21.7.2017   

MT

Il-Ġurnal Uffiċjali tal-Unjoni Ewropea

L 190/5

(1)

Il-Kroazja aderixxiet mal-Unjoni Ewropea fl-1 ta' Lulju 2013.

(2)

Fid-dawl tal-adeżjoni tagħha mal-Unjoni Ewropea fl-1 ta' Lulju 2013, il-Kroazja talbet li l-lista nazzjonali ta' varjetajiet ta' għeneb tal-inbid rikonoxxuti tiddaħħal fil-lista ta' varjetajiet ta' għeneb tal-inbid li jinkludu indikazzjoni ġeografika u li jistgħu jidhru fuq it-tikkettar tal-inbejjed, li tinsab fl-Anness II tar-Regolament tal-Kummissjoni (KE) Nru 753/2002 (2) u li bħalissa qed tidher fl-Anness XV tar-Regolament tal-Kummissjoni (KE) Nru 607/2009 (3). Skont ir-Regolament (KE) Nru 1234/2007 tal-Parlament Ewropew u tal-Kunsill (4), il-Kummissjoni indikat lill-Kroazja li l-lista nazzjonali tal-varjetajiet m'għandhiex tiġi approvata fil-livell tal-Unjoni u li kull Stat Membru jiddeċiedi dwar il-lista tiegħu stess. Il-Kummissjoni indikat ukoll lill-Kroazja li, skont il-prattika segwita f'adeżjonijiet preċedenti u b'mod partikolari r-Regolament tal-Kummissjoni (KE) Nru 1429/2004 (5) li jemenda l-Anness II tar-Regolament (KE) Nru 753/2002, l-inklużjoni ta' ismijiet ta' varjetajiet ta' għeneb tal-inbid Kroati fil-lista tal-Anness XV tar-Regolament (KE) Nru 607/2009 issir wara l-adeżjoni. Abbażi ta' din l-informazzjoni, il-Kroazja rtirat din it-talba mill-pożizzjoni ta' negozjar tagħha.

(3)

L-Anness XV tar-Regolament (KE) Nru 607/2009 ġie emendat mir-Regolament tal-Kummissjoni (UE) Nru 753/2013 (6) biex jiddaħħlu b'mod partikolari l-ismijiet tal-varjetajiet ta' għeneb tal-inbid użati tradizzjonalment għall-kummerċjalizzazzjoni tal-inbejjed prodotti fit-territorju Kroat li fihom jew jikkonsistu minn denominazzjoni ta' oriġini protetta jew indikazzjoni ġeografika protetta fl-Unjoni sabiex ikunu jistgħu jkomplu jidhru fuq it-tikketta ta' nbejjed Kroati li jibbenefikaw minn denominazzjoni tal-oriġini protetta jew minn indikazzjoni ġeografika protetta. Minħabba s-sensittività tal-kwistjoni għas-Slovenja, l-isem tal-varjetà ta' għeneb tal-inbid “Teran”, omonimu tad-denominazzjoni tal-oriġini protetta Slovena “Teran” (PDO-SI-A1581), ma ġiex inkluż f'dan ir-Regolament sakemm ikun hemm il-pożizzjoni nnegozjata bejn il-Kroazja u s-Slovenja.

(4)

Il-Kroazja llimitat it-talba tagħha għall-użu tal-isem tal-varjetà ta' għeneb tal-inbid “Teran” għall-inbejjed bid-denominazzjoni tal-oriġini protetta “Hrvatska Istra” (PDO-HR-A1652). Minkejja l-limitazzjoni territorjali tal-awtorizzazzjoni mitluba u l-ħidma kontinwa tal-Kummissjoni, kien impossibbli li tinstab soluzzjoni ta' kompromess bejn il-Kroazja u s-Slovenja.

(5)

Billi, minkejja d-diversi tentattivi min-naħa tal-Kummissjoni, ma kinitx instabet soluzzjoni negozjata, biex jiġu rrikonċiljati l-pożizzjonijiet tal-Krazja u tas-Slovenja, u wara li saret il-verifika tal-informazzjoni disponibbli għall-Kummissjoni dwar il-prattika ta' tikkettar eżistenti fir-rigward tal-varjetà ta' għeneb tal-inbid “Teran”, jenħtieġ li jitniżżel l-isem ta' dik il-varjetà fil-Parti A tal-Anness XV tar-Regolament (KE) Nru 607/2009 fir-rigward tad-denominazzjoni tal-oriġini protetta “Hrvatska Istra”.

(6)

Madankollu, minħabba t-tħassib imressaq mis-Slovenja dwar ir-riskju allegat li l-konsumatur jiġi mqarraq u bil-għan li tinstab soluzzjoni li tissodisfa l-produtturi kollha kkonċernati u bl-appoġġ tal-Istati Membri kkonċernati, il-Kummissjoni tqis li huwa xieraq li tispeċifika l-kundizzjonijiet li bihom l-isem tal-varjetà “Teran” jista' jidher fuq it-tikkettar tal-prodotti li jibbenefikaw minn din id-denominazzjoni tal-oriġini, filwaqt li jitqiesu l-kundizzjonijiet li l-Kroazja biħsiebha timponi hija stess fuq il-produtturi tagħha.

(7)

Għalhekk, ir-Regolament (KE) Nru 607/2009 jenħtieġ li jiġi emendat skont dan.

(8)

Jenħtieġ li l-inklużjoni tal-Kroazja fil-Parti A tal-Anness XV tar-Regolament (KE) Nru 607/2009 rigward l-użu tal-isem tal-varjetà ta' għeneb tal-inbid “Teran” tieħu effett fid-data tal-adeżjoni tagħha, fl-1 ta' Lulju 2013, minħabba li t-talba tal-Kroazja ġiet ippreżentata qabel din id-data, l-użu tradizzjonali tal-isem “Teran” bħala varjetà ta' għeneb tal-inbid għall-kummerċjalizzazzjoni tal-inbejjed prodotti fit-territorju tal-Kroazja kienet il-prattika eżistenti fil-mument tal-adeżjoni u minħabba li l-adozzjoni ta' dan ir-Regolament ġiet posposta unikament sakemm ikun hemm soluzzjoni nnegozjata. Għall-istess raġunijiet, jenħtieġ li jkun hemm dispożizzjoni tranżitorja li tikkonċerna l-inbejjed prodotti qabel id-dħul fis-seħħ ta' dan ir-Regolament,