11.7.2017 |
MT |
Il-Ġurnal Uffiċjali tal-Unjoni Ewropea |
L 178/15 |
DEĊIŻJONI TAL-KUMMISSJONI (UE) 2017/1246
tas-7 ta' Ġunju 2017
li tapprova l-iskema ta' riżoluzzjoni għall-Banco Popular Español S.A.
(notifikata bid-dokument C(2017) 4038)
(It-test bl-Ingliż biss huwa awtentiku)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 806/2014 tal-Parlament Ewropew u tal-Kunsill tal-15 ta' Lulju 2014 li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta' kreditu u ċerti ditti tal-investiment fil-qafas ta' Mekkaniżmu Uniku ta' Riżoluzzjoni u Fond Uniku għar-Riżoluzzjoni u li jemenda r-Regolament (UE) Nru 1093/2010 (1), u b'mod partikolari t-tieni subparagrafu tal-Artikolu 18(7) tiegħu,
Billi:
(1) |
Fis-7 ta' Ġunju 2017 fil-05:13 il-Bord Uniku ta' Riżoluzzjoni (SRB) ittrażmetta skema ta' riżoluzzjoni għall-Banco Popular Español S.A. lill-Kummissjoni skont l-Artikolu 18(7) tar-Regolament (UE) Nru 806/2014. |
(2) |
Fl-iskema ta' riżoluzzjoni, l-SRB jiddikjara li l-kundizzjonijiet kollha għar-riżoluzzjoni stipulati fl-ewwel subparagrafu tal-Artikolu 18(1) tar-Regolament (UE) Nru 806/2014 huma rispettati mill-Banco Popular Español S.A. u jevalwa għaliex hemm bżonn azzjoni ta' riżoluzzjoni fl-interess pubbliku. |
(3) |
L-iskema ta' riżoluzzjoni, skont l-Artikolu 18(6) tar-Regolament (UE) Nru 806/2014, tqiegħed lill-Banco Popular Español S.A. taħt riżoluzzjoni u tiddetermina l-applikazzjoni tal-bejgħ ta' għodda ta' negozju lill-istituzzjoni taħt riżoluzzjoni. L-iskema ta' riżoluzzjoni tipprovdi wkoll ir-raġunijiet li minħabba fihom dawk l-elementi huma adegwati. |
(4) |
Il-Kummissjoni taqbel mal-iskema ta' riżoluzzjoni. B'mod partikulari taqbel mar-raġunijiet mogħtiija mill-SRB li minħabba fihom hi neċessarja r-riżoluzzjoni fl-interess pubbliku skont l-Artikolu 5 tar-Regolament (UE) Nru 806/2014. |
(5) |
L-iskema ta' riżoluzzjoni kif ippreżentata mill-SRB għandha għaldaqstant tiġi approvata, |
ADOTTAT DIN ID-DEĊIŻJONI:
Artikolu 1
L-iskema ta' riżoluzzjoni għall-Banco Popular Español S.A. hija approvata.
Artikolu 2
Din id-Deċiżjoni hija indirizzata lill-Bord Uniku ta' Riżoluzzjoni.
Magħmul fi Brussell, is-7 ta' Ġunju 2017.
Għall-Kummissjoni
Valdis DOMBROVSKIS
Viċi President
(1) ĠU L 225, 30.7.2014, p. 1.