8.5.2007 |
MT |
Il-Ġurnal Uffiċjali ta’ l-Unjoni Ewropea |
904 |
DEĊIŻJONI TAL-KUMMISSJONI
ta' l-14 ta' Ġunju 2006
dwar ċerti miżuri tranżitorji b'rabta ma' influwenza tat-tjur b'livell patoġeniku għoli ħafna fit-tjur ta' l-irziezet jew għasafar oħrajn maqbudin fil-Komunità
(innotifikata taħt dokument numru C(2006) 2402)
(Test b'rilevanza għaż-ŻEE)
(206/416/KE)
IL-KUMMISSJONI TAL-KOMUNITAJIET EWROPEJ,
Wara li kkunsidrat id-Direttiva tal-Kunsill 2005/94/KE ta' l-20 ta' Diċembru 2005 dwar miżuri tal-Komunità għall-kontroll ta' l-influwenza tat-tjur u li tirrevoka d-Direttiva 92/40/KEE (1), u b'mod partikolari l-Artikolu 66(2) tagħha,
Billi:
(1) |
L-Influwenza tat-Tjur hija marda serja u kontaġġjuża ħafna tat-tjur ta' l-irziezet u ta' għasafar oħrajn ikkawżata minn tipi differenti ta' viruses li jaqgħu taħt il-familja kbira tal-virus imsejħa Influenzaviridae. Il-viruses ta' l-influwenza tat-tjur jistgħu jinfirxu wkoll fil-mammiferi, inkluż il-bniedem, ġeneralment wara kuntatt dirett ma' għasafar infettati. L-għarfien attwali juri li r-riskji għas-saħħa minħabba l-hekk imsejħin viruses ta' l-influwenza tat-tjur b'livell patoġeniku baxx (LPAI) — huma inferjuri għal dak minħabba viruses ta' l-influwenza tat-tjur b'livell patoġeniku għoli (HPAI), li joriġinaw minn mutazzjoni ta' ċerti viruses LPAI. |
(2) |
Miżuri tal-Komunità għall-kontroll ta' l-influwenza tat-tjur ikkawżata mill-viruses HPAI kienu ġew stabbiliti bid-Direttiva tal-Kunsill 92/40/KEE tad-19 ta' Mejju 1992 li kienet tintroduċi miżuri tal-Komunità għall-kontroll ta' l-influwenza tat-tjur (2), bil-għan li tiġi mħarsa s-saħħa ta' l-annimali u tikkontribwixxi għall-iżvilupp tas-settur tat-tjur. |
(3) |
Il-miżuri previsti mid-Direttiva 92/40/KEE ġew fundamentalment riveduti fid-dawl ta' għarfien xjentifiku reċenti fuq ir-riskji ta' l-influwenza tat-tjur għall-annimali u s-saħħa pubblika, l-iżvilupp ta' testijiet tal-laboratorju ġodda u vaċċini u l-lezzjonijiet meħuda tul l-aħħar tifqigħ ta' din il-marda fil-Komunità kif ukoll f'pajjiżi terzi. Bil-ħsieb ta' dik ir-reviżjoni, id-Direttiva 92/40/KEE ġiet revokata u sostitwita bid-Direttiva 2005/94/KE. Taħt id-Direttiva 2005/94/KE l-Istati Membri għandhom sa l-1 ta' Lulju 2007 biex jittrasponu d-dispożizzjonijiet tagħha fil-liġi nazzjonali. |
(4) |
Minħabba s-sitwazzjoni dinjija attwali fir-rigward ta' l-influwenza tat-tjur, huwa meħtieġ li jiġu stabbiliti miżuri tranżitorji li għandhom jiġu applikati fl-istabbilimenti fejn it-tifqigħ ta' l-influwenza tat-tjur ikkawżat mill-viruses HPAI huwa suspettat jew ikkonfermat fit-tjur ta' l-irziezet jew għasafar oħrajn maqbudin, sakemm issir it-traspożizzjoni tad-Direttiva 2005/94/KE mill-Istati Membri. |
(5) |
Il-miżuri tranżitorji previsti f'din id-Deċiżjoni għandhom jaġevolaw l-Istati Membri biex jadottaw miżuri ta' kontroll tal-marda b'mod proporzjonat u flessibbli, billi jitqiesu l-livelli varji ta' riskju maħluqin mill-varjanti differenti tal-virus, l-impatt soċjali u ekonomiku konsegwenti tal-miżuri msemmija fuq is-settur ta' l-agrikoltura u setturi oħra involuti, filwaqt li fl-istess ħin jiġi żgurat li l-miżuri meħudin għal kull xenarju speċifiku huma l-aktar approprjati. |
(6) |
Fl-interessi tal-konsistenza u taċ-ċarezza tal-leġiżlazzjoni tal-Komunità, il-miżuri tranżitorji li għandu jsir provvediment għalihom fid-Deċiżjoni għandhom iqisu l-miżuri ta' kontroll tal-marda previsti fid-Direttiva 2005/94/KE u d-definizzjonijiet stipulati f'dik id-Direttiva japplikaw għal din id-Deċiżjoni. |
(7) |
Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali, |
ADOTTAT DIN ID-DEĊIŻJONI:
L-Artikolu 1
Suġġett u firxa ta' applikazzjoni
1. Din id-Deċiżjoni tistipula ċerti miżuri tranżitorji li għandhom jiġu applikati fi Stat Membru fejn tifqigħ ta' l-influwenza tat-tjur ikkawżat minn viruses ta' l-influwenza tat-tjur b'livell patoġeniku għoli (HPAI) huwa suspettat jew ikkonfermat fi tjur ta' l-irziezet jew għasafar oħrajn maqbudin.
2. Mingħajr preġudizzju għall-miżuri li għandhom jiġu applikati fl-istabbilimenti, u f'żoni ta' protezzjoni u sorveljanza skond id-Direttiva 92/40/KEE il-miżuri previsti f'din id-Deċiżjoni għandhom jiġu applikati mill-Istati Membri li għadhom ma ttrasponewx għal kollox id-dispożizzjonijiet tad-Direttiva 2005/94/KE kkonċernati minn din id-Deċiżjoni.
L-Artikolu 2
Notifika
1. L-Istati Membri għandhom jiżguraw li l-preżenza suspettata u l-preżenza ta' l-HPAI jiġu obbligatorjament u minnufih innotifikati lill-awtorità kompetenti.
2. L-Istati Membri għandhom jinnotifikaw ir-riżultati ta' kull sorveljanza għall-virus ta' l-influwenza tat-tjur b'livell patoġeniku għoli mwettqa fuq mammiferi u għandhom jinfurmaw minnufih lill-Kummissjoni b'kull riżultat pożittiv wara din is-sorveljanza.
L-Artikolu 3
Miżuri li għandhom jiġu applikati fi stabbilimenti fejn it-tifqigħ huwa suspettat
1. Fil-każ ta' tifqigħa suspettata, l-awtorità kompetenti għandha minnufih tagħti bidu għal stħarriġ biex tikkonferma jew teskludi l-preżenza ta' l-influwenza tat-tjur u tpoġġi l-istabbiliment taħt sorveljanza uffiċjali.
L-awtorità kompetenti għandha wkoll tiżgura li l-miżuri previsti fil-paragrafi 2 u 3 jiġu osservati.
2. L-awtorità kompetenti għandha tiżgura li l-miżuri li ġejjin jiġu applikati fl-istabbiliment:
(a) |
tjur ta' l-irziezet, għasafar oħrajn maqbudin u l-mammiferi kollha ta' l-ispeċi domestiċi jingħaddu jew, jekk approprjat, issir stima ta' l-għadd tagħhom għal kull tip ta' tjur ta' l-irziezet jew speċi ta' għasafar oħrajn maqbudin; |
(b) |
issir lista ta' l-għadd approssimattiv tat-tjur ta' l-irziezet, għasafar oħrajn maqbudin u l-mammiferi kollha ta' l-ispeċi domestiċi diġà morda, mejtin jew li jistgħu jiġu infettati f'kull kategorija fl-istabbiliment; dik il-lista għandha tiġi aġġornata kuljum biex tqis it-tfaqqis, it-twelid u l-imwiet matul il-perjodu tat-tifqigħa suspettata u għandha tintwera fuq talba ta' l-awtorità kompetenti; |
(ċ) |
it-tjur ta' l-irziezet kollha u għasafar oħrajn maqbudin, għandhom jiddaħħlu f'bini fl-istabbiliment tagħhom u jinżammu hemmhekk. Fejn dan mhux possibbli jew il-benesseri tagħhom ikun kompromess għandhom jinżammu f'xi post ieħor fl-istess stabbiliment b'mod li ma jidħlux f'kuntatt ma' tjur ta' l-irziezet oħrajn jew għasafar oħrajn maqbudin fi stabbilimenti oħrajn. Il-passi kollha raġonevoli għandhom jittieħdu biex ikun minimizzat il-kuntatt tagħhom ma' għasafar selvaġġi; |
(d) |
l-ebda tjur ta' l-irziezet jew għasafar oħrajn maqbudin ma jistgħu jidħlu jew joħorġu mill-istabbiliment; |
(e) |
l-ebda karkassa ta' tjur ta' l-irziezet jew għasafar oħrajn maqbudin, laħam tat-tjur ta' l-irziezet inkluż il-ġewwieni (“laħam tat-tjur”), għalf għat-tjur ta' l-irziezet (“għalf”), għodod, materjali, skart, ħmieġ, demel tat-tjur ta' l-irziezet u għasafar oħrajn maqbudin (“demel”), demel likwidu, skart użat taħt il-bhejjem jew kull ħaġa li tista' xxerred l-influwenza tat-tjur ma tista' tħalli l-istabbiliment mingħajr awtorizzazzjoni ta' l-awtorità kompetenti, bl-osservanza ta' miżuri ta' bijosigurtà approprjati bil-għan li jiġi minimizzat kull riskju ta' tixrid ta' l-influwenza tat-tjur; |
(f) |
l-ebda bajd ma jista' jħalli l-istabbiliment; |
(g) |
il-moviment ta' persuni, mammiferi ta' speċi domestiċi, vetturi u tagħmir lejn jew mill-istabbiliment huwa suġġett għall-kundizzjonijiet u l-awtorizzazzjoni ta' l-awtorità kompetenti; |
(h) |
mezzi approprjati ta' diżinfettar jintużaw fid-dħul u fil-ħruġ ta' bini li jilqa' fih tjur ta' l-irziezet jew għasafar oħrajn maqbudin u ta' l-istabbiliment innifsu skond l-istruzzjonijiet ta' l-awtorità kompetenti. |
3. L-awtorità kompetenti għandha tiżgura li ssir inkjesta epidemjoloġika.
4. Minkejja l-paragrafu 1, l-awtorità kompetenti tista' tipprovdi għas-sottomissjoni ta' kampjuni f'każi oħra. F'ċirkostanzi bħal dawn l-awtorità kompetenti tista' tipproċedi mingħajr ma tadotta xi wħud jew il-miżuri kollha li hemm referenza għalihom fil-paragrafu 2.
L-Artikolu 4
Derogi minn ċerti miżuri li għandhom jiġu applikati fi stabbilimenti fejn hemm tifqigħ suspettat
1. L-awtorità kompetenti tista' tagħti derogi mill-miżuri previsti fl-Artikolu 3(2) punti (c) sa (e) fuq il-bażi ta' valutazzjoni tar-riskju u jitqiesu l-prekawzjonijiet meħuda u d-destinazzjoni ta' l-għasafar u l-prodotti li jkunu se jiġu mċaqalqa.
2. L-awtorità kompetenti tista' tagħti wkoll derogi mill-miżuri previsti fl-Artikolu 3(2), punt (h) fil-każ ta' għasafar oħrajn maqbudin fi stabbilimenti mhux kummerċjali.
3. B'referenza għall-Artikolu 3(2) punt (f), l-awtorità kompetenti tista' tawtorizza li jintbagħtu l-bajd:
(a) |
direttament fi stabbiliment għall-manifattura ta' prodotti mill-bajd, kif stabbilit fil-Kapitolu II tas-Sezzjoni X ta' l-Anness III għar-Regolament (KE) Nru 853/2004 tal-Parlament Ewropew u tal-Kunsill (3), biex jiġu amministrati u ttrattati skond il-Kapitolu XI ta' l-Anness II għar-Regolament (KE) Nru 852/2004 tal-Parlament Ewropew u tal-Kunsill (4); fejn l-awtorità kompetenti tagħti din l-awtorizzazzjoni, din ta' l-aħħar għandha tkun suġġetta għall-kundizzjonijiet stabbiliti fl-Anness III għad-Direttiva 2005/94/KE; jew |
(b) |
għar-rimi. |
L-Artikolu 5
Tul ta' żmien tal-miżuri li għandhom jiġu applikati fi stabbilimenti fejn hemm tifqigħ suspettat
Il-miżuri li għandhom jiġu applikati fi stabbilimenti f'każi ta' tifqigħ suspettat, kif previst fl-Artikolu 3, għandhom jibqgħu jiġu applikati sakemm l-awtorità kompetenti hija sodisfatta li ġie eskluż is-suspett ta' l-influwenza tat-tjur fl-istabbiliment.
L-Artikolu 6
Miżuri addizzjonali bbażati fuq inkjesta epidemjoloġika
1. Fuq il-bażi tar-riżultati preliminari ta' inkjesta epidemjoloġika, l-awtorità kompetenti tista' tapplika l-miżuri previsti fil-paragrafi 2, 3 u 4 b'mod partikolari jekk l-istabbiliment jinsab f'żona fejn hemm densità għolja ta' tjur ta' l-irziezet.
2. Restrizzjonijiet temporanji jistgħu jiġu introdotti fuq il-movimenti ta' tjur ta' l-irziezet, għasafar oħrajn maqbudin u bajd u fuq il-moviment ta' vetturi użati mis-settur tat-tjur ta' l-irziezet f'żona definita jew fl-Istat Membru kollu.
Dawn ir-restrizzjonijiet jistgħu jiġu estiżi għall-movimenti ta' mammiferi ta' speċi domestiċi, iżda f'dak il-każ m'għandhomx jaqbżu t-72 siegħa, sakemm mhux ġustifikati.
3. Il-miżuri previsti fl-Artikolu 7 jistgħu jiġu applikati fl-istabbiliment.
Minkejja dan, jekk il-kundizzjonijiet jippermettu, l-applikazzjoni ta' dawk il-miżuri tista' tkun limitata għat-tjur ta' l-irziezet jew għasafar oħrajn maqbudin suspettati li huma infettati u l-unitajiet ta' produzzjoni tagħhom.
Kampjuni għandhom jittieħdu mit-tjur ta' l-irziezet jew għasafar oħrajn maqbudin jekk jinqatlu biex jiġi kkonfermat jew eskluż ir-riskju ta' tifqigħa suspettata.
4. Żona ta' kontroll temporanja madwar l-istabbiliment u wħud jew il-miżuri kollha previsti fl-Artikolu 3(2) għandhom jiġu applikati skond il-ħtieġa fl-istabbilimenti f'dik iż-żona.
L-Artikolu 7
Miżuri li għandhom jiġu applikati fi stabbilimenti fejn tifqigħ huwa kkonfermat
1. F'każ ta' tifqigħa ta' HPAI, l-awtorità kompetenti għandha tiżgura li l-miżuri previsti fl-Artikolu 3(2) u (3) u l-paragrafi 2 sa 9 ta' dan l-Artikolu huma applikati.
2. It-tjur ta' l-irziezet kollha u għasafar oħrajn maqbudin li hemm fl-istabbiliment għandhom jinqatlu mingħajr dewmien taħt superviżjoni uffiċjali. Din il-qatla għandha ssir b'mod li jiġi evitat ir-riskju li tinxtered l-influwenza tat-tjur, b'mod partikolari matul il-ġarr.
Madankollu, l-Istati Membri jistgħu jagħtu derogi għal ċerti speċi ta' tjur ta' l-irziezet jew għasafar oħrajn maqbudin biex ma jinqatlux, fuq il-bażi ta' valutazzjoni tar-riskju ta' tixrid ulterjuri ta' l-influwenza tat-tjur.
L-awtorità kompetenti tista' tieħu l-miżuri approprjati biex tillimita kull possibbiltà li l-influwenza tat-tjur tinxtered fost l-għasafar selvaġġi li jkun hemm fl-istabbiliment.
3. Il-karkassi u l-bajd kollha fl-istabbiliment għandhom jintremew taħt superviżjoni uffiċjali.
4. Tjur ta' l-irziezet li diġà faqqsu minn bajd miġbur mill-istabbiliment matul il-perjodu bejn id-data probabbli tad-dħul ta' l-HPAI fl-istabbiliment u l-applikazzjoni tal-miżuri previsti fl-Artikolu 3(2), għandhom jitpoġġew taħt superviżjoni uffiċjali u għandhom isiru l-investigazzjonijiet.
5. Il-laħam ta' tjur ta' l-irziezet imbiċċra u l-bajd miġbur mill-istabbiliment matul il-perjodu bejn id-data probabbli ta' dħul ta' l-HPAI fl-istabbiliment u l-applikazzjoni tal-miżuri previsti fl-Artikolu 3(2) għandhom, kull meta jkun possibbli, jiġu ntraċċati u mormijin taħt superviżjoni uffiċjali.
6. Is-sustanzi kollha, demel u skart li jistgħu jkunu kontaminati, bħal għalf, għandhom jinqerdu jew jgħaddu minn trattament li jaċċerta l-qirda tal-virus ta' l-influwenza tat-tjur, skond l-istruzzjonijiet mogħtija mill-veterinarju uffiċjali.
7. Wara r-rimi tal-karkassi, il-bini użat biex jinżammu fih, mergħat jew art, it-tagħmir li jista' jkun kontaminat u l-vetturi użati għall-ġarr tat-tjur ta' l-irziezet u għasafar oħrajn maqbudin, karkassi, laħam, għalf, demel, demel likwidu, imfierex ta' taħt il-bhejjem u kull materjal jew sustanza oħra li jistgħu jkunu kontaminati għandhom jiġu mnaddfa u diżinfettati bl-istruzzjonijiet mogħtija mill-veterinarju uffiċjali.
8. Għasafar oħrajn maqbudin jew mammiferi ta' speċi domestiċi m'għandhomx jidħlu jew joħorġu mill-istabbiliment mingħajr l-awtorizzazzjoni ta' l-awtorità kompetenti. Dik ir-restrizzjoni m'għandhiex tapplika għal mammiferi ta' speċi domestiċi li għandhom aċċess biss għall-kwartieri fejn jgħixu l-bnedmin.
9. Fil-każ ta' tifqigħa primarja, il-virus iżolat ikun suġġett għall-investigazzjonijiet tal-laboratorju biex jiġi identifikat is-sottotip ġenetiku. Dak il-virus iżolat għandu jiġi sottomess lil-laboratorju ta' referenza tal-Komunità għall-influwenza tat-tjur imsemmi fl-Artikolu 51(1) tad-Direttiva 2005/94/KE mill-aktar fis possibbli.
L-Artikolu 8
Derogi li jikkonċernaw ċerti stabbilimenti
1. L-awtorità kompetenti tista' tagħti derogi mill-miżuri previsti fl-ewwel subparagrafu ta' l-Artikolu 7(2) fil-każi ta' tifqigħa ta' HPAI fi stabbiliment mhux kummerċjali, ċirku, żù, ħanut ta' l-għasafar domestiċi, park ta' l-annimali selvaġġi, żona magħluqa fejn tjur ta' l-irziezet u għasafar oħrajn maqbudin jinżammu għal għanijiet xjentifiċi jew għanijiet relatati mal-konservazzjoni ta' speċi fil-periklu jew razez rari ta' tjur ta' l-irziezet u ta' għasafar oħrajn maqbudin uffiċjalment reġistrati, sakemm dawn id-derogi ma jipperikolawx il-kontroll tal-marda.
2. L-awtorità kompetenti għandha tiżgura li fejn tingħata deroga, kif previst fil-paragrafu 1, it-tjur ta' l-irziezet u għasafar oħrajn maqbudin milqutin mid-deroga:
(a) |
jiddaħħlu f'bini fl-istabbiliment tagħhom u jibqgħu hemmhekk; fejn dan mhux possibbli jew jekk il-benesseri tagħhom huwa kompromess jinġabru f'xi post ieħor fl-istess stabbiliment b'mod li ma jidħlux f'kuntatt ma' tjur ta' l-irziezet oħra jew għasafar oħrajn maqbudin fi stabbilimenti oħra; il-passi kollha raġonevoli għandhom jittieħdu biex ikun minimizzat il-kuntatt tagħhom ma' għasafar selvaġġi; |
(b) |
ikunu suġġetti għal aktar sorveljanza u ttestjar skond l-istruzzjonijiet tal-veterinarju uffiċjali u ma jkunux imċaqalqa sakemm it-testijiet tal-laboratorju jindikaw li m'humiex aktar ta' riskju sinifikanti għal tixrid ulterjuri ta' l-HPAI; u |
(ċ) |
ma jkunux mċaqalqa mill-istabbiliment oriġinali tagħhom, ħlief biex jinqatlu jew għal stabbiliment ieħor:
|
3. Minkejja l-projbizzjoni ta' moviment ta' tjur ta' l-irziezet u ta' għasafar oħrajn maqbudin skond il-paragrafu 2(b), l-awtorità kompetenti tista' fuq il-bażi ta' valutazzjoni tar-riskju tawtorizza l-ġarr taħt miżuri ta' bijosigurtà ta' tjur ta' l-irziezet jew ta' għasafar li ma jkunux jistgħu jinżammu sew u ma jkunux taħt sorveljanza fl-istabbiliment ta' l-oriġini lejn stabbiliment magħżul fl-istess Stat Membru, fejn aktar sorveljanza u ttestjar għandhom isiru taħt sorveljanza uffiċjali; sakemm din l-awtorizzazzjoni ma tipperikolax il-kontroll tal-marda.
4. L-awtorità kompetenti tista' tagħti derogi mill-miżuri previsti fl-Artikolu 7(5), biex il-bajd jintbagħat direttament fi stabbiliment għall-manifattura ta' prodotti mill-bajd kif stipulat fil-Kapitolu II tas-Sezzjoni X ta' l-Anness III għar-Regolament (KE) Nru 853/2004 amministrati u ttrattati skond il-Kapitolu XI ta' l-Anness II għar-Regolament (KE) Nru 852/2004.
5. L-Istati Membri għandhom jinfurmaw lill-Kummissjoni u lill-Istati Membri l-oħra dwar kull deroga mogħtija fuq il-bażi ta' din id-dispożizzjoni.
L-Artikolu 9
Miżuri li għandhom jiġu applikati f'każi ta' tifqigħ ta' l-HPAI f'unitajiet ta' produzzjoni separati
F'każi ta' tifqigħ ta' l-HPAI fi stabbiliment li huwa magħmul minn żewġ unitajiet jew aktar ta' produzzjoni separati, l-awtorità kompetenti tista' tagħti derogi mill-miżuri previsti fl-ewwel subparagrafu ta' l-Artikolu 7(2) għal unitajiet ta' produzzjoni bi tjur ta' l-irziezet jew għasafar oħrajn maqbudin fejn m'hemm l-ebda suspett ta' HPAI, kemm-il darba dawn id-derogi ma jipperikolawx il-kontroll tal-marda.
Dawn id-derogi għandhom jingħataw biss fil-każ ta' żewġ unitajiet jew aktar ta' produzzjoni separati fejn il-veterinarju uffiċjali, meta jkun ikkunsidra l-istruttura, id-daqs, l-operazzjoni, it-tip ta' bini, l-għalf, is-sors ta' l-ilma, it-tagħmir, l-istaff u l-viżitaturi fl-istabbiliment, ikun sodisfatt li huma għal kollox indipendenti minn unitajiet ta' produzzjoni oħra f'dawk li huma post u amministrazzjoni ta' kuljum tat-tjur ta' l-irziezet u għasafar oħrajn maqbudin li jinżammu hemmhekk.
L-Istati Membri għandhom jinfurmaw lill-Kummissjoni u lill-Istati Membri l-oħra dwar kull deroga li tkun ingħatat fuq il-bażi ta' din id-dispożizzjoni.
