31999R1257



Official Journal L 160 , 26/06/1999 P. 0080 - 0102


Ir-Regolament tal-Kunsill (KE) Nru 1257/1999

tas-17 ta’ Mejju 1999

dwar is-sostenn għal żvilupp rurali mill-Fond Agrikolu Ewropew għall-Gwida u Garanzija (FAEGG) u jemenda u jħassar ċerti Regolamenti.

IL-KUNSILL TA' L-UNJONI EWROPEA,

Wara li kkunsidra t-Trattat li jwaqqaf il-Komunità Ewropea, u partikolarment l-Artikoli 36 u 37 tiegħu,

Wara li kkunsidra l-proposta mill-Kummissjoni [1],

Wara li kkunsidra l-opinjoni tal-Parlament Ewropew [2],

Wara li kkunsidra l-opinjoni tal-Kumitat Ekonomiku u Soċjali [3],

Wara li kkunsidra l-opinjoni tal-Kumitat tar-Reġjuni [4],

Wara li kkunsidra l-opinjoni tal-Qorti ta’ l-Awdituri [5],

(1) Billi politika komuni għal żvilupp rurali għandha takkumpanja u tikkumplimenta l-istrumenti l-oħra tal-politika komuni agrikola u b’hekk tikkontribwixxi għall-akkwist ta' l-oġġettivi tal-politika kif meħtieġa fl-Artikolu 33 (1) tat-Trattat;

(2) Billi, skond l-Artikolu 33 (2)(a) tat-Trattat, fit-tħaddim tal-politika komuni agrikola u l-metodi speċjali għall-applikazzjoni tagħha, għandha titqies in-natura partikolari ta' l-attività agrikola li tirriżulta mill-istruttura soċjali ta' l-agrikoltura u mid-disparitajiet strutturali u naturali bejn ir-reġjuni agrikoli;

(3) Billi, skond l-Artikolu 159 tat-Trattat, l-implimentazzjoni tal-politika komuni għandha tieħu konjizzjoni ta' l-oġġettivi meħtieġa fl-Artikoli 158 u 160 tal-politika komuni ta’ koeżjoni ekonomika u soċjali u tikkontribwixxi għat-twettiq tagħhom; billi miżuri ta’ żvilupp rurali għandhom, għalhekk, jikkontribwixxu għal din il-politika fir-reġjuni li l-iżvilupp tagħhom ikun baqa’ lura (Oġġettiv 1) u reġjuni li jiffaċċjaw diffikultajiet strutturali (Oġġettiv 2) kif definiti fir-Regolament tal-Kunsill (KE) Nru 1260/1999, tal-21 ta’ Ġunju 1999 li jipprovdu disposizzjonijiet ġenerali dwar il-Fondi Strutturali [6];

(4) Billi miżuri intenzjonati bħala sostenn għal titjib ta' strutturi agrikoli kienu ġew introdotti fil-politika komuni agrikola sa minn kmieni sa mill-1972; billi għal kważi għoxrin sena, kienu saru tentattivi ħalli l-politika strutturali agrikola tkun integrata f’kuntest ekonomiku u soċjali aktar wiesgħa fiż-żoni rurali; billi fl-1992 riforma tal-politika enfasizzat id-dimensjoni ambjentali dwar l-agrikoltura bħala l-akbar wiesgħa fl-użu ta' l-art;

(5) Billi politika rurali hija bħalissa mwettqa permezz ta’ numru ta’ strumenti kumplessi;

(6) Billi matul is-snin li ġejjin, l-agrikoltura għandha tadatta għal realtajiet ġodda u aktar tibdil fit-termini ta' l-evoluzzjoni tas-suq, politika tas-suq u regoli tal-kummerċ, it-talba u l-preferenzi tal-konsumatur u t-tkabbir li jmiss tal-Komunità; billi dawn it-tibdiliet serji jaffettwaw mhux biss is-swieq agrikoli imma wkoll ġeneralment l-ekonomiji lokali f’żoni rurali; billi politika ta’ żvilupp rurali għandha tfittex li toħloq mill-ġdid u ssaħħaħ il-kompetittività ta’ żoni rurali u, għalhekk, tikkontribwixxi għaż-żamma u l-ħolqien ta' l-impjiegi f’dawk iż-żoni;

(7) Billi dawn l-iżviluppi għandhom ikunu inkoraġġiti u sostenuti bir-ri-organizzazzjoni u s-simplifikazzjoni ta' l-istrumenti eżistenti għal żvilupp rurali;

(8) Billi ri-organizzazzjoni bħal din għandha tqis l-esperjenza akkwistata fl-applikazzjoni ta' l-istrumenti eżistenti u għalhekk tkun ibbażata fuq dawk l-istrumenti, li huma dawk li kienu ġew implimentati permezz ta' l-oġġettivi ta’ prijorità kurrenti li jippromwovu żvilupp rurali billi jitħaffef l-aġġustament ta' l-istrutturi agrikoli fil-qafas tar-riforma tal-politika komuni agrikola u tal-faċilitazzjoni ta' l-iżvilupp u aġġustamenti strutturali f’żoni rurali (Oġġettivi 5a u 5b), kif meħtieġa fir-Regolament tal-Kunsill (KEE) Nru 2052/88 ta l-24 ta’ Ġunju 1988 dwar id-doveri tal-Fondi Strutturali u l-effettività tagħhom u dwar il-koordinament ta' l-attivitajiet tagħhom bejniethom u ma' dawk ta' l-operazzjonijiet tal-Bank Ewropew għall-Investimenti u l-istrumenti finanzjarji l-oħra [7] u r-Regolament tal-Kunsill (KEE) Nru 4256/88 tad-19 ta’ Diċembru 1988 li jesiġi disposizzjonijiet għall-implimentazzjoni tar-Regolament (KEE) Nru 2052/88 f’dak li għandu x’jaqsam il-Fond Agrikolu Ewropew għall-Gwida u Garanzija (FAEGG), Sezzjoni tal-Gwida [8], u dawk introdotti bħala miżuri li jakkompanjaw il-politika komuni agrikola ta' l-1992 ta’ riforma [9] bir-Regolament tal-Kunsill (KEE) Nru 2079/92 tat-30 ta’ Ġunju 1992 li jistitwixxi skema ta’ għajnuna mill-Komunità għall-irtirar kmieni mix-xogħol tar-raba [10] u Regolament tal-Kunsill (KEE) Nru 2080/92 tat-30 ta’ Ġunju 1992 li stabbilixxa skema ta’ għajnuna mill-Komunità għal miżuri ta’ selvikoltura fl-agrikoltura [11];

(9) Billi l-qafas għal żvilupp fir-riforma tal-politika rurali għandu jkopri iż-żoni rurali kollha fil-Komunità;

(10) Billi t-tliet miżuri akkompanjanti eżistenti li kienu introdotti bir-riforma ta l-1992 tal-politika komuni agrikola (agri-ambjent, irtirar kmieni u afforestazzjoni) għandhom ikunu issuplimentati mill-iskema għal żoni anqas favoriti u għal żoni b’restrizzjonijiet ambjentali;

(11) Billi miżuri oħrajn għal żvilupp rurali għandhom jifformaw parti minn programmi ta’ żvilupp integrat għal Oġġettiv 1 u jistgħu jifformaw parti mill-programm għal reġjuni ta’ Oġġettiv 2;

(12) Billi f'żoni rurali, miżuri ta’ żvilupp rurali għandhom jakkompanjaw u jikkomplimentaw il-politika tas-suq;

(13) Billi sostenn mill-FAEGG għal żvilupp rurali għandu jkun ibbażat fuq qafas legali wieħed li jistabbilixxi miżuri eliġibbli għal sostenn, l-oġġettivi tagħhom u l-kriterja għal eliġibbiltà;

(14) Billi, ikkunsidrata d-diversità taż-żoni rurali tal-Komunità, politika għal żvilupp rurali għandha tkun skond il-prinċipju ta’ sussidjarjetà; billi għalhekk din għandha, tkun di-ċentralizzata kif possibbli u l-enfasi għandha tkun fuq il-parteċipazzjoni ta’ approċċ ta’ "ta’ taħt fuq"; billi, għalhekk, kriterji ta’ eliġibbiltà għal sostenn ta’ żvilupp rurali m’għandhomx imorru aktar milli meħtieġ ħalli jintlaħqu l-oġġettivi tal-politika ta’ żvilupp rurali;

(15) Billi konsistenza ma' strumenti oħra tal-politika komuni agrikola u ma' politiki komuni oħra tenħtieġ, b’danakollu, kriterji ta’ sostenn bażiku li jkunu meħtieġa fil-livell tal-Komunità; billi, għandhom ikunu evitati partikolarment, tgħawwiġ mhux ġustifikat tal-kompetizzjoni li tirriżulta minn miżuri ta’ żvilupp rurali;

(16) Billi, sabiex tkun assigurata flessibbiltà u tkun imħaffa l-leġislazzjoni, il-Kunsill għandu jagħti l-poteri kollha meħtieġa għall-implimentazzjoni lill-Kummissjoni bi qbil mat-tielet inċiż ta’ l-Artikolu 202 tat-Trattat;

(17) Billi l-istruttura ta' l-agrikoltura fil-Komunità hija kkaratterizzata bl-eżistenza ta’ numru kbir ta’ oqsma li għandhom nuqqas ta’ kondizzjonijiet strutturali biex jassikuraw dħul xieraq u kondizzjonijiet tal-ħajja għal bdiewa u l-familji tagħhom;

(18) Billi l-għan ta’ l-għajnuna ta’ investiment tal-Komunità huwa li jimmodernizza l-oqsma agrikoli u b’hekk itejjeb il-vijabbiltà tagħhom;

(19) Billi kondizzjonijiet fil-Komunità li jirrigwardaw l-eliġibbiltà għal għajnuna ta’ investiment għandhom ikunu mħaffa meta mqabbla ma' kondizzjonijiet eżistenti kif meħtieġa fir-Regolament tal-Kunsill (KE) Nru 950/97 tal-20 ta’ Mejju 1997 dwar it-titjib fl-effiċjenza ta' l-istrutturi agrikoli [12];

(20) Billi l-għoti ta’ benefiċċji speċifiċi lill-bdiewa żgħażagħ jistgħu jiffaċilitaw mhux biss l-istabbiliment tagħhom imma wkoll l-aġġustament strutturali ta' l-oqsma tagħhom wara l-istabbiliment inizjali tagħhom;

(21) Billi l-evoluzzjoni u l-ispeċjalizzazzjoni ta' l-agrikoltura tenħtieġ livell xieraq ta taħriġ ġenerali, tekniku u ekonomiku għal persuni involuti f'attivitajiet agrikoli u ta’ selvikultura, speċjalment f’dak li għandu x’jaqsam ma' approċċi ġodda lejn amministrazzjoni, produzzjoni u negozju;

(22) Billi sforz partikolari huwa meħtieġ ħalli jkunu mgħallma l-bdiewa u jkunu infurmati dwar metodi ta’ agrikoltura kompatibbli ma' l-ambjent;

(23) Billi irtirar kmieni mix-xogħol tal-biedja għandu jkun inkuraġġit sabiex tittejjeb il-vijabbiltà ta’ oqsma agrikoli, billi titqies l-esperjenza meħtieġa għall-implimentazzjoni tar- Regolament (KEE) Nru 2079/92;

(24) Billi sostenn għal żoni anqas iffavoriti għandu jikkontribwixxi lejn użu kontinwu ta’ art agrikola, il-manutenzjoni tal-kampanja, manutenzjoni u tħeġġiġ ta’ sistemi ta’ biedja sostenibbli;

(25) Billi żoni anqas iffavoriti għandhom ikunu kklassifikati fuq il-bażi ta’ kriterji komuni;

(26) Billi ma hemmx ħtieġa għal xi aktar klassifikazzjoni ta’ żoni anqas iffavoriti fil-livell tal-Komunità;

(27) Billi kondizzjonijiet li jikkonċernaw l-eliġibbiltà ta’ allokazzjonijiet kumpensatorji għandhom ikunu meħtieġa sabiex tkun assigurata l-effiċjenza ta’ din is-sistema ta’ sostenn u biex tassigura li l-oġġettivi tagħha jkunu milħuqa;

(28) Billi minħabba limitazzjonijiet fl-użu agrikolu fiż-żoni b’restrizzjonijiet ambjentali għandu mnejn ikun meħtieġ li sostenn jingħata lill-bdiewa biex isolvu l-problemi speċifiċi tagħhom li joriġinaw minn dawn il-limitazzjonijiet;

(29) Billi, fis-snin li ġejjin, irwol prominenti għandu jingħata lill-istrumenti ta’ agri-ambjent biex isostnu l-iżvilupp sostenibbli f’żoni rurali u jwieġbu għat-talba dejjem tiżdied mis-soċjetà għal servizzi ambjentali;

(30) Billi sostenn agri-ambjentali eżistenti permezz ta’ Regolament (KEE) Nru 2078/92 għandu jibqa’ immirat lejn miżuri ambjentali, billi titqies l-esperjenza akkwistata fl-implimentazzjoni ta’ din l-iskema kif iddettaljata fir-rapport tal-Kummissjoni ippreżentat bis-saħħa ta’ l-Artikolu 10 (2) tar-Regolament (KEE) Nru 2078/92;

(31) Billi skema ta’ għajnuna agri-ambjentali għandha tibqa' biex tinkoraġġixxi bdiewa li jservu s-soċjetà bħala entità bl-introduzzjoni jew il-kontinwazzjoni ta' l-użu ta’ prattiċi tal-biedja li jkunu kumpatibbli mal-ħtieġa dejjem tiżdied biex jitħares u jkun imtejjeb l-ambjent, riżorsi naturali, ħamrija u diversità ġenetika u jinżamm il-pajsaġġ u l-kampanja;

(32) Billi titjib fl-ipproċessar u n-negozju ta’ prodotti agrikoli għandu jkun inkuraġġit bis-sostenn għal investimenti f’dak il-qasam;

(33) Billi sostenn bħal dan jista' x'aktarx ikun ibbażat fuq il-kondizzjonijiet eżistenti kif preżentament huma meħtieġa fir-Regolament tal-Kunsill (KE) Nru 951/97 tal-20 ta’ Mejju 1997 dwar it-titjib ta' l-ipproċessar u l-kondizzjonijiet tan-negozju ta’ prodotti agrikoli [13].

