Direttorat Ġenerali Eurostat

Pubblikazzjoni ta’ post vakanti għall-kariga ta’ Direttur “Statistika Makroekonomika” ESTAT.C, fil-Lussemburgu — (Grad AD 14)

(l-Artikolu 29(2) tar-Regolamenti tal-Persunal)

COM/2019/10389

(2019/C 225 A/01)

Min aħna

Il-Eurostat huwa Direttorat Ġenerali fil-Kummissjoni Ewropea. Huwa jagħti lill-Unjoni Ewropea servizz ta’ tagħrif statistiku ta’ kwalità għolja u jaqdi lill-istituzzjonijiet Ewropej, l-Istati Membri, is-swieq finanzjarji, il-komunità imprenditorjali, iċ-ċittadini, ir-riċerkaturi u l-midja.

Il-Eurostat huwa responsabbli mill-koordinazzjoni u t-tisħiħ tal-governanza tas-Sistema Ewropea tal-Istatistika (ESS - European Statistical System) bl-għan li jipprovdi aċċess faċli għall-utenti kollha ta’ statistika affidabbli, komparabbli u puntwali fil-livell tal-UE. Hija r-responsabbiltà tiegħu li jipproponi l-leġiżlazzjoni statistika kollha tal-UE. Il-Eurostat jikkoopera wkoll mal-organizzazzjonijiet internazzjonali fil-qasam tal-istatistika uffiċjali u jgħin pajjiżi barra mill-UE biex itejbu s-sistemi statistiċi tagħhom.

Id-Direttorat C “Statistika makroekonomika” jinkludi ħames (5) unitajiet u madwar 120 membru tal-persunal (permanenti u mhux permanenti) kif ukoll jamministra baġit ta’ madwar EUR 16-il miljun. Id-Direttorat ikopri qasam tal-istatistika tal-kontijiet nazzjonali: il-metodoloġija tal-kontijiet nazzjonali, l-indikaturi, il-produzzjoni tal-kontijiet nazzjonali, l-istatistika għal skopijiet amministrattivi, l-istatistika tal-prezzijiet, il-paritajiet tal-kapaċità tal-akkwist kif ukoll l-istatistika dwar id-djar.

L-Uffiċċji tal-Eurostat jinsabu fil-Lussemburgu.

X’qed nipproponu

Il-pożizzjoni impenjattiva u ta’ profil għoli tad-Direttur tal-Istatistika Makroekonomika fl-Eurostat tinkludi r-responsabbiltajiet ewlenin li ġejjin:

—

Direzzjoni u ġestjoni strateġika fil-qasam essenzjali tal-istatistika tal-kontijiet nazzjonali: il-metodoloġija tal-kontijiet nazzjonali, l-indikaturi, il-produzzjoni tal-kontijiet nazzjonali, l-istatistika għal skopijiet amministrattivi, l-istatistika tal-prezzijiet, il-paritajiet tal-kapaċità tal-akkwist kif ukoll l-istatistika dwar id-djar;

—	Direzzjoni u ġestjoni strateġika fit-tixrid u l-komunikazzjoni tal-istatistika u data li jipproduċi d-Direttorat;

—

Rappreżentazzjoni tad-Direttorat f’relazzjonijiet ewlenin ma’:

—	dipartimenti oħra tal-Kummissjoni, bħad-Direttorat Ġenerali għall-Affarijiet Ekonomiċi u Finanzjarji (DĠ ECFIN) u d-Direttorat Ġenerali għall-Baġit (DĠ BUDG) u istituzzjonijiet oħra tal-Unjoni Ewropea, bħall-Qorti Ewropea tal-Awdituri;

—	partijiet ikkonċernati esterni bħall-korpi rilevanti tas-ESS, l-istituti nazzjonali tal-istatistika, il-ministeri tal-finanzi, il-banek ċentrali nazzjonali u korpi internazzjonali bħall-BĊE, il-FMI, in-NU u l-OECD.

—	Il-ġestjoni tar-riżorsi umani u finanzjarji.

