Wiċċ nazzjonali ġdid tal-muniti tal-euro maħsuba għaċ-ċirkolazzjoni
(2023/C 262/04)
Wiċċ nazzjonali għall-munita kommemorattiva l-ġdida taż-żewġ euro maħsuba għaċ-ċirkolazzjoni u maħruġa minn Franza
Il-muniti tal-euro maħsuba għaċ-ċirkolazzjoni għandhom status ta’ valuta legali fiż-Żona tal-Euro kollha. Bil-għan li tinforma lill-pubbliku u lill-partijiet kollha li jużaw il-muniti, il-Kummissjoni tippubblika deskrizzjoni tad-disinji tal-muniti l-ġodda kollha (1). F’konformità mal-Konklużjonijiet tal-Kunsill tal-10 ta’ Frar 2009 (2), l-Istati Membri taż-Żona tal-Euro u l-pajjiżi li kkonkludew ftehim monetarju mal-Unjoni Ewropea li jipprevedi l-ħruġ ta’ muniti tal-euro, huma awtorizzati joħorġu muniti kommemorattivi tal-euro maħsuba għaċ-ċirkolazzjoni kemm-il darba jiġu ssodisfati ċerti kundizzjonijiet, b’mod partikolari li jintużaw il-muniti taż-żewġ euro biss. Dawn il-muniti għandhom l-istess karatteristiċi tekniċi bħall-muniti l-oħra taż-żewġ euro, iżda n-naħa nazzjonali tagħhom fiha disinn kommemorattiv li jkun simboliku ħafna f’termini nazzjonali jew Ewropej.
Il-pajjiż emittenti: Franza
Is-suġġett tal-kommemorazzjoni: It-Tazza tad-Dinja tar-Rugby Franza 2023
Deskrizzjoni tad-disinn: Fl-okkażjoni tat-Tazza tad-Dinja tar-Rugby organizzata fi Franza, Monnaie de Paris tiċċelebra r-rugby u din il-kompetizzjoni li se tlaqqa’ flimkien timijiet minn 20 nazzjon.
Id-disinn jirrappreżenta player stilizzat tar-rugby li jagħmel pass. Fl-isfond, il-ground tar-rugby huwa l-globu li fuqu jitqiegħdu l-lasti tar-rugby. Is-sett huwa parti minn galassja immaġinarja tar-rugby fejn il-pjaneti l-oħra huma ovali. L-emblema tal-kompetizzjoni hija mdaħħla maġenb il-player, filwaqt li l-isem tal-kompetizzjoni jiċċirkonda d-disinn. L-indikazzjoni tal-pajjiż emittenti “RF”, il-marka taz-zekka u l-marka ewlenija taz-zekka huma mdaħħla taħt l-immaġni fuq in-naħa tal-lemin. L-isem tal-kompetizzjoni, il-pajjiż tal-ħruġ “FRANCE” u s-sena “2023” huma mdaħħla fuq in-naħa tax-xellug. L-isem tal-kompetizzjoni madwar id-disinn, kif ukoll ir-referenza “RF” jidhru fit-tipa uffiċjali tal-avveniment, imsejjaħ Mobius.
Iċ-ċirku ta’ barra tal-munita juri t-12-il stilla tal-bandiera Ewropea.
L-għadd ta’ muniti li huwa stmat li se jinħarġu: 15 000 000
Id-data tal-ħruġ: Ġunju 2023
(1) Ara ĠU C 373, 28.12.2001, p. 1 għall-uċuħ nazzjonali tal-muniti kollha li nħarġu fl-2002.
(2) Ara l-konklużjonijiet tal-Kunsill dwar l-Affarijiet Ekonomiċi u Finanzjarji tal-10 ta’ Frar 2009 u r-Rakkomandazzjoni tal-Kummissjoni tad-19 ta’ Diċembru 2008 dwar il-linji gwida komuni għall-uċuħ nazzjonali u l-ħruġ ta’ muniti tal-euro maħsuba għaċ-ċirkolazzjoni (ĠU L 9, 14.1.2009, p. 52).