Dan it-test hu maħsub purament bħala għodda ta’ dokumentazzjoni u m’għandu l-ebda effett legali. L-istituzzjonijiet tal-Unjoni m'għandhom l-ebda responsabbiltà għall-kontenut tiegħu. Il-verżjonijiet awtentiċi tal-atti rilevanti, inklużi l-preamboli tagħhom, huma dawk ippubblikati fil-Ġurnal Uffiċjali tal-Unjoni Ewropea u disponibbli f’EUR-Lex. Dawk it-testi uffiċjali huma aċċessibbli direttament permezz tal-links inkorporati f’dan id-dokument

REGOLAMENT (UE) 2024/1309 TAL-PARLAMENT EWROPEW U TAL-KUNSILL

tad-29 ta’ April 2024

dwar miżuri biex tonqos l-ispiża tal-implimentazzjoni tan-networks tal-komunikazzjonijiet elettroniċi tal-gigabits, li jemenda r-Regolament (UE) 2015/2120 u li jħassar id-Direttiva 2014/61/UE (Att dwar l-Infrastruttura tal-Gigabits)

(Test b’rilevanza għaz-ŻEE)

Artikolu 1

Suġġett u kamp ta’ applikazzjoni

Dan ir-Regolament għandu l-għan li jiffaċilita u jistimula l-introduzzjoni tan-networks b’kapaċità għolja ħafna (VHCN) billi jippromwovi l-użu konġunt tal-infrastruttura fiżika eżistenti u billi jippermetti implimentazzjoni aktar effiċjenti tal-infrastruttura fiżika ġdida biex dawn in-networks ikunu jistgħu jiġu introdotti aktar malajr u b’inqas spejjeż.

Jekk xi dispożizzjoni ta’ dan ir-Regolament tkun kunfliġġenti għal xi dispożizzjoni tad-Direttiva 2002/77/KE, (UE) 2018/1972 jew (UE) 2022/2555, għandha tipprevali d-dispożizzjoni rilevanti ta’ dawk id-Direttivi.

Dan ir-Regolament jistabbilixxi rekwiżiti minimi biex jintlaħqu l-għanijiet stipulati fil-paragrafu 1. L-Istati Membri jistgħu jżommu jew jintroduċu miżuri f’konformità ma’ liġijiet tal-Unjoni li jkunu aktar stretti jew aktar dettaljati minn dawk ir-rekwiżiti minimi, jekk dawn il-miżuri jservu biex jippromwovu l-użu konġunt tal-infrastruttura fiżika eżistenti jew jippermettu implimentazzjoni aktar effiċjenti ta’ infrastruttura fiżika ġdida.

B’deroga mill-paragrafu 3 ta’ dan l-Artikolu, l-Istati Membri ma għandhomx iżommu jew jintroduċu l-miżuri msemmija f’dak il-paragrafu fir-rigward tal-Artikolu 3(5), l-ewwel subparagrafu, il-punti (a) sa (e), l-Artikolu 3(7) u (10), l-Artikolu 4(7), l-Artikolu 5(2), it-tieni subparagrafu, l-Artikoli 5(5) u 6(2) u l-Artikolu 10(7) u (8).

Dan ir-Regolament huwa mingħajr preġudizzju għar-responsabbiltà tal-Istati Membri li jissalvagwardjaw is-sigurtà nazzjonali u s-setgħa tagħhom li jissalvagwardjaw funzjonijiet Statali essenzjali oħra, fosthom l-iżgurar tal-integrità territorjali tal-Istat u ż-żamma tal-ordni pubbliku.

Artikolu 2

Definizzjonijiet

Għall-finijiet ta’ dan ir-Regolament, japplikaw id-definizzjonijiet stabbiliti fid-Direttiva (UE) 2018/1972, b’mod partikolari d-definizzjonijiet ta’ “network tal-komunikazzjonijiet elettroniċi”, “network b’kapaċità għolja ħafna”, “network pubbliku tal-komunikazzjonijiet elettroniċi”, “punt tat-terminazzjoni tan-network”, “faċilitajiet assoċjati”, “utent finali”, “sigurtà tan-networks u tas-servizzi”, “aċċess”, u “operatur”.

Japplikaw ukoll id-definizzjonijiet li ġejjin:

(1)

“operatur ta’ network” tfisser:

(a)

operatur kif definit fl-Artikolu 2, il-punt (29), tad-Direttiva (UE) 2018/1972;

(b)

impriża li tipprovdi infrastruttura fiżika maħsuba biex tipprovdi:

(i)

servizz tal-produzzjoni, tat-trasport jew tad-distribuzzjoni ta’:

—

gass;

—

elettriku, inkluż it-tidwil pubbliku;

—

tisħin;

—

ilma, inkluż ir-rimi jew it-trattament tal-ilma mormi u tad-drenaġġ, u s-sistemi tad-drenaġġ;

(ii)

servizzi tat-trasport, inkluż linji ferrovjarji, toroq, inkluż toroq urbani, mini, portijiet u ajruporti;

(2)

“korp irregolat bil-liġi pubblika” tfisser korp li għandu l-karatteristiċi kollha li ġejjin:

(a)

huwa stabbilit bl-iskop speċifiku li jissodisfa l-ħtiġijiet fl-interess ġenerali, li ma jkollhomx karattru industrijali jew kummerċjali;

(b)

ikollu personalità ġuridika;

(c)

huwa ffinanzjat, għalkollox jew fil-parti l-kbira, mill-awtoritajiet tal-Istat, reġjonali jew lokali, jew minn korpi oħra rregolati bil-liġi pubblika jew huwa soġġett għal superviżjoni maniġerjali minn dawk l-awtoritajiet jew korpi; jew ikollu bord amministrattiv, maniġerjali jew superviżorju, li aktar minn nofs il-membri tiegħu jinħatru mill-awtoritajiet tal-Istat, reġjonali jew lokali, jew minn korpi oħra rregolati bil-liġi pubblika;

(3)

“korp tas-settur pubbliku” tfisser awtorità tal-Istat, reġjonali jew lokali, korp irregolat bil-liġi pubblika jew assoċjazzjoni maħluqa minn awtorità waħda jew aktar bħal dawn, jew minn korp wieħed jew aktar bħal dawn irregolati bil-liġi pubblika;

(4)

“infrastruttura fiżika” tfisser:

(a)

kwalunkwe element ta’ network li hu maħsub biex jilqa’ elementi oħra tan-network bla ma jsir element attiv tan-network innifsu, bħal pajpijiet, arbli, tubi, kaxxetti tal-ispezzjoni, tappieri, kaxxi tat-triq, installazzjonijiet tal-antenni, torrijiet u arbli, kif ukoll il-bini inkluż is-soqfa tagħhom jew partijiet mill-faċċati tagħhom jew id-daħliet għall-bini, u kwalunkwe ass ieħor, inkluż għamara tat-toroq, bħal arbli tad-dawl, sinjali tat-triq, dwal tat-traffiku, billboards u strutturi għall-pedaġġ, kif ukoll waqfiet tal-karozzi tal-linja u tat-tramm u stazzjonijiet tal-metro u ferrovjarji;

(b)

fejn ma jkunux parti minn network u jkunu proprjetà ta’ korpi tas-settur pubbliku jew ikkontrollati minnhom: bini inkluż is-soqfa tagħhom u partijiet mill-faċċati tagħhom jew id-daħliet għall-bini, u kwalunkwe ass ieħor, inkluż għamara tat-toroq, bħal arbli tad-dawl, sinjali tat-triq, dwal tat-traffiku, billboards u strutturi għall-pedaġġ, kif ukoll waqfiet tal-karozzi tal-linja u tat-tramm u stazzjonijiet tal-metro u ferrovjarji.

Il-kejbils, inkluż il-fibra skura, kif ukoll l-elementi tan-networks użati għall-forniment tal-ilma għall-konsum mill-bniedem kif definit fl-Artikolu 2, il-punt (1), tad-Direttiva (UE) 2020/2184 tal-Parlament Ewropew u tal-Kunsill ( 1 ) mhumiex infrastruttura fiżika skont it-tifsira ta’ dan ir-Regolament;

(5)

“xogħlijiet ċivili” tfisser l-eżitu ta’ xogħlijiet tal-bini jew tal-inġinerija ċivili meħuda kollha flimkien li minnu innifsu jkun biżżejjed biex titwettaq funzjoni ekonomika jew teknika u li jinvolvi element wieħed jew aktar ta’ infrastruttura fiżika;

(6)

“infrastruttura fiżika fil-bini” tfisser infrastruttura fiżika jew installazzjonijiet fiżiċi fil-post tal-utent finali, inkluż elementi b’sjieda konġunta, maħsuba biex tilqa’ networks ta’ aċċess bil-wajer u/jew mingħajru, meta dawn in-networks ta’ aċċess ikunu jifilħu jagħtu servizzi ta’ komunikazzjoni elettronika u jqabbdu l-punt ta’ aċċess tal-bini mal-punt ta’ terminazzjoni tan-network;

(7)

“wajers tal-fibra fil-bini” tfisser kejbils tal-fibra ottika fil-post tal-utent finali, inkluż elementi bi sjieda konġunta, maħsuba biex iwasslu servizzi tal-komunikazzjonijiet elettroniċi u jgħaqqdu l-punt tal-aċċess tal-bini mal-punt tat-terminazzjoni tan-network;

(8)

“infrastruttura fiżika fil-bini lesta għall-fibra” tfisser infrastruttura fiżika fil-bini maħsuba biex tilqa’ elementi tal-fibra ottika;

(9)

“xogħlijiet kbar ta’ rinnovazzjoni” tfisser xogħlijiet ċivili fil-post tal-utent finali li jinkludu modifiki strutturali tal-infrastruttura fiżika fil-bini kollha kemm hi jew ta’ parti sinifikanti minnha u li jeħtieġu, f’konformità mal-liġi nazzjonali, permess tal-bini;

(10)

“permess” tfisser deċiżjoni espliċita jew impliċita jew sett ta’ deċiżjonijiet meħuda simultanjament jew suċċessivament minn awtorità kompetenti waħda jew aktar li huma meħtieġa skont il-liġi nazzjonali biex impriża twettaq xogħlijiet ta’ kostruzzjoni jew ċivili meħtieġa għall-implimentazzjoni ta’ elementi ta’ VHCNs;

(11)

“punt ta’ aċċess” tfisser punt fiżiku, li jkun jinsab ġewwa jew barra l-bini, aċċessibbli għall-impriżi li jipprovdu jew li huma awtorizzati biex jipprovdu networks pubbliċi tal-komunikazzjonijiet elettroniċi, li permezz tiegħu tkun tista’ ssir disponibbli l-konnessjoni mal-infrastruttura fiżika fil-bini lesta għall-fibra;

(12)

“drittijiet ta’ aċċess” tfisser id-drittijiet imsemmijin fl-Artikolu 43(1) tad-Direttiva (UE) 2018/1972, mogħtija lil operatur biex jinstalla faċilitajiet fuq, minn fuq jew minn taħt proprjetà pubblika jew privata biex jimplimenta VHCNs u faċilitajiet assoċjati.

Artikolu 3

Aċċess għall-infrastruttura fiżika eżistenti

L-operaturi tan-networks u l-korpi tas-settur pubbliku li huma s-sidien ta’ infrastruttura fiżika jew jikkontrollawha għandhom jissodisfaw, fuq talba bil-miktub ta’ operatur, it-talbiet raġonevoli kollha għal aċċess għal dik l-infrastruttura fiżika b’termini u kundizzjonijiet ġusti u raġonevoli, inkluż il-prezz, bil-ħsieb li jiġu implimentati elementi ta’ VHCNs jew faċilitajiet assoċjati. Il-korpi tas-settur pubbliku li huma s-sidien tal-infrastruttura fiżika jew li jikkontrollawha għandhom jissodisfaw dawn it-talbiet raġonevoli kollha wkoll b’termini u kundizzjonijiet nondiskriminatorji. Dawn it-talbiet bil-miktub għandhom jispeċifikaw l-elementi tal-infrastruttura fiżika li għaliha jintalab l-aċċess, u jkunu jinkludu t-tul tal-perjodu speċifiku. L-Istati Membri jistgħu jispeċifikaw rekwiżiti ddettaljati relatati mal-aspetti amministrattivi tat-talbiet.

Fuq talba ta’ operatur, persuni ġuridiċi li huma primarjament attivi bħala inkwilini tal-art, jew bħala detenturi ta’ drittijiet fuq l-art, għajr id-drittijiet tal-proprjetà, li fuqhom il-faċilitajiet huma ppjanati li jiġu installati jew li ġew installati bil-ħsieb li jiġu implimentati elementi ta’ VHCNs, jew li jimmaniġġaw kuntratti ta’ lokazzjoni f’isem is-sidien tal-art, u l-operaturi għandhom jinnegozjaw l-aċċess għal tali art in bona fide, inkluż fir-rigward tal-prezz, li meta xieraq għandu jirrifletti l-kundizzjonijiet tas-suq, f’konformità mal-liġi kuntrattwali nazzjonali.

L-operaturi u l-persuni ġuridiċi msemmija fl-ewwel subparagrafu ta’ dan il-paragrafu għandhom jinfurmaw lill-awtorità regolatorja nazzjonali dwar il-konklużjoni tal-ftehimiet milħuqa f’konformità mal-ewwel subparagrafu, inkluż il-prezz miftiehem.

L-Istati Membri jistgħu jipprovdu gwida dwar it-termini u l-kundizzjonijiet, inkluż il-prezz, sabiex jiffaċilitaw il-konklużjoni ta’ tali ftehimiet.

L-Istati Membri jistgħu jipprevedu li s-sidien ta’ bini kummerċjali privat, li ma jkunux jappartjenu jew ikkontrollati minn operatur tan-network għandhom jissodisfaw, fuq it-talba bil-miktub ta’ operatur, talbiet raġonevoli għall-aċċess għal dak il-bini, inkluż il-bjut tagħhom, bil-ħsieb li jinstallaw elementi ta’ VHCNs jew faċilitajiet assoċjati b’termini u kundizzjonijiet ġusti u raġonevoli, u bi prezz li jirrifletti l-kundizzjonijiet tas-suq. Qabel talba bħal din minn dawk li jkunu qed ifittxu aċċess għandhom jiġu ssodisfati l-kundizzjonijiet kollha li ġejjin:

(a)

il-bini jkun jinsab f’żona rurali jew remota kif definit mill-Istati Membri;

(b)

ma jkun hemm disponibbli l-ebda VHCN tal-istess tip – fiss jew mobbli – bħal dak li dawk li jkunu qed ifittxu aċċess ikun biħsiebhom jimplimentaw fiż-żona li għaliha ssir it-talba għall-aċċess, u ma jkun hemm l-ebda pjan biex jiġi implimentat tali network skont l-informazzjoni miġbura mill-punt uniku ta’ informazzjoni disponibbli fid-data tat-talba,

(c)

ma jkun hemm l-ebda infrastruttura fiżika fiż-żona li għaliha ntalab l-aċċess, li hija proprjetà ta’ operaturi ta’ networks jew korpi tas-settur pubbliku jew ikkontrollata minnhom u li hija teknikament adatta biex tilqa’ elementi ta’ VHCNs.

L-Istati Membri jistgħu jiddeterminaw lista ta’ kategoriji ta’ bini kummerċjali li jistgħu jkunu eżentati mill-obbligu li jissodisfaw tali talba għal aċċess, għal raġunijiet ta’ sigurtà pubblika, difiża, sikurezza u saħħa. Dik il-lista u l-kriterji li għandhom jiġu applikati biex dawk il-kategoriji jiġu identifikati għandhom jiġu ppubblikati permezz ta’ punt uniku tal-informazzjoni.

Meta jiddeterminaw termini u kundizzjonijiet ġusti u raġonevoli, inkluż il-prezzijiet, għall-għoti tal-aċċess, u sabiex jevitaw prezzijiet eċċessivi, l-operaturi ta’ networks u l-korpi tas-settur pubbliku li huma s-sidien ta’ infrastruttura fiżika jew jikkontrollawha għandhom, fejn rilevanti, iqisu mill-inqas dawn li ġejjin:

(a)

kuntratti u termini u kundizzjonijiet kummerċjali eżistenti miftiehma bejn operaturi li jfittxu aċċess u operaturi ta’ networks jew korpi tas-settur pubbliku li jagħtu aċċess għal infrastruttura fiżika;

(b)

il-ħtieġa li jkun żgurat li l-fornitur tal-aċċess ikollu opportunità ġusta biex jirkupra l-ispejjeż li jġarrab biex jipprovdi aċċess għall-infrastruttura fiżika tiegħu, filwaqt li jitqiesu l-kundizzjonijiet nazzjonali speċifiċi, il-mudelli tan-negozju, u kwalunkwe struttura tariffarja stabbilita biex tingħata opportunità ġusta għall-irkupru tal-ispejjeż; fil-każ tan-networks tal-komunikazzjonijiet elettroniċi, għandu jitqies ukoll kull rimedju impost minn awtorità regolatorja nazzjonali;

(c)

kwalunkwe spiża addizzjonali ta’ manutenzjoni u adattament li jirriżulta mill-għoti ta’ aċċess għall-infrastruttura fiżika rilevanti;

(d)

l-impatt tal-aċċess mitlub fuq il-pjan tan-negozju tal-fornitur tal-aċċess, inkluż l-investimenti fl-infrastruttura fiżika li għaliha jkun intalab l-aċċess;

(e)

fil-każ speċifiku ta’ aċċess għall-infrastruttura fiżika tal-operaturi, kwalunkwe gwida rilevanti skont il-paragrafu 13, u b’mod partikolari:

(i)

il-vijabbiltà ekonomika ta’ dawk l-investimenti fuq il-bażi tal-profil ta’ riskju tagħhom;

(ii)

il-ħtieġa għal redditu ġust fuq l-investiment u għal kwalunkwe skeda ta’ żmien għal tali redditu fuq l-investiment;

(iii)

kwalunkwe impatt tal-aċċess fuq il-kompetizzjoni downstream u konsegwentement fuq il-prezzijiet u r-redditu fuq l-investiment;

(iv)

kwalunkwe deprezzament tal-assi tan-network fil-mument tat-talba għal aċċess;

(v)

kwalunkwe argument għall-vijabbiltà li jirfed l-investiment fil-mument li jkun sar, b’mod partikolari investiment fl-infrastruttura fiżika użata għall-forniment tal-konnettività; u

(vi)

kwalunkwe possibbiltà offruta preċedentement lil dawk li jkunu qed ifittxu aċċess biex jikkoinvestu fl-implimentazzjoni tal-infrastruttura fiżika, b’mod partikolari skont l-Artikolu 76 tad-Direttiva (UE) 2018/1972, jew jimplimentawha b’mod konġunt;

(f)

meta titqies il-ħtieġa tal-operaturi għal redditu ġust fuq l-investiment li jirrifletti l-kundizzjonijiet rilevanti tas-suq, il-mudelli kummerċjali differenti tagħhom, b’mod partikolari fil-każ ta’ impriżi li primarjament jipprovdu faċilitajiet assoċjati u joffru aċċess fiżiku għal aktar minn impriża waħda li tipprovdi, jew li hija awtorizzata li tipprovdi, networks pubbliċi tal-komunikazzjonijiet elettroniċi.

L-operaturi ta’ networks u l-korpi tas-settur pubbliku li huma s-sidien ta’ infrastruttura fiżika jew jikkontrollawha jistgħu jirrifjutaw l-aċċess għal infrastruttura fiżika speċifika fuq il-bażi ta’ waħda jew aktar mir-raġunijiet li ġejjin:

(a)

l-infrastruttura fiżika li għaliha jkun intalab l-aċċess ma tkunx teknikament xierqa biex tospita xi wieħed mill-elementi tal-VHCN imsemmija fil-paragrafu 1;

(b)

ikun hemm nuqqas ta’ disponibbiltà ta’ spazju biex jintlaqgħu l-elementi tal-VHCNs jew tal-faċilitajiet assoċjati msemmijin fil-paragrafu 1, inkluż wara li tkun tqieset il-ħtieġa futura għal spazju tal-fornitur tal-aċċess li tkun intweriet b’mod suffiċjenti, pereżempju b’referenza għall-pjanijiet ta’ investimenti disponibbli pubblikament jew għal perċentwal applikat konsistentement għall-kapaċità riżervata għall-ħtiġijiet futuri, imqabbla mal-kapaċità kollha tal-infrastruttura fiżika;

(c)

l-eżistenza ta’ raġunijiet ġustifikati rigward is-sikurezza, is-sigurtà nazzjonali u s-saħħa pubblika;

(d)

l-eżistenza ta’ raġunijiet ġustifikati kif xieraq rigward l-integrità u s-sigurtà ta’ kwalunkwe network, b’mod partikolari l-infrastruttura kritika nazzjonali;

(e)

l-eżistenza ta’ riskju ġustifikat kif xieraq ta’ interferenzi serji tas-servizzi tal-komunikazzjonijiet elettroniċi ppjanati bil-forniment ta’ servizzi oħra fuq l-istess infrastruttura fiżika;

(f)

id-disponibbiltà ta’ mezzi alternattivi vijabbli ta’ aċċess fiżiku passiv bl-ingrossa għan-networks tal-komunikazzjonijiet elettroniċi, xierqa għall-forniment ta’ VHCNs, u offruti b’termini u kundizzjonijiet ġusti u raġonevoli, li jiġu pprovduti mill-istess operatur ta’ network jew, fil-każ speċifiku ta’ żoni rurali jew remoti fejn network jitħaddem fuq bażi bl-ingrossa biss u jkun proprjetà ta’ korpi tas-settur pubbliku jew ikkontrollat minnhom, li jiġu pprovduti mill-operatur ta’ tali network.

L-Istati Membri jistgħu jipprevedu li l-operaturi ta’ networks u l-korpi tas-settur pubbliku li huma s-sidien ta’ infrastruttura fiżika jew jikkontrollawha jistgħu jirrifjutaw l-aċċess għal infrastruttura fiżika speċifika meta jkun hemm mezzi alternattivi vijabbli ta’ aċċess attiv bl-ingrossa miftuħ u nondiskriminatorju għal VHCNs, li huma pprovduti mill-istess operatur ta’ network jew mill-istess korp pubbliku, dment li jiġu ssodisfati ż-żewġ kundizzjonijiet li ġejjin:

(a)

tali mezzi alternattivi ta’ aċċess bl-ingrossa jiġu offruti b’termini u kundizzjonijiet ġusti u raġonevoli, inkluż il-prezz;

(b)

il-proġett ta’ implimentazzjoni tal-operatur rikjedenti jindirizza l-istess żona ta’ kopertura u ma jkun hemm ebda network ieħor tal-fibra li jservi ż-żona ta’ kopertura li jikkonnettja l-bini tal-utent finali.

Dan il-paragrafu għandu japplika biss għal dawk l-Istati Membri fejn tali possibbiltà għal rifjut jew possibbiltà ekwivalenti għal rifjut tiġi applikata fil-11 ta’ Mejju 2024, f’konformità mal-liġi nazzjonali li tikkonforma mal-liġi tal-Unjoni.

Fil-każ li jiġi rrifjutat l-għoti ta’ aċċess kif imsemmi fil-paragrafi 5 u 6, l-operatur ta’ network jew il-korp tas-settur pubbliku li huwa s-sid ta’ infrastruttura fiżika jew jikkontrollaha għandu jikkomunika bil-miktub lil dawk li qed ifittxu l-aċċess ir-raġunijiet speċifiċi u dettaljati għal tali rifjut mhux aktar tard minn xahar mid-data tal-wasla tat-talba kompleta għall-aċċess, għajr għall-infrastruttura kritika nazzjonali kif definita fil-liġi nazzjonali, li għaliha ma għandhomx ikunu meħtieġa raġunijiet speċifiċi u dettaljati fil-komunikazzjoni tar-rifjut lil dawk li jkunu qed ifittxu aċċess.

L-Istati Membri jistgħu jistabbilixxu jew jaħtru korp biex jikkoordina t-talbiet għall-aċċess għall-infrastruttura fiżika li tkun il-proprjetà ta’ korpi tas-settur pubbliku jew ikkontrollata minnhom, jipprovdu pariri legali u tekniċi permezz tan-negozjar ta’ termini u kundizzjonijiet tal-aċċess, u jiffaċilitaw l-għoti tal-informazzjoni permezz ta’ punt uniku tal-informazzjoni kif imsemmi fl-Artikolu 12.

L-infrastruttura fiżika li diġà hi soġġetta għall-obbligi tal-aċċess imposti mill-awtoritajiet regolatorji nazzjonali skont id-Direttiva (UE) 2018/1972 jew li tirriżulta mill-applikazzjoni tar-regoli tal-Unjoni dwar l-għajnuna mill-Istat ma għandhiex tkun soġġetta għall-obbligi stipulati fil-paragrafi 1, 4 u 5, sakemm dawk l-obbligi tal-aċċess ikunu fis-seħħ.

10.

