|
5.2.2015
|
MT
|
Il-Ġurnal Uffiċjali tal-Unjoni Ewropea
|
L 29/3
|
REGOLAMENT TA' IMPLIMENTAZZJONI TAL-KUMMISSJONI (UE) 2015/171
tal-4 ta' Frar 2015
dwar ċerti aspetti tal-proċedura ta' liċenzjar tal-impriżi ferrovjarji
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2012/34/UE tal-Parlament Ewropew u tal-Kunsill tal-21 ta' Novembru 2012 li tistabbilixxi żona ferrovjarja unika Ewropea (1) u b'mod partikolari l-Artikolu 17(5) tagħha,
Billi:
|
(1)
|
Ir-Rakkomandazzjoni tal-Kummissjoni tas-7 ta' April 2004 dwar l-użu ta' format komuni Ewropew għal dokumenti ta' liċenzjar maħruġa skont id-Direttiva tal-Kunsill 95/18/KE dwar il-liċenzjar ta' impriżi ferrovjarji (2) rrakkomandat l-użu tal-format standard għad-dokumenti ta' liċenzjar maħruġa mill-awtoritajiet nazzjonali tal-liċenzjar.
|
|
(2)
|
Skont l-Artikolu 23 tad-Direttiva 2012/34/UE l-liċenzji kunsinnati mill-awtoritajiet nazzjonali tal-liċenzjar huma validi fit-territorju kollu tal-Unjoni. L-awtoritajiet nazzjonali tal-liċenzjar għandhom jinfurmaw lill-Aġenzija Ferrovjarja Ewropea bil-liċenzji li jkunu ġew maħruġa, sospiżi, revokati jew emendati u din tal-aħħar għandha tinforma lill-Istati Membri l-oħra skont il-każ. Mudell komuni għal-liċenzjar jiffaċilita x-xogħol tal-awtoritajiet nazzjonali tal-liċenzjar u tal-Aġenzija Ewropea tal-Ferroviji u jipprovdi aċċess aktar faċli għall-informazzjoni dwar il-liċenzji lill-partijiet interessati kollha, b'mod partikolari lill-awtoritajiet tal-liċenzjar tal-Istati Membri l-oħra u l-amministraturi tal-infrastruttura.
|
|
(3)
|
L-informazzjoni kollha meħtieġa li tikkonferma li ċerta impriża ferrovjarja tkun ġiet regolarment liċenzjata għal ċertu tip ta' servizz tat-trasport ferrovjarju tista' tkun tinstab f'dokument standardizzat. Il-mudell standard għad-dokument tal-liċenzjar għandu jiffaċilita l-pubblikazzjoni tal-informazzjoni rilevanti kollha dwar il-liċenzji fuq is-sit tal-Internet tal-Aġenzija Ferrovjarja Ewropea. Il-format standard jista' jiġi mmodifikat fil-ġejjieni skont l-esperjenza tal-użu tiegħu u l-iżvilupp tal-ħtiġijiet għal aktar informazzjoni dwar il-liċenzji.
|
|
(4)
|
Il-kundizzjonijiet li skonthom jistgħu jiġu ssodisfati r-rekwiżiti msemmija fl-Artikolu 22 tad-Direttiva 2012/34/UE relatati mal-kopertura għar-responsabbiltà ċivili jafu jvarjaw bejn l-Istati Membri skont il-liġijiet nazzjonali. Evidenza li l-impriża ferrovjarja tissodisfa dawn ir-rekwiżiti nazzjonali għandhom jiġu pprovduti b'Anness mad-dokument tal-liċenzja. Il-mudell standard għal dan l-Anness għandu jkun użat għal dan l-għan. Fil-każ li l-impriża ferrovjarja tixtieq teżerċita l-attivitajiet tagħha f'żewġ Stati Membri jew aktar, il-kopertura għal responsabbiltà ċivili għal kull wieħed minn dawn l-Istati Membri għandha tissemma f'Anness addizzjonali, li għandu jkun provdut mill-awtorità tal-liċenzjar fl-Istat Membru addizzjonali li l-impriża ferrovjarja tixtieq topera fih.
|
|
(5)
|
L-awtoritajiet tal-liċenzjar jistgħu jnaqqsu l-ispejjeż amministrattivi tagħhom, il-livell ta' miżati tal-liċenzjar u ż-żmien biex jieħdu deċiżjoni dwar applikazzjoni għal liċenzja jekk dawn jiskambjaw l-informazzjoni malajr ma' awtoritajiet oħra u ma' entitajiet pubbliċi jew privati oħrajn.
|
|
(6)
|
Minħabba li ftit sar ċaqliq fis-suq, mhumiex meħuda deċiżjonijiet dwar il-liċenzjar f'ebda Stati Membri għal sena jew snin konsekuttivi. Fl-istess ħin, il-miżati għoljin jafu joħolqu ostaklu għad-dħul fis-suq ta' impriżi ferrovjarji.
|
|
(7)
|
Impriżi ferrovjarji li japplikaw għal liċenzja ġdida ma għandhomx jaffaċċjaw kundizzjonijiet ta' liċenzjar anqas favorevoli minn impriżi ferrovjarji li qegħdin diġà joperaw fis-suq.
|
|
(8)
|
Il-piż amministrattiv żejjed impost fuq l-awtoritajiet tal-liċenzjar u l-impriżi għandu jitnaqqas billi jittrażżnu b'mod strett ir-rekwiżiti għall-kundizzjonijiet stabbiliti fid-Direttiva 2012/34/UE.
|
|
(9)
|
L-awtoritajiet tal-liċenzjar ma għandhom l-ebda obbligu li jitolbu miżata għal-liċenzjar minn impriża ferrovjarja. Madankollu, l-Istati Membri jistgħu jiddeċiedu li jimponu tali miżata għax-xogħol imwettaq mill-awtoritajiet tal-liċenzjar biex jeżaminaw l-applikazzjoni. F'każ bħal dan il-ħlas tal-liċenzja ma għandux ikun diskriminatorju, jiġi effettivament impost fuq l-impriżi kollha li japplikaw għal liċenzja u jkun ibbażat fuq il-ħidma attwali tal-awtorità tal-liċenzjar. Jekk il-miżata tal-liċenzjar taqbeż EUR 5 000, l-awtorità tal-liċenzjar għandha tniżżel l-għadd ta' sigħat-persuni utilizzati u n-nefqa fin-nota tal-ħlas għall-miżata.
|
|
(10)
|
F'tentattiv biex jinħolqu kundizzjonijiet ekwi bejn l-impriżi ferrovjarji, id-Direttiva 2012/34/UE ħassret ċerti arranġamenti li mhumiex kompatibbli mal-kundizzjonijiet imtejba tas-suq, biex permezz ta' hekk l-impriżi ferrovjarji għandhom jiġu assigurati jew jingħataw garanziji adegwati skont il-kundizzjonijiet tas-suq. L-awtoritajiet tal-liċenzjar għandhom jiġu mistiedna biex jivverifikaw l-implimentazzjoni tal-kundizzjonijiet riveduti b'kooperazzjoni ma' awtoritajiet oħra tal-Istati Membri.
|
|
(11)
|
L-għoti ta' liċenzja lil impriża ferrovjarja ma għandux ikun kundizzjonali fuq dan iċ-ċertifikat tas-sikurezza msemmi fl-Artikolu 10 tad-Direttiva 2004/49/KE tal-Parlament Ewropew u tal-Kunsill (3).
|
|
(12)
|
L-impriżi ferrovjarji ġodda huma kruċjali għall-kompetizzjoni, iżda jista' jkollhom diffikultajiet prattiċi biex jipprovdi rekord ta' qagħda finanzjarja tajba li jippermettilhom jistabbilixxu suppożizzjonijiet realistiċi għal perjod ta' 12 xahar fil-futur skont l-Artikolu 20(1) u (2) tad-Direttiva 2012/34/UE. Filwaqt li l-leġislaturi tal-UE ħolqu l-għażla ta' prova ssimplifikata għal ċerti trasportaturi tal-ajru iżgħar skont l-Artikolu 5(3) tar- Regolament (KE) Nru 1008/2008 tal-Parlament Ewropew u tal-Kunsill (4), il-proċedura biex tinkiseb liċenzja tista' tqis dawn id-diffikultajiet prattiċi billi ttaffi l-proċedura biex tintwera qagħda finanzjarja tajba għall-impriżi ferrovjarji li japplikaw għal liċenzja.
|
|
(13)
|
Il-miżuri pprovduti f'dan ir-Regolament huma skont l-opinjoni tal-Kumitat stabbilit skont l-Artikolu 62(1) tad-Direttiva 2012/34/UE,
|
ADOTTAT DAN IR-REGOLAMENT:
Artikolu 1
Suġġett
Dan ir-Regolament jistabbilixxi d-dettalji għall-użu ta' mudell komuni għad-dokument tal-liċenzji. Jipprevedi wkoll ċerti aspetti tal-proċedura għall-għoti ta' liċenzja.
