AVVIŻ TA’ POŻIZZJONI VAKANTI CONS/AD/169/21

(2021/C 190 A/01)

 

TAGĦRIF ĠENERALI

Dipartiment	GSC.LING.2.
Post tax-xogħol	Brussell, Bini Justus Lipsius
Titlu tal-pożizzjoni	Direttur
Grupp tal-funzjoni u grad	AD 14
Approvazzjoni tas-sigurtà meħtieġa	EU SECRET
SKADENZA GĦALL-APPLIKAZZJONIJIET	It-8 ta’ Ġunju 2021 — 12.00 nofsinhar (ħin ta’ Brussell)

Min aħna

Is-Segretarjat Ġenerali tal-Kunsill (SĠK) jassisti lill-Kunsill Ewropew u lill-Kunsill tal-UE u l-korpi preparatorji tagħhom fl-oqsma kollha tal-attivitajiet tagħhom. Jipprovdi pariri u sostenn lill-membri tal-Kunsill Ewropew u lill-Kunsill u lill-Presidenti tagħhom fl-oqsma kollha ta’ attività, inkluż pariri ta’ politika u legali, koordinazzjoni ma’ istituzzjonijiet oħra, elaborazzjoni ta’ kompromessi, superviżjoni kif ukoll jittratta l-aspetti prattiċi kollha li huma meħtieġa għat-tħejjija u t-tmexxija tajba tal-Kunsill Ewropew u l-Kunsill.

Is-servizz tat-Traduzzjoni huwa responsabbli li jipprovdi traduzzjonijiet ta’ dokumenti tal-Kunsill u tal-Kunsill Ewropew fil-lingwi uffiċjali kollha tal-UE. Barra minn hekk, is-Servizz tat-Traduzzjoni jipprovdi assistenza ta’ editjar lill-awturi tal-abbozzi ta’ dokumenti interni u tal-Presidenza kif ukoll assistenza multilingwi għall-monitoraġġ tal-media, briefings mill-President tal-Kunsill Ewropew u inizjattivi oħra. Skont l-Approċċ strateġiku għal servizz li qed jevolvi 2020-2024 tiegħu, is-Servizz tat-Traduzzjoni huwa ffukat fuq it-tiswir ta’ servizz flessibbli lest għall-futur filwaqt li jappoġġa wkoll lill-persunal matul it-tibdil. Huwa magħmul minn żewġ Direttorati, LING.1 li jinkludi 12-il unità lingwistika u l-Unità ta’ Operazzjonijiet, u LING.2 li jinkludi t-12-il unità lingwistika l-oħra u l-Unità tar-Riżorsi.

Nipproponu

Il-kariga ta’ Direttur fid-Direttorat LING.2 hija pożizzjoni li toffri sfida f’ambjent politikament interessanti u dinamiku. Inti ser tmexxi tim ta’ madwar 450 membru tal-persunal mill-gruppi funzjonali kollha u ser tkun responsabbli għall-aspetti operattivi, finanzjarji u strateġiċi tal-fajls ittrattati minnhom.

Taħt l-awtorità tad-Deputat Direttur Ġenerali, inti ser tkun qed tmexxi d-Direttorat tiegħek u r-riżorsi tiegħu b’mod professjonali, torganizza l-attivitajiet tiegħu u tappoġġa u timmotiva lill-persunal fil-ħidma tagħhom. Tkun qed tiżgura l-kwalità tas-servizzi u l-prodotti mogħtija mid-Direttorat, kif ukoll il-komunikazzjoni u l-kooperazzjoni effettivi kemm fid-Direttorat kif ukoll mad-Direttorat l-ieħor (LING.1), u wkoll ma’ servizzi oħra tas-SĠK.

Inti ser tipprovdi pariri ta’ livell għoli fil-qasam ta’ responsabbiltà tiegħek, kemm bil-fomm kif ukoll bil-miktub, fuq inizjattiva tiegħek stess jew fuq talba, lid-Deputat Direttur Ġenerali dwar l-aspetti kollha tad-dossiers fir-responsabbiltà tad-Direttorat. F’dan il-kuntest, ser tintalab tirrappreżenta lill-Kunsill Ewropew u lill-Kunsill f’fora pubbliċi u f’negozjati ma’ istituzzjonijiet, aġenziji u korpi oħra tal-UE fl-oqsma fir-responsabbiltà tad-Direttorat.

Inti ser tiddefinixxi l-objettivi li għandhom jintlaħqu u tikkontribwixxi biex dawn jintlaħqu billi tistabbilixxi l-programm ta’ ħidma tad-Direttorat u tiżgura l-monitoraġġ xieraq tal-implimentazzjoni tiegħu.

