10.11.2011   

MT

Il-Ġurnal Uffiċjali tal-Unjoni Ewropea

C 325/6

Azzjoni mressqa fid-29 ta' Awwissu 2011 minn Hurtigruten ASA kontra l-Awtorità ta' Sorveljanza tal-EFTA

(Każ E-10/11)

2011/C 325/03

Azzjoni kontra l-Awtorità ta' Sorveljanza tal-EFTA tressqet quddiem il-Qorti tal-EFTA fid-29 ta' Awwissu 2011 minn Hurtigruten ASA, irrappreżentata minn Siri Teigum, advokat, u Odd Stemsrud, advokat, Advokatfirmaet Thommessen AS, Haakon VII’s gate 10, 0116 Oslo, in-Norveġja.

Ir-Rikorrent titlob lill-Qorti tal-EFTA biex:

(1)

Tannulla d-Deċiżjoni tal-Awtorità ta' Sorveljanza tal-EFTA Nru 205/11/COL tad-29 ta' Ġunju 2011 dwar il-Ftehim Supplimentari dwar Hurtigruten Service;

(2)

Bħala alternattiva, tiddikjara nulli l-Artikoli 2, 3 u 4 tad-Deċiżjoni tal-Awtorità ta' Sorveljanza tal-EFTA Nru 205/11/COL tad-29 ta' Ġunju 2011, sa tali punt li tordna l-irkupru tal-għajnuna msemmija fl-Artikolu 1 ta’ dik id-Deċiżjoni; kif ukoll

(3)

Jiġi ordnat lill-Awtorità ta' Sorveljanza tal-EFTA biex tbati l-kostijiet tagħha nnifisha u biex tħallas dawk ta' Hurtigruten ASA.

Sfond legali u fattwali u eċċezzjonijiet legali miġjuba bħala sostenn:

—

Ir-Rikorrent, Hurtigruten ASA, hija kumpanija pubblika limitata, li twettaq attivitajiet ta' vjaġġar u ta' trasport fin-Norveġja u f'pajjiżi oħrajn.

—

Fit-28 ta' Novembru 2008, l-awtoritajiet Norveġiżi informaw lill-Awtorità ta' Sorveljanza tal-EFTA l-innegozjar mill-ġdid tal-ftehim bejn l-awtoritajiet Norveġiżi u Hurtigruten ASA dwar l-akkwist tas-servizzi ta' trasport bejn Bergen u Kirkenes fin-Norveġja. Fl-14 ta' Lulju 2010 l-Awtorità ta' Sorveljanza tal-EFTA infurmat lill-awtoritajiet Norveġiżi li kienet se tibda l-proċedura ta' investigazzjoni formali skont l-Artikolu 1(2) tal-Parti I tal-Protokoll 3 tal-Ftehim dwar is-Sorveljanza u l-Qorti fir-rigward tal-ħlasijiet addizzjonali lil Hurtigruten fl-2008.

—

Bid-Deċiżjoni Nru 205/11/COL, l-Awtorità ta' Sorveljanza tal-EFTA ddeċidiet li l-Ftehim Supplimentari kkostitwixxa għajnuna mill-Istat li mhix kompatibbli mal-funzjonament tal-Ftehim taż-ŻEE fit-tifsira tal-Artikolu 61(1) taż-ŻEE sal-punt li tikkostitwixxi forma ta' kumpens żejjed għal servizz pubbliku.

—

Ir-Rikorrent tiddikjara, inter alia, li l-Awtorità ta' Sorveljanza tal-EFTA bbażat id-Deċiżjoni kkontestata fuq żbalji ċari ta' liġi u/jew ta' valutazzjoni:

—

skont l-Artikolu 59(2) taż-ŻEE dwar id-dritt tal-Gvern Norveġiż li jiżgura li l-prestazzjoni ta' impriża fdata bl-operat tas-servizzi ta' interess ekonomiku ġenerali ma tiġix imfixkla meta l-operat ma jaqta' xejn tagħha jkun f'riskju, u l-livell ta' kumpens li jista' jingħata f'dawn iċ-ċirkustanzi;

—

skont l-Artikolu 61(1) taż-ŻEE u l-qafas Altmark u l-infurzar sussegwenti tad-Deċiżjoni;

—

tal-Artikolu 61(3) taż-ŻEE u l-applikabbiltà tal-Linji Gwida dwar l-Għajnuna mill-Istat għall-għajnuna għas-salvataġġ u r-ristrutturar ta' impriżi f'diffikultà; kif ukoll

—

li d-Deċiżjoni trid tiġi annullata abbażi tan-nuqqas tal-Awtorità ta' Sorveljanza tal-EFTA li tagħti r-raġunijiet għad-deċiżjoni tagħha kif mitlub mill-Artikolu 16 SCA, ksur tal-prinċipju ta' governanza tajba, ksur tad-dmir lil jeżerċita deliġenza dovuta, nuqqas ta' bażi legali fil-Protokoll 3 SCA u/jew ksur tal-prinċipju ta' ċertezza legali.