ANNESS

Skema tal-ittestjar neċessarja biex tkun verifikata l-kisba tal-mira tal-Unjoni msemmija fl-Artikolu 1(2)

1.   QAFAS GĦAT-TEĦID TAL-KAMPJUNI

Il-qafas għat-teħid tal-kampjuni għandu jinkludi l-qatgħat kollha tad-dundjani tas-simna u tat-tgħammir fil-qafas tal-programmi nazzjonali ta’ kontroll stipulati fl-Artikolu 5 tar-Regolament (KE) Nru 2160/2003.

2.   MONITORAĠĠ TAD-DUNJANI

2.1.   Frekwenza tat-teħid tal-kampjun

(a)

L-operaturi kummerċjali tal-ikel għandhom jieħdu kampjuni mill-qatgħat kollha tad-dundjani tas-simna u tat-tgħammir kif ġej: (i) it-teħid tal-kampjuni minn qatgħat tad-dundjani tas-simna u tat-tgħammir għandu jsir fi żmien tliet ġimgħat qabel il-qatla. L-awtorità kompetenti tista’ tawtorizza teħid tal-kampjuni fl-aħħar sitt ġimgħat qabel id-data tal-qatla f’każ li d-dundjani jinżammu għal aktar minn 100 jum jew jaqgħu taħt il-produzzjoni organika tad-dundjani skont ir-Regolament tal-Kummissjoni (KE) Nru 889/2008 (1); (ii) it-teħid tal-kampjuni minn qatgħat tad-dundjani tat-tgħammir għandu jsir: — f’qatgħat tat-trobbija: b’età ta’ ġurnata, b’età ta’ erba’ ġimgħat u ġimagħtejn qabel jimxu għall-fażi li jbidu jew għall-unità fejn ibidu, — f’qatgħat adulti: mill-anqas kull tielet ġimgħa matul il-perjodu li jbidu fl-azjenda jew fil-mafqas, — fl-azjenda fil-każ ta’ qatgħat tad-dundjani tat-tgħammir li jbidu bajd tat-tfaqqis maħsub għall-kummerċ fl-Unjoni. (iii) L-awtorità kompetenti tista’ tiddeċiedi li timplimenta waħda mill-għażliet imsemmija fit-tieni inċiż tal-punt (ii) għall-iskema kollha tal-ittestjar għall-qatgħat kollha. Madanakollu, it-teħid tal-kampjuni tal-qatgħat tat-tgħammir li jbidu bajd tat-tfaqqis maħsub għall-kummerċ fl-Unjoni għandu jseħħ fl-azjenda. (iv) B’deroga mit-tieni inċiż tal-punt (ii), jekk il-mira tal-Unjoni tkun intlaħqet għal mill-anqas sentejn kalendarji konsekuttivi fl-Istati Membri kollha, it-teħid tal-kampjuni fl-azjenda jista’ jiġi estiż biex isir kull erba’ ġimgħat, fuq id-diskrezzjoni tal-awtorità kompetenti. Madanakollu, l-awtorità kompetenti tista’ tiddeċiedi li żżomm jew terġa’ lura għal intervall tal-ittestjar ta’ ġimgħatejn fil-każ li tinstab il-preżenza tas-serotipi rilevanti tas-Salmonella fil-qatgħa tat-tgħammir fl-azjenda u/jew f’kull każ ieħor meqjus xieraq mill-awtorità kompetenti.

(b)

It-teħid tal-kampjuni mill-awtorità kompetenti għandu għallinqas jipprovdi għal: (i) it-teħid tal-kampjuni minn qatgħat tad-dundjani tat-tgħammir: — darba fis-sena, il-qatgħat kollha b’mill-anqas 250 dundjan adult tat-tgħammir b’età ta’ bejn it-30 u l-45 ġimgħa u l-azjendi kollha li jrabbu dundjani nanniet u bużnanniet elit għat-tgħammir; l-awtorità kompetenti tista’ tiddeċiedi li dan it-teħid tal-kampjuni jista’ jsir ukoll fil-mafqas; u — il-qatgħat kollha fl-azjendi f’każ li tinstab is-Salmonella Enteritidis jew is-Salmonella Typhimurium f’kampjuni meħuda fil-mafqas minn operaturi kummerċjali tal-ikel jew fil-qafas tal-kontrolli uffiċjali, biex tiġi investigata l-oriġini tal-infezzjoni. (ii) it-teħid tal-kampjuni minn qatgħat tad-dundjani tas-simna għandu jsir darba fis-sena, mill-anqas f’qatgħa waħda f’10 % tal-azjendi b’mill-anqas 500 dundjan tas-simna. (iii) it-teħid tal-kampjuni jista’ jsir abbażi tar-riskju u kull darba li l-awtorità kompetenti tikkunsidrah neċessarju. (iv) it-teħid tal-kampjuni li jsir mill-awtorità kompetenti jista’ jieħu post it-teħid tal-kampjuni mill-operatur kummerċjali tal-ikel kif imsemmi fil-punt (a).

