li jemenda r-Regolament (KE) Nru 1725/2003 li jaddotta ċerti standards internazzjonali tal-kontabilità skond ir-Regolament (KE) Nru 1606/2002 tal-Parlament Ewropew u tal-Kunsill, rigward l-Istandard Internazzjonali tal-Kontabilità (IAS) 21 u l-Interpretazzjoni 7 tal-Kumitat għall-Interpretazzjoni tar-Rappurtaġġ Finanzjarju Internazzjonali (IFRIC)

Wara li kkunsidrat ir-Regolament (KE) Nru 1606/2002 tal-Parlament Ewropew u tal-Kunsill tad-19 ta’ Lulju 2002 dwar l-applikazzjoni ta’ l-istandards internazzjonali tal-kontabilità (1), u b’ mod partikolari l-Artikolu 3(1) tiegħu,

(1) Kull kumpanija għandha tapplika l-IFRIC 7 kif stabbilit fl-Anness ta’ dan ir-Regolament mhux aktar tard mill-bidu tas-sena finanzjarja tagħha fl-2006, ħlief dawk il-kumpaniji li għandhom id-data ta’ bidu f’Jannar jew Frar, li għandhom japplikaw l-IFRIC 7 mhux aktar tard mill-bidu tas-sena finanzjarja tagħhom fl-2007.

(2) Kull kumpanija għandha tapplika l-Emenda għall-IAS 21 kif stabbilita fl-Anness ta’ dan ir-Regolament sa mhux aktar tard mill-bidu tas-sena finanzjarja tagħha fl-2006.

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali ta’ l-Unjoni Ewropea.

ANNESS

STANDARDS TA' RAPPURTAĠĠ FINANZJARJU INTERNAZZJONALI

IFRIC 7	Interpretazzjoni 7 ta’ l-IFRIC L-applikazzjoni ta’ Strateġija ta’ Stqarrija mill-ġdid skond l-IAS 29 Ir-Rappurtaġġ Finanzjarju f’Ekonomiji Iperinflazzjonarji
IAS 21	Emenda għall-IAS 21 L-Effetti ta' Tibdil fir-Rati tal-Kambju Barranin - Investiment Nett f’Attività Estera

“Ir-riproduzzjoni hija permessa fi ħdan iż-Żona Ekonomika Ewropea. Id-drittijiet kollha eżistenti huma riżervati barra ż-ŻEE, bl-eċċezzjoni tad-dritt ta' kkupjar għall-użu personali jew skopijiet oħra ta’ kummerċ ġust. Aktar tagħrif jista’ jinkiseb mill-IASB fuq l-internet www.iasb.org”

IFRIC INTERPRETAZZJONI 7

L-applikazzjoni ta’ Strateġija ta’ Stqarrija mill-ġdid skond l-IAS 29

Ir-Rappurtaġġ Finanzjarju f’Ekonomiji Iperinflazzjonarji

Referenzi

—	L-IAS 12 Taxxi fuq id-Dħul

—	L-IAS 29 Ir-Rappurtaġġ Finanzjarju f’Ekonomiji Iperinflazzjonarji

Sfond

Din l-Interpretazzjoni tagħti gwida dwar kif għandhom jiġu applikati l-kondizzjonijiet ta’ l-IAS 29 f’perjodu ta’ rappurtaġġ fejn entità tiddentifika (*) fl-ekonomija l-eżistenza ta’ iperinflazzjoni tal-munita funzjonali tagħha, meta dik l-ekonomija ma kenitx iperinflazzjonali fil-perjodu preċedenti, u b’hekk l-entità tistqarr mill-ġdid id-dikjarazzjonijiet finanzjarji tagħha skond l-IAS 29.

Kwistjonijiet

Il-kwistjonijiet indirizzati f’din l-Interpretazzjoni huma:

(a)	kif għandha tkun interpretata l-kondizzjoni “…dikjarata skond il-valur ta’ qies prevalenti fid-data tal-karta ta’ bilanċ” fil-paragrafu 8 ta’ l-IAS 29 meta entità tapplika dan l-Istandard?