(34) Billi għandu jkun assigurat li dawn l-investimenti jkunu vijabbli u li l-bdiewa jkollhom sehem mill-benefiċċji ekonomiċi ta' l-azzjoni meħudha;

(35) Billi s-selvikultura hija parti integrali minn żvilupp rurali u miżuri ta’ selvikultura għandhom, għalhekk, ikunu inklużi fl-iskema ta’ sostenn ta’ żvilupp rurali, billi sostenn għas-selvikultura għandu jevita t-tgħawwiġ tal-kompetizzjoni u għandu jkun newtrali għas-suq;

(36) Billi miżuri ta’ selvikultura għandhom ikunu adottati fid-dawl ta’ l-impenji mogħtija mill-Komunità u mill-Istati Membri fil-livell internazzjonali u tkun ibbażata fuq il-pjanijiet ta' l-Istati Membri għas-selvikultura; billi miżuri bħal dawn jistgħu wkoll iqisu l-problemi speċifiċi ta’ tibdil tal-klima;

(37) Billi miżuri ta’ selvikultura għandhom ikunu bbażati fuq dawk meħuda permezz ta’ skemi eżistenti meħtieġa fir-Regolament tal-Kunsill (KEE) Nru 1610/89 tad-29 ta’ Mejju 1989 li jipprovdi disposizzjonijiet għall-implimentazzjoni tar-Regolament (KEE) Nru 4256/88 f’dak li jirrigwarda l-iskema ta’ żvilupp u l-aħjar utilizzazzjoni ta’ oqsma ta’ siġar f’żoni rurali fil-Komunità [14] u fir-Regolament tal-Kunsill (KEE) Nru 867/90 tad-29 ta’ Marzu 1990 dwar it-titjib fl-ipproċessar u l-kondizzjonijiet tan-negozju għal prodotti ta’ selvikultura [15];

(38) Billi l-afforestazzjoni ta’ art agrikola hija speċjalment importanti mil-lat ta' l-użu tal-ħamrija u l-ambjent u bħala kontribuzzjoni għal żieda fil-forniment ta’ ċerti prodotti ta’ selvikultura, billi s-sostenn eżistenti għall-afforestazzjoni permezz tar-Regolament (KEE) Nru 2080/92 għandu, għalhekk, jitkompla, billi titqies l-esperjenza akkwistata fl-implimentazzjoni ta’ dik l-iskema kif deskritta fid-dettall fir-rapport tal-Kummissjoni ippreżentat bis-saħħa ta' l-Artikolu 8 (3) tiegħu;

(39) Billi għandhom isiru ħlasijiet għal attivitajiet biex tinżamm u tkun imtejba l-istabbiltà ekoloġika tal-foresti f’ċerti żoni;

(40) Billi għandu jingħata sostenn għal miżuri oħra li għandhom x’jaqsmu ma' attivitajiet ta’ biedja u l-konverżjoni tagħhom; billi l-lista ta’ miżuri għandha tkun definita fuq il-bażi ta’ esperjenza u wara li titqies il-ħtieġa għal żvilupp rurali li jkun ibbażat parzjalment fuq attivitajiet u servizzi mhux agrikoli sabiex tiddawwar it-tendenza lejn tnaqqis ekonomiku u soċjali u t-tnaqqis fil-popolazzjoni tal-kampanja; billi miżuri biex jitneħħew id-disugwaljanzi u jkunu mħeġġa opportunitajiet ugwali għall-irgiel u n-nisa għandhom ikunu sostenuti;

(41) Billi d-domanda mill-konsumaturi għal prodotti agrikoli prodotti organikament u għall-ikel qiegħda tiżdied; billi b’hekk qiegħed jinħoloq suq ġdid għal prodotti agrikoli; billi agrikoltura organika ittejjeb is-sostenibbiltà ta’ attivitajiet tal-biedja u b’hekk tikkontribwixxi lejn l-għanijiet ġenerali ta’ dan ir-Regolament; billi miżuri ta’ sostenn għal żvilupp rurali jistgħu jikkonċernaw il-produzzjoni, l-ipproċessar u n-negozju ta’ prodotti agrikoli li jkunu prodotti organikament;

(42) Billi miżuri ta’ żvilupp rurali li jkunu eliġibbli għal sostenn mill-Komunità għandhom ikunu konformi mal-liġi tal-Komunità u jkunu konsistenti mal-politiki l-oħra tal-Komunità kif ukoll ma' strumenti oħra tal-politika komuni agrikola;

(43) Billi fil-qafas ta’ dan ir-Regolament għandu jkun eskluż sostenn minn ċerti miżuri eliġibbli permezz ta’ strumenti ta’ politika komuni agrikola u partikolarment għal dawk li jidħlu fl-iskop ta’ skemi permezz ta' l-organizzazzjoni komuni tas-suq bl-eċċezzjonijiet ġustifikati bi kriterji oġġettivi;

(44) Billi, minħabba l-għajnuna eżistenti lill-gruppi ta’ produtturi u l-għaqdiet tagħhom f’diversi organizzazzjonijiet komuni tas-suq, ma jidhirx li jkun aktar meħtieġ sostenn speċifiku għal gruppi ta’ produtturi fil-qafas ta’ żvilupp rurali; billi, għalhekk, m’għandhomx jitkomplew skemi eżistenti ta’ għajnuna permezz tar- Regolament tal-Kunsill (KE) Nru 952/97 ta l-20 ta’ Mejju 1997 dwar gruppi ta’ produtturi u l-għaqdiet tagħhom [16];

(45) Billi l-finanzjament ta’ sostenn mill-Komunità għal miżuri li jakkumpanjawhom u għal miżuri oħra ta’ żvilupp rurali f’oqsma oħra apparti minn Oġġettiv 1 għandu jiġi mis-Sezzjoni tal-Garanzija ta' l-FAEGG; billi r-regoli bażiċi finanzjarji meħtieġa fir-Regolament (KE) Nru 1260/1999 kienu ġew adattati kif xieraq;

(46) Billi l-finanzjament ta’ sostenn mill-Komunità ta’ miżuri għal żvilupp rurali, f’oqsma koperti b’Oġġettiv 1, għandhom jibqgħu jiġu mis-Sezzjoni ta’ Gwida ta' l-FAEGG ħlief għat-tliet miżuri li jakkumpanjaw u għas-sostenn ta’ żoni anqas iffavoriti u żoni b’restrizzjonijiet ambjentali;

(47) Billi, f’dak li għandu x’jaqsam mas-sostenn għal miżuri ta’ żvilupp rurali koperti bil-programmazzjoni ta’ Oġġettiv 1 u Oġġettiv 2, Regolament (KE) Nru 1260/1999 għandu jkun applikabbli, partikolarment dwar il-programmazzjoni integrat ta’ dawn il-miżuri; billi, b’dana kollu, regoli li jikkonċernaw il-finanzjament għandhom iqisu l-miżuri ta’ finanzjament tal-Garanzija ta’ reġjuni f’Oġġettiv 2;

(48) Billi miżuri ta’ żvilupp rurali li ma humiex koperti bi programmazzjoni ta’ Oġġettiv 1 jew Oġġettiv 2 għandhom ikunu suġġetti għal programmazzjoni ta’ żvilupp rurali bis-saħħa ta’ regoli speċifiċi; billi r-rati ta’ assistenza għal miżuri bħal dawn għandhom ikunu differenzjati skond il-prinċipju ġenerali kif meħtieġ fl-Artikolu 29 (1) tar-Regolament (KE) Nru 1260/1999 wara li titqies b’mod suffiċjenti l-ħtieġa ta’ koeżjoni soċjali u ekonomika; billi, bħala riżultat, dawk ir-rati ta’assistenza għandhom, bi prinċipju, jkunu iddifferenzjati bħala bejn oqsma koperti b’Oġġettiv 1 u Oġġettiv 2 u oqsma oħra; billi r-rati meħtieġa b’dan ir-Regolament huma r-rati massimi ta' l-assistenza tal-Komunità;

(49) Billi, b’żieda mal-programmi ta' żvilupp rurali, il-Kummissjoni għandha tkun tista' tagħmel disposizzjonijiet għal studji dwar żvilupp rurali fuq l-inizjattiva tagħha stess indipendentement mill-inizjattiva ta’ żvilupp rurali li hemm disposizzjoni dwarha fl-Artikoli 19 u 20 tar-Regolament (KE) Nru 1260/1999;

(50) Billi regoli xierqa għandhom ikunu stabbiliti għas-sorveljar u l-valutazzjoni ta' sostenn għal żvilupp rurali, bl-użu ta’ indikaturi definiti tajjeb li għandhom ikunu miftiehma u stabbiliti qabel l-implimentazzjoni tal-programm;

(51) Billi miżuri ta’ żvilupp rurali għandhom ikunu eliġibbli għal sostenn minn Stat Membru mingħajr il-ko-finanzjament mill-Komunità; billi, minħabba l-impatt konsiderevoli ekonomiku ta’ għajnuna bħal din u sabiex tkun assigurata konsistenza mal-miżuri eliġibbli għal sostenn mill-Komunità u għal proċeduri ssimplifikati, regoli speċifiċi ta’ għajnuna Statali għandhom ikunu stabbiliti;

(52) Billi għandu jkun possibbli li jkunu adottati regoli transizzjonali ħalli jiffaċilitaw it-transizzjoni minn skemi eżistenti ta’ sostenn lejn skemi ġodda ta’ sostenn għal żvilupp rurali;

(53) Billi skemi ġodda ta’ sostenn li hemm disposizzjoni dwarhom f’dan ir-Regolament jieħdu post l-iskemi ta’ sostenn eżistenti li għalhekk għandhom ikunu mħassra; billi, bħala konsegwenza, id-deroga fl-iskemi kurrenti għal reġjuni l-aktar imbiegħda u għall-Gżejjer Eġej l-istess għandhom ikunu mħassra; billi regoli ġodda li jipprovdu għal flessibbiltà meħtieġa, adattament u derogi sabiex jintlaħqu l-ħtiġiet speċifiċi ta’ dawk ir-reġjuni għandhom ikunu stabbiliti meta l-miżuri ta’ żvilupp rurali jkunu programmati,

ADOTTA DAN IR-REGOLAMENT:

IT-TITOLU I

SKOP U OĠĠETTIVI

L- Artikolu 1

1. Dan ir-Regolament jistabbilixxi l-qafas ta’ sostenn tal-Komunità għal żvilupp rurali sostenibbli.

2. Miżuri ta’ żvilupp rurali għandhom jakkumpanjaw u jikkomplimentaw l-istrumenti l-oħra tal-politika komuni agrikola u b’hekk jikkontribwixxu lejn l-akkwist ta' l-oġġettivi meħtieġa fl-Artikolu 33 tat-Trattat.

3. Miżuri ta’ żvilupp rurali għandhom:

- ikunu integrati fil-miżuri li jippromwovu l-iżvilupp u l-aġġustament strutturali tar-reġjuni li l-iżvilupp tagħhom ikun baqa’ lura (Oġġettiv 1), u

- jakkumpanjaw il-miżuri ta’ sostenn għal konverżjoni ekonomika u soċjali taż-żoni li jiffaċċjaw diffikultajiet strutturali (Oġġettiv 2)

fir-reġjuni konċernati, billi jitqiesu l-għanijiet speċifiċi ta’ sostenn tal-Komunità permezz ta’ dawn l-oġġettivi kif meħtieġa fl-Artikoli 158 u 160 tat-Trattat u fir-Regolament (KE) Nru 1260/1999 u skond il-kondizzjonijiet meħtieġa f’dan ir-Regolament.