Il-korpi tas-settur pubbliku li huma s-sidien ta’ infrastruttura fiżika jew ta’ ċerti kategoriji ta’ infrastruttura fiżika, jew li jikkontrollawha, jistgħu ma japplikawx il-paragrafi 1, 4 u 5 għal dik l-infrastruttura fiżika jew dawk il-kategoriji ta’ infrastruttura fiżika minħabba raġunijiet ta’ valur arkitettoniku, storiku, reliġjuż jew ambjentali, jew minħabba raġunijiet ta’ sigurtà pubblika, difiża, sikurezza u saħħa. L-Istati Membri jew, kif xieraq, l-awtoritajiet reġjonali u lokali għandhom jidentifikaw din l-infrastruttura fiżika jew dawn il-kategoriji ta’ infrastruttura fiżika fit-territorji tagħhom abbażi ta’ raġunijiet debitament ġustifikati u proporzjonati. Il-lista ta’ kategoriji ta’ infrastruttura fiżika u l-kriterji applikati biex dawn jiġu identifikati għandhom isiru disponibbli permezz ta’ punt uniku tal-informazzjoni.

11.

L-operaturi għandu jkollhom id-dritt li joffru aċċess għall-infrastruttura fiżika tagħhom għall-fini tal-implimentazzjoni tan-networks, għajr in-networks tal-komunikazzjonijiet elettroniċi jew il-faċilitajiet assoċjati.

12.

Minkejja l-paragrafu 3, dan l-Artikolu għandu jkun mingħajr preġudizzju għad-dritt għall-proprjetà tas-sid tal-infrastruttura fiżika meta l-operatur tan-network jew il-korp tas-settur pubbliku ma jkunx is-sid, u għad-dritt għall-proprjetà ta’ partijiet terzi oħra, bħas-sidien tal-artijiet u s-sidien ta’ proprjetà privata, jew, fejn applikabbli, għad-drittijiet tal-inkwilini.

13.

Wara li tikkonsulta lill-partijiet ikkonċernati, lill-korpi nazzjonali għas-soluzzjoni tat-tilwim u lil korpi jew aġenziji kompetenti oħra tal-Unjoni fis-setturi rilevanti, kif xieraq, u b’kont meħud tal-prinċipji stabbiliti sew u s-sitwazzjoni distinta fost l-Istati Membri, il-Kummissjoni tista’, b’kooperazzjoni mill-qrib mal-BEREC, tipprovdi gwida dwar l-applikazzjoni ta’ dan l-Artikolu.

Artikolu 4

Trasparenza tal-infrastruttura fiżika

Biex ikun jista’ jitlob aċċess għall-infrastruttura fiżika f’konformità mal-Artikolu 3, operatur għandu jkollu d-dritt ta’ aċċess, meta jitolbu, għall-informazzjoni minima li ġejja dwar l-infrastruttura fiżika eżistenti, b’format elettroniku permezz ta’ punt uniku tal-informazzjoni:

(a)

il-post u r-rotta ġeoreferenzjati;

(b)

it-tip u l-użu attwali tal-infrastruttura;

(c)

punt tal-kuntatt.

Din l-informazzjoni minima għandha tkun aċċessibbli, skont termini proporzjonati, nondiskriminatorji u trasparenti u, fi kwalunkwe każ, fi żmien għaxart ijiem tax-xogħol wara d-data tas-sottomissjoni tat-talba għall-aċċess għall-informazzjoni. F’każijiet ġustifikati kif xieraq, dik l-iskadenza tista’ tiġi estiża b’ħamest ijiem tax-xogħol. L-operaturi li jitolbu aċċess għandhom jiġu infurmati bi kwalunkwe estensjoni tal-iskadenza permezz ta’ punt uniku tal-informazzjoni.

Kull operatur li jitlob aċċess għall-informazzjoni skont dan l-Artikolu għandu jispeċifika ż-żona ġeografika fejn ikun biħsiebu jimplimenta l-elementi ta’ VHCNs jew il-faċilitajiet assoċjati.

L-aċċess għall-informazzjoni minima jista’ jkun limitat jew irrifjutat dment li jkun meħtieġ biex jiġu żgurati s-sigurtà ta’ ċertu bini li jkunu proprjetà ta’ korpi tas-settur pubbliku jew ikkontrollati minnhom, is-sigurtà tan-networks u l-integrità tagħhom, is-sigurtà nazzjonali, is-sigurtà tal-infrastruttura nazzjonali kritika, is-saħħa jew is-sikurezza pubblika, jew minħabba raġunijiet ta’ kunfidenzjalità jew sigrieti kummerċjali u operattivi.

Minbarra l-informazzjoni minima msemmija fil-paragrafu 1, l-ewwel subparagrafu, l-Istati Membri jistgħu jirrikjedu informazzjoni dwar l-infrastruttura fiżika eżistenti bħal informazzjoni dwar il-livell ta’ okkupazzjoni tal-infrastruttura fiżika.

L-operaturi tan-networks u l-korpi tas-settur pubbliku għandhom jagħmlu disponibbli mill-inqas l-informazzjoni minima msemmija fil-paragrafu 1 u, fejn applikabbli, l-informazzjoni addizzjonali msemmija fil-paragrafu 2 permezz ta’ punt uniku tal-informazzjoni u f’format elettroniku, u għandhom jagħmlu disponibbli minnufih kwalunkwe aġġornament ta’ dik l-informazzjoni. F’każ li l-operaturi tan-networks jew il-korpi tas-settur pubbliku ma jikkonformawx ma’ dan il-paragrafu, l-awtoritajiet kompetenti jistgħu jitolbu li l-informazzjoni nieqsa msemmija fil-paragrafu 1 issir disponibbli b’format elettroniku permezz ta’ punt uniku tal-informazzjoni, fi żmien għaxart ijiem tax-xogħol mid-data tal-wasla ta’ tali talba, mingħajr preġudizzju għall-possibbiltà li l-Istati Membri jimponu penali fuq l-operaturi tan-networks u l-korpi tas-settur pubbliku li huma s-sidien ta’ infrastruttura fiżika jew jikkontrollawha talli ma jkunux ikkonformaw ma’ dak l-obbligu.

Għal perjodu tranżitorju tal-iqsar żmien possibbli u ta’ mhux aktar minn tnax-il xahar, l-Istati Membri jistgħu jeżentaw muniċipalitajiet b’inqas minn 3 500 abitant mill-obbligu msemmi fil-paragrafu 3. L-Istati Membri għandhom jistabbilixxu pjan direzzjonali bi skadenzi biex l-informazzjoni minima msemmija fil-paragrafu 1 issir disponibbli permezz ta’ punt uniku tal-informazzjoni f’format elettroniku. Dawk l-eċċezzjonijiet u l-pjanijiet direzzjonali għandhom jiġu ppubblikati permezz ta’ punt uniku tal-informazzjoni. Matul dak il-perjodu tranżitorju, dawk il-muniċipalitajiet għandhom jiżguraw li l-informazzjoni disponibbli tkun aċċessibbli għall-operaturi.

L-operaturi tan-networks u l-korpi tas-settur pubbliku għandhom jissodisfaw it-talbiet raġonevoli għal stħarriġiet fuq il-post ta’ elementi speċifiċi tal-infrastruttura fiżika tagħhom meta ssir talba speċifika bil-miktub minn operatur. Dawn it-talbiet għandhom jispeċifikaw l-elementi tal-infrastruttura fiżika kkonċernata biex jiġu implimentati l-elementi ta’ VHCNs jew il-faċilitajiet assoċjati. L-istħarriġiet fuq il-post tal-elementi speċifikati tal-infrastruttura fiżika għandu jingħata b’termini proporzjonati, nondiskriminatorji u trasparenti fi żmien xahar mid-data tal-wasla tat-talba, soġġett għal-limitazzjonijiet stipulati fil-paragrafu 1, ir-raba’ subparagrafu. L-Istati Membri jistgħu jispeċifikaw rekwiżiti ddettaljati relatati mal-aspetti amministrattivi tat-talbiet.

L-Istati Membri jistgħu jidentifikaw, abbażi ta’ raġunijiet debitament ġustifikati u proporzjonati, l-infrastruttura kritika nazzjonali kif definita fil-liġi nazzjonali, jew partijiet minnha, li ma għandhomx ikunu soġġetti għall-obbligi stabbiliti fil-paragrafi 1, 3 u 5.

Il-paragrafi 1, 3 u 5 ma għandhomx japplikaw fejn:

(a)

l-infrastruttura fiżika mhix adattata teknikament għall-implimentazzjoni ta’ VHCNs jew faċilitajiet assoċjati”;

(b)

l-obbligu li tingħata informazzjoni dwar ċerti tipi eżistenti ta’ infrastruttura fiżika skont il-paragrafu 1, l-ewwel subparagrafu, ikun sproporzjonat, abbażi ta’analiżi tal-ispiżabenefiċċji mwettqa mill-Istati Membri u ta’ konsultazzjoni mal-partijiet ikkonċernati; jew

(c)

l-infrastruttura fiżika ma tkunx soġġetta għal obbligi tal-aċċess f’konformità mal-Artikolu 3(10).

Il-ġustifikazzjoni, il-kriterji u l-kundizzjonijiet għall-applikazzjoni ta’ kull eċċezzjoni bħal din għandhom jiġu ppubblikati permezz ta’ punt uniku tal-informazzjoni u nnotifikati lill-Kummissjoni.

L-operaturi li jiksbu aċċess għall-informazzjoni skont dan l-Artikolu għandhom jieħdu miżuri xierqa biex jiżguraw ir-rispett għall-kunfidenzjalità kif ukoll għas-sigrieti kummerċjali u operattivi. Għal dak l-għan, għandhom iżommu l-informazzjoni kunfidenzjali u jużawha biss għall-fini tal-implimentazzjoni tan-networks tagħhom.

Artikolu 5

Koordinazzjoni tax-xogħlijiet ċivili

Il-korpi tas-settur pubbliku li huma s-sidien ta’ infrastruttura fiżika jew jikkontrollawha u l-operaturi tan-networks għandu jkollhom id-dritt li jinnegozjaw ftehimiet dwar il-koordinazzjoni tax-xogħlijiet ċivili, inkluż dwar it-tqassim tal-ispejjeż, ma’ operaturi oħra biex jiġu implimentati elementi ta’ VHCNs jew faċilitajiet assoċjati.

Meta jwettqu, jew jippjanaw li jwettqu, direttament jew indirettament, xogħlijiet ċivili ffinanzjati għalkollox jew parzjalment b’mezzi pubbliċi, il-korpi tas-settur pubbliku li huma s-sidien ta’ infrastruttura fiżika jew jikkontrollawha u l-operaturi tan-networks għandhom jissodisfaw kull talba raġonevoli bil-miktub għall-koordinazzjoni ta’ dawk ix-xogħlijiet ċivili b’termini trasparenti u nondiskriminatorji li jagħmlu l-operaturi biex jiġu implimentati elementi ta’ VHCNs jew faċilitajiet assoċjati. L-Istati Membri jistgħu jispeċifikaw rekwiżiti ddettaljati relatati mal-aspetti amministrattiv tat-talba.

It-talbiet għall-koordinazzjoni tax-xogħlijiet ċivili għandhom jiġu ssodisfati, dment li jiġu ssodisfati l-kundizzjonijiet kollha li ġejjin:

(a)

il-koordinazzjoni tax-xogħlijiet ċivili ma tkunx ser tinvolvi spejjeż addizzjonali li ma jistgħux jiġu rkuprati, inkluż dawk ikkawżati minn dewmien addizzjonali, għall-operatur tan-network jew il-korp tas-settur pubbliku li huwa s-sid ta’ infrastruttura fiżika jew jikkontrollaha li inizjalment ippreveda x-xogħlijiet ċivili inkwistjoni, mingħajr preġudizzju għall-possibbiltà li l-partijiet ikkonċernati jaqblu dwar it-tqassim tal-ispejjeż;

(b)

l-operatur tan-network jew il-korp tas-settur pubbliku li huma s-sidien ta’ infrastruttura fiżika jew jikkontrollawha li inizjalment ippreveda x-xogħlijiet ċivili jibqa’ jkollu kontroll tal-koordinazzjoni tax-xogħlijiet;

(c)

it-talba tiġi sottomessa mill-aktar fis possibbli u, meta jkun meħtieġ permess għax-xogħlijiet ċivili, fi żmien mill-inqas xahar qabel is-sottomissjoni tal-proġett finali lill-awtoritajiet kompetenti tal-għoti tal-permessi.

L-Istati Membri jistgħu jipprevedu li talbiet għall-koordinazzjoni tax-xogħlijiet ċivili magħmula minn impriża li tipprovdi, jew li tkun awtorizzata tipprovdi, networks pubbliċi tal-komunikazzjonijiet elettroniċi lil impriża li tkun proprjetà ta’ korpi tas-settur pubbliku jew ikkontrollata minnhom u li tipprovdi, jew li tkun awtorizzata tipprovdi, networks pubbliċi tal-komunikazzjonijiet elettroniċi jitqiesu mhux raġonevoli f’każ li x-xogħlijiet ċivili jikkontribwixxu għall-implimentazzjoni ta’ VHCNs, dment li dawk il-VHCNs ikunu jinsabu f’żoni rurali jew remoti, ikunu proprjetà ta’ korpi tas-settur pubbliku jew ikkontrollati minnhom, u huma operati fuq bażi ta’ ingrossa biss.

Talba għall-koordinazzjoni tax-xogħlijiet ċivili magħmula minn impriża li tipprovdi, jew li hi awtorizzata li tipprovdi, networks pubbliċi tal-komunikazzjonijiet elettroniċi lil impriża li tipprovdi jew li hi awtorizzata li tipprovdi networks pubbliċi tal-komunikazzjonijiet elettroniċi tista’ titqies mhux raġonevoli meta jiġu ssodisfati ż-żewġ kundizzjonijiet li ġejjin:

(a)

it-talba tikkonċerna żona li kienet soġġetta għal xi waħda minn dawn:

(i)

previżjoni tal-ilħuq minn networks tal-broadband, inkluż minn VHCNs skont l-Artikolu 22(1) tad-Direttiva (UE) 2018/1972;

(ii)

stedina biex tiġi ddikjarata l-intenzjoni li jiġi implimentat VHCNs skont l-Artikolu 22(3) tad-Direttiva (UE) 2018/1972;

(iii)

konsultazzjoni pubblika għall-applikazzjoni tar-regoli tal-Unjoni dwar l-għajnuna mill-Istat;

(b)

l-impriża rikjedenti naqset milli tesprimi l-intenzjoni tagħha li timplimenta VHCNs fiż-żona msemmija fil-punt (a) f’xi waħda mill-aktar proċeduri reċenti minn dawk elenkati f’dak il-punt li jkopru l-perjodu li matulu ssir it-talba għal koordinazzjoni.

Jekk talba għal koordinazzjoni titqies mhux raġonevoli abbażi tal-ewwel subparagrafu, l-impriża li tipprovdi, jew li hi awtorizzata tipprovdi, networks pubbliċi tal-komunikazzjonijiet elettroniċi li tkun irrifjutat il-koordinazzjoni tax-xogħlijiet ċivili għandha timplimenta infrastruttura fiżika b’kapaċità biżżejjed biex takkomoda l-ħtiġijiet raġonevoli futuri possibbli tal-aċċess tal-partijiet terzi.

L-Istati Membri jistgħu jidentifikaw, abbażi ta’ raġunijiet debitament ġustifikati u proporzjonati, it-tipi ta’ xogħlijiet ċivili meqjusa bħala b’ambitu limitat, bħal fir-rigward ta’ valur, daqs jew durata, jew relatati ma’ infrastruttura kritika nazzjonali li tista’ tkun eżentata mill-obbligu ta’ koordinazzjoni tax-xogħlijiet ċivili skont il-paragrafu 2. Il-ġustifikazzjoni, il-kriterji u l-kundizzjonijiet biex jiġu applikati eċċezzjonijiet għal tali tipi ta’ xogħlijiet ċivili għandhom jiġu ppubblikati permezz ta’ punt uniku tal-informazzjoni.

L-Istati Membri jistgħu jiddeċiedu li l-korpi tas-settur pubbliku li huma s-sidien ta’ infrastruttura fiżika jew jikkontrollawha u l-operaturi ta’ networks ma għandhomx japplikaw il-paragrafi 2 u 4 għat-tipi ta’ xogħlijiet ċivili relatati mal-infrastruttura kritika nazzjonali jew għal raġunijiet ta’ sigurtà nazzjonali identifikati mill-Istati Membri skont l-ewwel subparagrafu ta’ dan il-paragrafu.

Il-korpi tas-settur pubbliku li huma s-sidien ta’ infrastruttura fiżika jew jikkontrollawha u l-operaturi tan-networks jistgħu jiddeċiedu li ma japplikawx il-paragrafi 2 u 4 għat-tipi ta’ xogħlijiet li huma identifikati mill-Istati Membri bħala b’ambitu limitat skont l-ewwel subparagrafu ta’ dan il-paragrafu.

Sat-12 ta’ Novembru 2025, wara konsultazzjoni mal-partijiet ikkonċernati, il-korpi nazzjonali għas-soluzzjoni tat-tilwim u korpi jew aġenziji kompetenti oħra tal-Unjoni fis-setturi rilevanti kif xieraq, u wara li jittieħed kont tal-prinċipji stabbiliti sew u s-sitwazzjonijiet speċifiċi ta’ kull Stat Membru, il-BEREC għandu, f’kooperazzjoni mill-qrib mal-Kummissjoni, jipprovdi linji gwida dwar l-applikazzjoni ta’ dan l-Artikolu, b’mod partikolari dwar:

(a)

it-tqassim tal-ispejjeż assoċjati mal-koordinazzjoni tax-xogħlijiet ċivili kif imsemmi fil-paragrafu 1;

(b)

il-kriterji li l-korpi għas-soluzzjoni tat-tilwim jenħtieġ li jsegwu meta jsolvu tilwim li jaqa’ fil-kamp ta’ applikazzjoni ta’ dan l-Artikolu; u

(c)

il-kriterji biex tiġi żgurata kapaċità suffiċjenti biex jiġu akkomodati ħtiġijiet raġonevoli prevedibbli fil-futur jekk il-koordinazzjoni tax-xogħlijiet ċivili tiġi rrifjutata skont il-paragrafu 4.

Artikolu 6

Trasparenza fix-xogħlijiet ċivili ppjanati

Biex ikun jista’ jsir in-negozjar ta’ ftehimiet dwar il-koordinazzjoni tax-xogħlijiet ċivili msemmija fl-Artikolu 5, kwalunkwe operatur ta’ networks u korp tas-settur pubbliku li huwa s-sid ta’ infrastruttura fiżika jew jikkontrollaha għandu jagħmel disponibbli b’format elettroniku permezz ta’ punt uniku tal-informazzjoni l-informazzjoni minima li ġejja:

(a)

il-post ġeoreferenzjat u t-tip ta’ xogħlijiet;

(b)

l-elementi tal-infrastruttura fiżika involuta;

(c)

id-data stmata għall-bidu tax-xogħlijiet u d-durata tagħhom;

(d)

id-data stmata għas-sottomissjoni tal-proġett finali lill-awtoritajiet kompetenti għall-għoti tal-permessi, meta applikabbli;

(e)

punt tal-kuntatt.

L-operatur tan-network u l-korp tas-settur pubbliku li huwa s-sid ta’ infrastruttura fiżika jew jikkontrollaha għandhom jiżguraw li l-informazzjoni msemmija fl-ewwel subparagrafu għax-xogħlijiet ċivili ppjanati relatati mal-infrastruttura fiżika tagħhom, hija korretta, u aġġornata u disponibbli fil-pront, permezz ta’ punt uniku tal-informazzjoni uniku, malli l-informazzjoni tkun disponibbli għall-operatur tan-network għax-xogħlijiet ċivili tiegħu previsti għas-sitt xhur ta’ wara u, fi kwalunkwe każ u fejn ikun previst permess, mhux aktar tard minn xahrejn qabel l-ewwel sottomissjoni tal-applikazzjoni għal permess lill-awtoritajiet kompetenti.

L-operaturi għandu jkollhom id-dritt li jaċċessaw l-informazzjoni minima msemmija fl-ewwel subparagrafu f’format elettroniku, fuq talba ġustifikata, permezz ta’ punt uniku tal-informazzjoni, li jispeċifika ż-żona li fiha l-operatur rikjedenti jipprevedi li jimplimenta elementi ta’ VHCNs jew faċilitajiet assoċjati. Fi żmien għaxart ijiem tax-xogħol mid-data tal-wasla tat-talba għall-aċċess għall-informazzjoni, l-informazzjoni mitluba għandha ssir disponibbli b’termini proporzjonati, nondiskriminatorji u trasparenti. F’każijiet ġustifikati kif xieraq, dik l-iskadenza tista’ tiġi estiża darba b’ħamest ijiem tax-xogħol. L-aċċess għall-informazzjoni minima jista’ jkun limitat jew irrifjutat biss meta meħtieġ biex jiġu żgurati s-sigurtà tan-networks u l-integrità tagħhom, is-sigurtà nazzjonali, is-sigurtà tal-infrastruttura kritika, is-saħħa jew is-sikurezza pubblika, jew minħabba raġunijiet ta’ kunfidenzjalità jew sigrieti kummerċjali u operattivi.

L-Istati Membri jistgħu jidentifikaw, abbażi ta’ raġunijiet ġustifikati kif xieraq u proporzjonati, it-tipi ta’ xogħlijiet ċivili meqjusa bħala b’ambitu limitat, bħal fir-rigward tal-valur, id-daqs jew id-durata, jew relatati ma’ infrastruttura kritika nazzjonali, kif ukoll l-emerġenzi jew ir-raġunijiet ta’ sigurtà nazzjonali li jiġġustifikaw id-deroga mis-soġġezzjoni għall-obbligu tad-disponibbiltà tal-informazzjoni minima skont il-paragrafu 1. Il-ġustifikazzjoni, il-kriterji u l-kundizzjonijiet għall-applikazzjoni ta’ eċċezzjonijiet għal tali tipi ta’ xogħlijiet ċivili għandhom jiġu ppubblikati permezz ta’ punt uniku tal-informazzjoni.

L-Istati Membri jistgħu jiddeċiedu li l-korpi tas-settur pubbliku li huma s-sidien ta’ infrastruttura fiżika jew jikkontrollawha u l-operaturi tan-networks ma għandhomx japplikaw il-paragrafu 1 għat-tipi ta’ xogħlijiet ċivili relatati mal-infrastruttura kritika nazzjonali jew għal raġunijiet ta’ sigurtà nazzjonali identifikati mill-Istati Membri skont l-ewwel subparagrafu ta’ dan il-paragrafu.

Il-korpi tas-settur pubbliku li huma s-sidien ta’ infrastruttura fiżika jew jikkontrollawha u l-operaturi tan-networks jistgħu jiddeċiedu li ma japplikawx il-paragrafu 1 għall-informazzjoni dwar tipi ta’ xogħlijiet ċivili b’ambitu limitat u lanqas għar-raġunijiet ta’ emerġenza identifikati mill-Istati Membri skont l-ewwel subparagrafu ta’ dan il-paragrafu.

Artikolu 7

Proċeduri tal-għoti tal-permessi u d-drittijiet ta’ aċċess

L-awtoritajiet kompetenti ma għandhomx jirrestrinġu jew ifixklu bla bżonn l-implimentazzjoni ta’ xi element ta’ VHCNs jew faċilitajiet assoċjati. L-Istati Membri għandhom jagħmlu l-almu tagħhom biex jagħmluha aktar faċli li kwalunkwe regola li tirregola l-kundizzjonijiet u l-proċeduri applikabbli għall-għoti tal-permessi u d-drittijiet ta’ aċċess, meħtieġa għall-implimentazzjoni ta’ elementi ta’ VHCNs jew faċilitajiet assoċjati tkun konsistenti fit-territorju nazzjonali kollu.

L-awtoritajiet kompetenti għandhom jagħmlu disponibbli, permezz ta’ punt uniku tal-informazzjoni f’format elettroniku, l-informazzjoni kollha dwar il-kundizzjonijiet u l-proċeduri applikabbli għall-għoti tal-permessi u d-drittijiet ta’ aċċess, li jingħataw permezz ta’ proċeduri amministrattivi, inkluż kull informazzjoni dwar l-eżenzjonijiet fuq uħud mill-permessi jew id-drittijiet ta’ aċċess, jew fuq kollha kemm huma, meħtieġa skont il-liġi tal-Unjoni jew nazzjonali u modi kif wieħed jissottometti applikazzjonijiet f’format elettroniku u jikseb informazzjoni dwar l-istatus tal-applikazzjoni.

Kwalunkwe operatur għandu jkollu d-dritt li jissottometti, permezz ta’ punt uniku tal-informazzjoni f’format elettroniku, applikazzjonijiet għall-permessi jew għat-tiġdid tagħhom, jew drittijiet ta’ aċċess kollha meħtieġa u li jikseb informazzjoni dwar l-istatus tal-applikazzjoni tiegħu. L-Istati Membri jistgħu jispeċifikaw proċeduri dettaljati biex tinkiseb dik l-informazzjoni.

