2.2.2016   

MT

Il-Ġurnal Uffiċjali tal-Unjoni Ewropea

L 25/48

REGOLAMENT TA' IMPLIMENTAZZJONI TAL-KUMMISSJONI (UE) 2016/131

tal-1 ta' Frar 2016

li japprova s-C(M)IT/MIT (3:1) bħala sustanza attiva eżistenti għall-użu fil-prodotti bijoċidali għall-prodotti tat-tipi 2, 4, 6, 11, 12 u 13

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 528/2012 tal-Parlament Ewropew u tal-Kunsill tat-22 ta' Mejju 2012 dwar it-tqegħid fis-suq u l-użu tal-prodotti bijoċidali (1), u b'mod partikolari t-tielet subparagrafu tal-Artikolu 89(1) tiegħu,

Billi:

(1)

Ir-Regolament Delegat tal-Kummissjoni (UE) Nru 1062/2014 (2) jistabbilixxi lista ta' sustanzi attivi eżistenti li għandhom jiġu vvalutati biex possibbilment jiġu approvati għall-użu fil-prodotti bijoċidali. Dik il-lista tinkludi s-C(M)IT/MIT (3:1).

(2)

Is-C(M)IT/MIT (3:1) ġie vvalutat skont l-Artikolu 16(2) tad-Direttiva 98/8/KE tal-Parlament u tal-Kunsill (3) għall-użu fil-prodotti tat-tip 2, “diżinfettanti taż-żoni privati u taż-żoni tas-saħħa pubblika u prodotti bijoċidali oħra”, fil-prodotti tat-tip 4, “diżinfettanti taż-żoni tal-ikel u tal-għalf”, fil-prodotti tat-tip 6, “priservattivi ta' ġol-bottijiet”, fil-prodotti tat-tip 11, “priservattivi għas-sistemi tal-birda tal-likwidu u tal-proċessar”, u fil-prodotti tat-tip 12, “slimiċidi”, u fil-prodotti tat-tip 13 “Priservattivi ta' fluwidi fix-xogħol tal-metall” kif definiti fl-Anness V ta' dik id-Direttiva, li jikkorrispondu rispettivament mat-tipi ta' prodotti 2, 4, 6, 11, 12 u 13 kif definiti fl-Anness V tar-Regolament (UE) Nru 528/2012.

(3)

Franza ġiet magħżula bħala l-awtorità kompetenti tal-valutazzjoni u ssottomettiet ir-rapporti tal-valutazzjoni, flimkien mar-rakkomandazzjonijiet tagħha, lill-Kummissjoni fid-19 ta' Ottubru 2011, fis-27 ta' Novembru 2012 u fit-22 ta' April 2013 f'konformità mal-paragrafi 4 u 6 tal-Artikolu 14 tar-Regolament tal-Kummissjoni (KE) Nru 1451/2007 (4).

(4)

Skont l-Artikolu 7(1)(b) tar-Regolament Delegat tal-Kummissjoni (UE) Nru 1062/2014, il-Kumitat tal-Prodotti Bijoċidali fformula l-opinjonijiet tal-Aġenżija Ewropea għas-Sustanzi Kimiċi fil-5 ta' Frar 2015, fl-14 ta' April 2015 u fis-17 ta' Ġunju 2015, filwaqt li qies il-konklużjonijiet tal-awtorità kompetenti tal-evalwazzjoni.

(5)

Skont dawn l-opinjonijiet, il-prodotti bijoċidali li jintużaw għall-prodotti tat-tipi 2, 4, 6, 11, 12 u 13 u li fihom is-C(M)IT/MIT (3:1) jistgħu jkunu preżunti li jissodisfaw ir-rekwiżiti tal-Artikolu 5 tad-Direttiva 98/8/KE, kemm-il darba jkunu konformi ma' ċerti kundizzjonijiet dwar l-użu tiegħu.

(6)

Għalhekk, jixraq li l-użu tas-C(M)IT/MIT (3:1) fil-prodotti bijoċidali għal prodotti tat-tipi 2, 4, 6, 11, 12 u 13 jiġi approvat soġġett għall-konformità ma' ċerti speċifikazzjonijiet u kundizzjonijiet.

(7)

Għall-użu fil-prodotti tat-tip 4, il-valutazzjoni ma indirizzatx l-inkorporazzjoni tal-prodotti bijoċidali li jkun fihom is-C(M)IT/MIT (3:1) f'materjali u f'oġġetti maħsuba biex jiġu f'kuntatt dirett jew indirett mal-ikel skont it-tifsira tal-Artikolu 1(1) tar-Regolament (KE) Nru 1935/2004 tal-Parlament Ewropew u tal-Kunsill (5). Għal dawn il-materjali jista' jkun hemm bżonn li jiġu stabbiliti limiti speċifiċi għall-migrazzjoni fl-ikel, kif imsemmi fl-Artikolu 5(1)(e) ta' dak ir-Regolament. Għaldaqstant, l-approvazzjoni ma għandhiex tkopri tali użu sakemm il-Kummissjoni ma tkunx stabbiliet tali limiti jew inkella jkun ġie stabbilit, skont dak ir-Regolament, li dawn il-limitazzjonijiet mhumiex meħtieġa.

(8)

Billi s-C(M)IT/MIT (3:1) jissodisfa l-kriterji għall-klassifikazzjoni bħala sensitizzatur tal-ġilda tal-kategorija 1 kif definit fl-Anness I tar-Regolament (KE) Nru 1272/2008 tal-Parlament Ewropew u tal-Kunsill (6), l-oġġetti trattati bis-C(M)IT/MIT (3:1) jew li jinkorporawh, għandhom ikunu tikkettati kif jixraq meta jitqiegħdu fis-suq.

(9)

Għandu jitħalla jgħaddi perjodu ta' żmien raġonevoli qabel ma tiġi approvata sustanza attiva, sabiex il-partijiet ikkonċernati jkunu jistgħu jieħdu l-miżuri ta' tħejjija meħtieġa biex jissodisfaw ir-rekwiżiti l-ġodda.

(10)

Il-miżuri stipulati f'dan ir-Regolament huma skont l-opinjoni tal-Kumitat Permanenti dwar il-Prodotti Bijoċidali,

ADOTTAT DAN IR-REGOLAMENT:

Artikolu 1

Is-C(M)IT/MIT (3:1) għandu jiġi approvat bħala sustanza attiva għall-użu fil-prodotti bijoċidali għall-prodotti tat-tipi 2, 4, 6, 11, 12 u 13, kemm-il darba jkun hemm konformità mal-ispeċifikazzjonijiet u l-kundizzjonijiet stabbiliti fl-Anness.

Artikolu 2

Dan ir-Regolament jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri kollha.

Magħmul fi Brussell, l-1 ta' Frar 2016.

Għall-Kummissjoni

Il-President

Jean-Claude JUNCKER

(1)  ĠU L 167, 27.6.2012, p. 1.

(2)  Ir-Regolament Delegat tal-Kummissjoni (UE) Nru 1062/2014 tal-4 ta' Awwissu 2014 dwar il-programm ta' ħidma għall-evalwazzjoni sistematika tas-sustanzi attivi bijoċidali kollha li jeżistu fil-prodotti bijoċidali msemmijin fir-Regolament (UE) Nru 528/2012 tal-Parlament Ewropew u tal-Kunsill (ĠU L 294, 10.10.2014, p. 1).

(3)  Id-Direttiva 98/8/KE tal-Parlament Ewropew u tal-Kunsill tas-16 ta' Frar 1998 dwar it-tqegћid fis-suq tal-prodotti bijoċidali (ĠU L 123, 24.4.1998, p. 1).

