REGOLAMENT DELEGAT TAL-KUMMISSJONI (UE) 2016/2251

tal-4 ta' Ottubru 2016

li jissupplimenta r-Regolament (UE) Nru 648/2012 tal-Parlament Ewropew u tal-Kunsill dwar derivati OTC, kontropartijiet ċentrali u repożitorji tad-data dwar it-tranżazzjonijiet rigward standards tekniċi regolatorji għal tekniki tal-mitigazzjoni tar-riskju għall-kuntratti tad-derivattivi OTC mhux ikklirjati minn kontroparti ċentrali

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 648/2012 tal-Parlament Ewropew u tal-Kunsill tal-4 ta' Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet (1), u b'mod partikolari l-Artikolu 11(15) tiegħu,

Billi:

(1)

Il-kontropartijiet għandhom obbligu li jipproteġu lilhom infushom kontra skoperturi ta' kreditu għal kontropartijiet tad-derivattivi bil-ġbir ta' marġnijiet meta dawn il-kuntratti ma jiġux ikklirjati minn kontroparti ċentrali. Ir-Regolament jistabbilixxi standards għall-iskambju ta' kollateral f'waqtu, preċiż u ssegregat b'mod xieraq. Dawn l-istandards jinħtieġ li japplikaw fuq bażi mandatorja għall-kollateral li l-kontropartijiet huma meħtieġa jiġbru jew jibagħtu skont dan ir-Regolament. Madankollu, il-kontropartijiet li jaqblu li jiġbru jew jibagħtu kollateral lil hinn mir-rekwiżiti ta' dan ir-Regolament jinħtieġ li jkunu kapaċi jagħżlu jekk jiskambjawx jew le dan il-kollateral konformi ma' dawn l-istandards.

(2)

Il-kontropartijiet soġġetti għar-rekwiżiti tal-Artikolu 11(3) tar-Regolament (UE) Nru 648/2012 jinħtieġ li jikkunsidraw il-profili tar-riskju differenti tal-kontropartijiet mhux finanzjarji li huma taħt il-livell limitu tal-kklirjar imsemmi fl-Artikolu 10 ta' dan ir-Regolament meta jistabbilixxu l-proċeduri tal-immaniġġar tar-riskju tagħhom għall-kuntratti tad-derivattivi barra l-Borża (over-the-counter, “OTC”) konklużi ma' dawn l-entitajiet. Għaldaqstant huwa xieraq li l-kontropartijiet jitħallew jiddeterminaw jekk il-livell tar-riskju ta' kreditu tal-kontroparti li jinħoloq minn dawn il-kontropartijiet mhux finanzjarji li huma taħt dan il-livell limitu tal-ikklirjar jeħtieġx li jiġi mitigat permezz tal-iskambju ta' kollateral. Billi wieħed jista' jassumi li l-kontropartijiet mhux finanzjarji stabbiliti f'pajjiż terz li jistgħu jkunu taħt il-livell limitu tal-ikklirjar jekk stabbiliti fl-Unjoni għandhom l-istess profili ta' riskju bħall-kontropartijiet mhux finanzjarji taħt il-livell limitu tal-ikklirjar stabbiliti fl-Unjoni, l-istess approċċ jinħtieġ li jiġi applikat għaż-żewġ tipi ta' entitajiet sabiex jiġi evitat l-arbitraġġ regolatorju.

(3)

Il-kontropartijiet għall-kuntratti tad-derivattivi OTC ikklirjati mhux ċentralment għandhom bżonn li jiġu protetti mir-riskju ta' inadempjenza potenzjali tal-kontroparti l-oħra. Għaldaqstant, huma meħtieġa żewġ tipi ta' kollateral fil-forma ta' marġnijiet biex jiġu mmaniġġati kif suppost ir-riskji li għalihom dawn il-kontropartijiet jiġu esposti. L-ewwel tip huwa marġni ta' varjazzjoni, li jipproteġi l-kontropartijiet kontra skoperturi relatati mal-valur attwali tas-suq tal-kuntratt tad-derivattivi OTC tagħhom. It-tieni tip huwa marġni inizjali, li jipproteġi l-kontropartijiet kontra telf potenzjali li jista' joriġina minn movimenti fil-valur tas-suq tal-pożizzjoni tad-derivattivi li jseħħ bejn l-aħħar skambju tal-marġni ta' varjazzjoni qabel l-inadempjenza ta' kontroparti u l-ħin li fih il-kuntratti tad-derivattivi OTC jiġu sostitwiti jew li fih ir-riskju korrispondenti jiġi ħħeġġjat.

(4)

Billi l-kontropartijiet ċentrali (central counterparties, “CCPs”) jistgħu jkunu awtorizzati bħala istituzzjoni ta' kreditu skont il-leġiżlazzjoni tal-Unjoni, jeħtieġ li jiġu esklużi l-kuntratti tad-derivattivi OTC ikklirjati mhux ċentralment li jidħlu fihom is-CCPs waqt proċess ta' mmaniġġar ta' inadempjenza mir-rekwiżiti ta' dan ir-Regolament billi dawn il-kuntratti jkunu diġa soġġetti għad-dispożizzjonijiet tar-Regolament Delegat tal-Kummissjoni (UE) Nru 153/2013 (2) u għaldaqstant mhumiex soġġetti għad-dispożizzjonijiet ta' dan ir-Regolament.

(5)

Għal kuntratti tad-derivattivi OTC ikklirjati mhux ċentralment li jinvolvu l-ħlas ta' primjum minn qabel biex tiġi garantita l-prestazzjoni tal-kuntratt, il-kontroparti li tirċievi l-ħlas tal-primjum (il-“bejjiegħ ta' għażliet”) ma jkollhiex skopertura attwali jew potenzjalment futura għall-kontroparti. Barra dan, il-valwazzjoni ta' kuljum skont is-suq ta' dawn il-kuntratti hija diġà koperta mill-ħlas tal-primjum. Għaldaqstant, meta s-sett tan-nettjar stabbilit jikkonsisti minn dawn il-pożizzjonijiet ta' għażla, il-bejjiegħ ta' għażliet jinħtieġ li jkun f'pożizzjoni li jagħżel li ma jiġborx marġnijiet inizjali jew ta' varjazzjoni għal dawn it-tipi ta' derivattivi OTC sakemm il-bejjiegħ ta' għażliet ma jkun espost għall-ebda riskju ta' kreditu. Il-kontroparti li tħallas il-primjum (ix-“xerrej ta' għażliet”), madankollu, jinħtieġ li tiġbor kemm il-marġnijiet inizjali kif ukoll dawk ta' varjazzjoni.

(6)

Waqt li l-proċessi tas-soluzzjoni tat-tilwim inklużi fil-ftehimiet bilaterali bejn kontropartijiet huma utli għall-minimizzazzjoni tat-tul u l-frekwenza tat-tilwim, jinħtieġ li l-kontropartijiet, fl-ewwel istanza, jiġbru tal-inqas l-ammont mhux disputat f'każ li jkun hemm dubju dwar l-ammont ta' eżerċitazzjoni ta' marġni. Dan inaqqas ir-riskju li jinħoloq mit-tranżazzjonijiet li dwarhom ikun hemm tilwim u għaldaqstant jiġi żgurat li l-kuntratti tad-derivattivi OTC ikklirjati mhux ċentralment jiġu kkollateralizzati sa fejn dan ikun possibbli.

(7)

Sabiex jiġu ggarantiti kundizzjonijiet ekwi fil-ġuriżdizzjonijiet kollha, meta kontroparti stabbilita fl-Unjoni tidħol f'kuntratt tad-derivattivi OTC ikklirjati mhux ċentralment ma' kontroparti stabbilita f'pajjiż terz, jinħtieġ li l-marġnijiet inizjali u ta' varjazzjoni jiġu skambjati fiż-żewġ direzzjonijiet. Jinħtieġ li l-kontropartijiet stabbiliti fl-Unjoni li jagħmlu tranżazzjonijiet ma' kontropartijiet stabbiliti f'pajjiżi terzi jibqgħu soġġetti għall-obbligi tal-valutazzjoni tal-infurzabbiltà ġuridika tal-ftehimiet bilaterali u l-effikaċja tal-ftehimiet ta' segregazzjoni.

(8)

Huwa xieraq li l-kontropartijiet jitħallew japplikaw ammont ta' trasferiment minimu meta jiskambjaw kollateral sabiex jitnaqqas il-piż operazzjonali tal-iskambju ta' somom limitati meta l-iskoperturi jimxu ftit biss. Madankollu, jinħtieġ li jiġi żgurat li dan l-ammont ta' trasferiment minimu jintuża bħala għodda operazzjonali u mhux bil-għan li jservi bħala linja ta' kreditu mhux kollateralizzat bejn il-kontropartijiet. Għaldaqstant, jinħtieġ li jiġi stabbilit livell massimu għal dak l-ammont ta' trasferiment minimu.

(9)

Għal raġunijiet operazzjonali, f'xi każijiet jista' jkun iktar xieraq li jkun hemm ammonti ta' trasferiment minimu separati għall marġni inizjali u tal-varjazzjoni. F'każijiet bħal dawn jinħtieġ li jkun possibbli li l-kontropartijiet jaqblu dwar ammonti ta' trasferiment minimi separati għall-marġni ta' varjazzjoni u inizjali. Madankollu, is-somma tal-ammonti ta' trasferiment minimi separati ma tinħtiġx taqbeż il-livell massimu tal-ammont ta' trasferiment minimu. Għal raġunijiet prattiċi, jinħtieġ li jkun possibbli li jiġi definit l-ammont ta' trasferiment minimu fil-valuta li fiha normalment jiġu skambjati l-marġnijiet, li tista' ma tkunx l-euro.

(10)

Xi ġurisdizzjonijiet ta' pajjiżi terzi jistgħu jiddeterminaw kamp ta' applikazzjoni differenti għar-Regolament (UE) Nru 648/2012 għall-finijiet tar-rekwiżiti tagħhom għall-iskambju ta' kollateral rigward il-kuntratti tad-derivattivi OTC li ma jiġux ikklirjati ċentralment. Għaldaqstant, li kieku dan ir-Regolament kellu jeżiġi li l-kuntratti tad-derivattivi OTC ikklirjati mhux ċentralment u rregolati mir-Regolament (UE) Nru 648/2012 biss jiġu inklużi fil-kalkoli tal-marġnijiet għall-settijiet tan-nettjar transfruntieri, il-kontropartijiet f'ġurisdizzjonijiet differenti potenzjalment jista' jkollhom jirdoppjaw il-kalkoli meħtieġa biex jikkunsidraw definizzjonijiet differenti jew kampi ta' applikazzjoni differenti ta' prodotti taħt ir-rekwiżiti tal-marġnijiet rispettivi. Dan jista' jwassal għal kalkoli ta' marġnijiet mgħawġin. Barra dan, dan aktarx iżid ir-riskju ta' tilwim. Għaldaqstant, il-fatt li jiġi permess l-użu ta' sett usa' ta' prodotti f'settijiet tan-nettjar tranfruntieri li jinkludu l-kuntratti tad-derivattivi OTC kollha li huma soġġetti għal skambju ta' kollateral f'ġurisdizzjoni partikolari jew oħra jista' jiffaċilita proċess ta' ġbir ta' marġnijiet b'inqas xkiel. Dan l-approċċ huwa konsistenti mal-mira tan-nuqqas ta' riskju sistemiku tar-Regolament (UE) Nru 648/2012, billi firxa usa' ta' prodotti tista' tkun soġġetta għar-rekwiżiti tal-marġnijiet.

(11)

Il-kontrapartijiet jistgħu jagħżlu li jiġbru l-marġnijiet inizjali fi flus, fejn f'dan il-każ il-kollateral ma għandu jkun soġġett għall-ebda haircut, bil-kundizzjoni li l-valuta tal-kollateral taqbel mal-valuta li fiha huwa espress il-kuntratt. Madankollu, meta l-marġnijiet inizjali jinġabru fi flus f'valuta differenti mill-valuta li fiha huwa espress il-kuntratt, l-ispariġġ fil-valuti jista' jiġġenera riskju tal-kambju. Għal din ir-raġuni, haircut tal-ispariġġ fil-valuti jinħtieġ li tapplika għall-marġnijiet inizjali miġbura fi flus f'valuta oħra. Għall-marġnijiet ta' varjazzjoni miġbura fi flus mhija meħtieġa l-ebda haircut f'konformità mal-qafas BCBS-IOSCO, saħansitra meta l-ħlas jitwettaq f'valuta differenti mill-valuta tal-kuntratt.

(12)

Meta stabbilixxew il-livell tar-rekwiżiti tal-marġni inizjali, il-Kumitat ta' Basel dwar is-Superviżjoni Bankarja u l-Bord tal-Organizzazzjoni Internazzjonali tal-Kummissjonijiet tat-Titoli qiesu żewġ aspetti b;mod espliċitu, kif ġie rifless fil-qafas tagħhom, “Margin requirements for non-centrally cleared derivatives” ta' Marzu 2015 (“il-qafas BCBS-IOSCO”). L-ewwel aspett huwa d-disponibbiltà ta' kwalità għolja ta' kreditu u ta' assi likwidi li jkopru r-rekwiżiti tal-marġnijiet inizjali. It-tieni aspett huwa l-prinċipju ta-proporzjonalità, billi kontropartijiet finanzjarji u mhux finanzjarji iżgħar jistgħu jintlaqtu b'mod sproporzjonat mir-rekwiżiti tal-marġnijiet tal-bidu. Biex jinżammu kundizzjonijiet ekwivalenti, dan ir-Regolament jinħtieġ li jintroduċi limitu massimu li jkun eżattament l-istess bħal dak fil-qafas BCBS-IOSCO li taħtu żewġ kontropartijiet ma jkunux meħtieġa jiskambjaw marġni inizjali. Dan jinħtieġ li jnaqqas l-ispejjeż u l-piż operazzjonali b'mod sostanzjali għall-parteċipanti iżgħar u jindirizza t-tħassib dwar id-disponibbiltà ta' kwalità għolja ta' kreditu u assi likwidi mingħajr ma jiġu mminati l-objettivi tar-Regolament (UE) Nru 648/2012.

(13)

Waqt li l-limiti massimi dejjem jinħtieġ li jiġu kkalkulati fil-livell tal-gruppi, il-fondi ta' investiment jinħtieġ li jiġu ttrattati bħala każ speċjali billi jistgħu jiġu mmaniġġati minn maniġer ta' investiment singolu u jinqabdu bħala grupp singolu. Madankollu, meta l-fondi jkunu gruppi distinti ta' assi u ma jkunux kollateralizzati, iggarantiti jew appoġġati minn fondi ta' investiment oħrajn jew il-maniġer tal-investiment innifsu, ikunu relativament 'il bogħod mir-riskju filkonfornt tal-bqija tal-grupp. Dawn il-fondi ta' investiment għaldaqstant jinħtieġ li jiġu ttrattati bħala entitajiet separati meta jiġu kkalkulati l-limiti massimi, f'konformità mal-qafas BCBS-IOSCO.

(14)

Rigward il-marġni inizjali, ir-rekwiżiti ta' dan ir-Regolament aktarx ikollhom impatt li jista' jitkejjel fuq il-likwidità tas-swieq, billi l-assi pprovduti bħala kollateral ma jistgħux jiġu llikwidati jew jintużaw mill-ġdid b'xi mod ieħor għad-durata tal-kuntratt tad-derivattivi OTC ikklirjati mhux ċentralment. Dawn ir-rekwiżiti jirrappreżentaw bidla sinifikanti fil-prattika tas-suq u jippreżentaw ċerti sfidi operazzjonali u prattiċi li jeħtieġu li jiġu mmaniġġati hekk kif ir-rekwiżiti l-ġodda jidħlu fis-seħħ. Waqt li jiġi kkunsidrat li l-marġni ta' varjazzjoni diġà jkopri fluttwazzjonijiet realizzati fil-valur tal-kuntratti tad-derivattivi OTC ikklirjati mhux ċentralment sal-punt tal-inadempjenza, huwa meqjus proprzjonat li jiġi applikat limitu massimu ta' EUR 8 biljun f'ammonti nozzjonali grossi ta' kuntratti OTC pendenti għall-applikazzjoni tar-rekwiżiti tal-marġni inizjali. Dan il-limitu massimu japplika fil-livell tal-gruppi jew, meta l-kontroparti ma tkunx parti minn grupp, fil-livell tal-entità singola. L-ammont nozzjonali gross aggregat tal-kuntratti pendenti jinħtieġ li jintuża bħala referenza adegwata billi huwa metrika xierqa għall-kejl tad-daqs u l-kumplessità ta' portafoll ta' kuntratti ta' derivattivi OTC ikklirjati mhux ċentralment. Huwa wkoll referenza li tista' tiġi mmonitorjata u rrappurtata b'mod faċli. Dawn il-limiti massimi huma konformi wkoll mal-qafas BCBS-IOSCO għall-kuntratti ta' derivattivi OTC ikklirjati mhux ċentralment u għaldaqstant huma konsistenti mal-istandards internazzjonali.

(15)

L-iskoperturi li jinħolqu mill-kuntratti jew kontropartijiet li huma eżenti b'mod temporanju jew permanenti jew parzjalment eżenti minn marġnijiet, jinħtieġ li jiġu inklużi wkoll fil-kalkolu tal-ammont nozzjonali gross aggregat. Dan minħabba li l-kuntratti kollha jikkontribwixxu għad-determinazzjoni tad-daqs u l-kumplessità tal-portafoll ta' kontroparti. Għaldaqstant, il-kuntratti ta' derivattivi OTC ikklirjati mhux ċentralment li jistgħu jiġu eżentati mir-rekwiżiti ta' dan ir-Regolament huma rilevanti wkoll għad-determinazzjoni tad-daqs, l-iskala u l-kumplessità tal-portafoll tal-kontroparti u għaldaqstant jinħtieġ li jiġu inklużi wkoll fil-kalkolu tal-limiti massimi.

(16)

Huwa xieraq li jiġu stabbiliti proċeduri speċjali ta' mmaniġġjar tar-riskju għal ċerti tipi ta' kuntratti tad-derivattivi OTC ikklirjati mhux ċentralment li juru profili tar-riskju partikolari. B'mod partikolari, l-iskambju ta' marġni ta' varjazzjoni mingħajr marġni inizjali jinħtieġ li, b'konsistenza mal-qafas BCBS-IOSCO, jitqies bħala skambju xieraq ta' kollateral għall-kuntratti ta' kambju saldati 'mod fiżiku. B'mod simili, billi skambji bejn valuti jistgħu jiġu dekomposti f'sekwenza ta' tranżazzjonijiet forward tal-kambju, il-komponent tar-rata tal-imgħax biss jinħtieġ li jiġi kopert mill-marġni inizjali.