L-awtoritajiet kompetenti jistgħu, fi żmien 15-il jum tax-xogħol mill-wasla tagħhom, jirrifjutaw l-applikazzjonijiet għall-permessi, inkluż tad-drittijiet ta’ aċċess, li għalihom l-informazzjoni minima ma tkunx saret disponibbli permezz ta’ punt uniku tal-informazzjoni, skont l-Artikolu 6(1), l-ewwel subparagrafu, mill-istess operatur li japplika għal dak il-permess.

L-awtoritajiet kompetenti għandhom jagħtu jew jirrifjutaw il-permessi, għajr id-drittijiet ta’ aċċess, fi żmien 4 xhur mid-data tal-wasla ta’ applikazzjoni kompluta għall-permess.

L-awtoritajiet kompetenti għandhom jiddeterminaw il-kompletezza tal-applikazzjoni għall-permessi jew għad-drittijiet ta’ aċċess fi żmien 20 jum tax-xogħol minn meta jirċievu l-applikazzjoni.L-awtoritajiet kompetenti għandhom jistiednu lill-applikant jipprovdi kwalunkwe informazzjoni nieqsa matul dak il-perjodu. Id-determinazzjoni mill-awtorità kompetenti li l-applikazzjoni għal permess hija kompluta ma għandhiex tirriżulta f’xi sospensjoni jew interruzzjoni tal-perjodu globali ta’ erba’ xhur għall-eżami tal-applikazzjoni għall-permess, li jibda mid-data tal-wasla tal-applikazzjoni kompluta.

L-ewwel u t-tieni subparagrafi għandhom ikunu mingħajr preġudizzju għal skadenzi jew obbligi speċifiċi oħra stabbiliti għat-twettiq xieraq tal-proċedura, applikabbli għall-proċedura tal-għoti tal-permessi, inkluż il-proċedimenti tal-appell, f’konformità mal-liġi tal-Unjoni jew mal-liġi nazzjonali li tosserva l-liġi tal-Unjoni u mingħajr preġudizzju għar-regoli li jagħtu lill-applikant drittijiet addizzjonali jew li jkollhom l-għan li jiżguraw li l-permessi jingħataw malajr kemm jista’ jkun.

L-Istati Membri għandhom jistipulaw u jippubblikaw, bil-quddiem, permezz ta’ punt uniku tal-informazzjoni, ir-raġunijiet li għalihom l-awtorità kompetenti tista’, f’każijiet eċċezzjonali u sostanzjati kif xieraq, filwaqt li taġixxi fuq inizjattiva tagħha stess, testendi l-iskadenzi msemmija fl-ewwel subparagrafu ta’ dan il-paragrafu u fil-paragrafu 6.

Kull estensjoni għandha tkun l-iqsar possibbli u ma għandhiex taqbeż l-erba’ xhur, għajr meta din tkun meħtieġa biex jiġu ssodisfati skadenzi jew obbligi speċifiċi oħra stabbiliti għat-twettiq xieraq tal-proċedura li jkunu applikabbli għall-proċedura tal-għoti tal-permessi, inkluż il-proċedimenti tal-appell, skont il-liġi tal-Unjoni jew il-liġi nazzjonali li tosserva l-liġi tal-Unjoni.

Ma għandhiex tintalab estensjoni sabiex tinkiseb informazzjoni nieqsa li l-awtorità kompetenti tkun naqset milli titlob mill-applikant skont it-tieni subparagrafu.

Kull rifjut ta’ permess jew dritt ta’ aċċess għandu jiġi ssostanzjat kif xieraq abbażi ta’ kriterji oġġettivi, trasparenti, nondiskriminatorji u proporzjonati.

B’deroga mill-Artikolu 43(1), il-punt (a), tad-Direttiva (UE) 2018/1972, meta jkunu meħtieġa drittijiet ta’ aċċess fi, fuq jew taħt proprjetà pubblika jew, fejn applikabbli, proprjetà privata, bl-awtorizzazzjoni minn qabel tas-sid jew f’konformità mal-liġi nazzjonali, għall-implimentazzjoni ta’ elementi ta’ VHCNs jew faċilitajiet assoċjati flimkien mal-permessi, l-awtoritajiet kompetenti għandhom jagħtu dawk id-drittijiet ta’ aċċess fi żmien il-perjodu ta’ erba’ xhur jew fl-iskadenza stabbilita bil-liġi nazzjonali, liema minnhom tkun l-iqsar, mid-data tal-wasla tal-applikazzjoni kompluta, għajr fil-każ ta’ esproprjazzjoni.

L-awtoritajiet kompetenti jistgħu jġeddu l-permess mogħti lil operatur għax-xogħlijiet ċivili meħtieġa għall-implimentazzjoni ta’ elementi ta’ VHCNs jew faċilitajiet assoċjati fejn, għal raġunijiet oġġettivament ġustifikati, ix-xogħlijiet ċivili ma setgħux jibdew jew jintemmu qabel l-iskadenza tal-validità tal-permess. It-tiġdid tal-permess għandu jingħata mingħajr rekwiżiti proċedurali addizzjonali għall-operaturi.

L-Istati Membri jistgħu, fost l-oħrajn, jitolbu permessi għall-introduzzjoni tal-elementi ta’ VHCNs jew tal-faċilitajiet assoċjati f’bini jew f’siti ta’ valur arkitettoniku, storiku, reliġjuż jew ambjentali protetti f’konformità mal-liġi nazzjonali jew, meta meħtieġ, minħabba raġunijiet ta’ sikurezza pubblika, ta’ sigurtà tal-infrastruttura kritika jew raġunijiet ambjentali.

Il-permessi, għajr id-drittijiet ta’ aċċess, meħtieġa għall-implimentazzjoni ta’ elementi ta’ VHCNs jew ta’ faċilitajiet assoċjati, ma għandhomx ikunu soġġetti għal tariffi jew imposti li jmorru lil hinn mill-ispejjeż amministrattivi kif previst, mutatis mutandis, fl-Artikolu 16 tad-Direttiva (UE) 2018/1972.

10.

Il-Kummissjoni għandha timmonitorja l-applikazzjoni ta’ dan l-Artikolu fl-Istati Membri. Għal dak l-għan, l-Istati Membri għandhom jirrappurtaw kull tliet snin lill-Kummissjoni dwar l-istatus tal-implimentazzjoni ta’ dan l-Artikolu u dwar jekk il-kundizzjonijiet elenkati fih ġewx issodisfati.

11.

Il-proċedura stabbilita f’dan l-Artikolu għandha tapplika mingħajr preġudizzju għall-Artikolu 57 tad-Direttiva (UE) 2018/1972.

12.

Dan l-Artikolu għandu jkun mingħajr preġudizzju għall-possibbiltà li l-Istati Membri jintroduċu aktar dispożizzjonijiet għall-awtoritajiet kompetenti biex iħaffu l-proċedura għall-għoti tal-permessi.

Artikolu 8

Nuqqas ta’ deċiżjoni dwar l-applikazzjoni għal permess

Fin-nuqqas ta’ deċiżjoni mill-awtorità kompetenti sal-iskadenza applikabbli msemmija fl-Artikolu 7(5), il-permess għandu jitqies li jkun ingħata mal-iskadenza ta’ dik l-iskadenza.

L-ewwel subparagrafu għandu japplika dment li l-proċedura tal-għoti tal-permessi ma tikkonċernax id-drittijiet ta’ aċċess. Fuq talba, l-operatur jew kwalunkwe parti affettwata għandha tkun intitolata li tirċievi konferma bil-miktub mill-awtorità kompetenti li, fejn applikabbli, il-permess ikun ingħata b’mod impliċitu.

L-Istati Membri għandhom jiżguraw li kwalunkwe parti terza affettwata jkollha d-dritt li tintervjeni fil-proċedura amministrattiva u li tikkontesta d-deċiżjoni li tagħti l-permess.

L-Istati Membri jistgħu jidderogaw mill-paragrafu 1 ta’ dan l-Artikolu fejn ikun disponibbli mill-inqas wieħed mir-rimedji li ġejjin għall-proċedura rilevanti tal-għoti tal-permessi:

(a)

l-operatur li ġarrab dannu bħala riżultat ta’ nuqqas ta’ konformità mill-awtorità kompetenti mal-iskadenza applikabbli stipulata f’konformità mal-Artikolu 7(5) ikun intitolat li jitlob kumpens għad-dannu, f’konformità mal-liġi nazzjonali;

(b)

l-operatur jista’ jirreferi l-każ lil qorti jew lil awtorità superviżorja.

Fil-każ ta’ deroga skont il-paragrafu 2 ta’ dan l-Artikolu, l-Istat Membru kkonċernat għandu jiżgura li, mal-għeluq tal-iskadenza stabbilita f’konformità mal-Artikolu 7(5) u mingħajr preġudizzju għad-dritt tal-operatur li immedjatament ifittex rimedji f’konformità mal-paragrafu 2 ta’ dan l-Artikolu, l-awtorità kompetenti, jew kwalunkwe korp ieħor determinat minn dak l-Istat Membru, għandu jistieden lill-applikant, mingħajr dewmien żejjed, fuq talba tal-operatur, jew fuq inizjattiva proprja, għal laqgħa biex tiġi ffaċilitata l-adozzjoni ta’ deċiżjoni dwar l-applikazzjoni għal permess. Il-laqgħa għandha tissejjaħ mill-awtorità kompetenti mhux aktar tard minn xahrejn wara s-sottomissjoni tat-talba. Mingħajr dewmien żejjed wara l-laqgħa, l-awtorità kompetenti għandha tipprovdi rendikont bil-miktub tad-diskussjoni, inkluż il-fehmiet tal-partijiet involuti u li jindika lill-operatur data meta għandha tinħareġ deċiżjoni dwar l-applikazzjoni għal permess.

Artikoli 9

Eżenzjonijiet mill-proċeduri tal-għoti tal-permessi

Ix-xogħlijiet ċivili li jikkonsistu f’xi waħda minn dawn li ġejjin ma għandhom ikunu soġġetti għal ebda proċedura tal-għoti tal-permessi skont it-tifsira tal-Artikolu 7, sakemm tali permess ma jkunx meħtieġ f’konformità ma’ atti legali oħra tal-Unjoni:

(a)

xogħlijiet ta’ tiswija u manutenzjoni b’ambitu limitat, bħal fir-rigward ta’ valur, daqs, impatt u durata;

(b)

aġġornamenti tekniċi limitati ta’ xogħlijiet jew installazzjonijiet eżistenti, b’impatt limitat;

(c)

xogħlijiet ċivili fuq skala żgħira li huma b’ambitu limitat, bħal fir-rigward ta’ valur, daqs, impatt jew durata meħtieġa għall-implimentazzjoni ta’ VHCNs.

Abbażi ta’ raġunijiet ġustifikati kif xieraq u proporzjonati, l-Istati Membri għandhom jidentifikaw it-tipi ta’ xogħlijiet ċivili li għalihom japplika l-paragrafu 1. L-informazzjoni dwar dawn it-tipi ta’ xogħlijiet ċivili għandha tiġi ppubblikata permezz ta’ punt uniku tal-informazzjoni.

B’deroga mill-paragrafu 1 u soġġett għall-proċedura stabbilita fil-paragrafu 2, l-awtoritajiet kompetenti jistgħu jirrikjedu permessi għall-introduzzjoni ta’ elementi ta’ VHCNs jew faċilitajiet assoċjati fis-sitwazzjonijiet li ġejjin:

(a)

għal infrastruttura fiżika jew ċerti kategoriji ta’ infrastruttura fiżika protetta għal raġunijiet ta’ valur arkitettoniku, storiku, reliġjuż jew ambjentali, jew protetti mod ieħor f’konformità mal-liġi nazzjonali; jew

(b)

fejn meħtieġ għal raġunijiet ta’ sigurtà pubblika, difiża, sikurezza, ambjent jew saħħa pubblika, jew biex tiġi protetta s-sigurtà tal-infrastruttura kritika.

L-Istati Membri jistgħu jirrikjedu li l-operaturi li jippjanaw li jwettqu xogħlijiet ċivili koperti minn dan l-Artikolu jinnotifikaw lill-awtoritajiet kompetenti, qabel il-bidu tax-xogħlijiet, bl-intenzjoni tagħhom li jibdew ix-xogħlijiet ċivili.

