6.10.2006   

MT

Il-Ġurnal Uffiċjali ta’ l-Unjoni Ewropea

62

REGOLAMENT TAL-KUMMISSJONI (KE) Nru 79/2005

tad-19 ta' Jannar 2005

l-implimentazzjoni tar-Regolament (KE) Nru 1774/2002 tal-Parlament Ewropew u tal-Kunsill dwar l-użu tal-ħalib, ta' prodotti li huma bbażati fuq il-ħalib u prodotti derivati mill-ħalib, li jaqgħu taħt id-definizzjoni ta’ materjal ta’ Kategorija 3 f’dak ir-Regolament

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi il-Komunità Ewropea,

Wara li kkundsidrat ir-Regolament (KE) Nru 1774/2002 tal-Parlament Ewropew u tal-Kunsill tat-3 ta’ Ottubru 2002 li jistabbilixxu regoli dwar is-saħħa li jikkonċernaw prodotti sekondarji mill-annimali li mhumiex maħsuba għall-konsum mill-bniedem (1), u partikolarment l-Artikolu 6 (2) (i) tiegħu,

Billi:

(1)

Ir-Regolament (KE) Nru 1774/2002 jistipula r-regoli tas-saħħa tal-pubbliku u ta’ l-annimali għall-ġbir, trasport, ħażna, immaniġġjar, ipproċessar u użu jew rimi ta’ prodotti sekondarji minn annimali sabiex ikun hemm prevenzjoni ta’ riskju għas-saħħa pubblika u ta’ l-annimali li jirriżulta minn dawk il-prodotti.

(2)

Ir-Regolament (KE) Nru 1774/2002 jistipula regoli għall-użu ta’ ċerti prodotti sekondarji mill-annimali li huma derivati mill-produzzjoni ta’ prodotti maħsuba għall-konsum mill-bniedem u oġġetti ta’ l-ikel li kienu jeżistu qabel li oriġinaw mill-annimali, li jaqgħu taħt id-definizzjoni ta’ materjali ta’ Kategorija 3 f’dak ir-Regolament, inklużi l-ħalib u l-prodotti bbażati fuq il-ħalib li m’għadhomx aktar maħsuba għall-konsum mill-bniedem. Ir-Regolament (KE) Nru 1774/2004 jistipola wkoll għall-possibiltà li jintuża materjal ta’ Kategorija 3 b’modi oħra, skond il-proċedura stabbilita f’dak ir-Regolament u wara konsultazzjoni mal-kumitat xjentifiku apposta.

(3)

Skond l-oppinjonijiet tal-Kumitat ta’ Direzzjoni Xjentifiku ta’ l-1996, l-1999 u l-2000, m’hemm ebda evidenza li l-ħalib jittrażmetti l-Enkefalopatija Bovina Sponġiformi u kull riskju mill-ħalib jista’ jitqies bħala negliġibbli. Fir-rapport tal-15 ta’ Marzu 2001 dwar kif jinsabu l-affarijiet, il-Grupp ad hoc TSE/BSE ddefenda dak il-parir

(4)

A bażi ta’ dawk l-opinjonijiet, il-ħalib, prodotti bbażati fuq il-ħalib u l-kolostru huma derogati mill-projbizzjoni dwar l-għalf bi proteina dderivata mill-annimali lill-annimali ta’ l-irziezet, li jinżammu għat-tismin jew għat-trobbija għall-produzzjoni ta' l-ikel, skond ir-Regolament (KE) Nru 999/2001 tal-Parlament Ewropew u tal-Kunsill tat-22 ta' Mejju 2001 li jistabilixxi regoli għall-prevenzjoni, l-kontroll u l-eradikazzjoni ta' ċerti enkefalopatiji sponġiformi trażmissibbli (2)

(5)