L-Artikolu 10
Miżuri li għandhom jiġu applikati fi stabbilimenti li kellhom kuntatt
1. Fuq il-bażi ta' l-inkjesta epidemjoloġika, l-awtorità kompetenti għandha tiddeċiedi jekk stabbiliment għandux jiġi kkunsidrat bħala stabbiliment li kellu kuntatt.
L-awtorità kompetenti għandha tiżgura li l-miżuri previsti fl-Artikolu 3(2) huma applikati fi stabbilimenti li kellhom kuntatt sakemm il-preżenza ta' l-HPAI tkun ġiet eskluża.
2. Fuq il-bażi ta' l-inkjesta epidemjoloġika, l-awtorità kompetenti tista' tapplika l-miżuri previsti fl-Artikolu 7 fl-istabbilimenti li kellhom kuntatt u b'mod partikolari jekk l-istabbiliment li kellu kuntatt jinsab f'żona b'densità għolja ta' tjur ta' l-irziezet.
Il-kriterji ewlenin li għandhom jitqiesu għall-applikazzjoni tal-miżuri previsti fl-Artikolu 7 fi stabbilimenti li kellhom kuntatt huma stabbiliti fl-Anness IV għad-Direttiva 2005/94/KE.
3. L-awtorità kompetenti għandha tiżgura li jittieħdu kampjuni mit-tjur ta' l-irziezet u għasafar oħrajn maqbudin meta jinqatlu bil-għan li tiġi konfermata jew eskluża l-preżenza tal-virus ta' l-HPAI f'dawk l-istabbilimenti li kellhom kuntatt.
4. L-awtorità kompetenti għandha tiżgura li, f'kull stabbiliment fejn tjur ta' l-irziezet u għasafar oħrajn maqbudin jinqatlu u jintremew u l-influwenza tat-tjur tkun sussegwentement ikkonfermata, il-bini u kull tagħmir li jista' jkun kontaminat u l-vetturi użati għall-ġarr tat-tjur ta' l-irziezet, għasafar oħrajn maqbudin, karkassi, laħam, għalf, demel, demel likwidu, imfierex ta' taħt il-bhejjem u kull materjal jew sustanza oħra li tista' tkun kontaminata jiġu mnaddfa u diżinfettati bl-istruzzjonijiet mogħtija mill-veterinarju uffiċjali.
L-Artikolu 11
Twaqqif ta' żoni ta' ħarsien, sorveljanza u u ta' żoni aktar ristretti f'każi ta' tifqigħ ta' l-HPAI
1. L-awtorità kompetenti immedjatament wara li tfaqqa' l-HPAI għandha tistabbilixxi:
(a) |
żona ta' protezzjoni b'raġġ ta' mhux inqas minn tliet kilometri madwar l-istabbiliment; |
(b) |
żona ta' sorveljanza b'raġġ ta' mhux inqas minn 10 kilometri madwar l-istabbiliment, li jinkludi ż-żona ta' protezzjoni. |
2. Jekk it-tifqigħa ta' l-HPAI tiġi kkonfermata f'għasafar oħrajn maqbudin fi stabbiliment mhux kummerċjali, ċirku, żù, ħanut ta' l-għasafar domestiċi, park ta' l-annimali selvaġġi, żona magħluqa fejn għasafar oħrajn maqbudin jinżammu għal għanijiet xjentifiċi jew għanijiet relatati mal-konservazzjoni ta' speċi fil-periklu jew razez rari ta' għasafar oħrajn maqbudin li huma uffiċjalment reġistrati u li ma fihomx tjur ta' l-irziezet, l-awtorità kompetenti tista', wara valutazzjoni tar-riskju, tidderoga sal-limitu meħtieġ mid-dispożizzjonijiet ta' l-Artikoli 11 u 26 li jikkonċernaw it-twaqqif taż-żoni ta' protezzjoni u ta' sorveljanza u tal-miżuri li għandhom jiġu applikati hemmhekk, kemm-il darba dawn id-derogi ma jipperikolawx il-kontroll tal-marda.
3. Meta tistabbilixxi żoni ta' protezzjoni u ta' sorveljanza, kif previst fil-paragrafu 1, l-awtorità kompetenti għandha għall-inqas tikkunsidra l-kriterji li ġejjin:
(a) |
l-inkjesta epidemjoloġika; |
(b) |
il-qagħda ġeografika, b'mod partikolari il-fruntieri naturali; |
(ċ) |
il-post u l-prossimità ta' l-istabbilimenti u l-għadd ikkalkulat ta' tjur ta' l-irziezet; |
(d) |
tendenzi fil-movimenti u fil-kummerċ ta' tjur ta' l-irziezet jew ta' għasafar oħrajn maqbudin; |
(e) |
il-faċilitajiet u l-istaff disponibbli biex jiġi kkontrollat kull moviment fiż-żoni ta' protezzjoni u ta' sorveljanza tat-tjur ta' l-irziezet jew ta' għasafar oħrajn maqbudin, il-karkassi, id-demel, l-imfierex jew skart użat, b'mod partikolari jekk it-tjur ta' l-irziezet jew għasafar oħrajn maqbudin li se jinqatlu u jintremew għandhom jiġu mċaqalqa mill-istabbiliment ta' l-oriġini tagħhom. |
4. L-awtorità kompetenti tista' tistabbilixxi żoni ristretti ulterjuri madwar jew li jmissu maż-żoni ta' protezzjoni u ta' sorveljanza, filwaqt li tqis il-kriterji previsti fil-paragrafu 3.
5. Jekk żona ta' protezzjoni, ta' sorveljanza jew żona oħra ristretta tkopri t-territorji ta' Stati Membri differenti, l-awtoritajiet kompetenti ta' l-Istati Membri kkonċernati għandhom jikkollaboraw biex iż-żona tiġi definita.
L-Artikolu 12
Miżuri li għandhom jiġu applikati kemm fiż-żona ta' protezzjoni kif ukoll f'dawk ta' sorveljanza
1. L-awtorità kompetenti għandha tiżgura li jiġu applikati dawn il-miżuri li ġejjin fiż-żoni ta' protezzjoni u ta' sorveljanza:
(a) |
introduzzjoni ta' arranġamenti li jippermettu li jiġi intraċċat dak kollu li jista' jxerred il-virus ta' l-influwenza tat-tjur inkluż it-tajr ta' l-irziezet, għasafar oħrajn maqbudin, laħam, bajd, karkassi, għalf, imfierex ta' taħt il-bhejjem, nies li daħlu f'kuntatt mat-tjur ta' l-irziezet infettati jew għasafar oħrajn maqbudin jew vetturi li għandhom rabta ma' l-industrija tat-tjur ta' l-irziezet; |
(b) |
Is-sidien għandhom jipprovdu lill-awtorità kompetenti, meta mitluba, b'kull tagħrif rilevanti dwar it-tjur ta' l-irziezet jew għasafar oħrajn maqbudin u bajd li jkunu dieħla jew ħierġa mill-istabbiliment. |
2. L-awtorità kompetenti għandha tieħu l-passi raġonevoli kollha biex tiżgura li l-persuni kollha fiż-żona ta' protezzjoni u ta' sorveljanza milquta mir-restrizzjonijiet ikkonċernati huma konxji bis-sħiħ mir-restrizzjonijiet fis-seħħ.
Dak it-tagħrif jista' jitwassal permezz ta' avviżi ta' twissija, riżorsi tal-medja bħall-istampa u t-televiżjoni jew b'kull mezz ieħor xieraq.
3. L-awtorità kompetenti tista', fejn huwa indikat minn tagħrif epidemjoloġiku jew minn evidenza oħra, timplimenta programm ta' qirda preventiva, inkluż it-tbiċċir preventiv jew il-qtil tat-tjur ta' l-irziezet jew għasafar oħrajn maqbudin, fi stabbilimenti u żoni li huma f'riskju.