(4)  Ir-Regolament tal-Kummissjoni (KE) Nru 1451/2007 tal-4 ta' Diċembru 2007 dwar it-tieni fażi tal-programm ta' ħidma ta' 10 snin imsemmi fl-Artikolu 16(2) tad-Direttiva 98/8/KE tal-Parlament Ewropew u tal-Kunsill rigward it-tqegħid fis-suq ta' prodotti bijoċidali (ĠU L 325, 11.12.2007, p. 3).

(5)  Ir-Regolament (KE) Nru 1935/2004 tal-Parlament Ewropew u tal-Kunsill tas-27 ta' Ottubru 2004 dwar materjali u oġġetti maħsuba biex jiġu f'kuntatt mal-ikel u li jħassar id-Direttivi 80/590/KEE u 89/109/KEE (ĠU L 338, 13.11.2004, p. 4).

(6)  Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta' Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1).

ANNESS

Isem Komuni

Isem tal-IUPAC

Numri tal-Identifikazzjoni

Il-grad minimu ta' purità tas-sustanza attiva (1)

Data tal-approvazzjoni

Data tal-iskadenza tal-approvazzjoni

Tip ta' prodott

Kundizzjonijiet speċifiċi

C(M)IT/MIT (3:1)

Isem tal-IUPAC:

Il-massa tar-reazzjoni ta' 5-kloro-2-metil-2H-iżotijażol-3-on u 2-metil-2h-iżotijażol-3-on (3:1)

Nru tal-KE: m.a.

Nru tal-CAS: 55965-84-9

579 g/kg (il-piż fi stat niexef ikkalkulat teoretikament)

Is-sustanza attiva hija manifatturata bħala konċentrat tekniku (TK) flimkien ma' solventi u stabbilizzaturi differenti.

fl-1 ta' Lulju 2017.

fit-30 ta' Ġunju 2027.

2

Il-valutazzjoni tal-prodott għandha tagħti attenzjoni partikolari għall-esponimenti, ir-riskji u l-effikaċja marbuta ma' kull użu kopert minn applikazzjoni għall-awtorizzazzjoni, iżda mhux indirizzati fil-valutazzjoni tar-riskju tas-sustanza attiva fil-livell tal-Unjoni.

L-awtorizzazzjonijiet tal-prodotti bijoċidali huma soġġetti għall-kundizzjonijiet li jmiss:

Għandhom jiġu stabbiliti proċeduri operazzjonali sikuri u miżuri organizzazzjonali xierqa għall-utenti professjonali. Il-prodotti għandhom jintużaw b'tagħmir personali protettiv xieraq meta l-esponiment ma jkunx jista' jitnaqqas għal livell aċċettabbli b'mezzi oħrajn.

It-tqegħid fis-suq ta' oġġetti ttrattati huwa suġġett għall-kundizzjonijiet li ġejjin:

Il-persuna responsabbli biex tqiegħed fis-suq oġġett ittrattat bis-sustanza C(M)IT/MIT (3:1) jew oġġett li jinkorpora din is-sustanza, għandha tiżgura li t-tikketta ta' dak l-oġġett ittrattat tkun tagħti l-informazzjoni mniżżla fit-tieni sottoparagrafu tal-Artikolu 58(3) tar-Regolament (UE) Nru 528/2012.

4

Il-valutazzjoni tal-prodott għandha tagħti attenzjoni partikolari għall-esponimenti, ir-riskji u l-effikaċja marbuta ma' kull użu kopert minn applikazzjoni għall-awtorizzazzjoni, iżda mhux indirizzat fil-valutazzjoni tar-riskju tas-sustanza attiva fil-livell tal-Unjoni.

L-awtorizzazzjonijiet tal-prodotti bijoċidali huma soġġetti għall-kundizzjonijiet li jmiss:

(1)

Għandhom jiġu stabbiliti proċeduri operazzjonali sikuri u miżuri organizzazzjonali xierqa għall-utenti professjonali. Il-prodotti għandhom jintużaw b'tagħmir personali protettiv xieraq meta l-esponiment ma jkunx jista' jitnaqqas għal livell aċċettabbli b'mezz ieħor.