Din in-notifika ma għandhiex tinvolvi aktar minn dikjarazzjoni mill-operatur tal-intenzjoni tiegħu li jibda x-xogħlijiet ċivili u s-sottomissjoni tal-informazzjoni minima li hija meħtieġa biex l-awtoritajiet kompetenti jkunu jistgħu jivvalutaw jekk dawk ix-xogħlijiet humiex koperti mid-deroga stipulata fil-paragrafu 3. Dik l-informazzjoni minima għandha tinkludi mill-inqas id-data meta x-xogħlijiet ċivili huma mistennija li jibdew, id-durata tagħhom, id-dettalji ta’ kuntatt tal-persuna responsabbli għat-twettiq tax-xogħlijiet u ż-żona kkonċernata mix-xogħlijiet.

Artikolu 10

Infrastruttura fiżika u wajers tal-fibra fil-bini

Il-bini kollu li għadu kif inbena u l-bini li qed isirlu xogħlijiet kbar ta’ rinnovazzjoni, inkluż l-elementi bi sjieda konġunta, li għalihom ikunu ġew sottomessi applikazzjonijiet għall-permessi tal-bini wara t-12 ta’ Frar 2026, għandu jiġi attrezzat b’infrastruttura fiżika fil-bini lesta għall-fibra u wajers tal-fibra fil-bini, inkluż konnessjonijiet sal-punt fiżiku fejn l-utent finali jikkonnettja man-network pubbliku.

Il-bini b’abitazzjonijiet multipli kollu li għadu kif inbena jew li qed isirluxogħlijiet kbar ta’ rinnovazzjoni, li għalih l-applikazzjonijiet tal-permessi tal-bini jkunu ġew sottomessi wara t-12 ta’ Frar 2026 għandu jiġi attrezzat b’punt tal-aċċess.

Sat-12 ta’ Frar 2026, il-bini kollu, inkluż l-elementi tagħhom bi sjieda konġunta, li qed isirlu xogħlijiet kbar ta’ rinnovazzjoni kif definit fl-Artikolu 2, il-punt (10), tad-Direttiva 2010/31/UE, għandu jiġi attrezzat b’infrastruttura fiżika fil-bini lesta għall-fibra, u wajers tal-fibra fil-bini, inkluż konnessjonijiet sal-punt fiżiku fejn l-utent finali jikkonnettja man-network pubbliku, jekk dan ma jżidx b’mod sproporzjonat l-ispejjeż tax-xogħlijiet ta’ rinnovazzjoni u jekk ikun teknikament fattibbli. Il-bini kollu b’abitazzjonijiet multipli li qed isirlu xogħlijiet kbar ta’ rinnovazzjoni bħal dawn għandu wkoll ikun attrezzat b’punt ta’ aċċess.

Sat-12 ta’ Novembru 2025, l-Istati Membri għandhom, f’konsultazzjoni mal-partijiet interessati u abbażi tal-aħjar prattiki tal-industrija, jadottaw l-istandards jew l-ispeċifikazzjonijiet tekniċi rilevanti li huma meħtieġa għall-implimentazzjoni tal-paragrafi 1, 2 u 3. Dawk l-istandards jew l-ispeċifikazzjonijiet tekniċi għandhom jippermettu faċilment attivitajiet ta’ manutenzjoni ordinarji għall-wajers tal-fibra individwali li jintużaw minn kull operatur biex jipprovdi servizzi tal-VHCN u għandhom jistabbilixxu mill-inqas:

(a)

l-ispeċifikazzjonijiet tal-punt ta’ aċċess għall-bini u l-ispeċifikazzjonijiet tal-interfaċċa tal-fibra;

(b)

l-ispeċifikazzjonijiet tal-kejbil;

(c)

l-ispeċifikazzjonijiet tas-sokit;

(d)

l-ispeċifikazzjonijiet għall-conduits jew il-mikrokanali;

(e)

l-ispeċifikazzjonijiet tekniċi meħtieġa biex tiġi evitata interferenza mal-kejbils elettriċi;

(f)

ir-raġġ minimu tal-liwja;

(g)

speċifikazzjonijiet tekniċi għall-installazzjoni tal-kejbils.

L-Istati Membri għandhom jiżguraw konformità mal-istandards jew l-ispeċifikazzjonijiet tekniċi msemmija fil-paragrafu 4. Biex juru tali konformità, l-Istati Membri għandhom jistabbilixxu proċeduri li jistgħu jinkludu spezzjoni fuq il-post tal-bini jew kampjun rappreżentattiv tagħhom.

Bini attrezzat f’konformità ma’ dan l-Artikolu għandu jkun eliġibbli, fuq bażi volontarja u skont il-proċeduri stabbiliti mill-Istati Membri, li jirċievi tikketta “lest għall-fibra”, fejn l-Istati Membri jkunu għażlu li jintroduċu t-tali tikketta.

Il-paragrafi 1, 2 u 3 ma għandhomx japplikaw għal ċerti kategoriji ta’ bini, meta l-konformità ma’ dawk il-paragrafi tkun sproporzjonata, mil-lat ta’ spejjeż għal sidien individwali jew konġunti abbażi ta’ elementi oġġettivi. L-Istati Membri għandhom jidentifikaw dawn il-kategoriji tal-bini abbażi ta’ raġunijiet ġustifikati kif xieraq u proporzjonati.

L-Istati Membri għandhom jidentifikaw, abbażi ta’ raġunijiet debitament sostanzjati u proporzjonati, it-tipi ta’ bini, bħal kategoriji speċifiċi ta’ monumenti, bini storiku, bini militari u bini użat għal finijiet ta’ sigurtà nazzjonali, kif definit fil-liġi nazzjonali, li għandhom ikunu eżentati mill-obbligi previsti fil-paragrafi 1, 2 u 3 jew li għalihom dawn l-obbligi għandhom japplikaw b’adattamenti tekniċi xierqa. L-informazzjoni dwar dawn il-kategoriji tal-bini għandha tiġi ppubblikata permezz ta’ punt uniku tal-informazzjoni.

Artikolu 11

Aċċess għall-infrastruttura fiżika fil-bini

Soġġett għall-paragrafu 3, u mingħajr preġudizzju għad-drittijiet tal-proprjetà, kull fornitur ta’ networks pubbliċi tal-komunikazzjonijiet elettroniċi għandu jkollu d-dritt li jintroduċi n-network tiegħu bi spejjeż tiegħu sal-punt ta’ aċċess.

Soġġett għall-paragrafu 3, kull fornitur ta’ networks pubbliċi tal-komunikazzjonijiet elettroniċi għandu jkollu d-dritt tal-aċċess għal kwalunkwe infrastruttura fiżika eżistenti fil-bini biex jimplimenta elementi ta’ VHCNs jekk id-duplikazzjoni tkun teknikament impossibbli jew ekonomikament ineffiċjenti.

Kull detentur ta’ dritt li juża l-punt ta’ aċċess u l-infrastruttura fiżika fil-bini għandu jissodisfa t-talbiet bil-miktub raġonevoli kollha tal-aċċess għall-punt ta’ aċċess u għall-infrastruttura fiżika fil-bini mingħand il-fornituri tan-networks pubbliċi tal-komunikazzjonijiet elettroniċi b’termini u kundizzjonijiet ġusti, raġonevoli u nondiskriminatorji, inkluż il-prezz, meta xieraq. L-Istati Membri jistgħu jispeċifikaw rekwiżiti ddettaljati relatati ma’ aspetti amministrattivi tat-talba.

Fin-nuqqas ta’ infrastruttura fiżika disponibbli fil-bini lesta għall-fibra, kull fornitur ta’ networks pubbliċi tal-komunikazzjonijiet elettroniċi għandu jkollu d-dritt li jtemm in-network tiegħu fil-bini tal-abbonat, soġġett għall-qbil tas-sid u/jew tal-abbonat, f’konformità mal-liġi nazzjonali, bl-użu tal-infrastruttura fiżika eżistenti fil-bini, sal-punt li tkun disponibbli u aċċessibbli skont il-paragrafu 3, u dment li din timminimizza l-impatt fuq il-proprjetà privata ta’ partijiet terzi.

Dan l-Artikolu għandu jkun mingħajr preġudizzju għad-dritt għall-proprjetà tas-sid tal-punt ta’ aċċess jew tal-infrastruttura fiżika fil-bini fejn id-detentur ta’ dritt għall-użu ta’ dik l-infrastruttura jew dak il-punt ta’ aċċess ma jkunx is-sid, u għad-dritt għall-proprjetà ta’ partijiet terzi oħra, bħas-sidien tal-artijiet u s-sidien tal-bini.

Sat-12 ta’ Novembru 2025, wara konsultazzjoni mal-partijiet ikkonċernati, mal-korpi nazzjonali għas-soluzzjoni tat-tilwim u ma’ korpi jew aġenziji kompetenti oħra tal-Unjoni fis-setturi rilevanti kif xieraq, u b’kont meħud ta’ prinċipji stabbiliti sew u tas-sitwazzjoni distinta fl-Istati Membri kollha, il-BEREC għandu, f’kooperazzjoni mill-qrib mal-Kummissjoni, jippubblika linji gwida dwar it-termini u l-kundizzjonijiet ta’ aċċess għall-infrastruttura fiżika fil-bini, inkluż dwar l-applikazzjoni ta’ termini u kundizzjonijiet ġusti u raġonevoli, u l-kriterji li jenħtieġ li jsegwu l-korpi nazzjonali għas-soluzzjoni tat-tilwim meta jsolvu tilwim.

Artikolu 12

Diġitalizzazzjoni tal-punti ta’ informazzjoni uniċi

Il-punti ta’ informazzjoni uniċi għandhom jagħmlu l-għodod diġitali xierqa disponibbli, bħal fil-forma ta’ portali web, bażijiet tad-data, pjattaformi diġitali jew applikazzjonijiet diġitali, biex jippermettu l-eżerċitar online tad-drittijiet kollha u l-konformità mal-obbligi kollha stipulati f’dan ir-Regolament.

L-Istati Membri jistgħu jinterkollegaw, jew jintegraw għalkollox jew parzjalment, diversi għodod diġitali eżistenti jew li għadhom kemm ġew żviluppati li jappoġġaw il-punti ta’ informazzjoni uniċi msemmija fil-paragrafu 1, kif xieraq, sabiex tiġi evitata d-duplikazzjoni tal-għodod diġitali.

L-Istati Membri għandhom jistipulaw punt tad-dħul diġitali nazzjonali uniku, li jkun jikkonsisti f’interfaċċa komuni tal-utenti biex jiġi żgurat aċċess bla xkiel għall-punti ta’ informazzjoni uniċi diġitalizzati.

L-Istati Membri għandhom jiżguraw riżorsi tekniċi, finanzjarji u umani adegwati biex jappoġġaw l-introduzzjoni u d-diġitalizzazzjoni tal-punti ta’ informazzjoni uniċi.

Artikolu 13

Soluzzjoni tat-tilwim

Mingħajr preġudizzju għall-possibbiltà li każ jiġi riferut quddiem qorti, kull parti għandha tkun intitolata li tirreferi tilwima li tista’ tinqala’ quddiem il-korp nazzjonali kompetenti għas-soluzzjoni tat-tilwim stabbilit skont l-Artikolu 14:

(a)

meta l-aċċess għall-infrastruttura eżistenti jiġi rrifjutat jew ma jkunx intlaħaq qbil dwar it-termini u l-kundizzjonijiet speċifiċi, inkluż il-prezz, fi żmien xahar mid-data tal-wasla tat-talba għall-aċċess skont l-Artikolu 3;

(b)

b’rabta mad-drittijiet u l-obbligi stipulati fl-Artikoli 4 u 6, inkluż meta l-informazzjoni mitluba ma tiġix ipprovduta sal-iskadenzi applikabbli;

(c)

meta ma jkunx intlaħaq qbil dwar il-koordinazzjoni tax-xogħlijiet ċivili skont l-Artikolu 5(2) fi żmien xahar mid-data tal-wasla tat-talba formali għall-koordinazzjoni tax-xogħlijiet ċivili; jew

(d)

meta ma jkunx intlaħaq qbil dwar l-aċċess għall-infrastruttura fiżika fil-bini msemmi fl-Artikolu 11(2) jew (3) fi żmien xahar mid-data tal-wasla tat-talba formali tal-aċċess.

L-Istati Membri jistgħu jipprevedu li, fil-każ tat-tilwim imsemmi fil-paragrafu 1, il-punti (a) u (d), meta l-entità li mingħandha l-operatur talab aċċess tkun fl-istess ħin l-entità intitolata li tagħti d-dritt ta’ aċċess lill-proprjetà li fuqha, li fiha jew taħtha jinsab is-suġġett tat-talba għall-aċċess, il-korp nazzjonali kompetenti għas-soluzzjoni tat-tilwim jista’ wkoll isolvi t-tilwima rigward id-dritt ta’ passaġġ.

