AVVIŻ TA' REKLUTAĠĠ PE/242/S

Direttur (Grupp ta' funzjonijiet AD, grad 14)

DIRETTORAT ĠENERALI GĦALL-INNOVAZZJONI U S-SOSTENN TEKNOLOĠIKU — DIRETTORAT GĦALL-PUBBLIKAZZJONI, L-INNOVAZZJONI U L-ĠESTJONI TAD-DATA

(2020/C 65 A/10)

1. Pożizzjoni vakanti

Il-President tal-Parlament Ewropew iddeċieda li jniedi proċedura għall-pożizzjoni ta’ direttur (1) (AD, grad 14) fi ħdan id-Direttorat għall-Pubblikazzjoni, l-Innovazzjoni u l-Ġestjoni tad-Data tad-Direttorat Ġenerali għall-Innovazzjoni u s-Sostenn Teknoloġiku, fuq il-bażi tal-Artikolu 29(2) tar-Regolamenti tal-Persunal għall-Uffiċjali tal-Unjoni Ewropea (2) (minn hawn ’il quddiem imsejħa r-“Regolamenti tal-Persunal”).

Din il-proċedura ta’ selezzjoni, li għandha l-iskop li tagħti lill-Awtorità tal-Ħatra għażla akbar ta’ kandidati, se tiżvolġi b’mod parallel mal-proċedura interna u dik interistituzzjonali ta’ reklutaġġ.

Ir-reklutaġġ se jsir fil-grad AD14 (3). Is-salarju bażiku huwa ta’ EUR 14 837,60 fix-xahar. Ma’ dan is-salarju bażiku, li huwa soġġett għat-taxxa Komunitarja u eżenti mit-taxxa nazzjonali, jistgħu jiżdiedu ċerti allowances skont il-kondizzjonijiet previsti mir-Regolamenti tal-Persunal.

Il-kandidati għandhom jieħdu nota li dan l-impjieg huwa soġġett għar-regolament dwar il-politika tal-mobilità, li ġie adottat mill-Bureau tal-Parlament Ewropew fil-15 ta’ Jannar 2018.

Dan l-impjieg jirrikjedi disponibilità kif ukoll kuntatt frekwenti ma’ nies fil-Parlament u barra minnu, b’mod partikolari mal-Membri tal-Parlament Ewropew. Id-direttur se jkun mitlub iwettaq missjonijiet frekwenti fil-postijiet tax-xogħol differenti tal-Parlament Ewropew u barra minnhom.

2. Post tax-xogħol

Il-Lussemburgu. Dan l-impjieg jaf jiġi trasferit lejn wieħed mill-postijiet tax-xogħol l-oħra tal-Parlament Ewropew.

3. Opportunitajiet indaqs

Il-Parlament Ewropew japplika politika ta’ opportunitajiet indaqs u jaċċetta l-applikazzjonijiet mingħajr ebda diskriminazzjoni, bħal pereżempju diskriminazzjoni bbażata fuq is-sess, ir-razza, il-kulur, l-oriġini etnika jew soċjali, il-karatteristiċi ġenetiċi, il-lingwa, ir-reliġjon jew it-twemmin, l-opinjonijiet politiċi jew oħrajn, l-appartenenza għal minoranza nazzjonali, il-proprjetà, it-twelid, id-diżabilità, l-età, l-orjentament sesswali, l-istat ċivili jew is-sitwazzjoni tal-familja.

4. Deskrizzjoni tal-funzjonijiet

Bħala uffiċjal ta’ livell għoli, id-direttur, fid-dawl tal-linji gwida u d-deċiżjonijiet stabbiliti mill-awtorità parlamentari u mid-Direttur Ġenerali, huwa inkarigat minn dawn il-kompiti (4):

—	jiżgura l-funzjonament tajjeb ta’ dipartiment kbir tas-Segretarjat Ġenerali tal-Parlament Ewropew magħmul minn unitajiet li jkopru l-oqsma ta’ kompetenza tad-Direttorat,

—	imexxi, jistimula, jimmotiva u jikkoordina timijiet ta’ aġenti — jaħdem biex isir l-aħjar użu mir-riżorsi tad-dipartiment filwaqt li jiżgura servizz ta’ kwalità għolja (organizzazzjoni, ġestjoni tar-riżorsi umani u baġitarji, innovazzjoni, eċċ.) fl-oqsma ta’ attività tiegħu,

—	jippjana l-attivitajiet tad-Direttorat (definizzjoni tal-objettivi u l-istrateġiji) — jieħu d-deċiżjonijiet meħtieġa biex jintlaħqu l-objettivi stabbiliti—jivvaluta s-servizzi pprovduti bl-iskop li jiggarantixxi l-kwalità tagħhom,

—	jagħti pariri lid-Direttur Ġenerali, lis-Segretarjat Ġenerali u lill-Membri tal-Parlament Ewropew fl-oqsma ta’ attività tiegħu,

—	jikkoopera mad-direttorati differenti tas-Segretarjat Ġenerali, jirrappreżenta lill-Istituzzjoni u jinnegozja kuntratti jew ftehimiet fl-oqsma ta’ attività tiegħu,

—	jiġġestixxi u jwassal fi tmiemhom proġetti speċifiċi li jistgħu jinvolvu responsabilitajiet finanzjarji,

—	iwettaq il-funzjoni ta’ uffiċjal awtorizzanti b’sottodelega.

5. Rekwiżiti ta’ eleġibilità

Din il-proċedura ta’ selezzjoni hija miftuħa għall-kandidati kollha li, sad-data meta jagħlqu l-applikazzjonijiet, ikunu ssodisfaw ir-rekwiżiti li ġejjin:

(a)

Rekwiżiti ġenerali

Skont l-Artikolu 28 tar-Regolamenti tal-Persunal, jeħtieġ b’mod partikolari li l-kandidati:

—	ikunu ċittadini ta’ wieħed mill-Istati Membri tal-Unjoni Ewropea,

—	igawdu d-drittijiet ċivili tagħhom,

—	ikunu ssodisfaw kull obbligu impost mil-liġijiet ta’ reklutaġġ applikabbli fil-qasam militari,

—	joffru l-garanziji ta’ moralità mitluba għall-eżerċizzju tal-funzjonijiet previsti.

(b)

Rekwiżiti speċifiċi

(i)

Kwalifiki, diplomi u esperjenza professjonali meħtieġa

—	Livell ta’ edukazzjoni li jikkorrispondi għal ċiklu sħiħ ta’ studji universitarji ċċertifikati b’diploma, meta l-perjodu normali ta’ dawn l-istudji universitarji jkun ta’ erba’ snin jew aktar,

jew

livell ta’ edukazzjoni li jikkorrispondi għal ċiklu sħiħ ta’ studji universitarji ċċertifikati b’diploma flimkien ma’ esperjenza professjonali xierqa ta’ sena jew aktar (5) meta l-perjodu normali tal-istudji universitarji jkun għall-anqas ta’ tliet snin.

—	Esperjenza professjonali, ta’ mill-anqas tnax-il sena, miksuba wara li jkunu nkisbu l-kwalifiki msemmija hawn fuq, fosthom mill-anqas sitt snin ta’ esperjenza maniġerjali.

(ii)

Għarfien meħtieġ

—	Għarfien kulturali ġenerali eċċellenti tal-affarijiet Ewropej,

—	fehim eċċellenti ta’ kwistjonijiet politiċi interni, nazzjonali u internazzjonali,

—	fehim tajjeb ħafna tal-kulturi differenti rappreżentati fi ħdan l-istituzzjonijiet Ewropej,

—	għarfien eċċellenti tat-Trattati,

—	għarfien eċċellenti tal-istruttura tas-Segretarjat Ġenerali tal-Parlament Ewropew, tal-organizzazzjoni u l-ambjent tiegħu u tal-atturi varji,

—	għarfien eċċellenti tar-Regoli ta’ Proċedura tal-Parlament Ewropew, tal-proċeduri leġiżlattivi u tar-regoli u l-prattiki interni,

—	għarfien eċċellenti tal-Regolamenti tal-Persunal, kif ukoll tal-interpretazzjoni tagħhom u tar-regoli derivati minnhom,

—	għarfien eċċellenti tar-regoli finanzjarji applikabbli għall-baġit ġenerali tal-Unjoni u r-regoli ta’ applikazzjoni tagħhom u tar-regoli interni u testi subordinati oħra tal-Parlament Ewropew,

—	għarfien amministrattiv tajjeb ħafna (aspetti b’rabta mar-riżorsi umani u/jew il-ġestjoni u/jew il-baġit u/jew il-finanzi u/jew l-informatika u/jew l-aspetti ġuridiċi, eċċ.),

—	għarfien eċċellenti tat-tekniki maniġerjali.