2.2.   Il-protokoll tat-teħid tal-kampjuni

2.2.1.   Struzzjonijiet ġenerali għat-teħid tal-kampjuni

L-awtorità kompetenti jew l-operatur kummerċjali tal-ikel għandhom jiżguraw li l-kampjuni jittieħdu minn persuni mħarrġa għal dak il-għan.

It-teħid tal-kampjuni minn qatgħat tad-dundjani tat-tgħammir għandu jsir skont il-punt 2.2 tal-Anness tar-Regolament tal-Kummissjoni (UE) Nru 200/2010 (2).

Għat-teħid tal-kampjuni minn qatgħat tad-dundjani tas-simna mill-anqas żewġ pari swabs li jintlibsu fuq l-istvali għandhom jittieħdu għal kull qatgħa. Is-swabs li jintlibsu fuq l-istvali jitqiegħdu fuq il-buz u l-kampjun jittieħed bil-mixi madwar il-bini fejn jinżammu t-tjur. Is-swabs minn qatgħa waħda tad-dundjani jistgħu jinġabru f’kampjun wieħed.

Il-wiċċ tas-swabs, qabel ma dawn jintlibsu fuq l-istvali, għandu jixxarrab:

(a)	billi jiġu applikati dilwenti ta’ rkupru massimu (MRD: 0,8 % klorur tas-sodju, 0,1 % peptun f’ilma sterili dejonizzat); jew

(b)	billi jiġi applikat ilma sterili; jew

(c)	billi jiġi applikat kull dilwent ieħor approvat mil-laboratorju nazzjonali ta’ referenza msemmi fl-Artikolu 11(3) tar-Regolament (KE) Nru 2160/2003; jew

(d)	billi jiġi awtoklavat f’kontenitur flimkien mad-dilwenti.

Is-swabs li jintlibsu fuq l-istvali għandhom jixxarrbu billi jitferra’ l-likwidu fihom qabel ma jintlibsu jew billi jitħawdu f’kontenitur bid-dilwent.

Għandu jkun żgurat li t-taqsimiet kollha ta’ azjenda huma rappreżentati fil-kampjun b’mod proporzjonat. Kull par swabs li jintlibsu fuq l-istvali għandu jkopri madwar 50 % taż-żona tal-binja.

Meta jitlesta t-teħid tal-kampjuni, is-swabs li jintlibsu fuq l-istvali għandhom jitneħħew bil-galbu mill-buz sabiex ma jaqax materjal aderenti. Is-swabs li jintlibsu fuq l-istvali jistgħu jinqalbu ta’ ġewwa barra biex ma jaqax minnhom materjal. Dawn għandhom jitqiegħu f’borża jew f’kontenitur u titwaħħal fuqhom tikketta.

L-awtorità kompetenti tista’ tiddeċiedi li żżid l-għadd minimu ta’ kampjuni sabiex tiżgura teħid rappreżentattiv tal-kampjuni skont evalwazzjoni tal-każijiet, wieħed wieħed, tal-parametri epidemjoloġiċi, fosthom il-kundizzjonijiet tal-bijosigurtà, it-tqassim jew id-daqs tal-qatgħa.

Jekk l-awtorità kompetenti tapprova dan, par wieħed ta’ swabs li jintlibsu fuq l-istvali jista’ jitbiddel minn kampjun ta’ 100 g trab miġbur minn diversi postijiet fil-binja kollha minn fuq uċuħ bi preżenza viżibbli ta’ trab. Bħala alternattiva, swab waħda jew aktar ta’ drapp niedi b’wiċċ kombinat ta’ mill-anqas 900 cm2 jistgħu jintużaw biex jiġbru trab minn fuq diversi uċuħ minn madwar il-binja. Kull swab għandha tinkesa sew bit-trab fuq iż-żewġ naħat.

