(1)

Ir-Regolament ta’ Implimentazzjoni tal-Kummissjoni (UE) 2021/2051 tal-24 ta’ Novembru 2021 li jikkonċerna l-awtorizzazzjoni ta’ preparazzjoni ta’ Bacillus velezensis PTA-6507, Bacillus velezensis NRRL B-50013 u Bacillus velezensis NRRL B-50104 bħala addittiv fl-għalf għad-dundjani tas-simna (id-detentur tal-awtorizzazzjoni: Danisco Animal Nutrition irrappreżentata minn Genencor International B.V.) (1) għandu jiġi inkorporat fil-Ftehim dwar iż-ŻEE.

(2)

Ir-Regolament ta’ Implimentazzjoni tal-Kummissjoni (UE) 2021/2080 tas-26 ta’ Novembru 2021 dwar l-awtorizzazzjoni tal-monoidroklorur monoidrat tal-L-istidina prodott mill-fermentazzjoni bl-Escherichia coli NITE SD 00268 bħala addittiv tal-għalf għall-ispeċijiet kollha tal-annimali ħlief il-ħut bil-pinen (2) għandu jiġi inkorporat fil-Ftehim dwar iż-ŻEE.

(3)

Ir-Regolament ta' Implimentazzjoni tal-Kummissjoni (UE) 2021/2090 tal-25 ta' Novembru 2021 li jikkonċerna ċ-ċaħda tal-awtorizzazzjoni tad-diossidu tat-titanju bħala addittiv tal-għalf għall-ispeċijiet kollha tal-annimali (3) għandu jiġi inkorporat fil-Ftehim dwar iż-ŻEE.

(4)

Din id-Deċiżjoni tikkonċerna l-leġiżlazzjoni dwar l-għalf. Il-leġiżlazzjoni li tirrigwarda l-għalf ma għandhiex tapplika għal-Liechtenstein sakemm l-applikazzjoni tal-Ftehim bejn il-Komunità Ewropea u l-Konfederazzjoni Żvizzera dwar il-kummerċ fil-prodotti agrikoli tibqa’ estiża għal-Liechtenstein, kif speċifikat fl-adattamenti settorjali tal-Anness I tal-Ftehim dwar iż-ŻEE. Għaldaqstant, din id-Deċiżjoni ma tapplikax għal-Liechtenstein.

(5)

Jenħtieġ għalhekk, li l-Anness I għall-Ftehim dwar iż-ŻEE jiġi emendat skont dan,