(b)	entità kif għandha tqis il-ftuħ tal-figuri diferiti ta’ taxxa fid-dikjarazzjonijiet finanzjarji riveduti tagħha?

Konsensus

Fil-perjodu ta’ rappurtaġġ meta entità tidentifika l-eżistenza ta' l-iperinflazzjoni fl-ekonomija tal-munita funzjonali tagħha, meta ma kenitx iperinflazzjonali fil-perjodu preċedenti, l-entità għandha tapplika l-kondizzjonijiet ta’ l-IAS 29 bħallikieku l-ekonomija minn dejjem kienet iperinflazzjonali. Għalhekk, skond il-figuri li mhumiex monetarji meqjusa fuq prezz storiku, il-karta ta’ bilanċ ta’ ftuħ ta’ l-entità fil-bidu tal-perjodu l-aktar kmieni ppreżentat fid-dikjarazzjonijiet finanzjarji għandhom ikunu riveduti biex jirriflettu l-effett ta’ l-inflazzjoni mid-data li fiha l-assi kienu ġew akkwistati u meta l-passivi kienu nġarrbu sad-data ta’ għeluq tal-karta ta' bilanċ tal-perjodu tar-rappurtaġġ. Għall-oġġetti li mhumiex monetarji li jinsabu fil-ftuħ tal-karta ta’ bilanċ f’ammonti kurrenti fid-dati differenti minn dawk ta' kisba jew ħlas, dik id-dikjarazzjoni għandha tirrifletti minflok l-effett ta' l-inflazzjoni mid-data meta dawk l-ammonti miżmuma kienu ġew determinati sad-data ta’ għeluq tal-karta ta’ bilanċ tal-perjodu tar-rappurtaġġ.

Fid-data ta’ għeluq tal-karta ta’ bilanċ, il-figuri diferiti ta’ taxxa huma identifikati u meqjusa skond l-IAS 12. Madankollu, il-figuri tat-taxxa diferuti fil-ftuħ tal-karta ta' bilanċ għall-perjodu ta' rappurtaġġ għandhom ikunu determinati hekk:

(a)	l-entità terġa tqies il-figuri diferiti ta’ taxxa skond l-IAS 12 wara li tkun tennet mill-ġdid l-ammonti nominali miżmuma tal-figuri tagħha li mhumiex monetarji fid-data tal-karta ta’ bilanċ ta’ ftuħ tal-perjodu ta’ rappurtaġġ billi tapplika l-valur ta’ qies f’dik id-data.

(b)	il-figuri diferiti ta’ taxxa meqjusa mill-ġdid skond (a) huma riveduti minħabba l-bidla fil-valur ta’ qies mid-data tal-ftuħ tal-karta ta’ bilanċ tal-perjodu ta’ rappurtaġġ sad-data ta’ l-għeluq tal-karta ta’ bilanċ ta’ dak il-perjodu.

L-entità tapplika l-istrateġija f’(a) u (b) meta terġa tistqarr il-figuri diferuti tat-taxxa fil-ftuħ tal-karta ta’ bilanċ ta’ kwalunkwe perjodu komparattiv ippreżentat fir-rapporti finanzjarji riveduti għall-perjodu ta’ rappurtaġġ fejn tapplika l-entità IAS 29.

Wara li entità tkun stqarret mill-ġdid ir-rapporti finanzjarji tagħha, il-figuri kollha korrispondenti fir-rapporti finanzjarji għal perjodu ta’ rappurtaġġ sussegwenti, inklużi l-figuri diferiti ta’ taxxa, huma riveduti permezz ta' l-applikazzjoni tal-bidla fil-valur ta' qies għal dak il-perjodu ta' rappurtaġġ sussegwenti, biss għar-rapporti finanzjarji rivisti għall-perjodu ta’ rappurtaġġ preċedenti.

Data effettiva

Entità għandha tapplika din l-Interpretazzjoni għall-perjodi annwali li jibdew fl-1 ta’ Marzu 2006 jew wara. Applikazzjoni minn kmieni hija mħeġġa. Jekk entità tapplika din l-Interpretazzjoni għal rapporti finanzjarji għal perjodu li jibda qabel l-1 ta’ Marzu 2006, għandha xxandar dan il-fatt.

