|
16.11.2013 |
MT |
Il-Ġurnal Uffiċjali tal-Unjoni Ewropea |
L 306/7 |
REGOLAMENT TA’ DELEGA TAL-KUMMISSJONI (UE) Nru 1155/2013
tal-21 ta’ Awwissu 2013
li jemenda r-Regolament (UE) Nru 1169/2011 tal-Parlament Ewropew u tal-Kunsill dwar l-għoti ta’ informazzjoni dwar l-ikel lill-konsumaturi fir-rigward ta’ informazzjoni dwar l-assenza jew il-preżenza mnaqqsa ta’ glutina fl-ikel
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 1169/2011 tal-Parlament Ewropew u tal-Kunsill tal-25 ta’ Ottubru 2011 dwar l-għoti ta’ informazzjoni dwar l-ikel lill-konsumaturi (1), u b’mod partikolari l-Artikolu 36(4) tiegħu,
Billi:
|
(1) |
Il-paragrafu 2 tal-Artikolu 36 tar-Regolament (UE) Nru 1169/2011 jirrikjedi li l-informazzjoni li tista’ tiġi pprovduta minn operaturi tan-negozju tal-ikel ma tqarraqx bil-konsumatur, ma tkunx ambigwa jew toħloq konfużjoni għall-konsumaturi u, fejn ikun il-każ, tkun ibbażata fuq id-data xjentifika rilevanti. |
|
(2) |
Skont il-paragrafu 3 ta’ dak l-Artikolu, il-Kummissjoni għandha tadotta atti ta’ implimentazzjoni dwar l-applikazzjoni ta’ dawk ir-rekwiżiti għall-każijiet identifikati f’dak il-paragrafu. |
|
(3) |
Il-paragrafu 4 ta’ dak l-Artikolu jipprovdi għall-possibbiltà li l-paragrafu 3 jiġi ssupplimentat billi jiżdied każ speċifiku ieħor li fih il-Kummissjoni għandha timplimenta dawk ir-rekwiżiti sabiex jiġi żgurat li l-konsumaturi jkunu informati b’mod xieraq. |
|
(4) |
Persuni li għandhom il-marda coeliac ibatu minn intolleranza permanenti għall-glutina. Il-glutina tista’ tikkawża effetti avversi għal dawk il-persuni u għalhekk għandha tkun assenti jew preżenti f’ammonti baxxi ħafna fid-dieta tagħhom. |
|
(5) |
Ir-Regolament tal-Kummissjoni (KE) Nru 41/2009 (2) jistabbilixxi regoli armonizzati dwar l-informazzjoni li tingħata lill-konsumaturi dwar l-assenza jew il-preżenza mnaqqsa ta’ glutina fl-ikel. Ir-Regolament (UE) Nru 609/2013 tal-Parlament Ewropew u tal-Kunsill (3) jipprevedi t-tħassir tar-Regolament (KE) Nru 41/2009 mill-20 ta’ Lulju 2016. |
|
(6) |
Il-konsumaturi għandhom ikomplu jkunu infurmati b’mod xieraq u ma jiġux imqarrqa jew konfużi meta l-informazzjoni dwar l-assenza jew il-preżenza mnaqqsa ta’ glutina fl-ikel tingħata mill-operaturi tan-negozji tal-ikel wara t-tħassir tar-Regolament (KE) Nru 41/2009. Huwa għalhekk meħtieġ li l-paragrafu 3 tal-Artikolu 36 tar-Regolament (UE) Nru 1169/2011 jiġi emendat sabiex jippermetti lill-Kummissjoni tistabbilixxi kundizzjonijiet uniformi għall-informazzjoni dwar l-ikel dwar l-assenza jew il-preżenza mnaqqsa ta’ glutina fl-ikel li tista’ tingħata mill-operaturi tan-negozji tal-ikel, |
ADOTTAT DAN IR-REGOLAMENT:
Artikolu 1
Fl-ewwel sottoparagrafu tal-Artikolu 36(3) tar-Regolament (UE) Nru 1169/2011 għandu jiżdied il-punt (d) li ġej:
|
“(d) |
informazzjoni dwar l-assenza jew il-preżenza mnaqqsa ta’ glutina fl-ikel.” |
Artikolu 2
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, il-21 ta’ Awwissu 2013.
Għall-Kummissjoni
Il-President
José Manuel BARROSO
(1) ĠU L 304, 22.11.2011, p. 18.
(2) Ir-Regolament tal-Kummissjoni (KE) Nru 41/2009 tal-20 ta’ Jannar 2009 li jikkonċerna l-kompożizzjoni u l-ittikkettjar ta’ oġġetti tal-ikel għal dawk li ma taqbilx magħhom il-glutina (ĠU L 16, 21.1.2009, p. 3).
(3) Ir-Regolament (UE) Nru 609/2013 tal-Parlament Ewropew u tal-Kunsill tat-12 ta’ Ġunju 2013 dwar ikel maħsub għat-trabi u t-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż u li jħassar id-Direttiva tal-Kunsill 92/52/KEE, id-Direttivi tal-Kummissjoni 96/8/KE, 1999/21/KE, 2006/125/KE u 2006/141/KE, id-Direttiva 2009/39/KE tal-Parlament Ewropew u tal-Kunsill u r-Regolamenti tal-Kummissjoni (KE) Nru 41/2009 u (KE) Nru 953/2009 (ĠU L 181, 29.6.2013, p. 35).