(17)

Jinħtieġ li jittieħed kont tal-impedimenti li jħabbtu wiċċhom magħhom l-emittenti ta' bonds koperti jew puli ta' kopertura meta jipprovdu kollateral. Għaldaqstant, taħt sett ta' kundizzjonijiet speċifiċi, l-emittenti ta' bonds koperti jew puli ta' kopertura ma jinħtiġx li jkunu meħtieġa li jdaħħlu kollateral. Dan jinħtieġ li jippermetti ftit flessibbiltà għall-emittenti ta' bonds koperti jew puli ta' kopertura waqt li jiżgura li r-riskji għall-kontropartijiet tagħhom jiġu limitati. Emittenti ta' bonds koperti jew puli ta' kopertura jistgħu jħabbtu wiċċhom ma' impedimenti legali biex jiġi depożitat jew jinġabar kollateral mhux fi flus għal marġni inizjali jew ta' varjazzjoni jew jiġi depożitat marġni ta' varjazzjoni fi flus kontanti billi l-pagament ta' marġni ta' varjazjoni jista' jitqies bħala talba li tieħu preċedenza fuq it-talbiet tal-emittenti ta' bonds, u dan jista' jwassal għal impediment legali. Bl-istess mod, il-possibbiltà li marġni inizjali jiġi sostitwit jew irtirat jista' jitqies bħala talba li tieħu preċedenza fuq it-talbiet tal-emittent ta' bonds li jħabbtu wiċċhom ma' l-istess tip ta' limiti. Madankollu, ma hemm l-ebda restrizzjoni fuq emittent ta' bonds koperti jew ta' grupp kopert biex irodd lura flus miġbura qabel bħala marġni ta' varjazzjoni. Għaldaqstant, il-kontropartijiet tal-emittenti ta' bonds koperti jew ta' puli ta' kopertura jinħtieġ li jkunu meħtieġa jibagħtu marġni ta' varjazzjoni fi flus u jinħtieġ li jkollhom id-dritt li jiksbu lura parti minn din is-somma jew is-somma kollha kemm hi, iżda l-emittenti ta' bonds koperti jew ta' gruppi koperti jinġtieġ li jkunu meħtieġa biss li jibagħtu marġni ta' varjazzjoni ekwivalenti għall-ammont fi flus li jkunu rċevew qabel.

(18)

Il-kontropartijiet dejjem jinħtieġu li jivvalutaw l-infurzabbiltà ġuridika tan-nettjar u tal-ftehimiet ta' segregazzjoni tagħhom. Meta, għal dak li jirrigwarda l-qafas ġuridiku ta' pajjiż terz, dawn il-valutazzjonijiet jirriżultaw negattivi, il-kontropartijiet jinħtieġ li jiddependu fuq arranġamenti differenti mill-iskambjubidirezzjonali tal-marġnijiet. Bil-għan li tiġi żgurata l-konsistenza mal-istandards internazzjonali, biex jiġi evitat li jkun impossibbli għall-kontropartijiet tal-Unjoni li jinnegozjaw mal-kontropartijiet f'dawn il-ġurisdizzjonijiet, u biex jiġu żgurati kundizzjonijiet ekwi għall-kontropartijiet tal-Unjoni, huwa xieraq li jiġi stabbilit livell limitu minimu li taħtu l-kontropartijiet jistgħu jinnegozjaw ma' kontropartijiet stabbiliti f'dawn il-ġurisdizzjonijiet mingħajr l-iskambju ta' marġnijiet inizjali jew ta' varjazzjoni. Meta l-kontropartijiet ikollhom il-possibbiltà li jiġbru marġnijiet u jistgħu jiżguraw li għall-kollateral miġbur, għall-kuntrarju tal-kollateral iddepożitat, id-dispożizzjonijiet ta' dan ir-Regolament ikunu jistgħu jintlaħqu, il-kontropartijiet tal-Unjoni dejjem jinħtieġ li jkunu meħtieġa jiġbru kollateral. L-iskoperturi minn kuntratti ma' kontropartijiet stabbiliti f'ġurisdizzjonijiet ta' pajjiż terz li ma huma koperti mill-ebda skambju ta' kollateral minħabba l-impedimenti legali f'dawn il-ġurisdizzjonijiet jinħtieġ li jiġu mrażżna bl-istabbiliment ta' limitu, billi l-kapital mhuwiex meqjus ekwivalenti għal skambju ta' marġni rigward l-iskoperturi li jinħolqu minn kuntratti tad-derivattivi OTC ikklirjati mhux ċentralment u mhux il-kontropartijiet kollha soġġetti għar-rekwiżiti tal-marġnijiet skont dan ir-Regolament huma soġġetti wkoll għal rekwiżiti tal-kapital. Dan il-limitu jinħtieġ li jiġi stabbilit b'mod li l-kalkolu u l-verifika tiegħu jkunu sempliċi. Biex jiġi evitat li r-riskju sistemiku jakkumula u biex jiġi evitat li dan it-trattament speċifiku joħloq il-possibbiltà ta' ċirkumvenzjoni tad-dispożizzjonijiet ta' dan ir-Regolament, il-limitu jinħtieġ li jiġi stabbilit f'livell konservattiv. Dawn it-trattamenti jistgħu jitqiesu prudenti biżżejjed, minħabba li jeżistu tekniki oħrajn ta' mitigazzjoni tar-riskju bħala alternattiva għall-marġnijiet.

(19)

Sabiex ikun hemm salvagwardja kontra l-każ meta l-kollateral ma jkunx jista' jiġi likwidat minnufih wara l-inadempjenza ta' kontroparti, huwa meħtieġ, meta jsir il-kalkolu tal-marġni inizjali, li jiġi kkunsidrat il-perjodu ta' żmien mill-iskambju l-iktar reċenti ta' kollateral li jkopri sett tan-nettjar ta' kuntratti ma' kontroparti kontumaċi sakemm il-kuntratti jingħalqu u r-riskju tas-suq li jirriżulta jiġi ħħeġġjat mill-ġdid. Dan il-perjodu ta' żmien huwa magħruf bħala l-“perjodu b'riskju ta' marġni” (margin period of risk, “MPOR”) u huwa l-istess għodda bħal dik użata fl-Artikolu 272(9) tar-Regolament (UE) Nru 575/2013 tal-Parlament Ewropew u tal-Kunsill (3), rigward il-kreditu ta' riskju tal-kontropartijiet tal-istituzzjonijiet tal-kreditu. Madankollu, billi l-objettivi taż-żewġ Regolamenti huma differenti, u r-Regolament (UE) Nru 575/2013 jistabbilixxi regoli għall-kalkolu tal-MPOR għall-fini tar-rekwiżiti dwar il-fondi proprji biss, jinħtieġ li dan ir-Regolament jinkludi regoli speċifiċi dwar l-MPOR meħtieġa fil-kuntest tal-proċeduri tal-ġestjoni tar-riskji għall-kuntratti ta' derivattivi OTC ikklirjati mhux ċentralment. L-MPOR jinħtieġ li jikkunsidra l-proċessi meħtieġa minn dan ir-Regolament għall-iskambju ta' marġnijiet.

(20)

Marġni inizjali u ta' varjazzjoni ġeneralment jinħtieġ li jiġu skambjati mhux iktar tard mit-tmiem tal-jum ta' negozju wara l-jum tal-eżekuzzjoni. Madankollu, hija permessa estensjoni taż-żmien għall-iskambju tal-marġni ta' varjazzjoni meta jiġi kkumpensat minn kalkolu adegwat tal-MPOR. B'mod alternattiv, meta ma japplika l-ebda marġni inizjali, jinħtieġ li tiġi permessa estensjoni jekk jinġabar ammont xieraq ta' marġni ta' varjazzjoni addizzjonali.

(21)

Meta jiġu żviluppati mudelli ta' marġnijiet inizjali u meta jiġi kkalkulat l-MPOR xieraq, il-kontropartijiet jinħtieġ li jikkunsidraw il-ħtieġa li jkollhom mudelli li jaqbdu l-likwidità tas-suq, in-numru ta' parteċipanti f'dak is-suq partikolari u l-volum tal-kuntratti tad-derivattivi OTC rilevanti. Fl-istess ħin teżisti l-ħtieġa li jiġi żviluppat mudell li ż-żewġ partijiet jistgħu jifhmu, jirriproduċu u li jkunu jistgħu jiddependu fuqu biex isolvu t-tilwim. Għaldaqstant il-kontropartijiet jinħtieġ li jkunu jistgħu jikkalibraw il-mudell u jikkalkulaw l-MPOR skont il-kundizzjonijiet tas-suq biss, mingħajr il-ħtieġa li jaġġustaw l-istimi tagħhom għall-karatteristiċi ta' kontropartijiet speċifiċi. Min-naħa l-oħra dan jimplika li l-kontropartijiet jistgħu jagħżlu li jadottaw mudelli differenti biex jikkalkulaw l-ammonti tal-marġni inizjali li jridu jiskambjaw bejniethom, u li dawn l-ammonti tal-marġni inizjali jistgħu ma jkunux simmetriċi.

(22)

Waqt li teżisti l-ħtieġa għal rikalibrazzjoni ta' mudell ta' marġni inizjali bi frekwenza suffiċjenti, kalibrazjoni ġdida tista' twassal għal livelli mhux mistennija ta' rekwiżiti tal-marġni. Għal din ir-raġuni, jinħtieġ li jiġi stabbilit perjodu ta' żmien xieraq, li waqtu l-marġnijiet xorta jkunu jistgħu jiġu skambjati abbażi tal-kalibrazzjoni preċedenti. Dan jinħtieġ li jagħti żmien biżżejjed lill-kontropartijiet biex jikkonformaw ma' appelli għall-marġni li jirriżultaw minn rikalibrazzjoni.

(23)

Il-kollateral jinħtieġ li jitqies bħala liberament trasferibbli jekk, fil-każ ta' inadempjenza tal-ispeditur tal-kollateral, ma jkun hemm l-ebda impediment regolatorju jew legali jew pretensjonijiet minn terza persuna, inklużi dawk tal-kustodju tat-terzi persuni. Madankollu, ċerti pretensjonijiet, bħall-kostijiet u l-ispejjeż imġarrba għat-trasferiment tal-kollateral, fil-forma ta' irhna imposti b'mod regolari fuq it-trasferimenti kollha ta' titoli, ma jinħtiġx li jiġu meqjusa bħala impediment billi dan jista' jwassal għal sitwazzjoni fejn impediment dejjem jista' jiġi identifikat.

(24)

Il-kontroparti kollettriċi jinħtieġ li jkollha l-kapaċità operazzjonali li tillikwida l-kollateral fil-każ ta' inadempjenza tal-ispeditur tal-kollateral. Il-kontroparti kollettriċi jinħtieġ li tkun kapaċi wkoll li tuża l-introjtu fi flus tal-likwidazzjoni biex tidħol f'kuntratt ekwivalenti ma' kontroparti oħra jew li tiħħeġġja r-riskju li jirriżulta. Għaldaqstant, l-aċċes għas-suq jinħtieġ li jkun prerekwiżit għall-kollettur tal-kollateral biex ikun jista' jbigħ il-kollateral jew jakkwistah mill-ġdid f'ammont ta' żmien raġjonevoli. Din il-kapaċità jinħtieġ li tkun indipendenti mill-ispeditur tal-kollateral.

(25)

Il-kollateral miġbur irid jkun ta' likwidità għolja u ta' kwalità kreditizja suffiċjenti biex il-kontroparti kollettriċi tkun tista' tillikwida l-pożizzjonijiet mingħajr ma ssofri telf minħabba tibdil sinifikanti fil-valur f'każ li l-kontroparti l-oħra ssir kontumaċi. Il-kwalità kreditizja tal-kollateral jinħtieġ li tiġi vvalutata abbażi ta' metodoloġiji rikonoxxuti bħall-klassifikazzjonijiet ta' istituzzjonijiet esterni tal-valutazzjoni tal-kreditu. Madankollu, sabiex jitnaqqas ir-riskju ta' dipendenza mekkanistika fuq klassifikazzjonijiet esterni, jinħtieġ li jiġu introdotti għadd ta' salvagwardji addizzjonali. Dawn is-salvagwardji jinħtieġ li jinkludu l-possibbiltà li jintuża mudell Ibbażat fuq Klassifikazzjoni Interna (Internal Rating Based, “IRB”) u l-possibbiltà li tiddewwem is-sostituzzjoni tal-kollateral li jsir ineliġibbli minħabba tnaqqis fil-grad tal-klassifikazzjoni, bil-għan li jitnaqqsu b'mod effiċjenti l-effetti ta' preċipizju potenzjali li jistgħu jinħolqu minn dipendenza eċċessiva fuq klassifikazzjonijiet esterni tal-kreditu.

(26)

Waqt li l-haircuts inaqqsu r-riskju li l-kollateral miġbur ma jkunx biżżejjed biex ikopri l-ħtiġijiet ta' marġni fi żmien ta' stress finanzjarju, huma wkoll meħtieġa mitiganti tar-riskju oħrajn meta jiġi aċċettat kollateral mhux fi flus sabiex jiġi żgurat li jkun jista' jiġi llikwidat b'mod effettiv. B'mod partikolari l-kontropartijiet jinħtieġ li jiżguraw li l-kollateral miġbur jiġi diversifikat b'mod raġjonevoli f'termini ta' emittenti individwali, tipi ta' emittenti u klassijiet ta' assi.

(27)

L-impatt fuq l-istabbiltà finanzjarja tal-likwidazzjoni tal-kollateral iddepożitat minn kontropartijiet mhux sistemikament importanti huwa wieħed limitat. Barra dan, il-limiti ta' konċentrazzjoni fuq il-marġni inizjali jistgħu jikkostitwixxu piż għall-kontropartijiet b'portafolji tad-derivattivi tal-OTC żgħar billi jista' jkollhom disponibbli firxa limitata biss ta' kollateral eliġibbli biex jintbagħat. Għaldaqstant, anki jekk id-diversifikazzjoni tal-kollateral tikkostitwixxi mitigant tar-riskju validu, il-kontropartijiet importanti b'mod mhux sistemiku ma jinħtiġx ikunu meħtieġa jiddiversifikaw il-kollateral. Min-naħa l-oħra, l-istituzzjonijiet finanzjarji sistemiċi u kontropartijiet oħrajn b'portafolji tad-derivattivi OTC kbar li jinnegozjaw ma' xulxin jinħtieġ li japplikaw il-limiti ta' konċentrazzjonijiet tal-inqas għall-marġni inizjali, inkluż rigward kollateral eliġibbli li jinkludi t-titoli tad-dejn sovran tal-Istati Membri. Dawn il-kontropartijiet huma sofistikati biżżejjed biex jittrasformaw il-kollateral jew biex ikollhom aċċess għal swieq u emittenti multipli biex jiddiversifikaw biżżejjed il-kollateral iddepożitat. L-Artikolu 131 tad-Direttiva 2013/36/UE tal-Parlament Ewropew u tal-Kunsill (4) jipprevedi l-identifikazzjoni ta' istituzzjonijiet bħala sistemikament importanti skont il-liġi tal-Unjoni. Madankollu, meta wieħed jikkunsidra l-kamp ta' applikazzjoni wiesa' tar-Regolament (UE) Nru 648/2012, jinħtieġ li jiġi introdott livell limitu kwantitattiv sabiex b'hekk ir-rekwiżiti għal-limiti ta' konċentrazzjoni japplikaw ukoll għall-kontropartijiet li jistgħu ma jaqgħux taħt dawk il-klassifikazzjonijiet eżistenti ta' istituzzjonijiet sistemikament importanti iżda li madankollu jinħtieġ li jkunu soġġetti għal limiti ta' konċentrazzjonijiet minħabba d-daqs tal-portafolji tad-derivattivi OTC tagħhom.

(28)

L-arranġamenti ta' skemi tal-pensjoni huma soġġetti għal rekwżiti ta' kollateralizzazzjoni bilaterali. Madankollu, huwa importanti li jiġi evitat piż eċċessiv minn dawn ir-rekwiżiti fuq il-prestazzjoni mistennija ta' dawn l-iskemi u, konsegwentement, fuq l-introjtu tal-irtirar ta' pensjonanti futuri. L-obbligazzjonijiet tal-arranġamenti tal-iskemi tal-pensjoni għall-persuni rtirati huma denominati f'valuti lokali u l-investimenti tagħhom, għaldaqstant, iridu jiġu denominati fl-istess valuta sabiex jiġu evitati l-kostijiet u r-riskji ta' diskrepanzi bejn il-valuti barranin. Għaldaqstant huwa xieraq li jiġi previst li l-limiti tal-konċentrazzjonijiet ma japplikawx għall-arranġamenti tal-iskemi tal-pensjoni bl-istess mod bħal dawk tal-kontropartijiet. Madankollu, huwa importanti li jiġu stabbiliti proċeduri ta' mmaniġġar tar-riskji adegwati biex jiġu mmonitorjati u indirizzati r-riskji potenzjali ta' konċentrazzjoni li jinħolqu minn dan ir-reġim speċjali. Jinħtieġ li jsir monitoraġġ u reviżjoni tal-applikazzjoni ta' dawn id-dispożizzjonijiet rigward l-arranġamenti tal-iskemi tal-pensjoni fid-dawl tal-iżviluppi tas-suq.

(29)

Id-diffikultajiet fis-segregazzjoni tal-kollateral fi flus jinħtieġ li jiġu rikonoxxuti billi l-kontropartijiet jitħallew jibagħtu ammont limitat ta' marġni inizjali fil-forma ta' flus u billi l-kustodji jitħallew jinvestu mill-ġdid dan l-ammont ta' flus kollaterali. Madankollu, il-flus miżmuma minn kustodju jikkostitwixxu obbligazzjoni li l-kustodju jkollu lejn il-kontroparti li tiddepożita, u dan jiġġenera riskju ta' kreditu għall-kontroparti li tiddepożita. Għaldaqstant, sabiex jitnaqqas ir-riskju sistemiku, l-użu tal-flus bħala marġni inizjali jinħtieġ li jkun soġġett għal rekwiżiti ta' diversifikazzjoni tal-inqas għall-istituzzjonijiet sistemikament importanti. L-istituzzjonijiet sistemikament importanti b'mod sistemiku jinħtieġ li jkunu meħtieġa jillimitaw l-ammont ta' marġni inizjali miġbura fi flus kontanti jew jiddiversifikaw l-iskoperturi bl-użu ta' iktar minn kustodju wieħed.

(30)

Il-valur tal-kollateral ma jinħtiġx jeżibixxi korrelazzjoni pożittiva sinifikanti mal-kredibbiltà kreditizja tal-ispeditur ta' kollateral jew mal-valur tal-portafoll sottostanti tad-derivattivi kklirjati mhux ċentralment billi dan jista' jimmina l-effettività tal-protezzjoni offruta mill-kollateral miġbur. Fid-dawl ta' dan, it-titoli maħruġa mill-ispeditur ta' kollateral jew mill-entitajiet relatati tiegħu ma jinħtiġx jiġu aċċettati bħala kollateral. Il-kontropartijiet jinħtieġ li jkunu meħtieġa wkoll jimmonitorjaw li l-kollateral miġbur ma jkunx soġġett għal forom oħrajn ta' riskju ta' korrelazzjoni ħażina.

(31)

Jinħtieġ li jkun possibbli għall-kontroparti mhux kontumaċi li tillikwida l-assi miġbura bħala kollateral bħala marġni inizjali jew ta' varjazzjoni fi żmien qasir biżżejjed sabiex ikun hemm protezzjoni kontra t-telf fuq kuntratti tad-derivattivi OTC ikklirjati mhux ċentralment fl-eventwalità ta' inadempjenza tal-kontroparti. Għaldaqstant dawn l-assi jinħtieġ li jkunu likwidi ħafna u ma jinħtiġx jiġu esposti għal riskju ta' kreditu, tas-suq jew ta' kambju eċċessiv. Sal-punt fejn il-valur tal-kollateral jiġi espost għal dawn ir-riskji, jinħtieġ li jiġu applikati haircuts sensittiv għar-riskji b'mod xieraq.

(32)

Sabiex jiġi żgurat it-trasferiment fil-ħin tal-kollateral, il-kontropartijiet jinħtieġ li jkollhom stabbiliti proċessi operazzjonali effiċjenti. Dan jeħtieġ li l-proċessi għall-iskambju bilaterali ta' kollateral ikunu ddettaljati, trasparenti u robusti biżżejjed. Nuqqas min-naħa tal-kontropartijiet li jaqblu dwar u li jistabbilixxu qafas operazzjonali għal kalkolu, notifika u finalizzazzjoni effiċjenti ta' appelli għall-marġni jista' jwassal għal tilwim u falliment fl-iskambji ta' kollateral li jirriżultaw f'espożizzjonijiet mhux kollateralizzati taħt kuntratti tad-derivattivi OTC. Bħala riżultat ta' dan, huwa essenzjali li l-kontropartijiet jistabbilixxu politiki interni u standards ċari rigward it-trasferimenti ta' kollateral. Kull devjazzjoni minn dawn il-politiki jinħtieġ li tiġi eżaminata b'mod riġoruż mill-partijiet interessati interni kollha li huma meħtieġa jawtorizzaw dawn id-devjazzjonijiet. Barra dan, it-termini applikabbli kollha rigward l-iskambju operazzjonali ta' kollateral jinħtieġ li jiġu rreġistrati b'mod preċiż, dettaljat, robust, fil-pront u sistematiku.

(33)

Jinħtieġ li jiġi konkluż ftehim dwar l-iskambju ta' kollateral bejn il-kontropartijiet li jidħlu f'kuntratti tad-derivattivi OTC ikklirjati mhux ċentralment sabiex jipprovdi ċertezza tad-dritt. Bħala riżultat ta' dan, ftehim dwar l-iskambju ta' kollateral jinħtieġ li jinkludi d-drittijiet u l-obbligi materjali kollha tal-kontropartijiet applikabbli għall-kuntratti tad-derivattivi OTC ikklirjati mhux ċentralment.

(34)

Il-kollateral jipproteġi lill-kontroparti kollettriċi fl-eventwalità ta' indempjenza tal-kontroparti li tiddepożita. Madankollu, iż-żewġ kontropartijiet huma responsabbli wkoll biex jiżguraw li l-mod li bih jinżamm il-kollateral miġbur ma jżidx ir-riskju ta' telf ta' kollateral iddepożitat b'eċċess għall-kontroparti li tiddepożita f'każ li l-kontroparti kollettriċi tkun kontumaċi. Għal din ir-raġuni, il-ftehim bilaterali bejn il-kontropartijiet jinħtieġ li jippermetti liż-żewġ kontropartijiet jaċċedu għall-kollateral fil-ħin meta jkollhom id-dritt li jagħmlu dan, u għaldaqstant il-ħtieġa għal regoli dwar is-segregazzjoni u għal regoli li jipprovdu valutazzjoni tal-effettività tal-ftehim f'dan ir-rigward, b'kunsiderazzjoni tar-restrizzjonijiet ġuridiċi u l-prattiki tas-suq ta' kull ġurisdizzjoni.

(35)

Ir-riipotekazzjoni, ir-rahan mill-ġdid jew l-użu mill-ġdid tal-kollateral miġbur bħala marġnijiet inizjali jista' joħloq riskji ġodda għall-kontropartijiet minħabba l-pretensjonijiet tat-terzi persuni fuq l-assi fl-eventwalità ta' inadempjenza. Komplikazzjonijiet legali u operazzjonali jistgħu jdewmu r-ritorn tal-kollateral fl-eventwalità ta' inadempjenza tal-kollettur tal-kollateral inizjali jew tat-terza persuna, jew anki jagħmlu dan ir-ritorn impossibbli. Għaldaqstant, sabiex tiġi ppreservata l-effiċjenza tal-qafas u tiġi żgurata mitigazzjoni tajba tar-riskji ta' kreditu tal-kontroparti, ir-riipotekazzjoni, ir-rahan mill-ġdid jew l-użu mill-ġdid tal-kollateral miġbur bħala marġni inizjali ma jeħtiġx jiġu permessi.

(36)

Minħabba d-diffikultajiet fis-segregazzjoni tal-flus, il-prattiki attwali għall-iskambju ta' kollateral fi flus f'ċerti ġurisdizzjonijiet u l-ħtieġa għal dipendenza fuq il-flus minflok it-titoli f'ċerti ċirkostanzi meta t-trasferiment ta' titoli jista' jiġi impedit minn restrizzjonijiet operazzjonali, il-kollateral miġbur fi flus bħala marġni inizjali dejjem jinħtieġ li jinżamm minn bank ċentrali jew minn istituzzjoni ta' kreditu ta' terza persuna, billi dan jiżgura s-separazzjoni miż-żewġ kontropartijiet fil-kuntratt. Biex tiġi żgurata din is-separazzjoni, l-istituzzjoni ta' kreditu tat-terza persuna ma jinħtiġx tappartjeni għall-istess grupp bħal dak tal-kontropartijiet.

(37)

Meta kontroparti tinnotifika lill-awtorità kompetenti rilevanti dwar l-intenzjoni tagħha li tavvantaġġja ruħha mill-eżenzjoni tat-tranżazzjonijiet intragrupp, sabiex l-awtorità kompetenti tiddeċiedi jekk il-kundizzjonijiet għall-eżenzjoni jkunux intlaħqu, il-kontroparti jinħtieġ li tipprovdi fajl komplut li jinkludi l-informazzjoni rilevanti kollha meħtieġa sabiex l-awtorità kompetenti tlesti l-valutazzjoni tagħha.

(38)

Sabiex grupp jitqies wieħed bi proċeduri tal-ġestjoni tar-riskju adegwatament sodi u robusti, iridu jintlaħqu għadd ta' kundizzjonijiet. Jinħtieġ li l-grupp jiżgura monitoraġġ regolari tal-iskoperturi intragrupp, u s-soluzzjoni fil-ħin tal-obbligi li jirriżultaw mill-kuntratti tad-derivattivi OTC intragrupp għandha tiġi ggarantita abbażi tal-għodod tal-monitoraġġ u l-likwidità fil-livell tal-grupp li jkunu konsistenti mal-kumplessità tat-tranżazzjonijiet intragrupp.

(39)

Sabiex l-eżenzjoni għat-tranżazzjonijiet intragrupp tkun applikabbli, irid ikun ċert li l-ebda dispożizzjoni leġiżlattiva, regolatorja, amministrattiva jew dispożizzjoni obbligatorja oħra tad-dritt aplikabbli ma tkun tista' tipprevjeni legalment lill-kontropartijiet intragrupp milli jilħqu l-obbligi tagħhom li jittraferixxu flus jew iħallsu lura titoli skont it-termini tat-tranżazzjonijiet intragrupp. B'mod simili, ma jinħtiġx ikun hemm l-ebda prattika operazzjonali jew ta' negozju tal-kontropartijiet intragrupp jew tal-grupp li tista' tirriżulta fin-nuqqas ta' disponibbiltà ta' fondi għall-ilħuq tal-obbligazzjonijiet ta' ħlas billi jsiru dovuti fuq bażi minn jum għal jum, jew li trasferiment elettroniku fil-pront ta' fondi ma jkunx possibbli.

(40)

Dan ir-Regolament jinkludi numru ta' rekwiżiti dettaljati li għandhom jintlaħqu sabiex grupp ikun jista' jikseb l-eżenzjoni mid-depożitu ta' marġni għat-tranżazzjonijiet intragrupp. Minbarra dawn ir-rekwiżiti, meta waħda miż-żewġ kontropartijiet fil-grupp tkun domiċiljata f'pajjiż terz li għalih determinazzjoni tal-ekwivalenza skont l-Artikolu 13(2) tar-Regolament (UE) Nru 648/2012 tkun għadha ma ġietx ipprovduta, il-grupp irid jiskambja marġnijiet ta' varjazzjoni u inizjali ssegregati b'mod xieraq għat-tranżazzjonijiet intragrupp kollha mas-sussidjarji f'dawn il-pajjiżi terzi. Sabiex tiġi evitata applikazzjoni sproporzjonata tar-rekwiżiti tal-marġnijiet u b'kunsiderazzjoni ta' rekwiżiti simili, dan ir-Regolament jinħtieġ li jipprovdi għal implimentazzjoni mdewma ta' dan ir-rekwiżit partikolari. Din għandha tippermetti żmien biżżejjed għat-tlestija tal-proċess biex tiġi prodotta d-determinazzjoni tal-ekwivalenza, waqt li ma tkunx meħtieġa allokazzjoni ineffiċjenti tar-riżorsi lill-gruppi b'sussidjarji domiċiljati f'pajjiżi terzi.

(41)

Waqt li jiġi kkunsidrat il-prinċipju tal-proporzjonalità, il-kontropartijiet li għandhom portafolji iżgħar u, għaldaqstant, operazzjonijiet ġeneralment iżgħar jinħtieġ li jingħataw iktar ħin biex jadattaw is-sistemi u l-proċessi interni tagħhom sabiex jikkonformaw mar-rekwiżiti ta' dan ir-Regolament. Sabiex jintlaħaq bilanċ tajjeb bejn il-mitigazzjoni tar-riskji li jirriżultaw mid-derivattivi OTC ikklirjati mhux ċentralment u l-applikazzjoni proporzjonali ta' dan ir-Regolament, kif ukoll biex tintlaħaq il-konsistenza internazzjonali u jiġu minimizzati l-possibiltajiet tal-arbitraġġ regolatorju bil-għan li jiġi evitat it-tħarbit tas-suq, huwa meħtieġ perjodu ta' adozzjoni gradwali tar-rekwiżiti. Il-perjodu ta' adozzjoni gradwali għar-rekwiżiti introdotti f'dan ir-Regolament jikkunsidra l-iskeda miftiehma fil-qafas BCBS-IOSCO, li ġie stabbilit b'referenza għal studju tal-impatt kwantitattiv li jinvolvi l-istituzzjonijiet ta' kreditu tal-Unjoni.

(42)

Ir-Regolament Delegat tal-Kummissjoni (*1) jispeċifika d-definizzjoni ta' tranżazzjonijiet forward tal-kambju saldati b'mod fiżiku fl-Unjoni. Madankollu, f'dan l-istadju, din id-definizzjoni mhijiex applikabbli u dawk il-prodotti mhumiex definiti b'mod omoġenu fl-Unjoni. Għaldaqstant, sabiex jiġi evitat li jinħolqu kundizzjonijiet mhux ekwi fl-Unjoni, huwa meħtieġ li l-applikazzjoni tat-tekniki tal-mitigazzjoni tar-riskju korrispondenti jiġu allinjati mad-data tal-applikazzjoni tal-Att Delegat rilevanti. Fi kwalunkwe każ, tiġi stabbilita data speċifika li fiha jinħtieġ li japplikaw ir-rekwiżiti relevanti biex jiġi evitat dewmien eċċessiv fl-introduzzjoni tat-tekniki tal-mitigazzjoni tar-riskju.

(43)

Sabiex tiġi evitata l-frammentazzjoni tas-suq u jiġu żgurati kundizzjonijiet ekwi għall-kontropartijiet tal-Unjoni stabbiliti fl-Unjoni fuq livell globali, u filwaqt li jiġi rikonoxxut li f'xi ġurisdizzjonijiet l-iskambju tal-marġni ta' varjazzjoni u dak inizjali għal għażliet fuq l-ishma singoli u għażliet tal-indiċi tal-ekwità mhuwiex soġġett għal rekwiżiti tal-marġnijiet ekwivalenti, it-trattament ta' dawn il-prodotti jinħtieġ li jiġi inkluż b'mod gradwali. Dan il-perjodu ta' inklużjoni gradwali jipprovdi ħin għall-monitoraġġ tal-iżvilupp regolatorju f'ġurisdizzjonijiet oħrajn u biex jiġi żgurat li jkunu stabbiliti rekwiżiti xierqa fl-Unjoni biex jitnaqqas ir-riskju ta' kreditu tal-kontroparti rigward tali kuntratti waqt li jiġi evitat li jkun hemm lok għal arbitraġġ regolatorju.

(44)	Minħabba raġunijiet ta' ċertezza tad-dritt u biex jiġu evitati interruzzjonijiet potenzjali fi swieq finanzjarji, huwa xieraq li jiġi ċċarat it-trattament tal-kuntratti eżistenti.

(45)	Dan ir-Regolament huwa bbażat fuq l-istandards tekniċi regolatorji abbozzati ppreżentati mill-Awtorità Bankarja Ewropea, l-Awtorità Ewropea tal-Assigurazzjoni u l-Pensjonijiet tax-Xogħol u l-Awtorità Ewropea tat-Titoli u s-Swieq lill-Kummissjoni.

(46)

L-Awtorità Bankarja Ewropea, l-Awtorità Ewropea tal-Assigurazzjoni u l-Pensjonijiet tax-Xogħol u l-Awtorità Ewropea tat-Titoli u s-Swieq għamlu konsultazzjonijiet pubbliċi miftuħin dwar l-istandards tekniċi regolatorji abbozzati li fuqhom huwa bbażat dan ir-Regolament, analizzaw il-kostijiet u l-benefiċċji potenzjali relatati u talbu l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (5), l-opinjoni tal-Grupp tal-Partijiet Interessati tal-Assigurazzjoni u r-Riassigurazzjoni u l-Grupp tal-Partijiet Interessati tal-Qasam tal-Pensjonijiet tax-Xogħol stabbiliti skont l-Artikolu 37 tar-Regolament (UE) Nru 1094/2010 tal-Parlament Ewropew u tal-Kunsill (6), u l-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (7).

(47)

Skont il-proċedura stabilita fil-ħames, fis-sitt u fis-seba' paragrafu tal-Artikolu 10(1) tar-Regolament (UE) Nru 1093/2010, fil-ħames, fis-sitt u fis-seba' subparagrafu tal-Artikolu 10(1) tar-Regolament (UE) Nru 1095/2010 u fil-ħames, fis-sitt u fis-seba' subparagrafu tal-Artikolu 10(1) tar-Regolament (UE) Nru 1094/2010, dan ir-Regolament jinkorpora emendi għall-istandards tekniċi regolatorji abbozzati, ippreżentati mill-ġdid fil-forma ta' opinjoni formali lill-Kummissjoni mill-Awtorità Bankarja Ewropea, mill-Awtorità Ewropea tal-Assigurazzjoni u l-Pensjonijiet tax-Xogħol u mill-Awtorità Ewropea tat-Titoli u s-Swieq, fuq il-bażi tal-emendi proposti tal-Kummissjoni,

ADOTTAT DAN IR-REGOLAMENT:

KAPITOLU I

DISPOŻIZZJONIJIET ĠENERALI DWAR IL-PROĊEDURI TAL-ĠESTJONI TAR-RISKJU

TAQSIMA 1

Definizzjonijiet u rekwiżiti ġenerali

Artikolu 1

Definizzjonijiet

Għall-finijiet ta' dan ir-Regolament, japplikaw id-definizzjonijiet li ġejjin:

(1)	“marġni inizjali” tfisser il-kollateral miġbur minn kontroparti biex tkopri l-iskopertura attwali u futura potenzjali tagħha fl-intervall bejn l-aħħar ġbir ta' marġni u l-likwidazzjoni ta' pożizzjonijiet jew iħħeġġjar tar-riskju tas-suq wara inadempjenza tal-kontroparti l-oħra;

(2)	“marġni ta' varjazzjoni” tfisser il-kollateral miġbur minn kontroparti biex jiġu riflessi r-riżultati ta' valwazzjoni skont is-suq jew valwazzjoni skont mudell ta' kuljum ta' kuntratti pendenti msemmijin fl-Artikolu 11(2) tar-Regolament (UE) Nru 648/2012;

(3)	“sett tan-nettjar” tfisser sett ta' kuntratti tad-derivattivi barra l-Borża (over-the-counter, “OTC”) ikklirjati mhux ċentralment bejn żewġ kontropartijiet li jkun soġġett għal ftehim ta' netting bilaterali infurzabbli legalment.

Artikolu 2

Rekwiżiti ġenerali

1. Il-kontropartijiet għandhom jistabbilixxu, japplikaw u jiddokumentaw proċeduri ta' ġestjoni tar-riskju għall-iskambju ta' kollateral għall-kuntratti tad-derivattivi OTC ikklirjati mhux ċentralment.

2. Il-proċeduri tal-ġestjoni tar-riskju msemmija fil-paragrafu 1 għandhom jinkludu proċeduri li jipprovdu għal jew jispeċifikaw dan li ġej:

(a)	l-eliġibbiltà tal-kollateral għall-kuntratti tad-derivattivi OTC ikklirjati mhux ċentralment konformi mat-Taqsima 2;

(b)	il-kalkolu u l-ġbir tal-marġnijiet għall-kuntratti tad-derivattivi OTC ikklirjati mhux ċentralment konformi mat-Taqsima 3;

(c)	il-ġestjoni u s-segregazzjoni tal-kollateral għall-kuntratti tad-derivattivi OTC ikklirjati mhux ċentralment konformi mat-Taqsima 5;

(d)	il-kalkolu tal-valur aġġustat tal-kollateral konformi mat-Taqsima 6;

(e)	l-iskambju ta' informazzjoni bejn kontropartijiet u l-awtorizzazzjoni u r-reġistrazzjoni ta' kull eċċezzjoni għall-proċeduri tal-ġestjoni tar-riskju msemmija fil-paragrafu 1;

(f)	ir-rappurtar tal-eċċezzjonijiet stabbiliti fil-Kapitolu II lill-maniġment superjuri;

(g)	it-termini tal-ftehimiet kollha meħtieġa li l-kontropartijiet ikunu daħlu fihom, l-aktar tard sa meta jiġi konkluż kuntratt tad-derivattivi OTC ikklirjat mhux ċentralment, inklużi t-termini tal-ftehim ta' netting u t-termini tal-iskambju tal-ftehim ta' kollateral skont l-Artikolu 3;

(h)	il- verifika perjodika tal-likwidità tal-kollateral li jiġi skambjat;

(i)	ir-riapproprjazzjoni fil-ħin tal-kollateral, fl-event ta' inadempjenza mill-kontroparti li tiddepożita, min-naħa tal-kontroparti kollettriċi; u

(j)	il-monitoraġġ regolari tal-iskoperturi li jinħolqu minn kuntratti tad-derivattivi OTC li huma tranżazzjonijiet intragrupp u s-saldu fil-ħin tal-obbligazzjonijiet li jirriżultaw minn dawn il-kuntratti.