(2)

Minħabba r-riskji identifikati għall-utenti professjonali, il-prodotti bijoċidali għandhom jiġu applikati biss b'sistemi awtomatiċi, sakemm ma jkunx jista' jintwera li r-riskji jistgħu jitnaqqsu għal livell aċċettabbli b'mezz ieħor.

(3)

Għall-prodotti li jistgħu jwasslu għal residwi fl-ikel jew fl-għalf, għandha tiġi vverifikata hemmx ħtieġa li jiġu ddefiniti livelli massimi tar-residwi (MRLs) ġodda jew li jiġu emendati l-livelli massimi tar-residwi eżistenti skont ir-Regolament (KE) Nru 470/2009 tal-Parlament Ewropew u tal-Kunsill (2) jew ir-Regolament (KE) Nru 396/2005 tal-Parlament Ewropew u tal-Kunsill (3), u għandha tittieħed kull miżura xierqa ta' mitigazzjoni tar-riskji biex ikun żgurat li l-MRLs applikabbli ma jinqabżux.

(4)

Il-prodotti ma għandhomx jiġu inkorporati f'materjali u oġġetti maħsuba biex jiġu f'kuntatt mal-ikel skont it-tifsira tal-Artikolu 1(1) tar-Regolament (KE) Nru 1935/2004, sakemm il-Kummissjoni ma tkunx stabbiliet limiti speċifiċi għall-migrazzjoni ta' C(M)IT/MIT (3:1) fl-ikel, jew jekk ikun ġie stabbilit skont dak ir-Regolament li dawn il-limiti ma jkunux meħtieġa.

It-tqegħid fis-suq ta' oġġetti ttrattati huwa suġġett għall-kundizzjonijiet li jmiss:

Il-persuna responsabbli għat-tqegħid fis-suq ta' oġġett ittrattat bis-sustanza C(M)IT/MIT (3:1) jew oġġett li jinkorpora din is-sustanza, għandha tiżgura li t-tikketta ta' dak l-oġġett ittrattat tkun tagħti l-informazzjoni mniżżla fit-tieni sottoparagrafu tal-Artikolu 58(3) tar-Regolament (UE) Nru 528/2012.

6

Il-valutazzjoni tal-prodott għandha tagħti attenzjoni partikolari għall-esponimenti, ir-riskji u l-effikaċja marbuta ma' kull użu kopert minn applikazzjoni għall-awtorizzazzjoni, iżda mhux indirizzati fil-valutazzjoni tar-riskju tas-sustanza attiva fil-livell tal-Unjoni.

L-awtorizzazzjonijiet tal-prodotti bijoċidali huma soġġetti għall-kundizzjonijiet li jmiss:

(1)

Għall-utenti industrijali jew professjonali għandhom jiġu stabbiliti proċeduri operattivi sikuri u miżuri organizzativi xierqa. Il-prodotti għandhom jintużaw b'tagħmir personali protettiv xieraq meta l-esponiment ma jkunx jista' jitnaqqas għal livell aċċettabbli b'mezz ieħor.

(2)

Minħabba r-riskji għall-ambjent, il-prodotti bijoċidali ma jistgħux jintużaw għall-preservazzjoni ta' likwidi tal-ipproċessar tal-polpa jew tal-karta, sakemm ma jkunx jista' jintwera li r-riskji jistgħu jitnaqqsu għal livell aċċettabbli.

