(1)

L-ispeċifikazzjonijiet tekniċi u operazzjonali stabbiliti fl-Anness tad-Deċiżjoni ta' Implimentazzjoni tal-Kummissjoni (UE) 2017/224 (2) jipprevedu li l-ispeċifikazzjonijiet ġenerali tas-servizz “preċiżjoni għolja SK” ipprovdut mis-servizz kummerċjali jinkludu żball ta' pożizzjonament ta' inqas minn deċimetru u li l-aċċess għal dan is-servizz “preċiżjoni għolja SK”, ikkontrollat minn fornitur ta' servizzi wieħed jew aktar, isir bi ħlas skont il-politika tal-ipprezzar fis-seħħ.

(2)

Madankollu jidher li aċċess bi ħlas għas-servizz ta' preċiżjoni għolja tas-servizz kummerċjali huwa ta' natura li jostakola l-iżvilupp tal-applikazzjonijiet li jużaw dan is-servizz u li jfixkel, b'mod partikolari fi ħdan l-Unjoni, it-tkabbir promettenti tal-attivitajiet ekonomiċi bbażati fuq it-teknoloġija tar-radjunavigazzjoni bis-satellita. Jista' jkun ukoll ta' ostakolu għall-introduzzjoni tas-sistema stabbilita skont il-programm Galileo fis-swieq dinjija, meta jitqies li s-sistemi kompetituri jipproponu li joffru s-servizzi ta' preċiżjoni għolja bla ħlas.

(3)

Barra minn hekk, l-intrapriżi tas-setturi li qegħdin jiżviluppaw, li probabbilment huma dawk li se jużaw l-aktar is-servizz kummerċjali ta' preċiżjoni għolja, bħalma huma dawk attivi fil-qasam tal-vetturi awtonomi, tar-robotika jew tad-drones, ma għandhomx bżonn preċiżjoni ta' pożizzjonament daqshekk għolja bħal dik prevista inizjalment għas-servizz kummerċjali. Għal dawn l-intrapriżi hija biżżejjed preċiżjoni ta' inqas minn żewġ deċimetri, u huwa aktar interessanti għalihom li minflok jitnaqqas il-ħin meħtieġ biex tinkiseb din il-preċiżjoni. Għaldaqstant, teżisti korrelazzjoni pożittiva bejn il-preċiżjoni tal-pożizzjonament u l-ħin meħtieġ biex tinkiseb din il-preċiżjoni. Għalhekk it-tnaqqis tal-preċiżjoni minima minn deċimetru wieħed għal żewġ deċimetri, se jiġi akkumpanjat minn tnaqqis tal-ħin meħtieġ biex tinkiseb il-preċiżjoni, varjabbli skont it-teknoloġija użata u l-ambjent u l-lokalizzazzjoni tal-utent.

(4)

Barra minn hekk, l-utenti li għandhom bżonn servizz li jkollu żball ta' pożizzjonament inqas minn dak li jista' joffri s-servizz “preċiżjoni għolja SK”, dejjem jistgħu jiksbuh mingħand intrapriżi li, diġà jipproponu servizzi kummerċjali li għandhom preċiżjoni bħal din b'mod lokalizzat.

(5)

Jeħtieġ li jiġi speċifikat ukoll li l-għotja tas-servizz ta' preċiżjoni tas-servizz kummerċjali bla ħlas ma tippreġudikax il-fatt li servizzi oħrajn ipprovduti mis-sistema stabbilita skont il-programm Galileo jkunu bi ħlas.

(6)

Għalhekk, huwa xieraq li jiġi previst b'mod korrelattiv, minn naħa, li l-aċċess għas-servizz “preċiżjoni għolja SK” ipprovdut mis-servizz kummerċjali jkun bla ħlas u, min-naħa l-oħra, li l-ispeċifikazzjonijiet ġenerali ta' dan is-servizz “preċiżjoni għolja SK” jinkludu żball ta' pożizzjonament ta' inqas minn żewġ deċimetri.

(7)

Fl-aħħar nett, fir-rigward tal-użu tas-servizz “preċiżjoni għolja SK”, huwa importanti li jsiru xi emendi żgħar fl-isem taż-żewġ fażijiet previsti sabiex jirriflettu aħjar ir-realtà.

(8)

Għaldaqstant, jenħtieġ li d-Deċiżjoni ta' Implimentazzjoni (UE) 2017/224 tiġi emendata skont dan.

(9)

Il-miżuri previsti f'din id-Deċiżjoni huma skont l-opinjoni tal-kumitat stabbilit skont l-Artikolu 36(1) tar-Regolament (UE) Nru 1285/2013,

1)

Fir-ringiela bit-titlu “L-ispeċifikazzjonijiet ġenerali” u fil-kolonna bit-titlu “Preċiżjoni għolja SK”, it-test huwa sostitwit bit-test li ġej: “Il-forniment ta' dejta ta' preċiżjoni għolja sabiex jinkiseb żball tal-pożizzjonament ta' inqas minn żewġ deċimetri f'kundizzjonijiet normali ta' użu”;

2)

Fir-ringiela bit-titlu “L-aċċess għas-servizz” u fil-kolonna bit-titlu “Preċiżjoni għolja SK”, it-test huwa sostitwit bit-test li ġej: “- Aċċess bla ħlas”;

3)

Fir-ringiela bit-titlu “It-tnedija tas-servizz” u fil-kolonna bit-titlu “Preċiżjoni għolja SK”, il-kliem “Il-fażi tal-operazzjoni kummerċjali inizjali bejn l-2018 u l-2020 – Il-fażi tal-operazzjoni kummerċjali sħiħa mill-2020” huma sostiwiti bil-kliem “Il-fażi tal-forniment tas-sinjali inizjali bejn l-2018 u l-2020 - Il-fażi tal-prestazzjoni sħiħa tas-servizzi mill-2020”.