10.7.2014   

MT

Il-Ġurnal Uffiċjali tal-Unjoni Ewropea

L 201/33

(1)

Permezz ta' ittra tal-4 ta' April 2014 l-awtoritajiet Islandiżi nnotifikaw il-mappa tal-għajnuna reġjonali tagħhom applikabbli mill-1 ta' Lulju 2014 sal-31 ta' Diċembru 2020 (“il-mappa tal-għajnuna reġjonali”) b'segwitu għall-paragrafu 156 tal-Linji Gwida tal-Awtorità dwar l-għajnuna reġjonali mill-Istat għall-2014-2020 (“RAG”) (1). Dawn il-linji gwida jeħtieġu li l-Istati tal-EFTA li għandhom l-intenzjoni li jagħtu għajnuna reġjonali jinnotifikaw il-mapep tal-għajnuna reġjonali.

(2)

Din id-deċiżjoni tirrappreżenta l-valutazzjoni tal-Awtorità tal-kompatibbiltà tal-mappa notifikata mal-RAG skont il-paragrafu 157 ta' dawn il-linji gwida. Il-mappa nnifisha ma tinvolvi l-ebda għajnuna mill-istat skont it-tifsira tal-Artikolu 61 tal-Ftehim taż-ŻEE. L-approvazzjoni tal-mappa mill-Awtorità ma tikkostitwixxix awtorizzazzjoni biex tingħata ebda għajnuna. L-awtorizzazzjoni tal-mappa tistabbilixxi, flimkien mal-RAG, il-qafas għall-għoti ta' għajnuna għall-investiment reġjonali. F'dan ir-rigward il-mappa tikkostitwixxi parti integrali tal-RAG (2).

(3)

Kopertura tal-popolazzjoni nazzjonali ta' reġjuni megħjuna fl-Istati tal-EFTA ġiet stabbilita fl-RAG. Il-kopertura tal-popolazzjoni nazzjonali għall-Islanda għall-2014-2020 hija 36,5 % (3).

(4)

L-Islanda hija maqsuma f'żewġ reġjuni Statistiċi (4) fil-livell 3:

(5)

Minħabba l-PDG per capita relattivament għoli, l-ebda reġjun Islandiż ma jikkwalifika għad-deroga skont l-Artikolu 61(3)(a) tal-Ftehim taż-ŻEE (5).

(6)

L-awtoritajiet Islandiżi nnotifikaw l-Islanda 'l barra mir-reġjun Kapitali li tikkwalifika għad-deroga skont l-Artikolu 61(3)(c) tal-Ftehim taż-ŻEE, ibbażata fuq densità baxxa tal-popolazzjoni (6).

(7)

L-awtoritajiet Islandiżi ssottomettew mappa li tistabbilixxi ż-żoni magħżula (stabbiliti bħala Anness I għal din id-Deċiżjoni). Iż-żona magħżula, l-Islanda 'l barra mir-reġjun Kapitali, tkopri erja ta' art ta' 99 258 km2.

(8)

L-Islanda 'l barra mir-reġjun Kapitali hija reġjun Statistiku fil-livell 3 b'inqas minn 12,5 abitant għal kull km2. Għalhekk, iż-żona magħżula tikkwalifika bħala żona skarsament popolata (7).

(9)

Il-popolazzjoni totali tal-Islanda fl-1 ta' Jannar 2014 ammontat għal 325 671 abitant u l-popolazzjoni totali taż-żona koperta mill-mappa tal-għajnuna reġjonali notifikata hija, skont l-iktar dejta riċenti ppubblikata mill-uffiċċju nazzjonali tal-istatistika, 116 919 abitant. (8) Konsegwentement, il-popolazzjoni koperta mill-mappa tal-għajnuna reġjonali notifikata hija 35,9 % tal-popolazzjoni Islandiża. Din hija inqas mill-kopertura tal-popolazzjoni nazzjonali stabbilita għall-Islanda fil-RAG (36,5 %) (9).

(10)

In-numru ta' muniċipalitajiet koperti mill-mappa tal-għajnuna reġjonali notifikata huwa 67.

(11)

It-tabella ta' hawn taħt tipprovdi ħarsa ġenerali tal-muniċipalitajiet kollha, flimkien ma' kodiċijiet muniċipali (10), inklużi fil-mappa tal-għajnuna reġjonali.

(12)

Iż-żona eliġibbli jkollha livell massimu ta' għajnuna ġenerali ta' 15 % ekwivalenti tal-għotja gross (EGħG). Dan jiġi ssupplimentat b'żieda ta' 20 % għal intrapriżi żgħar jew 10 % għal intrapriżi ta' daqs medju. Dawn l-intensitajiet tal-għajnuna jikkonformaw mal-limiti stipulati fil-paragrafi 154 u 155 tal-RAG.

(13)

F'konformità mal-paragrafu 156 tal-RAG, il-mappa notifikata se tkun fis-seħħ mill-1 ta' Lulju 2014 sal-31 ta' Diċembru 2020. Jekk meħtieġ, kif stipulat fil-paragrafu 161 tal-RAG, il-mappa notifikata tista' tkun soġġetta għal rieżami ta' nofs it-term f'Ġunju 2016 biex jiġu identifikati żoni possibbli li jistgħu jkunu eliġibbli għall-għajnuna reġjonali skont l-Artikolu 61(3)(a) tal-Ftehim taż-ŻEE u l-livell tal-intensità tal-għajnuna li jikkorrispondi mal-PDG tagħhom per capita.

(14)

Barra minn hekk, din id-deċiżjoni ma tillimitax is-setgħat tal-Awtorità biex tirrieżamina l-mappa skont l-Artikolu 1(1) fil-Parti I tal-Protokoll 3 tal-Ftehim dwar is-Sorveljanza u l-Qorti, jekk ikun neċessarju, qabel it-tmiem tal-perjodu msemmi hawn fuq.

(15)

Abbażi tal-evalwazzjoni ta' hawn fuq, l-Awtorità tqis li l-mappa tal-għajnuna reġjonali Islandiża għall-2014-2020 hija kompatibbli mal-prinċipji stabbiliti fil-RAG peress li ż-żona koperta ma taqbiżx il-kopertura tal-popolazzjoni eliġibbli kif stabbilit fil-paragrafu 142 tal-RAG.