REGOLAMENT TAL-KUMMISSJONI (UE) Nru 724/2010

tat-12 ta’ Awwissu 2010

li jistipula regoli dettaljati għall-implimentazzjoni ta’ għeluq f’ħin reali ta’ ċertu sajd fil-Baħar tat-Tramuntana u fi Skagerrak

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KE) Nru 1224/2009 tal-20 ta’ Novembru 2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (1), u b’mod partikolari l-Artikolu 51(3) tiegħu,

Billi:

(1)

L-Artikoli 51, 52 u 53 tar-Regolament (KE) Nru 1224/2009 jistabbilixxi regoli u proċeduri dwar l-adozzjoni tal-għeluq fil-ħin reali mill-Istati Membri. Skont dawk id-dispożizzjonijiet, l-Istati Membri għandhom jagħlqu temporanjament is-sajd f’ċertu żona jekk ikun intlaħaq livell ta’ attivazzjoni ta’ qabdiet ta’ speċi partikolari, jew ta’ gruppi ta’ speċijiet.

(2)

Il-Verbal Maqbul tal-Konklużjonijiet bejn l-Unjoni Ewropea u n-Norveġja tat-3 ta’ Lulju 2009 jistipula l-proċeduri u l-metodoloġija ta’ teħid ta’ kampjuni għall-adozzjoni tal-għeluq fil-ħin reali fil-Baħar tat-Tramuntana u fi Skagerrak. Dawk id-dispożizzjonijiet ġew trasposti fil-liġi tal-Unjoni permezz ta’ Regolament tal-Kunsill (KE) Nru 753/2009 (2), li jemenda r-Regolament (KE) Nru 43/2009 li jistabbilixxi għall-2009 l-opportunitajiet tas-sajd u l-kundizzjonijiet assoċjati għal ċerti stokkijiet tal-ħut.

(3)

Dawk id-dispożizzjonijiet hekk introdotti fir-Regolament (KE) Nru 43/2009 kienu japplikaw għall-haddock, il-bakkaljaw, il-pollakkju (saithe) u l-merlangu li jinqabdu bi kwalunkwe rkaptu tas-sajd għajr xbieki tat-tkarkir tal-ħut pelaġiku, tartaruni jduru, għeżula tat-tisqif u jiggers għall-aringi, il-kavalli, u s-sawrell, nases u gangmu għall-arzell, u xbieki tal-garġi. Barra minn hekk, kienu jispeċifikaw fost oħrajn l-obbligi tal-Istati Membri kostali fir-rigward tad-deċiżjonijiet dwar l-għeluq fil-ħin reali u t-tagħrif li għandu jingħata lill-Istati Membri l-oħra u/jew lill-pajjiżi terzi kkonċernati u lill-Kummissjoni.

(4)	Billi d-dispożizzjonijiet ikkonċernati ma baqgħux japplikaw mill-1 ta’ Jannar 2010, jeħtieġ li jiġi pprovdut għat-traspożizzjoni tal-Verbal Maqbul permezz ta’ regoli dettaljati li jimplimentaw l-Artikoli 51, 52 u 53 tar-Regolament (KE) 1224/2009 fil-Baħar tat-Tramuntana u fi Skagerrak.

(5)	Il-miżuri pprovduti f’dan ir-Regolament huma skont l-opinjoni tal-Kumitat tas-Sajd u l-Akkwakultura.

ADOTTAT DAN IR-REGOLAMENT:

Artikolu 1

Is-Suġġett

Dan ir-Regolament jistabbilixxi regoli dettaljati għall-implimentazzjoni ta’ għeluq f’ħin reali ta’ ċertu sajd fil-Baħar tat-Tramuntana u fi Skagerrak skont l-Artikoli 51, 52 and 53 tar-Regolament (KE) Nru 1224/2009.

Artikolu 2

Ambitu

Dan ir-Regolament għandu japplika għall-haddock, il-bakkaljaw, il-pollakkju (saithe) u l-merlangu li jinqabdu fil-Baħar tat-Tramuntana u fi Skagerrak bi kwalunkwe rkaptu tas-sajd għajr:

(a)	xbieki tat-tkarkir tal-ħut pelaġiku, tartaruni jduru, għeżula tat-tisqif u jiggers għall-aringi, il-kavalli, u s-sawrell;

(b)

nases;

(c)	gangmu għall-arzell;

(d)	xbieki tal-garġi.