Emenda għall- IAS 21

L-Effetti tat-Tibdil fir-Rati tal-Kambju Barranin

Dan id-dokument jistabbilixxi emendi għall-IAS 21 L-Effetti tat-Tibdil fir-Rati tal-Kambju Barranin. L-emendi jiffinalizzaw il-proposti fl-Abbozz ta’ l-Emendi Proposti għall-Korrezzjoni Teknika 1 ta’ l-IAS 21 Investiment Nett f’Attività Estera ppubblikati f’Settembru 2005.

Entità għandha tapplika dawn l-emendi f’dan id-dokument għall-perjodi annwali li jibdew fl-1 ta’ Jannar 2006 jew wara. L-applikazzjoni minn kmieni hija mħeġġa.

Investiment Nett f’Attività Estera

Il-paragrafu 15A huwa miżjud kif ġej.

“15A

L-entità li għandha oġġett monetarju li tirċievi minn jew li jitħallas lill-attività estera deskritta fil-paragrafu 15 tista’ tkun kwalunkwe sussidjarja tal-grupp. Per eżempju, entità li għandha żewġ sussidjarji, A u B. Is-Sussidjarja B hija l-attività estera. Is-Sussidjarja A tagħti self lis-Sussidjarja B. Is-self mogħti mis-Sussidjarja A lil Sussidjarja B ikun parti mill-investiment nett ta' l-entità fis-Sussidjarja B jekk il-ħlas tas-self la jkun ippjanat u lanqas maħsub li jseħħ fil-futur qrib. Dan ikun ukoll il-każ jekk is-Sussidjarja A tkun hija stess l-attività barranija.”

L-għarfien ta’ differenza fil-kambju

Il-paragrafu 33 huwa emendat kif ġej.

“33

Meta oġġett monetarju jagħmel parti mill-investiment nett irrappurtat minn entità f’attività estera u huwa denominat fil-munita funzjonali ta' l-entità li qed tirrapporta, tinħoloq differenza fil-kambju fid-dikjarazzjonijiet finanzjarji individwali ta’ l-attività estera skond il-paragrafu 28. Jekk oġġett bħal dan huwa denominat fil-munita funzjonali ta’ l-attività estera, tinħoloq differenza fil-kambju tad-dikjarazzjonijiet finanzjarji separati ta’ l-entità li qed tirrapporta skond il-paragrafu 28. Jekk oġġett bħal dan huwa denominat f’munita differenti mill-munita funzjonali ta’ l-entità li qed tirrapporta jew ta’ l-attività estera, tinħoloq differenza fil-kambju fid-dikjarazzjonijiet finanzjarji separati ta’ l-entità li qed tirrapporta u fid-dikjarazzjonijiet finanzjarji ta' l-attività estera skond il-paragrafu 28. Dawn id-differenzi fil-kambju jerġgħu jiġu kklassifikati fil-komponent separat ta’ l-ishma fid-dikjarazzjonijiet finanzjarji li jinkludu l-attività estera u l-entità li qed tirrapporta (jiġifieri d-dikjarazzjonijiet finanzjarji li fihom l-attività estera hija konsolidata, proporzjonalment konsolidata jew inkluża fil-kontijiet permezz tal-metodu ta’ l-ekwità).”

Il-paragrafu 58A huwa miżjud kif ġej.

“58A	Investiment Nett f’Attività Estera (Emenda għall-IAS 21), maħruġ f’Diċembru 2005, biż-żieda tal-paragrafu 15A u l-emenda tal-paragrafu 33. Entità għandha tapplika dawn l-emendi għall-perjodi annwali li jibdew fl-1 ta’ Jannar 2006 jew wara. L-applikazzjoni minn kmieni hija mħeġġa.”

(*) L-identifikazzjoni ta’ l-iperinflazzjoni hija bbażata fuq il-ġudizzju ta’ l-entità tal-kriterji fil-paragrafu 3 ta’ l-IAS 29.