Ir-Regolament (KE) Nru 1774/2002 ma japplikax għall-ħalib fi stat likwidu u kolostru li jkunu ntremew jew ġew użati fir-razzett ta’ provenjenza. Dak ir-Regolament jippermetti wkoll l-applikazzjoni lir-raba ta’ ħalib u kolostru bħala fertilizzant jew bħala mezz li jtejjeb il-kwalità tal-ħamrija, jekk l-awtorità kompetenti ma tikkunsidrax li dawn jippreżentaw riskju ta’ tixrid ta’ xi mard serju trażmissibli, billi l-annimali ta’ l-irziezet jistgħu jkollhom aċċess għal din l-art u għalhekk jistgħu jiġu esposti għal tali riskju

(6)

Taħt ir-Regolament (KE) Nru 1774/2002, materjal ta’ Kategorija 3 għandu jintuża skond kundizzjonijiet stretti u l-għalf ta’ tali materjal lill-annimali ta’ l-irziezet huwa permess biss wara l-ipproċessar f'impjant ta’ l-ipproċessar ta’ Kategorija 3 approvat.

(7)

Prodotti sekondarji mill-annimali, derivati mill-produzzjoni ta' prodotti tal-ħalib li huma destinati għall-konsum mill-bniedem u oġġetti ta’ l-ikel li qabel kienu prodotti tal-ħalib huma ġeneralment prodotti fi stabbilimenti approvati skond id-Direttiva tal-Kunsill 92/46/KEE tas-16 ta’ Ġunju 1992 li tistabbilixxi r-regoli tas-saħħa għall-produzzjoni u tpoġġija fis-suq ta’ ħalib nej, ħalib li huwa ttrattat bis-sħana u prodotti bbażati fuq il-ħalib (3). Prodotti tal-ħalib li huma lesti għall-konsum huma ġeneralment imgeżwrin u, għalhekk, il-possibbiltà li jkun hemm kontaminazzjoni sussegwenti tal-prodott hija minima.

(8)

Il-Kummissjoni għandha tfittex il-parir ta’ l-Awtorità Ewropea dwar is-Sigurtà ta’ l-Ikel dwar il-possibiltà li l-annimali ta’ l-irziezet jiġu magħlfa, skond il-kundizzjonijiet meħtieġa sabiex ikunu mminimizzati r-riskji, ħalib lest għall-konsum, prodotti bbażati fuq il-ħalib u prodotti derivati mill-ħalib, li jaqgħu taħt id-definizzjoni ta’ materjali ta’ Kategorija 3 fir-Regolament (KE) Nru 1774/2002, (il-prodotti), mingħajr aktar trattamenti.

(9)

Waqt li dak il-parir ikun pendenti u fid-dawl ta’ l-opinjonijiet xjentifiċi attwali u tal-Kumitat Xjentifiku dwar is-Saħħa ta’ l-Annimali u r-Rapport dwar is-Sigurtà ta’ l-Annimal dwar l-istrateġija għat-tilqim f’emerġenza kontra il-marda ta’ l-ilsien u d-dwiefer fl-1999, jixraq li jiġu stabbiliti, fuq bażi proviżorja, miżuri speċifiċi għall-ġbir, it-trasportazzjoni, l-ipproċessar, u l-użu tal-prodotti.

(10)

Sistemi ta’ kontroll xierqa għandhom jiddaħħlu fis-seħħ fl-Istati Membri sabiex tkun ikkontrollata l-konformità ma' dan ir-Regolament u sabiex tittieħed azzjoni adattata fin-nuqqas ta’ din il-konformità. L-Istati Membri għandhom ukoll jieħdu in konsiderazzjoni l-assessjar tar-riskji tagħhom fl-okkorrenza ta' l-aħjar jew l-agħar xenarju li trid issir bħala preparazzjoni tal-pjanijiet ta’ kontinġenza tagħhom għal mard epiżotiku, meta jiġi deċiż in-numru ta’ holdings reġistrati li jistgħu jkunu awtorizzati li jużaw il-prodotti konċernati.