4. L-Istati Membri li japplikaw il-miżuri previsti fil-paragrafu 3 għandhom minnufih jinfurmaw lill-Kummissjoni b'dan.
L-Artikolu 13
Ċensiment u żjarat mill-veterinarju uffiċjali u sorveljanza
L-awtorità kompetenti għandha tiżgura li l-miżuri li ġejjin jiġu applikati fiż-żoni ta' protezzjoni:
(a) |
isir ċensiment ta' l-istabbilimenti kollha mill-aktar fis possibbli; |
(b) |
l-istabbilimenti kummerċjali kollha ssirilhom żjara minn veterinarju uffiċjali mill-aktar fis possibbli biex isir eżami kliniku fuq it-tjur ta' l-irziezet u għasafar oħrajn maqbudin u, jekk meħtieġ, jinġabru kampjuni għal testijiet fil-laboratorju skond l-istruzzjonijiet mogħtija mill-veterinarju uffiċjali; għandu jinżamm reġistru ta' dawn iż-żjarat u s-sejbiet li jirriżultaw minnhom; stabbilimenti mhux kummerċjali għandha ssirilhom żjara minn veterinarju uffiċjali qabel ma titneħħa ż-żona ta' protezzjoni; |
(ċ) |
sorveljanza addizzjonali għandha tiġi implimentata minnufih skond l-istruzzjonijiet mogħtija mill-veterinarju uffiċjali bil-għan li jiġi identifikat kull tixrid ieħor ta' l-influwenza tat-tjur fl-istabbilimenti li jinsabu fiż-żona ta' protezzjoni. |
L-Artikolu 14
Miżuri li għandhom jiġu applikati fi stabbilimenti fiż-żoni ta' protezzjoni
L-awtorità kompetenti għandha tiżgura li l-miżuri li ġejjin jiġu applikati fl-istabbilimenti fiż-żoni ta' protezzjoni:
(a) |
it-tjur ta' l-irziezet u l-għasafar oħrajn maqbudin kollha għandhom jiddaħħlu f'bini fl-istabbiliment tagħhom u jinżammu hemmhekk. Fejn dan mhux prattiku jew il-benesseri tagħhom huwa kompromess, dawn jinżammu magħluqin f'xi post ieħor fl-istess stabbiliment b'tali mod li ma jkollhomx kuntatt ma' tjur ta' l-irziezet oħrajn jew għasafar oħrajn maqbudin fi stabbilimenti oħra. Għandhom jittieħdu l-passi kollha raġonevoli biex ikun minimizzat il-kuntatt tagħhom ma' għasafar selvaġġi; |
(b) |
il-karkassi għandhom jintremew mill-aktar fis possibbli; |
(ċ) |
il-vetturi u t-tagħmir użati għall-ġarr ta' tjur ta' l-irziezet jew għasafar oħrajn maqbudin ħajjin, laħam, għalf, demel, demel likwidu u mfierex u kull materjal jew sustanzi oħrajn li jistgħu jkunu kontaminati, jitnaddfu u jiġu diżinfettati skond l-istruzzjonijiet mogħtija mill-veterinarju uffiċjali; |
(d) |
il-partijiet kollha ta' vetturi użati mill-istaff jew persuni oħra li jidħlu jew joħorġu mill-istabbilimenti u li setgħu ġew kontaminati jitnaddfu u jiġu diżinfettati bl-istruzzjonijiet jingħataw mill-veterinarju uffiċjali; |
(e) |
l-ebda tjur ta' l-irziezet, għasafar oħrajn maqbudin, jew mammiferi domestiċi ma jistgħu jidħlu fi jew joħorġu minn stabbiliment mingħajr l-awtorizzazzjoni ta' l-awtorità kompetenti. Din ir-restrizzjoni ma tapplikax għall-mammiferi li għandhom aċċess biss għall-kwartieri fejn jgħixu l-bnedmin li fihom huma:
|
(f) |
kwalunkwe żjieda fil-mard jew fil-mortalità jew tnaqqis sinifikanti fid-data tal-produzzjoni fl-istabbilimenti hija rappurtata minnufih lill-awtorità kompetenti, li għandha tagħmel l-investigazzjonijiet xierqa skond l-istruzzjonijiet mogħtija mill-veterinarju uffiċjali; |
(g) |
kull persuna li tidħol fi jew toħroġ minn stabbilimenti għandha tħares miżuri xierqa ta' bijosigurtà maħsuba biex jipprevjenu t-tixrid ta' l-influwenza tat-tjur; |
(h) |
reġistri dwar il-persuni kollha li jżuru l-istabbilimenti, ħlief djar, jinżammu mis-sid biex jiffaċilita s-sorveljanza u l-kontroll tal-marda u għandhom ikunu disponibbli meta mitluba mill-awtorità kompetenti. Dawn id-dokumenti m'hemmx għalfejn jinżammu fejn il-viżitaturi jmorru fi stabbilimenti bħalma huwa żù jew park ta' annimali selvaġġi fejn m'għandhomx aċċess għaż-żoni fejn jinżammu l-annimali. |
L-Artikolu 15
Projbizzjoni tat-tneħħija jew tat-tixrid ta' mfierex ta' taħt il-bhejjem użat, demel jew demel likwidu mill-istabbilimenti
L-awtorità kompetenti għandha tiżgura li t-tneħħija jew it-tixrid ta' mfierex ta' taħt il-bhejjem użat, demel u demel likwidu mill-istabbilimenti fiż-żoni ta' protezzjoni huma pprojbiti, sakemm mhux awtorizzati minnha. Madankollu, il-moviment ta' demel jew ta' demel likwidu jista' jiġi awtorizzat minn stabbilimenti taħt miżuri ta' bijosigurtà lejn impjant magħżul għat-trattament jew għall-ħażna intermedja għal trattament sussegwenti biex tinqered il-preżenza possibbli ta' viruses ta' l-influwenza tat-tjur skond ir-Regolament (KE) Nru 1774/2002 tal-Parlament ewropew u tal-Kunsill (5).
L-Artikolu 16
Fieri, swieq jew laqgħat oħrajn u t-tgħammir mill-ġdid ta' tjur tal-kaċċa
L-awtorità kompetenti għandha tiżgura li fieri, swieq, wirjiet jew laqgħat oħrajn ta' tjur ta' l-irziezet jew għasafar oħrajn maqbudin huma pprojbiti fiż-żoni ta' protezzjoni.
L-awtorità kompetenti għandha tiżgura li tjur ta' l-irziezet u għasafar oħrajn maqbudin maħsuba għat-tgħammir mill-ġdid tat-tjur tal-kaċċa m'għandhomx jinħelsu fiż-żoni ta' protezzjoni.
L-Artikolu 17
Projbizzjoni tal-moviment u l-ġarr ta' għasafar, bajd, laħam tat-tjur ta' l-irziezet u karkassi
1. L-awtorità kompetenti għandha tiżgura li fiż-żoni ta' protezzjoni, il-moviment u l-ġarr mill-istabbilimenti fit-toroq, esklużi t-toroq ta' servizz privati fl-istabbilimenti, jew bil-ferrovija, ta' tjur ta' l-irziezet, għasafar oħrajn maqbudin, tjur ta' l-irziezet lesti biex ibidu, flieles ta' jum, bajd u karkassi huma pprojbiti.
2. L-awtorità kompetenti għandha tiżgura li l-ġarr ta' laħam ta' tjur ta' l-irziezet mill-biċċeriji, mill-impjanti għall-qtugħ u mill-ħażniet kiesħa huwa pprojbit kemm-il darba ma jkunx prodott:
(a) |
minn tjur ta' l-irziezet li oriġina minn barra ż-żoni ta' protezzjoni u li kien maħżun u inġarr separatament mil-laħam ta' tjur ta' l-irziezet fiż-żoni ta' protezzjoni; jew |
(b) |
f'data għallinqas 21 jum qabel id-data meta probabbilment seħħet l-infezzjoni l-aktar bikrija fi stabbiliment fiż-żona ta' protezzjoni u minn meta ġie prodott inħażen u inġarr separatament minn laħam prodott wara dik id-data. |
3. Madankollu, il-projbizzjonijiet fil-paragrafi 1 u 2 m'għandhomx japplikaw għat-tranżitu miż-żoni ta' protezzjoni fit-toroq jew bil-ferrovija mingħajr ħatt jew waqfien.