Artikolu 2
Definizzjonijiet
Għall-finijiet ta' dan ir-Regolament, “dokument tal-liċenzja” tfisser il-mudell komuni mimli u ffirmat kif suppost, kif stipulat fl-Annessi I u II ta' dan ir-Regolament, li għandu jiġi ppreżentat lill-Aġenzija Ferrovjarja Ewropea.
Artikolu 3
L-użu tal-mudell komuni għad-dokument tal-liċenzja
1. Il-liċenzji maħruġa skont il-Kapitolu III tad-Direttiva 2012/34/UE għandhom jużaw il-format standard stabbilit fl-Anness I u II ta' dan ir-Regolament.
Fil-każ fejn tinħareġ liċenzja ġdida, l-awtorità tal-liċenzjar għandha tattribwixxi numru tan-notifika tal-liċenzji tal-UE skont is-sistema ta' numerazzjoni armonizzata, imsejjaħ Numru Ewropew għall-Identifikazzjoni (EIN), kif stabbilit fl-Appendiċi 2 tad-Deċiżjoni tal-Kummissjoni 2007/756/KE (5).
Kull darba li liċenzja tingħata, tiġi emendata b'mod rilevanti għad-dokument tal-liċenzja, tiġi sospiża, tiġi revokata jew tiġi mibdula b'liċenzja temporanja, l-awtorità tal-liċenzjar għandha tistabbilixxi dokument tal-liċenzja bbażat fuq dan il-format
2. L-awtoritajiet tal-liċenzjar għandhom jinfurmaw lill-Aġenzija Ferrovjarja Ewropea b'konformità mal-Artikolu 24(8) tad-Direttiva 2012/34/UE billi jipprovdu kopja tad-dokument tal-liċenzja kif stipulat fil-protokoll tal-komunikazzjoni maqbula bejniethom.
3. L-informazzjoni li tikkonċerna l-kopertura finanzjarja għar-responsabilità ċivili msemmija fl-Artikolu 22 tad-Direttiva 2012/34/UE għandu jissemma fl-Anness għad-dokument tal-liċenzja, billi jintuża l-format standard stabbilit fl-Anness II għal dan ir-Regolament. L-awtorità tal-liċenzjar għandha tehmeż anness mad-dokument tal-liċenzja. Dan l-anness għandu jingħata numru wieħed (1).
4. Permezz tal-informazzjoni provduta fl-annessi dwar ir-responsabbiltà, kif stipulat fl-Anness II ma' dan ir-Regolament, l-awtorità tal-liċenzjar fi Stat Membru partikolari jew amministratur tal-infrastruttura jista' jiċċekkja jekk il-kopertura tar-responsabbiltà ċivili li tittieħed mill-impriża ferrovjarja u li tkun approvata minn awtoritajiet oħra tal-liċenzjar hix biżżejjed f'dan l-Istat Membru partikolari. Jekk l-awtorità tal-liċenzjar tiddetermina li l-livell ta' kopertura huwa insuffiċjenti, din tista' titlob lill-impriża ferrovjarja għal kopertura addizzjonali. L-impriża ferrovjarja għandha tipprovdi lill-awtorità tal-liċenzji l-informazzjoni mitluba dwar il-kopertura tagħha.
5. Ladarba awtorità tal-liċenzjar tkun sodisfatta bil-kopertura, din għandha tinforma lill-Aġenzija Ferrovjarja Ewropea dwar l-aġġornament tal-annessi eżistenti kkomunikata minn awtorità tal-liċenzji tal-istess Stat Membru jew iż-żieda ta' anness ulterjuri mal-liċenzja, billi jintuża l-format standard ta' dan l-Anness II u jiġu assenjati n-numri li jmiss (2, 3, 4, eċċ.) ma' dan l-anness.
