20.12.2016 |
MT |
Il-Ġurnal Uffiċjali tal-Unjoni Ewropea |
L 345/66 |
DEĊIŻJONI TA' IMPLIMENTAZZJONI TAL-KUMMISSJONI (UE) 2016/2316
tas-16 ta' Diċembru 2016
li temenda d-Deċiżjoni ta' Implimentazzjoni tal-Kummissjoni (UE) 2015/1849 dwar miżuri protettivi kontra l-introduzzjoni u t-tixrid fl-Unjoni ta' organiżmi ta' ħsara fir-rigward ta' ċertu ħxejjex tal-ikel li joriġinaw fil-Ghana
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 2000/29/KE tat-8 ta' Mejju 2000 dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-prodotti tal-pjanti u kontra t-tixrid tagħhom ġewwa l-Komunità (1), u b'mod partikolari t-tielet sentenza tal-Artikolu 16(3) tagħha,
Billi:
(1) |
Id-Deċiżjoni ta' Implimentazzjoni tal-Kummissjoni (UE) 2015/1849 (2) tipprojbixxi l-introduzzjoni fit-territorju tal-Unjoni tal-pjanti, barra ż-żerriegħa, ta'Capsicum L., Lagenaria Ser., Luffa Mill., Momordica L. u Solanum L., barra S. lycopersicum L., li joriġinaw mill-Ghana. |
(2) |
Din il-projbizzjoni hija limitata fiż-żmien. Din tapplika sa tmiem is-sena 2016. Il-verifika mwettqa fil-Ghana f'Settembru 2016 uriet li li għadhom jippersistu n-nuqqasijiet fis-sistema taċ-ċertifikazzjoni tal-esportazzjoni fitosanitarja ta' dak il-pajjiż terz. Għaldaqstant, jixraq li tiġi estiża din il-projbizzjoni sal-31 ta' Diċembru 2017. |
(3) |
Għalhekk, id-Deċiżjoni ta' Implimentazzjoni (UE) 2015/1849 għandha tiġi emendata skont dan. |
(4) |
Il-miżuri previsti f'din id-Deċiżjoni huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DIN ID-DEĊIŻJONI:
Artikolu 1
L-Artikolu 2 tad-Deċiżjoni ta' Implimentazzjoni (UE) 2015/1849 jinbidel b'dan li ġej:
“Artikolu 2
L-Artikolu 1 għandu japplika sal-31 ta' Diċembru 2017.”
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell, is-16 ta' Diċembru 2016.
Għall-Kummissjoni
Vytenis ANDRIUKAITIS
Membru tal-Kummissjoni
(1) ĠU L 169, 10.7.2000, p. 1.
(2) Id-Deċiżjoni ta' Implimentazzjoni tal-Kummissjoni (UE) 2015/1849 tat-13 ta' Ottubru 2015 dwar miżuri protettivi kontra l-introduzzjoni u t-tixrid fl-Unjoni ta' organiżmi ta' ħsara fir-rigward ta' ċertu ħxejjex tal-ikel li joriġinaw fil-Ghana (ĠU L 268, 15.10.2015, p. 33).