Għall-finijiet tal-punt (g) tal-ewwel subparagrafu, it-termini tal-ftehimiet jinkludu l-aspetti kollha li jikkonċernaw l-obbligi li jirriżultaw minn kull kuntratt tad-derivattivi OTC ikklirjat mhux ċentralment li għandu jiġi konkluż, u mill-inqas dan li ġej:

(a)	kull obbligazzjoni ta' ħlas li tirriżulta bejn kontropartijiet;

(b)	il-kundizzjonijiet għan-nettjar tal-obbligazzjoni ta' ħlas;

(c)	avvenmenti ta' inadempjenza jew avvenimenti oħra ta' terminazzjoni tal-kuntratti tad-derivattivi OTC ikklirjati mhux ċentralment;

(d)	il-metodi ta' kalkolazzjoni kollha użati fir-rigward tal-obbligazzjonijiet ta' ħlas;

(e)	il-kundizzjonijiet għan-nettjar tal-obbligazzjoni ta' ħlas mat-terminazzjoni,

(f)	it-trasferiment ta' titoli u obbligazzjonijiet mat-terminazzjoni;

(g)	il-liġi li tirregola t-tranżazzjonijiet tal-kuntratti tad-derivattivi OTC ikklirjati mhux ċentralment.

3. Meta l-kontropartijiet jidħlu f'netting jew fi skambju ta' ftehim kollaterali, dawn iwettqu analiżi legali indipendenti tal-infurzabbiltà ta' dawn il-ftehimiet. Din l-analiżi tista' titwettaq minn unità indipendenti interna jew minn terza persuna indipendenti.

Ir-rekwiżit li titwettaq l-analiżi msemmija fl-ewwel subparagrafu titqies li tkun issodisfata fil-konfront tal-ftehim ta' netting meta dak il-ftehim ikun rikonoxxut skont l-Artikolu 296 tar-Regolament (UE) Nru 575/2013.

4. Il-kontropartijiet għandhom jistabbilixxu politiki biex jivvalutaw fuq bażi kontinwa l-infurzabbiltà tan-netting u l-iskambju tal-ftehimiet ta' kollateral li jidħlu fihom.

5. Il-proċeduri tal-ġestjoni tar-riskju msemmijin fil-paragrafu 1 għandhom jiġu ttestjati, analizzati u aġġornati skont il-ħtieġa u tal-inqas kull sena.

6. Jekk mitluba jagħmlu dan, il-kontropartijiet li jużaw mudelli ta' marġni inizjali skont it-Taqsima 4 għandhom jipprovdu lill-awtoritajiet kompetenti b'kull dokumentazzjoni relatata mal-proċeduri tal-ġestjoni tar-riskju msemmija fil-paragrafu 2(b) f'kull ħin.

Artikolu 3

Ftehim dwar skambju ta' kollateral

Il-ftehim dwar skambju ta' kollateral imsemmi fil-punt (g) tal-ewwel subparagrafu tal-Artikolu 2(2) għandu jinkludi tal-inqas it-termini li ġejjin:

(a)	il-livelli u t-tip ta' kollateral meħtieġ;

(b)	il-ftehimiet ta' segregazzjoni;

(c)	is-sett tan-nettjar li għalih jirreferi l-iskambju ta' kollateral;

(d)	il-proċeduri għan-notifika, il-konferma u l-aġġustament ta' appelli għall-marġni;

(e)	il-proċeduri għas-saldu ta' appelli għall-marġni għal kull tip ta' kollateral eliġibbli;

(f)	il-proċeduri, il-metodi, il-perjodi ta' żmien u l-allokazzjoni tar-responsabbiltajiet għall-kalkolu tal-marġnijiet u l-valwazzjoni tal-kollateral;

(g)	l-eventi meqjusa bħala l-eventi ta' inadempjenza jew tat-terminazzjoni;

(h)	il-liġi applikabbli għall-kuntratt tad-derivattivi OTC ikklirjati mhux ċentralment;

(i)	il-liġi applikabbli għall-ftehim dwar skambju ta' kollateral.

TAQSIMA 2

Eliġibbiltà

Artikolu 4

Kollateral eliġibbli

1. Kontroparti għandha tiġbor kollateral mill-klassijiet ta' assi li ġejjin biss:

(a)	flus kontanti fil-forma ta' flus ikkreditati għal kont fi kwalunkwe valuta, jew pretensjonijiet simili għall-ħlas lura ta' flus, bħal depożiti tas-suq tal-flus;

(b)	deheb fil-forma ta' ingotti ta' deheb pur allokat ta' konsenja tajba rikonoxxuta;

(c)	titoli ta' dejn maħruġa mill-gvernijiet ċentrali jew il-banek ċentrali ta' Stati Membri;

(d)	titoli ta' dejn maħruġa mill-gvernijiet reġjonali jew l-awtoritajiet lokali tal-Istati Membri li l-iskoperturi tagħhom jiġu ttrattati bħala skoperturi għall-gvern ċentrali ta' dak l-Istat Membru partikolari skont l-Artikolu 115(2) tar-Regolament (UE) Nru 575/2013;

(e)	titoli ta' dejn maħruġa mill-entitajiet tas-settur pubbliku tal-Istati Membri li l-iskoperturi tagħhom jiġu ttrattati bħala espożizzjonijiet għall-gvern ċentrali, il-gvern reġjonali jew awtorità lokali ta' dak l-Istat Membru partikolari skont l-Artikolu 116(4) tar-Regolament (UE) Nru 575/2013;

(f)	titoli ta' dejn maħruġa mill-gvernijiet reġjonali jew awtoritajiet lokali tal-Istati Membri għajr dawk imsemmija fil-punt (d);

(g)	titoli ta' dejn maħruġa mill-entitajiet tas-settur pubbliku tal-Istati Membri għajr dawk imsemmija fil-punt (e);

(h)	titoli ta' dejn maħruġa minn banek tal-iżvilupp multilaterali elenkati fl-Artikolu 117(2) tar-Regolament (UE) Nru 575/2013;

(i)	titoli ta' dejn maħruġa mill-organizzazzjonijiet internazzjonali elenkati fl-Artikolu 118 tar-Regolament (UE) Nru 575/2013;

(j)	titoli ta' dejn maħruġa mill-gvernijiet jew il-banek ċentrali ta' pajjiżi terzi;

(k)	titoli ta' dejn maħruġa mill-gvernijiet reġjonali jew l-awtoritajiet lokali ta' pajjiżi terzi li jilħqu r-rekwiżiti tal-punti (d) u (e);

(l)	titoli ta' dejn maħruġa mill-gvernijiet reġjonali jew awtoritajiet lokali ta' pajjiżi terzi għajr dawk imsemmija fil-punti (d) u (e);

(m)	titoli ta' dejn maħruġa minn istituzzjonijiet ta' kreditu jew ditti ta' investiment inklużi l-bonds imsemmija fl-Artikolu 52(4) tad-Direttiva 2009/65/KE tal-Parlament Ewropew u tal-Kunsill (8);

(n)	bonds korporattivi;

(o)	is-segment ta' titolizzazzjoni l-iktar superjuri, kif definit fl-Artikolu 4(61) tar-Regolament (UE) Nru 575/2013, li mhuwiex rititolizzazzjoni kif definit fl-Artikolu 4(63) ta' dan ir-Regolament;

(p)	bonds konvertibbli bil-kundizzjoni li jistgħu jiġu kkonvertiti biss f'ekwitajiet li huma inklużi f'indiċi speċifikat skont il-punt (a) tal-Artikolu 197(8) tar-Regolament (UE) Nru 575/2013;

(q)	ekwitajiet inklużi f'indiċi speċifikat skont il-punt (a) tal-Artikolu 197(8) tar-Regolament (UE) Nru 575/2013;

(r)	ishma jew unitajiet f'impriżi ta' investimenti kollettivi f'titoli trasferibbli (UCITS), bil-kundizzjoni li jintlaħqu l-kundizzjonijiet stabbiliti fl-Artikolu 5.

2. Kontroparti għandha tiġbor biss kollateral mill-klassijiet ta' assi msemmija fil-punti (f), (g) u minn (k) sa (r) tal-paragrafu 1 meta japplikaw il-kundizzjonijiet kollha li ġejjin:

(a)	l-assi mhumiex maħruġa mill-kontroparti li tiddepożita;

(b)	l-assi mhumiex maħruġa minn entitajiet li huma parti minn grupp li għalih tappartjeni l-kontroparti li tiddepożita;

(c)	l-assi mhumiex soġġetti mod ieħor għal xi riskju sinifikanti ta' korrelazzjoni ħażina kif definit fil-punti (a) u (b) tal-paragrafu 1 tal-Artikolu 291 tar-Regolament (UE) Nru 575/2013.

Artikolu 5

Kriterji ta' eliġibbiltà għal unitajiet jew ishma f'UCITS

1. Għall-finijiet tal-punt (r) tal-Artikolu 4(1), kontroparti tista' tuża biss unitajiet jew ishma f'UCITS bħala kollateral eliġibbli meta jintlaħqu l-kundizzjonijiet kollha li ġejjin:

(a)	l-unitajiet jew l-ishma jkollhom kwotazzjoni pubblika ta' kuljum tal-prezz;

(b)	l-UCITS ikunu limitati għal investiment f'assi eliġibbli skont l-Artikolu 4(1);

(c)	l-UCITS jilħqu l-kriterji stabbiliti fl-Artikolu 132(3) tar-Regolament (UE) Nru 575/2013.

Għall-finijiet tal-punt (b), l-UCITS jistgħu jużaw strumenti derivattivi biex jiħħeġġjaw ir-riskji li jinħolqu mill-assi li fihom jinvestu.

Meta UCITS tinvesti f'ishma jew unitajiet ta' UCITS oħra, il-kundizzjonijiet stabbiliti fl-ewwel subparagrafu għandhom japplikaw ukoll għal dawk l-UCITS.

2. Permezz ta' deroga mill-punt (b) tal-paragrafu 1, meta UCITS jew kwalunkwe waħda mill-UCITS sottostanti tagħha ma jinvestux biss f'assi li jkunu eliġibbli skont l-Artikolu 4(1), huwa biss il-valur tal-unità jew tal-azzjoni tal-UCITS li jirrappreżenta investiment f'assi eliġibbli li jista' jintuża bħala kollateral eliġibbli skont il-paragrafu 1 ta' dan l-Artikolu.

L-ewwel subparagrafu għandu japplika għal kwalunkwe UCITS ta' UCITS li għandha UCITS sottostanti tagħha stess.

3. Meta assi mhux eliġibbli ta' UCITS jista' jkollhom valur negattiv, il-valur tal-unità jew tal-azzjoni tal-UCITS li jista' jintuża bħala kollateral eliġibbli skont il-paragrafu 1 għandu jiġi ddeterminat bit-tnaqqis tal-valur negattiv massimu tal-assi mhux eliġibbli mill-valur ta' assi eliġibbli.

Artikolu 6

Valutazzjoni tal-kwalità kreditizja

1. Il-kontraparti kollettriċi għandha tivvaluta l-kwalità tal-kreditu tal-assi li jappartjenu għall-klassijiet tal-assi msemmija fil-punti (c), (d) u (e) tal-Artikolu 4(1) li mhumiex denominati jew mhumiex iffinanzjati fil-valuta domestika tal-emittent u fil-punti (f), (g), minn (j) sa (n) u (p) tal-Artikolu 4(1) bl-użu ta' waħda mill-metodoloġiji li ġejjin:

(a)	il-klassifikazzjonijiet interni msemmija fil-paragrafu 3 tal-kontroparti kollettriċi;

(b)

il-klassifikar intern imsemmi fil-paragrafu 3 tal-kontroparti li tissepożita, meta dik il-kontroparti tkun stabbilita fl-Unjoni jew f'pajjiż terz fejn il-kontroparti li tissepożita tkun soġġetta għal superviżjoni konsolidata vvalutata ekwivalenti għal dik irregolata bid-dritt tal-Unjoni skont l-Artikolu 127 tad-Direttiva 2013/36/UE;

(c)

valutazzjoni tal-kwalità kreditizja maħruġa minn Istituzzjoni Esterna tal-Valutazzjoni tal-Kreditu (ECAI) rikonoxxuta kif definit fl-Artikolu 4(98) tar-Regolament (UE) Nru 575/2013 jew valutazzjoni tal-kwalità kreditizja ta' aġenzija ta' kreditu għall-esportazzjoni msemmija fl-Artikolu 137 ta' dak ir-Regolament.

2. Il-kontroparti kollettriċi għandha tivvaluta l-kwalità kreditizja tal-assi li jappartjenu għall-klassi tal-assi msemmija fil-punt (o) tal-Artikolu 4(1) bl-użu tal-metodoloġija msemmija fil-punt (c) tal-paragrafu 1 ta' dan l-Artikolu.

3. Kontroparti li titħalla tuża l-approċċ ibbażat fuq klassifikazzjonijiet interni (IRB) skont l-Artikolu 143 tar-Regolament (UE) Nru 575/2013 tista' tuża l-klassifikazzjonijiet interni tagħha sabiex tivvaluta l-kwalità kreditizja tal-kollateral miġbur għall-finijiet ta' dan ir-Regolament.

4. Kontroparti li tuża l-approċċ IRB skont il-paragrafu 3 għandha tiddetermina l-iskala tal-kwalità kreditizja tal-kollateral konformi mal-Anness I.

5. Kontroparti li tuża l-approċċ IRB skont il-paragrafu 3 għandha tikkomunika lill-kontroparti l-oħra l-iskala tal-kwalità kreditizja msemmija fil-paragrafu 4 assoċjata mal-assi li jkollhom jiġu skambjati bħala kollateral.

6. Għall-finijiet tal-paragrafu 1(c), il-valutazzjoni tal-kwalità kreditizja għandha tiġi mmappjata għall-iskali tal-kwalità kreditizja speċifikati skont l-Artikoli 136 jew 270 tar-Regolament (UE) Nru 575/2013.

Artikolu 7

Rekwiżiti speċifiċi għall-assi eliġibbli

1. Il-kontropartijiet għandhom jużaw biss l-assi msemmijin fil-punti (f), (g) u minn (j) sa (p) tal-Artikolu 4(1) bħala kollateral meta l-kwalità kreditizja tagħhom tkun ġiet ivvalutata bħala l-iskali tal-kwalità kreditizja 1, 2 jew 3 skont l-Artikolu 6.

2. Il-kontropartijiet għandhom jużaw biss l-assi msemmijin fil-punti (c), (d), u (e) tal-Artikolu 4(1) li mhumiex denominati jew iffinanzjati fil-valuta domestika tal-emittent bħala kollateral meta l-kwalità kreditizja tagħhom tkun ġiet ivvalutata bħala l-passi tal-kwalità kreditizja 1, 2, 3 jew 4 skont l-Artikolu 6.

3. Il-kontropartijiet għandhom jistabbilixxu proċeduri għat-trattament tal-assi skambjati bħala kollateral konformi mal-paragrafi 1 u 2 li l-kwalità kreditizja tagħhom tiġi vvalutata sussegwentement bħala:

(a)	l-iskala 4 jew lil hinn minnha għall-assi msemmijin fil-paragrafu 1;

(b)	lil hinn mill-iskala 4 għall-assi msemmijin fil-paragrafu 2.

4. Il-proċeduri msemmijin fil-paragrafu 3 għandhom jilħqu r-rekwiżiti kollha li ġejjin:

(a)	għandhom jipprojbixxu lill-kontropartijiet milli jiskambjaw assi addizzjonali vvalutati bħala tal-kwalità kreditizja msemmija fil-paragrafu 3;

(b)	għandhom jistabbilixxu skeda li biha l-assi vvalutati bħala tal-kwalità kreditizja msemmija fil-paragrafu 3 u diġà skambjati bħala kollateral jiġu sostitwiti tul perjodu ta' żmien li ma jaqbiżx ix-xahrejn;

(c)	għandhom jistabbilixxu skala tal-kwalità kreditizja li teħtieġ is-sostituzzjoni immedjata tal-assi msemmija fil-paragrafu 3;

(d)	għandhom jippermettu li l-kontropartijiet iżidu l-haircuts fuq il-kollateral rilevanti dment li l-kollateral ma jkunx ġie sostitwit skont l-iskeda msemmija fil-punt (b).

5. Il-kontropartijiet ma għandhomx jużaw il-klassijiet tal-assi msemmija fl-Artikolu 4(1) bħala kollateral meta ma jkollhom l-ebda aċċess għas-suq għal dawn l-assi jew meta ma jkunux jistgħu jillikwidaw dawn l-assi fil-ħin f'każ ta' inadempjenza tal-kontroparti li tiddepożita.

Artikolu 8

Limiti ta' konċentrazzjoni għall-marġni inizjali

1. Meta l-kollateral jinġabar bħala marġni inizjali konformi mal-Artikolu 13, għandhom japplikaw il-limiti li ġejjin għal kull kontroparti kollettriċi:

(a)

is-somma tal-valuri tal-marġni inizjali miġbura mill-klassijiet tal-assi msemmija fil-punti (b), (f), (g), u minn (l) sa (r) tal-Artikolu 4(1) maħruġa minn emittent singolu jew minn entitajiet li jappartjenu għall-istess grupp ma taqbiżx l-ikbar wieħed mill-valuri li ġejjin:

(i)	15 % tal-kollateral miġbur mill-kontroparti li tiddepożita;

(ii)	EUR 10 miljun jew l-ekwivalenti f'valuta oħra;

(b)

is-somma tal-valuri tal-marġġni inizjali miġbura mill-klassijiet tal-assi msemmija fil-punti (o), (p) u (q) tal-Artikolu 4(1), meta l-klassijiet tal-assi msemmija fil-punti (p) u (q) ta' dan l-Artikolu jinħarġu minn istituzzjonijiet kif definit fir-Regolament (UE) Nru 575/2013, ma taqbiżx l-ikbar wieħed mill-valuri li ġejjin:

(i)	40 % tal-kollateral miġbur mill-kontroparti li tiddepożita;

(ii)	EUR 10 miljun jew l-ekwivalenti f'valuta oħra.

Il-limiti stabbiliti fl-ewwel subparagrafu għandhom japplikaw ukoll għall-ishma jew l-unitajiet fl-UCITS meta l-UCITS tinvesti primarjament fil-klassijiet tal-assi msemmija f'dan is-subparagrafu.

2. Meta l-kollateral jinġabar bħala marġni inizjali skont l-Artikolu 13 f'eċċess ta' EUR 1 biljun u kull kontroparti tappartjeni għal waħda mill-kategoriji elenkati fil-paragrafu 3, japplikaw il-limiti li ġejjin għall-ammont tal-marġni inizjali f'eċċess ta' EUR 1 biljun miġbura minn kontroparti:

(a)	is-somma tal-valuri tal-marġni inizjali miġbura mill-klassijiet tal-assi msemmija fil-punti minn (c) sa (l) tal-Artikolu 4(1) maħruġa minn emittent singolu jew minn emittenti domiċiljati fl-istess pajjiż ma għandhiex taqbeż il-50 % tal-marġni inizjali miġbura minn din il-kontroparti.

