20.3.2015 |
MT |
Il-Ġurnal Uffiċjali tal-Unjoni Ewropea |
L 76/42 |
REGOLAMENT TAL-KUMMISSJONI (UE) 2015/463
tad-19 ta' Marzu 2015
li jemenda l-Anness tar-Regolament (UE) Nru 231/2012 li jistabbilixxi l-ispeċifikazzjonijiet għall-addittivi tal-ikel elenkati fl-Annessi II u III tar-Regolament (KE) Nru 1333/2008 tal-Parlament Ewropew u tal-Kunsill, fir-rigward tal-ispeċifikazzjonijiet għall-alkoħol poliviniliku (E 1203)
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 1333/2008 tal-Parlament Ewropew u tal-Kunsill (1) tas-16 ta' Diċembru 2008 dwar l-addittivi tal-ikel, u b'mod partikolari l-Artikolu 14 tiegħu,
Wara li kkunsidrat ir-Regolament (KE) Nru 1331/2008 tal-Parlament Ewropew u tal-Kunsill (2) tas-16 ta' Diċembru 2008 li jistabbilixxi proċedura ta' awtorizzazzjoni komuni għall-addittivi tal-ikel, l-enżimi tal-ikel u l-aromatizzanti tal-ikel, u b'mod partikolari l-Artikolu 7(5) tiegħu,
Billi:
(1) |
Ir-Regolament tal-Kummissjoni (UE) Nru 231/2012 (3) jistabbilixxi l-ispeċifikazzjonijiet għall-addittivi tal-ikel elenkati fl-Annessi II u III tar-Regolament (KE) Nru 1333/2008. |
(2) |
Dawk l-ispeċifikazzjonijiet jistgħu jiġu aġġornati skont il-proċedura komuni msemmija fl-Artikolu 3(1) tar-Regolament (KE) Nru 1331/2008, kemm b'inizjattiva tal-Kummissjoni jew inkella wara talba. |
(3) |
Fis-7 ta' Settembru 2011, tressqet applikazzjoni għall-emenda ta' speċifikazzjonijiet li jikkonċernaw l-alkoħol poliviniliku (E 1203) bħala addittiv tal-ikel. L-applikazzjoni saret disponibbli għall-Istati Membri skont l-Artikolu 4 tar-Regolament (KE) Nru 1331/2008. |
(4) |
L-ispeċifikazzjoni attwali fir-rigward tas-solubbiltà tal-alkoħol poliviniliku (E 1203) bħala addittiv tal-ikel, tiddikjara “Jinħall fl-ilma; jinħall kemxejn fl-etanol”. L-Istitut għas-Saħħa u l-Ħarsien tal-Konsumatur (IHCP) taċ-Ċentru Konġunt tar-Riċerka tal-Kummissjoni Ewropea wettaq studji (4) dwar is-solubbiltà tal-alkoħol poliviniliku li jaġġornaw id-dejta dwar is-solubbiltà tal-ispeċifikazzjonijiet eżistenti tal-Unjoni fil-konfront tas-solubbiltà fl-etanol. |
(5) |
L-Awtorità Ewropea dwar is-Sigurtà fl-Ikel (“l-Awtorità”) evalwat ir-riżultati tat-test tas-solubbiltà tal-alkoħol poliviniliku mwettaq mill-IHCP u l-informazzjoni pprovduta mill-applikant (5). L-Awtorità tqis li l-emenda tal-ispeċifikazzjoni dwar is-solubbiltà tal-alkoħol poliviniliku fl-etanol ma għandha l-ebda impatt fuq is-sikurezza tal-alkoħol poliviniliku bħala addittiv tal-ikel. |
(6) |
Filwaqt li jiġu kkunsidrati l-applikazzjoni, l-istudji mwettqa mill-IHCP u l-evalwazzjoni tal-Awtorità, jixraq li d-deskrizzjoni dwar is-solubbiltà tal-alkoħol poliviniliku (E 1203) bħala addittiv tal-ikel fl-etanol (≥ 99,8 %) tiġi emendata għal “prattikament insolubbli jew insolubbli”. |
(7) |
Għalhekk, ir-Regolament (UE) Nru 231/2012 għandu jiġi emendat kif meħtieġ. |
(8) |
Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
L-Anness tar-Regolament (UE) Nru 231/2012 huwa emendat skont l-Anness ta' dan ir-Regolament.
Artikolu 2
Dan ir-Regolament jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, id-19 ta' Marzu 2015.
Għall-Kummissjoni
Il-President
Jean-Claude JUNCKER
(1) ĠU L 354, 31.12.2008, p. 16.
(2) ĠU L 354, 31.12.2008, p. 1.
(3) Ir-Regolament tal-Kummissjoni (UE) Nru 231/2012 tad-9 ta' Marzu 2012 li jistabbilixxi l-ispeċifikazzjonijiet għall-addittivi tal-ikel elenkati fl-Annessi II u III tar-Regolament (KE) Nru 1333/2008 tal-Parlament Ewropew u tal-Kunsill (ĠU L 83, 22.3.2012, p. 1).
(4) João F. A. Lopes u Catherine Simoneau, 2014. “Solubility of Polyvinyl Alcohol in Ethanol.” Il-pubblikazzjoni ta' sostenn tal-EFSA 2014:EN-660, 20 pp.
(5) EFSA Journal 2014;12(9):3820.
ANNESS
Fl-Anness tar-Regolament (UE) Nru 231/2012, l-entrata għall-E 1203 alkoħol poliviniliku, l-ispeċifikazzjoni dwar is-solubbiltà tinbidel b'dan li ġej:
“Solubbiltà |
Jinħall fl-ilma; Prattikament insolubbli jew insolubbli fl-etanol (≥ 99,8 %)” |