Ser tkun tista’ tippjana u torganizza l-ħidma fil-qasam ta’ attività tad-Direttorat b’mod flessibbli, soġġett għal ħinijiet tax-xogħol, l-iskeda tal-Coreper, il-laqgħat tal-Kunsill Ewropew u tal-Kunsill u r-rekwiżiti tal-media. Int u l-persunal tiegħek ser tkunu tistgħu tibbenefikaw mill-arranġamenti ta’ xogħol flessibbli tas-SĠK, inkluż it-telexogħol. Il-missjonijiet okkażjonali barra mill-pajjiż huma meħtieġa, normalment fl-UE (madwar darbtejn fis-sena).

Qed infittxu

Qed infittxu maniġer ta’ esperjenza bil-kapaċità fit-tmexxija u l-motivazzjoni ta’ tim kbir, preferibbilment b’esperjenza maniġerjali fil-qasam tat-traduzzjoni. Qed infittxu maniġer dinamiku jew dinamika bil-kapaċità fl-immaniġġar tal-bidla f’ambjent ta’ żvilupp teknoloġiku rapidu filwaqt li jinżamm output ta’ kwalità għolja. Id-Direttur ta’ LING 2 irid ikun kapaċi jew tkun kapaċi tmexxih fil-proċess ta’ modernizzazzjoni bil-promozzjoni ta’ kultura ta’ innovazzjoni, kollaborazzjoni u komunikazzjoni u billi jiġi żgurat l-aħjar użu tar-riżorsi.

Il-maniġers kollha tas-SĠK huma mistennija jagħtu pariri lill-ġerarkija tagħhom u lill-partijiet ikkonċernati, imexxu l-persunal u r-riżorsi finanzjarji tagħhom u jirrappreżentaw lis-SĠK. Dawn l-aspettattivi huma mfissra fil-profil orizzontali tal-maniġers tas-SĠK, fl-Anness I.

Barra minn hekk, il-persuna impjegata ser ikun jeħtieġ ikollha:

—	kapaċità li taħseb u tippjana b’mod strateġiku, li tantiċipa u tidentifika problemi potenzjali u li tipproponi soluzzjonijiet u kompromessi fattibbli;

—	ħiliet ta’ tmexxija u l-kapaċità li tiggwida, timmotiva u tawtonomizza lill-persunal f’ambjent ta’ diversità u multikulturali, b’enfasi qawwija fuq l-iżvilupp tal-persunal;

—	ħiliet ta’ komunikazzjoni eċċellenti, inkluż ħiliet ta’ komunikazzjoni interpersonali;

—	il-kapaċità li tippromwovi spirtu b’saħħtu ta’ tim u li żżomm relazzjonijiet tax-xogħol tajbin ma’ firxa ta’ interlokuturi interni u esterni u l-kapaċità li turi sens ta’ diplomazija;

—	il-kapaċità li timmaniġġa t-tibdil u tappoġġa lill-persunal waqt it-tibdil;

—	kapaċità qawwija li tippjana u torganizza x-xogħol ġenerali tad-Direttorat sabiex jintlaħqu l-iskadenzi kritiċi u li tieħu ħsieb it-tqassim ġust tax-xogħol fost il-membri tat-tim u l-ippjanar tas-suċċessjoni;

—	il-kapaċità li tilħaq qbil jew għanijiet komuni billi tipprovdi pariri speċifiċi lill-partijiet ikkonċernati u billi tiffaċilita b’mod effettiv u kostruttiv diskussjoni li twassal għal riżultati li jgawdi minnhom kulħadd.

Peress li s-SĠK iħaddan politika ta’ mobbiltà għall-maniġers tiegħu, li huma mistennija jkollhom esperjenza estensiva, il-kandidati għandhom ikunu lesti u kapaċi jaħdmu f’oqsma ta’ attività differenti matul il-karriera tagħhom fis-SĠK.

POLITIKA TA’ REKLUTAĠĠ

L-applikanti għandhom jissodisfaw ir-rekwiżiti li ġejjin fil-mument tal-applikazzjoni:

(a)	Kondizzjonijiet ġenerali — ikunu ċittadini ta’ wieħed mill-Istati Membri tal-Unjoni Ewropea; — igawdu mid-drittijiet kollha tagħhom bħala ċittadini; — ikunu wettqu kwalunkwe obbligu impost fuqhom mil-liġijiet dwar il-lieva.

