19.6.2008   

MT

Il-Ġurnal Uffiċjali ta’ l-Unjoni Ewropea

L 160/36

(1)

Fil-qafas tar-Regolament (KEE) Nru 793/93 is-sustanzi li ġejjin kienu identifikati bħala sustanzi ta’ prijorità għall-valutazzjoni skond ir-Regolament tal-Kummissjoni (KE) Nru 2268/95 tas-27 ta’ Settembru 1995 li jikkonċerna t-tieni lista ta’ sustanzi ta’ prijorità kif previst fir-Regolament tal-Kunsill (KEE) Nru 793/93 (2):

(2)

L-Istat Membru rapporteur maħtur skond dan ir-Regolament tal-Kummissjoni temm l-attivitajiet tal-valutazzjoni tar-riskju għall-bniedem u għall-ambjent għal dawk is-sustanzi skond ir-Regolament tal-Kummissjoni (KE) Nru 1488/94 tat-28 ta’ Ġunju 1994 li jistipula l-prinċipji għal studju dwar ir-riskji lill-bniedem u l-ambjent ta’ materjali eżistenti (3) u ssuġġerixxa strateġija biex ikunu limitati r-riskji skond ir-Regolament tal-Kunsill (KEE) Nru 793/93.

(3)

Il-Kumitat Xjentifiku dwar it-Tossiċità, l-Ekotossiċità u l-Ambjent (SCTEE) u l-Kumitat Xjentifiku dwar ir-Riskji għas-Saħħa u l-Ambjent (SCHER) kienu kkonsultati u ħarġu opinjonijiet dwar il-valutazzjonijiet tar-riskju li saru mir-rapporteur. L-opinjonijiet ġew ippubblikati fuq il-websajt ta’ dawk il-Kumitati Xjentifiċi.

(4)

Ir-riżultati tal-valutazzjoni tar-riskju u aktar riżultati ta’ l-istrateġiji biex ikunu limitati r-riskji huma stipulati fil-Komunikazzjoni tal-Kummissjoni korrispondenti (4).

(5)

Huwa xieraq, abbażi tal-valutazzjoni, li jiġu rakkomandati miżuri għat-tnaqqis tar-riskju għas-sustanzi koperti b’din ir-Rakkomandazzjoni u l-Komunikazzjoni.

(6)

Il-miżuri għat-tnaqqis tar-riskju li għalihom tipprovdi din ir-rakkomandazzjoni huma skond l-opinjoni tal-Kumitat li twaqqaf skond l-Artikolu 15(1) tar-Regolament (KEE) Nru 793/93,

(1)

Għall-baċiri tax-xmajjar fejn l-emissjonijiet taż-żingu jistgħu jikkawżaw riskju, l-Istati Membri kkonċernati għandhom jistabbilixxu standards ta’ kwalità ambjentali (minn hawn 'il quddiem “EQS”). Il-miżuri nazzjonali għat-tnaqqis tat-tniġġis biex jintlaħqu dawk l-EQS fl-2015 għandhom jiġu inklużi fil-pjanijiet ta’ ġestjoni tal-baċiri tax-xmajjar skond id-dispożizzjonijiet tad-Direttiva 2000/60/KE tal-Parlament Ewropew u tal-Kunsill (5).

(2)

L-Istati Membri għandhom jipprovdu lill-Kummissjoni b’tagħrif dwar il-kontribut tas-sorsi u tal-passaġġi taż-żingu lill-ambjent akkwatiku, dwar kontrolli possibbli u wkoll dwar il-livelli taż-żingu fl-ambjent akkwatiku, sabiex tiġi kkunsidrata l-possibilità ta’ l-inklużjoni taż-żingu fir-reviżjoni li jmiss ta’ l-Anness X għad-Direttiva 2000/60/KE.

(3)

L-awtoritajiet kompetenti fl-Istati Membri kkonċernati, fil-permessi maħruġa taħt id-Direttiva 2008/1/KE tal-Parlament Ewropew u tal-Kunsill (6), għandhom jistabbilixxu kundizzjonijiet, valuri tal-limitu għall-emissjonijiet jew parametri ekwivalenti jew il-miżuri tekniċi dwar iż-żingu u l-komposti taż-żingu sabiex l-installazzjonijiet ikkonċernati joperaw skond l-aqwa metodi disponibbli (minn hawn ’il quddiem “BAT”) waqt li jikkunsidraw il-karatteristiċi tekniċi ta’ l-installazzjonijiet ikkonċernati, il-pożiżżjoni ġeografika u l-kundizzjonijiet ambjentali lokali tagħhom.

(4)

L-Istati Membri għandhom jimmonitorjaw bir-reqqa l-implimentazzjoni tal-BAT rigward iż-żingu u l-komposti taż-żingu u jirraportaw kwalunkwe żvilupp importanti lill-Kummissjoni fil-qafas ta’ l-iskambju ta’ l-informazzjoni dwar il-BAT.

(5)

L-emissjonijiet lokali fl-ambjent għandhom, fejn ikun neċessarju, ikunu kkontrollati minn regoli nazzjonali biex jiżguraw li ma jkun mistenni l-ebda riskju għall-ambjent.

(6)

Din ir-Rakkomandazzjoni hija indirizzata lill-Istati Membri.