2011D0402 — MT — 23.12.2011 — 003.001
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
DEĊIŻJONI TA’ IMPLIMENTAZZJONI TAL-KUMMISSJONI tas-6 ta’ Lulju 2011 dwar miżuri ta’ emerġenza applikabbli għaż-żerriegħa tal-fienu u ċertu żerriegħa u fażola impurtata mill-Eġittu (notifikata bid-dokument numru C(2011) 5000) (Test b’relevanza għaż-ŻEE) (ĠU L 179, 7.7.2011, p.10) |
Emendat bi:
|
|
Il-Ġurnal Uffiċjali |
||
No |
page |
date |
||
DEĊIŻJONI TA’ IMPLIMENTAZZJONI TAL-KUMMISSJONI tas-6 ta’ Ottubru 2011 |
L 263 |
20 |
7.10.2011 |
|
DEĊIŻJONI TA’ IMPLIMENTAZZJONI TAL-KUMMISSJONI tat-28 ta’ Ottubru 2011 |
L 285 |
53 |
1.11.2011 |
|
DEĊIŻJONI TA’ IMPLIMENTAZZJONI TAL-KUMMISSJONI tal-21 ta’ Diċembru 2011 |
L 343 |
117 |
23.12.2011 |
DEĊIŻJONI TA’ IMPLIMENTAZZJONI TAL-KUMMISSJONI
tas-6 ta’ Lulju 2011
dwar miżuri ta’ emerġenza applikabbli għaż-żerriegħa tal-fienu u ċertu żerriegħa u fażola impurtata mill-Eġittu
(notifikata bid-dokument numru C(2011) 5000)
(Test b’relevanza għaż-ŻEE)
(2011/402/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 178/2002 tal-Parlament Ewropew u tal-Kunsill tat-28 ta’ Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta’ sigurtà tal-ikel ( 1 ), u b’mod partikolari l-Artikolu 53(1)(b)(i) u l-Artikolu 53(1)(b)(iii) tiegħu,
Billi:
(1) |
Ir-Regolament (KE) Nru 178/2002 li jistabbilixxi prinċipji ġenerali li jirregolaw l-ikel u l-għalf b’mod ġenerali, u b’mod partikolari s-sikurezza tal-ikel u l-għalf, fil-livell Komunitarju u dak nazzjonali. Dan jistipula miżuri ta’ emerġenza meta huwa evidenti li ikel jew għalf impurtat minn pajjiż terz huwa mistenni li jikkostitwixxi riskju serju għas-saħħa tal-bniedem, is-saħħa tal-annimali jew l-ambjent, u li tali riskju ma jistax jiġi kkontrollat b’mod sodisfaċenti permezz ta’ miżuri meħuda mill-Istat(i) Membru(i) kkonċernat(i). |
(2) |
Fit-22 ta’ Mejju 2011 il-Ġermanja rrappurtat tixrid ta’ Tossina Shiga li tipproduċi batterji Escherichia coli (STEC), serotip O104:H4 fin-naħa ta’ fuq tal-Ġermanja. Ibbażat fuq investigazzjonijiet epidemjoloġiċi u ttestjar fil-laboratorju, is-sors ta’ kontaminazzjoni jista’ jkun marbut mal-konsum ta’ żerriegħa mxarrba prodotta f’wieħed mill-istabbilimenti fin-naħa ta’ isfel ta’ Hamburg. |
(3) |
Fil-15 ta’ Ġunju 2011 Franza rrappurtat tixrid f’Bordeaux, fi Franza, li - skont riżultati preliminari - ġie kkawżat mill-istess razza tal-E. coli (Tossina Shiga li tipproduċi batteriji Escherichia coli (STEC), serotip O104:H4 bħal dawk li nstabu fil-Ġermanja. Bħal ma kien fil-każ tal-Ġermanja, l-investigazzjonijiet jindikaw li l-konsum ta’ żerriegħa mxarrba seta’ kkawża t-tixrid. |
(4) |
Aktar indikaturi jissuġġerixxu li ż-żerriegħa niexfa użata għall-inbit tista’ tkun il-kawża oriġinali għat-tixrid fil-Ġermanja u Franza. Sabiex taċċerta ruħha dwar l-oriġini tal-kontaminazzjoni, il-Kummissjoni bdiet eżerċizzju ta’ rintraċċar kkoordinat mill-Awtorità Ewropea dwar is-Sigurtà fl-Ikel (EFSA) f’konsultazzjoni maċ-Ċentru Ewropew għall-Prevenzjoni u l-Kontroll tal-Mard u l-Organizzazzjoni Dinjija tas-Saħħa. Fil-5 ta’ Lulju 2011, l-EFSA ppubblikat ir-rapport finali tagħha. Ir-rapport jistqarr li t-tqabbil tal-informazzjoni tar-rintraċċar mit-tixrid Franċiż u Ġermaniż iwassal għall-konklużjoni li lott miż-żerriegħa tal-fienu impurtata mill-Eġittu aktarx hija l-aktar rabta komuni għalkemm ma jistax jiġi eskluż li lottijiet oħrajn jistgħu jiġu implikati. Meta wieħed iqis l-impatt sever fuq is-saħħa tal-bniedem li jirriżulta mill-esponiment għal kwantità żgħira ta’ materjal kontaminat, u, fin-nuqqas ta’ informazzjoni dwar is-sors u l-mezzi ta’ kontaminazzjoni kif ukoll kontaminazzjoni possibbli li tittieħed, bħalissa jidher xieraq li jiġu kkunsidrati l-lottijiet kollha tal-esportatur identifikat bħala suspettuż. |
(5) |
Barra minn hekk, l-eżerċizzju preżenti ta’ rintraċċar jappoġġja l-ipoteżi li t-tixrid huwa marbut u huwa kkawżat mill-importazzjoni taż-żerriegħa tal-fienu li ġiet ikkontaminata waqt l-importazzjoni jew qabel l-importazzjoni fl-UE. Din il-kontaminazzjoni taż-żerriegħa mar-razza tal-E. coli O104:H4 tirrifletti proċess ta’ produzzjoni li ppermmetta kontaminazzjoni ta’ materjal fekali ta’ oriġini umana u/jew tal-annimali. Għadu mhux ċar fejn dan seħħ sewwasew fil-katina alimentari u għadu mhux magħruf jekk dan ġiex rimedjat sadanittant. Għandu jsir aktar kampjunar mikrobijoloġiku fl-Istati Membri biex itemmu l-evidenza li ġejja mill-istudji epidemjoloġiċi kif stipulat fl-Artikolu 8 tad-Direttiva 2003/99/KE tal-Parlament Ewropew u tal-Kunsill tas-17 ta' Novembru 2003 rigward il-monitoraġġ taż-żoonożi u tal-aġenti żoonotiċi, temenda d-Deċiżjoni tal-Kunsill 90/424/KEE u tħassar id-Direttiva tal-Kunsill 92/117/KEE ( 2 ). |
(6) |
Fuq il-bażi tal-prinċipju tal-prekawzjoni huwa meħtieġ li tiġi pprojbita b’mod temporanju l-importazzjoni taż-żerriegħa u l-fażola kollha li tiġi mill-Eġittu, identifikata fl-Anness, biex tippermetti ż-żmien meħtieġ għal aktar valutazzjoni tas-sikurezza tagħhom. Huwa ċar li hemm possibilità ta’ impatt sever fuq is-saħħa tal-bniedem li ġejja mill-esponiment ta’ kwantità żgħira ta’ materjal kontaminat minn żerriegħa u fażola oħra u li ma hemmx tagħrif preċiż dwar l-oriġini eżatta fl-Eġittu u mezzi tal-kontaminazzjoni kif ukoll kontaminazzjoni possibbli li tittieħed. |
(7) |
Għaldaqstant huwa xieraq li jiġu adottati, fuq livell Ewropew, ċerti miżuri ta’ prekawzjoni u emerġenza biex jiżguraw li l-Istati Membri jadottaw il-miżuri kollha meħtieġa biex jirtiraw mis-suq tal-UE l-lottijiet kollha taż-żerriegħa tal-fienu impurtata mill-Eġittu matul il-perjodu ta’ bejn l-2009 u l-2011 imsemmija fin-notifiki tas-Sistema Rapida ta’ Allarm għal Ikel u Għalf marbuta mal-eżerċizzju tar-rintraċċar, biex jieħdu kampjuni minnhom u biex wara jeqirduhom u biex jissospendu temporanjament l-importazzjoni mill-Eġittu taż-żerriegħa u l-fażola kollha identifikata fl-Anness ta’ din id-Deċiżjoni. |
(8) |
Sabiex tippermetti ż-żmien meħtieġ għall-Awtoritajiet Kompetenti tal-Eġittu biex jipprovdu rispons u jikkunsidraw il-miżuri xierqa għall-immaniġġjar tar-riskji, is-sospensjoni temporanja tal-importazzjonijiet għandha tidħol fis-seħħ minn tal-inqas sal-31 ta’ Ottubru 2011. |
(9) |
Il-miżuri stipulati f’din id-Deċiżjoni huma f’konformità mal-opinjoni tal-Kumitat Permanenti dwar il-Katina Alimentari u s-Saħħa tal-Annimali. |
ADOTTAT DIN ID-DEĊIŻJONI TA’ IMPLIMENTAZZJONI:
Artikolu 1
L-Istati Membri għandhom jadottaw il-miżuri kollha meħtieġa sabiex il-lott kollu ta’ żerriegħa tal-fienu impurtata mill-Eġittu matul il-perjodu ta’ bejn l-2009 u l-2011, imsemmi fin-notifiki tas-Sistema Rapida ta’ Allarm għal Ikel u Għalf marbuta mal-eżerċizzju tar-rintraċċar ikun irtirat mis-suq u meqrud. F’konformità mal-Artikolu 8 tad-Direttiva 2003/99/KE l-lottijiet kkonċernati għandu jitteħdilhom kampjun.
Artikolu 2
Ir-rilaxx għaċ-ċirkolazzjoni libera fl-Unjoni taż-żrieragħ u l-fażola mill-Eġittu kif stipulat fl-Anness huwa ipprojbit sal-31 ta’ Marzu 2012.
Artikolu 3
Il-miżuri stabbiliti minn din id-Deċiżjoni għandhom ikunu vvalutati mill-ġdid b’mod regolari fuq il-bażi tal-garanziji offruti mill-Eġittu, riżultati tat-testijiet analitiċi u investigazzjonijiet li jkunu saru mill-Istati Membri.
Artikolu 4
Din id-Deċiżjoni hija indirizzata lill-Istati Membri.
ANNESS
Żrieragħ u fażola mill-Eġittu li r-rilaxx tagħhom għaċ-ċirkolazzjoni libera fl-Unjoni huwa pprojbit sal-31 ta’ Marzu 2012
Kodiċi NM (1) |
Deskrizzjoni |
ex070490 90 |
Nebbieta tar-rukola |
ex070690 90 |
Nebbieta tal-pitravi, nebbieta tar-ravanell |
ex07 08 |
Nebbieta ta’ ħxejjex leguminużi, friski jew imkessħin |
ex070990 90 ex070999 90 (2) |
Nebbieta tal-fażola tas-sojja |
ex07 13 |
Ħxejjex leguminużi mnixxfa, bil-qoxra, sew jekk imqaxxrin u sew jekk le, mhux maqsumin |
0910 99 10 |
Żrieragħ tal-fienu |
ex12 01 00 ex12 01 (2) |
Fażola tas-sojja mhux imkissra |
1207 50 |
Żrieragħ tal-mustarda |
ex120799 97 ex120799 96 (2) |
Żrieragħ u frott oħra żejtnin, mhux imkissrin |
1209 10 00 |
Żrieragħ tal-pitravi zokkrija |
1209 21 00 |
Żrieragħ tax-xnien (alfalfa) |
1209 91 |
Żrieragħ tal-ħaxix |
ex121490 90 |
Żrieragħ tax-xnien (alfalfa) |
(1) Il-“kodiċijiet NM” imsemmija f’din id-Deċiżjoni jirreferu għall-kodiċijiet speċifikati fil-Parti Tnejn tal-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU L 256, 7.9.1987, p. 1.). (2) Kodiċi NM fl-1.1.2012 |
( 1 ) ĠU L 31, 1.2.2002, p. 1.
( 2 ) ĠU L 325, 12.12.2003, p. 31.