(11)

Il-miżuri stipulati f’dan ir-Regolament jikkonformaw ma’ l-opinjoni tal-Kumitat Permanenti fuq il-Katina ta’ l-Ikel u s-Saħħa ta’ l-Annimal,

ADOTTAT DAN IR-REGOLAMENT:

Artikolu 1

Awtorizzazzjoni ġenerali mill-Istati Membri

L-Istati Membri għandhom jawtorizzaw il-ġbir, it-trasportazzjoni, l-ipproċessar, l-użu u l-ħażna ta’ ħalib, prodotti bbażati fuq il-ħalib u ta’ prodotti derivati mill-ħalib, li jaqgħu taħt id-definizzjoni ta’ materjali ta’ Kategorija 3, kif imsemmija fl-Artikoli 6(1)(e), 6(1)(f) u 6(1)(g) tar-Regolament (KE) Nru 1774/2002, li ma ġewx ipproċessati skond il-Kapitolu V ta’ l-Anness VII ta’ dak ir-Regolament (il-prodotti), bil-kundizzjoni li dawn l-attivitajiet u prodotti huma konformi mar-rekwiżiti stipulati f’dan ir-Regolament.

Artikolu 2

L-użu bħala għalf ta’ prodotti u xorrox pproċessati u ta’ prodotti mhux ipproċessati

1.   Il-prodotti pproċessati u x-xorrox, kif imsemmija fl-Anness I, jistgħu jintużaw bħala għalf skond il-ħtiġijiet stabbiliti f’dak l-Anness.

2.   Prodotti mhux ipproċessati u prodotti oħra, kif imsemmija fl-Anness II, jistgħu jintużaw bħala għalf skond ir-rekwiżiti stabbiliti f’dak l-Anness.

Artikolu 3

Il-ġbir, it-trasportazzjoni u l-ħażna

1.   Il-prodotti għandhom jinġabru, jiġu ttrasportati u identifikati skond ir-rekwiżiti stabbiliti fl-Anness II tar-Regolament (KE) Nru 1774/2002.

Iżda, l-ewwel subparagrafu ma japplikax għall-operaturi ta’ stabbilimenti ta’ l-ipproċessar tal-ħalib approvati skond l-Artikolu 10 tad-Direttiva 92/46/KEE meta jsir il-ġbir u r-ritorn minn u lejn l-istabbilimenti tagħhom ta’ prodotti li preċedentament kienu kkunsinjaw lill-klijenti tagħhom.

2.   Il-ħażna tal-prodotti għandha ssir f’temperatura xierqa sabiex ikun evitat kwalunkwe riskju għas-saħħa pubblika jew ta’ l-annimali, jew:

a)

f’impjant apposta ddedikat għall-ħażna approvat għal dak il-għan skond l-Artikolu 11 tar-Regolament (KE) Nru 1774/2002; jew

b)

f’żona separata ddedikata apposta għall-ħażna fi stabbiliment approvat skond l-Arikolu 10 tad-Direttiva 92/46/KEE.

3.   Il-kampjuni tal-prodotti finali meħudin waqt il-perjodu tal-ħażna jew fiż-żmien meta ġew irtirati mill-ħażna, għandhom ta’ l-inqas jikkonformaw ma’ l-istandards mikrobijoloġiċi stipulati fil-Kapitolu I (D) (10) ta’ l-Anness VII tar-Regolament (KE) Nru 1774/2002.

Artikolu 4

L-awtorizzazzjoni, ir-reġistrazzjoni u l-miżuri ta’ kontroll

1.   L-istabbilimenti ta’ l-ipproċessar tal-ħalib approvati skond l-Artikolu 10 tad-Direttiva 92/46/KEE u l-holdings, li huma awtorizzati kif stipulat fl-Annessi ta’ dan ir-Regolament, għandhom jiġu rreġistrati mill-awtoritajiet kompetenti għal dak il-għan.

2.   L-awtorità kompetenti għandha tieħu l-miżuri meħtieġa sabiex tikkontrolla l-konformità mill-operaturi ta’ stabbilimenti u holdings reġistrati mar-rekwiżiti stipulati f’dan ir-Regolament.