(b)

Kondizzjonijiet speċifiċi — ikollhom lawrja universitarja (1); — ikollhom mill-inqas ħmistax-il sena esperjenza professjonali rilevanti li minnhom ikunu effettivament wettqu mill-inqas tliet snin f’responsabbiltajiet maniġerjali u organizzattivi. — peress li l-Ingliż u l-Franċiż jintużaw b’mod estensiv għall-komunikazzjoni fis-SĠK u ma’ istituzzjonijiet oħra, huwa meħtieġ għarfien eċċellenti ta’ waħda miż-żewġ lingwi u għarfien tajjeb tal-lingwa l-oħra. L-għarfien ta’ lingwi uffiċjali oħra tal-UE jkun ta’ vantaġġ.

Nota:

(1)

Din il-pożizzjoni teħtieġ awtorizzazzjoni tas-sigurtà li tippermetti aċċess għad-dokumenti klassifikati (livell EU SECRET). Il-kandidati li japplikaw għall-pożizzjoni jridu jkunu lesti jgħaddu minn investigazzjoni ta’ sigurtà skont id-Deċiżjoni tal-Kunsill 2013/488/UE (2). Il-ħatra għal din il-pożizzjoni ssir effettiva biss bil-kondizzjoni li l-kandidat magħżul jew magħżula tkun kisbet ċertifikat validu ta’ approvazzjoni tas-sigurtà. Kandidat mingħajr awtorizzazzjoni tas-sigurtà ser jiġi offrut jew tiġi offruta kuntratt temporanju sakemm jinkiseb ir-riżultat tal-proċedura tal-approvazzjoni tas-sigurtà.

(2)	Il-kandidat li jintgħażel għandu jew għandha tkun lesta ssegwi l-programm ta’ taħriġ fil-ġestjoni tas-SĠK.

PROĊEDURA TAL-GĦAŻLA

Fl-għażla tal-kandidat, l-Awtorità tal-Ħatra ser tiġi megħjuna minn bord konsultattiv tal-għażla. Il-bord konsultattiv tal-għażla ser ikollu l-appoġġ ta’ ċentru ta’ evalwazzjoni, immexxi minn konsulenti tar-reklutaġġ esterni. Ir-rapporti stabbiliti miċ-ċentru ta’ evalwazzjoni għall-istess tip ta’ pożizzjoni ma jibqgħux validi wara sentejn mid-data li fiha saru l-eżerċizzji rilevanti jew mat-tmiem tal-kuntratt qafas bejn is-SĠK u ċ-ċentru ta’ evalwazzjoni inkwistjoni — skont liema data tiġi l-ewwel.

Il-bord konsultattiv tal-għażla l-ewwel ser jevalwa u jqabbel il-kwalifiki, l-esperjenza u l-motivazzjoni tal-applikanti kollha, abbażi tal-applikazzjonijiet tagħhom. Abbażi ta’ dik l-evalwazzjoni komparattiva, il-bord konsultattiv tal-għażla ser jagħmel lista ristretta tal-kandidati li, fl-opinjoni tiegħu, huma l-aktar adatti sabiex jiġu mistiedna għall-ewwel intervista. Peress li din l-ewwel għażla hija bbażata fuq evalwazzjoni komparattiva tal-applikazzjonijiet, l-ilħuq tar-rekwiżiti ta’ din il-pożizzjoni vakanti ma jiggarantix stedina għall-ewwel intervista. Minn fost il-kandidati intervistati, il-bord konsultattiv tal-għażla ser jagħmel preselezzjoni tal-kandidati biex jattendu ċ-ċentru ta’ evalwazzjoni, kif ukoll għat-tieni intervista mal-bord konsultattiv tal-għażla.

L-ippjanar proviżorju tal-għażla huwa kif ġej:

—	huwa mistenni li l-kandidati magħżula għall-intervisti ser jiġu infurmati sa nofs Ġunju 2021;

—	l-ewwel intervisti huma previsti għat-tieni nofs ta’ Ġunju jew il-bidu ta’ Lulju 2021;

—	iċ-ċentru ta’ evalwazzjoni mistenni jsir fl-ewwel nofs ta’ Lulju 2021;

—	it-tieni ċiklu ta’ intervisti huwa previst li jsir fit-tieni nofs ta’ Lulju 2021.

NB: L-iskeda ta’ hawn fuq hija purament indikattiva u, b’mod partikolari, soġġetta għall-implikazzjonijiet tal-miżuri restrittivi stabbiliti biex tiġi indirizzata l-pandemija tal-COVID-19.

BAŻI LEGALI

Din il-pożizzjoni ġiet ippubblikata fl-istituzzjonijiet kollha tal-Unjoni Ewropea u barra mill-istituzzjonijiet, f’konformità mal-Artikolu 29, il-paragrafi (1) u (2) tar-Regolamenti tal-Persunal għall-Uffiċjali tal-Unjoni Ewropea (3).