(b)	Meta l-marġni inizjali tinġabar fi flus kontanti, il-limitu ta' konċentrazzjoni ta' 50 % imsemmija fil-punt (a) iqis ukoll l-iskoperturi għar-riskju mid-detentur tat-terza persuna jew il-kustodju li jkollu l-flus.

3. Il-kontropartijiet imsemmijin fil-paragrafu 2 għandhom ikunu wieħed minn dawn li ġejjin:

(a)	istituzzjonijiet identifikati bħala G-SIIs konformi mal-Artikolu 131 tad-Direttiva 2013/36/UE;

(b)	istituzzjonijiet identifikati bħala O-SIIs konformi mal-Artikolu 131 tad-Direttiva 2013/36/UE;

(c)	kontropartijiet li ma jkunux arranġamenti ta' skema tal-pensjoni u li għalihom is-somma tal-valuri tal-kollateral li għandu jinġabar taqbeż il-EUR 1 biljun.

4. Meta l-kollateral jinġabar bħala marġni inizjali skont l-Artikolu 13 b'eċċess minn EUR 1 biljun minn arranġament ta' skema tal-pensjoni, il-kontroparti kollettriċi għandha tistabbilixxi proċeduri biex timmaniġġja r-riskju ta' konċentrazzjoni rigward il-kollateral miġbur mill-klassijiet tal-assi msemmija fil-punti minn (c) sa (l) tal-Artikolu 4(1), inkluża diversifikazzjoni adegwata ta' dan il-kollateral.

5. Meta l-istituzzjonijiet imsemmija fil-punti (a) u (b) tal-paragrafu 3 jiġbru marġni inizjali fi flus minn kontroparti singola li hija wkoll istituzzjoni msemmija f'dawn il-punti, il-kontroparti kollettriċi għandha tiżgura li mhux iktar minn 20 % tal-marġni inizjali jinżamm minn kustodju ta' terza persuna singola.

6. Il-paragrafi minn 1 sa 4 ma għandhomx japplikaw għall-kollateral miġbur fil-forma ta' strumenti finanzjarji li jkunu l-istess bħall-istrument finanzjarju sottostanti tal-kuntratt tad-derivattivi OTC ikklirjat mhux ċentralment.

7. Il-kontroparti kollettriċi tivvaluta l-konformità mal-kundizzjonijiet stipulati fil-paragrafu 2 ta' dan l-Artikolu mill-inqas kull darba li l-marġni inizjali tiġi kkalkulata skont l-Artikolu 9(2).

8. Permezz tad-deroga mill-paragrafu 7, kontroparti msemmija fil-punti (a), (b) u (c) tal-Artikolu 2(10) tar-Regolament (UE) Nru 648/2012 tista' tivvaluta konformità mal-kundizzjonijiet stipulati fil-paragrafu 2 kull trimestru, diment li l-ammont tal-marġni inizjali miġbur minn kull kontroparti individwali ikun dejjem inqas minn EUR 800 miljun matul it-trimestru li jippreċedi il-valutazzjoni.

TAQSIMA 3

Kalkolu u ġbir tal-marġnijiet

Artikolu 9

Frekwenza tal-kalkolu u d-determinazzjoni tad-data tal-kalkolu

1. Il-kontropartijiet għandhom jikkalkulaw marġni ta' varjazzjoni skont l-Artikolu 10 tal-inqas kuljum.

2. Il-kontropartijiet għandhom jikkalkulaw il-marġni inizjali skont l-Artikolu 11 mhux iktar tard mill-jum ta' negozju wara wieħed minn dawn l-eventi:

(a)	meta kuntratt ġdid tad-derivattivi OTC ikklirjat mhux ċentralment jiġi eżegwit jew jiżdied mas-sett tan-nettjar;

(b)	meta kuntratt eżistenti tad-derivattivi OTC ikklirjat mhux ċentralment jiskadi jew jitneħħa mis-sett tan-nettjar;

(c)	meta kuntratt eżistenti tad-derivattivi OTC ikklirjat mhux ċentralment jikkawża pagament jew konsenja għajr id-depożitu u l-ġbir ta' marġnijiet;

(d)	meta l-marġni inizjali jiġi kkalkulat skont l-approċċ standardizzat imsemmi fil-Artikolu 11(1) u kuntratt eżistenti jiġi riklassifikat f'termini tal-kategorija tal-assi msemmija fil-paragrafu 1 tal-Anness IV bħala riżultat ta' ħin imnaqqas sal-maturità;

(e)	meta ma jkun twettaq l-ebda kalkolu fl-għaxart ijiem tan-negozju preċedenti.

3. Għall-fini tad-determinazzjoni tad-data tal-kalkolu għall-marġni inizjali u ta' varjazzjoni, għandu japplika dan li ġej:

(a)	meta żewġ kontropartijiet jinsabu fl-itess żona tal-ħin, il-kalkolu għandu jkun ibbażat fuq is-sett tan-nettjar tal-jum tan-negozju preċedenti;

(b)	meta żewġ kontropartijiet ma jkunux jinsabu fl-istess żona tal-ħin, il-kalkolu għandu jkun ibbażat fuq it-tranżazzjonijiet fis-sett tan-nettjar li jiġu ffirmati qabel 16:00 tal-jum tan-negozju ta' qabel taż-żona tal-ħin li fiha s-siegħa 16:00 tiġi l-ewwel.

Artikolu 10

Kalkolu tal-marġni ta' varjazzjoni

L-ammont tal-marġni ta' varjazzjoni li għandu jinġabar minn kontroparti għandu jkun l-aggregazzjoni tal-valuri kkalkulati skont l-Artikolu 11(2) tar-Regolament (UE) Nru 648/2012 tal-kuntratti kollha fis-sett tan-nettjar, nieqes il-valur tal-marġni ta' varjazzjoni kollu li jkun inġabar qabel, nieqes il-valur nett ta' kull kuntratt fis-sett tan-nettjar stabbilit fil-punt tal-iffirmar tal-kuntratt, u biż-żieda tal-valur tal-marġni ta' varjazzjoni kollu li jkun ġie ddepożitat qabel.

Artikolu 11

Kalkolu tal-marġni inizjali

1. Il-kontropartijiet għandhom jikkalkulaw l-ammont tal-marġni inizjali li jkollu jinġabar jew bl-użu tal-approċċ standardizzat stabbilit fl-Anness IV inkella permezz tal-mudelli tal-marġnijiet inizjali msemmija fit-Taqsima 4 jew it-tnejn li huma.

2. Il-ġbir tal-marġni inizjali titwettaq mingħajr it-tpaċija tal-ammonti tal-marġni inizjali bejn iż-żewġ kontropartijiet.

3. Meta l-kontropartijiet jużaw kemm l-approċċ standardizzat stabbilit fl-Anness IV kif ukoll il-mudelli ta' marġni inizjali msemmija fit-Taqsima 4 fir-rigward tal-istess sett tan-nettjar, dawn jużawhom b'mod konsistenti għal kull kuntratt tad-derivattivi OTC ikklirjat mhux ċentralment.

4. Il-kontropartijiet li jikkalkulaw il-marġni inizjali skont it-Taqsima 4 ma għandhom jikkunsidraw l-ebda korrelazzjoni bejn il-valur tal-iskoperatura mhux garantita u l-kollateral f'dan il-kalkolu.

5. Il-kontropartijiet għandhom jifthiemu dwar il-metodu li kull kontroparti tuża biex tiddetermina l-marġni inizjali li jkollha tiġbor iżda mhumiex meħtieġa jużaw metodoloġija komuni.

6. Meta kontroparti waħda jew it-tnejn li huma jiddependu fuq mudell ta' marġni inizjali, għandhom jifthiemu dwar il-mudell żviluppat skont it-Taqsima 4.

Artikolu 12

Dispożizzjoni tal-marġni ta' varjazzjoni

1. Il-kontroparti li tiddepożita għandha tipprovdi l-marġni ta' varjazzjoni kif ġej:

(a)	fl-istess jum tan-negozju tad-data tal-kalkolu ddeterminata skont l-Artikolu 9(3);

(b)	jew, meta jintlaħqu l-kundizzjonijiet fil-paragrafu 2, fi żmien jumejn tan-negozju mid-data tal-kalkolu ddeterminata skont l-Artikolu 9(3).

2. Id-dispożizzjoni tal-marġni ta' varjazzjoni skont il-paragrafu 1(b) jista' jiġi applikat għal dan li ġej:

(a)

is-settijiet tan-netting li jinkludu kuntratti tad-derivattivi li ma jkunux soġġetti għal rekwiżiti ta' marġni inizjali skont dan ir-Regolament, meta l-kontroparti li tiddepożita tkun ipprovdiet, fid-data tal-ikkalkular tal-marġni ta' varjazzjoni jew qabel, ammont minn qabel ta' kollateral eliġibbli ikkalkulat bl-istess mod bħal dak applikabbli għal marġnijiet inizjali skont l-Artikolu 15, li għalih il-kontroparti kolletriċi tkun użat perjodu ta' riskju b'marġni (margin period of risk, “MPOR”) li jkun mill-inqas ugwali għall-għadd ta' jiem ta' bejniethom u li jkun jinkludi d-data tal-ikkalkular u d-data tal-ġbir;

(b)

is-settijiet tan-nettjar li jinkludu kuntratti soġġetti għal rekwiżiti tal-marġnijiet inizjali skont dan ir-Regolament, meta l-marġni inizjali jiġi aġġustat b'wieħed mill-modi li ġejjin:

(i)	biż-żieda tal-MPOR imsemmi fl-Artikolu 15(2) bin-numru ta' jiem bejn, u li jinkludu, id-data tal-kalkolu ddeterminata skont l-Artikolu 9(3) u d-data tal-ġbir iddeterminata skont il-paragrafu 1 ta' dan l-Artikolu;

(ii)

biż-żieda tal-marġni inizjali kkalkulat skont l-approċċ standardizzat imsemmi fl-Artikolu 11 bl-użu ta' metodoloġija xierqa waqt li jiġi kkunsidrat l-MPOR li jiżdied bin-numru ta' jiem bejn data u oħra, u bl-inklużjoni tad-data tal-kalkolu ddeterminata skont l-Artikolu 9(3) u d-data tal-ġbir iddeterminata skont il-paragrafu 2 ta' dan l-Artikolu.

Għall-finijiet tal-punt (a), f'każ li ma jkun hemm l-ebda mekkaniżmu għal segregazzjoni fis-seħħ bejn iż-żewġ kontropartijiet, dawk il-kontropartijiet jistgħu jpaċu l-ammonti li għandhom jiġu pprovduti.

3. Fl-eventwalità ta' tilwima dwar l-ammont ta' marġni ta' varjazzjoni li huwa mistenni, il-kontropartijiet għandhom jipprovdu, fl-istess perjodu ta' żmien imsemmi fil-paragrafu 1, tal-inqas il-parti mill-ammont ta' marġni ta' varjazzjoni li ma tkunx ikkontestata.

Artikolu 13

Dispożizzjoni tal-marġni inizjali

1. Il-kontroparti li tiddepożita għandha tipprovdi l-marġni inizjali skont it-Taqsima 5.

2. Il-kontroparti li tiddepożita għandha tipprovdi marġni inizjali fl-istess jum tan-negozju tad-data tal-kalkolu ddeterminata skont l-Artikolu 9(3).

3. Fl-eventwalità ta' tilwima dwar l-ammont ta' marġni inizjali li huwa mistenni, il-kontropartijiet għandhom jipprovdu tal-inqas il-parti tal-ammont tal-marġni inizjali li dwarha ma jkunx hemm tilwim fl-istess jum tan-negozju tad-data tal-kalkolu ddeterminata skont l-Artikolu 9(3).

TAQSIMA 4

Mudelli ta' marġnijiet inizjali

Artikolu 14

Rekwiżiti ġenerali

1. Meta kontroparti tuża mudell ta' marġni inizjali, dan il-mudell jista' jiġi żviluppat minn kwalunkwe waħda mill-kontropartijiet jew it-tnejn li huma, jew minn aġent estern.

Meta kontroparti tuża mudell ta' marġni inizjali żviluppat minn aġent estern, il-kontroparti għandha tibqa' responsabbli biex tiżgura li dan il-mudell jikkonforma mar-rekwiżiti msemmija f'din it-Taqsima.

2. Il-mudelli tal-marġnijiet inizjali għandhom jiġu żviluppati b'mod li jaqbad ir-riskji sinifikanti kollha li jinħolqu mill-iffirmar ta' kuntratti tad-derivattivi OTC ikklirjati mhux ċentralment inklużi fis-sett tan-nettjar, inkluż in-natura, l-iskala u l-kumplessità ta' dawn ir-riskji u għandhom jilħqu r-rekwiżiti li ġejjin:

(a)	il-mudell jinkorpora fatturi ta' riskju korrispondenti għall-valuti individwali li fihom dawk il-kuntratti fis-sett tan-nettjar huma denominati;

(b)	il-mudell jinkorpora fatturi ta' riskju taċ-ċaqliq fir-rata tal-imgħax korrispondenti għall-valuti individwali li fihom dawk il-kuntratti jiġu denominati;

(c)	il-kurva tar-rendiment tiġi diviża f'minimu ta' sitt meded ta' maturità għal skoperturi għar-riskju ta' ċaqliq fir-rata tal-imgħax fil-valuti u s-swieq ewlenin;

(d)	il-mudell jaqbad ir-riskju ta' movimenti bejn kurvi ta' rendiment differenti u bejn meded ta' maturità differenti;

(e)	il-mudell jinkorpora fatturi ta' riskju separati tal-inqas għal kull ekwità, indiċi tal-ekwità, komodità jew indiċi tal-komoditajiet sinifikanti għal dawk il-kuntratti;

(f)	il-mudell jaqbad ir-riskju li jinħoloq minn pożizzjonijiet inqas likwidi u pożizzjonijiet bi trasparenza limitata tal-prezzijiet f'xenarji realistiċi tas-suq;

(g)	il-mudell jaqbad ir-riskju, li mod ieħor ma jinqabadx minn karatteristiċi oħrajn tal-mudell, li jinħoloq minn kuntratti tad-derivattivi fejn il-klassi tal-assi sottostanti hija l-kreditu;

(h)	il-mudell jaqbad ir-riskju ta' movimenti bejn fatturi ta' riskju sottostanti simili iżda mhux identiċi, u l-iskopertura għal tibdil fil-valuri li jinħolqu minn diskrepanzi fil-maturità;

(i)	il-mudell jaqbad dipendenzi mhux lineari ewlenin;

(j)	il-mudell jinkorpora metodoloġiji għal ittestjar retrospettiv li jinkludu testijiet statistiċi tar-rendiment tal-mudell;

(k)	il-mudell jiddetermina liema eventi joħolqu tibdil fil-mudell, kalibrazzjoni jew azzjoni oħra ta' rimedju.

3. Il-proċeduri tal-immaniġġar tar-riskju msemmija fl-Artikolu 2(1) għandhom jiżguraw li kun sar monitoraġġ tal-prestazzjoni tal-mudell fuq bażi kontinwa inkluż l-ittestjar retrospettiv tal-mudell tal-inqas kull tliet xhur.

Għall-finijiet tal-ewwel subparagrafu, l-ittestjar retrospettiv jinkludi tqabbil bejn il-valuri prodotti mill-mudell u l-valuri tas-suq milħuqa tal-kuntratti tad-derivattivi OTC ikklirjati mhux ċentralment fis-sett tan-nettjar.

4. Il-proċeduri tal-immaniġġar tar-riskju msemmija fl-Artikolu 2(1) għandhom jenfasizzaw il-metodoloġiji użati biex jitwettaq ittestjar retrospettiv, inklużi testijiet statistiċi tal-prestazzjoni.

5. Il-proċeduri tal-immaniġġjar tar-riskju msemmija fl-Artikolu 2(1) għandhom jiddeskrivu liema riżultati tal-ittestjar retrospettiv iwasslu għal bidla fil-mudell, rikalibrazzjoni jew azzjonijiet oħra ta' rimedju.

6. Il-proċeduri tal-immaniġġjar tar-riskju msemmija fl-Artikolu 2(1) għandhom jiżguraw li l-kontropartijiet iżommu rekords tar-riżultati tal-ittestjar retrospettiv imsemmi fil-paragrafu 3 ta' dan l-Artikolu.

7. Il-kontropartijiet għandhom jipprovdu l-informazzjoni kollha meħtieġa biex jiġi spjegat il-kalkolu ta' valur partikolari u tal-mudell tal-marġni inizjali lill-kontroparti l-oħra b'mod li terza persuna esperta tkun tista' tivverifika dan il-kalkolu.

8. Il-mudell tal-marġni inizjali għandu jirrifletti l-inċertezza tal-parametri, il-korrelazzjoni, ir-riskju ta' bażi u l-kwalità tad-data b'mod prudenti.

Artikolu 15

Intervall ta' kunfidenza u MPOR

1. Il-varjazzjonijiet preżunti fil-valur tal-kuntratti tad-derivattivi OTC ikklirjati mhux ċentralment fis-sett tan-nettjar għall-kalkolu tal-marġnijiet inizjali bl-użu ta' mudell ta' marġni inizjali għandhom jiġu bbażati fuq intervall ta' fiduċja fuq naħa waħda ta' 99 fil-mija tul MPOR ta' mill-inqas għaxart (10) ijiem.

2. L-MPOR għall-kalkolu tal-marġnijiet inizjali bl-użu ta' mudell ta' marġni inizjali msemmi fil-paragrafu 1 għandu jinkludi:

(a)	il-perjodu li jista' jgħaddi mill-aħħar skambju ta' marġni ta' marġni ta' varjazzjoni sal-inadempjenza tal-kontroparti;

(b)

il-perjodu meħtieġ stmat għas-sostituzzjoni ta' kull kuntratt tad-derivattivi OTC ikklirjat mhux ċentralment fis-sett tan-nettjar jew l-iħħeġġjar tar-riskji li jinħolqu minnhom, b'kunsiderazzjoni tal-livell ta' likwidità tas-suq meta dawn it-tipi ta' kuntratti jiġu nnegozjati, il-volum totali tal-kuntratti tad-derivattivi OTC ikklirjati mhux ċentralment f'dan is-suq u n-numru ta' parteċipanti fis-suq.

Artikolu 16

Kalibrazzjoni tal-parametri tal-mudell

1. Il-parametri użati fil-mudelli tal-marġnijiet inizjali għandhom jiġu kkalibrati, mill-inqas kull sena, abbażi ta' data storika minn perjodu ta' żmien b'durata minima ta' tliet snin u durata massima ta' ħames snin.

2. Id-data użata għall-kalibrazzjoni tal-parametri tal-mudelli tal-marġnijiet inizjali għandha tinkludi l-perjodu kontinwu l-iktar reċenti mid-data li fiha titwettaq il-kalibrazzjoni msemmija fil-paragrafu 1 u tal-inqas 25 % ta' din id-data għandha tkun rappreżentattiva tal-perjodu ta' stress finanzjarju sinifikanti (“data stressjata”).