Artikolu 3

Definizzjonijiet

Għall-finijiet ta’ dan ir-Regolament, għandhom japplikaw id-definizzjonijiet li ġejjin:

(a)	Żoni tal-ICES (il-Kunsill Internazzjonali għall-Esplorazzjoni tal-Baħar) tfisser żoni kif definiti fir-Regolament tal-Kunsill (KEE) Nru 3880/91 (3);

(b)	“Skagerrak” tfisser iż-żona li fil-Punent tmiss ma’ linja miġbuda mill-fanal ta’ Hanstholm sal-fanal ta’ Lindesnes u fin-Nofsinhar ma’ linja miġbuda mill-fanal ta’ Skagen sal-fanal ta’ Tistlarna u minn dan il-punt sal-eqreb punt fuq il-kosta tal-Isvezja;

(c)	“Il-Baħar tat-Tramuntana” tfisser iż-żona IV tal-ICES;

(d)	“refgħa” tfisser l-azzjoni bejn it-tfigħ u l-ġbid lura ta’ nassa.

Artikolu 4

Livell ta’ attivazzjoni tal-qabdiet

1. Il-livell tal-qabdiet li jitlob attivazzjoni għall-għeluq fil-ħin reali tas-sajd, kif imsemmi fl-Artikolu 51 tar-Regolament (KE) Nru 1224/2009, għandu jkun 15 % bħala piż ta’ ħut li għadu qed jikber meta mqabbel mat-total tal-erba’ speċijiet imsemmija fl-Artikolu 2, f’refgħa.

2. Madankollu, jekk il-kwantità tal-bakkaljaw fil-kampjun taqbeż il-75 % meta mqabbla mat-total tal-erba’ speċijiet f’refgħa, il-livell ta’ attivazzjoni tal-qabdiet għandu jkun 10 % bħala piż ta’ ħut li għadu qed jikber meta mqabbel mat-total tal-erba’ speċijiet f’refgħa.

Artikolu 5

Tifsira ta’ ħut li għadu qed jikber

Għall-finijiet ta’ dan ir-Regolament, “ħut li għadu qed jikber” tfisser:

—	kampjunijiet tal-bakkaljaw iżgħar minn 35 ċm,

—	kampjunijiet tal-haddock iżgħar minn 30 ċm,

—	kampjunijiet tal-pollakkju (saithe)iżgħar minn 35 ċm,

—	kampjunijiet tal-merlangu iżgħar minn 27 ċm.

Artikolu 6

Kalkolu tal-livell tal-qabdiet ta’ ħut li għadu qed jikber

1. Għall-finijiet tal-kalkolu tal-livell tal-qabdiet ta’ ħut li għadu qed jikber skont l-Artikolu 51(2) tar-Regolament (KE) Nru 1224/2009, l-Istat Membru kostali u/jew l-Istat Membru parteċipant f’operazzjoni konġunta taħt Pjan Konġunt ta’ Skjerament għandu jidentifika żoni fejn hemm riskju li jintlaħaq il-livell ta’ attivazzjoni.

2. Fiż-żoni identifikati skont il-paragrafu 1, l-Istat Membru kostali u/jew l-Istat Membru parteċipant f’operazzjoni konġunta taħt Pjan Konġunt ta’ Skjerament għandu jwettaq spezzjonijiet biex ikejjel jekk il-perċentwali ta’ ħut li għadu qed jikber laħaqx il-livell ta’ attivazzjoni, inkluż permezz tal-Pjanijiet Konġunti ta’ Skjerament.

3. Meta jitwettqu l-ispezzjonijiet imsemmija fil-paragrafu 2, l-Istat Membru kostali u/jew l-Istat Membru parteċipant f’operazzjoni konġunta skont il-Pjan Konġunt ta’ Skjerament għandu:

(a)	jieħu u jkejjel kampjuni ta’ bakkaljaw, haddock, pollakkju (saithe) u merlangu minn refgħa skont id-dispożizzjonijiet fl-Anness I;

(b)	jiddokumenta kull kampjun billi jibgħat rapport komplut tal-kampjuni kif stipulat fl-Anness II lill-Istat kostali.

4. L-Istati Membri jistgħu jistiednu pajjiżi oħra li jwettqu spezzjonijiet fiż-żona kkonċernata biex iwettqu t-teħid ta’ kampjuni f’isimhom.

5. L-Istat Membru kostali kkonċernat għandu jippubblika mingħajr dewmien fuq is-sit tal-Internet tiegħu l-pożizzjoni li fiha ttieħed il-kampjun imsemmi fil-paragrafu 3(a), il-ħin li ttieħed u l-kwantità ta’ ħut li għadu qed jikber bħala perċentwali tal-qabda totali ta’ bakkaljaw, haddock, pollakkju (saithe) u merlangu fil-piż. Il-perċentwali għandu jiġi ppubblikat kemm skont l-ispeċi kif ukoll bħala total tal-erba’ speċijiet.