KIF TAPPLIKA

Id-data tal-għeluq għall-applikazzjonijiet hija t-8 ta’ Ġunju 2021 f’12.00 nofsinhar (ħin ta’ Brussell).

L-applikazzjonijiet jintlaqgħu biss bil-posta elettronika u jridu jintbagħtu lil: applications.management@consilium.europa.eu (4) mhux aktar tard mid-data tal-għeluq. Mhumiex ser jitqiesu l-applikazzjonijiet li jaslu tard.

Għandu jintuża l-indirizz elettroniku indikat hawn fuq għal kwalunkwe korrispondenza marbuta mal-proċedura tal-għażla (fis-suġġett tal-email għandu jkun hemm it-titlu li ġej: CONS/AD/169/21 LING.2).

Qabel ma jippreżentaw l-applikazzjoni tagħhom, il-kandidati għandhom jivverifikaw sew jekk jissodisfawx ir-rekwiżiti msemmijin taħt “Politika ta’ Reklutaġġ” hawn fuq, biex b’hekk jevitaw l-esklużjoni awtomatika mill-proċedura tal-għażla.

Biex ikun validu, il-fajl tal-applikazzjoni jrid jinkludi d-dokumenti li ġejjin f’format pdf (Nota: dokumenti maqfula, protetti bil-password jew b’firma elettronika mhumiex aċċettati):

(a)

il-formola tal-applikazzjoni (Anness V) mimlija u datata kif meħtieġ; il-formola tal-applikazzjoni elettronika tinsab fuq is-sit web tal-Kunsill minn dan il-link: http://www.consilium.europa.eu/en/general-secretariat/jobs/job-opportunities/ (il-fajl ikun imsemmi “XXX (KUNJOMOK) — Application form.pdf”);

(b)

curriculum vitae dettaljat (5), bl-Ingliż jew bil-Franċiż, preferibbilment fil-format Europass (http://europass.cedefop.europa.eu), li jkopri l-karriera kollha tal-persuna li tapplika u jelenka, fost oħrajn, il-kwalifiki, l-għarfien lingwistiku, l-esperjenza u d-dmirijiet attwali tal-persuna li tapplika (il-fajl ikun imsemmi “XXX (KUNJOMOK) — CV.pdf”);

(c)	ittra ta’ motivazzjoni, bl-Ingliż jew bil-Franċiż (il-fajl ikun imsemmi “XXX (KUNJOMOK) — Motivation letter.pdf”);

(d)

il-kopji tad-diplomi li jiċċertifikaw l-edukazzjoni u kopji tad-dokumenti u ċ-ċertifikati relatati mal-esperjenza professjonali għandhom jiġu miġbura flimkien f’dokument wieħed pdf. Mhux biżżejjed li tibgħat biss il-curriculum vitae imsemmi taħt (b). Id-dokumenti ta’ prova jridu jkunu nħarġu minn parti terza (il-fajl ikun imsemmi “XXX (KUNJOMOK) — Supporting documents.pdf”).

Jekk ma jiġux inklużi dawn id-dokumenti l-applikazzjoni tkun invalida.

Id-dokumenti kollha ta’ prova msemmija taħt (d) għandhom jiġu nnumerati f’sekwenza (Anness 1, 2, eċċ.) u miġbura flimkien kif imsemmi hawn fuq.

Applikazzjonijiet li jaslu bil-posta, jew permezz ta’ soluzzjonijiet ta’ ħżin ta’ data bbażati fuq cloud jew pjattaformi għall-kondiviżjoni tal-fajls mhumiex ser jiġu kkunsidrati.

Fil-każ li tintgħażel minn fost il-kandidati nitolbuk tipprovdi d-dokumenti oriġinali msemmija hawn fuq.

Il-kandidati ser jirċievu email sabiex tinfurmahom li l-applikazzjoni tagħhom tkun waslet. Madankollu, qatt ma jistgħu jiġu esklużi għalkollox diffikultajiet tekniċi marbuta mat-trażmissjoni ta’ emails. Għalhekk, il-kandidati li ma jirċevux email li tikkonferma l-wasla tal-applikazzjoni huma mħeġġa jikkuntattjaw lil applications.management@consilium.europa.eu Peress li l-bord konsultattiv tal-għażla ser jibda l-ħidma tiegħu ftit wara d-data tal-għeluq għall-applikazzjonijiet, kull verifika meħtieġa fir-rigward tal-wasla tal-applikazzjoni jenħtieġ issir fil-ġimgħa ta’ wara dik id-data.