L-Artikolu 18
Derogi għall-ġarr dirett tat-tjur ta' l-irziezet għall-qtil immedjat u l-moviment jew it-trattament ta' laħam tat-tjur ta' l-irziezet
1. B'deroga mill-Artikolu 17, l-awtorità kompetenti tista' tawtorizza l-ġarr dirett ta' tjur ta' l-irziezet li joriġinaw minn stabbiliment fiż-żona ta' protezzjoni għall-qatla immedjata f'biċċerija magħżula skond il-kundizzjonijiet li ġejjin:
(a) |
eżami kliniku fuq it-tjur ta' l-irziezet fl-istabbiliment ta' l-oriġini jsir mill-veterinarju uffiċjali fi żmien 24 siegħa minn meta jkunu ntbagħtu għall-qatla; |
(b) |
fejn ikun xieraq, testijiet fil-laboratorju jkunu saru fuq it-tjur ta' l-irziezet fl-istabbiliment ta' l-oriġini skond l-istruzzjonijiet mogħtija mill-veterinarju uffiċjali b'riżultati favorevoli; |
(ċ) |
it-tjur ta' l-irziezet jinġarru f'vetturi ssiġillati mill-awtorità kompetenti jew taħt is-superviżjoni tagħha; |
(d) |
l-awtorità kompetenti responsabbli mill-biċċerija magħżula hija infurmata u taqbel li tilqa' t-tjur ta' l-irziezet u mbagħad tikkonferma li saret il-qatla lill-awtorità kompetenti fil-post tat-tluq; |
(e) |
it-tjur ta' l-irziezet miż-żona ta' protezzjoni jinżammu separati minn tjur ta' l-irziezet oħrajn u jinqatlu separatament jew f'ħinijiet differenti minn tjur ta' l-irziezet oħrajn, preferibbilment fit-tmiem ta' jum ta' xogħol; it-tindif u d-diżinfettar sussegwenti għandhom jitlestew qabel ma jinqatlu tjur ta' l-irziezet oħrajn; |
(f) |
il-veterinarju uffiċjali għandu jiżgura li eżami dettaljat tat-tjur ta' l-irziezet isir fil-biċċerija magħżula meta t-tjur ta' l-irziezet jaslu wara li jkunu nqatlu; |
(g) |
il-laħam ma jidħolx fil-kummerċ intra-Komunitarju jew internazzjonali u jkun fih il-marka tas-saħħa għal-laħam frisk kif previst fl-Anness II għad-Direttiva tal-Kunsill 2002/99/KE (6); |
(h) |
il-laħam jinkiseb, jitqatta', jinġarr u jinħażen separatament minn laħam maħsub għall-kummerċ intra-Komunitarju u internazzjonali u jintuża b'mod li jiġi evitat li jkun imdaħħal fi prodotti tal-laħam maħsuba għall-kummerċ intra-Komunitarju jew internazzjonali, sakemm ma jkunx għadda mit-trattament stabbilit fl-Anness III għad-Direttiva 2002/99/KE. |
2. B'deroga mill-Artikolu 17, l-awtorità kompetenti tista' tawtorizza l-ġarr dirett ta' tjur ta' l-irziezet minn barra ż-żona ta' protezzjoni għall-qatla immedjata lejn biċċerija magħżula fiż-żona ta' protezzjoni u l-moviment sussegwenti ta' laħam derivat minn dan it-tjur ta' l-irziezet kemm-il darba:
(a) |
l-awtorità kompetenti responsabbli mill-biċċerija magħżula tkun infurmata u taqbel li tilqa' t-tjur ta' l-irziezet u wara tikkonferma l-qtil lill-awtorità kompetenti fil-post ta' tluq; |
(b) |
it-tjur ta' l-irziezet jinżammu separati minn tjur ta' l-irziezet oħra li joriġinaw miż-żona ta' protezzjoni u jinqatlu separatament jew f'ħinijiet differenti minn tjur ta' l-irziezet oħrajn; |
(ċ) |
il-laħam tat-tjur ta' l-irziezet prodott jitqatta', jinġarr u jinħażen separatament minn laħam tat-tjur ta' l-irziezet li ġej minn tjur ta' l-irziezet oħrajn li joriġinaw fiż-żona ta' protezzjoni; |
(d) |
il-prodotti sekondarji ta' l-annimali jintremew. |
L-Artikolu 19
Derogi għall-ġarr dirett ta' flieles ta' jum
1. B'deroga mill-Artikolu 17, l-awtorità kompetenti tista' tawtorizza l-ġarr dirett ta' flieles ta' jum, li ġejjin minn stabbilimenti fiż-żona ta' protezzjoni lejn stabbiliment jew tinda f'dak l-istabbiliment fl-istess Stat Membru, li preferibbilment jinsab barra ż-żoni ta' protezzjoni u ta' sorveljanza, suġġett għall-kundizzjonijiet li ġejjin:
(a) |
huma jinġarru f'vetturi ssiġillati mill-awtorità kompetenti jew taħt is-superviżjoni tagħha; |
(b) |
miżuri xierqa ta' bijosigurtà jkunu applikati matul il-ġarr u fl-istabbiliment tad-destinazzjoni; |
(ċ) |
l-istabbiliment tad-destinazzjoni jkun taħt sorveljanza uffiċjali wara l-wasla tal-flieles ta' jum; |
(d) |
jekk jiġu mċaqalqa barra miż-żona ta' protezzjoni jew ta' sorveljanza, it-tjur ta' l-irziezet għandhom jibqgħu fl-istabbiliment tad-destinazzjoni għal mill-inqas 21 jum. |
2. B'deroga mill-Artikolu 17, l-awtorità kompetenti tista' tawtorizza l-ġarr dirett ta' flieles ta' jum, imfaqqsa minn bajd li ġej minn stabbilimenti barra ż-żoni ta' protezzjoni u ta' sorveljanza, lejn kwalunkwe stabbiliment ieħor fl-istess Stat Membru, li preferibbilment jinsab barra ż-żoni ta' protezzjoni u ta' sorveljanza, kemm-il darba il-mafqas li jibgħathom jista' jiżgura, permezz tal-loġistika tiegħu u l-kundizzjonijiet ta' xogħol iġjeniċi tiegħu, li ma kien hemm l-ebda kuntatt bejn dak il-bajd u kull bajd ieħor għat-tifqis jew flieles ta' jum ġejjin minn gruppi ta' tjur ta' l-irziezet f'dawn iż-żoni u li għalhekk għandhom stat ta' saħħa differenti.
L-Artikolu 20
Derogi għall-ġarr dirett ta' tjur ta' l-irziezet lesti biex ibidu
B'deroga mill-Artikolu 17, l-awtorità kompetenti tista' tawtorizza l-ġarr dirett ta' tjur ta' l-irziezet lesti biex ibidu lejn stabbiliment jew tinda ta' dak l-istabbiliment preferibbilment fiż-żona ta' protezzjoni jew ta' sorveljanza fejn m'hemm l-ebda tjur ta' l-irziezet oħrajn, suġġett għall-kundizzjonijiet li ġejjin:
(a) |
eżami kliniku tat-tjur ta' l-irziezet u għasafar oħrajn maqbudin fl-istabbiliment ta' l-oriġini u b'mod partikolari ta' dawk li jridu jiġu mċaqalqa, isir mill-veterinarju uffiċjali; |
(b) |
fejn ikun xieraq, ikunu saru testijiet fil-laboratorju fuq tjur ta' l-irziezet fl-istabbiliment ta' l-oriġini skond l-istruzzjonijiet mogħtija mill-veterinarju uffiċjali b'riżultati favorevoli; |
(ċ) |
it-tjur ta' l-irziezet li huma lesti biex ibidu jinġarru f'vetturi ssiġillati mill-awtorità kompetenti jew taħt is-superviżjoni tagħha; |
(d) |
l-istabbiliment jew it-tinda tad-destinazzjoni titqiegħed taħt sorveljanza uffiċjali wara l-wasla tat-tjur ta' l-irziezet li huma lesti biex ibidu; |
(e) |
jekk jiġu mċaqalqa barra miż-żona ta' protezzjoni jew ta' sorveljanza, it-tjur ta' l-irziezet għandhom jibqgħu fl-istabbiliment tad-destinazzjoni għal mill-inqas 21 jum. |
L-Artikolu 21
Deroga għall-ġarr dirett ta' bajd għat-tifqis u għall-ikel
1. B'deroga mill-Artikolu 17, l-awtorità kompetenti tista' tawtorizza l-ġarr dirett ta' bajd għat-tifqis sew minn kwalunkwe stabbiliment lejn mafqas li jkun, fiż-żona ta' protezzjoni u jkun magħżul mill-awtorità kompetenti (“il-mafqas magħżul”) jew, suġġett għall-kundizzjonijiet li ġejjin, minn stabbiliment li jkun fiż-żona ta' protezzjoni lejn mafqas magħżul:
(a) |
il-gruppi ta' ġenituri li minnhom ġej il-bajd għat-tifqis kienu eżaminati mill-veterinarju uffiċjali skond l-istruzzjonijiet mogħtija mill-awtorità kompetenti u m'hemm l-ebda suspett ta' influwenza tat-tjur f'dawn l-istabbilimenti; |
(b) |
il-bajd għat-tifqis u l-pakketti tagħhom huma diżinfettati qabel ma jintbagħtu u li l-intraċċar lura ta' dan il-bajd jista' jiġi żgurat; |
(ċ) |
il-bajd għat-tifqis jinġarr f'vetturi ssiġillati mill-awtorità kompetenti jew taħt is-superviżjoni tagħha; |
(d) |
miżuri ta' bijosigurtà jkunu applikati fil-mafqas magħżul skond l-istruzzjonijiet ta' l-awtorità kompetenti. |
2. B'deroga mill-Artikolu 17, l-awtorità kompetenti tista' tawtorizza l-ġarr dirett tal-bajd:
(a) |
lejn ċentru ta' l-ippakkjar magħżul mill-awtorità kompetenti (“iċ-ċentru ta' l-ippakkjar magħżul”), kemm-il darba jkun ippakkjat f'pakketti li jintremew u li l-miżuri kollha ta' bijosigurtà meħtieġa mill-awtorità kompetenti huma applikati; |
(b) |
lejn stabbiliment għall-manifattura ta' prodotti tal-bajd kif stabbilit fil-Kapitolu II tas-Sezzjoni X ta' l-Anness III għar-Regolament (KE) Nru 853/2004 li jridu jiġu amministrati u ttrattati skond il-Kapitolu XI ta' l-Anness II għar-Regolament (KE) Nru 852/2004; jew |
(ċ) |
għar-rimi. |
L-Artikolu 22
Deroga għall-ġarr dirett tal-karkassi
B'deroga mill-Artikolu 17, l-awtorità kompetenti tista' tawtorizza l-ġarr dirett ta' karkassi kemm-il darba jinġarru biex jintremew.