3. Meta d-data stressjata msemmija fil-paragrafu 2 ma tikkostitwixxi tal-inqas 25 % tad-data użata fil-mudell tal-marġni inizjali, id-data l-inqas reċenti tad-data storika msemmija fil-paragrafu 1 għandha tinbidel b'data minn perjodu ta' strress finanzjarju sinifikanti, sa ma l-proporzjon ġenerali tad-data stressjata jkun tal-inqas 25 % tad-data ġenerali użata fil-mudell tal-marġni inizjali.

4. Il-perjodu ta' stress finanzjarju sinifikanti użat għall-kalibrazzjoni tal-parametri għandu jiġi identifikat u applikat b'mod separat tal-inqas għal kull waħda mill-klassijiet tal-assi msemmijin fl-Artikolu 17(2).

5. Il-parametri għandhom jiġu kkalibrati bl-użu ta' data ponderata b'mod ugwali.

6. Il-parametri jistgħu jiġu kkalibrati għal perjodi iqsar mill-MPOR determinat skont l-Artikolu 15. Meta jintużaw perjodi iqsar, il-parametri għandhom jiġu aġġustati għal dan l-MPOR minn metodoloġija xierqa.

7. Il-kontropartijiet għandu jkollhom politiki miktubin li jindikaw iċ-ċirkostanzi li jikkawżaw kalibrazzjoni iktar frekwenti.

8. Il-kontropartijiet għandhom jistabbilixxu proċeduri għall-aġġustament tal-valur tal-marġnijiet li jkollhom jiġu skambjati bħala reazzjoni għal bidla fil-parametri minħabba bidla fil-kundizzjonijiet tas-suq. Dawn il-proċeduri għandhom jipprevedu li l-kontropartijiet ikunu jistgħu jiskambjaw il-marġni inizjali addizzjonali li jirriżulta minn din il-bidla tal-parametri tul perjodu li jvarja bejn jum tan-negozju u tletin jum tan-negozju.

9. Il-kontropartijiet għandhom jistabbilixxu proċeduri li jirrigwardaw il-kwalità tad-data użata fil-mudell konformi mal-paragrafu 1, inkluża l-għażla ta' fornituri ta' data xierqa u t-tindif u l-interpolazzjoni ta' din id-data.

10. Indikaturi għad-data użata fil-mudelli tal-marġnijiet inizjali għandhom jintużaw biss meta jintlaħqu ż-żewġ kundizzjonijiet li ġejjin:

(a)	id-data disponibbli ma tkunx suffiċjenti jew ma tirriflettix il-volatilità vera ta' kuntratt tad-derivattivi OTC jew portafoll ta' kuntratti tad-derivattivi OTC fis-sett tan-nettjar;

(b)	l-indikaturi wasslu għal livell konservattiv ta' marġnijiet.

Artikolu 17

Diversifikazzjoni, iħħeġġjar u tpaċija għar-riskji fil-klassijiet sottostanti

1. Il-mudelli tal-marġni inizjali għandhom jinkludu biss il-kuntratti tad-derivattivi OTC ikklirjati mhux ċentralment fl-istess sett tan-nettjar. Il-mudelli tal-marġni inizjali jistgħu jipprevedu diversifikazzjoni, iħħeġġjar u tapaċija tar-riskji li jirrizultaw mir-riskji tal-kuntratti fl-istess sett tan-nettjar, diment li d-diversifikazzjoni, l-iħħeġġjar u t-tpaċija tar-riskji jitwettqu biss fl-istess klassi tal-assi sottostanti kif imsemmi fil-paragrafu 2.

2. Għall-finijiet tal-paragrafu 1, id-diversifikazzjoni, l-iħħeġġjar u t-tpaċija tar-riskji jistgħu jitwettqu biss fil-klassijiet tal-assi sottostanti li ġejjin:

(a)	rati tal-imgħax, valuta u inflazzjoni;

(b)

ekwità;

(c)

kreditu;

(d)	komoditajiet u deheb;

(e)

oħrajn.

Artikolu 18

Rekwiżiti kwalitattivi

1. Il-kontropartijiet għandhom jistabbilixxu proċess intern ta' governanza biex jivvalutaw l-adattezza tal-mudell ta' marġnijiet inizjali fuq bażi kontinwa, inkluż dan li ġej kollu:

(a)	validazzjoni inizjali tal-mudell minn persuni kkwalifikati kif xieraq li jkunu indipendenti mill-persuni li jiżviluppaw il-mudell;

(b)	validazzjoni ta' segwitu kull darba li ssir bidla sinifikanti fil-mudell tal-marġnijiet inizjali u tal-inqas darba fis-sena;

(c)

proċess ta' awditu regolari biex jiġi vvalutat dan li ġej:

(i)	l-integrità u l-kredibbiltà tas-sorsi tad-data;

(ii)	is-sistema ta' informazzjoni maniġerjali użata għall-applikazzjoni tal-mudell;

(iii)

l-akkuratezza u l-kompletezza tad-data użata;

(iv)	il-preċiżjoni u l-adegwatezza tas-suppożizzjonijiet ta' volatilità u ta' korrelazzjoni.

2. Id-dokumentazzjoni tal-proċeduri tal-ġestjoni tar-riskju msemmija fil-punt (b) tal-Artikolu 2(2) dwar il-mudell tal-marġnijiet inizjali għandha tilħaq il-kundizzjonijiet kollha li ġejjin:

(a)	għandha tippermetti li terza persuna mgħarrfa tifhem it-tifsila u d-dettall operazzjonali tal-mudell tal-marġnijiet inizjali;

(b)	għandha tinkludi s-suppożizzjonijiet u l-limitazzjonijiet ewlenin tal-mudell tal-marġnijiet inizjali;

(c)	għandha tiddefinixxi ċ-ċirkostanzi li taħthom is-suppożizzjonijiet tal-mudell tal-marġnijiet inizjali ma jibqgħux iżjed validi.

3. Il-kontropartijiet għandhom jiddokumentaw it-tibdil kollu fil-mudell tal-marġnijiet inizjali. Din id-dokumentazzjoni għandha tniżżel ukoll fid-dettall ir-riżultati tal-validazzjonijiet, imsemmija fil-paragrafu 1, imwettqa wara dan it-tibdil.

TAQSIMA 5

Immaniġġar u segregazzjoni tal-kollateral

Artikolu 19

Immaniġġar u segregazzjoni tal-kollateral

1. Il-proċeduri msemmija fl-Artikolu 2(2)(c) għandhom jinkludu dan li ġej:

(a)	valutazzjoni ta' kuljum tal-kollateral miżmum skont it-Taqsima 6;

(b)	l-arranġamenti ġuridiċi u struttura ta' żamma tal-kollateral li jippermettu l-aċċess għall-kollateral riċevut meta jkun qed jinżamm minn terza persuna;

(c)	meta l-marġni inizjali tinżamm mill-fornitur tal-kollateral, dak il-kollateral jinżamm f'kontijiet ta' kustodja 'l bogħod mill-insolvenza;

(d)	il-marġni inizjali mhux fi flus jinżamm konformi mal-paragrafi 3 u 4;

(e)

il-flus miġbura bħala marġni inizjali jinżammu f'kontijiet tal-flus f'banek ċentrali jew istituzzjonijiet ta' kreditu li jissodisfaw il-kundizzjonijiet kollha li ġejjin:

(i)	ikunu awtorizzati skont id-Direttiva 2013/36/UE jew ikunu awtorizzati f'pajjiż terz fejn ikun instab li l-arranġamenti superviżorji u regolatorji tiegħu huma ekwivalenti skont l-Artikolu 142(2) tar-Regolament (UE) Nru 575/2013;

(ii)	la jkunu l-kontropartijiet li jiddepożitaw u lanqas dawk kollettriċi, u lanqas parti mill-istess grupp bħala waħda mill-kontropartijiet;

(f)	id-disponibbiltà tal-kollateral mhux użat għal-likwidatur jew uffiċjal ieħor tal-insolvenza tal-kontroparti f'kontumaċja;

(g)	il-marġni inizjali huwa liberament trasferibbli fil-ħin lill-kontroparti li tiddepożita f'każ ta' inadempjenza tal-kontroparti kollettriċi;

(h)

li l-kollateral mhux fi flus huwa trasferibbli mingħajr l-ebda restrizzjoni regolatorja jew legali jew pretensjoni minn terza persuna, inklużi dawk tal-likwidatur tal-kontroparti kollettriċi jew kustodju estern, għajr l-irhna għal tariffi u l-ispejjeż imġarrba meta jiġu pprovduti l-kontijiet kustodjali u oħrajn għajr irhna li s-soltu jiġu imposti fuq it-titoli kollha f'sistema ta' kklirjar li fiha jkun jista' jinżamm dan il-kollateral;

(i)	li kull kollateral mhux użat jingħata lura bis-sħiħ lill-kontroparti li tiddepożita, bl-esklużjoni tal-kostijiet u l-ispejjeż imġarrba għall-proċess tal-ġbir u ż-żamma tal-kollateral.

2. Kull kollateral iddepożitat bħala marġni inizjali jew ta' varjazzjoni jista' jiġi sostitwit b'kollateral alternattiv meta jintlaħqu l-kundizzjonijiet kollha li ġejjin:

(a)	is-sostituzzjoni ssir skont it-termini tal-ftehim bejn il-kontropartijiet imsemmi fl-Artikolu 3;

(b)	il-kollateral alternattiv huwa eliġibbli konformi mat-Taqsima 2;

(c)	il-valur tal-kollateral alternattiv huwa biżżejjed biex jintlaħqu r-rekwiżiti kollha tal-marġnijiet wara l-applikazzjoni ta' kwalunkwe haircut relevanti.

3. Il-marġni inizjali għandu jkun protett mill-inadempjenza jew mill-insolvenza tal-kontroparti kollettriċi billi tiġi segregata b'wieħed minn dawn il-modi, jew it-tnejn li huma:

(a)	fil-kotba jew fir-rekords ta' detentur jew kustodju ta' terza persuna;

(b)	permezz ta' arranġamenti vinkolanti oħrajn;

4. Il-kontropartijiet għandhom jiżguraw li l-kollateral mhux fi flus li jiġi skambjat bħala marġni inizjali jiġi ssegregat kif ġej:

(a)	meta l-kollateral jinżamm mill-kontroparti kollettriċi fuq bażi proprjetarja, għandu jiġi ssegregat mill-bqija tal-assi proprjetarji tal-kontroparti kollettriċi;

(b)	meta l-kollateral jinżamm mill-kontroparti li tiddepożita fuq bażi nonproprjetarja, għandu jiġi ssegregat mill-bqija tal-assi proprjetarji tal-kontroparti li tiddepożita;

(c)	meta l-kollateral jinżamm fir-reġistri u r-rekords ta' kustodju jew detentur ieħor estern, għandu jiġi ssegregat mill-assi proprjetarji ta' dan id-detentur jew kustodju estern.

5. Meta kollateral mhux fi flus jinżamm mill-parti kollettriċi jew minn detentur jew kustodju estern, il-kontroparti kollettriċi għandha dejjem tipprovdi lill-kontroparti li tiddepożita l-għażla li tissegrega l-kollateral tagħha mill-assi ta' kontropartijiet li jiddepożitaw oħrajn.

6. Il-kontropartijiet għandhom iwettqu reviżjoni ġuridika indipendenti sabiex jivverifikaw li l-arranġamenti tas-segregazzjoni jilħqu r-rekwiżiti msemmija fil-paragrafu 1(g) u fil-paragrafi 3, 4 u 5. Din l-analiżi ġuridika tista' titwettaq minn unità interna indipendenti jew minn terza persuna indipendenti.

7. Il-kontropartijiet għandhom jipprovdu evidenza lill-awtoritajiet kompetenti tagħhom tal-konformità mal-paragrafu 6 rigward kull ġurisdizzjoni rilevanti u, b'talba minn awtorità kompetenti, għandhom jistabbilixxu politiki li jiżguraw il-valutazzjoni kontinwa tal-konformità.

8. Għall-finijiet tal-paragrafu 1(e), il-kontropartijiet għandhom jivvalutaw il-kwalità tal-kreditu tal-istituzzjoni ta' kreditu msemmija fih bl-użu ta' metodoloġija li ma tiddependix biss jew b'mod mekkanistiku fuq valutazzjonijiet tal-kwalità tal-kreditu esterni.

Artikolu 20

It-trattament tal-marġnijiet inizjali miġbura

1. Il-kontroparti kollettriċi ma għandhiex tagħmel riipotekazzjoni, tirhan mill-ġdid jew tuża mill-ġdid il-kollateral miġbur bħala marġni inizjali.

2. Minkejja l-paragrafu 1, detentur terz jista' juża l-marġni inizjali riċevut fi flus għal finijiet ta' riinvestiment.

TAQSIMA 6

Valutazzjoni tal-kollateral

Artikolu 21

Kalkolu tal-valur aġġustat tal-kollateral

1. Il-kontropartijiet għandhom jaġġustaw il-valur tal-kollateral miġbur konformi mal-metodoloġija stabbilita fl-Anness II jew metodoloġija li tuża stimi proprji tal-volatilità skont l-Artikolu 22.

2. Meta jaġġustaw il-valur tal-kollateral skont il-paragrafu 1, il-kontropartijiet jistgħu jinjoraw ir-riskju tal-munita barranija li jirriżulta mill-pożizzjonijiet f'valuti li huma soġġetti għal ftehim intergovernattiv legalment vinkolanti li jillimita l-varjazzjoni ta' dawn il-pożizzjonijiet relattivi għal valuti oħrajn koperti mill-istess ftehim.

Artikolu 22

Stimi proprji tal-valur aġġustat tal-kollateral

1. Il-kontropartijiet għandhom jaġġustaw il-valur tal-kollateral miġbur bl-użu ta' stimi proprji tal-volatilità skont l-Anness III.

2. Il-kontropartijiet għandhom jaġġornaw is-settijiet tad-data tagħhom u jikkalkulaw l-istimi proprji tal-volatilità msemmija fl-Artikolu 21 kull darba li l-livell tal-volatilità tal-prezzijiet tas-suq jinbidel b'mod materjali u tal-inqas darba kull trimestru.

3. Għall-finijiet tal-paragrafu 2, il-kontropartijiet għandhom jiddeterminaw minn qabel il-livelli ta' volatilità li jwasslu għal kalkolu mill-ġdid tal-haircuts kif imsemmi fl-Anness III.

4. Il-proċeduri msemmija fl-Artikolu 2(2)(d) għandhom jinkludu politiki għall-monitoraġġ tal-kalkolu tal-istimi proprji tal-volatilità u l-integrazzjoni ta' dawn l-istimi fil-proċess tal-ġestjoni tar-riskju ta' din il-kontroparti.

5. Il-politiki msemmija fil-paragrafu 4 għandhom ikunu soġġetti għal analiżi interna li tinkludi dan kollu li ġej:

(a)	l-integrazzjoni tal-istimi fil-proċess tal-ġestjoni tar-riskju tal-kontroparti, li għandha sseħħ tal-inqas darba fis-sena;

(b)	l-integrazzjoni tal-haircuts stmati fil-ġestjoni tar-riskju ta' kuljum;

(c)	il-validazzjoni ta' kull tibdil sinifikanti fil-proċess għall-kalkolu tal-istimi;

(d)	il-verifika tal-konsistenza, it-tempestività u l-kredibbiltà tas-sorsi tad-data użati għall-kalkolu tal-istimi;

(e)	il-preċiżjoni u l-adegwatezza tas-suppożizzjonijiet tal-volatilità.

6. L-analiżi msemmija fil-paragrafu 5 għandha titwettaq b'mod regolari fil-proċess tal-awditjar intern tal-kontroparti.

KAPITOLU II

DISPOŻIZZJONIJIET SPEĊIFIĊI DWAR IL-PROĊEDURI TAL-ĠESTJONI TAR-RISKJU

TAQSIMA 1

Eżenzjonijiet

Artikolu 23

CCPs awtorizzati bħala istituzzjonijiet ta' kreditu

Permezz ta' deroga mill-Artikolu 2(2), il-kontropartijiet jistgħu jipprovdu fil-proċeduri tal-immaniġġar ta' riskju tagħhom li ma jiġi skambjat l-ebda kollateral fir-rigward tal-kuntratti tad-derivattivi OTC ikklirjati mhux ċentralment li jkunu daħlu fihom b'CCPs awtorizzati bħala istituzzjonijiet ta' kreditu skont id-Direttiva 2013/36/UE.

Artikolu 24

Kontropartijiet mhux finanzjarji u kontropartijiet ta' pajjiżi terzi

Permezz ta' deroga mill-Artikolu 2(2), il-kontropartijiet, fil-proċeduri tal-ġestjoni tar-riskju tagħhom, jistgħu jipprevedu li l-ebda kollateral ma jiġi skambjat b'rabta ma' kuntratti tad-derivattivi OTC ikklirjati mhux ċentralment maqbula ma' kontropartijiet mhux finanzjarji li ma jissodisfawx il-kundizzjonijiet tal-Artikolu 10(1)(b) tar-Regolament (UE) Nru 648/2012, jew ma' entitajiet mhux finanzjarji stabbiliti f'pajjiż terz li ma jissodisfawx il-kundizzjonijiet tal-Artikolu 10(1)(b) tar-Regolament (UE) Nru 648/2012 li kieku kienu stabbiliti fl-Unjoni.

Artikolu 25

Ammont minimu tat-trasferiment

1. Permezz ta' deroga mill-Artikolu 2(2), il-kontropartijiet, fil-proċeduri tal-ġestjoni tar-riskju tagħhom, jistgħu jipprevedu li ma jinġabar l-ebda kollateral minn kontroparti meta l-ammont dovut mill-aħħar ġbir ta' kollateral ikun daqs jew inqas mill-ammont maqbul mill-kontropartijiet (“ammont minimu tat-trasferiment”).

L-ammont minimu tat-trasferiment m'a għandux jaqbeż EUR 500 000 jew l-ammont ekwivalenti f'valuta oħra.

2. Meta l-kontropartijiet jaqblu dwar ammont minimu tat-trasferiment, l-ammont ta' kollateral dovut għandu jiġi kkalkulat bħala s-somma ta':

(a)	il-marġni ta' varjazzjoni dovut mill-aħħar ġbir tiegħu kkalkulat konformi mal-Artikolu 10, inkluż kull eċċess ta' kollateral;

(b)	il-marġni inizjali dovut mill-aħħar ġbir tiegħu kkalkulat skont l-Artikolu 11, inkluż kull eċċess ta' kollateral;

3. Meta l-ammont ta' kollateral dovut jaqbeż l-ammont minimu tat-trasferiment miftiehem bejn il-kontropartijiet, il-kontroparti kollettriċi għandha tiġbor l-ammont sħiħ tal-kollateral dovut mingħajr it-tnaqqis tal-ammont minimu tat-trasferiment.

4. Il-kontropartijiet jistgħu jaqblu dwar ammonti minimi tat-trasferiment separati għal marġnijiet inizjali u ta' varjazzjoni, bil-kundizzjoni li s-somma ta' dawn l-ammonti minimi tat-trasferiment tkun daqs EUR 500 000 jew inqas jew l-ammont ekwivalenti f'valuta oħra.