OPPORTUNITAJIET INDAQS

Is-SĠK huwa impenjat favur opportunitajiet indaqs (ara l-Anness II).

Is-SĠK jagħraf li bilanċ tajjeb bejn ix-xogħol u l-ħajja privata huwa fattur motivazzjonali importanti għal ħafna nies u li x-xogħol flessibbli huwa dejjem aktar mistenni li jkun parti minn ambjent tax-xogħol modern. Għalhekk, huwa joffri pakkett tajjeb ħafna ta’ arranġamenti u faċilitajiet statutorji flessibbli tax-xogħol bħall-indukrar ta’ wara l-iskola u l-crèche.

Bħala impjegatur, is-SĠK huwa impenjat biex jiżgura l-ugwaljanza bejn is-sessi u biex jipprevjeni d-diskriminazzjoni fuq kwalunkwe bażi. Jilqa’ b’mod attiv l-applikazzjonijiet mill-kandidati kwalifikati kollha minn ambjenti diversi, fost il-ħiliet kollha u mill-bażi ġeografika l-aktar wiesgħa possibbli fost l-Istati Membri tal-UE. Biex tiġi promossa l-ugwaljanza bejn is-sessi, is-SĠK jinkoraġġixxi applikazzjonijiet min-nisa.

Tista’ tiġi pprovduta assistenza lil persuni b’diżabilità matul il-proċedura ta’ reklutaġġ. Għal aktar informazzjoni, jekk jogħġbok ibgħat email indirizzata lil Equal.opportunities@consilium.europa.eu.

RIEŻAMI TAL-APPLIKAZZJONIJIET

Il-proċeduri marbuta ma’ ilmenti, appelli u riferimenti għall-Ombudsman Ewropew jinsabu fl-Anness III ta’ dan l-avviż ta’ pożizzjoni vakanti.

PROTEZZJONI TAD-DATA

Ir-regoli għall-ipproċessar ta’ data personali b’rabta ma’ din il-proċedura tal-għażla jinsabu fl-Anness IV ta’ dan l-avviż ta’ pożizzjoni vakanti.

---

(1)  L-Artikolu 5(3)(c) tar-Regolamenti tal-Persunal għall-Uffiċjali tal-Unjoni Ewropea (ir-Regolamenti tal-Persunal) jesiġi li l-applikanti jkollhom mill-inqas:

(i)	livell ta’ edukazzjoni li jikkorrispondi ma’ studji universitarji kompluti, iċċertifikati b’diploma meta t-tul ta’ żmien normali tal-edukazzjoni universitarja jkun ta’ erba’ snin jew aktar, jew

(ii)	livell ta’ edukazzjoni li jikkorrispondi ma’ studji universitarji kompluti, iċċertifikati b’diploma u esperjenza professjonali adegwata ta’ mill-inqas sena meta t-tul ta’ żmien normali tal-edukazzjoni universitarja jkun ta’ mill-inqas tliet snin.

(2)  Id-Deċiżjoni tal-Kunsill 2013/488/UE tat-23 ta’ Settembru 2013 dwar ir-regoli tas-sigurtà għall-protezzjoni ta’ informazzjoni klassifikata tal-UE (ĠU L 274, 15.10.2013, p. 1).

(3)  Ir-Regolament (UE, Euratom) Nru 1023/2013 tal-Parlament Ewropew u tal-Kunsill tat- 22 ta' Ottubru 2013 li jemenda r-Regolamenti tal-Persunal għall-Uffiċjali tal-Unjoni Ewropea u l-Kondizzjonijiet tal-Impjieg ta' Aġenti Oħra tal-Unjoni Ewropea (ĠU L 287, 29.10.2013, p. 15).

(4)  Dan l-indirizz elettroniku huwa kkollegat ma’ indirizz elettroniku funzjonali u jista’ jittratta biss messaġġi b’Livell ta’ Kunfidenzjalità “Normali”; emails mibgħuta b’livell ieħor ta’ kunfidenzjalità (eż. “Personali”, “Privat”, “Kunfidenzjali”) ma jistgħux jiġu pproċessati. Għaldaqstant agħżel il-livell ta’ kunfidenzjalità “Normali”. Id-daqs massimu tal-email tiegħek għandu jkun 25MB. Jekk id-daqs tal-email tiegħek bl-hemżiet magħha jaqbeż dan id-daqs massimu, jekk jogħġbok qassam l-hemżiet tiegħek fuq għadd ta’ emails.

(5)  Il-kandidati huma mitluba ma jinkludux ritratti fis-CV tagħhom.