6. Kull anness dwar ir-responsabbiltà għandu jsemmi l-ammont, il-kamp ta' applikazzjoni, bħall-kamp ta' applikazzjoni ġeografiku jew it-tip ta' servizzi, u d-data tal-bidu u, jekk ikun applikabbli, l-iskadenza tal-kopertura. Il-numru tan-notifika tal-liċenzja għandu jissemma f'kull anness biex tiġi stabbilita rabta ċara mal-impriża ferrovjarja liċenzjata. L-awtorità tal-liċenzjar għandha tistabbilixxi anness aġġornat meta tiġi infurmata dwar bidla fil-kopertura għal responsabbiltà ċivili u tikkomunikaw l-Anness lill-Aġenzija Ferrovjarja Ewropea.
Artikolu 4
Miżati tal-liċenzjar
L-Istati Membri jistgħu jitolbu miżata tal-liċenzjar għall-eżami ta' kull applikazzjoni. Il-miżati tal-liċenzjar għandhom japplikaw b'mod nondiskriminatorju.
Artikolu 5
Ċerti aspetti pertinenti għar-rekwiżiti dwar il-kopertura tar-responsabbiltà ċivili u garanziji adegwati
1. L-awtorità tal-liċenzjar għandha tippubblika l-livelli minimi obbligatorji ta' kopertura, inkluż fejn l-ammont ta' tali kopertura huwa stabbilit fil-liġi nazzjonali.
2. L-awtorità tal-liċenzji ma tistax titlob kopertura li tidħol fis-seħħ qabel ma impriża ferrovjarja tibda l-operazzjonijiet tagħha.
3. Minn sa mhux aktar mill-25 ta' Awwissu 2015, l-awtorità tal-liċenzjar li tkun ħarġet il-liċenzja għandha titlob mingħand l-impriżi ferrovjarji liċenzjati kollha evidenza dwar il-livell u l-kamp ta' applikazzjoni tal-kopertura eżistenti tagħhom għal responsabbiltajiet f'każ ta' inċidenti, sakemm dawn ma jkunux ikkuntrattaw impriża tal-assigurazzjoni jew l-awtorità diġà għandha din l-informazzjoni. Tista' wkoll titlob din l-evidenza minn impriżi ferrovjarji f'każ li għandha dubji dwar jekk il-kopertura tagħhom jilħaqx ir-rekwiżiti msemmija fl-Artikolu 22 tad-Direttiva 2012/34/UE.
4. F'każ li l-intrapriża ma turix li hija assigurata b'mod adegwat, iżda li għandha garanziji adegwati biex tkun koperta, l-awtorità tal-liċenzjar, jekk ikun il-każ wara konsultazzjoni mal-korp regolatorju, għandha teżamina jekk il-kondizzjonijiet li taħthom l-impriża tkun kisbet garanziji bħal dawn jikkorrispondux għall-kundizzjonijiet tas-suq li kien jinkiseb minn xi impriża oħra bl-istess livell ta' kapaċità finanzjarja u espożizzjoni għar-riskji.
5. Jekk l-awtorità tal-liċenzjar tissospendi liċenzja skont l- Artikolu 24(1) tad-Direttiva 2012/34/UE, jew jagħti liċenzja temporanja skont l-Artikolu 24(3) tal-imsemmija Direttiva, din għandha tinforma lil kwalunkwe awtorità kompetenti oħra msemmija fir-Regolament (KE) Nru 1370/2007 tal-Parlament Ewropew u tal-Kunsill (6), li magħhom tkun taf li l-impriża ferrovjarja kellha kuntratti ta' servizzi. Jekk l-awtorità tal-liċenzjar għandha dubji dwar il-kompatibbiltà ta' garanziji għal kopertura tar-responsabbilitaijiet tagħha mar-regoli tal-Unjoni dwar l-għajnuna mill-Istat, hija tista' tittrażmetti l-informazzjoni meħtieġa lill-awtoritajiet responsabbli mill-kontroll ta' dawn ir-regoli dwar l-għajnuna mill-Istat.
Artikolu 6
Relazzjoni maċ-ċertifikati tas-sigurtà
1. L-għoti ta' liċenzja ma jistax ikun kundizzjonali fuq jekk l-impriża tkunx fil-pussess taċ-ċertifikat tas-sikurezza msemmi fl-Artikolu 10 tad-Direttiva 2004/49/KE.
2. Jekk impriża hija fil-pussess ta' ċertifikat tas-sigurtà, l-awtorità tal-liċenzjar ma għandhiex tiċċekkja ir-rekwiżiti għaċ-ċertifikati tas-sigurtà, meta tagħti l-liċenzja.