L- Artikolu 2

Sostenn għal żvilupp rurali, li għandu x’jaqsam ma' attivitajiet tal-biedja u l-konverżjoni tagħhom, jistgħu jikkonċernaw:

- it-titjib ta' l-istrutturi ta’ oqsma agrikoli u strutturi għal proċessar u negozjar ta’ prodotti agrikoli,

- il-konverżjoni u r-riorjentazzjoni tal-potenzjal ta’ produzzjoni agrikola, l-introduzzjoni ta’ teknoloġiji ġodda u t-titjib tal-kwalità tal-prodott,

- l-inkoraġġiment ta’ produzzjoni ta’ oġġetti mhux ta' l-ikel,

- l-iżvilupp sostenibbli tal-foresti,

- id-diversifikazzjoni ta’ attivitajiet bl-għan ta’ kumplimentarjetà jew attivitajiet alternattivi,

- il-manteniment jew ri-infurzar tan-nisġa soċjali vijabbli f’żoni rurali,

- l-iżvilupp ta’ attivitajiet ekonomiċi u l-manteniment u l-ħolqien ta’ impjiegi bl-għan li jkun assigurat l-isfruttament aħjar tal-potenzjal eżistenti inerenti,

- l-iżvilupp tal-kondizzjonijiet tax-xogħol u ta’ l-għejxien,

- il-manteniment u l-promozzjoni ta’ sistemi ta’ biedja b’imput baxx,

- il-preservazzjoni u l-promozzjoni ta’ valur ta’ natura għolja u ta’ agrikola sostenibbli li tirrispetta l-ħtiġiet ambjentali,

- it-tneħħija tad-disugwaljanza u tal-promozzjoni ta’ opportunitajiet ugwali għall-irgiel u n-nisa, partikolarment billi jkun hemm sostenn għal proġetti mibdija u implimentati min-nisa.

L- Artikolu 3

Sostenn għandu jingħata għal miżuri ta’ żvilupp rurali definiti fit-Titolu II u permezz tal-kondizzjonijiet provduti fih.

IT-TITOLU II

MIŻURI TA’ ŻVILUPP RURALI

IL-KAPITOLU I

INVESTIMENT F’OQSMA AGRIKOLI

L- Artikolu 4

Sostenn għal investiment f’oqsma agrikoli għandu jikkontribwixxi għal titjib fil-qliegħ agrikolu u għal kondizzjonijiet tal-ħajja, tax-xogħol u l-produzzjoni.

Investiment bħal dan għandu jfittex wieħed jew aktar minn dawn l-oġġettivi:

- biex inaqqas l-ispejjeż tal-produzzjoni,

- biex itejjeb jew jifrex mill-ġdid il-produzzjoni,

- biex tittejjeb il-kwalità,

- biex jippreserva u jtejjeb l-ambjent naturali, il-kondizzjonijiet ta' l-iġene u l-istandards tal-ħarsien ta' l-annimali,

- biex jippromwovi d-diversifikazzjoni ta' l-attivitajiet ta' l-irziezet.

L- Artikolu 5

Sostenn għal investiment għandu jingħata lill-oqsma agrikoli:

- li l-vijabbiltà ekonomika tagħhom tista' tintwera,

- li jkunu konformi ma' l-istandards minimi li jirrigwardaw l-ambjent, l-iġene u l-ħarsien ta' l-annimali, u

- meta l-bidwi jkun jippossjedi kapaċità adegwata ta' sengħa u kompetenza.

L- Artikolu 6

Sostenn m’għandux jingħata għal investiment li jkollu bħala l-oġġettivi tiegħu ż-żieda fil-produzzjoni li għaliha talba fis-suq normali ma tistax tinstab.

L- Artikolu 7

Stati Membri għandhom jiffissaw il-limiti għal investiment totali li jkun eliġibbli għas-sostenn.

L-ammont totali ta’ sostenn, espress bħala persentaġġ tal-volum ta’ investimenti eliġibbli, huwa limitat għal massimu ta’ 40 % u 50 % fiż-żoni l-anqas favoriti. Meta l-investimenti jkunu ndaħlu għalihom bdiewa żgħażagħ, bħal ma hemm referenza dwar dan permezz tal-Kapitolu II, dawn il-persentaġġi jistgħu jilħqu l-massimu ta’ 45 % u 55 % fiż-żoni l-anqas favoriti.

IL-KAPITOLU II

TWAQQIF TA’ BDIEWA ŻGĦAŻAGĦ

L- Artikolu 8

1. Twaqqif ta' għajnuna li tiffaċilita li bdiewa żgħażagħ jkunu stabbiliti għandha tingħata skond dawn il-kondizzjonijiet:

- il-bidwi jkun ta’ anqas minn 40 sena,

- il-bidwi jkun jippossjedi kapaċità adegwati tas-sengħa u komptenenza,

- il-bidwi jkun sejjer jistabbilixxi ruħu fil-qasam agrikolu għall-ewwel darba,

- f’dak li għandu x’jaqsam ma' l-azjenda:

(i) il-vijabbiltà ekonomika tista' tintwera, u

(ii) normi minimi li jirrigwardaw l-ambjent, l-iġene u l-ħarsien ta' l-annimali u jkunu konformi ma',

u

- il-bidwi jkun stabbilit bħala l-kap ta' l-azjenda.

Kondizzjonijiet speċifiċi jistgħu jkunu applikati f’sitwazzjoni meta l-bidwi żgħażugħ ma jkunx stabbilit bħala l-uniku kap tal-qasam. Dawn il-kondizzjonijiet għandhom ikunu ekwivalenti għal dawk meħtieġa għal bidwi żgħażugħ biex ikun stabbilit bħala l-kap uniku ta’ qasam.

2. L-għajnuna ta’ twaqqif tista' tkun tikkonsisti:

- premium waħdieni sal-massimu ta' l-ammont eliġibbli kif speċifikat fl-Anness.

- sussidju fuq l-imgħax fuq self li jkun ittieħed bl-għan li jkunu koperti l-ispejjeż li joriġinaw mit-twaqqif; il-valur kapitalizzat tas-sussidju fuq l-imgħax ma jistax jeċċedi l-valur tal-premium.

IL-KAPITOLU III

TAĦRIĠ

L- Artikolu 9

Sostenn għal taħriġ vokazzjonali għandu jikkontribwixxi għall-iżvilupp fil-kapaċitajiet vokazzjonali u l-kompetenza tal-bdiewa u ta’ persuni oħra involuti f’attivitajiet agrikoli u attivitajiet tal-foresti, u tal-konverżjoni tagħhom.

Taħriġ għandu partikolarment ikun iddisinjat:

- biex iħejji l-bdiewa għal ri-orjentazzjoni kwalitattiva tal-produzzjoni, l-applikazzjoni tal-prattiċi tal-produzzjoni kompatibbli mal-manteniment u t-titjieb tal-pajsaġġ, il-ħarsien ta' l-ambjent, in-normi ta' l-iġjene u l-ħarsien ta' l-annimali u l-akkwist tal-kapaċitajiet meħtieġa biex dawn ikunu jistgħu jamministraw azjenda li tkun ekonomikanet vijabbli, u

- Biex iħejji dawk li jkollhom il-foresti u persuni oħra involuti f’attivitajiet tas-selvikultura għall-applikazzjoni ta’ prattiċi ta’ tmexxija tal-foresti biex tkun imtejba l-ekonomija, l-ekoloġija u l-funzjoni soċjali tal-foresti.

IL-KAPITOLU IV

IRTIRAR KMIENI

L- Artikolu 10

1. Sostenn għal irtirar kmieni mill-biedja tista' tikkontribwixxi għal dawn l-oġġettivi:

- biex jipprovdi dħul għal bdiewa anzjani li jiddeċiedu li jieqfu mill-biedja,

- biex jinkoraġġixxi t-tibdil ta’ dawn il-bdiewa anzjani minnn bdiewa li jkunu jistgħu itejbu, fejn meħtieġ, il-vijabbiltà ekonomika tal-kumplament ta' l-oqsma agrikoli,

- li jassenja mill-ġdid l-art għal użu mhux agrikolu meta din ma tkunx tista' tkun maħduma skond il-kondizzjonijiet sodisfaċenti tal-vijabbiltà ekonomika.

2. Sostenn ta’ irtirar kmieni jista' jinkludi miżuri biex jipprovdu dħul għal ħaddiema ta' l-azjenda.

L- Artikolu 11

1. Dak li jittrasferixxi l-azjenda għandu:

- iwaqqaf l-attività kummerċjali kollha definittivament; hu jista', b’danakollu, ikompli b’xogħol tal-biedja li ma jkunx kummerċjali jew li jżomm l-użu tal-bini,

- ma jkunx ta’ anqas minn 55 sena imma ma jkunx għadu laħaq l-eta' ta’ irtirar fiż-żmien tat-trasferiment, u

- ikun ipprattika l-biedja l-10 snin ta’ qabel it-trasferiment.

2. Dak li jieħu f’idejh l-azjenda għandu:

- li jilħaq minflok dak li jittrasferixxi bħala l-kap ta' l-azjenda jew jieħu f’idejh l-art rilaxxata kollha jew parti minnha. Il-vijabbiltà ekonomika ta’ dak li jieħu f’idejh l-azjenda għandha titjieb matul perjodu u b’konformità mal-kondizzjonijiet li għandhom ikunu definiti fit-termini ta’, partikolarment, is-sengħa tax-xogħol ta’ dak li jieħu f’idejh l-azjenda u ma’ l-estenzjoni ta' l-art u l-volum tax-xogħol jew tad-dħul, skond ir-reġjun u t-tip tal-produzzjoni,

- jkun jipposjedi sengħa tax-xogħol u kompetenza, u

- jintrabat li jipprattika l-biedja fl-azjenda agrikola għal mhux anqas minn ħames snin.

3. Ħaddiem tal-biedja għandu:

- iwaqqaf ix-xogħol kollu tal-biedja definittivament,

- ma jkunx anqas minn 55 sena imma ma jkunx għadu laħaq l-eta ta' l-irtirar,

- ikun iddedika mill-anqas nofs il-ħin tax-xogħol tiegħu bħala għajnuna lill-familja jew ħaddiem tal-biedja jew għal xogħol tal-biedja matul il-ħames snin preċedenti,

- ikun ħadem fuq l-azjenda agrikola ta’ dak li jkun ittrasferixxa mill-anqas għall-ekwivalenti ta’ sentejn tal-ħin ta’ xogħol normali matul il-perjodu ta’ erba’ snin li jippreċedu l-irtirar ta’ dak li jittrasferixxi, u

- ikun jappartjeni għal skema ta’ sigurtà soċjali.

4. Dak li jieħu f'idejh u li ma jkunx ġej mill-biedja jista' jkun xi persuna oħra jew korp li jieħu f’idejh l-art rilaxxata biex jużaha għal skopijiet mhux agrikoli, bħal ma hija selvikultura jew il-ħolqien ta’ riservi ekoloġiċi, f'manjiera koumpatibbli mal-protezzjoni jew titjib tal-kwalità ta' l-ambjent tal-pajsaġġ.

5. Il-kondizzjonijiet meħtieġa f’dan l-Artikolu għandhom ikunu applikati matul il-perjodu li fih dak li jittrasferixxi jirċievi s-sostenn ta' l-irtirar kmieni.

L- Artikolu 12

1. L-ammonti massimi eliġibbli għal sostenn mill-Komunità huma meħtieġa fl-Anness.

2. Id-durata ta' l-irtirar kmieni m’għandhiex teċċedi il-perjodu totali ta’ 15-il sena għal dak li jittrasferixxi u 10 snin għal ħaddiem tal-biedja. M’għandhiex tkompli aktar wara l-għeluq tal-75 sena ta’ dak li jittrasferixxi u ma tmurx aktar mill-età normali ta' l-irtirar tal-ħaddiem.

Fil-każ ta’ dak li jittrasferixxi l-pensjoni normali ta' l-irtirar għandha titħallas mill-Istat Membru, sostenn għal irtirar kmieni għandu jingħata bħala suppliment billi jitqies l-ammont tal-pensjoni nazzjonali ta' l-irtirar.

IL-KAPITOLU V

ŻONI ANQAS IFFAVORITI U ŻONI B’RESTRIZZJONIJIET AMBJENTALI

L- Artikolu 13

Sostenn għal żoni anqas iffavoriti u żoni b’restrizzjonijiet ambjentali għandu jikkontribwixxi dawn l-oġġettivi.

(a) Kumpens għal żoni li huma naturalment anqas favoriti

- li jassiguraw l-użu kontinwu ta' l-art agrikola u b’jekk jikkontribwixxu għall-manteniment ta’ Komunità rurali vijabbli,

- li jmantni l-kampanja,

- li jmantni u jippromwovi s-sostenibbiltà tas-sistemi tal-biedja li partikolarment iqisu l-ħtiġijiet ta’ protezzjoni ambjentali.

(b) Kumpens għal żoni b’restrizzjonijiet ambjentali

- biex jassiguraw il-ħtiġiet ambjentali u jissalvagwardja l-biedja fiż-żoni b’restrizzjonijiet ambjentali.

L- Artikolu 14

1. Bdiewa f’żoni anqas iffavoriti jistgħu jkunu sostenuti b’allokazzjonijiet kumpensatorji.

2. Allokazzjonijiet kumpensatorji għandhom jingħataw għal kull ettaru ta’ art użata għall-agrikoltura lill-bdiewa li:

- jaħdmu medda minima ta’ art li għandha tkun definita,

- jintrabtu li jsegwu l-attività tal-biedja f’żoni anqas favoriti mill-anqas għall-ħames snin mill-ewwel pagament ta’ allokazzjonijiet kumpensatorji, u

- japplikaw il-prattiċi normali ta’ biedja tajba kompatibbli mal-ħtieġa li jkun salvagwardjat l-ambjent u tkun mantenuta l-kampanja, partikolarment b’biedja sostenibbli.

3. Meta residwi ta’ sustanzi ipprojbiti permezz tad-Direttiva 96/22/KE [17], jew residwi ta’ sustanzi awtorizzati permezz ta’ dik id-Direttiva imma użati illegalment, jinstab li jkunu jeżistu bis-saħħa tad-disposizzjonijiet relevanti tad-Direttiva 96/23/KE [18], f’annimal li jappartjeni lill-merħla ta’ bovini ta’ produttur, jew meta sustanza jew prodott li ma jkunux awtorizzati, jew sustanza jew prodott awtorizzati permezz tad-Direttiva 96/22/KE imma miżmuma illegalment fl-azjenda tal-produttur f'kull għamla, il-produttur għandu jkun eskluż milli jirċievi l-allokazzjonijiet kumpensatorji għas-sena kalendarja ta’ dik is-sejba.

Fil-każ ta’ ksur li jerġa' jseħħ, it-tul tal-perjodu ta' l-esklużjoni jista', jiddependi mis-serjetà ta' l-offiża, ikun imtawwal għal ħames snin mis-sena li fiha r-repetizzjoni ta' l-offiża tkun instabet.

Fil-każ ta’ ostakolu min-naħa tal-proprjetarju jew l-okkupant ta' l-annimali meta jkunu qegħdin jitwettqu l-ispezzjonijiet u meta l-kampjuni jkunu qegħdin jittieħdu li jkunu meħtieġa għall-applikazzjoni tal-pjan nazzjonali ta’ sorveljar, jew meta l-investigazzjonijiet jew il-verifiki li hemm disposizzjoni dwarhom permezz tad-Direttiva 96/23/KE jkunu qegħdin jitwettqu, il-penalitajiet li hemm disposizzjoni dwarhom fl-ewwel sub-paragrafu għandhom ikunu applikabbli.

L- Artikolu 15

1. Allokazzjonijiet kumpensatorji għandhom ikun stabbiliti f’livell li:

- jkunu suffiċjenti biex jagħmlu kontribuzzjoni effettiva biex jikkumpensa għal xkiel eżistenti, u

- jevitaw kumpens żejjed.

2. Allokazzjonijiet kumpensatorji għandhom ikunu ddifferenzjati kif xieraq, billi jitqiesu:

- s-sitwazzjoni u l-oġġettivi ta' l-iżvilupp partikulari għal reġjun,

- is-severità ta’ xi xkiel permanenti naturali li jaffettwa l-attivitajiet tal-biedja,

- il-problemi ambjentali partikulari li għandhom jinħallu fejn xieraq,

- it-tip ta’ produzzjoni u, fejn xieraq, l-istruttura ekonomika ta' l-azjenda.

3. Allokazzjonijiet kumpansatorji għandhom ikunu stabbiliti bejn l-ammonti minimi u massimi meħtieġa fl-Anness.

Allokazzjonijiet kumpensantorji għola minn dan l-ammont massimu jistgħu jingħataw basta li l-medja ta' l-ammont għall-allokazzjonijiet kumpensatorji kollha mogħtija fil-livell ta' l-ipprogrammazzjoni ikkonċernat ma teċċedix dan l-ammont massimu. B’dana kollu, f’każi li jkunu iġġustifikati kif xieraq b’ċirkostanzi oġġettivi, Stati Membri jistgħu, għall-iskopijiet tal-kalkolazzjoni tal-medja ta' l-ammont, jippreżentaw diversi programmi reġjonali.

L- Artikolu 16

1. Pagamenti bħala kumpens għal spejjeż involuti u dħul mitluf jistgħu jsiru lill-bdiewa li jkunu suġġetti għal restrizzjonijiet fuq l-użu agrikolu f’żoni b’restrizzjonijiet ambjentali bħala riżultat ta' l-implimentazzjoni tal-limitazzjonijiet fuq l-użu agrikolu bbażat fuq il-protezzjoni ambjentali tar-regoli tal-Komunità, jekk u sakemm dawn il-pagamenti jkunu meħtieġa biex isolvu l-problemi li joriġinaw minn dawk ir-regoli.

2. Pagamenti għandhom ikunu stabbiliti f’livell li jevita kumpens żejjed; din hija speċjalment meħtieġa fil-każ ta’ pagamenti liż-żoni anqas iffavuriti.

3. L-ammonti massimi eliġibbli għal sostenn mill-Komunità huma meħtieġa fl-Anness.

L- Artikolu 17

Żoni anqas iffavuriti għandhom jinkludu:

- żoni muntanjużi (Artikolu 18),

- żoni oħra anqas favoriti (Artikolu 19), u

- żoni affetwati bi xkiel speċifiku (Artikolu 20).

L- Artikolu 18

1. Żoni muntanjużi għandhom ikunu dawk ikkaratteriżżati b’limitazzjonijiet konsiderevoli tal-possibbiltà fl-użu ta’ l-art u żieda apprezzabbli fl-ispejjeż biex tinħadem minħabba:

- l-eżistenza, minħabba l-altitudni, ta’ kondizzjonijiet ta’ klima ferm diffiċli, li l-effett tagħhom ikunu li jqassar sostanzjalment l-istaġun għammieli,

- f’altitudni aktar baxxa, minħabba l-preżenza tal-parti l-aktar kbira taż-żona f’dak il-każ ta’ telgħat li jkunu weqfin wisq għall-użu ta’ makkinarju jew li jkunu jenħtieġu l-użu ta’ apparat speċjali li jkun jiswa ħafna flus, jew

- għal taħlita ta’ dawn iż-żewġ fatturi, meta l-ixkiel jirriżulta minn kull wieħed ikun trattat separatament dan ikun anqas akut imma l-għaqda tat-tnejn tagħti bidu għal xkiel ekwivalenti.

2. Żoni aktar lejn it-Tramuntana mill-Parallel 62 u ċerti żoni ta’ qrib għandhom ikunu ttrattati bl-istess metodu bħal żoni muntanjużi.

L- Artikolu 19

Żoni anqas iffavoriti li jkunu fil-periklu li jkunu abbandunati fl-użu ta' l-art u fejn konservazzjoni tal-kampanja tkun meħtieġa, għandhom jinkludu żoni ta’ biedja li jkunu omoġenji mil-lat tal-kondizzjonijiet ta’ produzzjoni naturali u jindikaw dawn il-karatteristiċi kollha kif ġejjin:

- il-preżenza ta’ art ta’ produttività fqira, diffiċli għal kultivazzjoni u b’potenzjal limitat li ma jkunx jista' jiżdied ħlief bi spejjeż eċċessivi, u li jkun aktar xieraq għat-trobbija ta’ merħliet ta’ annimali,

- il-produzzjoni li tirriżulta minn produttività baxxa ta' l-ambjent naturali li jkun sostanzjalment aktar baxx mill-medja, f’dak li għandu x’jaqsam ma indiċi prinċipali tat-twettieq ekonomiku ta' l-agrikoltura,

- popolazzjoni baxxa jew li qiegħda tonqos li tkun prinċipalment dipendenti fuq attività agrikola, li l-ħeffa tan-nuqqas tagħha tkun toħloq xkiel tal-vijabbiltà taż-żona koperta u tal-kontinwazzjoni ta' l-abitazzjoni.

L- Artikolu 20

Żoni anqas favoriti jistgħu jinkludu żoni oħra affetwati bi xkiel speċifiku, li bih il-biedja għandha tkompli sseħħ, meta meħtieġ u suġġetta għal ċerti kondizzjonijiet, sabiex ikun ikkonservat jew imtejjeb l-ambjent, il-manteniment tal-kampanja u l-preservazzjoni tal-potenzjal turistiku taż-żona jew sabiex ikun protett xatt il-baħar.

L- Artikolu 21

Il-medda totali taż-żoni li hemm referenza għalihom fl-Artikolu 16 u l-Artikolu 20 ma jistgħux jeċċedu 10 % ta' l-art ta' l-Istat Membru kkonċernat.

IL-KAPITOLU VI

AMBJENT AGRIKOLU

L- Artikolu 22

Sostenn għal metodi ta’ produzzjoni agrikola iddisinjat għal ħarsien ta' l-ambjent u għal manteniment tal-kampanja (ambjent agrikolu) għandu jikkontribwixxi għat-twettieq ta' l-oġġettivi tal-politika tal-Komunità rigward l-agrikoltura u l-ambjent.

Dan is-sostenn għandu jippromwovi:

- mezzi ta' l-użu ta' l-art agrikola li jkunu kumpatibbli mal-ħarsien u t-titjib ta' l-ambjent, il-pajsaġġ u l-aspetti tiegħu, riżorsi naturali, ħamrija u diversità ġenetika,

- tixrid li jkun favorevoli għall-ambjent ta’ biedja u amministrazzjoni ta’ sistemi ta’ mergħa ta’ intensità baxxa,

- il-konservazzjoni ta’ ambjenti ta’ biedja ta’ valur għoli naturali li jkunu mhedda,

- iż-żamma tal-pajsaġġ u l-aspetti storiċi ta' l-art agrikola,

- l-użu ta’ pjanar ambjentali fil-prattika tal-biedja.

L- Artikolu 23

1. Sostenn għandu jingħata lill-bdiewa li jimpenjaw irwieħhom li jagħmlu agrikoltura ambjentali għal mill-anqas ħames snin. Fejn meħtieġ, perjodu itwal għandu jkun iddeterminat mit-tipi partikolari ta' l-impenn bil-għan ta' l-effetti tagħhom fuq l-ambjent.

2. Impenji agrikoli ambjentali għandhom jinvolvu aktar milli l-applikazzjoni tal-prattika tas-soltu ta’ biedja tajba.

Għandhom jipprovdu għal servizzi li m’humiex ipprovduti b’xi miżuri oħra ta’ sostenn, bħal ma hu sostenn għas-suq u allokazzjonijiet kumpensatorji.

L- Artikolu 24

1. Sostenn f’dak li għandu x’jaqsam ma’ impenn agrikolu ambjentali għandu jingħata kull sena u jkun ikkalkulat fuq il-bażi ta’:

- dħul mitluf,

- spejjeż addizzjonali li jirriżultaw mill-impenn mogħti, u

- il-ħtieġa li jkunu ipprovduti inċentivi.

L-ispiża ta’ xogħlijiet kapitali li ma jkunux remunerattivi u li jkunu meħtieġa għat-twettieq ta' l-impenji jistgħu wkoll ikunu kkunsidrati fil-kalkulazzjoni tal-livell ta’ sostenn annwali.

2. L-ammonti massimi ta’ kull sena eliġibbli għal sostenn mill-Komunità huma meħtieġa fl-Anness. Dawn l-ammonti għandhom ikunu bbażati fuq il-kobor ta’ kull azjenda li dwarha l-impenn agrikolu ambjentali jkun applikabbli.

IL-KAPITOLU VII

TITJIB FL-IPPROĊESSAR U L-MARKETING TA’ PRODOTTI AGRIKOLI

L- Artikolu 25

1. Sostenn għal investiment għandu jiffaċilita t-titjib u r-razjonalizzazzjoni ta' l-ipproċessar u n-negozju ta’ prodotti agrikoli u b’hekk jikkontribwixxi għal żieda fil-kompetittività u ż-żieda fil-valur ta’ dawk il-prodotti.

2. Sostenn bħal dan għandu jikkontribwixxi lejn waħda jew aktar minn dawn l-oġġettivi:

- li jiggwida l-produzzjoni skond it-tendenzi tas-suq li jistgħu jitbassru jew li jinkoraġġixxi l-iżvilupp ta’ swieq ġodda għal prodotti agrikoli,

- biex itejjeb jew jirrazjonalizza l-linji tan-negozju jew l-iproċessar tal-prodotti,

- li jtejjeb il-preżentazzjoni u t-tħejjija ta’ prodotti jew jinkoraġġixxi użu aħjar jew l-eliminazzjoni ta’ prodotti sekondarji jew ħela,

- biex ikunu applikati teknoloġiji ġodda,

- biex jiffavorixxi investimenti innovattivi,

- biex itejjeb u jissorvelja l-kwalità,

- biex itejjeb u jissorvelja l-kondizzjonijiet tas-saħħa,

- biex jipproteġi l-ambjent.