2.2.2.   Struzzjonijiet speċifiċi għal ċerti tipi ta’ azjendi

(a)

Għall-qatgħat tad-dundjani mrobbija fil-ftuħ, il-kampjuni għandhom jittieħdu biss fil-binja.

(b)

Jekk l-aċċess għall-binja ma jkunx possibbli minħabba l-ispazju limitat f’qatgħat b’anqas minn 100 dundjan, u għalhekk waqt il-mixi ma jkunx possibbli li jintużaw is-swabs li jintlibsu fuq l-istvali, dawn jistgħu jitbiddlu mill-istess tip ta’ swabs tad-drapp li jintlibsu fl-idejn u li jintużaw għat-trab; u dawn jingħorku fuq uċuħ kontaminati b’rawt frisk, jew jekk dan ma jkunx fattibbli, permezz ta’ tekniki oħra għat-teħid tal-kampjuni mir-rawt li huma xierqa għall-għan maħsub.

2.2.3.   Teħid tal-kampjuni mill-awtorità kompetenti

L-awtorità kompetenti għandha tissodisfa ruħha billi tagħmel iżjed testijiet u/jew kontrolli dokumentati kif xieraq biex tivverifika li r-riżultati ma jitbiddlux bil-preżenza ta’ antimikrobiċi jew sustanzi oħra li ma jippermettux it-tkabbir tal-batterji.

Fejn ma tinstabx il-preżenza tas-Salmonella Enteritidis u tas-Salmonella Typhimurium iżda jinstabu antimikrobiċi jew effetti li tħalliex isir tkabbir tal-batterji, il-qatgħa tad-dundjani għandha titqies infettata għall-għan tal-mira tal-Unjoni msemmija fl-Artikolu 1(2).

2.2.4.   Trasport

Il-kampjuni għandhom jintbagħtu bla dewmien żejjed, bil-posta ekspress jew bil-kurjer, lil-laboratorji msemmija fl-Artikoli 11 u 12 tar-Regolament (KE) Nru 2160/2003. Waqt it-trasport għandhom jiġu protetti minn temperaturi ogħla minn 25 °C u mill-esponiment għad-dawl tax-xemx.

Fejn mhux possibbli li l-kampjuni jintbagħtu fi żmien 24 siegħa minn meta ttieħdu, dawn għandhom jinħażnu fil-kesħa.

3.   ANALIŻIJIET TAL-LABORATORJU

3.1.   It-tħejjija tal-kampjuni

Fil-laboratorju, il-kampjuni għandhom jinżammu fil-kesħa sakemm isir l-eżami, u dan għandu jinbeda fi żmien 48 siegħa wara li jasal il-kampjun u fi żmien 96 siegħa wara li jkun ittieħed il-kampjun.

Il-par(i) ta’ swabs/kalzetti li jintlibsu fuq l-istvali/kalzetti għandhom jinħarġu mill-kontenitur bil-galbu ħalli jiġi evitat li jaqa’ materjal aderenti ta’ rawt, jinġabru flimkien u jitqiegħu f’225 ml ilma tal-peptun li jkun newtralizzat (BPW) li jkun issaħħan minn qabel għal temperatura ambjentali. Is-swabs/kalzetti li jintlibsu fuq l-istvali għandhom jiġu mgħaddsa kompletament fil-BPW u għalhekk wieħed jista’ jżid aktar BPW jekk ikun meħtieġ.

Preferibbilment, il-kampjun tat-trab għandu jiġi analizzat għalih. Madanakollu, l-awtorità kompetenti tista’ tiddeċiedi li dan jitħalla jingħaqad ma’ dak tal-par swabs li jintlibsu fuq l-istvali/kalzetti għall-analiżi.

Il-kampjun għandu jitħawwad sakemm jissaturah kollu u l-kultura għandha titkompla bl-użu tal-metodu ta’ individwazzjoni stabbilit fil-punt 3.2.

Kampjuni oħrajn (pereżempju mill-qatgħat tat-tgħammir jew mill-imfaqas) għandhom jitħejjew skont il-punt 2.2.2 tal-Anness tar-Regolament (UE) Nru 200/2010.