Artikolu 7
Ċerti aspetti tal-proċedura għall-għoti ta' liċenzja
1. Fi żmien xahar mill-wasla tal-applikazzjoni, l-awtorità tal-liċenzjar għandha tinforma lill-impriża li l-fajl huwa komplut jew titlob għal informazzjoni komplementari. Dan il-limitu ta' żmien jista' jkun estiż b'ġimagħtejn taħt ċirkostanzi eċċezzjonali u l-impriża għandha tiġi infurmata b'dan. Ladarba tkun waslet informazzjoni kumplimentari, l-awtorità tal-liċenzjar għandha tinforma lill-impriża fi żmien massimu ta' xahar jekk il-fajl hux komplut.
2. L-awtorità tal-liċenzjar tista' titlob biss id-dokumenti msemmija fil-Kapitolu III tad-Direttiva 2012/34/UE jew dawk meħtieġa mil-leġiżlazzjoni nazzjonali. L-awtorità tal-liċenzjar għandha tippubblika lista tad-dokumenti kollha u l-kontenut tagħhom u ma għandhomx jitolbu dokumenti oħra mill-impriżi. Jekk il-lista tkun aġġornata u ppubblikata, l-impriżi jistgħu xorta joqogħdu fuq il-lista preċedenti rigward l-applikazzjonijiet li jkunu ssottomettew qabel l-aġġornament.
3. Fir-rigward ta' impriżi bi dħul annwali ta' inqas minn EUR 5 miljun, mill-attivitajiet ferrovjarji, l-awtorità tal-liċenzjar tista' tikkunsidra r-rekwiżit rigward l-kapaċità tagħhom li jissodisfaw l-obbligi attwali u potenzjali għal perjodu ta' 12-il xahar mill-bidu tal-operazzjonijiet skont l-Artikolu 20(1) tad-Direttiva 2012/34/UE bħala ssodisfat, jekk l-impriża tista' turi li l-kapital nett tagħha jkun mill-inqas EUR 100 000 jew ammont miftiehem mal-korp regolatorju. L-awtorità tal-liċenzjar għandha tippubblika dan l-ammont.
Artikolu 8
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu japplika mis-16 ta' Ġunju 2015.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-4 ta' Frar 2015.
Għall-Kummissjoni
Il-President
Jean-Claude JUNCKER
(1) ĠU L 343, 14.12.2012, p. 32.
(2) ĠU L 113, 20.4.2004, p. 37.
(3) Id-Direttiva 2004/49/KE tal-Parlament Ewropew u tal-Kunsill tad-29 ta' April 2004 fuq is-sigurtà tal-linji tal-ferrovija tal-Komunità (ĠU L 164, 30.4.2004, p. 44).
(4) Ir-Regolament (KE) Nru 1008/2008 tal-Parlament Ewropew u tal-Kunsill tal-24 ta' Settembru 2008 dwar regoli komuni għall-operat ta' servizzi bl-ajru fil-Komunità (ĠU L 293, 31.10.2008, p. 3).
(5) Id-Deċiżjoni tal-Kummissjoni 2007/756/KE tad-9 ta' Novembru 2007 li tadotta speċifikazzjoni komuni tar-reġistru nazzjonali tal-vetturi previst fl-Artikoli 14(4) u (5) tad-Direttivi 96/48/KE u 2001/16/KE (ĠU L 305, 23.11.2007, p. 30).
(6) Ir-Regolament (KE) Nru 1370/2007 tal-Parlament Ewropew u tal-Kunsill tat-23 ta' Ottubru 2007 dwar servizzi pubbliċi tat-trasport tal-passiġġieri bil-ferrovija u bit-triq u li jħassar ir-Regolamenti tal-Kunsill (KEE) Nri 1191/69 u 1107/70 (ĠU L 315, 3.12.2007, p. 1).
ANNESS I
Format standard għad-dokument tal-liċenzja
Test ta 'immaġni
INFORMAZZJONI DWAR IL-LIĊENZJA GĦAT-TWETTIQ TA’ SERVIZZI TA’ TRASPORT FERROVJARJU
Fi ħdan l-Unjoni u ż-Żona Ekonomika Ewropea skont id- Direttiva 2012/34/UE u l-leġislazzjoni nazzjonali rilevanti.