L- Artikolu 26

1. Sostenn għandu jingħata lil dawk il-persuni li fl-aħħar mill-aħħar ikunu responsabbli għal finanzjament ta’ investimenti fl-intrapriżi

- li dwarhom il-vijabbiltà ekonomika tista' tintwera, u

- li jkunu konformi man-normi minimi li jirrigwardaw l-ambjent, iġene u ħarsien ta' l-annimali.

2. Investiment għandu jikkontribwixxi għal titjib fis-sitwazzjoni tal-produzzjoni bażika fis-settur agrikolu f’dak il-każ. Għandha tiggarantixxi lill-produtturi ta’ dawk il-prodotti bażiċi sehem adegwat fil-benefiċċji ekonomiċi li jirriżultaw.

3. Evidenza suffiċjenti għandha tintwera li swieq normali għal prodotti kkonċernati jkunu jistgħu jinstabu.

L- Artikolu 27

1. Investiment għandu jikkonċerna l-ipproċessar u n-negozjar tal-prodotti koperti b’Anness I għat-Trattat ħlief għal prodotti tas-sajd.

2. Investiment għandu jilħaq il-kriterji ta’ l-għażla li jeżiġu prijoritajiet u jindikaw liema tipi ta’ investiment ma jkunux eliġibbli għal sostenn.

L- Artikolu 28

1. Dawn it-tipi ta’ investiment għandhom ikunu esklużi mis-sostenn:

- investiment fil-livell tal-bejgħ bl-imnut,

- investiment fl-ipproċessar jew in-negozjar ta’ prodotti minn pajjiżi terzi.

2. L-ammont totali ta’ sostenn, espress bħala persentaġġ tal-volum ta’ investiment eliġibbli, huwa limitat għal massimu ta’:

(a) 50 % ta’ reġjuni f’Oġġettiv 1;

(b) 40 % fir-reġjuni l-oħra.

IL-KAPITOLU VIII

SELVIKULTURA

L- Artikolu 29

1. Sostenn għal selvikultura għandu jikkontribwixxi għal manteniment u żvilupp ta' l-ekonomija, ekoloġija u funzjoni soċjali tal-foresti f’żoni rurali.

2. Sostenn bħal dan għandu partikolarment jikkontribwixxi lejn waħda jew aktar minn dawn l-oġġettivi:

- amministrazzjoni sostenibbli ta’ foresti u l-iżvilupp tas-selvikultura,

- manteniment jew titjib fir-riżorsi tal-foresti,

- it-tixrid ta’ żoni ta’ foresti.

3. Dan is-sostenn għandu jingħata biss għal foresti u artijiet li jkunu l-proprjetà ta’ sidien privati jew bl-assoċjazzjonijiet tagħhom jew minn muniċipalitajiet jew l-assoċjazzjonijiet tagħhom. Din ir-restrizzjoni m’għandhiex tapplika għal miżuri li hemm disposizzjoni dwarhom fis-sitt inċiż ta’ l-Artikolu 30 (1).

4. Sostenn bħal dan għandu jikkontribwixxi għat-twettiq ta' l-impenji mogħtija mill-Komunità u l-Istati Membri fil-livell internazzjonali. Għandu jkun ibbażat fuq programmi nazzjonali jew sub-nazzjonali ta’ selvikultura jew ta’ strumenti ekwivalenti li għandhom iqisu l-impennji magħmula fil-Konferenzi Ministerjali dwar il-Ħarsien ta’ Foresti fl-Ewropa.

5. Miżuri proposti permezz ta’ dan ir-Regolament f’żoni kklassifikati bħala li għandhom riskju għoli jew medju permezz ta’ Regolament tal-Kunsill (KEE) Nru 2158/92 tat-23 ta’ Lulju dwar il-protezzjoni tal-foresti tal-Komunità kontra n-nar [19] għandhom ikunu konformi mal-pjan ta' ħarsien tal-foresti ppreżentat mill-Istati Membri permezz ta’ Regolament (KEE) Nru 2158/92.

L- Artikolu 30

1. Sostenn għal foresti għandu jikkonċerna wieħed jew aktar minn dawn il-miżuri:

- l-afforestazzjoni ta’ art li ma hiex eliġibbli permezz ta’ l-Artikolu 31 basta li dak it-tħawwil ikun adattat għall- kondizzjonijiet lokali u jkun kumpatibbli ma' l-ambjent,

- investiment fil-foresti li jkollu l-għan li itejjeb sewwa l-ekonomija tagħhom, l-ekoloġija jew il-valur soċjali,

- investiment li jtejjeb jew jirrazjonalizza l-ħsad, l-ipproċessar u n-negozjar tal-prodotti tal-foresti; investiment relatat ma' l-użu ta' l-injam bħala materja prima għandu jkun limitat għall-operazzjonijiet kollha tax-xogħol qabel l-ipproċessar industrijali,

- il-promozzjoni ta’ aspetti ġodda għall-użu u n-negozjar tal-prodotti tal-foresta,

- it-twaqqif ta’ assoċjazzjonijiet ta’ sidien ta’ foresti li jkunu stabbiliti sabiex jgħinu lill-membri tagħhom biex itejbu s-sostenibbiltà u l-effiċjenza ta' l-amministrazzjoni tal-foresti tagħhom,

- li jirrestawraw il-potenzjal tal-produzzjoni tal-foresti li jkun sofra ħsara minħabba disastri naturali u nar u jintroduċu strumenti xierqa ta’ prevenzjoni.

2. Ir-regoli meħtieġa f’Kapitoli I u VII, bl-eċċezzjoni tat-tieni sub-paragrafu ta’ l-Artikolu 7, għandhom ikunu applikabbli kif xieraq għall-investimenti.

L- Artikolu 31

1. Sostenn għandu jingħata għall-afforestazzjoni ta’ art agrikola basta li dak it-tħawwil ikun adattat għall- kondizzjonijiet lokali u jkun kumpatibbli ma' l-ambjent.

Dak is-sostenn jista' jinkludi, b’żieda ma' l-ispejjeż tat-tħawwil:

- premium annwali għal kull ettaru afforestat biex ikopri l-ispejjeż ta’ manteniment għal perjodu sa ħames snin,

- premium annwali kull ettaru biex ikopri telf ta’ dħul li jirriżulta mill-afforestazzjoni għal massimu ta’ 20 sena għal bdiewa jew l-assoċjazzjonijiet tagħhom li jkunu ħadmu l-art qabel ma din tkun ġiet afforestata jew lil xi persuna legali privata oħra.

2. Sostenn għall-afforestazzjoni ta’ art agrikola li jkun sar minn awtoritajiet pubbliċi għandu jkopri biss l-ispejjeż tat-twaqqif.

3. Sostenn għall-afforestazzjoni ta’ art agrikola m’għandux ikun mogħti:

- lill-bdiewa li jibbenefikaw minn sostenn għal irtirar kmieni,

- f’dak li għandu x’jaqsam ma tħawwil ta’ siġar tal-Milied.

Fil-każ ta’ speċji li jikbru malajr li jkunu kkultivati għal termini qosra, sostenn għall-afforestazzjoni għandu jingħata biss għall-ispejjeż tat-tħawwil.

4. L-ammonti massimi ta’ kull sena tal-premium biex ikopru t-telf tad-dħul eliġibbli għal sostenn mill-Komunità meħtieġa fl-Annessa.

L- Artikolu 32

1. Bl-għan li:

- tkun mantenuta jew imtejba l-istabbilità ekoloġika tal-foresti meta l-irwol ta’ protezzjoni jew ekoloġiku ta’ dawn il-foresti jkun ta’ interess pubbliku u meta l-ispejjeż għal manteniment u l-miżuri tat-titjib ta’ dawn il-foresti jeċċedi d-dħul mis-selvikultura,

- il-manteniment ta’ spazju biex iwaqqaf it-tixrid tan-nirien permezz ta’ miżuri agrikoli,

pagamenti għal miżuri relevanti għandhom jingħataw lill-benefiċċjarji basta li l-valuri protettivi u ekoloġiċi ta’ dawn il-foresti jkunu assigurati b’manjera sostenibbli u l-miżuri li jkunu sejrin jitwettqu jkunu meħtieġa b’kuntratt u l-ispejjeż tagħhom ikunu speċifikati hemmhekk.

2. Pagamenti għandhom ikunu stabbiliti bejn l-ammonti minimi u massimi kif meħtieġa fl-Anness, fuq il-bażi ta' l-ispejjeż vera tal-miżuri mwettqa, kif stipulat minn qabel fil-kuntratt.

IL-KAPITOLU IX

L-INKORAĠĠIMENT TA' L-ADATTAZZJONI U L-IŻVILUPP TA’ ŻONI RURALI

L- Artikolu 33

Sostenn għandu jingħata għal miżuri, li għandhom x’jaqsmu ma' attivitajiet tal-biedja u tal-konverżjoni tagħhom u għal attivitajiet rurali, li ma jidħlux fl-iskop ta’ xi miżuri oħra li hemm referenza dwarhom f’dan it-Titolu.

Miżuri bħal dawn għandhom jikkonċernaw:

- titjib ta' l-art,

- tqassim mill-ġdid,

- it-twettiq ta’ ħelsien fl-irziezet u servizzi ta’ amministrazzjoni ta' l-irziezet,

- l-innegozjar ta’ prodotti agrikoli ta’ kwalità,

- servizzi bażiċi għall-ekonomija rurali u għal popolazzjoni,

- ir-rinovament u l-iżvilupp ta’ rħula u l-ħarsien u l-konservazzjoni tal-wirt rurali,

- diversifikazzjoni ta’ attivitajiet agrikoli u attivitajiet li jkunu qrib ta' l-agrikoltura biex jipprovdu attivitajiet multipli jew dħul alternattiv,

- l-amministrazzjoni tar-riżorsi ta' l-ilma agrikolu,

- l-iżvilupp u t-titjib ta' l-infrastruttura marbuta ma' l-iżvilupp agrikolu,

- l-inkuraġġiment ta’ attivitajiet turistiċi u tas-snajja,

- il-ħarsien ta' l-ambjent b’konnessjoni ma' l-agrikoltura, selvikultura u konservazzjoni tal-pajsaġġ kif ukoll mat-titjib tal-ħarsien ta' l-annimali,

- li jirrestawraw il-potenzjal tal-produzzjoni agrikola li tkun sofriet ħsara minħabba diżastri naturali u jintroduċu strumenti xierqa ta’ prevenzjoni,

- inġinerija finanzjarja.

IL-KAPITOLU X

REGOLI TA’ IMPLEMENTAZZJONI

L- Artikolu 34

Regoli dettaljati għall-implementazzjoni ta’ dan it-Titolu għandhom ikunu adottati bi qbil mal-proċedura provduta fl-Artikolu 50 (2) tar-Regolament (KE) Nru 1260/1999.

Dawn ir-regoli jistgħu partikolarment jiddefenixxu:

- kondizzjonijiet għal sostenn għal investiment fl-oqsma agrikoli (Artikoli 4 sa 7), inklużi r-restrizzjonijiet meħtieġa li jirriżultaw mill-applikazzjoni ta’ l-Artikolu 6,

- il-perjodu u l-kondizzjonijiet għal titjib tal-vijabbiltà ekonomika ta’ l-azjenda agrikola u l-kondizzjoni ta' l-użu ta’ art rilaxxata fil-każ ta’ irtirar kmieni (Artikolu 11 (2)),

- kondizzjonijiet għal għoti u kalkolazzjoni ta' l-allokazzjonijiet kumpensatorji f’żoni anqas favoriti, inkluż il-każ ta' l-użu komunali ta’ art agrikola (Artikoli 14 u 15) u l-pagamenti kumpensatorji f’żoni b’restrizzjonijiet ambjentali (Artikolu 16),

- kondizzjonijiet li jirregolaw l-għoti ta’ impenji agri-ambjentali (Artikoli 23 u 24),

- kriterji għal selezzjoni għal investiment bl-għan li jittejjeb l-ipproċessar u n-negozju ta’ prodotti agrikoli (Artikolu 27 (2)),

- kondizzjonijiet li jirregolaw il-miżuri dwar il-selvikultura (Kaptolu VIII),

Skond l-istess proċedura, il-Kummissjoni tista' tidderoga mit-tieni inċiż ta’ l-Artikolu 28 (1) f’dawk ir-reġjuni l-aktar imbiegħda suġġetti għall-kondizzjoni li l-prodotti ppoċessati jkunu destinati għas-suq tar-reġjun f’dak il-każ.

IT-TITOLU III:

PRINĊIPJI ĠENERALI, DISPOSIZZJONIJIET AMMINISTRATTIVI U FINANZJARJI

IL-KAPITOLU I

PRINĊIPJI ĠENERALI

Sub-kapitolu 1

Sostenn mill-FAEGG

L- Artikolu 35

1. Sostenn mill-Komunità għal irtirar kmieni (Artikoli 10 sa 12), żoni anqas favoriti u żoni b’restrizzjonijiet ambjentali (Artikoli 13 sa 21), ambjent agrikolu (Artikoli 22 sa 24) u afforestazzjoni (Artikolu 31) għandhom ikunu ffinanzjati mis-Sezzjoni tal-Garanzija FAEGG ġewwa l-Komunità.