(iii)

Għarfien lingwistiku

Il-pożizzjoni tirrikjedi għarfien fil-fond (minimu ta’ livell C1 (6)) ta’ waħda mil-lingwi uffiċjali tal-Unjoni Ewropea (7), kif ukoll għarfien tajjeb ħafna (minimu ta’ livell B2 (6)) ta’ mill-anqas waħda minn dawn il-lingwi.

Il-Kumitat Konsultattiv iqis ukoll l-għarfien ta’ lingwi uffiċjali oħrajn tal-Unjoni Ewropea.

(iv)

Kapaċitajiet meħtieġa

—	Sens ta’ strateġija,

—	kapaċità maniġerjali,

—	kapaċità ta’ ppjanar bil-quddiem,

—	kapaċità ta’ reazzjoni għall-avvenimenti,

—	approċċ metikoluż,

—	kapaċità ta’ komunikazzjoni.

6. Proċedura ta’ selezzjoni

Sabiex jgħin lill-Awtorità tal-Ħatra fl-għażla tagħha, il-Kumitat Konsultattiv għall-Ħatra ta’ Uffiċjali Għolja jistabbilixxi l-lista ta’ kandidati u jirrakkomanda lill-Bureau tal-Parlament Ewropew il-persuni li għandhom jiġu mistiedna għal intervista. Il-Bureau jiffinalizza l-lista ta’ dawn il-persuni, filwaqt li l-Kumitat jagħmel l-intervisti u jippreżenta r-rapport finali tiegħu lill-Bureau għad-deċiżjoni. F’dan il-qafas, il-Bureau jkun jista’ jipproċedi għas-smigħ tal-kandidati.

7. Tressiq tal-applikazzjonijiet

Id-data li fiha jagħlqu l-applikazzjonijiet hija:

l-20 ta’ Marzu 2020, f’12.00 (nofsinhar), ħin ta’ Brussell.

Il-kandidati huma mitluba jibagħtu, permezz ta’ email biss, f’format pdf, ittra ta’ motivazzjoni (Għall-attenzjoni tas-Segretarju Ġenerali tal-Parlament Ewropew, Avviż ta’ reklutaġġ numru PE/242/S) u curriculum vitae fil-format tal-Europass (8), b’indikazzjoni tar-referenza tal-avviż (PE/242/S) fis-suġġett tal-messaġġ, fl-indirizz li ġej:

PERS-EPSeniorManagement@ep.europa.eu

u jitqiesu bħala prova d-data u l-ħin tat-trażmissjoni tal-email.

Il-kandidati għandhom jiżguraw li d-dokumenti skennjati jkunu jistgħu jinqraw.

Il-kandidati li jissejħu għal intervista għandhom jieħdu nota li jridu jipprovdu, sad-data tal-intervista, kopji jew fotokopji tad-dokumenti li jikkonfermaw l-istudji tagħhom, kif ukoll l-esperjenza professjonali tagħhom u l-attività li jeżerċitaw fil-preżent (9). L-ebda wieħed minn dawn id-dokumenti ma jingħata lura lill-kandidati.

Id-data ta’ natura personali li jibagħtu l-kandidati fil-qafas ta’ din il-proċedura ta’ selezzjoni se tkun ipproċessata skont ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (10).

(1) Kull referenza, f’dan l-avviż, għal persuna tas-sess maskil għandha tkun ikkunsidrata wkoll li tikkostitwixxi referenza għal persuna tas-sess femminil, u viċeversa.

(2) Ara r-Regolament (KEE, Euratom, KEFA) Nru 259/68 tal-Kunsill (ĠU L 56, 4.3.1968, p. 1) emendat mir-Regolament (KE, Euratom) Nru 723/2004 (ĠU L 124, 27.4.2004, p. 1) kif ukoll mir-Regolament (UE, Εuratom) Nru 1023/2013 tal-Parlament Ewropew u tal-Kunsill tat-22 ta’ Ottubru 2013 li jemenda r-Regolamenti tal-Persunal għall-Uffiċjali tal-Unjoni Ewropea u l-Kondizzjonijiet tal-Impjieg ta’ Aġenti Oħra tal-Unjoni Ewropea (ĠU L 287, 29.10.2013, p. 15).

