17.8.2012   

MT

Il-Ġurnal Uffiċjali tal-Unjoni Ewropea

L 219/5

(1)

Id-Direttiva 2002/32/KE tistipula li l-użu ta’ prodotti maħsuba għall-għalf tal-annimali li fihom livelli ta’ sustanzi mhux mixtieqa li jaqbżu l-livelli massimi stipulati fl-Anness I ta’ dik id-Direttiva huwa pprojbit. L-Anness II tagħha jistabbilixxi limiti ta’ azzjoni li jesiġu investigazzjonijiet f’każijiet ta’ żieda fil-livelli ta’ dawn is-sustanzi.

(2)

Ġew stabbiliti livelli massimi (MLs) ogħla tal-arseniku, il-fluworu, iċ-ċomb u l-merkurju għall-materjal tal-għalf karbonat tal-kalċju u MLs ogħla tal-arseniku u l-fluworu għall-materjal tal-għalf ossidu tal-manjeżju iżda mhux għall-materjal tal-għalf karbonat tal-kalċju u tal-manjeżju, li huwa t-taħlita naturali tal-karbonat tal-kalċju u l-karbonat tal-manjeżju. Għal raġunijiet ta’ konsistenza, huwa xieraq li l-MLs għall-arseniku, il-fluworu, iċ-ċomb u l-merkurju fil-materjal tal-għalf karbonat tal-kalċju u tal-manjeżju jiġu allinjati mal-MLs eżistenti fil-karbonat tal-kalċju.

(3)

L-Awtorità Ewropea dwar is-Sigurtà fl-Ikel (EFSA) ikkonkludiet fl-Opinjoni Xjentifika tagħha dwar is-sigurtà u l-effikaċja tat-triidrossidu tal-klorur tad-diram (klorur tar-ram tribażiku, TBCC) bħala addittiv tal-għalf (2) li jkun xieraq li jiġi stabbilit l-istess ML tal-arseniku f’dan l-addittiv bħala l-ML tal-arseniku fil-pentaidrat tas-sulfat kupriku u fil-karbonat kupriku. Huwa xieraq li jiġi mmodifikat l-ML għall-arseniku fit-triidrossidu tal-klorur tad-diram.

(4)

Ċertu għalf kompost għall-annimali domestiċi fih proporzjon sinifikanti tal-materjali tal-għalf: ħut, annimali oħra tal-baħar u prodotti li ġejjin minnhom u/jew smida mill-alka tal-baħar. Dawn il-materjali tal-għalf fihom livell għoli ta’ arseniku totali. Madanakollu l-preżenza tal-arseniku f’dawn il-materjali tal-għalf huwa primarjament bħala arseniku organiku li huwa l-forma inqas tossika. Għaldaqstant huwa xieraq li jiġi mmodifikat l-ML għal arseniku applikabbli għal għalf kumplementari u komplut għall-annimali domestiċi li fih ħut, annimali oħra tal-baħar u prodotti li ġejjin minnhom u/jew smida tal-alka tal-baħar.

(5)

Iż-żewġ minerali żeoliti: in-natrolit u l-klinoptilolit huma l-kostitwenti attivi tan-natrolit-fonolit (E566) u l-klinoptilolit ta’ orġini vulkanika (E567). Għalhekk huwa xieraq li jiġi applikat l-istess ML għaċ-ċomb fin-natrolit-fonolit (E566) bħal fil-klinoptilolit ta’ orġini vulkanika (E567).

(6)

Sabiex tiżdied is-sostenibbiltà tat-trobbija tal-ħut tas-Salmonidae, iż-żejt tal-ħut qed kulma jmur jinbidel bl-użu taż-żejt veġetali. Madanakollu, din il-bidla, li x’aktarx tinfluwenza favorevolment is-sostenibbiltà tal-ambjent marittimu, xi drabi mhix possibbli, minħabba li l-ML huwa baxx ħafna għall-endosulfan fl-għalf komplut tal-ħut. Wara talba tal-Kummissjoni, l-Awtorità Ewropea dwar is-Sigurtà fl-Ikel (EFSA) tat opinjoni xjentifika. Fl-istqarrija tagħha dwar it-tossiċità orali tal-endosulfan fil-ħut (3), l-EFSA ddikjarat li ma kienu osservati l-ebda effetti negattivi sinifikanti fil-ħut (salamun Atlantiku) esposti għall-endosulfan sa 0,1 mg/kg fl-għalf ġo gaġeġ f’ibħra miftuħa u effetti negattivi żgħar biss kienu osservati f’Salamun li huwa espost għal livelli ogħla mill-ML attwali fl-għalf ġot-tankijiet. Minn studju limitat, hemm xi indikazzjonijiet li l-esponiment tat-tilapja tan-Nil għall-endosulfan permezz tal-għalf ġot-tankijiet kkawża effetti negattivi. Għalhekk huwa xieraq li jkun propost livell ogħla ta’ ML għall-endosulfan fl-għalf komplut għas-Salmonidae, sabiex jiffavorixxi l-evoluzzjoni għal sostenibbiltà miżjuda tat-trobbija tal-ħut mingħajr ma jkunu affettwati b’mod negattiv is-saħħa tal-ħut u s-saħħa tal-bniedem.