1. Stat tal-ħruġ tal-liċenzji
Stat tal-Ħruġ
Liċenzja ġdida Liċenzja emendata
Nru tal-liċenzja nazzjonali
Deċiżjoni ta’ identifikazzjoni
Leġiżlazzjoni applikabbli
Awtorità tal-Liċenzjar
Nru tat-Telefown
Indirizz postali
Kodiċi Postali u belt
Indirizz elettroniku
2. Detentur tal-liċenzja
Impriża ferrovjarja
Nru tat-Telefown
Indirizz postali
Kodiċi Postali u belt
Indirizz elettroniku
Nru tar-reġistrazzjoni
Nru tal-VAT
3. Validità
Valida minn
Liċenzja temporanja: IVA LE
Jekk iva: valida sa
Tip ta’ servizzi: merkanzija passiġġieri trazzjoni biss
Sospiża fi
Revokata fi
4. Emendi
Emendata fi
Deskrizzjoni tal-emenda
5. Kundizzjonijiet u obbligi
Il-kundizzjonijiet skont l-Artikolu 23(2) tad-Direttiva 2012/34/UE għandhom jiġu msemmija hawnhekk, jew għandha tingħata referenza għal fejn id-dokumentazzjoni hija disponibbli
Data
Firma
Isem
Nru tal-liċenzja-notifika tal-KE
Test ta 'immaġni
Spjegazzjonijiet dwar kif timla l-mudell tal-liċenzja
Il-leġiżlazzjoni rilevanti tal-Unjoni hija stipulata fid-Direttiva 2012/34/UE.
Il-liċenzji ferrovjarji maħruġa skont id-Direttiva 2012/34/UE huma validi wkoll fiż-Żona Ekonomika Ewropea permezz tad-Deċiżjoni Nru 118/2001 tal-Kumitat Konġunt taż-ŻEE tat-28 ta’ Settembru 2001 li temenda l-Anness XIII (Trasport) għall-Ftehim taż-ŻEE (ĠU L 322, 6.12.2001, p. 32). Il-liċenzji maħruġa fiż-Żona Ekonomika Ewropea huma ugwalment validi fl-Unjoni permezz tal-istess deċiżjoni.
Kull darba li Deċiżjoni li taffettwa d-dokument tal-liċenzja ta’ impriża ferrovjarja liċenzjata partikolari, jiġifieri billi temenda, tissospendi, tirrevoka jew tissostitwixxi liċenzja permanenti ma’ waħda temporanja, għandu jkun ikkomunikat lill-Aġenzija Ferrovjarja Ewropea dokument tal-liċenzja ġdid.
Id-dokument tal-liċenzja huwa dejjem akkumpanjat mill-Anness dwar il-kopertura finanzjarja għar-responsabbiltà.
L-ispjegazzjonijiet hawn taħt jirreferu għall-oqsma numerati tal-formola. Ir-referenzi huma għall-Artikoli tad-Direttiva 2012/34/UE.
Stat tal-ħruġ tal-liċenza. Għandu dejjem jiġi indikat jekk dokument jikkonċernax liċenzja ġdida jew kwalunkwe tip ta’ emenda għal liċenzja eżistenti. Il-leġiżlazzjoni applikabbli fl-Istat tal-ħruġ għandha tkun identifikata b’referenza għal-liġi jew dispożizzjonijiet legali oħra. In-numru tal-identifikazzjoni tal-liċenzja użat fl-Istat tal-ħruġ għandu jitniżżel u, fejn applikabbli, titniżżel ukoll l-identifikazzjoni tad-deċiżjoni tal-awtorità permezz ta’ numru ta’ referenza jew referenza rilevanti oħra. L-awtorità tal-liċenzjar hija maħtura mill-Istati Membri skont l- Artikolu 16. Din għandha tiġi identifikata b’mod li jagħmilha possibbli għall-partijiet interessati li jikkuntattjaw il-korp inkwistjoni. In-numri tat-telefown għandhom jindikaw in-numru ġenerali, fejn applikabbli, u mhux il-persuna responsabbli mill-kwistjonijiet tal-liċenzjar. In-numri tat-telefown u l-feks għandhom jindikaw il-kodiċi tal-pajjiż. L-indirizz tal-posta elettronika għandu jkun il-kaxxa postali ġenerali tal-awtorità.
