19.12.2017   

MT

Il-Ġurnal Uffiċjali tal-Unjoni Ewropea

L 338/1

(1)

Bir-Regolament (UE) 2016/1036 (2) il-Parlament Ewropew u l-Kunsill adottaw regoli komuni għall-protezzjoni kontra importazzjonijiet oġġett ta' dumping minn pajjiżi li mhumiex Stati Membri tal-Unjoni.

(2)

L-Artikolu 2(7) tar-Regolament (UE) 2016/1036 jikkostitwixxi l-bażi li fuqha jenħtieġ li jiġi determinat il-valur normali fil-każ ta' importazzjonijiet minn pajjiżi li mhumiex ekonomiji tas-suq. Bil-ħsieb ta' żviluppi fir-rigward ta' ċerti pajjiżi, huwa xieraq li l-valur normali jiġi determinat abbażi tar-Regolament (UE) 2016/1036 kif emendat minn dan ir-Regolament, b'effett mill-20 ta' Diċembru 2017. Fil-każ ta' pajjiżi li, fid-data tal-bidu ta' investigazzjoni, mhumiex Membri tal-Organizzazzjoni Dinjija tal-Kummerċ (WTO) u elenkati fl-Anness I tar-Regolament (UE) 2015/755 tal-Parlament Ewropew u tal-Kunsill (3), il-valur normali jenħtieġ li jiġi determinat skont metodoloġija speċifika fformulata għal dawk il-pajjiżi. Dan ir-Regolament hu mingħajr preġudizzju għad-determinazzjoni dwar jekk Membru tad-WTO huwiex ekonomija tas-suq jew għat-termini u l-kundizzjonijiet stabbiliti fil-protokolli u fi strumenti oħrajn li skonthom il-pajjiżi aderew mal-Ftehim ta' Marrakexx li Jistabbilixxi l-Organizzazzjoni Dinjija tal-Kummerċ li ntlaħaq fil-15 ta' April 1994 (4).

(3)

Fid-dawl tal-esperjenza miksuba fi proċedimenti tal-passat, huwa xieraq li jiġu ċċarati ċ-ċirkostanzi fejn id-distorsjonijiet sinifikanti li jaffettwaw b'mod konsiderevoli l-forzi tas-suq ħieles jistgħu jitqiesu li jeżistu. B'mod partikolari, huwa xieraq li jiġi ċċarat li dan huwa każ meta prezzijiet jew kostijiet irrappurtati, inklużi l-kostijiet ta' materji primi u ta' enerġija, ma jkunux ir-riżultat ta' forzi tas-suq ħieles għax huma affettwati minn intervent sostanzjali tal-gvern. Huwa wkoll xieraq li jiġi ċċarat li meta tkun valutata l-eżistenza ta' distorsjonijiet sinifikanti jenħtieġ li tingħata attenzjoni, inter alia, lill-impatt potenzjali ta' element wieħed jew aktar mis-segwenti: is-suq inkwistjoni huwa f'miżura sinifikanti servut minn intrapriżi li joperaw taħt is-sjieda, kontroll jew superviżjoni ta' politika jew gwida tal-awtoritajiet tal-pajjiż esportatur; il-preżenza tal-istat f'ditti li jippermettu lill-istat jinterferixxi fir-rigward tal-prezzijiet jew kostijiet; politiki jew miżuri pubbliċi li jiddiskriminaw favur fornituri domestiċi jew li b'mod ieħor jinfluwenzaw il-forzi tas-suq ħieles;in-nuqqas, l-applikazzjoni diskriminatorja jew l-infurzar inadegwat tal-liġijiet fil-qasam tal-fallimenti, dak soċjetarju jew dak tal-proprjetà; id-distorsjoni tal-kostijiet tal-pagi; l-aċċess għall-finanzi mogħtija minn istituzzjonijiet li jimplimentaw objettivi ta' ordni pubbliku jew li b'xi mod ieħor ma jaġixxux indipendentement mill-Istat.

(4)

Jenħtieġ li l-Kummissjoni tipproduċi, tippubblika u taġġorna regolarment ir-rapporti dwar distorsjonijiet sinifikanti, li jistgħu potenzjalment jirriżultaw f'investigazzjoni antidumping, li jiddeskrivu ċ-ċirkostanzi tas-suq relatati ma' dawk il-każijiet f'ċertu pajjiż jew f'ċertu settur. Tali rapporti u l-evidenza li fuqha huma bbażati jenħtieġ li jitqiegħdu fuq il-fajl ta' kull investigazzjoni relatata ma' dak il-pajjiż jew settur. F'tali investigazzjonijiet, il-partijiet interessati jenħtieġ li jkollhom biżżejjed opportunità biex jikkummentaw fuq ir-rapporti u l-evidenza li fuqha huma bbażati. Fil-valutazzjoni tal-eżistenza ta' distorsjonijiet sinifikanti, l-istandards internazzjonali rilevanti, fosthom il-konvenzjonijiet fundamentali tal-Organizzazzjoni Internazzjonali tax-Xogħol (ILO) u l-konvenzjonijiet ambjentali multilaterali rilevanti, jenħtieġ li jitqiesu, skont il-każ.

(5)

Il-kostijiet normalment jiġu kkalkulati fuq abbażi tar-rekords miżmuma mill-esportatur u produttur taħt investigazzjoni. Madankollu, fejn hemm distorsjonijiet diretti jew indiretti sinifikanti fil-pajjiż esportatur bil-konsegwenza li l-kostijiet riflessi fir-rekords tal-parti kkonċernata huma artifiċjalment baxxi, tali kostijiet jistgħu jiġu aġġustati jew stabbiliti fuq kull bażi raġonevoli, inkluża informazzjoni minn swieq rappreżentattivi oħrajn jew minn prezzijiet jew valuri ta' riferiment internazzjonali. Il-kostijiet domestiċi jistgħu wkoll jintużaw, iżda sal-punt biss li jkunu stabbiliti pożittivament biex ma jkunux soġġetti għal distorsjoni, fuq abbażi ta' evidenza preċiża u xierqa.

(6)

Meta d-data tinkiseb mill-pajjiżi rappreżentattivi u l-Kummissjoni jkollha tistabbilixxi jekk il-livell tal-protezzjoni soċjali u ambjentali f'tali pajjiżi huwiex adegwat, huwa neċessarju li l-Kummissjoni teżamina jekk dawk il-pajjiżi jirrispettawx il-konvenzjonijiet fundamentali tal-ILO u konvenzjonijiet ambjentali multilaterali rilevanti.

(7)

Meta parti mill-kostijiet għall-esportatur u produttur tkun distorta, inkluż fil-każijiet li fihom ċerta data tkun inkisbet minn sorsi differenti, dik il-parti tal-kostijiet jenħtieġ li tkun sostitwita minn kostijiet mhux distorti. Fid-dawl tal-esperjenza miksuba fi proċedimenti fil-passat,huwa xieraq li jiġi ċċarat ukoll li, għall-għanijiet tad-determinazzjoni tal-eżistenza ta' distorsjonijiet sinifikanti f'pajjiż terz, jenħtieġ li tiġi kkunsidrata kif dovut rigward l-evidenza kollha rilevanti rigward iċ-ċirkostanzi prevalenti fuq is-suq domestiku tal-esportaturi u produtturi minn dak il-pajjiż, li tpoġġiet fuq il-fajl, u li fuqha l-partijiet interessati kellhom opportunità jikkummentaw, inkluża opportunità għal dawk l-esportaturi u produtturi biex juru b'mod konklużiv li l-kostijiet domestiċi tagħhom huma mingħajr distorsjoni. Meta disponibbli, tali evidenza tinkludi rapporti rilevanti. L-indikazzjonijiet dwar l-eżistenza ta' distorsjonijiet sinifikanti jistgħu wkoll ikunu ppreżentati mill-partijiet ikkonċernati rilevanti kollha, inkluża l-industrija u t-trade unions tal-Unjoni. Tali indikazzjonijiet u l-bżonn li jkun evitat kwalunkwe piż addizzjonali għall-industrija tal-Unjoni, hija u tuża l-istrument antidumping, partikolarment fid-dawl tal-ispeċifiċitajiet ekonomiċi u kummerċjali tal-impriżi żgħar u ta' daqs medju, jenħtieġ li jitqiesu meta tittieħed id-deċiżjoni dwar it-tħejjija jew l-aġġornament tar-rapporti rilevanti.

(8)

Fir-rigward tal-metodoloġija użata fl-investigazzjoni oriġinali u li għandha tintuża fl-investigazzjoni ta' rieżami, japplika l-Artikolu 11(9) tar-Regolament (UE) 2016/1036. F'dak il-kuntest, huwa xieraq li jiġi ċċarat ukoll li, meta jiġi eżaminat jekk hemmx indikazzjoni li ċ-ċirkostanzi nbidlu, jenħtieġ li tiġi kkunsidrata kif dovut l-evidenza kollha rilevanti, inklużi rapporti rilevanti rigward iċ-ċirkostanzi prevalenti fis-suq domestiku tal-esportaturi u produtturi u l-evidenza li fuqha huma bbażati, li tpoġġiet fuq il-fajl, u li fuqha l-partijiet interessati kellhom opportunità jikkummentaw.

(9)

Fin-nuqqas ta' regoli tranżizzjonali speċifiċi oħrajn li jirregolaw il-kwistjoni, huwa xieraq li tiġi prevista l-applikazzjoni ta' dan ir-Regolament għad-deċiżjonijiet kollha dwar il-bidu ta' proċedimenti, u għall-proċedimenti kollha, inklużi l-investigazzjonijiet oriġinali u l-investigazzjonijiet ta' rieżami, mibdija, fl-20 ta' Diċembru 2017 jew wara dik id-data, soġġett għall-Artikolu 11(9) tar-Regolament (UE) 2016/1036. Barra minn hekk, permezz ta' regola tranżizzjonali speċifika għall-miżuri eżistenti, u wara li jkun ġie kkunsidrat in-nuqqas ta' xi regoli tranżizzjonali speċifiċi oħrajn li jirregolaw il-kwistjoni, fil-każ ta' tranżizzjoni minn valur normali kkalkulat skont l-Artikolu 2(7) tar-Regolament (UE) 2016/1036 għal valur normali kkalkulat skont il-metodoloġija stabbilita fir-Regolament (UE) 2016/1036 kif emendat minn dan ir-Regolament, il-metodoloġija oriġinali jenħtieġ li tkompli tapplika sa meta jinbeda l-ewwel rieżami ta' skadenza wara tali tranżizzjoni. Bil-ħsieb ta' tnaqqis tar-riskju ta' ċirkomvenzjoni tad-dispożizzjonijiet ta' dan ir-Regolament, l-istess approċċ jenħtieġ li japplika fir-rigward tar-rieżamijiet imwettqa skont l-Artikolu 11(4) tar-Regolament (UE) 2016/1036. Huwa xieraq ukoll li jiġi mfakkar li tranżizzjoni minn valur normali kkalkulat skont l-Artikolu 2(7) għal valur normali kkalkulat skont il-metodoloġija stabbilita fir-Regolament (UE) 2016/1036 kif emendat minn dan ir-Regolament minnha nnifisha ma tikkostitwixxix biżżejjed evidenza fis-sens tal-Artikolu 11(3) tar-Regolament (UE) 2016/1036. Jenħtieġ li tali regoli tranżizzjonali ineħħu lacuna li tista' toħloq inċertezza tad-dritt, jipprovdu opportunità raġonevoli biex il-partijiet interessati jkunu jistgħu jadattaw ruħhom għall-iskadenza ta' regoli antiki u għad-dħul fis-seħħ tar-regoli l-ġodda, u jiffaċilitaw l-amministrazzjoni effiċjenti, ordnata u ekwa tar-Regolament (UE) 2016/1036.