5. Meta l-kontropartijiet jaqblu dwar ammonti minimi tat-trasferiment separati konformi mal-paragrafu 4, il-kontroparti kollettriċi għandha tiġbor l-ammont sħiħ tal-marġni inizjali jew ta' varjazzjoni dovut mingħajr l-ebda tnaqqis minn dawn l-ammonti minimi tat-trasferiment meta l-ammont tal-kollateral inizjali jew ta' varjazzjoni dovut jaqbeż l-ammont tat-trasferiment minimu.

Artikolu 26

Kalkolu tal-marġni ma' kontropartijiet ta' pajjiż terz

Meta kontroparti tkun domiċiljata f'pajjiż terz, il-kontropartijiet jistgħu jikkalkulaw il-marġnijiet abbażi ta' sett tan-nettjar li jinkludi t-tipi ta' kuntratti li ġejjin:

(a)	id-derivattivi OTC ikklirjati mhux ċentralment soġġetti għal rekwiżiti ta' marġni skont dan ir-Regolament;

(b)

kuntratti li jissodisfaw iż-żewġ kundizzjonijiet li ġejjin:

(i)	huma identifikati bħala derivattivi OTC ikklirjati mhux ċentralment mir-reġim regolatorju applikabbli għall-kontroparti domiċiljata fil-pajjiż terz;

(ii)	ikunu soġġetti għal regoli dwar il-marġni fir-reġim regolatorju applikabbli għall-kontroparti domiċiljata fil-pajjiż terz.

TAQSIMA 2

Eżenzjonijiet fil-kalkolu tal-livelli tal-marġni inizjali

Artikolu 27

Kuntratti ta' kambju

Permezz ta' deroga mill-Artikolu 2(2), il-kontropartijiet, fil-proċeduri tal-ġestjoni tar-riskju tagħhom, jistgħu jipprevedu li ma jinġabrux marġnijiet inizjali rigward:

(a)	kuntratti tad-derivattivi OTC imħallsa b'mod fiżiku li jinvolvu biss l-iskambju ta' żewġ valuti differenti f'data futura speċifika b'rata fissa miftiehma fid-data tan-negozju tal-kuntratt li jkopri l-iskambju (“kuntratti forward tal-kambju”);

(b)

kuntratti tad-derivattivi OTC saldati b'mod fiżiku li jinvolvu biss skambju ta' żewġ valuti differenti f'data speċifika b'rata fissa li tiġi mifthiema fid-data tan-negozju tal-kuntratt li jkopri l-iskambju, u skambju b'lura taż-żewġ valuti f'data iktar tard u b'rata fissa li tiġi mifthiema wkoll fid-data tan-negozju tal-kuntratt li jkopri l-iskambju (“swaps tal-valuti skont ir-rata tal-kambju”);

(c)

l-iskambju ta' kapital ta' kuntratti tad-derivattivi OTC ikklirjati mhux ċentralment li skonthom il-kontropartijiet jiskambjaw biss l-ammont ewlieni u kull ħlas ta' imgħax f'valuta waħda għall-ammont ewlieni u kull ħlas ta' imgħax f'valuta oħra, f'punti speċifikati fiż-żmien, skont formola speċifikata (“swap tal-valuti”).

Artikolu 28

Limitu bbażat fuq ammont nozzjonali

1. Permezz ta' deroga mill-Artikolu 2(2), il-kontropartijiet, fil-proċeduri tal-ġestjoni tar-riskju tagħhom, jistgħu jipprevedu li l-marġnijiet inizjali ma jinġabrux għall-kuntratti tad-derivattivi OTC kollha ffirmati fi żmien sena kalendarja meta waħda miż-żewġ kontropartijiet ikollha ammont nozzjonali aggregat medju fi tmiem ix-xahar ta' kuntratti tad-derivattivi OTC ikklirjati mhux ċentralment għax-xhur ta' Marzu, April u Mejju tas-sena preċedenti ta' inqas minn EUR 8 biljun.

L-ammont nozzjonali aggregat medju fi tmiem ix-xahar imsemmi fl-ewwel subparagrafu għandu jiġi kkalkulat fil-livell tal-kontroparti jew fil-livell tal-grupp meta l-kontroparti tagħmel parti minn grupp.

2. Meta kontroparti tagħmel parti minn grupp, il-kalkolu tal-ammont nozzjonali aggregat medju fi tmiem ix-xahar għandu jinkludi l-kuntratti tad-derivattivi OTC ikklirjati mhux ċentralment kollha tal-grupp, inklużi l-kuntratti tad-derivattivi OTC ikklirjati mhux ċentralment intragrupp kollha.

Għall-finijiet tal-ewwel subparagrafu, il-kuntratti tad-derivattivi OTC li jkunu tranżazzjonijiet interni għandhom jiġu kkunsidrati darba waħda biss.

3. L-UCITS awtorizzata skont id-Direttiva 2009/65/KE u fondi ta' investimenti alternattivi ġestiti minn maniġers ta' fondi ta' investiment alternattivi awtorizzati jew irreġistrati skont id-Direttiva 2011/61/UE tal-Parlament Ewropew u tal-Kunsill (9) għandhom jiġu kkunsidrati bħala entitajiet distinti u għandhom jiġu ttrattati separatament meta jiġu applikati l-limiti msemmija fil-paragrafu 1 meta jintlaħqu l-kundizzjonijiet li ġejjin:

(a)	il-fondi jkunu puli segregati distinti ta' assi għall-finijiet tal-insolvenza jew il-falliment tal-fond;

(b)	il-puli segregati tal-assi ma jiġux kollateralizzati, iggarantiti jew appoġġati finanzjarjament mod ieħor minn fondi ta' investiment oħrajn jew mill-maniġers tagħhom.

Artikolu 29

Limitu bbażat fuq l-ammonti tal-marġni inizjali

1. Permezz ta' deroga mill-Artikolu 2(2), il-kontropartijiet, fil-proċeduri tal-ġestjoni tar-riskju tagħhom, jistgħu jipprovdu li l-marġni inizjali miġbur jitnaqqas b'ammont sa massimu ta' EUR 50 miljun fil-każ tal-punti (a) u (b) ta' dan il-paragrafu jew EUR 10 miljun fil-każ tal-punt (c) meta:

(a)	l-ebda kontroparti ma tkun tappartjeni għall-ebda grupp;

(b)	il-kontropartijiet ikunu parti minn gruppi differenti;

(c)	iż-żewġ kontropartijiet ikunu jappartjenui għall-istess grupp.

2. Meta kontroparti ma tiġborx il-marġnijiet inizjali konformi mal-paragrafu 1(b), il-proċeduri tal-ġestjoni tar-riskju msemmija fl-Artikolu 2(1) għandhom jinkludu dispożizzjonijiet dwar il-monitoraġġ, fil-livell tal-grupp, ta' jekk dan il-livell limitu jinqabiżx u dispożizzjonijiet għaż-żamma ta' rekords xierqa tal-iskoperturi tal-grupp għal kull kontroparti singola fl-istess grupp.

3. L-UCITS awtorizzata skont id-Direttiva 2009/65/KE u fondi ta' investimenti alternattivi ġestiti minn maniġers ta' fondi ta' investiment alternattivi awtorizzati jew irreġistrati skont id-Direttiva 2011/61/UE għandhom jiġu kkunsidrati bħala entitajiet distinti u għandhom jiġu ttrattati separatament meta jiġu applikati l-limiti msemmija fil-paragrafu 1 meta jintlaħqu l-kundizzjonijiet li ġejjin:

(a)	il-fondi jkunu puli segregati distinti ta' assi għall-finijiet tal-insolvenza jew il-falliment tal-fond;

(b)	il-puli segregati tal-assi ma jiġux kollateralizzati, iggarantiti jew appoġġati finanzjarjament mod ieħor minn fondi ta' investiment oħrajn jew mill-maniġers tagħhom.

TAQSIMA 3

Eżenzjonijiet mir-rekwiżit li jiġi ddepożitat jew miġbur marġni inizjali jew ta' varjazzjoni

Artikolu 30

It-trattament tad-derivattivi assoċjati ma' bonds koperti għal finijiet ta' ħħeġġjar

1. Permezz ta' deroga mill-Artikolu 2(2) u meta l-kundizzjonijiet stabbiliti fil-paragrafu 2 ta' dan l-Artikolu jiġu ssodisfati, il-kontropartijiet jistgħu, fil-proċeduri tal-ġestjoni tar-riskju tagħhom, jipprevedu dan li ġej b'rabta mal-kuntratti tad-derivattivi OTC konklużi f'konnessjoni ma' bonds koperti:

(a)	il-marġni ta' varjazzjoni ma jiġix iddepożitat mill-emittent tal-bonds koperti jew mill-pula ta' kopertura iżda jinġabar mill-kontroparti tiegħu fi flus u jingħata lura lill-kontroparti tiegħu meta jkun dovut;

(b)	il-marġni inizjali ma jiġix iddepożitat jew miġbur.

2. Il-paragrafu 1 japplika meta jiġu ssodisfati l-kundizzjonijiet kollha li ġejjin:

(a)	il-kuntratt tad-derivattivi OTC ma jintemmx f'każ tar-riżoluzzjoni jew l-insolvenza tal-emittent tal-bonds koperti jew tal-pula ta' kopertura;

(b)

il-kontroparti għad-derivattiv OTC konkluż ma' emittenti ta' bonds koperti jew b'puli ta' kopertura għal bonds koperti tiġi kklassifikata tal-inqas pari passu mad-detenturi tal-bonds koperti għajr meta l-kontroparti għad-derivattiv OTC konkluż ma' emittenti ta' bonds koperti jew ma' puli ta' kopertura għal bonds koperti tkun il-parti kontumaċi jew il-parti affettwata, jew tirrinunzja l-klassifikazzjoni ta' pari passu;

(c)	il-kuntratt tad-derivattivi OTC jiġi rreġistrat jew irrekordjat fil-pula ta' kopertura tal-bond kopert konformi mal-leġiżlazzjoni nazzjonali dwar il-bonds koperti;

(d)	il-kuntratt tad-derivattivi OTC jintuża biss għall-iħħeġġjar tar-rata tal-imgħax jew tad-diskrepanzi fil-valuti tal-grupp ta' kopertura rigward il-bond kopert;

(e)	is-sett tan-nettjar ma jinkludix kuntratti tad-derivattivi OTC mhux relatati mal-pula ta' kopertura tal-bond kopert;

(f)	il-bond kopert li miegħu jkun assoċjat il-kuntratt tad-derivattivi OTC jissodisfa r-rekwiżiti tal-paragrafi (1), (2) u (3) tal-Artikolu 129 tar-Regolament (UE) Nru 575/2013;

(g)	il-pula ta' kopertura tal-bond kopert li miegħu jkun assoċjat il-kuntratt tad-derivattivi OTC hi soġġetta għal rekwiżit ta' kollateralizzazzjoni regolatorja ta' mill-inqas 102 %.

Artikolu 31

It-trattament tad-derivattivi b'kontropartijiet f'pajjiżi terzi fejn l-infurzabbiltà ġuridika tal-ftehimiet tan-nettjar jew ta' protezzjoni tal-kollateral ma tistax tiġi żgurata

1. Permezz ta' deroga mill-Artikolu 2(2), il-kontropartijiet stabbiliti fl-Unjoni jistgħu jipprevedu, fil-proċeduri tal-ġestjoni tar-riskju tagħhom, li mhuwiex meħtieġ li l-marġnijiet ta' varjazzjoni u inizjali jiġu ddepożitati għal kuntratti tad-derivattivi OTC ikklirjati mhux ċentralment konklużi ma' kontropartijiet stabbiliti f'pajjiż terz li għalih tkun tapplika kwalunkwe waħda minn dawn il-kundizzjonijiet li ġejjin:

(a)	l-analiżi ġuridika msemmija fl-Artikolu 2(3) tikkonferma li l-ftehim ta' netting u, meta jintuża, l-iskambju ta' ftehim ta' kollateral ma jistax jiġi infurzat legalment b'ċertezza f'kull żmien;

(b)	l-analiżi ġuridika msemmija fl-Artikolu 19(6) tikkonferma li r-rekwiżiti ta' segregazzjoni msemmija fl-Artikolu 19(3), (4) u (5) ma jistgħux jiġu ssodisfati.

Għall-finijiet tal-ewwel subparagrafu, il-kontropartijiet stabbiliti fl-Unjoni għandhom jiġbru l-marġni fuq bażi grossa.

2. Permezz ta' deroga mill-Artikolu 2(2), il-kontropartijiet stabbiliti fl-Unjoni jistgħu jipprevedu, fil-proċeduri tal-ġestjoni tar-riskju tagħhom, li mhuwiex meħtieġ li l-marġnijiet ta' varjazzjoni u inizjali jiġu ddepożitati jew li jinġabru għall-kuntratti konklużi ma' kontropartijiet stabbiliti f'pajjiż terz meta japplikaw il-kundizzjonijiet kollha li ġejjin:

(a)	il-punti (a) u, meta applikabbli, il-punt (b) tal-paragrafu 1 japplikaw;

(b)	l-analiżijiet ġuridiċi msemmija fil-punti (a) u (b) tal-paragrafu 1 jikkonfermaw li l-ġbir ta' kollateral konformi ma' dan ir-Regolament mhuwiex possibbli, anki abbażi ta' ġbir ta' kollateral bil-grossa;

(c)	il-proporzjon ikkalkulat konformi mal-paragrafu 3 huwa inqas minn 2,5 %.

3. Il-proporzjon imsemmi fil-paragrafu 2(c) għandu jkun ir-riżultat tad-diviżjoni tal-ammont li jirriżulta mill-punt (a) ta' dan il-paragrafu b'dak li jirriżulta mill-punt (b):

(a)

is-somma tal-ammonti nozzjonali ta' kwalunkwe kuntratt tad-derivattivi OTC pendenti tal-grupp li minnu tagħmel parti l-kontroparti li jkun ġie konkluż wara d-dħul fis-seħħ ta' dan ir-Regolament u li għalih ma jkun inġabar l-ebda marġni mill-kontropartijiet stabbiliti f'pajjiż terz li għalihom japplika l-punt (b) tal-paragrafu 2;

(b)	is-somma tal-ammonti nozzjonali tal-kuntratti tad-derivattivi OTC pendenti kollha tal-grupp li minnu tagħmel parti l-kontroparti, bl-esklużjoni tal-kuntratti tad-derivattivi OTC li jkunu tranżazzjonijiet intragrupp.

KAPITOLU III

KUNTRATTI DERIVATTIVI INTRAGRUPP

TAQSIMA 1

Proċeduri għall-kontropartijiet u l-awtoritajiet kompetenti meta jiġu applikati eżenzjonijiet għall-kuntratti tad-derivattivi intragrupp

Artikolu 32

Proċeduri għall-kontropartijiet u l-awtoritajiet kompetenti rilevanti

1. L-applikazzjoni jew in-notifika minn kontroparti lill-awtorità kompetenti skont il-paragrafi minn 6 sa 10 tal-Artikolu 11 tar-Regolament (UE) Nru 648/2012 għandhom jitqiesu bħala riċevuti meta l-awtorità kompetenti tirċievi l-informazzjoni kollha li ġejja:

(a)	l-informazzjoni kollha meħtieġa biex jiġi vvalutat jekk il-kundizzjonijiet speċifikati fil-paragrafi 6, 7, 8, 9 jew 10, rispettivament, tal-Artikolu 11 tar-Regolament (UE) Nru 648/2012 ikunux intlaħqu;

(b)	l-informazzjoni u d-dokumenti msemmijin fl-Artikolu 18(2) tar-Regolament Delegat tal-Kummissjoni (UE) Nru 149/2013 (10).

2. Meta awtorità kompetenti tiddetermina li tkun meħtieġa iktar informazzjoni sabiex jiġi vvalutat jekk intlaħqux il-kundizzjonijiet imsemmija fil-paragrafu 1(a), għandha tippreżenta talba bil-miktub għal informazzjoni lill-kontroparti.

3. Deċiżjoni meħuda minn awtorità kompetenti skont l-Artikolu 11(6) tar-Regolament (UE) Nru 648/2012 għandha tiġi kkomunikata lill-kontroparti fi żmien tliet xhur mill-irċevuta tal-informazzjoni kollha msemmija fil-paragrafu 1.

4. Meta awtorità kompetenti tilħaq deċiżjoni pożittiva skont il-paragrafi 6, 8, jew 10 tal-Artikolu 11 tar-Regolament (UE) Nru 648/2012, hija għandha tikkomunika din id-deċiżjoni pożittiva lill-kontroparti bil-miktub, u tispeċifika tal-inqas dan li ġej:

(a)	jekk l-eżenzjoni hijiex eżenzjoni sħiħa jew eżenzjoni parzjali;

(b)	fil-każ ta' eżenzjoni parzjali, identifikazzjoni ċara tal-limitazzjonijiet tal-eżenzjoni.

5. Meta awtorità kompetenti tasal għal deċiżjoni negattiva skont il-paragrafi 6, 8, jew 10 tal-Artikolu 11 tar-Regolament (UE) Nru 648/2012, jew toġġezzjona għal notifika skont il-paragrafi 7 jew 9 tal-Artikolu 11 ta' dan ir-Regolament, hija għandha tikkomunika din id-deċiżjoni negattiva jew din l-oġġezzjoni lill-kontroparti bil-miktub, u tispeċifika tal-inqas dan li ġej:

(a)	il-kundizzjonijiet tal-paragrafi 6, 7, 8, 9 jew 10, rispettivament, tal-Artikolu 11 tar-Regolament (UE) Nru 648/2012 li mhumiex issodisfati;

(b)	sommarju tar-raġunijiet għaliex huwa meqjus li dawn il-kundizzjonijiet mhumiex milħuqa.

6. Meta waħda mill-awtoritajiet kompetenti notifikati skont l-Artikolu 11(7) tar-Regolament (UE) Nru 648/2012 tqis li l-kundizzjonijiet imsemmija fil-punti (a) jew (b) tal-ewwel subparagrafu tal-Artikolu 11(7) ta' dan ir-Regolament mhumiex milħuqa, hija għandha tinnotifika lill-awtorità kompetenti l-oħra fi żmien xahrejn mill-irċevuta tan-notifika.

7. L-awtoritajiet kompetenti għandhom jinnotifikaw lill-kontropartijiet mhux finanzjarji bl-oġġezzjoni msemmija fil-paragrafu 5 fi żmien tliet xhur mill-wasla tan-notifika.

8. Deċiżjoni meħuda minn awtorità kompetenti skont l-Artikolu 11(8) tar-Regolament (UE) Nru 648/2012 għandha tiġi kkomunikata lill-kontroparti stabbilita fl-Unjoni fi żmien tliet xhur mill-irċevuta tal-informazzjoni kollha msemmija fil-paragrafu 1.

9. Deċiżjoni meħuda minn awtorità kompetenti ta' kontroparti finanzjarja msemmija fl-Artikolu 11(10) tar-Regolament (UE) Nru 648/2012 għandha tiġi kkomunikata lill-awtorità kompetenti tal-kontroparti mhux finanzjarja fi żmien xahrejn mill-irċevuta tal-informazzjoni kollha rċevuta msemmija fil-paragrafu 1 u lill-kontropartijiet fi żmien tliet xhur mill-irċevuta ta' din l-informazzjoni.

