|
2.7.2010 |
MT |
Il-Ġurnal Uffiċjali tal-Unjoni Ewropea |
L 168/16 |
REGOLAMENT TAL-KUMMISSJONI (UE) Nru 581/2010
tal-1 ta' Lulju 2010
dwar il-perjodi massimi għat-tniżżil ta' dejta rilevanti mill-unitajiet tal-vetturi u minn kards tas-sewwieqa
(Test b’relevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 561/2006 tal-Parlament Ewropew u tal-Kunsill tal-15 ta’ Marzu 2006 dwar l-armonizzazzjoni ta' ċerta leġiżlazzjoni soċjali li għandha x'taqsam mat-trasport bit-triq u li jemenda r-Regolamenti tal-Kunsill (KEE) Nru 3821/85 u (KE) Nru 2135/98 u li jħassar ir-Regolament tal-Kunsill (KEE) Nru 3820/85 (1) u partikularment l-Artikolu 10(5)(c) tiegħu,
Billi:
|
(1) |
Jeħtieġ tniżżil regolari ta' dejta rreġistrata mill-unità tal-vettura u fuq il-kard tas-sewwieq sabiex ikun possibbli kontroll effikaċi tal-konformità tas-sewwieq u tal-impriża mad-dispożizzjonijiet dwar ħinijiet tas-sewqan u perjodi ta' mistrieħ kif stipulati bir-Regolament (KE) Nru 561/2006. |
|
(2) |
Billi jiġi determinat il-perjodu massimu li fih id-dejta rilevanti trid titniżżel mill-unità tal-vettura u l-kard tas-sewwieq, jistgħu jkunu aktar armonizzati l-kundizzjonijiet għat-trasport bit-triq fl-Unjoni kollha. |
|
(3) |
Għad-determinazzjoni tal-perjodi massimi li fihom għandha titniżżel id-dejta, il-ġranet b'attività rreġistrata biss għandhom jiġu kkalkulati. |
|
(4) |
Id-Direttiva 95/46/KE tal-Parlament Ewropew u tal-Kunsill tal-24 ta' Ottubru 1995 dwar il-protezzjoni ta’ individwi fir-rigward tal-ipproċessar ta’ data [dejta] personali u dwar il-moviment liberu ta’ dik id-data [dejta] (2) tapplika għall-ipproċessar ta' dejta personali li jsir skont dan ir-Regolament. |
|
(5) |
Sabiex jitnaqqas il-piż amministrattiv fuq l-impriżi, huwa xieraq li tiġi ddefinita d-dejta rilevanti li trid titniżżel. |
|
(6) |
Il-miżuri pprovduti f'dan ir-Regolament huma skont l-opinjoni tal-Kumitat stabbilit bl-Artikolu 18(1) tar-Regolament tal-Kunsill (KEE) Nru 3821/85 (3), |
ADOTTAT DAN IR-REGOLAMENT:
Artikolu 1
1. Dan ir-Regolament jistipula l-perjodi massimi li fihom id-dejta rilevanti għandha titniżżel mill-unità tal-vettura u l-kard tas-sewwieq għall-finijiet tal-Artikolu 10(5)(a)(i) tar-Regolament (KE) Nru 561/2006.
2. Għall-finijiet ta' dan ir-Regolament, “dejta rilevanti” tfisser kwalunkwe dejta rreġistrata mit-takografu diġitali għajr id-dejta dettaljata tal-veloċità.
3. Il-perjodu massimu li fih għandha titniżżel id-dejta rilevanti ma għandux jaqbeż:
|
(a) |
90 jum għal dejta mill-unità tal-vettura; |
|
(b) |
28 jum għal dejta mill-kard tas-sewwieq. |
4. Id-dejta rilevanti għandha titniżżel b'tali mod li ebda dejta ma tintilef.
Artikolu 2
Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.
Għandu japplika mid-90 jum wara l-pubblikazzjoni tiegħu.
Dan ir-Regolament għandu jorbot fl-intier tiegħu u japplika direttament fl-Istati Membri skont it-Trattati.
Magħmul fi Brussell, l-1 ta’ Lulju 2010.
Għall-Kummissjoni
Il-President
José Manuel BARROSO
(1) ĠU L 102, 11.4.2006, p. 1.