(10)

Bir-Regolament (UE) 2016/1037 (5), il-Parlament Ewropew u l-Kunsill adottaw regoli komuni għall-protezzjoni kontra importazzjonijiet sussidjati minn pajjiżi li mhumiex Stati Membri tal-Unjoni. L-esperjenza wriet li l-entità reali tas-sussidji ġeneralment tiġi skoperta matul l-investigazzjoni rilevanti. B'mod partikolari, l-esportaturi investigati frekwentement jinsabu li jibbenefikaw minn sussidji li l-eżistenza tagħhom ma setgħetx tkun magħrufa raġonevolment qabel ma ssir l-investigazzjoni. Huwa xieraq li jiġi ċċarat li, meta tali sussidji jinstabu matul xi investigazzjoni jew rieżami partikolari, il-Kummissjoni jenħtieġ li toffri konsultazzjonijiet addizzjonali lill-pajjiż tal-oriġini u/jew tal-esportazzjoni kkonċernat fir-rigward ta' tali sussidji identifikati matul l-investigazzjoni. Fin-nuqqas ta' regoli tranżizzjonali speċifiċi oħrajn li jirregolaw il-kwistjoni, huwa xieraq li tiġi prevista l-applikazzjoni ta' dan ir-Regolament għad-deċiżjonijiet kollha dwar il-bidu ta' proċedimenti, u għall-proċedimenti kollha, inklużi l-investigazzjonijiet oriġinali u l-investigazzjonijiet ta' rieżami, mibdija, fl-20 ta' Diċembru 2017 jew wara dik id-data.

(11)

Għalhekk jenħtieġ li r-Regolament (UE) 2016/1036 u r-Regolament (UE) 2016/1037 jiġu emendati skont dan,

(1)

Fl-Artikolu 2, jiddaħħal il-paragrafu li ġej:

(2)

Fl-Artikolu 2, il-paragrafu 7 huwa sostitwit b'dan li ġej:

“7.   Fil-każ ta' importazzjonijiet minn pajjiżi li, fid-data tal-bidu tal-investigazzjoni, mhumiex membri tad-WTO u elenkati fl-Anness I tar-Regolament (UE) 2015/755 tal-Parlament Ewropew u tal-Kunsill (*1), il-valur normali għandu jiġi ddeterminat abbażi tal-prezz jew valur maħdum f'pajjiż rappreżentattiv xieraq, jew il-prezz minn tali pajjiż terz għal pajjiżi oħrajn, inkluża l-Unjoni, jew fejn dawk mhumiex possibbli, fuq kull bażi raġonevoli oħra, inkluż il-prezz imħallas realment jew pagabbli fl-Unjoni għall-prodott simili, aġġustat kif xieraq jekk neċessarju biex jinkludi marġni tal-profitt raġonevoli.

Il-pajjiż rappreżentattiv xieraq għandu jiġi magħżul b'mod raġonevoli, filwaqt li titqies kull informazzjoni kredibbli disponibbli fiż-żmien tal-għażla, u b'mod partikolari, l-kooperazzjoni minn tal-anqas esportatur u produttur wieħed f'dak il-pajjiż. F'każ li jkun tali pajjiżi jkunu aktar minn wieħed, għandha tingħata preferenza, meta jkun il-każ, lill-pajjiżi li għandhom livell adegwat ta' protezzjoni soċjali u ambjentali. Għandhom jitqiesu wkoll il-limiti taż-żmien. Fejn xieraq, għandu jintuża pajjiż rappreżentant xieraq li huwa soġġett għall-istess investigazzjoni.

Il-partijiet għall-investigazzjoni għandhom jiġu infurmati fil-pront wara l-bidu tagħha dwar il-pajjiż previst u għandhom jingħataw għaxart (10) ijiem biex jikkummentaw.

(*1)  Ir-Regolament (UE) 2015/755 tal-Parlament Ewropew u tal-Kunsill tad-29 ta' April 2015 dwar regoli komuni għall-importazzjonijiet minn ċerti pajjiżi terzi (ĠU L 123, 19.5.2015, p. 33).”"