2. Sostenn mill-Komunità għal miżuri oħra ta’ żvilupp rurali għandhom ikunu ffinanzjati mill-FAEGG:

- Sezzjoni ta’ Gwida f’żoni koperti b’Oġġettiv 1,

- Sezzjoni ta’ Garanzija f’żoni li ma humiex koperti b’Oġġettiv 1.

3. Sostenn għal miżuri li hemm referenza għalihom fis-sitta, is-seba' u d-disa' inċiżi ta’ l-Artikolu 33 għandhom ikunu ffinanzjati mill-FAEGG f’żoni klassifikati permezz ta’ l-Oġġettivi 1 u 2 f’żoni fi transizzjoni f’dak li għandu x’jaqsam mal-finanzjament tagħhom ma hemmx disposizzjoni dwarhom fil-Fond Ewropew Reġjonali ta' l-Iżvilupp (FERŻ).

L- Artikolu 36

1. F’dak li għandu x’jaqsam ma' miżuri ta’ żvilupp rurali li hemm referenza għalihom fl-Artikolu 35 (2):

- f’żoni koperti b'Oġġettiv 1, Regolament (KE) Nru 1260/1999 għandu jkun applikabbli kif supplimentat minn regoli speċifiċi li jinstabu f’dan ir-Regolament,

- f’żoni koperti b’Oġġettiv 2, Regolament (KE) Nru 1260/1999 għandu jkun applikabbli kif supplimentat minn regoli speċifiċi li jinstabu f’dan ir-Regolament.

2. F’dak li għandu x’jaqsam ma' miżuri ta’ żvilupp rurali ffinanzjat mis-Sezzjoni tal-Garanzija ta' l-FAEGG, regoli speċifiċi tar-Regolament (KE) Nru 1260/1999 [20] u d-disposizzjonijiet adottati fl-implimentazzjoni tagħhom għandhom ikunu applikabbli ħlief fejn hemm mod ieħor ipprovdut f’dan ir-Regolament.

Sub-kapitolu II

Kompatibbiltà u konsistenza

L- Artikolu 37

1. Sostenn għal żvilupp rurali għandu jingħata biss għal miżuri li jkunu konformi mal-liġi tal-Komunità.

2. Miżuri bħal dawn għandhom ikunu konformi ma' l-istrateġiji l-oħra tal-Komunità u miżuri implimentati permezz tagħhom.

Partikolarment, l-ebda miżura li tidħol fl-iskop ta’ dan ir-regolament m’għandha tkun eliġibbli għal sostenn permezz ta’ xi skema oħra ta’ sostenn tal-Komunità jekk tkun inkompattibli ma' xi kondizzjoni speċifika pprovduta f’dan ir-Regolament.

3. Għandha wkoll tkun assigurata konsistenza ma' miżuri implimentati permezz ta’ miżuri oħra tal-politika komuni agrikola, u partikolarment bejn miżuri ta’ sostenn ta’ żvilupp rurali min-naħa l-waħda u miżuri implimentati permezz ta' l-organizzazzjoni tas-suq komuni u kwalità agrikola u miżuri tas-saħħa min-naħa l-oħra, kif ukoll bejn miżuri differenti ta’ sostenn għal żvilupp rurali.

Għalhekk, l-ebda sostenn permezz ta’ dan ir-Regolament m’għandu jingħata għal:

- miżuri li jidħlu fl-iskop ta’ skemi ta’ sostenn permezz ta' l-organizzazzjoni komuni agrikola, bl-eċċezzjonijiet, meta jkunu ġġustifikati, bi kriterji oġġettivi, li jistgħu jkunu definiti bi qbil ma' l-Artikolu 50,

- miżuri ta’ sostenn għal proġetti ta’ riċerka, biex jinkoraġġixxu prodotti agrikoli jew biex jeridikaw mard ta' l-annimali.

4. Stati Membri jistgħu jeżiġu iżjed jew aktar kondizzjonijiet restrittivi għall-għoti ta’ sostenn mill-Komunità għal żvilupp rurali basta li dawk il-kondizzjonijiet ikunu konsistenti ma' l-oġġettivi u mal-ħtiġiet ipprovduti f’dan ir-Regolament.

L- Artikolu 38

1. Pagamenti ma jistgħux isiru għal dak li għandu x’jaqsam ma' l-istess miżuri kemm permezz ta’ dan ir-Regolament u skema oħra ta’ sostenn tal-Komunità.

2. Sostenn għal diversi miżuri permezz ta’ dan ir-Regolament jistgħu jkunu magħquda biss jekk dawk il-miżuri jkunu konsistenti u kompatibbli ma xulxin. Jekk meħtieġ, il-livell tas-sostenn għandu jkun aġġustat.

L- Artikolu 39

1. Stati Membri għandhom jieħdu dawk il-passi kollha meħtieġa ħalli jassiguraw il-kompatibbiltà u l-konsistenza ta’ miżuri ta’ sostenn għal żvilupp rurali bis-saħħa tad-dispożizzjonijiet meħtieġa f’dan il-Kapitolu.

2. Pjanijiet għal żvilupp rurali mibgħuta mill-Istati Membri għandhom jinkludu studju dwar il-kompatibbiltà u l-konsistenza tal-miżuri ta’ sostenn maħsuba u ta’ indikazzjoni tal-miżuri meħuda sabiex tkun assigurata l-kompatibbiltà u l-konsistenza.

3. Miżuri ta’ sostenn għandhom, fejn meħtieġ, ikunu sussegwentament riveduti ħalli jassiguraw il-kompatibbiltà u l-konsistenza.

IL-KAPITOLU II

PROGRAMMAR

L- Artikolu 40

1. Miżuri ta’ żvilupp rurali ffinanzjati mis-Sezzjoni ta’ Gwida ta' l-FAEGG għandhom jiffurmaw parti mill-programmazzjoni għal reġjuni ta’ Oġġettiv 1 bi qbil mar-Regolament (KE) Nru 1260/1999.

2. Miżuri ta’ żvilupp rurali apparti minn dawk li hemm referenza għalihom fl-Artikolu 35 (1) jistgħu jifformaw parti mill-programmazzjoni għal reġjuni ta’ Oġġettiv 2 bi qbil mar-Regolament (KE) Nru 1260/1999.

3. Miżuri oħra ta’ żvilupp rurali li ma jagħmlux parti mill-programmazzjoni bi qbil mal-paragrafi 1 u 2 għandhom ikunu suġġetti għal programmazzjoni ta’ żvilupp rurali bi qbil ma' l-Artikoli 41 sa 44.

4. B’referenza għal miżuri xierqa ta’ żvilupp rurali, Stati Membri jistgħu wkoll jissottomettu għall-approvazzjoni Regolamenti ta’ qafas ġenerali li jifformaw parti mill-programmazzjoni bi qbil mal-paragrafi 1 sa 3, sakemm dan ikun xieraq bl-għan li jinżammu kondizzjonijiet uniformi.

L- Artikolu 41

1. Pjanijiet għal żvilupp rurali għandhom jitħejjew fil-livell ġeografiku li jkun meqjus li jkun l-aktar xieraq. Dawn għandhom ikunu mħejjija mill-awtoritajiet kompetenti mill-Istat Membru u għandhom ikunu sottomessi mill-Istat Membru lill-Kummissjoni wara li l-awtoritajiet kompetenti u l-organizzazzjonijiet fil-livell territorjali xieraq ikunu ġew ikkonsultati.

2. Miżuri ta’ sostenn għal żvilupp rurali li sejrin ikunu adottati f’żona waħda għandhom ikunu integrati, kull meta jkun possibbli, fi pjan wieħed. Kull meta diversi pjanijiet jenħtieġ li jkunu stabbiliti, ir-relazzjoni bejn miżuri ppreżentati f’dawk il-pjanijiet għandha tkun indikata u l-kompatibbiltà u l-konsistenza tagħhom tkun assigurata.

L- Artikolu 42

Pjanijiet ta’ żvilupp rurali għandhom ikopru perjodu ta’ seba' snin mill-1 ta’ Jannar 2000.

L- Artikolu 43

1. Pjanijiet ta’ żvilupp rurali għandhom jinkludu:

- deskrizzjoni kwantifikata tas-sitwazzjoni kurrenti li turi d-disparità, in-nuqqas u l-potenzjal għal żvilupp, ir-riżorsi finanzjarji użati u r-riżultati prinċipali ta' l-operazzjonijiet ta’ dawk magħmula fil-perjodu ta' programmazzjoni ta' qabel f’dak li għandu x’jaqsam mal-valutazzjonji tar-riżultati disponibbli,

- deskrizzjoni tal-politika proposta, l-oġġettivi kwantifikati tagħha, il-prijoritajiet ta’ żvilupp rurali magħżula, u ż-żona ġeografika koperta,

- valutazzjoni li turi l-impatt mistenni ekonomiku, ambjentali u soċjali, inklużi l-effetti fuq l-impjiegi,

- tabella ġenerali finanzjara indikattiva li tiġbor fil-qosor ir-riżorsi finanzjarji nazzjonali u tal-Komunità li hemm disposizzjoni dwarhom u li jikkorrespondu ma' kull prijorità ta’ żvilupp rurali sottomessi fil-kuntest tal-pjan u, meta l-pjan ikopri żoni rurali f’Oġġettiv 2, jidentifika l-ammonti indikattivi għal miżuri ta’ żvilupp rurali permezz ta’ l-Artikolu 33 f’dawk iż-żoni,

- deskrizzjoni tal-miżuri kontemplati għall-implimentazzjoni tal-pjanijiet, u partikolarment skemi ta’ għajnuna, inklużi l-punti meħtieġa ħalli jkunu studjati r-regoli tal-kompetizzjoni,

- fejn xieraq, informazzjoni dwar il-ħtiġiet ta’ xi studji, proġetti ta’ demostrazzjoni, taħriġ jew assistenza teknika għal operazzjonijiet li għandhom x’jaqsmu mat-tħejjija, implimentazzjoni jew adattament tal-miżuri kkonċernati,

- in-nomina ta' l-awtoritajiet kompetenti u tal-korpi responsabbli,

- disposizzjonijiet biex jassiguraw l-effettività u l-implimentazzjoni korretta tal-pjanijiet, inkluż is-sorveljar u l-valutazzjoni, definizzjoni għal indikaturi kwantifikati għal valutazzjoni, arranġamenti għal kontrolli u sanzjonijiet u pubbliċità adegwata,

- ir-riżultati tal-konsultazzjonijiet u n-nomina ta' l-awtoritajiet assoċjati u l-korpi kif ukoll tas-sħab ekonomiċi u soċjali fil-livelli xierqa.

2. Fil-pjanijiet tagħhom, l-Istati Membri għandhom:

- jipprovdu għal miżuri agri-ambjentali ġewwa t-territorji tagħhom kollha, u bi qbil mal-ħtiġiet speċifiċi tagħhom,

- jassiguraw li l-bilanċ meħtieġ jinżamm bejn id-diversi miżuri ta’ sostenn.

L- Artikolu 44

1. Pjanijiet ta’ żvilupp rurali għandhom ikunu sottomessi mhux aktar tard minn sitt xhur wara d-dħul fis-seħħ ta’ dan ir-Regolament.

2. Il-Kummissjoni għandha tistudja l-pjanijiet proposti ħalli tiddetermina jekk dawn ikunux konsistenti ma' dan ir-Regolament. Fuq il-bażi tal-pjanijiet, hi għandha tapprova d-dokumenti għal programmazzjoni ta’ żvilupp rurali bi qbil mal-proċedura li hemm referenza għaliha fl-Artikolu 50 (2) tar-Regolament (KE) Nru 1260/1999 fi żmien sitt xhur wara s-sottomissjoni tal-pjanijiet.

IL-KAPITOLU III

MIŻURI ADDIZZJONALI U INIZJATTIVI TAL-KOMUNITÀ

L- Artikolu 45

1. Bis-saħħa ta’ l-Artikolu 21 (2) tar-Regolament (KE) Nru 1260/1999, il-Kummissjoni, permezz tal-proċedura pprovduta fl-Artikolu 50 (2) ta’ dak ir-Regolament, tista' testendi l-iskop ta’ l-għajnuna mis-Sezzjoni ta’ Gwida ta' l-FAEGG aktar lil hinn minn dak li hemm disposizzjoni dwaru fl-Artikolu 35 (2) ta’ dan ir-Regolament u l-miżuri ta’ finanzjament eliġibbli permezz tar-Regolamenti tal-Kunsill (KE) Nru 1262/1999 [21], (KE) Nru 1261/1999 [22] u (KE) Nru 1262/1999 [23] bl-għan li jkunu implimentati l-miżuri kollha fl-inizjattiva tal-Komunità għal żvilupp rurali.

2. Is-Sezzjoni ta’ Garanzija ta' l-FAEGG tista’, fuq l-inizjattiva tal-Kummissjoni, tiffinanzja studji relatati mal-programmazzjoni ta’ żvilupp rurali.

