Ir-Regolament tal-Kummissjoni (KE) numru 836/2004

tat-28 ta' April 2004

li jippreskrivi l-miżuri transizzjonali li għandhom ikunu applikati minn Ċipru rigward il-coenurus cerebralis (scrapie)

(Test b'rilevanza għaż-ŻEE)

IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 999/2001 tal-Parlament Ewropew u tal-Kunsill tat-22 ta' Mejju 2001 li tippreskrivi regoli għall-prevenzjoni, kontroll u qerda ta' ċerti enċifalopatiji sponġiformi li jittieħdu [1], u b'mod partikolari l-Artikolu 12(4) u 13 (6) tiegħu,

Wara li kkunsidrat l-Att ta' Adeżjoni ta' l-2003 tar-Repubblika Ċeka, l-Estonja, Ċipru, il-Latvja, il-Litwanja, l-Ungerija, Malta, il-Polonja, l-Islovenja u l-Islovakkja ma' l-Unjoni Ewropea, u l-aġġustamenti għat-trattati li fuqhom hija mwaqqfa l-Unjoni Ewropea, u b'mod partikolari l-Artikolu 42 tiegħu,

Billi:

(1) Ir-Regolament (KE) Nru 999/2001 jinkludi disposizzjonijiet dwar il-qerda taċ-coenurus cerebralis (scrapie) f'annimali ovini u kaprini u l-metodi ta' teknika dijanjostiċi li għandhom jintużaw għall-konferma tal-marda.

(2) Fid-29 ta' Jannar 2004, Ċipru applika għall-għotja ta' miżuri transizzjonali in relazzjoni mal-miżuri ta' qerda f'azjendi infettati biċ-coenurus cerebralis (scrapie). Dawn il-miżuri huma meħtieġa in vista tal-livell għoli ta' coenurus cerebralis (scrapie) fil-populazzjoni ovina u kaprina, il-livell baxx ta' reżistenza ddeterminata ġenetikament fil-populazzjoni ovina, u n-natura tal-biedja f'Ċipru. L-applikazzjoni titlob ukoll miżuri transizzjonali dwar il-metodi ta' teknika dijanjostiċi għaċ-coenurus cerebralis (scrapie), in vista tal-kapaċita ta' laboratorju limitata.

(3) Ċipru impenja ruħu li jipprovdi pjan ta' azzjoni biex jindirizza n-nuqqas ta' tnissil ta' annimali ovini ta' ġenotip adattat, jgħolli l-livell ta' reżistenza fil-populazzjoni ovina u jipprovdi annimali ta' sostituzzjoni f'azjendi infettati. Dan il-pjan għandu jkun issottomess sa l-1 ta' Ġunju 2004 bħala parti mill-applikazzjoni tiegħu għall-finanzjament Komunitarju għal miżuri speċifiċi veterinarji taħt id-disposizzjonijiet tad-Deċiżjoni tal-Kunsill Nru 90/424/KEE dwar in-nefqa fil-qasam vetrinarju [2].

(4) Il-miżuri transizzjonali mogħtija lil Ċipru għandhom jippermettu li suġġetti għal eżami veterinarju, ċerti annimali ovini u kaprini minn azjendi infettati għandhom jitbiċċru għall-konsum uman, li ma jistgħux jitbiċċru għall-konsum uman fl-Istati Membri l-oħra. Huwa mixtieq li jingħata lil Stati Membri u lil pajjiżi terzi bl-istess mod, l-istess garanziji ta' saħħa. Għalhekk matul il-perjodu ta' applikazzjoni ta' dawn il-miżuri transizzjonali, u filwaqt li jitqiesu miżuri ta' kontroll, l-esportazzjoni ta' prodotti dderivati minn annimali ovini u kaprini lejn Stati Membri oħra u għal pajjiżi terzi għandha tkun ipprojbita.

(5) Il-miżuri mogħtija lil Ċipru biex jadatta l-implimentazzjoni tar-Regolament (KE) Nru 999/2001 għal perjodu transizzjonali għandhom ikunu rriveduti kemm jista' jkun malajr u għandhom f'kull każ u skond l-Att ta' Adeżjoni jkunu limitati għal perjodu massimu ta' tliet snin.

(6) Il-miżuri li tipprovdi għalihom din id-Deċiżjoni huma skond l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali,

ADOTTAT DAN IR-REGOLAMENT:

Artikolu 1

L-awtorità kompetenti f'Ċipru għandha timplimenta d-disposizzjonijiet tar-Regolament (KE) Nru 999/2001 skond id-disposizzjonijiet ta' din id-Deċiżjoni, sat-30 ta' April 2007 l-iktar tard.

Artikolu 2

Permezz ta' deroga mill-Artikolu 12.2 tar-Regolament (KE) Nru 999/2001, wara li perjodu ta' tnax-il xahar ikun skada wara l-konferma ta' l-ewwel każ ta' coenurus cerebralis (scrapie) f'azjenda, li jintbagħtu l-moħħ u tessuti oħra għal eżami ta' laboratorju ta' każijiet issuspettati wara dak il-perjodu jistgħu jkunu limitati għall-kampjun bl-addoċċ annwali ta' 10 % ta' annimali ovini u kaprini ssuspettati li huma infettati bit-TSE.

