Id-Direttiva 2003/52/KE tal-Parlament Ewropew u tal-Kunsill

tat-18 ta’ ġunju 2003

li temenda d-Direttiva 95/2/KE fir-rigward tal-kondizzjonijiet għal użu għal adittiv ta’ l-ikel E 425 konjac

(Test b’rilevanza għaż-ŻEE)

IL-PARLAMENT EWROPEW U L-KUNSILL TA’ L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b’mod partikolari l-Artikolu 95 tiegħu,

Wara li kkunsidraw il-proposta mill-Kummissjoni [1],

Wara li kkunsidraw l-opinjoni tal-Kumitat Ekonomiku u Soċjali [2],

Filwaqt li jaġixxu skond il-proċedura stabbilita fl-Artikolu 251 tat-Trattat [3],

Billi:

(1) Id-Direttiva 95/2K/KE tal-Parlament Ewropew u tal-Kunsill ta’ l-20 ta’ Frar 1995 dwar additivi ta’ l-ikel barra minn koloranti u ħlewwiet [4] tawtorizza l-użu ta’ l-addittiv ta’ l-ikel E 425 konjac f’affarijiet ta’ l-ikel taħt ċerti kondizzjonijiet.

(2) Il-Kummissjoni ħadet miżuri għas-sospensjoni temporanja tat-tqegħid fis-suq ta’ tazzi żgħar tal-ġelatina li jikkontjenu E 425 konjac minħabba li nstab li huma perikolużi ladarba kkawżaw il-mewt ta’ diversi tfal u persuni anzjani f’pajjiżi terzi billi fgaw.

(3) Xi fabbrikanti ta’ tazzi żgħar tal-ġelatina jirrikonoxxu r-riskju għas-saħħa umana billi jwaħħlu twissija fuq il-pakkett ta’ l-ikel, li temfasizza r-riskju għal tfal u l-anzjani.

(4) Abbażi ta’ l-informazzjoni pprovduta mill-Istati Membri li adottaw miżuri fuq livell nazzjonali, jista’ jiġi konkluż li tazzi żgħar tal-ġelatina li jikkontjenu E 425 konjac jikkostitwixxu riskju għall-ħajja. B’żieda mal-forma u d-daqs tagħhom, il-proprjetajiet kimiċi u fiżiċi ta’ konjac huma l-kawża għal tazzi żgħar tal-ġelatina li jikkostitwixxu riskju għas-saħħa umana.

(5) Fil-każ preżenti, twissija permezz ta’ l-ittikkettjar mhijiex suffiċjenti għall-protezzjoni tas-saħħa umana, speċjalment fir-rigward ta’ tfal.

(6) Huwa neċessarju li jiġu modifikati l-kondizzjonijiet ta’ użu għal E 425 konjac fir-rigward ta’ l-użu tiegħu f’ħellu tal-ġelatina, inklużi tazzi żgħar tal-ġelatina.

(7) Id-Direttiva 95/2/KE għandha għalhekk tiġi emendata kif suppost,

ADOTTAW DIN ID-DIRETTIVA:

Artikolu 1

Fl-Anness IV mad-Direttiva 95/2/KE fil-filliera għal E 425: Konjac: (i) gomma tal-Konjac (ii) glukomannane tal-Konjac it-test "Affarijiet ta’ l-ikel in ġenerali (ħlief dawk imsemmija fl-Artikolu 2(3))" għandu jiġi sostitwit bit-test "Affarijiet ta’ l-ikel in ġenerali (ħlief dawk imsemmija fl-Artikolu 2(3) u ħelu tal-ġelatina inklużi tazzi żgħar tal-ġelatina)".

Artikolu 2

L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattvii neċessarji sabiex jikkonformaw ma’ din id-Direttiva qabel is-17 ta’ Jannar 2004. Għandhom minnufih jinfurmaw lill-Kummissjoni bihom.

Meta l-Istati Membri jadottaw dawk il-miżuri, għandujkollhom referenza għal din id-Direttiva jew ikollhom magħhom din ir-referenza fl-okkażjoni tal-pubblikazzjon uffiċjali tagħhom. L-Istati Membri għandhom jiddeterminaw kif għandha ssir din ir-referenza.

Artikolu 3

Din id-Direttiva għandha tidħol fis-seħħ fil-jum tal-pubblikazzjoni tagħha fil-Ġurnal Uffiċjali ta’ l-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmula fil-Lussemburgu, fit-18 ta’ Ġunju 2003.

Għall-Parlament Ewropew

Il-President

P. Cox

Għall-Kunsill

Il-President

G. Drys

[1] (1) ĠU C 331 E, tal-31.12.2002, p. 124.

[2] ĠU C 85, tat-8.4.2003, p. 39.

[3] L-Opinjoni tal-Parlament Ewropew tal-11 ta’ Frar 2003 (għadha mhux ippubblikata fil-urnal Uffiċjali), u d-Deċiżjoni tal-Kunsill tad-19 ta’ Mejju 2003.

[4] ĠU L 61, tat-18.3.1995, p. 1. Id-Direttiva kif l-aħħar emendata bid-Direttiva 2001/5/KE (ĠU L 55, ta’ l-24.2.2001, p. 59).

--------------------------------------------------