L-Artikolu 23
Tindif u diżinfettar tal-mezzi ta' trasport
L-awtorità kompetenti għandha tiżgura li l-vetturi u t-tagħmir li jintuża għall-ġarr kif previst fl-Artikoli 18 u 22 huma mnaddfin u diżinfettati mingħajr dewmien skond l-istruzzjonijiet tal-veterinarju uffiċjali.
L-Artikolu 24
Tul ta' żmien tal-miżuri
1. Il-miżuri previsti fl-Artikolu 13 sa 23 għandhom jinżammu għallinqas għal 21 jum wara d-data li fiha jkunu tlestew it-tindif u d-diżinfettar preliminari fl-istabbiliment infettat skond l-istruzzjonijiet mogħtija mill-veterinarju uffiċjali u sakemm l-istabbilimenti li jinsabu fiż-żona ta' protezzjoni jkunu ġew ittestjati skond l-istruzzjonijiet mogħtija mill-veterinarju uffiċjali
2. Meta l-miżuri previsti fl-Artikolu 13 sa 23 m'għandhomx jibqgħu fis-seħħ, kif previst fil-paragrafu 1 ta' dan l-Artikolu, il-miżuri stabbiliti fl-Artikolu 25 għandhom japplikaw fiż-żona li kienet ta' protezzjoni, sakemm ma jibqgħux jiġu applikati kif previst fl-Artikolu 26.
L-Artikolu 25
Miżuri li għandhom jiġu applikati fiż-żoni ta' sorveljanza
L-awtorità kompetenti għandha tiżgura li l-miżuri li ġejjin jiġu applikati f'żoni ta' sorveljanza:
(a) |
ċensiment ta' l-istabbilimenti kummerċjali kollha tat-tjur ta' l-irziezet isir mill-aktar fis possibbli; |
(b) |
il-moviment ta' tjur ta' l-irziezet, tjur ta' l-irziezet lesti biex ibidu, flieles ta' jum, bajd fiż-żona ta' sorveljanza huwa pprojbit kemm-il darba ma tingħatax l-awtorizzazzjoni mill-awtorità kompetenti, li tiżgura li miżuri xierqa ta' bijosigurtà huma applikati biex jitrażżan it-tixrid ta' l-influwenza tat-tjur; din il-projbizzjoni ma tapplikax għat-tranżitu miż-żona ta' sorveljanza fuq it-triq jew bil-ferrovija mingħajr ħatt jew waqfien; |
(ċ) |
il-moviment ta' tjur ta' l-irziezet, tjur ta' l-irziezet lesti biex ibidu, flieles ta' jum u bajd lejn stabbilimenti, biċċeriji, ċentri ta' ppakkjar jew stabbiliment għall-manifattura ta' prodotti mill-bajd barra miż-żona ta' sorveljanza huwa pprojbit; madankollu, l-awtorità kompetenti tista' tawtorizza l-ġarr dirett ta':
|
(d) |
kull persuna li tidħol fi jew toħroġ minn stabbilimenti fiż-żona ta' sorveljanza għandha tosserva miżuri xierqa ta' bijosigurtà maħsuba biex irażżnu t-tixrid ta' l-influwenza tat-tjur; |
(e) |
vetturi u tagħmir użat għall-ġarr ta' tjur ta' l-irziezet u għasafar oħrajn maqbudin ħajjin, karkassi, għalf, demel, demel likwidu u mfierex u kull materjal jew sustanzi oħra li jistgħu jkunu kontaminati, jitnaddfu u jiġu diżinfettati mingħajr dewmien wara l-kontaminazzjoni skond l-istruzzjonijiet mogħtija mill-veterinarju uffiċjali; |
(f) |
l-ebda tjur ta' l-irziezet, għasafar oħrajn maqbudin jew mammiferi ta' speċi domestiċi ma jistgħu jidħlu fi jew joħorġu minn stabbiliment fejn jinżammu tjur ta' l-irziezet mingħajr l-awtorizzazzjoni ta' l-awtorità kompetenti. Din ir-restrizzjoni m'għandhiex tapplika għal mammiferi li għandhom aċċess biss għall-kwartieri fejn jgħixu l-bnedmin li fihom huma:
|
(g) |
kwalunkwe żjieda fil-mard jew fil-mortalità jew tnaqqis sinifikanti fid-data tal-produzzjoni fl-istabbilimenti hija rappurtata minnufih lill-awtorità kompetenti, li għandha tagħmel l-investigazzjonijiet xierqa skond l-istruzzjonijiet mogħtija mill-veterinarju uffiċjali; |
(h) |
it-tneħħija jew it-tixrid ta' mfierex użat, demel, jew demel likwidu huwa pprojbit kemm-il darba ma jiġix awtorizzat mill-awtorità kompetenti; il-moviment tad-demel jista' jiġi awtorizzat minn stabbiliment li jinsab fiż-żona ta' sorveljanza taħt miżuri ta' bijosigurtà lejn impjant magħżul għat-trattament jew għall-ħażna intermedja għat-trattament sussegwenti biex tinqered il-possibbiltà ta' preżenza ta' viruses ta' l-influwenza tat-tjur, skond ir-Regolament (KE) Nru 1774/2002; |
(i) |
fieri, swieq, wirjiet jew laqgħat oħrajn ta' tjur ta' l-irziezet jew għasafar oħrajn maqbudin huma pprojbiti; |
(j) |
tjur ta' l-irziezet għat-tgħammir mill-ġdid ta' tjur tal-kaċċa m'għandhomx jinħelsu. |
L-Artikolu 26
Tul ta' żmien tal-miżuri
Il-miżuri previsti fl-Artikolu 25 għandhom jinżammu għallinqas għal 30 jum wara d-data ta' tlestija tat-tindif u d-diżinfettar preliminari fl-istabbiliment infettat skond l-istruzzjonijiet mogħtija mill-veterinarju uffiċjali.