Detentur tal-liċenzja. Id-dettalji tal-kuntatt tad-detentur tal-liċenzja għandhom, b’mod simili bħal fil-każ tad-dettalji tal-awtorità, jindikaw l-indirizzi ġenerali tal-impriża ferrovjarja, filwaqt li jevitaw li jagħtu referenza għal xi persuna partikolari. Jekk diversi numri tar-reġistrazzjoni huma attribwiti lid-detentur skont il-liġi nazzjonali, hemm possibilitajiet fil-formola li jitniżżlu kemm in-numru tal-VAT kif ukoll it-tieni numru tar-reġistrazzjoni. In-numri tat-telefown u l-feks għandhom jindikaw il-kodiċi tal-pajjiż.
Validità. Skont l-ewwel sentenza tal- Artikolu 23(2) liċenzja tibqa’ valida sakemm l-impriża ferrovjarja tissodisfa l-obbligi tad-Direttiva. Ir-reviżjonijiet li huma permessi skont it-tieni sentenza tal- Artikolu 23(2) ma jitolbux li d-dokument tal-liċenzja bħala tali jiġi emendat.
L-awtorità tal-ħruġ għandha tindika l-ewwel data ta’ validità u t-tip(i) ta’ servizzi li l-liċenzja hija valida għalih(om). Fil-każ ta’ liċenzja temporanja, maħruġa skont id-dispożizzjonijiet tal-Artikolu 24(3), għandha titniżżel id-data tat-tmiem. Il-perjodu massimu ta’ validità ta’ liċenzja temporanja huwa ta’ sitt xhur. Fil-każ ta’ sospensjoni jew revoka d-dati għandhom jitniżżlu fil-formola. Id-dati għandhom jitniżżlu f’format komuni (jjxxss).
Emendi. Jekk l-impriża ferrovjarja liċenzjata tibdel jew testendi b’mod sinifikanti l-attivitajiet tagħha, il-liċenzja għandha terġa’ tiġi ppreżentata għal reviżjoni (Artikolu 24.6). Reviżjoni bħal din tista’ tikkawża li l-liċenzja tiġi emendata u jekk iseħħ dan, id-data tal-emenda għandha tiddaħħal fil-qasam flimkien ma’ deskrizzjoni qasira. Id-dati għandhom jitniżżlu f’format komuni (jjxxss).
Kundizzjonijiet u obbligi. L-Artikolu 23(3) jiddikjara li d-dispożizzjonijiet speċifiċi li jirregolaw is-sospensjoni jew ir-revoka ta’ liċenzja jistgħu jiġu inkorporati fil-liċenzja nnifisha. Jekk dan ikun il-każ, id-dispożizzjonijiet għandhom ikunu indikati f’dan il-qasam.
Firma. Persuna awtorizzata mill-awtorità tal-liċenzjar li tiddeċiedi fuq il-liċenzi għandha tivvalida u tikkomunika d-dokument tal-liċenzja lill-Aġenzija Ferrovjarja Ewropea. L-isem tal-persuna firmatarja għandu jinkiteb ittra ittra.
ANNESS II
Format standard għall-anness dwar ir-responsabbiltà mal-liċenzja ferrovjarja
Test ta 'immaġni
LIĊENZJA
Nru tal-anness dwar ir-responsabbiltà
Kopertura finanzjarja għar-responsabbiltà
Fir-rigward ta’ liċenzja għat-twettiq ta’ servizzi ta’ trasport bil-ferrovija fi ħdan l-Unjoni u ż-Żona Ekonomika Ewropea skont id-Direttiva 2012/34/UE u l-leġislazzjoni nazzjonali rilevanti.
1. Stat tal-ħruġ tal-liċenzji
Stat emittenti
Awtorità tal-Liċenzjar
Nru tal-liċenzja nazzjonali
Deċiżjoni ta’ identifikazzjoni
Leġiżlazzjoni applikabbli
2. Detentur tal-liċenzja
Impriża ferrovjarja
Nru ta’ reġistrazzjoni
Nru tal-VAT
3. Awtorità tal-liċenzjar (jekk mhix l-awtorità tal-liċenzjar f’1)
Awtorità tal-Liċenzjar
Nru tat-Telefown
Indirizz postali
Kodiċi Postali u belt
Indirizz elettroniku
Stat
Leġiżlazzjoni applikabbli
4. Kopertura finanzjarja għar-responsabbiltà
Kopertura finanzjarja, ammont
Garanziji skont il-kundizzjonijiet tas-suq (deskrizzjoni qasira)
Kopertura ġeografika
Valida minn
Valida sa
5. Kundizzjonijiet u obbligi
Il-kundizzjonijiet nazzjonali skont l-Artikolu 22, l-Artkolu 23(2) u/jew (3) tad-Direttiva 2012/34/UE għandhom jiġu msemmija hawnhekk, jew għandha tingħata referenza għal fejn id-dokumentazzjoni hija disponibbli
Data Firma
Isem
Nru tal-liċenzja-notifika tal-KE
Test ta 'immaġni
Spjegazzjonijiet u struzzjonijiet għall-użu
Stat tal-ħruġ tal-liċenza. L-informazzjoni mogħtija fil-liċenzja għandha tiġi ripetuta hawnhekk biex tippermetti l-identifikazzjoni korretta tal-liċenzja. L-awtorità tal-liċenzjar hija maħtura mill-Istati Membri skont l- Artikolu 16. Peress li l-Anness huwa marbut ma’ dokument tal-liċenzja skont l-Anness I ta’ dan ir-Regolament mhuwiex meħtieġ li tiġi ripetuta l-informazzjoni kollha mogħtija fuq l-awtorità tal-liċenzjar. L-isem huwa biżżejjed.
