|
24.8.2007 |
MT |
Il-Ġurnal Uffiċjali ta’ l-Unjoni Ewropea |
50 |
DEĊIŻJONI TAL-KUMMISSJONI
tat-22 ta' Diċembru 2006
li tapprova l-pjanijiet ta' kontinġenza għall-kontroll ta' l-influwenza tat-tjur u l-marda ta' Newcastle
(notifikat bid-dokument numru C(2006) 6806)
(Test b'rilevanza għaż-ŻEE)
(2007/24/KE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat it-Trattat ta' Adeżjoni tal-Bulgarija u r-Rumanija, u partikolarment l-Artikolu 4(3) tiegħu,
Wara li kkunsidrat l-Att ta' Adeżjoni tal-Bulgarija u r-Rumanija, u partikolarment l-Artikolu 56 tiegħu,
Wara li kkunsidrat id-Direttiva tal-Kunsill 92/40/KEE tad-19 ta' Mejju 1992 li tintroduċi miżuri Komunitarji għall-kontroll ta' l-influwenza ta' l-għasafar (1), u b'mod partikolari t-tieni subparagrafu ta' l-Artikolu 17(4) tagħha,
Wara li kkunsidrat id-Direttiva tal-Kunsill 92/66/KEE ta' l-14 ta' Lulju 1992 li tintroduċi miżuri tal-Komunità għal kontroll tal-marda ta' Newcastle (2), u b'mod partikolari t-tieni subparagrafu ta' l-Artikolu 21(4) tagħha,
Billi:
|
(1) |
Id-Direttivi 92/40/KEE u 92/66/KEE jistipolaw il-miżuri ta' kontroll li għandhom jiġu applikati f'każ ta' tifqigħa ta' l-influwenza tat-tjur u l-marda ta' Newcastle rispettivament, kif ukoll ċerti miżuri preventivi mmirati lejn żieda fl-għarfien u fl-istat ta' tħejjija mill-awtoritajiet kompetenti u mill-komunità agrikola fir-rigward ta' dawk il-mardiet. Skond dawn id-Direttivi, il-pjanijiet ta' kontinġenza ta' l-Istati Membri għall-kontroll ta' l-influwenza tat-tjur u l-marda ta' Newcastle għandhom jiġu approvati mill-Kummissjoni. |
|
(2) |
Id-Deċiżjoni tal-Kummissjoni 2004/402/KE tas-26 ta' April 2004 li tapprova pjanijiet ta' kontinġenza għall-kontroll ta' l-influwenza ta' l-għasafar u l-marda ta' Newcastle (3), tapprova dawk il-pjanijiet ta' kontinġenza għal dawn l-Istati Membri. L-Anness ta' dik id-Deċiżjoni jelenka l-Istati Membri li l-pjanijiet tagħhom ġew approvati. |
|
(3) |
Il-Bulgarija u r-Rumanija għandhom jissieħbu fl-UE fl-1 ta' Jannar 2007. Għaldaqstant, il-Bulgarija u r-Rumanija ressqu l-pjanijiet ta' kontinġenza tagħhom għall-kontroll ta' l-influwenza tat-tjur u l-marda ta' Newcastle lill-Kummissjoni għall-approvazzjoni. |
|
(4) |
Dawn il-pjanijiet ta' kontinġenza kif emendati mill-Bulgarija u r-Rumaija wara s-suġġerimenti li sarulhom matul l-evalwazzjoni tagħhom, jissodisfaw il-kriterji stipulati fid-Direttivi 92/40/KEE u 92/66/KEE u, soġġetti għal aġġornament regolari u implimentazzjoni effettiva, jippermettu li jintlaħqu l-għanijiet mixtieqa ta' dawk id-Direttivi u, għalhekk, għandhom jiġu approvati. |
|
(5) |
Għal skopijiet ta' ċarezza fil-leġislazzjoni Komunitarja, id-Deċiżjoni Nru 2004/402/KE għandha tiġi revokata u mibdula b'din id-Deċiżjoni. |
|
(6) |
Il-miżuri stipulati f'din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali, |
ADOTTAT DIN ID-DEĊIŻJONI:
Artikolu 1
Il-pjanijiet ta' kontinġenza li l-Bulgarija ppreżentat lill-Kummissjoni fis-7 ta' Novembru 2006 għall-kontroll ta' l-influwenza tat-tjur u l-marda ta' Newcastle huma approvati.
Artikolu 2
Il-pjanijiet ta' kontinġenza li r-Rumanija ppreżentat lill-Kummissjoni fid-9 ta' Novembru 2006 għall-kontroll ta' l-influwenza tat-tjur u l-marda ta' Newcastle huma approvati.
Artikolu 3
L-Anness jistipula l-lista ta' Stati Membri li għandhom pjanijiet ta' kontinġenza approvati għall-kontroll ta' l-influwenza tat-tjur u l-marda ta' Newcastle.
Artikolu 4
Id-Deċiżjoni 2004/402/KE hija revokata.
Artikolu 5
Din id-Deċiżjoni għandha tapplika soġġetta għal u mid-data tad-dħul fis-seħħ tat-Trattat ta' Adeżjoni tal-Bulgarija u r-Rumanija.
Artikolu 6
Din id-Deċiżjoni hija indirizzata lill-Istati Membri.
Magħmul fi Brussell, 22 ta' Diċembru 2006.
Għall-Kummissjoni
Markos KYPRIANOU
Membru tal-Kummissjoni
(1) ĠU L 167, 22.6.1992, p. 1. Id-Direttiva kif emendata l-aħħar mill-Att ta' Adeżjoni ta' l-2004 (ĠU L 236, 23.9.2004, p. 33).
(2) ĠU L 260, 5.9.1992, p. 1. Id-Direttiva kif emendata l-aħħar bl-Att ta' l- 2004.
(3) ĠU L 123, 27.4.2004, p. 111.
ANNESS
Lista ta' Stati Membri msemmija fl-Artikolu 3
|
Kodiċi |
Pajjiż |
|
AT |
L-Awstrija |
|
BE |
Il-Belġju |
|
BG |
Il-Bulgarija |
|
CY |
Ċipru |
|
CZ |
Ir-Repubblika Ċeka |
|
DE |
Il-Ġermanja |
|
DK |
Id-Danimarka |
|
EE |
L-Estonja |
|
EL |
Il-Greċja |
|
ES |
Spanja |
|
FI |
Il-Finlandja |
|
FR |
Franza |
|
HU |
L-Ungerija |
|
IE |
L-Irlanda |
|
IT |
L-Italja |
|
LV |
Il-Latvja |
|
LT |
Il-Litwanja |
|
LU |
Il-Lussemburgu |
|
MT |
Malta |
|
NL |
L-Olanda |
|
PL |
Il-Polonja |
|
PT |
Il-Portugall |
|
RO |
Ir-Rumanija |
|
SE |
L-Iżvezja |
|
SI |
Is-Slovenja |
|
SK |
Is-Slovakkja |
|
UK |
Ir-Renju Unit |