(3) Meta jiġi reklutat, l-uffiċjal jingħata grad skont id-dispożizzjonijiet tal-Artikolu 32 tar-Regolamenti tal-Persunal.

(4) Għall-kompiti prinċipali, ara l-Anness.

(5) Din is-sena ta’ esperjenza ma titqiesx għall-evalwazzjoni tal-esperjenza professjonali li jirreferi għaliha l-punt li jmiss.

(6) Ara l-Qafas Komuni Ewropew ta’ Referenza għal-Lingwi (QKERL) — https://europass.cedefop.europa.eu/sites/default/files/cefr-mt.pdf

(7) Il-lingwi uffiċjali tal-Unjoni Ewropea huma: il-Bulgaru, iċ-Ċek, id-Daniż, l-Estonjan, il-Finlandiż, il-Franċiż, il-Ġermaniż, il-Grieg, l-Ingliż, l-Irlandiż, l-Ispanjol, l-Iżvediż, il-Kroat, il-Latvjan, il-Litwan, il-Malti, l-Olandiż, il-Pollakk, il-Portugiż, ir-Rumen, is-Slovakk, is-Sloven, it-Taljan u l-Ungeriż.

(8) http://europass.cedefop.europa.eu/

(9) Dan ma japplikax għall-kandidati li jkunu fis-servizz tal-Parlament Ewropew fid-data meta jagħlqu l-applikazzjonijiet.

(10) ĠU L 295, 21.11.2018, p. 39.

ANNESS

DIRETTORAT ĠENERALI GĦALL-INNOVAZZJONI U S-SOSTENN TEKNOLOĠIKU - DIRETTORAT GĦALL-PUBBLIKAZZJONI, L-INNOVAZZJONI U L-ĠESTJONI TAD-DATA

DMIRIJIET PRINĊIPALI

(Dipartiment magħmul minn 164 aġent: 120 uffiċjal, 3 aġenti temporanji u 41 aġent kuntrattwali)

Id-Direttorat EDIT iforni servizzi tal-ogħla livell fil-pubblikazzjoni, irawwem l-innovazzjoni u jamministra d-data korporattiva fil-Parlament Ewropew.

Ir-responsabilitajiet ivarjaw mill-istampar u d-disinn grafiku sal-iżvilupp ta’ soluzzjonijiet diġitali fil-qasam tal-pubblikazzjoni u l-introduzzjoni u l-applikazzjoni ta’ teknoloġiji emerġenti, bħall-intelliġenza artifiċjali.

Għandu rwol ta’ tmexxija editorjali fir-rigward tal-intranet tal-Parlament u jiffaċilita t-trasparenza tal-istituzzjoni billi jagħmel id-data parlamentari disponibbli għall-pubbliku.

UNITÀ TAL-INNOVAZZJONI, L-INTRANETS U S-SOLUZZJONIJIET DIĠITALI

—	Tippromwovi kultura ta’ innovazzjoni;

—	Tfassal soluzzjonijiet diġitali;

—	Tadatta l-kapaċitajiet editorjali biex ikomplu jevolvu u jissodisfaw il-bżonnijiet dejjem jinbidlu tal-utenti.

Servizz tal-Innovazzjoni

—	Janalizza l-potenzjal tat-teknoloġiji emerġenti l-ġodda u, meta jkun il-każ, jassumi rwol ta’ medjatur rigward l-aċċess tagħhom biex l-adozzjoni fil-PE titħaffef bil-ħsieb li jiżdiedu l-produttività u l-effiċjenza;

—	Jibni l-pedamenti għal ċentru ta’ kompetenza tal-intelliġenza artifiċjali (IA);

—	Jippromwovi kultura tal-ICTs li tkun innovattiva u kreattiva fi ħdan il-PE;

—	Iforni prova tal-kunċett konkreta u funzjonanti li tkopri l-mobilità, is-servizzi abbażi tal-lokalizzazzjoni, l-analitika tad-data, kollaborazzjoni u komunikazzjoni, l-internet tal-oġġetti u teknoloġiji emerġenti oħrajn;

—	Jipprovdi strumenti u tekniki li jikkultivaw il-potenzjal innovattiv tal-istituzzjoni;

—	Jistabbilixxi s-sħubijiet neċessarji biex tiġi stimolata mentalità miftuħa u innovattiva;

—	Janima l-pjattaforma INNOVATE u jorganizza l-ġimgħa tal-innovazzjoni li tittella’ kull sena kif ukoll avvenimenti relatati oħrajn.

Servizz tal-Intranets u s-Soluzzjonijiet Diġitali

—	Jintroduċi, jimplimenta u jsostni soluzzjonijiet innovattivi, diġitali u li jespandu fil-qasam tal-pubblikazzjoni;

—	Iforni servizzi editorjali, f’kollaborazzjoni stretta mal-klijenti tiegħu;

—	Isostni l-cloud computing u l-inizjattivi tal-ġestjoni tad-data;

—	Jaħdem favur innovazzjoni sostenibbli billi jbiddel il-provi tal-kunċetti innovattivi ta’ suċċess f’soluzzjonijiet li jistgħu jespandu;

—	Jimmodernizza u jarmonizza l-istrumenti u l-applikazzjonijiet speċifiċi għad-Direttorat (applikazzjonijiet kollaborattivi, MIS4Stats, applikazzjonijiet editorjali);

—	Iqawwi l-applikazzjonijiet tal-programm ta’ ħidma mingħajr karti: eCommittee, eDelegation, eMeeting, MyEPDocuments u PLM-REP; jestendi l-kapaċità tiegħu biex isostni l-laqgħat l-oħrajn li jsiru mingħajr karti;

—	Iwettaq analiżijiet tal-kunċetti biex jitkompla l-progress tal-intranets il-ġodda (eż. l-arkitettura tal-kontenut u l-istrateġija dwar aspetti soċjali);

—	Jiżgura s-sostenn, il-produzzjoni, is-segwitu u l-manutenzjoni evoluttiva tal-applikazzjonijiet informatiċi, eż. APP-FTU, EDIT Cat, QE2WEB, IPMS.

UNITÀ TAL-ĠESTJONI TAD-DATA U L-PRODUZZJONI TA’ DOKUMENTI

—	Toħloq ċentru ta’ għarfien espert fil-qasam tal-ġestjoni tad-data bil-ħsieb li jsostni l-iżvilupp ta’ mudell informatiku mmexxi mid-data;

—	Tiżviluppa s-sisien għal politika tal-ġestjoni tad-data;

—	Tiddefinixxi politika għal data miftuħa;

—	Iforni servizzi ta’ pubblikazzjoni u ta’ qari tal-provi.

Servizz tal-Ġestjoni tad-Data u l-Ipproċessar tad-Dokumenti

—	Jiżviluppa qafas għall-ġestjoni tad-data fil-Parlament Ewropew u jagħqdu mas-servizzi relatati ta’ indiċizzazzjoni tad-dokumenti parlamentari;

—	Jipproċessa u jikkonverti d-dokumenti parlamentari f’format XML biex jintużaw fil-katina leġiżlattiva;

—	Imexxi l-proġett "Parliamentary Open Data";

—	Jiddefinixxi politika ta’ data miftuħa ġenerali u konsistenti;

—	Jeżamina l-opportunitajiet u s-soluzzjonijiet fl-indiċizzazzjoni permezz tal-magni;

—	Jirrieżamina l-modi u l-flussi tax-xogħol attwali ta’ indiċizzazzjoni tad-dokumenti parlamentari;

—	Irawwem il-kooperazzjoni fil-livell interistituzzjonali fil-qasam tal-ġestjoni tad-data u tad-data miftuħa;

—	Iżomm kuntatti mal-programm e-Parliament biex itejjeb il-kwalità tad-dokumenti parlamentari pproċessati u kkonvertit f’format XML.

Servizz tal-Preparazzjoni tad-Dokumenti Multilingwi

—	Iforni servizzi ta’ pubblikazzjoni u ta’ qari tal-provi bil-lingwi uffiċjali kollha tal-Unjoni Ewropea;

—	Jipproċessa u jipproduċi provi lesti għall-istampar tad-diversi dokumenti leġiżlattivi u parlamentari, eż. minuti tas-sessjonijiet parlamentari, testi adottati, mistoqsijiet u tweġibiet bil-miktub, skedi informattivi dwar l-Unjoni Ewropea, eċċ.

UNITÀ TAL-ISTAMPAR

—	Tiżgura l-ġestjoni, il-koordinament, t-tmexxija u l-finanzi tal-Unità tal-Istampar u tas-servizzi tagħha;

—	Tiżgura s-segretarjat tal-Unità;

—	Teżerċita l-funzjonijiet ta’ korrispondent għad-Direttorat EDIT (Innovazzjoni, Riskju, Protezzjoni tad-data, Sigurtà, EMAS);

—	Tkun inkarigata mill-"kundizzjonijiet tax-xogħol" fi ħdan l-EDIT;

—	Issegwi l-proġetti PPP.

UNITÀ TAS-SOSTENN EDITORJALI U L-PROĠETTI VIŻIVI

—	Tforni servizzi relatati mal-ġestjoni tal-klijenti fil-qasam tal-istampar, id-disinn u l-multimedia kif ukoll preparazzjoni teknika tal-pubblikazzjonijiet;

—	Tforni servizzi ta’ stampar fuq talba (print-on-demand) u tieħu ħsieb id-distribuzzjoni tradizzjonali diretta fi Brussell u fi Strasburgu ta’ dokumenti mhux ordnati minn qabel.

Servizz tat-Talbiet tal-Klijenti u l-Proġetti

Publishing & Documents Counter

—	Jeżamina soluzzjonijiet innovattivi ġodda għas-servizzi ta’ stampar fuq talba (print-on-demand) u ta’ tip ieħor;

—	Isegwi l-evoluzzjoni fil-qasam tad-dokumenti diġitali u mobbli;

—	Jiżviluppa sinerġija bejn id-diversi servizzi tal-pubblikazzjoni li jaħdmu flimkien f’post wieħed biex jaqdu aħjar lill-Klijenti;

Publishing Service Desk

—	Iwaqqaf tim ta’ disinjaturi grafiċi;

—	Jiddefinixxi proċeduri u strumenti ċari għal kollaborazzjoni effiċjenti bejn dawk responsabbli mill-klijenti (client managers) u d-disinjaturi grafiċi;

—	Jimmonitorja l-aċċessi għas-server u jarkivja biex itejjeb l-effiċjenza u l-ħin tar-rispons;

—	Jaħdem favur titjib kostanti tas-servizzi offruti lill-klijenti (stħarriġ ta’ sodisfazzjon, KPIs);

—	Jaġġorna l-Katalogu online;

—	Isaħħaħ ir-relazzjonijiet mal-Klijenti: il-Membri, il-gruppi politiċi, il-Kumitati, id-Direttorati Ġenerali u l-Uffiċċju tal-Pubblikazzjonijiet;

—	Jagħti kontribut fil-Kumitat Editorjali;

—	Jirridisinja il-Web2Print fil-kuntest tal-Istrateġija għall-Istampar il-ġdida;

—	Jagħti kontribut lill-Istrateġija tas-Servizz billi jirrieżamina u joħloq netwerks u proċessi trasversali fi ħdan id-Direttorat għall-Pubblikazzjoni;

—	Janalizza l-produzzjonijiet b’intensità għolja fl-użu ta’ karti u jagħti parir lill-klijenti biex jużaw kanali ta’ distribuzzjoni elettronika.

Servizz tal-Awtomatizzazzjoni tal-Pubblikazzjonijiet

—	Jiżviluppa, itejjeb u jagħmel manutenzjoni tal-applikazzjonijiet użati għall-pubblikazzjoni (eż. Web2print);

—	Jieħu ħsieb l-awtomatizzazzjoni tal-proċessi produttivi tal-istampar, mill-preżentazzjoni tal-ordnijiet sal-konsenja;

—	Jistabbilixxi strumenti u metodi komuni għall-pubblikazzjoni u għall-ipproċessar tad-dokumenti;

—	Jiddefinixxi l-istandards PDF għall-istampar;

—	Ifittex fis-suq strumenti ġodda tal-pubblikazzjoni li jkunu orjentati lejn l-ħolqien ta’ prodotti għall-pubblikazzjoni diġitali;

—	Jamministra l-istrumenti editorjali;

—	Jiggarantixxi l-kontinwità tas-servizz għall-Web2Print u għall-MIS.