|
25.9.2008 |
MT |
Il-Ġurnal Uffiċjali ta’ l-Unjoni Ewropea |
L 257/14 |
DIRETTIVA TAL-KUMMISSJONI 2008/89/KE
ta’ l-24 ta’ Settembru 2008
li temenda, għall-għanijiet ta’ l-adattament tagħha għall-progress tekniku, id-Direttiva tal-Kunsill 76/756/KEE rigward l-istallazzjoni ta’ dawl u mezzi ta’ senjalazzjoni bid-dawl fuq vetturi bil-mutur u l-karrijiet tagħhom
(Test b’relevanza għaż-ŻEE)
Il-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropej,
Wara li kkunsidrat id-Direttiva tal-Kunsill 2007/46/KE tal-5 ta’ Settembru 2007 li tistabbilixxi qafas għall-approvazzjoni ta’ vetturi bil-mutur u l-karrijiet tagħhom, u ta’ sistemi, komponenti u unitajiet tekniċi separati maħsuba għal dawn il-vetturi (1), u b’mod partikolari l-Artikolu 39(2) tagħha,
Billi:
|
(1) |
Id-Direttiva 76/756/KEE tas-27 ta’ Lulju 1976 dwar l-approssimazzjoni tal-liġijiet ta’ l-Istati Membri li għandhom x’jaqsmu ma’ l-istallazzjoni ta’ dawl u mezzi ta’ senjalazzjoni bid-dawl fuq vetturi bil-mutur u l-karrijiet tagħhom (2) hija waħda mid-Direttivi separati fil-kuntest tal-proċedura ta’ l-approvazzjoni tat-tip tal-KE li ġiet stabbilita mid-Direttiva tal-Kunsill 70/156/KEE tas-6 ta’ Frar 1970 dwar l-approssimazzjoni tal-liġijiet ta’ l-Istati Membri li għandhom x’jaqsmu ma’ l-approvazzjoni tat-tip ta’ vetturi bil-mutur u l-karrijiet tagħhom (3). Id-dispożizzjonijiet tad-Direttiva 70/156/KEE marbuta ma’ sistemi, komponenti u unitajiet tekniċi għall-vetturi għalhekk japplikaw għad-Direttiva 76/756/KEE. |
|
(2) |
Sabiex tiżdied is-sigurtà fit-triq billi tittejjeb il-viżibilità ta’ vetturi bil-mutur l-obbligazzjoni biex jitwaħħlu dwal apposta li jinxtegħlu bi nhar fuq dawn il-vetturi għandha tkun introdotta fid-Direttiva 76/756/KEE. |
|
(3) |
Teknoloġiji ġodda bħas-Sistema Adattiva tad-Dwal ta’ Quddiem (AFS) u s-Sinjal ta’ Emerġenza ta’ Waqfien (ESS) huma mistennija li jkollhom influwenza pożittiva fuq is-sigurtà fit-triq. Id-Direttiva 76/756/KEE għandha għalhekk tkun emendata sabiex tippermetti t-twaħħil ta’ dawn il-mezzi. |
|
(4) |
Sabiex ikunu kkunsidrati aktar emendi mar-Regolament UN/ECE Nru 48 (4) li l-Komunità diġa vvotat dwarhom, hu xieraq li tiġi adottata d-Direttiva 76/756/KEE għall-progress tekniku billi tkun konformi mar-rekwiżiti tekniċi ta’ dan ir-Regolament UN/ECE. Fl-interess taċ-ċarezza l-Anness II tad-Direttiva 76/756/KEE għandu jkun emendat. |
|
(5) |
Id-Direttiva 76/756/KEE għandha għalhekk tiġi emendata skond dan. |
|
(6) |
Il-miżuri previsti f’din id-Direttiva huma skond l-opinjoni tal-Kumitat Tekniku – Vetturi bil-Mutur, |
ADOTTAT DIN ID-DIRETTIVA:
Artikolu 1
L-Anness II, il-paragrafu 1 tad-Direttiva 76/756/KEE huwa emendat kif ġej:
|
“1. |
Ir-rekwiżiti tekniċi għandhom ikunu dawk stipulati fil-paragrafi 2, 5 u 6 tar-Regolament UN/ECE Nru 48 (*) u l-Annessi 3 sa 11 tagħhom. |
Artikolu 2
B’effett mis-7 ta’ Frar 2011 għal vetturi ta’ kategoriji M1 u N1 u mis-7 ta’ Awwissu 2012 għal vetturi ta’ kategoriji oħrajn, jekk ir-rekwiżiti stabbiliti fid-Direttiva 76/756/KEE, kif emendati minn din id-Direttiva, ma jkunux konformi ma’, l-Istati Membri, fuq raġunijiet relatati ma’ l-istallazzjoni ta’ dawl u mezzi ta’ senjalazzjoni bid-dawl, għandhom jirrifjutaw li jagħtu approvazzjoni tat-tip KE jew approvazzjoni tat-tip nazzjonali għal tipi ġodda ta’ vetturi.
Artikolu 3
1. L-Istati Membri għandhom jadottaw u jippubblikaw, sa mhux aktar tard mill-15 ta’ Ottubru 2009 il-liġijiet, ir-regolamenti, u d-dispożizzjonijiet amministrattivi neċessarji sabiex ikunu f’konformità ma’ din id-Direttiva. Għandhom jikkomunikaw minnufih lill-Kummissjoni t-test ta’ dawk id-dispożizzjonijiet u t-tabella ta’ korrelazzjoni bejn dawk id-dispożizzjonijiet u din id-Direttiva.
Għandhom japplikaw dawk id-dispożizzjonijiet mis-16 ta’ Ottubru 2009.
Meta l-Istati Membri jadottaw dawk id-dispożizzjonijiet, dawn għandhom ikollhom referenza għal din id-Direttiva jew għandhom ikunu akkumpanjati b’tali referenza dakinhar tal-pubblikazzjoni uffiċjali tagħhom. L-Istati Membri għandhom jistabbilixxu kif għandha ssir it-tali referenza.
2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert b’din id-Direttiva.
Artikolu 4
Din id-Direttiva għandha tidħol fis-seħħ fl-għoxrin jum wara l-pubblikazzjoni tagħha f’Il-Ġurnal Uffiċjali ta’ l-Unjoni Ewropea.
Artikolu 5
Din id-Direttiva hija indirizzata lill-Istati Membri.
Magħmula fi Brussell, 24 ta’ Settembru 2008.
Għall-Kummissjoni
Günter VERHEUGEN
Viċi President
(1) ĠU L 263, 9.10.2007, p. 1.
(2) ĠU L 262, 27.9.1976, p. 1.
(4) ĠU L 135, 23.5.2008, p. 1.