L-Artikolu 27
Miżuri li għandhom jiġu applikati f'żoni aktar ristretti
1. L-awtorità kompetenti tista' tipprovdi li xi wħud jew il-miżuri kollha previsti fl-Artikoli 13 sa 26 għandhom japplikaw fiż-żoni aktar ristretti previsti fl-Artikolu 11(4) (“iż-żoni aktar ristretti”).
2. L-awtorità kompetenti tista', fejn l-informazzjoni epidemjoloġika jew evidenza oħra tindika, timplimenta programm ta' qirda preventiva, inkluża l-qatla preventiva jew il-qtil ta' tjur ta' l-irziezet jew għasafar oħrajn maqbudin, fi stabbilimenti u żoni f'riskju, skond il-kriterji ta' l-Anness IV għad-Direttiva 2005/94/KE, li jinsabu f'żoni aktar ristretti.
It-tgħammir mill-ġdid ta' dawk l-istabbilimenti għandu jsir skond l-istruzzjonijiet ta' l-awtorità kompetenti.
3. L-Istati Membri li japplikaw il-miżuri previsti fil-paragrafi 1 u 2 għandhom jinfurmaw lill-Kummissjoni b'dan.
L-Artikolu 28
Testijiet fil-laboratorju u miżuri oħrajn dwar majjali u speċi oħrajn
1. L-awtorità kompetenti għandha tiżgura li wara li jkun ikkonfermat l-HPAI fi kwalunkwe stabbiliment, testijiet tal-laboratorju xierqa għandhom isiru fuq kull majjal preżenti fl-istabbiliment biex ikun ikkonfermat jew eskluż li dawk il-majjali huma, jew kienu, infettati bil-virus ta' l-influwenza tat-tjur b'livell patoġeniku għoli.
L-ebda majjal m'għandu jiġi mċaqlaq mill-istabbiliment sakemm jaslu r-riżultati ta' dawk it-testijiet.
2. Fejn it-testijiet tal-laboratorju previsti fil-paragrafu 1 jikkonfermaw sejbiet pożittivi għall-viruses ta' l-HPAI fil-majjali, l-awtorità kompetenti tista' tawtorizza l-moviment ta' dawk il-majjali lejn stabbilimenti oħra tal-majjali jew lejn biċċeriji magħżula, kemm-il darba testijiet xierqa sussegwenti jkunu wrew li r-riskju tat-tixrid ta' l-influwenza tat-tjur huwa negliġibbli.
3. L-awtorità kompetenti għandha tiżgura li fejn it-testijiet tal-laboratorju previsti fil-paragrafu 1 jikkonfermaw theddida serja għas-saħħa, il-majjali jinqatlu mill-aktar fis possibbli taħt superviżjoni uffiċjali u b'tali mod li jitrażżan it-tixrid tal-virus ta' l-influwenza tat-tjur, b'mod partikolari matul il-ġarr, u skond id-Direttiva 93/119/KEE (7).
4. L-awtorità kompetenti tista', wara l-konferma ta' l-influwenza tat-tjur fi kwalunkwe stabbiliment, u fuq il-bażi ta' valutazzjoni tar-riskju, tapplika l-miżuri previsti fil-paragrafi 1, 2 u 3 fuq kull mammiferu ieħor preżenti fl-istabbiliment u tista' testendi dawk il-miżuri fuq stabbilimenti li kellhom kuntatt.
5. L-Istati Membri għandhom jinfurmaw lill-Kummissjoni fil-qafas tal-Kumitat Permanenti dwar il-Katina ta' l-Ikel u s-Saħħa ta' l-Annimali bir-riżultati tat-testijiet u l-miżuri applikati skond il-paragrafi 1 sa 4.
6. L-awtorità kompetenti tista', wara l-konferma tal-virus HPAI fil-majjali jew f'kull mammiferu ieħor fi kwalunkwe stabbiliment, tagħmel sorveljanza biex tidentifika u tapplika miżuri biex trażżan tixrid ulterjuri ta' l-HPAI fi speċi oħrajn.
L-Artikolu 29
Ripopolazzjoni ta' l-istabbilimenti
1. L-Istati Membru għandhom jiżguraw li l-paragrafi 2 sa 5 ta' dan l-Artikolu huma osservati, wara l-applikazzjoni tal-miżuri previsti mill-Artikolu 7.
2. Ir-ripopolazzjoni ta' stabbilimenti kummerċjali ta' tjur ta' l-irziezet m'għandux isir għall-perjodu ta' 21 jum wara d-data tat-tlestija tat-tindif u d-diżinfettar finali skond l-istruzzjonijiet mogħtija mill-veterinarju uffiċjali.
3. Il-miżuri li ġejjin għandhom jitwettqu matul perjodu ta' 21 jum wara d-data tar-ripopolazzjoni ta' l-istabbilimenti kummerċjali tat-tjur ta' l-irziezet:
(a) |
it-tjur ta' l-irziezet għandu jsirilhom għallinqas eżami kliniku wieħed magħmul mill-veterinarju uffiċjali. L-eżami kliniku, jew jekk isir iktar minn wieħed, l-eżami kliniku finali, isir kemm jista' jkun qrib it-tmiem tal-perjodu ta' 21 jum imsemmi aktar 'il fuq; |
(b) |
it-testijiet tal-laboratorju jsiru skond l-istruzzjonijiet ta' l-awtorità kompetenti; |
(ċ) |
tjur ta' l-irziezet li jmutu matul il-fażi ta' ripopolazzjoni jiġu ttestjati skond l-istruzzjonijiet ta' l-awtorità kompetenti; |
(d) |
kull persuna li tidħol fi jew toħroġ minn stabbiliment kummerċjali tat-tjur ta' l-irziezet għandha tosserva miżuri xierqa ta' bijosigurtà maħsuba biex irażżnu t-tixrid ta' l-influwenza tat-tjur; |
(e) |
matul il-fażi ta' ripopolazzjoni l-ebda tjur ta' l-irziezet m'għandhom joħorġu mill-istabbiliment kummerċjali tat-tjur ta' l-irziezet mingħajr l-awtorizzazzjoni ta' l-awtorità kompetenti; |
(f) |
is-sid għandu jżomm dokumentazzjoni fuq id-data tal-produzzjoni, inkluża data dwar il-mard u l-mortalità, li trid tkun aġġornata regolarment; |
(g) |
kull tibdil sinifikanti fid-data tal-produzzjoni, kif imsemmi fil-punt (f), u anormalitajiet oħrajn għandhom ikunu rrappurtati minnufih lill-awtorità kompetenti. |
4. Fuq il-bażi ta' valutazzjoni tar-riskju, l-awtorità kompetenti tista' tordna li l-proċeduri previsti fil-paragrafu 3 jiġu applikati fi stabbilimenti barra dawk l-istabbilimenti kummerċjali tat-tjur ta' l-irziezet jew fuq speċi oħrajn fi stabbiliment kummerċjali tat-tjur ta' l-irziezet.
5. Ir-ripopolazzjoni tat-tjur ta' l-irziezet fi stabbilimenti li kellhom kuntatt għandha ssir skond l-istruzzjonijiet ta' l-awtorità kompetenti bbażati fuq valutazzjoni tar-riskju.
L-Artikolu 30
Validità
Din id-Deċiżjoni għandha tapplika sat-30 ta' Ġunju 2007.
L-Artikolu 31
Destinatarji
Din id-Deċiżjoni hija indirizzata lill-Istati Membri.
Magħmul fi Brussell, nhar l-14 ta' Ġunju 2006.
Għall-Kummissjoni
Markos KYPRIANOU
Membru tal-Kummissjoni
(1) ĠU L 10, 14.1.2006, p. 16.
(2) ĠU L 167, 22.6.1992, p. 1. Direttiva kif emendata l-aħħar mill-Att ta' Adeżjoni ta' l-2003.
(3) ĠU L 139, 30.4.2004, p. 55. Verżjoni kkoreġuta ĠU L 226, 25.6.2004, p. 22.
(4) ĠU L 139, 30.4.2004, p. 1. Verżjoni kkoreġuta ĠU L 226, 25.6.2004, p. 3.
(5) ĠU L 273, 10.10.2002, p. 1.
(6) ĠU L 18, 23.1.2003, p. 11.
(7) ĠU L 340, 31.12.1993, p. 21. Direttiva kif emendata l-aħħar bir-Regolament (KE) Nru 1/2005 (ĠU L 3, 5.1.2005, p. 1).