(7)

Dejta riċenti tindika li l-livelli ta’ diossina fis-smida tal-krustaċji, li huwa prodott sekondarju mill-produzzjoni tal-ikel u li jintuża primarjament fl-għalf għall-ħut ornamentali f’livell minn 1 % sa 3 % fl-għalf, huma ogħla mill-ML attwali. Sabiex tkun tista’ tintuża din is-smida għall-għalf u sabiex tonqos il-kwantità ta’ skart tal-ikel mingħajr ma tkun ipperikolata s-saħħa pubblika u tal-annimali, huwa xieraq li jiżdied bi ftit l-ML għad-diossini fis-smida tal-krustaċji.

(8)

Id-Direttiva 2002/32/KE għandha l-għan li tevita t-tixrid ta’ żrieragħ vijabbli tal-ispeċijiet tal-Ambrosia fl-ambjent. Peress li t-tħin jew is-sħiq ixejnu l-kapaċità tal-ġerminazzjoni taż-żrieragħ, ma hemmx il-ħtieġa li jitnaddfu l-granuli u ż-żrieragħ li fihom livelli mhux konformi ta’ żrieragħ tal-ispeċijiet tal-Ambrosia qabel it-tħin jew is-sħiq, bil-kundizzjoni li jittieħdu miżuri ta’ prevenzjoni sabiex jiġi evitat it-tixrid taż-żrieragħ tal-ispeċijiet tal-Ambrosia fl-ambjent waqt it-trasport, il-ħżin u l-ipproċessar.

(9)

Fir-rigward tal-koċċidjostati diklażuril u lasaloċid A sodju, iridu jsiru xi emendi sabiex jiġu kkonsidrati l-awtorizzazzjonijiet mogħtija dan l-aħħar ta’ dawn is-sustanzi li huma stabbiliti bir-Regolament tal-Kummissjoni (UE) Nru 169/2011 tat-23 ta’ Frar 2011 li jikkonċerna l-awtorizzazzjoni tad-diklażuril bħala addittiv fl-għalf għall-fargħuni (detentur tal-awtorizzazzjoni Janssen Pharmaceutica N.V.) (4), ir-Regolament ta’ Implimentazzjoni tal-Kummissjoni (UE) Nru 888/2011 tal-5 ta’ Settembru 2011 li jikkonċerna l-awtorizzazzjoni ta’ diklażuril bħala addittiv tal-għalf għat-tiġieġ għat-tismin (detentur tal-awtorizzazzjoni Janssen Pharmaceutica N.V.) u li jemenda r-Regolament (KE) Nru 2430/1999 (5) u r-Regolament ta’ Implimentazzjoni tal-Kummissjoni (UE) Nru 900/2011 tas-7 ta’ Settembru 2011 dwar l-awtorizzazzjoni tal-lasaloċid A sodju bħala addittiv tal-għalf għall-faġani, il-fargħuni, is-summien u l-perniċi għajr l-għasafar għall-bajd (detentur tal-awtorizzazzjoni Alpharma (Belgium) BVBA) (6).

(10)

Billi qed tiġi proposta żieda fl-ML għad-diossini fis-smida tal-krustaċji, huwa xieraq li jiżdied ukoll b’mod korrispondenti l-limitu ta’ azzjoni applikabbli għas-smida tal-krustaċji stipulat fl-Anness II tad-Direttiva 2002/32/KE.

(11)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali u la l-Parlament Ewropew u lanqas il-Kunsill ma opponewhom,