(1)

L-Artikolu 13(1) tar-Regolament (KE) Nru 1967/2006 jipprojbixxi l-użu ta' tagħmir irmunkat sa tliet mili nawtiċi mill-kosta jew sa livell ta' fond ta' 50 m meta dak il-fond jintlaħaq 'il ġewwa minn dik id-distanza mill-kosta.

(2)

Meta xi Stat Membru jitlobha, il-Kummissjoni tista' tippermetti deroga mill-Artikolu 13(1) tar-Regolament (KE) Nru 1967/2006, diment li jintlaħqu għadd ta' kundizzjonijiet stabbiliti fl-Artikolu 13(5) u (9).

(3)

Fit-2 ta' Ġunju 2016,il-Kummissjoni rċeviet talba mill-Greċja għal deroga mill-ewwel subparagrafu tal-Artikolu 13(1) tar-Regolament (KE) Nru 1967/2006 rigward l-użu tat-tartarun tradizzjonali għas-sajd tal-karamella (Spicara smaris) u l-vopa (Boops boops) fl-ibħra territorjali tal-Greċja.

(4)

It-talba għandha x'taqsam mal-attivitajiet tas-sajd diġà awtorizzati mill-Greċja u tkopri bastimenti li għandhom esperjenza vasta fis-sajd ta' aktar minn ħames snin u joperaw skont pjan ta' ġestjoni adottat mill-Greċja.

(5)

F'Settembru 2016, il-Kumitat Xjentifiku, Tekniku u Ekonomiku għas-Sajd (STECF) ivvaluta d-deroga li talbet il-Greċja u l-abbozz relatat tal-pjan ta' ġestjoni.

(6)

Fid-29 ta' Diċembru 2016, il-Greċja adottat il-pjan ta' ġestjoni permezz ta' Deċiżjoni Ministerjali (6719/146097/29-12-2016) skont l-Artikolu 19(2) tar-Regolament (KE) Nru 1967/2006 (minn hawn 'il quddiem imsejjaħ “il-pjan ta' ġestjoni Grieg”).

(7)

Id-deroga li talbet il-Greċja hi konformi mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006.

(8)

B'mod partikolari, hemm limitazzjonijiet ġeografiċi speċifiċi meta wieħed iqis l-istruttura morfoloġika distinta tal-Greċja, magħmula minn diversi gżejjer mifruxa fuq diversi Ibħra, u d-distribuzzjoni spazjali tal-ispeċijiet fil-mira, li hija limitata esklussivament f'ċerti siti speċifiċi u f'żoni kostali f'fond ta' anqas minn 50 metru. Għalhekk, il-postijiet għas-sajd huma limitati.

(9)

Is-sajd ma jistax isir b'tagħmir ieħor, peress li t-tartaruni biss għandhom il-karatteristika teknika meħtieġa biex jiwettaq dan it-tip ta' sajd.

(10)

Barra minn hekk, is-sajd ma jħalli ebda impatt sinifikanti fuq l-ambjent tal-baħar, minħabba li t-tartaruni huma tagħmir selettivi ferm li ma jmissux ma qiegħ il-baħar u ma jistgħux joperaw fuq il-Posidonia oceanica f'qiegħ il-baħar.

(11)

It-talba tkopri lista ta' 244 bastiment elenkati fl-Anness 5 tal-pjan ta' ġestjoni li jirregola l-operat tat-tartaruni tradizzjonali fl-ibħra tal-Greċja. Għalhekk, id-deroga mitluba mill-Greċja taffettwa għadd limitat ta' bastimenti, meta mqabbel maż-żona tad-distribuzzjoni kbira tal-flotta tat-tartaruni, li tirrappreżenta madwar 1,5 fil-mija tal-flotta tas-sajd Griega kollha u 1 697,72 tunnellaġġ gross (GT).

(12)

Dawk il-bastimenti jinsabu f'lista li ntbagħtet lill-Kummissjoni f'konformità mal-Artikolu 13(9) tar-Regolament (KE) Nru 1967/2006.

(13)

Id-Deċiżjoni Ministerjali tal-Greċja u l-pjan ta' ġestjoni jiggarantixxu li ma jkun hemm ebda żieda oħra tal-isforz tas-sajd f'konformità mal-Artikolu 13(9) tar-Regolament (KE) Nru 1967/2006.

(14)

L-attivitajiet tas-sajd ikkonċernati jissodisfaw ir-rekwiżiti tal-ewwel subparagrafu tal-Artikolu 4(1) tar-Regolament (KE) Nru 1967/2006 li jipprojbixxi s-sajd fuq dawk il-ħabitati. Tabilħaqq li t-tartaruni jiġu rmonkati fil-kolonna tal-ilma u ma jmissux qiegħ il-baħar. Barra minn hekk, l-immappjar komplut tal-Posidonia oceanica f'qiegħ il-baħar fl-ibħra territorjali tal-Greċja, jiikkontribwixxi għall-protezzjoni tal-Posidonia oceanica.

(15)

Ir-rekwiżiti tal-Artikolu 8(1)(h) tar-Regolament (KE) Nru 1967/2006 mhumiex applikabbli għax dawn għandhom x'jaqsmu mal-bastimenti tat-tkarkir.

(16)

Dwar ir-rekwiżit ta' konformità mal-Artikolu 9(3) li jistabbilixxi d-daqs minimu tal-malja, il-Kummissjoni tinnota li billi l-attivitajiet tas-sajd ikkonċernati huma selettivi ferm, għandhom effett negliġibbli fuq l-ambjent tal-baħar u mhumiex affettwati mid-dispożizzjonijiet tal-Artikolu 4(5), f'konformità mal-Artikolu 9(7) tar-Regolament (KE) Nru 1967/2006, il-Greċja awtorizzat deroga minn dawn id-dispożizzjonijiet fil-pjan ta' ġestjoni tagħha.

(17)

L-attivitajiet tas-sajd ikkonċernati jitwettqu f'distanza qasira ħafna mill-kosta u għaldaqstant ma jostakolawx l-attivitajiet ta' bastimenti oħra.

(18)

Il-pjan ta' ġestjoni jiggarantixxi li l-qabdiet tal-ispeċijiet imsemmija fl-Anness III tar-Regolament (KE) Nru 1967/2006 ikunu minimi minħabba li l-ispeċijiet fil-mira huma l-karamella (Spicara smaris) u l-vopa (Boops boops), li mhumiex imsemmija fl-Anness III tar-Regolament (KE) Nru 1967/2006, u l-attivitajiet tas-sajd huma selettivi ferm.

(19)

L-attivitajiet tas-sajd huma selettivi ferm u ma jimmirawx iċ-ċefalopodi.

(20)

Il-pjan ta' ġestjoni fih miżuri għall-monitoraġġ tal-attivitajiet tas-sajd, u b'hekk jissodisfa l-kundizzjonijiet stabbiliti fl-Artikolu 14 tar-Regolament tal-Kunsill (KE) Nru 1224/2009 (2).

(21)

Il-pjan ta' ġestjoni Grieg fih miżuri għall-monitoraġġ tal-attivitajiet tas-sajd, kif previst fit-tielet subparagrafu tal-Artikolu 13(9) tar-Regolament (KE) Nru 1967/2006.

(22)

B'hekk, fi żmien xieraq għandha tingħata d-deroga mitluba.

(23)

Il-Greċja għandha tirrapporta lill-Kummissjoni f'intervalli regolari u skont il-pjan ta' monitoraġġ previst fil-pjan ta' ġestjoni Grieg.

(24)

Jekk it-tul tad-deroga jkun limitat, ikunu jistgħu jiġu żgurati miżuri ta' ġestjoni korrettivi fil-pront, f'każ li r-rapport lill-Kummissjoni juri li l-istatus tal-konservazzjoni tal-istokkijiet sfruttati huwa dgħajjef, filwaqt li jkun hemm l-opportunità biex il-bażi xjentifika tissaħħaħ biex ikun jista' jitfassal pjan ta' ġestjoni aħjar.

(25)

Il-miżuri previsti f'dan ir-Regolament huma skont l-opinjoni tal-Kumitat għas-Sajd u l-Akkwakultura,