DEĊIŻJONI TA' L-AWTORITÀ TAS-SORVELJANZA TA' L-EFTA

Nru 320/06/COL

tal-31 ta' Ottubru 2006

li temenda l-lista miġbura fil-punt 39 fil-Parti 1.2 tal-Kapitolu I ta' l-Anness I tal-Ftehim dwar iż-Żona Ekonomika Ewropea li telenka postijiet ta' spezzjoni fuq il-fruntiera fl-Islanda u fin-Norveġja miftiehma għal verifiki veterinarji fuq annimali ħajjin u fuq prodotti minn pajjiżi terzi u li tħassar id-Deċiżjoni 246/06/COL tas-6 ta' Settembru 2006 ta' l-Awtorità tas-Sorveljanza ta' l-EFTA

L-AWTORITÀ TAS-SORVELJANZA TA’ L-EFTA,

WARA LI KKUNSIDRAT il-Ftehim dwar iż-Żona Ekonomika Ewropea, partikolarment l-Artikolu 109 u Protokoll 1 tiegħu,

WARA LI KKUNSIDRAT il-Ftehim bejn l-Istati ta' l-EFTA dwar l-Istabbiliment ta' Awtorità tas-Sorveljanza u ta' Qorti tal-Ġustizzja, partikolarment l-Artikolu 5(2)(d) u l-Protokoll 1 tiegħu,

WARA LI KKUNSIDRAT il-punti 4(B)(1) u (3) u punt (5)(b) tal-Parti Preliminari tal-Kapitolu I ta' l-Anness I tal-Ftehim taż-ŻEE,

WARA LI KKUNSIDRAT l-Att imsemmi fil-punt 1.1.4 tal-Kapitolu I ta' l-Anness I tal-Ftehim taż-ŻEE (id-Direttiva tal-Kunsill 97/78/KE tat-18 ta' Diċembru 1997 li tistabbilixxi l-prinċipji li jikkontrollaw l-organizzazzjonijiet ta' verifiki veterinarji fuq il-prodotti li jidħlu fil-Komunità minn pajjiżi terzi), kif emendat u adattat għall-Ftehim taż-ŻEE mill-adattamenti settorjali msemmija fl-Anness I ta' dak il-Ftehim, u partikolarment l-Artikolu 6(2) tiegħu,

WARA LI KKUNSIDRAT l-Att imsemmi fil-punt 1.1.5 tal-Kapitolu I ta' l-Anness I tal-Ftehim taż-ŻEE (id-Direttiva tal-Kunsill 91/496/KEE tal-15 ta' Lulju 1991 li tistabbilixxi l-prinċipji li jikkontrollaw l-organizzazzjonijiet ta' verifiki veterinarji fuq l-annimali li jidħlu fil-Komunità minn pajjiżi terzi), kif emendat u adattat għall-Ftehim taż-ŻEE mill-adattamenti settorjali msemmija fl-Anness I ta' dak il-Ftehim, u partikolarment l-Artikolu 6(4) tiegħu,

WARA LI KKUNSIDRAT l-Att imsemmi fil-punt 1.2.111 tal-Kapitolu I ta' l-Anness I tal-Ftehim taż-ŻEE (id-Deċiżjoni tal-Kummissjoni 2001/812/KE tal-21 ta’ Novembru 2001 li tistabbilixxi r-rekwiżiti għall-approvazzjoni ta' postijiet ta' spezzjoni fuq il-fruntiera responsabbli minn verifiki veterinarji fuq il-prodotti li jidħlu fil-Komunità minn pajjiżi terzi), kif emendat, u partikolarment l-Artikolu 3(5) tiegħu,

BILLI d-Deċiżjoni Nru 246/06/COL tas-6 ta' Settembru 2006 ta' l-Awtorità tas-Sorveljanza ta' l-EFTA ħassret id-Deċiżjoni Nru 86/02/COL ta' l-Awtorità ta' Sorveljanza ta' l-EFTA ta' l-24 ta' Mejju 2002 u fasslet lista ġdida ta' postijiet ta' spezzjoni fuq il-fruntiera fl-Islanda u fin-Norveġja approvati għal verifiki veterinarji fuq annimali ħajjin u prodotti ta' annimali minn pajjiżi terzi,

BILLI, il-Gvern tan-Norveġja talab lill-Awtorità tas-Sorveljanza ta' l-EFTA sabiex iżżid il-post ta' spezzjoni fuq il-fruntiera propost fil-port ta' Egersund mal-lista ta' postijiet ta' spezzjoni fuq il-fruntiera fl-Islanda u fin-Norveġja approvati għal verifiki veterinarji fuq prodotti u annimali minn pajjiżi terżi elenkati fil-punt 39 fil-Parti 1.2 tal-Kapitolu I ta' l-Anness I tal-Ftehim taż-ŻEE,

BILLI l-Gvern tan-Norveġja talab lill-Awtorità tas-Sorveljanza ta' l-EFTA sabiex telenka l-post ta' spezzjoni fuq il-fruntiera propost fil-port ta' Egersund għall-importazzjoni ta' żejt tal-ħut għall-konsum tal-bniedem u konsum ieħor u ħut mitħun bl-ingrossa,

BILLI l-Gvern tan-Norveġja ppropona lill-Awtorità tas-Sorveljanza ta' l-EFTA sabiex iżżid il-kategoriji addizzjonali ta' prodotti ta' żejt tal-ħut bl-ingrossa u żejt tal-ħut ippakkjat għall-konsum tal-bniedem u konsum ieħor għaċ-ċentru ta' spezzjoni ta' Kristiansund fil-post ta' spezzjoni fuq il-fruntiera fi Kristiansund,

BILLI l-Awtorità tas-Sorveljanza ta' l-EFTA u l-Kummissjoni Ewropea, b'kooperazzjoni mill-qrib ma' l-Awtoritajiet Kompetenti tan-Norveġja, spezzjonaw b'mod konġunt il-post ta' spezzjoni fuq il-fruntiera ta' Egersund u ċ-ċentru ta' spezzjoni ta' Kristiansund,

BILLI wara l-ispezzjoni konġunta, u skond il-paragrafu 4(B)3 tal-parti Preliminari ta' l-Anness I tal-Ftehim taż-ŻEE, l-ispetturi ta' l-Awtorità tas-Sorveljanza ta' l-EFTA u l-Kummissjoni Ewropea adottaw rakkomandazzjoni komuni fis-16 ta' Ottubru 2006 (Każ Nru 59362/Avveniment Nru 391554) sabiex jiżdiedu l-post ta' spezzjoni fuq il-fruntiera ta' Egersund u l-kategoriji ġodda għaċ-ċentru ta' spezzjoni Krisitiansund mal-lista ta' postijiet ta' spezzjonijiet fuq il-fruntiera,

BILLI permezz tad-Deċiżjoni tagħha Nru 312/06/COL l-Awtorità tas-Sorveljanza ta' l-EFTA rreferiet il-kwistjoni quddiem il-Kumitat Veterinarju EFTA li jassisti lill-Awtorità tas-Sorveljanza ta' l-EFTA,

BILLI l-miżuri stipulati f'din id-Deċiżjoni huma skond l-opinjoni tal-Kumitat Veterinarju EFTA li jassisti lill-Awtorità tas-Sorveljanza ta' l-EFTA,

ADOTTAT DIN ID-DEĊIŻJONI: