1.3.2007   

MT

Il-Ġurnal Uffiċjali ta’ l-Unjoni Ewropea

9

(1)

Fil-każ ta' ċereali u prodotti li joriġinaw mill-pjanti inkluż frott u ħxejjex, livelli ta' residwi jirriflettu l-użu ta' kwantitajiet minimi ta' pestiċidi meħtieġa sabiex jinkiseb ħarsien effettiv ta' pjanti, applikati b'tali mod li l-ammont ta' residwi jkun baxx kemm jista' jkun skond kif inhu aċċettabbli b'mod prattiku u tossikoloġiku, b'qies, b'mod partikolari, tal-ħarsien ta' l-ambjent u l-istima tal-konsum djetetiku tal-konsumaturi. Fil-każ ta' l-oġġetti ta' l-ikel li joriġinaw mill-annimali, il-livelli tar-residwi jirriflettu l-konsum mill-annimali ta' ċereali u prodotti li joriġinaw mill-pjanti li jiġu ttrattati bil-pestiċidi, u, fejn ikun rilevanti, il-konsegwenzi diretti mill-użu tal-mediċini veterinarji. Il-livelli massimi ta' residwi Komunitarji (MRLs) jirrappreżentaw l-ogħla limitu ta' l-ammont ta' tali residwi li wieħed jista' jistenna li jsib fl-oġġetti meta jkunu ġew rispettati prattiki agrikoli tajbin.

(2)

L-MRLs għall-pestiċidi jinżammu taħt reviżjoni u jinbidlu sabiex titqies l-informazzjoni u d-data ġdida. L-MRLs huma ffissati fil-limitu l-iktar baxx tad-determinazzjoni analitika fejn użi awtorizzati ta' prodotti għall-protezzjoni tal-pjanti ma jirriżultawx f'livelli osservabbli ta' residwu ta' pestiċidi fi jew fuq il-prodott ta' l-ikel, jew, fejn ma hemmx użi awtorizzati, jew fejn użi li ġew awtorizzati minn Stati Membri ma ġewx sostnuti bid-data neċessarja, jew fejn użi f'pajjiżi terzi jirriżultaw f'residwi fi jew fuq prodotti ta' l-ikel li jistgħu jiġu ċċirkolati fis-suq tal-Komunità ma ġewx sostnuti bid-data neċessarja.

(3)

Il-Kummissjoni ġiet infurmata li għal phosphamidon and mevinphos, jista' jkun hemm bżonn li l-MRLs attwali jiġu riveduti fid-dawl tad-disponibilità ta' informazzjoni ġdida dwar it-tossikoloġija u tal-konsum mill-konsumatur. Il-Kummissjoni talbet lill-Istati Membri relaturi rilevanti sabiex jagħmlu proposti għar-reviżjoni ta' l-MRLs Komunitarji. Proposti bħal dawn tressqu lill-Kummissjoni.

(4)

L-esponiment tal-konsumaturi matul ħajjithom kif ukoll għal perjodu qasir għall-pestiċidi msemmija f'din id-Direttiva, permezz tal-prodotti ta' l-ikel, ġew studjati mill-ġdid u vvalutati skond il-proċeduri u l-prattiki Komunitarji, filwaqt li tqiesu l-linji gwida ppubblikati mill-Organizzazzjoni Dinjija tas-Saħħa (4). Fuq dik il-bażi, huwa xieraq li jiġu ffissati MRLs ġodda, sabiex jiġi aċċertat li ma jkun hemm ebda esponiment inaċċettabbli tal-konsumatur.

(5)

Fejn huwa rilevanti, l-esponiment qawwi tal-konsumaturi għal dawk il-pestiċidi permezz ta' kull wieħed mill-prodotti ta' l-ikel li jista' jkun fihom residwi, ġie studjat u vvalutat skond il-proċeduri u l-prattiki Komunitarji, filwaqt li tqiesu l-linji ta' gwida ppubblikati mill-Organizzazzjoni Dinjija tas-Saħħa. Il-konklużjoni hi li l-preżenza ta' residwi ta' pestiċidi fi jew taħt l-MRLs il-ġodda mhijiex se tikkawża effetti tossiċi qawwija.

(6)

Permezz ta' l-Organizzazzjoni Dinjija tal-Kummerċ, is-sħab kummerċjali tal-Komunità ġew ikkonsultati dwar l-MRLs ġodda u tqiesu l-kummenti tagħhom dwar dawn il-livelli.

(7)

L-Annessi tad-Direttivi 76/895/KEE, 86/362/KEE u 90/642/KEE għandhom għalhekk jiġu emendati skond dan.

(8)

Il-miżuri stipulati f'din id-Direttiva huma f'konformità ma' l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali,