SENTENZA TAL-QORTI

tal-14 ta’ Diċembru 2019

fil-Kawża E-1/19

Andreas Gyrre

v

Il-Gvern Norveġiż, irrappreżentat mill-Ministeru tat-Tfal u l-Ugwaljanza

(Id-Direttiva 2005/29/KE — Prattiki kummerċjali żleali fin-negozju mal-konsumatur — l-Anness I — il-Punt 9 — Meta wieħed jiddikjara jew b’xi mod ieħor joħloq l-impressjoni li prodott jista’ jinbiegħ legalment meta ma jistax)

(2020/C 90/02)

Fil-kawża E-1/19, Andreas Gyrre v il-Gvern Norveġiż, irrappreżentat mill-Ministeru tat-Tfal u l-Ugwaljanza — TALBA lill-Qorti skont l-Artikolu 34 tal-Ftehim bejn l-Istati tal-EFTA dwar l-Istabbiliment ta’ Awtorità ta’ Sorveljanza u ta’ Qorti tal-Ġustizzja mill-Qorti tal-Appell ta’ Borgarting (Borgarting lagmannsrett) li jikkonċerna l-interpretazzjoni tad-Direttiva 2005/29/KE tal-Parlament Ewropew u tal-Kunsill tal-11 ta’ Mejju 2005 dwar prattiċi kummerċjali żleali fin-negozju mal-konsumatur fis-suq intern u li temenda d-Direttiva tal-Kunsill 84/450/KEE, id-Direttivi 97/7/KE, 98/27/KE u 2002/65/KE tal-Parlament Ewropew u tal-Kunsill, u r-Regolament (KE) Nru 2006/2004 tal-Parlament Ewropew u tal-Kunsill, u b’mod partikolari l-punt 9 tal-Anness I tiegħu, il-Qorti, magħmula minn Páll Hreinsson, President, Bernd Hammermann (Imħallef Relatur), u Siri Teitum (Imħallef ad hoc), qatgħet is-sentenza fl-14 ta’ Diċembru 2019, li l-parti operattiva tagħha hija kif ġej:

Il-punt 9 tal-Anness I tad-Direttiva 2005/29/KE tal-Parlament Ewropew u tal-Kunsill, tal-11 ta’ Mejju 2005, dwar prattiċi kummerċjali żleali fin-negozju mal-konsumatur fis-suq intern li temenda d-Direttiva tal-Kunsill 84/450/KEE, id-Direttivi 97/7/KE, 98/27/KE u 2002/65/KE tal-Parlament Ewropew u tal-Kunsill, u r-Regolament (KE) Nru 2006/2004 tal-Parlament Ewropew u tal-Kunsill, għandu jiġi interpretat fis-sens li jinkludi sitwazzjonijiet li fihom kummerċjant jiddikjara jew b’xi mod ieħor joħloq l-impressjoni, ibbażata fuq l-impressjoni ġenerali mogħtija lill-konsumatur medju fil-mument tad-deċiżjoni tranżazzjonali, li prodott jista’ jiġi legalment mibjugħ meta dan ma jistax isir. Hija ma għandhiex effett fuq dik l-evalwazzjoni dwar jekk tali projbizzjoni leġiżlattiva nazzjonali, bħal f’dan il-każ, tapplikax jew fl-Istat taż-ŻEE tal-bejgħ jew fl-Istat taż-ŻEE tal-prestazzjoni jew fit-tnejn li huma. Lanqas ma hemm lok li din l-evalwazzjoni affettwata mill-projbizzjoni leġiżlattiva nazzjonali inkwistjoni tkun sussegwentement meqjusa bħala kuntrarja għal-liġi taż-ŻEE.