IL-KAPITOLU IV

DISPOSIZZJONIJIET FINANZJARJI

L- Artikolu 46

1. Sostenn mill-Komunità għal żvilupp rurali mis-Sezzjoni tal-Garanzija ta' l-FAEGG għandu jkun suġġett għall- ippjanar finanzjarju u tal-kontijiet fuq bażi annwali. L-ippjanar finanzjarju għandu jifforma parti mill-programmazzjoni ta’ żvilupp rurali (Artikolu 40 (3)) jew ta’ programmazzjoni li għandha x’jaqsam ma' Oġġettiv 2.

2. Il-Kummissjoni għandha tagħmel allokazzjonijiet inizjali lill-Istati Membri, maqsuma fuq bażi annwali u tuża l-kriterji oġġettivi li jqisu s-sitwazzjonijiet partikolari u l-ħtiġiet, u l-isforzi li għandhom jittieħdu speċjalment għall-ambjent, ħolqien ta’ impjiegi u l-manteniment tal-pajsaġġ.

3. Allokazzjonijiet inizjali għandhom ikunu aġġustati fuq il-bażi ta’ spiża attwali u tbassir ta’ spiża riveduta mibgħuta mill-Istati Membri billi jkunu kkunsidrati l-oġġettivi tal-programmazzjoni, u jkunu suġġetti għal fondi disponibbli u bħala regola jkunu konsistenti ma' l-intensità ta’ l-għajnuna f’żoni rurali koperti b’Oġġettiv 2.

L- Artikolu 47

1. Disposizzjonijiet finanzjarji meħtieġa fl-Artikoli 31, 32 (ħlief għall-ħames sub-paragrafu tal-paragrafi 1 tiegħu), 34, 38 u 39 tar-Regolament (KE) Nru 1260/1999 m’għandhomx ikunu applikabbli għal sostenn dwar miżuri ta’ żvilupp rurali f’dak li għandu x’jaqsam ma' Oġġettiv 2.

Il-Kummissjoni għandha tieħu l-azzjoni meħtieġa ħalli tassigura l-implimentazzjoni effiċjenti u koerenti ta’ dawn il-miżuri li għandhom mill-anqas jilħqu l-istess normi bħal dawk meħtieġa fid-disposizzjonijiet li hemm referenza għalihom fl-ewwel sub-paragrafu, inkluż il-prinċipju ta’ awtorità waħdanija ta’ amministrazzjoni.

2. Għal miżuri koperti bi programmazzjoni ta’ żvilupp rurali, il-Komunità għandha tikkontribwixxi għal finanzjament bis-saħħa tal-prinċipji meħtieġa fl-Artikoli 29 u 30 tar-Regolament (KE) Nru 1260/1999.

F’dan ir-rigward:

- il-kontribuzzjonijiet tal-Komunità m’għandhomx jeċċedu 50 % ta' l-ispiża totali eliġibbli, bħala regola ġenerali, għandha tkun ugwali għal mill-anqas 25 % ta' l-ispiża pubblika eliġibbli fiż-żoni li ma jkunux koperti minn Oġġettiv 1 u Oġġettiv 2,

- għal investiment li joħloq qliegħ, ir-rati meħtieġa fl-Artikolu 29 (4) (a) (ii) u (iii) u (b) (ii) u (iii) tar-Regolament (KE) Nru 1260/1999 għandhom ikunu applikabbli. Oqsma agrikoli u tas-selvikultura u negozji involuti fl-ipproċessar u n-negozju ta’ prodotti agrikoli u tas-selvikultura huma negozji li jirrispettaw fil-qofol ta’ dak li jfisser l-Artikolu 29 (4) (b) (iii),

- il-kontribuzzjonijiet tal-Komunità fil-programmazzjoni tal-miżuri meħtieġa f’Artikoli 22 sa 24 ta’ dan ir-Regolament għandhom ikunu ta’ 75 % fiż-żoni koperti b’Oġġettiv 1 u 50 % fiż-żoni l-oħra.

Il-ħames sub-paragrafu ta’ l-Artikolu 32 (1) tar-Regolament (KE) Nru 1260/1999 għandu jkun applikabbli għal dawn il-pagamenti.

3. Pagamenti u assistenza finanzjarja mis-Sezzjoni ta’ Garanzija ta' l-FAEGG tista' tieħu għamla ta’ avvanzamenti għall-implimentazzjoni tal-programm u ta’ pagamenti f’dak li għandu x’jaqsam ma' l-ispiża minfuqa.

IL-KAPITOLU V

SORVELJAR U VALUTAZZJONI

L- Artikolu 48

1. Il-Kummissjoni u l-Istati Membri għandhom jassiguraw is-sorveljar effettiv u l-implimentazzjoni ta’ programmazzjoni għal żvilupp rurali.

2. Dan is-sorveljar għandu jkun imwettaq permezz ta’ proċeduri konġunti miftiehma.

Sorveljar għandu jitwettaq b’referenza għal indikaturi speċifiċi fiżiċi u finanzjarji miftiehma u stabbiliti bil-quddiem.

Stati Membri għandhom jissottomettu rapporti annwali ta’ progress lill-Kummissjoni.

3. Fejn xieraq, kumitati ta’ sorveljar għandhom ikunu stabbiliti.

L- Artikolu 49

1. Valutazzjoni ta’ miżuri koperti bi programmazzjoni ta’ żvilupp rurali, għandhom jitwettqu fuq il-bażi tal-prinċipji pprovduti fl-Artikoli 40 sa 43 tar-Regolament (KE) Nru 1260/1999.

2. Is-Sezzjoni ta’ Garanzija ta' l-FAEGG tista', fil-qafas tar-riżorsi finanzjarji allokati għal programmi, tipparteċipa fil-finanzjament tal-valutazzjoni li għandha x’taqsam ma' l-iżvilupp rurali fl-Istati Membri. Is-Sezzjoni ta’ Garanzija ta' l-FAEGG tista' wkoll, fuq l-inizjattiva tal-Kummissjoni, tiffinanzja valutazzjoni fil-livell tal-Komunità.

IL-KAPITOLU VI

REGOLI TA’ IMPLIMENTAZZJONI

L- Artikolu 50

Regoli dettaljati għall-applikazzjoni ta’ dan it-Titolu għandhom ikunu adottati bi qbil mal-proċedura pprovduta fl-Artikolu 50 (2) tar-Regolament (KE) Nru 1260/1999.

Dawn ir-regoli jistgħu partikolarment jiddefenixxu d-dettalji ta’:

- il-preżentazzjoni ta’ pjanijiet ta’ żvilupp rurali (Artikoli 41 sa 44),

- ir-reviżjoni ta’ dokumenti għal programmazzjoni ta’ żvilupp rurali,

- l-ippjanar finanzjarju, partikolarment biex jassigura d-dixxiplina ta' l-estimi (Artikolu 46), u l-parteċipazzjoni fil-finanzjament (Artikolu 47 (2)),

- sorveljar u valutazzjoni (Artikoli 48 u 49),

- kif jassiguraw konsistenza bejn miżuri ta’ żvilupp rurali u miżuri ta’ sostenn introdotti bl-organizzazzjonijiet tas-suq (Artikolu 37).

IT-TITOLU IV

GĦAJNUNA STATALI

L- Artikolu 51

1.2. Ħlief fejn hemm ipprovdut mod ieħor f’dan it-Titolu, l-Artikoli 87 sa 89 tat-Trattat għandhom ikunu applikabbli għal għajnuna mogħtija mill-Istati Membri għal miżuri ta’ sostenn għal żvilupp rurali.

B’danakollu, l-Artikoli 87 sa 89 tat-Trattat m’għandhomx ikunu applikabbli għal kontribuzzjonijiet finanzjarji pprovduti minn Stati Membri għal miżuri li jkunu suġġetti għal sostenn mill-Komunità fil-qofol ta’ dak li jfisser l-Artikolu 36 tat-Trattat bi qbil mad-disposizzjonijiet ta’ dan ir-Regolament.

2. Għajnuna għal investiment f’oqsma agrikoli li teċċedi l-persentaġġi li hemm referenza għalihom fl-Artikolu 7 għandha tkun ipprojbita. Din il-projbizzjoni m’għandhiex tapplika għal għajnuna għal investimenti li għandhom x’jaqsmu ma':

investimenti magħmula prinċipalment fl-interess pubbliku li jkollhom x’jaqsmu mal-konverżjoni ta’ pajsaġġi tradizzjonali li jkunu ngħataw l-għamla b’attivitajiet agrikoli jew tas-selvikultura jew ta’ ri-allokazzjoni ta’ bini ta’ rziezet.

- il-protezzjoni u t-titjib fl-ambjent,

- it-titjib fil-kondizzjonijiet ta' l-iġjene ta’ intrapriżi tal-merħliet ta' l-annimali u tal-ħarsien ta' l-annimali.

- 3. Għajnuna Statali mogħtija lill-bdiewa bħala kumpens għal xkiel naturali f’żoni anqas favoriti għandha tkun ipprojbita jekk ma tissodisfax il-kondizzjonijiet maħsuba fl-Artikoli 14 u 15.

3. 4. Għajnuna Statali bħala sostenn lill-bdiewa li jagħtu impenn agri-ambjentali li jonqsu milli jissodisfaw il-kondizzjonijiet meħtieġa fl-Artikoli 22 sa 24 għandha tkun ipprojbita. B’danakollu, għajnuna addizzjonali li teċċedi l-ammonti massimi stabbiliti bi qbil ma l-Artikolu 24 (2) tista' tingħata jekk tkun iġġustifikata permezz tal-paragrafu 1 ta’ dak l-Artikolu. F’każijiet eċċezzjonali ġġustifikati kif xieraq tista' tkun permissibli deroga

4. f’dak li għandu x’jaqsam mat-tul minimu ta’ dawn l-impenji kif meħtieġa fl-Artikolu 23 (1).

L- Artikolu 52

Fl-iskop ta’ l-Artikolu 36 tat-Trattat, għajnuna Statali intenzjonata biex tipprovdi finanzjament addizzjonali għal miżuri ta’ żvilupp rurali li dwarhom sostenn mill-Komunità jkun ingħata għandhom ikunu notifikati mill-Istati Membri u approvati mill-Kummissjoni bi qbil mad-disposizzjonijiet ta’ dan ir-Regolament bħala parti mill-programmazzjoni li hemm referenza għaliha fl-Artikolu 40. L-ewwel sentenza ta’ l-Artikolu 88 (3) tat-Trattat m’għandhiex tapplika għal għajnuna hekk innotifikata.

IT-TITOLU V:

REGOLI TRANSITORJI U FINALI

L- Artikolu 53

1. Jekk miżuri speċifiċi jkunu meħtieġa ħalli jiffaċilitaw it-transizzjoni mis-sistema eżistenti lejn waħda stabbilità b’dan ir-Regolament, dawk il-miżuri għandhom ikunu adottati mill-Kummissjoni bi qbil mal-proċedura pprovduta fl-Artikolu 50 (2) tar-Regolament (KE) Nru 1260/1999.

2. Miżuri bħal dawn għandhom partikolarment ikunu adottati għall-integrazzjoni tas-sostenn eżistenti ta’ azzjonijiet tal-Komunità, approvati mill-Kummissjoni għal perjodu li jispċċa wara l-1 ta’ Jannar 2000 jew mingħajr ebda limitu ta’ żmien, fis-sostenn ta’ żvilupp rurali skond id-disposizzjoni għal dan f’dan ir-Regolament.

L- Artikolu 54

1. Artikolu 17 tar-Regolament tal-Kunsill (KEE) Nru 1606/71 tas-26 ta’ Lulju 1971 dwar l-organizzazzjoni komuni tas-suq tal-hops [24] għandha tinbidel b’dan li ġej:

"L- Artikolu 17

1. Ir-Regolamenti dwar il-finanzjament ta' politika komuni agrikola għandhom ikunu applikabbli fin-negozju tal-prodotti li hemm referenza għalihom fl-Artikolu 1 (1) mid-data ta' l-implimentazzjoni ta' l-arranġamenti meħtieġa hawnhekk.

2. L-għajnuna li hemm referenza għaliha fl-Artikolu 8 għandha tkun suġġetta għal finanzjament parzjali mill-Komunità.

3. Stati Membri jistgħu jħallsu l-għajnuna li hemm referenza għaliha fl-Artikolu 12 lill-produtturi bejn is-16 ta’ Ottubru u l-31 ta’ Diċembru tas-sena tas-suq f’dak li għandu x’jaqsam ma' l-għajnuna li tkun saret applikazzjoni dwarha.

6. 4. Il-Kummissjoni għandha, billi ssegwi l-proċedura pprovduta fl-Artikolu 20, tadotta regoli għall-applikazzjoni ta’ dan l-Artikolu."