Filwaqt li jqis bis-sħiħ il-prinċipju tal-proporzjonalità u l-prinċipji stabbiliti fil-gwida rilevanti tal-Kummissjoni jew il-linji gwida tal-BEREC, il-korp nazzjonali għas-soluzzjoni tat-tilwim imsemmi fil-paragrafu 1 għandu joħroġ deċiżjoni vinkolanti biex isolvi t-tilwima:

(a)

fi żmien erba’ xhur mid-data tal-wasla tat-talba tas-soluzzjoni tat-tilwim, fir-rigward tat-tilwim imsemmi fil-paragrafu 1, il-punt (a).

(b)

fi żmien xahar mid-data tal-wasla tat-talba tas-soluzzjoni tat-tilwim, fir-rigward tat-tilwim imsemmi fil-paragrafu 1, il-punti (b), (c) u (d).

Dawk l-iskadenzi jistgħu jiġu estiżi biss f’ċirkostanzi eċċezzjonali ġustifikati kif xieraq.

Fir-rigward tat-tilwim imsemmi fil-paragrafu 1, il-punti (a), (c) u (d), tad-deċiżjoni tal-korp nazzjonali għas-soluzzjoni tat-tilwim tista’ tikkonsisti fl-istabbiliment ta’ termini u kundizzjonijiet ġusti u raġonevoli, inkluż il-prezz, meta xieraq.

Il-korpi għas-soluzzjoni tat-tilwim għandhom jippubblikaw id-deċiżjonijiet tagħhom, filwaqt li jirrispettaw il-prinċipji tal-kunfidenzjalità u l-protezzjoni tas-sigrieti kummerċjali. Il-punt ta’ informazzjoni uniku għandu jiżgura aċċess għad-deċiżjonijiet ippubblikati mill-korpi għas-soluzzjoni tat-tilwim.

Meta t-tilwima tkun relatata mal-aċċess għall-infrastruttura ta’ operatur u l-korp nazzjonali għas-soluzzjoni tat-tilwim ikun l-awtorità regolatorja nazzjonali, għandhom jitqiesu l-objettivi stipulati fl-Artikolu 3 tad-Direttiva (UE) 2018/1972, meta xieraq.

Dan l-Artikolu jikkomplementa r-rimedji u l-proċeduri ġudizzjarji f’konformità mal-Artikolu 47 tal-Karta tad-Drittijiet Fundamentali tal-Unjoni Ewropea, u huwa mingħajr preġudizzju għalihom.

Artikolu 14

Korpi kompetenti

L-Istati Membri għandhom jistabbilixxu jew jaħtru korp kompetenti wieħed jew aktar biex iwettqu l-kompiti assenjati lill-korp nazzjonali għas-soluzzjoni tat-tilwim f’konformità mal-Artikolu 13(1) (il-“korp nazzjonali għas-soluzzjoni tat-tilwim”).

Il-korp nazzjonali għas-soluzzjoni tat-tilwim għandu jkun legalment distint, u funzjonalment indipendenti, minn kwalunkwe operatur tan-network u minn kwalunkwe korp tas-settur pubbliku li huwa s-sid ta’ infrastruttura fiżika involuta fit-tilwim, jew li jikkontrollaha. L-Istati Membri li jibqa’ jkollhom is-sjieda jew il-kontroll tal-operaturi tan-networks għandhom jiżguraw separazzjoni strutturali effettiva tal-funzjonijiet relatati mal-proċeduri nazzjonali tas-soluzzjoni tat-tilwim u dawk tal-punt uniku tal-informazzjoni minn attivitajiet assoċjati mas-sjieda jew mal-kontroll.

Il-korpi nazzjonali għas-soluzzjoni tat-tilwim għandhom jaġixxu b’mod indipendenti u oġġettiv, u ma għandhomx ifittxu jew jieħdu struzzjonijiet minn xi korp ieħor meta jiddeċiedu dwar it-tilwim sottomess lilhom. Dan ma għandux jipprevjeni superviżjoni f’konformità mal-liġi nazzjonali. Il-korpi tal-appell kompetenti biss għandu jkollhom is-setgħa li jissospendu jew ibiddlu d-deċiżjonijiet tal-korpi nazzjonali għas-soluzzjoni tat-tilwim.

Il-korp nazzjonali għas-soluzzjoni tat-tilwim jista’ jitlob xi ħlasijiet biex ikopri l-ispejjeż tat-twettiq tal-kompiti assenjati lilu.

Il-partijiet kollha kkonċernati minn tilwima għandhom jikkooperaw bis-sħiħ mal-korp nazzjonali għas-soluzzjoni tat-tilwim.

Il-funzjonijiet ta’ punt uniku tal-informazzjoni msemmi fl-Artikoli minn 3 sa 10, 12 u 13 għandhom jitwettqu minn korp kompetenti wieħed jew aktar maħtura mill-Istati Membri fil-livell lokali, reġjonali jew nazzjonali, kif xieraq. Biex jiġu koperti l-ispejjeż tal-qadi ta’ dawk il-funzjonijiet, jistgħu jintalbu ħlasijiet għall-użu tal-punti ta’ informazzjoni uniċi.

Il-paragrafu 2, l-ewwel subparagrafu, għandu japplika mutatis mutandis għall-korpi kompetenti li jwettqu l-funzjonijiet ta’ punt uniku tal-informazzjoni.

Il-korpi kompetenti għandhom jeżerċitaw is-setgħat tagħhom b’mod imparzjali, trasparenti u fil-ħin. L-Istati Membri għandhom jiżguraw li dawn ikollhom ir-riżorsi tekniċi, finanzjarji u umani adegwati biex iwettqu l-kompiti assenjati lilhom.

L-Istati Membri għandhom jippubblikaw il-kompiti li għandu jwettaq kull korp kompetenti permezz ta’ punt uniku tal-informazzjoni, b’mod partikolari meta dawk il-kompiti jiġu assenjati lil aktar minn korp kompetenti wieħed jew meta l-kompiti assenjati jkunu nbidlu. Meta xieraq, il-korpi kompetenti għandhom jikkonsultaw u jikkooperaw bejniethom dwar kwistjonijiet ta’ interess komuni.

L-Istati Membri għandhom jgħarrfu lill-Kummissjoni bl-identità ta’ kull korp kompetenti, f’konformità ma’ dan l-Artikolu, biex iwettaq funzjoni skont dan ir-Regolament, u bir-responsabbiltajiet rispettivi tagħhom kif ukoll bi kwalunkwe modifika fihom, qabel ma din il-ħatra jew il-modifika tidħol fis-seħħ.

10.

Kull deċiżjoni meħuda minn korp kompetenti għandha tkun soġġetta għal appell, f’konformità mal-liġi nazzjonali, quddiem korp tal-appell indipendenti għalkollox, inkluż korp ta’ natura ġudizzjarja. L-Artikolu 31 tad-Direttiva (UE) 2018/1972 għandu japplika mutatis mutandis għal kull appell skont dan il-paragrafu.

Id-dritt għal appell f’konformità mal-ewwel subparagrafu għandu jkun mingħajr preġudizzju għad-dritt tal-partijiet li jressqu t-tilwima quddiem il-qorti nazzjonali kompetenti.

Artikolu 15

Penali

L-Istati Membri għandhom jistabbilixxu regoli dwar il-penali applikabbli għall-ksur ta’ dan ir-Regolament u ta’ xi deċiżjoni vinkolanti adottata skont dan ir-Regolament mill-korpi kompetenti msemmija fl-Artikolu 14 u għandhom jieħdu l-miżuri kollha meħtieġa biex jiżguraw li dawn jiġu implimentati. Il-penali previsti għandhom ikunu xierqa, effettivi, proporzjonati u dissważivi.

Artikolu 16

Rapport u monitoraġġ

Sat-12 ta’ Mejju 2028, il-Kummissjoni għandha tippreżenta rapport lill-Parlament Ewropew u lill-Kunsill dwar l-implimentazzjoni ta’ dan ir-Regolament. Ir-rapport għandu jinkludi sommarju tal-impatt tal-miżuri stabbiliti f’dan ir-Regolament u valutazzjoni tal-progress lejn l-ilħuq tal-objettivi tiegħu, inkluż jekk dan ir-Regolament jistax jikkontribwixxi aktar biex jintlaħqu l-miri tal-konnettività stabbiliti fid-Deċiżjoni (UE) 2022/2481 u, jekk iva, kif.

Ir-rapport għandu jinkludi żviluppi relatati mal-kamp ta’ applikazzjoni ta’ dan ir-Regolament li għandhom impatt potenzjali fuq il-progress lejn l-implimentazzjoni rapida u estensiva tal-VHCN, f’żoni rurali, insulari u remoti, bħall-gżejjer u r-reġjuni muntanjużi u b’popolazzjoni baxxa, kif ukoll fuq l-evoluzzjoni tas-suq għall-infrastruttura ta’ torrijiet, u l-adozzjoni ta’ diversi soluzzjonijiet ta’ backhauling inkluż backhauling bis-satellita fil-konnettività diġitali ta’ veloċità għolja.

Għal dak il-għan, il-Kummissjoni tista’ titlob informazzjoni mingħand l-Istati Membri, li trid tiġi sottomessa mingħajr dewmien żejjed. B’mod partikolari, sat-12 ta’ Novembru 2025, l-Istati Membri għandhom, b’kooperazzjoni mill-qrib mal-Kummissjoni, permezz tal-Kumitat tal-Komunikazzjonijiet stabbilit skont l-Artikolu 118 tad-Direttiva (UE) 2018/1972, jistipulaw indikaturi biex jiġu mmonitorjati b’mod adegwat l-applikazzjoni ta’ dan ir-Regolament u l-mekkaniżmu biex jiġi żgurat il-ġbir perjodiku tad-data u r-rappurtar ta’ dan lill-Kummissjoni.

Artikolu 17

Emendi għar-Regolament (UE) 2015/2120

Ir-Regolament (UE) 2015/2120 huwa emendat kif ġej:

(1)

Fl-Artikolu 2, jiżdiedu l-punti li ġejjin:

“(5)

‘servizz ta’ komunikazzjonijiet interpersonali indipendenti min-numri’ tfisser servizz ta’ komunikazzjonijiet interpersonali indipendenti min-numri kif definit fl-Artikolu 2, il-punt (7), tad-Direttiva (UE) 2018/1972 tal-Parlament Ewropew u tal-Kunsill ( *1 );

(6)

‘komunikazzjonijiet domestiċi’ tfisser kwalunkwe servizz tal-komunikazzjonijiet interpersonali bbażati fuq in-numri li joriġina fl-Istat Membru tal-fornitur domestiku tal-konsumatur u li jittermina fi kwalunkwe numru fiss jew mobbli tal-pjan nazzjonali ta’ numerazzjoni, tal-istess Stat Membru;

(7)

‘komunikazzjonijiet intra-UE’ tfisser kwalunkwe servizz tal-komunikazzjonijiet interpersonali bbażati fuq in-numri li joriġina fl-Istat Membru tal-fornitur domestiku tal-konsumatur u li jittermina fi kwalunkwe numru fiss jew mobbli tal-pjan nazzjonali ta’ numerazzjoni ta’ Stat Membru ieħor.

(2)

fl-Artikolu 5a, jiżdiedu l-paragrafi li ġejjin:

“7.

Mill-1 ta’ Jannar 2029, il-fornituri ma għandhomx japplikaw prezzijiet bl-imnut differenti għall-konsumaturi għal komunikazzjonijiet domestiċi u komunikazzjonijiet intra-UE, dment li jiġu adottati regoli tekniċi dwar salvagwardji bħas-sostenibbiltà, l-użu ġust u l-miżuri kontra l-frodi. Sat-30 ta’ Ġunju 2028, il-Kummissjoni għandha, wara konsultazzjoni mal-BEREC, tadotta att ta’ implimentazzjoni li jistabbilixxi dawk ir-regoli tekniċi f’konformità mal-proċedura ta’ eżami msemmija fl-Artikolu 5b.