Jekk isir qbil fuq l-istandards tal-Kumitat Ewropew għall-Istandardizzazzjoni (“CEN”) jew l-Organizzazzjoni Internazzjonali għall-Istandardizzazzjoni (“ISO”) dwar it-tħejjija tar-rawt biex tinstab is-Salmonella, dawn għandhom jiġu applikati u jieħdu post id-dispożizzjonijiet dwar it-tħejjija tal-kampjuni stabbiliti f’dan il-punt.

3.2.   Il-metodu tal-individwazzjoni

Għandu jintuża l-metodu ta’ individwazzjoni li hu rakkomandat mil-Laboratorju ta’ Referenza tal-UE għas-Salmonella f’Bilthoven, il-Pajjiżi l-Baxxi.

Dan il-metodu hu deskritt fl-Anness D tal-EN/ISO 6579 (2002): “L-individwazzjoni tas-Salmonella spp. fir-rawt tal-annimali u fil-kampjuni tal-istadju primarju tal-produzzjoni”.

F’dak il-metodu ta’ individwazzjoni, tintuża sustanza semi-solida (sustanza semi-solida mmodifikata Rappaport-Vassiladis, MSRV) bħala s-sustanza selettiva unika tal-arrikkiment.

3.3.   Is-serotipar

Għall-qatgħat tad-dundjani tat-tgħammir għandu jiġi serotipizzat mill-anqas iżolat wieħed minn kull kampjun pożittiv, skont l-iskema White-Kaufmann-Le Minor.

Għall-qatgħat tad-dundjani tas-simna għandu jiġi serotipizzat mill-anqas iżolat wieħed minn kull kampjun pożittiv li ttieħed mill-awtorità kompetenti, skont l-iskema White-Kauffmann-Le Minor.

L-operaturi kummerċjali tal-ikel għandhom għallinqas jiżguraw li għall-iżolati kollha l-ebda wieħed ma jkun mis-serotipi tas-Salmonella Enteritidis jew tas-Salmonella Typhimurium inklużi l-varjetajiet monofażiċi bil-formula antiġenika 1,4,[5],12:i:-.

3.4.   Metodi alternattivi

Fir-rigward tal-kampjuni meħuda fuq inizjattiva tal-operatur kummerċjali tal-ikel, il-metodi tal-analiżi stipulati fl-Artikolu 11 tar-Regolament (KE) Nru 882/2004 tal-Parlament Ewropew u tal-Kunsill (3) jistgħu jintużaw minflok il-metodi għat-tħejjija tal-kampjuni, il-metodu ta’ individwazzjoni u s-serotipar previsti fil-punti 3.1, 3.2 u 3.3 ta’ dan l-Anness, jekk validati skont l-EN/ISO 16140.

3.5.   Ħażna tal-varjetajiet

Il-laboratorji għandhom jiżguraw li kull sena mill-anqas varjant iżolat wieħed tas-Salmonella spp. għal kull qatgħa jkun jista’ jinġabar mill-awtorità kompetenti u jinħażen għal phagetyping jew ittestjar tas-suxxettibbiltà antimikrobika li jistgħu jsiru fil-futur, bl-użu tal-metodi normali għall-ġbir tal-kultura, li jrid jiżgura l-integrità tal-varjetajiet għal perjodu minimu ta’ sentejn mid-data tal-analiżi.

L-awtorità kompetenti tista’ tiddeċiedi li iżolati tas-Salmonella spp. minn kampjuni li ttieħdu minn operaturi kummerċjali tal-ikel għandhom jinħażnu għal phagetyping jew ittestjar għas-suxxettibilità antimikrobika fil-futur biex jipprovdu għall-iżolati li jridu jiġu ttestjati skont l-Artikolu 2 tad-Deċiżjoni tal-Kummissjoni 2007/407/KE (4).

4.   RIŻULTATI U RAPPURTAR

4.1.   Kalkolu tal-prevalenza għall-verifika tal-mira tal-Unjoni

Qatgħa tad-dundjani għandha titqies pożittiva għall-għan tal-verifika tal-kisba tal-mira tal-Unjoni meta fil-qatgħa tinstab il-preżenza tas-Salmonella Enteritidis u/jew tas-Salmonella Typhimurium (għajr il-varjetajiet tal-vaċċin, iżda inklużi l-varjetajiet monofażiċi bil-formula antiġenika 1,4,[5],12:i:-).