It-tqegħid fis-suq ta' oġġetti ttrattati huwa suġġett għall-kundizzjonijiet li jmiss:

(1)

Minħabba r-riskji għas-saħħa tal-bniedem identifikati, it-taħlitiet ittrattati bi C(M)IT/MIT (3:1) jew li fihom din is-sustanza, li jitqiegħdu fis-suq għall-użu mill-pubbliku, ma għandux ikun fihom C(M)IT/MIT (3:1) f'konċentrazzjoni li tista' tikkawża klassifikazzjoni ta' sensitizzatur tal-ġilda, sakemm ma jkunx jista' jiġi evitat l-esponiment b'mezz ieħor barra mill-ilbies ta' apparat protettiv personali.

(2)

Minħabba r-riskji għas-saħħa tal-bniedem identifikati, id-deterġenti likwidi ttrattati bi C(M)IT/MIT (3:1) jew li fihom din is-sustanza, li jitqiegħdu fis-suq biex jintużaw mill-professjonisti ma għandux ikun fihom C(M)IT/MIT (3:1) f'konċentrazzjoni li tista' tikkawża klassifikazzjoni ta' sensitizzatur tal-ġilda, sakemm ma jkunx jista' jiġi evitat l-esponiment b'mezz ieħor barra mill-ilbies ta' apparat protettiv personali.

(3)

Minħabba r-riskji għas-saħħa tal-bniedem identifikati, it-taħlitiet ittrattati bi C(M)IT/MIT (3:1) jew li fihom din is-sustanza, minbarra d-deterġenti likwidi, li jitqiegħdu fis-suq biex jintużaw mill-professjonisti, ma għandux ikun fihom C(M)IT/MIT (3:1) f'konċentrazzjoni li tista' tikkawża klassifikazzjoni ta' sensitizzatur tal-ġilda, sakemm ma jkunx jista' jiġi evitat l-esponiment, anki bl-ilbies ta' apparat protettiv personali.

(4)

Il-persuna responsabbli biex tqiegħed fis-suq oġġett ittrattat bis-sustanza C(M)IT/MIT (3:1) jew oġġett li jinkorpora din is-sustanza, għandha tiżgura li t-tikketta ta' dak l-oġġett ittrattat tkun tagħti l-informazzjoni mniżżla fit-tieni sottoparagrafu tal-Artikolu 58(3) tar-Regolament (UE) Nru 528/2012.

11

Il-valutazzjoni tal-prodott għandha tagħti attenzjoni partikolari għall-esponimenti, ir-riskji u l-effikaċja marbuta ma' kull użu kopert minn applikazzjoni għall-awtorizzazzjoni, iżda mhux indirizzati fil-valutazzjoni tar-riskju tas-sustanza attiva fil-livell tal-Unjoni.

L-awtorizzazzjonijiet tal-prodotti bijoċidali huma soġġetti għall-kundizzjonijiet li jmiss:

(1)

Għandhom jiġu stabbiliti proċeduri operazzjonali sikuri u miżuri organizzazzjonali adegwati għall-utenti professjonali. Il-prodotti għandhom jintużaw b'tagħmir personali protettiv xieraq meta l-esponiment ma jkunx jista' jitnaqqas għal livell aċċettabbli b'mezz ieħor.

(2)

Minħabba r-riskji għall-ambjent li ġew identifikati, il-prodotti ma għandhomx jiġu awtorizzati għall-użu bħala preżervattivi tal-likwidu tal-ipproċessar fotografiku jew bħala preżervattivi ta' soluzzjonijiet tat-trattament tal-injam u lanqas ma għandhom jintużaw f'sistemi tat-tkessiħ li jiċċirkolaw mill-ġdid kbar u miftuħin, sakemm ma jkunx jista' jintwera li r-riskji jistgħu jitnaqqsu għal livell aċċettabbli.

(3)

Minħabba r-riskji għall-ambjent identifikati, u sakemm ma jkunx jista' jintwera li r-riskji jistgħu jitnaqqsu għal livell aċċettabbli, it-tikketti u, fejn jingħataw, l-iskedi tad-dejta tas-sikurezza, għandhom jindikaw li:

a.

Fl-użu f'sistemi tat-tkessiħ żgħar miftuħin reċirkolanti, għandu jkun hemm stabbiliti miżuri tal-mitigazzjoni tar-riskji biex titnaqqas il-kontaminazzjoni tal-kompartiment terrestri permezz ta' depożizzjoni mill-arja.

b.

Għall-użi oħrajn barra dawk speċifikati fil-kundizzjoni (2), l-ilma skartat mill-faċilitajiet għandu jingħadda f'impjant tat-trattament tad-dranaġġ.

It-tqegħid fis-suq ta' oġġetti ttrattati huwa suġġett għall-kundizzjonijiet li jmiss:

Il-persuna responsabbli biex tqiegħed fis-suq oġġett ittrattat bis-sustanza C(M)IT/MIT (3:1) jew oġġett li jinkorpora din is-sustanza, għandha tiżgura li t-tikketta ta' dak l-oġġett ittrattat tkun tagħti l-informazzjoni mniżżla fit-tieni sottoparagrafu tal-Artikolu 58(3) tar-Regolament (UE) Nru 528/2012.

12

Il-valutazzjoni tal-prodott għandha tagħti attenzjoni partikolari għall-esponimenti, ir-riskji u l-effikaċja marbuta ma' kull użu kopert minn applikazzjoni għall-awtorizzazzjoni, iżda mhux indirizzati fil-valutazzjoni tar-riskju tas-sustanza attiva fil-livell tal-Unjoni.

L-awtorizzazzjonijiet tal-prodotti bijoċidali huma soġġetti għall-kundizzjonijiet li jmiss:

(1)

Għandhom jiġu stabbiliti proċeduri operazzjonali sikuri u miżuri organizzazzjonali adegwati għall-utenti professjonali. Il-prodotti għandhom jintużaw b'tagħmir personali protettiv xieraq meta l-esponiment ma jkunx jista' jitnaqqas għal livell aċċettabbli b'mezz ieħor.

(2)

Minħabba r-riskji għall-ambjent li ġew identifikati, il-prodotti ma jistgħux jintużaw f'impjanti fuq il-baħar, sakemm ma jkunx jista' jintwera li r-riskji jistgħu jitnaqqsu għal livell aċċettabbli.

(3)

Minħabba r-riskji għas-saħħa tal-bniedem li ġew identifikati, it-tikketti jew l-iskedi tad-dejta tas-sikurezza tal-prodotti awtorizzati biex jintużaw fuq installazzjonijiet lil hinn mill-kosta ma għandux ikun fihom C(M)IT/MIT (3:1) f'konċentrazzjoni li timmarka l-klassifika ta' sensitizzatur tal-ġilda, sakemm ma jiġux stabbiliti proċeduri sikuri għat-tħaddim u miżuri organizzattivi xierqa għall-ħaddiema.

(4)

Minħabba r-riskji għall-ambjent li ġew identifikati, it-tikketti jew l-iskedi tad-dejta tas-sikurezza tal-prodotti awtorizzati biex jintużaw fl-impjanti tal-karta għandhom jindikaw il-ħtieġa ta' dilwizzjoni xierqa tar-rilaxx industrijali mill-faċilitajiet għal ġol-kanali tal-ilma wara t-trattament mekkaniku/kimiku jew wara t-trattament f'impjant tat-trattament tad-dranaġġ, sakemm ma jkunx jista' jintwera li r-riskji jistgħu jitnaqqsu għal livell aċċettabbli b'mezz ieħor.

It-tqegħid fis-suq ta' oġġetti ttrattati huwa suġġett għall-kundizzjonijiet li jmiss:

Il-persuna responsabbli biex tqiegħed fis-suq oġġett ittrattat bis-sustanza C(M)IT/MIT (3:1) jew oġġett li jinkorpora din is-sustanza, għandha tiżgura li t-tikketta ta' dak l-oġġett ittrattat tkun tagħti l-informazzjoni mniżżla fit-tieni sottoparagrafu tal-Artikolu 58(3) tar-Regolament (UE) Nru 528/2012.

13

Il-valutazzjoni tal-prodott għandha tagħti attenzjoni partikolari għall-esponimenti, ir-riskji u l-effikaċja marbuta ma' kull użu kopert minn applikazzjoni għall-awtorizzazzjoni, iżda mhux indirizzati fil-valutazzjoni tar-riskju tas-sustanza attiva fil-livell tal-Unjoni.

L-awtorizzazzjonijiet tal-prodotti bijoċidali huma soġġetti għall-kundizzjonijiet li jmiss:

(1)

Għandhom jiġu stabbiliti proċeduri operazzjonali sikuri u miżuri organizzazzjonali adegwati għall-utenti professjonali. Il-prodotti għandhom jintużaw b'tagħmir personali protettiv xieraq meta l-esponiment ma jkunx jista' jitnaqqas għal livell aċċettabbli b'mezz ieħor.

(2)

Minħabba r-riskji identifikati għall-utenti professjonali, it-tqegħid tal-prodotti fil-fluwidi għat-tħaddim tal-metall għandu jsir b'mod semiawtomatiku jew awtomatiku, sakemm ma jkunx jista' jintwera li r-riskji jistgħu jitnaqqsu għal livell aċċettabbli b'mezz ieħor.

(3)

Minħabba r-riskji identifikati għall-utenti professjonali, it-tikketti, u fejn jeżistu, l-iskedi tad-dejta tas-sikurezza, għandhom jindikaw li l-prodotti ma għandhomx jintużaw fil-likwidi tal-ipproċessar tal-metall f'konċentrazzjoni li timmarka l-klassifika ta' sensitizzatur tal-ġilda, sakemm ma jkunx jista' jintwera li r-riskji jistgħu jitnaqqsu għal livell aċċettabbli b'mezz ieħor.

It-tqegħid fis-suq ta' oġġetti ttrattati huwa suġġett għall-kundizzjonijiet li jmiss:

Il-persuna responsabbli biex tqiegħed fis-suq oġġett ittrattat bis-sustanza C(M)IT/MIT (3:1) jew oġġett li jinkorpora din is-sustanza, għandha tiżgura li t-tikketta ta' dak l-oġġett ittrattat tkun tagħti l-informazzjoni mniżżla fit-tieni sottoparagrafu tal-Artikolu 58(3) tar-Regolament (UE) Nru 528/2012.

(1)  Il-purità indikata f'din il-kolonna kienet il-grad minimu ta' purità tas-sustanza attiva użata għall-evalwazzjoni li saret skont l-Artikolu 16(2) tad-Direttiva 98/8/KE. Is-sustanza attiva fil-prodott imqiegħed fis-suq tista' tkun ta' purezza ugwali jew differenti, jekk ikun ġie ppruvat li hija teknikament ekwivalenti għas-sustanza attiva evalwata.

(2)  Ir-Regolament (KE) Nru 470/2009 tal-Parlament Ewropew u tal-Kunsill tas-6 ta' Mejju 2009 li jistabbilixxi l-proċeduri Komunitarji għall-istabbiliment tal-limiti ta' residwi ta' sustanzi farmakoloġikament attivi fl-oġġetti tal-ikel li joriġinaw mill-annimali, u li jħassar ir-Regolament tal-Kunsill (KEE) Nru 2377/90 u li jemenda d-Direttiva 2001/82/KE tal-Parlament Ewropew u tal-Kunsill u r-Regolament (KE) Nru 726/2004 tal-Parlament Ewropew u tal-Kunsill (ĠU L 152, 16.6.2009, p. 11).

(3)  Ir-Regolament (KE) Nru 396/2005 tal-Parlament Ewropew u tal-Kunsill tat-23 ta' Frar 2005 dwar il-livelli massimi ta' residwu ta' pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE (ĠU L 70, 16.3.2005, p. 1).