2. Artikolu 6 tar-Regolament tal-Kunsill (KEE) Nru 404/93 tat-13 ta’ Frar 1993 dwar l-organizzazzjoni komuni tas-suq tal-banana [25] għandha tkun mibdula b’dan it-test li ġej:

"L- Artikolu 6

1. Għal ħames snin wara d-data ta’ għarfien, l-Istati Membri għandhom jagħtu lill-organizzazzjonijiet ta’ produtturi rikonoxxuti assistenza biex jinkoraġġixxu l-istabbiliment tagħhom u jassistu fl-operazzjoni amministrattiva tagħhom.

2. Għajnuna bħal din:

- għandha tkun, għall-ewwel, it-tieni, it-tielet, ir-raba’ u l-ħames sena rispettivament, 5 %, 5 %, 4 %, 3 % u 2 % tal-valur tal-produzzjoni nnegozjata permezz ta' l-awspiċji ta' l-organizzazzjoni tal-produttur,

- m’għandhiex teċċedi l-ispiża attwali tal-formazzjoni u ta' l-operat amministrattiv ta' l-organizzazzjoni kkonċernata,

- għandha titħallas b'rati annwali għal massimu ta’ seba' snin wara d-data ta’ l-għarfien.

Il-valur tal-produzzjoni ta’ kull sena għandu jkun ikkalkulat fuq il-bażi ta’:

- il-volum annwali attwalment innegozjat,

- il-medja tal-prezzijiet tal-produttur akkwistati.

3. Organizzazzjonijiet ta’ produtturi li joriġinaw minn organizzazzjonijiet li diġà jkunu konformi kważi għal kollox mal-kondizzjonijiet ta’ dan ir-Regolament għandhom jikkwalifikaw għal għajnuna permezz ta’ dan l-Artikolu biss jekk ikunu stabbiliti bħala riżultat ta’ għaqda li tawtorizza l-oġġettivi li hemm referenza għalihom fl-Artikolu 5 biex ikunu milħuqa aktar effettivament. B’danakollu, f’każ bħal dan, l-għajnuna għandha tingħata biss f’dak li jirrigwarda l-ispejjeż tat-twaqqif ta' l-organizzazzjoni (spiża minfuqa b’konnessjoni max-xogħol preparatorju u mat-tħejjija tal-memorandum u l-artikoli ta' l-assoċjazzjoni).

4. L-għajnuna li hemm referenza għaliha f’dan l-Artikolu għandha tkun innotifikata lill-Kummissjoni f’rapport mill-Istati Membri fl-għeluq ta’ kull sena finanzjarja."

3. Regolament tal-Kunsill (KE) Nru 2200/96 tat-28 ta’ Ottubru 1996 dwar l-organizzazzjoni komuni tas-suq għal frott u ħxejjex [26] huwa b’hekk emendat kif ġej:

(a) l-Artikolu 15 (6) għandu jkun mibdul b’dan li ġej:

"6. F’reġjuni tal-Komunità fejn ċertu grad ta' l-organizzazzjoni ta’ prodotti tkun pjuttost baxxa, Stati Membri jistgħu jkunu awtorizzati, fuq talba li tkun issostanjata kif jixraq, li jħallsu lill-organizzazzjonijiet tal-produttur assistenza finanzjarja nazzjonali ekwivalenti għal massimu ta’ nofs il-kontribuzzjonijiet finanzjarji tal-produtturi. Din l-assistenza għandha tkun addizzjonali għall-fond operattiv.

Għal Stati Membri fejn is-suq ta' l-organizzazzjonijiet tal-produttur ikun anqas minn 15 % tal-produzzjoni tal-frott u l-ħxejjex u li l-produzzjoni tagħhom tal-frott u l-ħxejjex tirrappreżenta anqas minn 15 % tat-total tal-prodott agrikolu tagħhom, l-assistenza li hemm referenza għaliha fl-ewwel sub-paragrafu tista' parzjalment tkun mogħtija lura mill-Komunità fuq talba ta' l-Istat Membru kkonċernat."

(b) l-Artikolu 52 għandu jkun mibdul b’dan li ġej:

"L- Artikolu 52

1. Spiża li għandha x’taqsam mal-pagament għal kumpens mill-Komunità għat-tneħħija u l-finanzjament mill-Komunità tal-fond operattiv, il-miżuri speċifiċi li hemm referenza għalihom fl-Artikolu 17 u l-Artikoli 53, 54 u 55 u verifiki minn esperti ta' l-Istati Membri li jkunu disponibbli għall-Kummissjoni fl-applikazzjoni ta’ l-Artikolu 40 (1) għandhom ikunu meqjusa li jkunu ta’ intervent biex jistabbilizzaw is-swieq agrikoli fil-qofol ta’ dak li jfisser l-Artikolu 1 (2) (b) tar-Regolament (KE) Nru 1257/1999 [27].

2. Spiża li għandha x’taqsam ma' l-għoti ta’ l-għajnuna minn Stati Membri bi qbil ma' l-Artikolu 14 u t-tieni sub-paragrafu ta’ l-Artikolu 15 (6) għandha tkun meqjusa bħala intervent biex jistabilizza s-swieq agrikoli fil-qofol ta’ dak li jfisser l-Artikolu 1 (2) (b) tar-Regolament (KE) Nru 1257/1999. Għandha tkun eliġibbli għal finanzjament parzjali mill-Komunità.

3. Il-Kummissjoni għandha, billi ssegwi l-proċedura pprovduta fl-Artikolu 46, tadotta regoli għall-applikazzjoni ta’ dan l-Artikolu.

4. Id-disposizzjonijiet ta’ Titolu VI għandhom ikunu applikabbli mingħajr preġudizzju għall-applikazzjoni tar-Regolament tal-Kunsill (KEE) Nru 4045/89 tal-21 ta’ Diċembru 1989 dwar skrutinju minn Stati Membri tat-transazzjonijiet li jagħmlu parti mis-sistema ta’ finanzjament mis-Sezzjoni tal-Garanzija tal-Fond Ewropew Agrikolu dwar Gwida u Garanzija u jħassar id-Direttiva 77/435/KEE [28]."

L- Artikolu 55

1. Dawn ir-Regolamenti li ġejjin huma b'dan imħassra:

- Regolament (KEE) Nru 4256/88,

- Regolamenti (KE) Nru 950/97, (KE) Nru 951/97, (KE) Nru 952/97 u Regolament (KEE) Nru 867/90,

- Regolamenti (KEE) Nru 2078/92, (KEE) Nru 2079/92, (KEE) Nru 2080/92,

- Regolament (KEE) Nru 1610/89

2. Dawn id-disposizzjonijiet li ġejjin huma b’dan mħassra:

- l-Artikolu 21 tar-Regolament (KEE) Nru 3763/91 [29],

- l-Artikolu 32 tar-Regolament (KEE) Nru 1600/92 [30],

- l-Artikolu 27 tar-Regolament (KEE) Nru 1601/92 [31],

- l-Artikolu 13 tar-Regolament (KEE) Nru 2019/93 [32].

3. Ir-Regolamenti mħassra u d-disposizzjonijiet imneħħija permezz tal-paragrafi 1 u 2 rispettivament għandhom jibqgħu jkunu applikabbli għal azzjonijiet approvati mill-Kummissjoni permezz tar-Regolament qabel l-1 ta’ Jannar 2000.

4. Direttivi tal-Kunsill u tal-Kummissjoni li jadottaw listi ta’ żoni anqas favoriti jew jemendaw dawk il-listi bi qbil ma' l-Artikolu 21 (2) u (3) tar-Regolament (KE) Nru 950/97 għandhom jibqgħu effettivi sakemm ma jkunux emendati aktar fil-qafas tal-programmi.

L- Artikolu 56

Dan ir-Regolament għandu jidħol fis-seħħ fis-seba’ jum ta’ wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Għandu jkun applikabbli f’dak li għandu x’jaqsam mas-sostenn mill-Komunità mill-1 ta’ Jannar 2000.

Dan ir-Regolament għandu jorbot fl-intier tiegħu u jkun direttament applikabbli fl-Istati Membri kollha.

Magħmul f'Brussel, 17 ta’ Mejju 1999.

Għall-Kunsill

Il-President

K. H. Funke

[1] ĠU C 170, ta' l-4.6.1998, p. 7.

[2] L-opinjoni mogħtija fis-6 ta’ Mejju 1999 (li għadha ma ġietx ippubblikata fil-Ġurnal Uffiċjali).

[3] ĠU C 407, tat-28.12.1998, p. 210.

[4] ĠU C 93, tas-6.4.1999, p. 1.

[5] ĠU C 401, tat-22.12.1998, p. 3.

[6] ĠU L 161, tas-26.6.1999, p. 1.

[7] ĠU L 185, tal-15.7.1988, p. 9. Regolament kif l-aħħar emendat bir-Regolament (KE) Nru 3193/94 (ĠU L 337, ta' l-24.12.1994, p. 11).

[8] ĠU L 374, 31.12.1988, p. 25. Regolament kif l-aħħar emendat bir-Regolament (KE) Nru 2085/93 (ĠU L 193, tal-31.7.1993, p. 44).

[9] ĠU L 215, tat-30.7.1992, p. 85. Regolament kif l-aħħar emendat bir-Regolament tal-Kummissjoni (KE) Nru 2272/95 (ĠU L 288, ta' l-1.12.1995, p. 35). Regolament msewwi bir-Regolament tal-Kummissjoni (KE) Nru 1962/96 (ĠU L 259, 12.10.1996, p. 7).

[10] ĠU L 215, 30.7.1992, p. 91. Regolament kif emendat bir-Regolament tal-Kummissjoni (KE) Nru 2773/95 (ĠU L 288, 1.12.1995, p. 37).

[11] ĠU L 215, tat-30.7.1992, p. 96. Regolament kif l-aħħar emendat bir-Regolament tal-Kummissjoni (KE) Nru 231/96 (ĠU L 30, 8.2.1996, p. 33).

[12] ĠU L 142, 2.6.1997, p. 1. Regolament kif emendat bir-Regolament (KE) Nru 2331/98 (ĠU L 291, 30.10.1998, p. 10).

[13] ĠU L 142, 2.6.1997, p. 22.

[14] ĠU L 165, 15.6.1989, p. 3.

[15] ĠU L 91, 6.4.1990, p. 7.

[16] ĠU L 142, 2.6.1997, p. 30.

[17] ĠU L 125, 23.5.1996, p. 3.

[18] ĠU L 125, 23.5.1996, p. 10.

[19] ĠU L 217, 31.7.1992, p. 3. Regolament kif emendat bir-Regolament (KE) Nru 308/97 (ĠU L 51, 21.2.1997, p. 2).

[20] Ara paġna 103 ta’ dan il-Ġurnal Uffiċjali.

[21] ĠU L 161, 26.6.1999, p. 48.

[22] ĠU L 161, 26.6.1999, p. 43.

[23] ĠU L 161, 26.6.1999, p. 54.

[24] ĠU L 175, 4.8.1971, p. 1. Regolament kif l-aħħar emendat bir-Regolament (KE) Nru 1554/97 (ĠU L. 208, 2.8.1997, p. 1).

[25] ĠU L 47, 25.2.1993, p. 1. Regolament kif l-aħħar emendat bir-Regolament (KE) Nru 1637/98 (ĠU L. 210, 28.7.1998, p. 28).

[26] ĠU L 297, 21.12.1996, p. 1. Regolament kif l-aħħar emendat bir-Regolament (KE) Nru 857/1999 (ĠU L. 108, 27.4.1999, p. 7).

[27] ĠU L 160, 26.6.1999, p. 80.

[28] ĠU L 388, 30.12.1989, p. 17. Regolament kif l-aħħar emendat bir-Regolament (KE) Nru 3235/94 (ĠU L. 338, 28.12.1994, p. 16).

[29] ĠU L 356, 24.12.1991, p. 1.

[30] ĠU L 173, 27.6.1992, p. 1.

[31] ĠU L 173, 27.6.1992, p. 13.

[32] ĠU L 184, 27.7.1993, p. 1.

--------------------------------------------------

L-ANNESS

TABELLA TA' AMMONTI

Artikolu | Suġġett | Euro | |

8(2) | Twaqqif ta' l-għajnuna | 25000 | |

12(1) | Irtir kmieni | 15000 | kull trasferent u sena |

150000 | ammont totali kull trasferent |

3500 | kull ħaddiem u sena |

35000 | ammont totali kull sena |

15(3) | Allowance minima kompensatorja | 25 | kull ettaru użat għall-agrikultura |

Allowance massima kompensatorja | 200 | kull ettaru ta' arji użati għall- agrikultura |

16 | Ħlas massimu | 200 | kull ettaru |

24(2) | Uċuħ annwali | 600 | kull ettaru |

Uċuħ speċjalizzati perenni | 900 | kull ettaru |

Użu ieħor ta' l-art | 450 | kull ettaru |

31(4) | Premium massimu annwali biex ikopri telf ta' dħul minn afforestazzjoni | | |

—għal bdiewa jew assoċjazzjonijiet tagħhom | 725 | kull ettaru |

—għal kull persuna oħra fid-dritt privat | 185 | kull ettaru |

32(2) | Ħlas minimu | 40 | kull ettaru |

Ħlas massimu | 120 | kull ettaru |

--------------------------------------------------