Artikolu 5

Is-sospensjoni ta’ awtorizzazzjoni u reġistrazzjoni fil-każ ta’ nuqqas ta’ konformità

Kull awtorizzazzjoni u reġistrazzjoni maħruġa mill-awtoritajiet kompetenti b’konformità ma’ dan ir-Regolament għandha tiġi sospiża minnufih jekk il-kundizzjonijiet ta’ dan ir-Regolament mhumiex aktar osservati.

L-awtorizzazzjoni u reġistrazzjoni jistgħu jingħataw lura biss wara li jkunu ttieħdu miżuri korrettivi xierqa kif indikat mill-awtorità kompetenti.

Artikolu 6

Analiżi

Il-Kummissjoni għandha tanalizza d-dispożizzjonijiet ta’ dan ir-Regolament u tadattahom kif huwa xieraq fid-dawl ta’ l-opinjoni ta’ l-Awtorita Ewropea dwar is-Sigurtà ta’ l-Ikel.

Artikolu 7

Dħul fis-seħħ

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu fil-Ġurnal Uffiċjali ta’ l-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, nhar id-19 ta' Jannar 2005.

Għall-Kummissjoni

Markos KYPRIANOU

Membru tal-Kummissjoni Ewropea

(1)  ĠU L 273, 10.10.2002, pġ. 1. Regolament kif l-aħħar emendat bir-Regolament tal-Kummissjoni (KE) Nru 668/2004 (ĠU L 112, 19.4.2004, p. 1).

(2)  ĠU L 147, 31.5.2001, pġ. 1; Regolament kif l-aħħar emendat bir-Regolament (KE) Nru 1492/2004 (ĠU L 274, 24.8.2004, pġ. 12).

(3)  ĠU L 268, 14.9.1992, pġ. 1. Direttiva kif l-aħħar emendata bir-Regolament (KE) Nru 806/2003 (ĠU L 122, 16.5.2003, pġ. 1).

ANNESS I

UŻU IEĦOR TA’ PRODOTTI PPROĊESSATI U XORROX, KIF STIPULAT FL-ARTIKOLU 6 (2)(i) TAR-REGOLAMENT (KE) Nru 1774/2002

KAPITOLU I

A.   Il-prodotti kkonċernati:

Il-prodotti, inkluż l-ilma li jintuża għat-tindif li ġie in kuntatt mal-ħalib mhux ipproċessat u/jew ma’ l-istess ħalib li kien ġie ppasturizzat skond il-Kapitolu I, A, 4(a) ta’ l-Anness Ċ tad-Direttiva 92/46/KEE, li ġew sottomessi għal ta’ l-inqas wieħed minn dawn it-trattamenti:

a)

“temperatura għolja ħafna” (UHT) kif stipulat fil-Kapitolu I, A, 4(b) ta’ l-Anness Ċ tad-Direttiva 92/46/KEE;

b)

sterilizzazzjoni fejn jew valur Fc ugwali għal 3 jew ogħla huwa miksub, jew li tkun saret skond il-Kapitolu I A, 4(c) ta’ l-Anness C tad-Direttiva 92/46/KEE f’temperatura ta’ mill-inqas 115°Ċ għal 20 minuta jew ekwivalenti;

ċ)

pasturizzazzjoni skond il-Kapitolu I, A, 4(a) jew sterilizzazzjoni, ħlief dik imsemmija fil-paragrafu (b) ta’ din it-Taqsima, skond il-Kapitolu I, A, 4(c) ma’ l-Anness C tad-Direttiva 92/46/KEE, segwita minn:

i)

fil-każ ta’ ħalib imnixxef jew prodotti ta’ ħalib imnixxef, jew fil-proċess li jitnixxef; jew

ii)

fil-każ ta’ prodott ta’ ħalib aċidifikat, b’liema proċess il-pH jitnaqqas u jinżamm taħt il-valur ta’ 6 għal ta’ l-inqas siegħa.

B.   L-użu

Il-prodotti, imsemmija f’Taqsima A, jistgħu jintużaw bħala materjal għall-għalf fl-Istati Membri kkonċernati, u jistgħu jintużaw f’żoni transfruntieri fejn l-Istati Membri kkonċernati għandhom ftehim reċiproku għal dak il-għan. L-istabbiliment ikkonċernat irid jaċċerta li dawk il-prodotti jkunu rintraċċabbli.