(3)

Fl-Artikolu 11(3), jiżdied is-subparagrafu li ġej:

“Fejn il-miżuri antidumping eżistenti huma bbażati fuq valur normali kkalkulat skont l-Artikolu 2(7) kif kien fis-seħħ fid-19 ta' Diċembru 2017, il-metodoloġija stabbilita fl-Artikolu 2(1) sa (6a) għandha tissostitwixxi l-metodoloġija oriġinali użata għad-determinazzjoni tal-valur normali biss mid-data meta jinbeda l-ewwel rieżami ta' skadenza ta' dawk il-miżuri, wara d-19 ta' Diċembru 2017. Skont l-Artikolu 11(2), dawk il-miżuri għandhom jibqgħu fis-seħħ sakemm jibqa' pendenti l-eżitu tar-rieżami.”

(4)

Fl-Artikolu 11(4), jiżdied is-subparagrafu li ġej:

“Meta l-miżuri antidumping eżistenti huma bbażati fuq valur normali kkalkulat skont l-Artikolu 2(7) kif kien fis-seħħ fid-19 ta' Diċembru 2017, il-metodoloġija stabbilita fl-Artikolu 2(1) sa (6a) għandha tissostitwixxi l-metodoloġija oriġinali użata għad-determinazzjoni tal-valur normali biss wara d-data li fiha jinbeda l-ewwel rieżami ta' skadenza ta' tali miżuri, wara l-20 ta' Diċembru 2017. Skont l-Artikolu 11(2), dawk il- miżuri għandhom jibqgħu fis-seħħ sakemm jibqa' pendenti l-eżitu tar-rieżami.”;

(5)

Fl-Artikolu 11(9), jiżdied is-subparagrafu li ġej:

“Fir-rigward taċ-ċirkostanzi rilevanti għad-determinazzjoni tal-valur normali skont l-Artikolu 2, għandha tiġi kkunsidrata kif dovut l-evidenza kollha rilevanti, inklużi r-rapporti rilevanti rigward iċ-ċirkostanzi prevalenti fuq is-suq domestiku tal-esportaturi u produtturi u l-evidenza li fuqha huma bbażati, li tpoġġiet fuq il-fajl, u li fuqha l-partijiet interessati kellhom opportunità jikkummentaw.”;

(6)

L-Artikolu 23 huwa sostitwit b'dan li ġej:

“Artikolu 23

Rapport u informazzjoni

1.   Il-Kummissjoni, b'rispett dovut għall-protezzjoni tal-informazzjoni kunfidenzjali fis-sens tal-Artikolu 19, għandha tippreżenta rapport annwali lill-Parlament Ewropew u lill-Kunsill dwar l-applikazzjoni u l-implimentazzjoni ta' dan ir-Regolament. Ir-rapport għandu jinkludi informazzjoni dwar l-applikazzjoni ta' miżuri provviżorji u definittivi, it-terminazzjoni ta' investigazzjonijiet mingħajr miżuri, investigazzjonijiet mill-ġdid, rieżamijiet, distorsjonijiet sinifikanti u żjarat ta' verifika, u l-attivitajiet tad-diversi korpi responsabbli mill-monitoraġġ tal-implimentazzjoni ta' dan ir-Regolament u s-sodisfazzjon tal-obbligi derivati minnu.

2.   Il-Parlament Ewropew jista' jistieden lill-Kummissjoni għal laqgħa ad hoc tal-kumitat reponsabbli tiegħu biex tippreżenta u tispjega kwalunkwe kwistjoni relatata mal-implimentazzjoni tar-Regolament. Barra minn hekk, jista', inter alia abbażi tar-rapport skont il-paragrafu 1 u l-preżentazzjoni u l-ispjegazzjonijiet imsemmija f'dan il-paragrafu, jikkomunika kwalunkwe kunsiderazzjoni u fatt rilevanti lill-Kummissjoni.

3.   Mhux aktar tard minn sitt xhur wara l-preżentazzjoni tar-rapport lill-Parlament Ewropew u lill-Kunsill, il-Kummissjoni għandha tagħmel ir-rapport pubbliku.”.