Mill-1 ta’ Jannar 2025, il-fornituri jistgħu, fuq bażi volontarja, jikkonformaw mal-obbligu li ma japplikawx prezzijiet bl-imnut differenti minn dawk stabbiliti fil-paragrafu 7. Dawk il-fornituri għandhom ikunu eżentati mill-obbligi stabbiliti fil-paragrafu 1, soġġett għal politika ta’ użu ġust, bil-ħsieb li jġibu l-benefiċċji ta’ prezzijiet bl-imnut ugwali għal komunikazzjonijiet domestiċi u intra-UE lill-konsumaturi aktar kmieni. Għal dak l-għan, il-Kummissjoni għandha tadotta att ta’ implimentazzjoni dwar l-użu ġust, ibbażat fuq xejriet tipiċi tal-użu, u miżuri kontra l-frodi sal-31 ta’ Diċembru 2024, wara konsultazzjoni mal-BEREC. Dak l-att ta’ implimentazzjoni għandu jiġi adottat f’konformità mal-proċedura ta’ rieżami msemmija fl-Artikolu 5b(2).

Sat-30 ta’ Ġunju 2027, wara konsultazzjoni mal-BEREC, il-Kummissjoni għandha tirrieżamina dan l-Artikolu, u abbażi tal-valutazzjoni tal-impatt tiegħu, il-Kummissjoni tista’, jekk xieraq, tiddeċiedi li tippreżenta proposta leġiżlattiva sabiex temendah.

10.

Il-valutazzjoni msemmija fil-paragrafu 9 għandha tinkludi:

(a)

l-evoluzzjoni tal-ispejjeż bl-ingrossa relatati mal-forniment ta’ komunikazzjonijiet intra-UE;

(b)

l-evoluzzjoni tal-kompetizzjoni fis-suq għall-forniment ta’ servizzi tal-komunikazzjonijiet interpersonali bbażati fuq in-numri u x-xejra tal-prezzijiet bl-imnut tal-komunikazzjonijiet intra-UE fl-Istati Membri differenti;

(c)

l-evoluzzjoni tal-preferenzi tal-konsumaturi u l-għażla ta’ offerti speċjali u pakketti mhux imposti fuq il-bażi tal-konsum reali tal-komunikazzjonijiet intra-UE;

(d)

l-impatt possibbli fuq is-swieq nazzjonali għall-forniment ta’ servizzi tal-komunikazzjonijiet interpersonali bbażati fuq in-numri u b’mod partikolari fuq il-prezzijiet bl-imnut imposti fuq il-konsumaturi b’mod ġenerali, filwaqt li jitqiesu l-ispejjeż tal-forniment ta’ komunikazzjonijiet intra-UE, u l-impatt potenzjali tal-miżuri fuq id-dħul għall-fornituri u, jekk possibbli, il-kapaċità ta’ investiment tal-fornituri, b’mod partikolari bil-ħsieb tal-introduzzjoni futura ta’ networks f’konformità mal-miri għall-konnettività stabbiliti fid-Deċiżjoni (UE) 2022/2481 fejn l-imposti addizzjonali għall-komunikazzjonijiet intra-UE ma jkunux diġà ġew applikati;

(e)

il-firxa tal-użu, id-disponibbiltà u l-kompetittività tas-servizzi tal-komunikazzjonijiet interpersonali indipendenti min-numri jew kwalunkwe alternattiva għall-komunikazzjonijiet intra-UE;

(f)

l-evoluzzjoni tal-pjanijiet tariffarji fir-rigward tal-komunikazzjonijiet intra-UE, u b’mod partikolari, il-punt sa fejn l-implimentazzjoni tal-miżuri previsti fil-paragrafu 8 pproduċiet riżultati fid-direzzjoni tal-eliminazzjoni tad-differenzi fil-prezzijiet bl-imnut għall-konsumaturi bejn komunikazzjonijiet domestiċi u dawk intra-UE.

11.

Sabiex iwettaq il-valutazzjoni msemmija fil-paragrafu 9, il-BEREC għandu jiġbor l-informazzjoni rilevanti mingħand l-awtoritajiet regolatorji nazzjonali fuq bażi regolari. Fejn applikabbli, l-awtoritajiet regolatorji nazzjonali jistgħu jipprovdu tali data f’koordinazzjoni mal-awtoritajiet kompetenti oħra. Id-data miġbura mill-BEREC skont dan il-paragrafu għandha tiġi nnotifikata lill-Kummissjoni mill-inqas darba fis-sena. Il-Kummissjoni għandha tippubblikaha. Biex jiġi żgurat li l-BEREC ikun jista’ jwettaq l-obbligi tiegħu skont dan il-paragrafu, il-fornituri għandhom ikunu obbligati jikkooperaw billi jipprovdu d-data mitluba, inkluż data kunfidenzjali, lill-awtoritajiet nazzjonali rilevanti.”;

(3)

jiddaħħal l-Artikolu li ġej:

“Artikolu 5b

Proċedura ta’ kumitat

Sabiex tissodisfa l-obbligi tagħha skont l-Artikolu 5a ta’ dan ir-Regolament, il-Kummissjoni għandha tkun assistita mill-Kumitat tal-Komunikazzjonijiet stabbilit bl-Artikolu 118(1) tad-Direttiva (UE) 2018/1972. Dak il-kumitat għandu jkun kumitat fis-sens tar-Regolament (UE) Nru 182/2011.

Fejn issir referenza għal dan l-Artikolu, għandu japplika l-Artikolu 5 tar-Regolament (UE) Nru 182/2011.”;

(4)

fl-Artikolu 10(5), id-data “14 ta’ Mejju 2024” hija sostitwita bid-data “30 ta’ Ġunju 2032.”.

Artikolu 18

Tħassir

Id-Direttiva 2014/61/UE hija mħassra b’effett mill- ►C1 12 ta’ Novembru 2025 ◄ .

B’deroga mill-paragrafu 1 ta’ dan l-Artikolu, fejn id-dispożizzjonijiet ta’ dan ir-Regolament li jissostitwixxu d-dispożizzjonijiet tad-Direttiva 2014/61/UE japplikaw minn data aktar tard, id-dispożizzjonijiet korrispondenti li ġejjin ta’ dik id-Direttiva għandhom jibqgħu fis-seħħ sa dik l-istess data, kif stipulat hawn taħt:

(a)

L-Artikolu 4(2) u (3), l-Artikolu 4(4), l-ewwel sentenza, l-Artikolu 6(1), (2), (3) u (5) u l-Artikolu 7(1) u (2), ta’ dik id-Direttiva għandhom jibqgħu fis-seħħ sat-12 ta’ Mejju 2026;

(b)

L-Artikolu 8(1) sa (4) ta’ dik id-Direttiva għandu jibqa’ fis-seħħ sat-12 ta’ Frar 2026.

Ir-referenzi għad-Direttiva li tħassret għandhom jiġu interpretati bħala referenzi għal dan ir-Regolament u għandhom jinqraw f’konformità mat-tabella ta’ korrelazzjoni fl-Anness.

Artikolu 19

Dħul fis-seħħ u applikazzjoni

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mit-12 ta’ Novembru 2025.

B’deroga mill-paragrafu 2 ta’ dan l-Artikolu:

(a)

l-Artikolu 5(6) u l-Artikolu 11(6) għandhom japplikaw mill-11 ta’ Mejju 2024;

(b)

l-Artikolu 17 għandu japplika mill-15 ta’ Mejju 2024.

(c)

l-Artikolu 10(1), (2) u (3) għandu japplika mit-12 ta’ Frar 2026;

(d)

l-Artikolu 4(3), l-Artikolu 6(1), l-Artikolu 7(2) u (3) u l-Artikolu 12(1), (2) u (3) għandhom japplikaw mit-12 ta’ Mejju 2026;

Dan ir-Regolament għandu jorbot fl-intier tiegħu u japplika direttament fl-Istati Membri kollha.

ANNESS

Tabella ta’ korrelazzjoni

Direttiva 2014/61/UE	Dan ir-Regolament
Artikolu 1(1)	Artikolu 1(1)
Artikolu 1(2)	Artikolu 1(3)
Artikolu 1(3)	Artikolu 1(3)
Artikolu 1(4)	Artikolu 1(2)
—	Artikolu 1(4)
—	Artikolu 1(5)
Artikolu 2	Artikolu 2
Artikolu 3(1)	Artikolu 3(11)
Artikolu 3(2)	Artikolu 3(1)
—	Artikolu 3(2)
—	Artikolu 3(3)
—	Artikolu 3(4)
Artikolu 3(3)	Artikolu 3(5)
—	Artikolu 3(6)
Artikolu 3(3), it-tieni subparagrafu	Artikolu 3(7)
Artikolu 3(4)	Artikolu 13(1)(a)
Artikolu 3(5)	Artikolu 13(2) Artikolu 13(3) Artikolu 13(4), it-tieni subparagrafu
—	Artikolu 3(8)
—	Artikolu 3(9)
—	Artikolu 3(10)
Artikolu 3(6)	Artikolu 3(12)
—	Artikolu 3(13)
Artikolu 4(1)	Artikolu 4(1)
Artikolu 4(2)	Artikolu 4(3)
—	Artikolu 4(2)
–Artikolu 4(3)	Artikolu 4(1) Artikolu 4(3)
Artikolu 4(4) l-ewwel sentenza	Artikolu 4(3)
—	Artikolu 4(4)
Artikolu 4(4) it-tieni u t-tielet sentenza	Artikolu 4(1), it-tieni u t-tielet subparagrafu
Artikolu 4(5)	Artikolu 4(5)
Artikolu 4(6)	Artikolu 13(1)(b) Artikolu 13(2)(b)
Artikolu 4(7)	Artikolu 4(6) Artikolu 4(7)
Artikolu 4(8)	Artikolu 4(8)
Artikolu 5(1)	Artikolu 5(1)
Artikolu 5(2)	Artikolu 5(2)
—	Artikolu 5(3)
—	Artikolu 5(4)
Artikolu 5(3)	Artikolu 13(1)(c)
Artikolu 5(4)	Artikolu 13(2)(b) Artikolu 13(3)
Artikolu 5(5)	Artikolu 5(5)
—	Artikolu 5(6)
Artikolu 6(1)	Artikolu 6(1)
Artikolu 6(2)	—
Artikolu 6(3)	Artikolu 6(1)
Artikolu 6(4)	Artikolu 13(1)(b), Artikolu 13(2)(b),
Artikolu 6(5)	Artikolu 6(2)
—	Artikolu 7(1)
Artikolu 7(1)	Artikolu 7(2)
Artikolu 7(2)	Artikolu 7(3)
—	Artikolu 7(4)
Artikolu 7(3)	Artikolu 7(5)
—	Artikolu 7(6) Artikolu 7(7) Artikolu 7(8) Artikolu 7(9) Artikolu 7(10) Artikolu 7(11) Artikolu 7(12)
Artikolu 7(4)	—
—	Artikolu 8
—	Artikolu 9
Artikolu 8(1)	Artikolu 10(1)
Artikolu 8(2)	Artikolu 10(2)
Artikolu 8(3)	Artikolu 10(6)
Artikolu 8(4)	Artikolu 10(7) Artikolu 10(8)
Artikolu 9(1)	Artikolu 11(1)
Artikolu 9(2)	Artikolu 11(2)
Artikolu 9(3)	Artikolu 11(3) Artikolu 13(1)(d) Artikolu 13(2)
Artikolu 9(4)	Artikolu 11(3)
Artikolu 9(5)	Artikolu 11(4)
Artikolu 9(6)	Artikolu 11(5)
—	Artikolu 11(6)
—	Artikolu 12
—	Artikolu 13(1) it-tieni subparagrafu
—	Artikolu 13(4) l-ewwel subparagrafu
—	Artikolu 13(5)
Artikolu 10(1)	Artikolu 14(1)
Artikolu 10(2)	Artikolu 14(2) u Artikolu 14(3)
Artikolu 10(3)	Artikolu 14(4)
Artikolu 10(4)	Artikolu 14(5)
—	Artikolu 14(6)
—	Artikolu 14(7)
Artikolu 10(5)	Artikolu 14(9)
Artikolu 10(6)	Artikolu 14(10)
Artikolu 11	Artikolu 15
Artikolu 12	Artikolu 16(1)
—	Artikolu 16(2)
—	Artikolu 17
—	Artikolu 18
Artikolu 13	—
Artikolu 14	Artikolu 19
Artikolu 15	—

( ) Id-Direttiva (UE) 2020/2184 tal-Parlament Ewropew u tal-Kunsill tas-16 ta’ Diċembru 2020 dwar il-kwalità tal-ilma maħsub għall-konsum mill-bniedem (ĠU L 435, 23.12.2020, p. 1).

( *1 ) Id-Direttiva (UE) 2018/1972 tal-Parlament Ewropew u tal-Kunsill tal-11 ta’ Diċembru 2018 li tistabbilixxi l-Kodiċi Ewropew għall-Komunikazzjonijiet Elettroniċi (ĠU L 321, 17.12.2018, p. 36).”;