Artikolu 7

Għeluq tas-sajd

1. Meta kampjun imsemmi fl-Artikolu 6(3)(a) juri perċentwali ta’ ħut li għadu qed jikber li jilħaq livell ta’ attivazzjoni, l-Istat Membru kostali kkonċernat għandu jipprojbixxi s-sajd fiż-żona kkonċernata bi kwalunkwe rkaptu tas-sajd għajr:

(a)	xbieki tat-tkarkir tal-ħut pelaġiku, tartaruni jduru, għeżula tat-tisqif u jiggers għall-aringi, il-kavalli, u s-sawrell;

(b)

nases;

(c)	gangmu għall-arzell; u

(d)	xbieki tal-garġi,

skont l-Artikolu 53 tar-Regolament (KE) Nru 1224/2009.

2. Iż-żona li għandha tingħalaq skont il-paragrafu 1 għandha tiġi ddefinita abbażi tal-kriterji li ġejjin:

(a)	iż-żona għandu jkollha 4, 5 jew 6 punti li jgħaqqdu;

(b)	il-punt tan-nofs tal-operazzjoni jew operazzjonijiet tas-sajd b’kampjuni “l fuq mil-livell ta” attivazzjoni għandu jkun daqs il-punt tan-nofs taż-żona magħluqa;

(c)	meta ż-żona magħluqa hija bbażata fuq kampjun wieħed u tinsab “il barra mill-ilmijiet sa 12-il mil mil-linja bażi tal-Istat Membru kostali, għandha tkun ta” 50 mil kwadru.

3. L-għeluq fil-ħin reali msemmi fil-paragrafu 1 għandu:

(a)	jidħol fis-seħħ 12-il siegħa wara d-deċiżjoni tal-Istat Membru kkonċernat; u

(b)	japplika għal 21 jum, imbagħad dritt wara għandu jieqaf japplika awtomatikament f’nofsillejl UTC.

4. Jekk iż-żona li se tingħalaq tinkludi żoni taħt il-ġurisdizzjoni jew is-sovranità ta’ pajjiżi terzi ġirien, l-Istat Membru kostali kkonċernat għandu jinforma minnufih lil dawk il-pajjiż terzi.

Artikolu 8

Informazzjoni

1. Għall-finijiet tal-Artikolu 53(5) tar-Regolament (KE) Nru 1224/2009, l-Istat Membru kostali għandu minnufih jagħmel id-dettalji tal-għeluq fil-ħin reali deċiżi skont l-Artikolu 7 disponibbli fuq is-sit tal-Internet tiegħu u jinnotifika l-għeluq fil-ħin reali:

(a)	lill-bastimenti fil-viċinanza taż-żona sa kemm hu possibbli;

(b)	lill-Kummissjoni;

(c)	liċ-Ċentri tal-Monitoraġġ tas-Sajd (“FMCs”), kif imsemmi fl-Artikolu 3 tar-Regolament tal-Kummissjoni (KE) Nru 2244/2003 (4); u

(d)	lill-Istati Membri u l-pajjiżi terzi oħrajn li l-bastimenti tas-sajd tagħhom huma awtorizzati joperaw fiż-żona kkonċernata.

2. L-Istati Membri għandhom jieħdu l-miżuri meħtieġa biex jiżguraw li l-FMCs tagħhom jinfurmaw il-bastimenti li jtajru l-bandiera tagħhom li huma affettwati bl-għeluq fil-ħin reali.

3. Għall-finijiet tal-Artikolu 53(6) tar-Regolament (KE) Nru 1224/2009, fuq talba, l-Istat Membru kostali kkonċernat għandu jibgħat lill-Kummissjoni r-rapporti dettaljati tat-teħid tal-kampjuni u l-ġustifikazzjonijiet li fuqhom hija bbażata d-deċiżjoni tal-għeluq fil-ħin reali skont l-Artikolu 7.

Artikolu 9

Dħul fis-seħħ

Dan ir-Regolament għandu jidħol fis-seħħ fis-seba’ jum ward dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-12 ta’ Awwissu 2010.

Għall-Kummissjoni

Il-President

José Manuel BARROSO

(1) ĠU L 343, 22.12.2009, p. 1.

(2) ĠU L 214, 19.8.2009, p. 1.

(3) ĠU L 365, 31.12.1991, p. 1.

(4) ĠU L 333, 20.12.2003, p. 17.

ANNESS II

Test ta 'immaġni