10. Il-kontropartijiet li jkunu ppreżentaw notifika jew ikunu rċevew deċiżjoni pożittiva skont il-paragrafi 6, 7, 8, 9 jew 10, rispettivament, tal-Artikolu 11 tar-Regolament (UE) Nru 648/2012 għandhom jinnotifikaw minnufih lill-awtorità kompetenti rilevanti b'kull bidla li tista' taffettwa l-ilħuq tal-kundizzjonijiet stabbiliti f'dawn il-paragrafi, kif applikabbli. L-awtorità kompetenti tista' toġġezzjona għall-applikazzjoni għall-eżenzjoni jew tirtira d-deċiżjoni pożittiva tagħha wara kwalunkwe bidla fiċ-ċirkustanzi li tista' taffettwa l-issodisfar ta' dawk il-kundizzjonijiet.

11. Meta deċiżjoni negattiva jew oġġezzjoni tiġi kkomunikata minn awtorità kompetenti, il-kontroparti rilevanti tista' tippreżenta biss applikazzjoni jew notifika oħra meta sseħħ bidla materjali fiċ-ċirkostanzi li jiffurmaw il-bażi tad-deċiżjoni jew l-oġġezzjoni tal-awtorità kompetenti.

TAQSIMA 2

Kriterji applikabbli għall-applikazzjoni ta' eżenzjonijiet għall-kuntratti tad-derivattivi intragrupp

Artikolu 33

Kriterji applikabbli dwar l-impediment legali tat-trasferiment fil-pront ta' fondi proprji u l-ħlas lura ta' obbligazzjonijiet

Impediment legali għat-trasferiment fil-pront ta' fondi proprji jew il-ħlas lura ta' obbligazzjonijiet bejn il-kontropartijiet kif imsemmi fil-paragrafi minn 5 sa 10 tal-Artikolu 11 tar-Regolament (UE) Nru 648/2012 għandu jitqies bħala eżistenti meta jkun hemm restrizzjonijiet effettivi jew previsti ta' natura legali inkluża kwalunkwe waħda minn dawn li ġejjin:

(a)	kontrolli tal-valuti u tal-kambju;

(b)	qafas regolatorju, amministrattiv, ġuridiku jew kuntrattwali li jipprevjeni l-appoġġ finanzjarju reċiproku jew jaffettwa b'mod sinifikanti t-trasferiment ta' fondi fi grupp;

(c)

tintlaħaq kwalunkwe waħda mill-kundizzjoniiet dwar l-intervent bikri, l-irkupru u r-riżoluzzjoni kif imsemmi fid-Direttiva 2014/59/UE tal-Parlament Ewropew u tal-Kunsill (11), u b'riżultat ta' dan l-awtorità kompetenti tipprevedi impediment għat-trasferiment fil-pront ta' fondi proprji jew ħlas lura ta' obbligazzjonijiet;

(d)	l-eżistenza ta' interessi minoritarji li jillimitaw is-setgħa tat-teħid ta' deċiżjonijiet fl-entitajiet li jiffurmaw il-grupp;

(e)	in-natura tal-istruttura legali tal-kontroparti, kif definit fl-istatuti, l-istrumenti ta' inkorporazzjoni u r-regoli interni tagħha.

Artikolu 34

Kriterji applikabbli dwar l-impedimenti prattiċi tat-trasferiment fil-pront ta' fondi proprji u l-ħlas lura ta' obbligazzjonijiet

Għandu jitqies li jkun jeżisti impediment prattiku għat-trasferiment fil-pront ta' fondi proprji jew il-ħlas lura ta' obbligazzjonijiet bejn il-kontropartijiet kif imsemmi fil-paragrafi minn 5 sa 10 tal-Artikolu 11 tar-Regolament (UE) Nru 648/2012 meta jkun hemm restrizzjonijiet ta' natura prattika, inkluż kwalunkwe waħda minn dawn li ġejjin:

(a)	disponibbiltà insuffiċjenti ta' assi likwidi jew mhux gravati għall-kontroparti rilevanti meta dovuti;

(b)	impedimenti ta' natura operazzjonali li jdewmu b'mod effettiv jew jipprevjenu dawn it-trasferimenti jew dan il-ħlas lura meta dovuti.

KAPITOLU IV

DISPOŻIZZJONIJIET TRANŻITORJI U FINALI

Artikolu 35

Dispożizzjonijiet tranżitorji

Il-kontropartijiet imsemmija fl-Artikolu 11(3) tar-Regolament (UE) Nru 648/2012 jista' jkompli japplika l-proċeduri tal-ġestjoni tar-riskju li jkollhom fis-seħħ fid-data tal-applikazzjoni ta' dan ir-Regolament fir-rigward tal-kuntratti tad-derivattivi OTC ikklirjati mhux ċentralment li jkunu daħlu fihom bejn is-16 ta' Awwissu 2012 u d-dati rilevanti tal-applikazzjoni ta' dan ir-Regolament.

Artikolu 36

Applikazzjoni tal-Artikolu 9(2), l-Artikolu 11, l-Artikoli minn 13 sa 18, il-punti (c), (d) u (f) tal-Artikolu 19(1), l-Artikolu 19(3) u l-Artikolu 20

1. L-Artikolu 9(2), l-Artikolu 11, l-Artikoli minn 13 sa 18, il-punti (c), (d) u (f) tal-Artikolu 19(1), l-Artikolu 19(3) u l-Artikolu 20 japplikaw kif ġej:

(a)	minn xahar wara d-data tad-dħul fis-seħħ ta' dan ir-Regolament, meta ż-żewġ kontropartijiet ikollhom, jew ikunu jappartjenu għal gruppi li kull wieħed minnhom ikollu ammont nozzjonali aggregat medju ta' derivattivi OTC ikklirjati mhux ċentralment ta' aktar minn EUR 3 000 biljun;

(b)	mill-1 ta' Settembru 2017, meta ż-żewġ kontropartijiet ikollhom, jew jagħmlu parti minn gruppi li kull wieħed minnhom ikollu, ammont nozzjonali aggregat medju ta' derivattivi OTC ikklirjati mhux ċentralment li jkun ogħla minn EUR 2 250 biljun;

(c)	mill-1 ta' Settembru 2018, meta ż-żewġ kontropartijiet ikollhom, jew jagħmlu parti minn gruppi li kull wieħed minnhom ikollu, ammont nozzjonali aggregat medju ta' derivattivi OTC ikklirjati mhux ċentralment li jkun ogħla minn EUR 1 500 biljun;

(d)	mill-1 ta' Settembru 2019, meta ż-żewġ kontropartijiet ikollhom, jew jagħmlu parti minn gruppi li kull wieħed minnhom ikollu, ammont nozzjonali aggregat medju ta' derivattivi OTC ikklirjati mhux ċentralment li jkun ogħla minn EUR 750 biljun;

(e)	mill-1 ta' Settembru 2020, meta ż-żewġ kontropartijiet ikollhom, jew jagħmlu parti minn gruppi li kull wieħed minnhom ikollu, ammont nozzjonali aggregat medju ta' derivattivi OTC ikklirjati mhux ċentralment li jkun ogħla minn EUR 8 biljuni.

2. Permezz ta' deroga mill-paragrafu 1, fejn il-kundizzjonijiet tal-paragrafu 3 ta' dan l-Artikolu jintlaħqu, l-Artikolu 9(2), l-Artikolu 11,l-Artikoli minn 13 sa 18, il-punti (c), (d) u (f) tal-Artikolu 19(1), l-Artikolu 19(3) u l-Artikolu 20 għandhom japplikaw kif ġej:

(a)	tliet (3) snin wara d-data tad-dħul fis-seħħ ta' dan ir-Regolament meta ma tiġi adottata l-ebda deċiżjoni dwar l-ekwivalenza skont l-Artikolu 13(2) tar-Regolament (UE) Nru 648/2012 għall-finijiet tal-Artikolu 11(3) ta' dan ir-Regolament rigward il-pajjiż terz rilevanti;

(b)

id-data l-iktar tard minn dawn li ġejjin meta tiġi adottata deċiżjoni dwar l-ekwivalenza skont l-Artikolu 13(2) tar-Regolament (UE) Nru 648/2012 għall-finijiet tal-Artikolu 11(3) ta' dan ir-Regolament rigward il-pajjiż terz rilevanti:

(i)	erba' xhur wara d-data tad-dħul fis-seħħ tad-deċiżjoni adottata skont l-Artikolu 13(2) tar-Regolament (UE) Nru 648/2012 għall-finijiet tal-Artikolu 11(3) ta' dan ir-Regolament rigward il-pajjiż terz rilevanti;

(ii)	id-data applikabbli ddeterminata skont il-paragrafu 1.

3. Id-deroga msemmija fil-paragrafu 2 għandha tapplika biss meta l-kontropartijiet għal kuntratt tad-derivattivi OTC ikklirjat mhux ċentralment jissodisfaw il-kundizzjonijiet kollha li ġejjin:

(a)	kontroparti waħda tkun stabbilita f'pajjiż terz u l-kontroparti l-oħra tkun stabbilita fl-Unjoni;

(b)	il-kontroparti stabbilita f'pajjiż terz tkun kontroparti finanzjarja jew kontroparti mhux finanzjarja;

(c)

il-kontroparti stabbilita fl-Unjoni tkun waħda minn dawn li ġejjin:

(i)	kontroparti finanzjarja, kontroparti mhux finanzjarja, kumpanija azzjonarja finanzjarja, istituzzjoni finanzjarja jew impriża ta' servizzi anċillari soġġetta għal rekwiżiti prudenzjali xierqa u l-kontroparti ta' pajjiż terz imsemmija fil-punt (a) tkun kontroparti finanzjarja;

(ii)	kontroparti finanzjarja jew kontroparti mhux finanzjarja u l-kontroparti ta' pajjiż terz imsemmija fil-punt (a) tkun kontroparti mhux finanzjarja;

(d)	iż-żewġ kontropartijiet ikunu inklużi fl-istess konsolidazzjoni fuq bażi sħiħa konformi mal-Artikolu 3(3) tar-Regolament (UE) Nru 648/2012;

(e)	iż-żewġ kontropartijiet ikunu soġġetti għal proċeduri ċentralizzati xierqa tal-evalwazzjoni, tal-kejl u tal-kontroll tar-riskju;

(f)	jintlaħqu r-rekwiżiti tal-Kapitolu III.

Artikolu 37

Applikazzjoni tal-Artikoli 9(1), 10 u 12

1. l-Artikoli 9(1), 10 u 12 għandhom japplikaw kif ġej:

(a)	minn xahar wara d-data tad-dħul fis-seħħ ta' dan ir-Regolament għall-kontropartijiet li t-tnejn li huma jkollhom, jew jagħmlu parti minn, gruppi li kull wieħed minnhom ikollu ammont nozzjonali aggregat medju ta' derivattivi OTC ikklirjati mhux ċentralment ta' aktar minn EUR 3 000 biljun;

(b)	mid-data li hija l-iktar tard bejn l-1 ta' Marzu 2017, jew xahar wieħed (1) wara d-data tad-dħul fis-seħħ ta' dan ir-Regolament għal kontropartijiet oħrajn.

2. Permezz ta' deroga mill-paragrafu 1 rigward il-kuntratti forward tal-kambju msemmija fil-punt (a) tal-Artikolu 27, l-Artikoli 9(1), 10 u 12 għandhom japplikaw f'waħda mid-dati li ġejjin, skont liema waħda li tiġi l-ewwel:

(a)	il-31 ta' Diċembru 2018, meta r-Regolament imsemmi fil-punt (b) ma jkunx għadu beda japplika;

(b)	id-data ta' dħul fis-seħħ tar-Regolament Delegat tal-Kummissjoni (*2) li jispeċifika xi elementi tekniċi relatati mad-definizzjoni ta' strumenti finanzjarji rigward kuntratti forward tal-kambju saldati b'mod fiżiku jew id-data ddeterminata skont il-paragrafu 1, skont liema tiġi aktar tard.

Artikolu 38

Dati tal-applikazzjoni għal kuntratti speċifiċi

1. Permezz ta' deroga mill-Artikoli 36(1) u 37, rigward id-derivattivi OTC kollha ikklirjati mhux ċentralment li huma għażliet ta' ekwità ta' stokk singolu jew għażliet fuq l-indiċi, l-Artikoli msemmija fl-Artikoli 36(1) u 37 għandhom japplikaw minn tliet (3) snin wara d-data tad-dħul fis-seħħ ta' dan ir-Regolament.

2. Permezz ta' deroga mill-Artikoli 36(1) u 37, meta kontroparti stabbilita fl-Unjoni tidħol f'kuntratt tad-derivattivi OTC mhux ikklirjati ma' kontroparti oħra li tappartjeni għall-istess grupp, l-Artikoli msemmija fl-Artikoli 36(1) u 37 għandhom japplikaw mid-dati speċifikati skont dawk l-Artikoli jew l-4 ta' Lulju 2017, skont liema tkun l-aktar tard.

Artikolu 39

Kalkolu tal-ammont nozzjonali aggregat medju

1. Għall-finijiet tal-Artikoli 36 u 37, l-ammont nozzjonali aggregat medju msemmi għandu jiġi kkalkulat bħala l-medja tal-ammont nozzjonali gross totali li jilħaq il-kundizzjonijiet kollha li ġejjin:

(a)	li jiġu rreġistrati fl-aħħar jum tan-negozju ta' Marzu, April u Mejju 2016 rigward il-kontropartijiet imsemmija fil-punt (a) tal-Artikolu 36(1);

(b)	li jiġu rreġistrati fl-aħħar jum tan-negozju ta' Marzu, April u Mejju tas-sena msemmija f'kull wieħed mill-punti fl-Artikolu 36(1);

(c)	jinkludi l-entitajiet kollha tal-grupp;

(d)	jinkludi l-kuntratti tad-derivattivi OTC ikklirjati mhux ċentralment kollha tal-grupp;

(e)	jinkludi l-kuntratti intragrupp tad-derivattivi OTC ikklirjati mhux ċentralment kollha tal-grupp, fejn kull wieħed minnhom jingħadd għal darba.

2. Għall-finijiet tal-paragrafu 1, l-UCITS awtorizzata skont id-Direttiva 2009/65/KE u fondi ta' investimenti alternattivi ġestiti minn maniġers ta' fondi ta' investiment alternattivi awtorizzati jew irreġistrati skont id-Direttiva 2011/61/UE għandhom jiġu kkunsidrati bħala entitajiet distinti u għandhom jiġu ttrattati separatament, meta jintlaħqu l-kundizzjonijiet li ġejjin:

(a)	il-fondi jkunu puli segregati distinti ta' assi għall-finijiet tal-insolvenza jew il-falliment tal-fond;

(b)	il-puli segregati tal-assi ma jiġux kollateralizzati, iggarantiti jew appoġġati finanzjarjament mod ieħor minn fondi ta' investiment oħrajn jew mill-maniġers tagħhom.

Artikolu 40

Dħul fis-seħħ

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-4 ta' Ottubru 2016.

Għall-Kummissjoni

Il-President

Jean-Claude JUNCKER

(1) ĠU L 201, 27.7.2012, p. 1.

(2) Ir-Regolament ta' Delega tal-Kummisjoni (UE) Nru 153/2013 tad-19 ta' Diċembru 2012 li jissupplimenta r-Regolament (UE) Nru 648/2012 tal-Parlament Ewropew u tal-Kunsill fir-rigward ta' standards tekniċi regolatorji dwar rekwiżiti għall-kontropartijiet ċentrali (ĠU L 52, 23.2.2013, p. 41).

(3) Ir-Regolament (UE) Nru 575/2013 tal-Parlament Ewropew u tal-Kunsill tas-26 ta' Ġunju 2013 dwar ir-rekwiżiti prudenzjali għall-istituzzjonijiet ta' kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, p. 1).

(4) Id-Direttiva 2013/36/UE tal-Parlament Ewropew u tal-Kunsill tas-26 ta' Ġunju 2013 dwar l-aċċess għall-attività tal-istituzzjonijiet ta' kreditu u s-superviżjoni prudenzjali tal-istituzzjonijiet ta' kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, 27.6.2013, p. 338).

(*1) C(2016) 2398 final.

(5) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).

(6) Ir-Regolament (UE) Nru 1094/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol), u li jemenda d-Deċiżjoni Nru 716/2009/KE u li jħassar id-Deċiżjoni tal-Kummissjoni 2009/79/KE (ĠU L 331, 15.12.2010, p. 48).

(7) Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(8) Id-Direttiva 2009/65/KE tal-Parlament Ewropew u tal-Kunsill tat-13 ta' Lulju 2009 dwar il-koordinazzjoni ta' liġijiet, regolamenti u dispożizzjonijiet amministrattivi fir-rigward tal-impriżi ta' investiment kollettiv f'titoli trasferibbli (undertakings for collective investment in transferable securities, UCITS) (ĠU L 302, 17.11.2009, p. 32).

(9) Id-Direttiva 2011/61/UE tal-Parlament Ewropew u tal-Kunsill tat-8 ta' Ġunju 2011 dwar Maniġers ta' Fondi ta' Investiment Alternattivi u li temenda d-Direttivi 2003/41/KE u 2009/65/KE u r-Regolamenti (KE) Nru 1060/2009 u (UE) Nru 1095/2010 (ĠU L 174, 1.7.2011, p. 1).

(10) Ir-Regolament Delegat tal-Kummissjoni (UE) Nru 149/2013 tad-19 ta' Diċembru 2012 li jissupplimenta r-Regolament (UE) Nru 648/2012 tal-Parlament Ewropew u tal-Kunsill fir-rigward tal-istandards tekniċi regolatorji dwar l-arranġamenti tal-ikklerjar indiretti, l-obbligu tal-ikklerjar, ir-reġistru pubbliku, l-aċċess għal ċentru tan-negozjar, kontropartijiet nonfinanzjarji, tekniki tal-mitigazzjoni tar-riskji għal kuntratti tad-derivattivi OTC mhux ikklerjati minn CCP (ĠU L 52, 23.2.2013, p. 11).

(11) Id-Direttiva 2014/59/UE tal-Parlament Ewropew u tal-Kunsill tal-15 ta' Mejju 2014 li tistabbilixxi qafas għall-irkupru u r-riżoluzzjoni ta' istituzzjonijiet ta' kreditu u ditti ta' investiment u li temenda d-Direttiva tal-Kunsill 82/891/KEE u d-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE, 2011/35/UE, 2012/30/UE u 2013/36/UE, u r-Regolamenti (UE) Nru 1093/2010 u (UE) Nru 648/2012, tal-Parlament Ewropew u tal-Kunsill (ĠU L 173, 12.6.2014, p. 190).

(*2) C(2016) 2398 final.

Skala tal-Kwalità Kreditizja	Probabilità tal-inadempjenza, kif definita fl-Artikolu 4(54) tar-Regolament (UE) 575/2013 inqas minn jew daqs:
1	0,10 %
2	0,25 %
3	1 %
4	7,5 %