KAPITOLU II

A.   Il-Prodotti kkonċernati:

1.

Il-prodotti, inkluż l-ilma li jintuża għat-tindif li ġie in kuntatt ma’ ħalib li kien ġie ppasturizzat biss skond il-Kapitolu I, A, 4(a) ta’ l-Anness C tad-Direttiva 92/46/KEE, u

2.

Ix-xorrox li jinħadem minn prodotti bbażati fuq ħalib li ma jkunx ġie ttrattat bis-sħana, li jrid jinġabar mill-inqas 16-il siegħa wara li jagħqad il-ħalib u fejn il-pH irid jiġi rreġistrat bħala < 6.0 qabel ma jintbagħat direttament lill-holdings awtorizzati ta’ l-annimali.

B.   L-użu

Il-prodotti u x-xorrox, imsemmija f’Taqsima A, jistgħu jintużaw bħala materjal ta’ għalf fl-Istati Membri kkonċernati u jkunu suġġetti għall-kundizzjonijiet segwenti:

a)

li jintbagħtu minn stabbiliment approvat skond l-Artikolu 10 tad-Direttiva 92/46/KEE, li jiggarantixxi li dawk il-proddotti jkunu rintraċċabbli; u

b)

li jintbagħtu lil numru limitat ta' holdings awtorizzati ta’ l-annimali, li huwa ffissat fuq il-bażi ta’ l-assessjar tar-riskji fl-okkorrenza ta’ l-aħjar jew l-agħar xenarju mwettaq mill-Istati Membri kkonċernati bħala preparament għall-pjanijiet ta’ kontinġenza f’każ ta’ mard epiżotiku, partikolarment il-marda ta’ l-ilsien u d-dwiefer.

ANNESS II

UŻI OĦRAJN TA’ PRODOTTI MHUX IPPROĊESSATI U TA’ PRODOTTI OĦRA

A.   Il-prodotti kkonċernati:

Prodotti primi, inkluż l-ilma li jintuża għat-tindif li jkun ġie in kuntatt ma’ ħalib mhux ipproċessat, u prodotti oħrajn li għalihom it-trattamenti msemmija fil-Kapitoli I u II ta’ l-Anness I ma jistgħux ikunu aċċertati.

B.   L-użu

Il-prodotti msemmija f’Taqsima A, jistgħu jintużaw bħala materjal ta’ għalf fl-Istati Membri kkonċernati u jkunu soġġetti għall-kundizzjonijiet segwenti:

a)

li jintbagħatu minn stabiliment approvat skond l-Artikolu 10 tad-Direttiva 92/46/KEE, li jigarantixxi li dawk il-proddotti jkunu rintraċċabbli; u

b)

li jintbagħatu lil numru limitat ta' holdings ta’ annimali, awtorizzati, li huwa ffissat fuq il-bażi ta’ l-assessjar ta’ riskju għall-aħjar jew l-agħar xenarju mwettqa mill-Istati Membri kkonċernati bħala preparament għall-pjanijiet ta’ kontinġenza f’każ ta’ mard epiżotiku, partikularment il-marda ta’ l-ilsien u d-dwiefer, u bil-kundizzjoni li l-annimali preżenti fil-holdings awtorizzati biss jistgħu jiġu trasferiti:

i)

jew direttament lejn biċċerija li tinsab fl-istess Stat Membru; jew inkella

ii)

f’holding oħra fl-istess Stat Membru, li għaliha l-awtorità kompetenti tiggarantixxi li l-annimali li huma suxxettibbli għall-marda ta’ l-ilsien u d-dwiefer jistgħu jiġu trasferiti mill-holding biss:

a)

jew skond il-punt (i) jew inkella

b)

jekk l-annimali jkunu ntbagħtu lejn holding fejn ma jagħlfux bil-prodotti msemmija f’dan l-Anness, wara li jiskadi perjodu ta’ waqfien ta’ 21 jum mill-introduzzjoni ta’ l-annimali.