Qatgħat tad-dundjani pożittivi għandhom jingħaddu darba biss kull rawnd, irrispettivament mill-għadd ta’ operazzjonijiet ta’ teħid tal-kampjuni u ttestjar, u jiġu rappurtati biss fis-sena li fiha jinstabu pożittivi għall-ewwel darba. Il-prevalenza għandha tiġi kkalkulata b’mod separat għal qatgħat tad-dundjani tas-simna u għal qatgħat tad-dundjani adulti tat-tgħammir.

4.2.   Rappurtar

4.2.1.   Ir-rappurtar għandu jinkludi:

(a)	in-numru totali ta’ qatgħat tad-dundjani tas-simna u tad-dundjani adulti tat-tgħammir li jkunu ġew ittestjati mill-anqas darba matul is-sena tar-rappurtar;

(b)	in-numru totali ta’ qatgħat tas-simna u ta’ qatgħat adulti tat-tgħammir li jinstabu pożittivi għal xi serotip tas-Salmonella fl-Istat Membru;

(c)	in-numru ta’ qatgħat tad-dundjani tas-simna u tad-dundjani adulti tat-tgħammir li jinstabu pożittivi għallinqas darba għas-Salmonella Enteritidis u s-Salmonella Typhimurium inklużi l-varjetajiet monofażiċi bil-formula antiġenika 1,4,[5],12:i:-;

(d)	in-numru ta’ qatgħat tad-dundjani tas-simna u tad-dundjani adulti tat-tgħammir li jinstabu pożittivi għal kull serotip tas-Salmonella jew għal Salmonella mhux speċifikata (iżolati li ma jistgħux jingħataw tip jew li mhumiex serotipizzati).

4.2.2.   L-informazzjoni msemmija fl-(a) sad-(d) tal-punt 4.2.1 għandha tingħata b’mod separat għat-teħid tal-kampjuni fil-programm nazzjonali ġenerali ta’ kontroll tas-Salmonella għal:

(a)	it-teħid tal-kampjuni tal-operaturi kummerċjali tal-ikel kif stipulat fil-punt 2.1(a); u

(b)	it-teħid tal-kampjuni tal-awtoritajiet kompetenti kif stipulat fil-punt 2.1(b).

4.2.3.   Ir-riżultati tat-testijiet għandhom jitqiesu bħala informazzjoni rilevanti dwar il-katina alimentari kif stipulat fit-Taqsima III tal-Anness II tar-Regolament (KE) Nru 853/2004 tal-Parlament Ewropew u tal-Kunsill  (5).

Għallinqas din l-informazzjoni li ġejja għandha ssir disponibbli għall-awtorità kompetenti minn kull qatgħa tad-dundjani ttestjata:

(a)	ir-referenza tal-azjenda, li tibqa’ unika fiż-żmien;

(b)	ir-referenza tal-qatgħa, li tibqa’ unika fiż-żmien;

(c)	ix-xahar meta jittieħdu l-kampjuni;

(d)	l-għadd ta’ tjur f’kull qatgħa.

Ir-riżultati u kull informazzjoni rilevanti addizzjonali għandhom jiġu rappurtati bħala parti mir-rapport dwar it-tendenzi u s-sorsi stipulat fl-Artikolu 9(1) tad-Direttiva 2003/99/KE tal-Parlament Ewropew u tal-Kunsill (6).

L-operatur kummerċjali tal-ikel għandu javża mingħajr dewmien lill-awtorità kompetenti bl-individwazzjoni tas-Salmonella Enteritidis u s-Salmonella Typhimurium inklużi l-varjetajiet monofażiċi bil-formula antiġenika 1,4,[5],12:i:-. L-operatur kummerċjali tal-ikel għandu jagħti struzzjonijiet lil-laboratorju tal-analiżi biex jaġixxi skont dan.

---

(1)  ĠU L 250, 18.9.2008, p. 1.

(2)  ĠU L 61, 11.3.2010, p. 1.

(3)  ĠU L 165, 30.4.2004, p. 1.

(4)  ĠU L 153, 14.6.2007, p. 26.

(5)  ĠU L 139, 30.4.2004, p. 55.

(6)  ĠU L 325, 12.12.2003, p. 31.