(1)

Skont l-Artikolu 24 tal-Ftehim dwar is-Sorveljanza u l-Qorti, l-Awtorità għandha ddaħħal fis-seħħ id-dispożizzjonijiet tal-Ftehim ŻEE li jikkonċernaw l-għajnuna mill-Istat.

(2)

Skont l-Artikolu 5(2)(b) tal-Ftehim dwar is-Sorveljanza u l-Qorti, l-Awtorità toħroġ avviżi jew linji gwida dwar kwistjonijiet indirizzati fil-Ftehim ŻEE, jekk dan il-Ftehim jew il-Ftehim dwar is-Sorveljanza u l-Qorti jipprevedi dan b’mod speċifiku jew jekk l-Awtorità tikkunsidra li jkun meħtieġ.

(3)

Fid-19 ta’ Jannar 1994, l-Awtorità adottat ir-regoli proċedurali u sostantivi fil-qasam tal-għajnuna mill-Istat li jinkludu kapitolu b’linji gwida dwar il-konverżjoni ta’ muniti nazzjonali f’ECUs (1).

(4)

Fil-5 ta’ Novembru 2003, dawn il-linji gwida ġew emendati wara l-introduzzjoni tal-Euro (2).

(5)

Minn dawn il-linji gwida jirriżulta li kull ammont espress f’Euro se jinbidel f’muniti tal-Istati tal-EFTA taż-ŻEE matul kwalunkwe sena kalendarja bir-rati tal-kambju prevalenti fl-ewwel jum tas-sena li fiha jkunu disponibbli l-valuri tal-kambju għal Euro fil-muniti kollha taż-ŻEE.

(6)

Dawn il-linji gwida ma għadhomx jikkorrispondu mal-linji gwida u l-prattiki tal-Kummissjoni Ewropea, li b’mod ġenerali tapplika r-rati tal-kambju tal-munita ta’ kull xahar/ta’ kuljum.

(7)

L-Awtorità kkonsultat mal-Istati tal-EFTA taż-ŻEE u mal-Kummissjoni Ewropea u se tallinja s-sistema tagħha għall-konverżjonijiet tal-munita ma’ dik tal-Kummissjoni Ewropea minn issa ’l quddiem.

(8)

Għaldaqstant, l-Awtorità ddeċidiet li tħassar il-linji gwida tagħha dwar il-konverżjoni ta’ muniti nazzjonali għall-Euro.