Detentur tal-liċenzja. Peress li l-Anness huwa marbut ma’ liċenzja mhuwiex meħtieġ li tiġi ripetuta l-informazzjoni kollha mogħtija fuq id-detentur tal-liċenzja. L-isem u n-numri tar-reġistrazzjoni possibbli huma biżżejjed.
Korp tal-liċenzjar responsabbli għall-validazzjoni ta’ kopertura finanzjarja. Jekk l-anness dwar ir-responsabbiltà jkun sottomess mill-awtorità tal-għoti tal-liċenzja lill-impriża ferrovjarja, dan il-qasam ma għandux jimtela. F’każ li awtorità tal-liċenzjar fi Stat Membru ieħor tkun talbet u approvat il-kopertura tal-assigurazzjoni addizzjonali, id-dettalji tal-kuntatt relevanti ta’ dik l-awtorità tal-liċenzjar għandhom jitniżżlu f’dan il-qasam. In-numri tat-telefown u l-feks għandhom jindikaw il-kodiċi tal-pajjiż.
Kopertura finanzjarja għar-responsabbiltà. L-ammont ta’ kopertura li huwa meħtieġ u approvat għandu jitniżżel f’dan il-fqasam, b’indikazzjoni tal-munita li biha huwa nnotat. Jekk l-impriża ferrovjarja ma tkunx ħadet polza tal-assigurazzjoni iżda wriet li hija koperta minn garanziji adegwati skont il-kundizzjonijiet tas-suq (eż. garanzija finanzjarja), in-natura ta’ din il-kopertura għandha tiġi deskritta. Jekk il-kopertura ġeografika hija limitata għal pajjiż jew għal reġjun speċifiku jew jekk ċerti pajjiżi jew reġjuni huma speċifikament esklużi, dan għandu jkun deskritt. Għandha titniżżel l-ewwel data ta’ validità tal-polza ta’ assigurazzjoni. L-impriża ferrovjarja għandha obbligu li tkompli tkopri r-responsabbiltà. Il-liċenzja ma tkunx valida jekk l-impriża ferrovjarja ma tissodisfax dan ir-rekwiżit (Artikolu 18). Madankollu, f’każijiet eċċezzjonali, l-assigurazzjoni tista’ tittieħed għal żmien limitat. F’dan il-każ tista’ tiddaħħal data tat-tmiem tal-validità. Id-dati għandhom jitniżżlu f’format komuni (jjxxss). L-awtorità tal-liċenzjar tista’ tivverifika li l-impriża ferrovjarja tikkonforma mar-rekwiżiti (Artikolu 24).
Kundizzjonijiet u obbligi. Il-kopertura għar-responsabbiltà tista’ tintrabat ma’ kundizzjonijiet nazzjonali jew obbligi imposti fuq l-impriża ferrovjarja mid-dispożizzjonijiet tal-Artikolu 22. F’każ hekk, dan għandu jiġi indikat f’dan il-qasam.
Firma. Persuna awtorizzata mill-awtorità tal-liċenzjar li tapprova l-arranġamenti tal-assigurazzjoni fi ħdan il-proċedura tal-liċenzjar għandha tivvalida u tikkomunika d-dokument lill-Aġenzija Ferrovjarja Ewropea. L-isem tal-persuna firmatarja għandu jinkiteb ittra ittra.
Numru tan-notifika tal-liċenzja tal-KE.