Artikolu 3

1. Permezz ta' deroga mid-disposizzjonijiet ta' l-Anness VII mar-Regolament (KE) Nru 999/2001:

(a) l-eċċezzjoni li jipprovdi għaliha l-paragrafu 2, il-punt (b) (ii) għandha tkun estiża għall-annimali kaprini u annimali ovini taħt l-età ta' sitt xhur li huma maħsuba biss għall-biċċerija;

(b) il-kondizzjonijiet biex ikunu introdotti annimali kaprini li jipprovdi għalihom il-paragrafu 3.1, il-punt (c) f'azjenda fejn kienet saret distruzzjoni skond il-punt 2 (b) (i) jew (ii) m'għandhomx japplikaw;

(ċ) Fil-punt 5 ta' l-Anness VII mar-Regolament (KE) Nru 999/2001, barra mill-punti (a) sa (c), il-punt (d) li ġej għandu japplika:

"(d) madankollu, fil-każ ta' annimali taħt l-eta ta' sitt xhur, kemm annimali ovini ta' ġenotip mhux magħruf kif ukoll annimali kaprini jistgħu jmorru direttament għall-qatla għall-konsum uman f'biċċerija fit-territorju ta' Ċipru, taħt il-kondizzjonijiet li ġejjin:

(i) l-annimali jkunu eżaminati minn uffiċjal veterinarju fl-azjenda ta' oriġini li jikkonferma l-assenza ta' kull sintomi kliniċi ta' coenurus cerebralis, qabel id-dispaċċ lejn il-biċċerija;

(ii) ir-ras intiera u l-organi tal-ħofor (kavitajiet) toraċiċi u addominali ta' annimali tali għandhom jintremew skond l-Artikolu 4(2) (a) (b) u (c) tar-Regolament (KE) Nru 1774/2002."

(d) Fil-punt 6 ta' l-Anness VII mar-Regolament (KE) Nru 999/2001, il-punt (c) m'għandux japplika.

2. Permezz ta' deroga mill-punt 3.2 tal-Kapitolu C ta' l-Anness X mar-Regolament (KE) Nru 999/2001, li ġej għandu japplika:

"3.2 Ittestjar tal-laboratorju għall-preżenza taċ-coenurus cerebralis f'annimali ovini u kaprini

(a) Każijiet issuspettati

Tessuti minn annimali ovini u kaprini mibgħuta għal ittestjar ta' laboratorju skond id-disposizzjonijiet ta' l-Artikolu 12(2) għandhom ikunu suġġetti għal eżami istopatoloġiku kif preskritt fl-aħħar versjoni tal-Manual, ħlief fejn il-materjal ikun awtolisizzat. Fejn ir-riżultat tat-test istopatoloġiku jkun inkonklussiv jew negattiv jew fejn il-materjali jkun awtolisizzat, it-tessuti għandhom ikunu ssuġġettati għal eżami b'immunoċitokimika jew immunoblotting, kif preskritt fil-Manual, jew għal test rapidu. Jekk ir-riżultat ta' wieħed minn dawk l-eżamijiet ikun pożittiv, l-annimal għandu jitqies bħala każ ta' coenurus cerebralis pożittiv.

(b) Immonitorjar taċ-coenurus cerebralis (scrapie)

Tessuti minn annimali ovini u kaprini mibgħuta għal ittestjar ta' laboratorju skond id-disposizzjonijiet ta' l-Anness III, il-Kapitolu A, it-Taqsima II (Immonitorjar ta' annimali ovini u kaprini) għandhom ikunu eżaminati b'test rapidu.

Meta r-riżultat tat-test rapidu jkun inkonklussiv, il-brainstem għandu jintbagħat mill-ewwel għand laboratorju uffiċjali għal eżami ta' konferma b'immunoċitokimika jew immunoblotting, kif jirreferi għalih l-(a).

Jekk ir-riżultat ta' wieħed minn dawk l-eżamijiet ikun pożittiv, l-annimal għandu jitqies bħala każ ta' coenurus cerebralis (scrapie) pożittiv."

Artikolu 4

Id-dispaċċ minn Ċipru lejn Stati Membri oħra jew lejn pajjiżi terzi tal-prodotti li ġejjin maħsuba għall-konsum uman minn annimali ovini u kaprini huwa pprojbit:

(i) laħam frisk kif iddefinit bid-Direttiva 64/433/KEE [3]

(ii) laħam ikkapuljat u preparazzjonijiet tal-laħam kif iddefiniti bid-Direttiva 94/65/KE [4]

(iii) prodotti tal-laħam kif iddefiniti bid-Direttiva 77/99/KEE [5]

Artikolu 5

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali ta' l-Unjoni Ewropea.

Huwa għandu japplika suġġett għal u mid-data tad-dħul fis-seħħ tat-Trattat ta' Adeżjoni tar-Repubblika Ċeka, l-Estonja, Ċipru, il-Latvja, il-Litwanja, l-Ungerija, Malta, il-Polonja, l-Islovenja u l-Islovakkja.

Huwa għandu japplika mit-30 ta' April 2007.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-28 ta' April 2004.

Għall-Kummissjoni

David Byrne

Membru tal-Kummissjoni

[1] ĠU L 147, tal-31.5.1, pġ. 1. Regolament kif l-aħħar emendat bir-Regolament tal-Kummissjoni (KE) Nru 2245/2003 (ĠU L 333, 20.12.3, pġ. 28).

[2] ĠU L 224, tat-18.8.1990, pġ. 19. Deċiżjoni kif l-aħħar emendata bir-Regolament tal-Kunsill (KE) Nru 806/2003 (ĠU L 122, tas-16.5.2003, pġ. 1).

[3] ĠU C 121, tad-29.7.1964, pġ. 2012/64.

[4] ĠU L 368, tal-31.12.94, pġ. 10.

[5] ĠU L 26, tal-31.1.77, pġ. 85.

--------------------------------------------------