Id-Direttur se jaġixxi bħala Uffiċjal Awtorizzanti b’sottodelega f’konformità mar-regoli u r-regolamenti finanzjarji tal-Kummissjoni.

X’qed infittxu

Il-kandidat ammess jenħtieġ li jkollu:

(a)

Esperjenza fil-maniġment, u b’mod partikolari:

—	kapaċità qawwija fil-ġestjoni u t-tmexxija ta’ korp amministrattiv kemm fil-livell strateġiku kif ukoll fil-livell maniġerjali;

—	suċċess bil-provi f’pożizzjoni maniġerjali, li tinvolvi l-ġestjoni ta’ riżorsi umani u finanzjarji;

—	għarfien tal-ippjanar, l-eżekuzzjoni u l-monitoraġġ tax-xogħol fl-Eurostat fi proċeduri li huma applikati fil-Kummissjoni Ewropea.

—	kapaċità eċċellenti li jidderieġi u jimmotiva tim kbir f’kuntest multinazzjonali u multisettorjali;

Il-kandidat se jkun parti mit-tim ta’ ġestjoni tad-Direttorat Ġenerali. F’dan il-kuntest esperjenza soda ta’ xogħol f’tim ta’ ġestjoni huwa vantaġġ.

(b)

Għarfien tekniku u esperjenza, u b’mod partikolari:

—	għarfien tajjeb ħafna tal-prijoritajiet tal-Kummissjoni u l-politiki rilevanti tal-UE, speċjalment il-politiki ekonomiċi, il-politiki relatati mar-riżorsi proprji tal-UE, kif titwettaq il-politika kummerċjali u l-monitoraġġ tal-iżbilanċi makroekonomiċi;

—	fehim tajjeb tal-iżvilupp, il-produzzjoni u l-użu tal-istatistika Ewropea u l-funzjonament tal-ESS;

—	ġudizzju sod u sens manifestat ta’ inizjattiva biex jipproponi u jimplimenta ideat ġodda;

—	sfond sod fl-ekonomija u/jew fehim tajjeb tal-istatistika makroekonomika jkun ta’ vantaġġ.

(c)

Ħiliet fil-komunikazzjoni/negozjar u ħiliet oħrajn, u b’mod partikolari:

—

ħiliet tajbin ta’ komunikazzjoni, kif ukoll ħiliet interpersonali, ta’ netwerking u ta’ negozjar, li jippermettu li l-kandidat imexxi diskussjonijiet, jikkomunika b’mod ċar, jaġixxi b’mod effettiv biex jirrappreżenta lill-Kummissjoni u jistabbilixxi relazzjonijiet tajbin ta’ xogħol ma’ istituzzjonijiet oħrajn Ewropej u mhux Ewropej;

—	ħiliet analitiċi eċċellenti u kapaċità li jsolvi problemi organizzattivi u operazzjonali permezz ta’ approċċ orjentat lejn ir-riżultati;

—	ġudizzju perċettiv u fin fi kwistjonijiet li huma politikament sensittivi.

Kundizzjonijiet essenzjali (ir-rekwiżiti tal-eliġibbiltà)

Għall-fażi tal-għażla l-kandidati se jiġu ikkunsidrati biss abbażi tar-rekwiżiti formali segwenti li għandhom jiġu ssodisfati sal-iskadenza tal-applikazzjonijiet:

—	Nazzjonalità: il-kandidati jridu jkunu ċittadini ta’ wieħed mill-Istati Membri tal-Unjoni Ewropea.

—

Lawrja jew diploma tal-università: il-kandidati jrid ikollhom:

—	livell ta’ edukazzjoni li jikkorrispondi għal studji universitarji mitmuma u ċċertifikati b’diploma meta l-perjodu normali tal-edukazzjoni universitarja jkun ta’ erba’ (4) snin jew aktar;

—

jew inkella livell ta’ edukazzjoni li jikkorrispondi għal studji universitarji mitmuma u ċċertifikati b’diploma u esperjenza professjonali xierqa ta’ mill-inqas sena meta l-perjodu normali ta’ edukazzjoni universitarja jkun tal-inqas tliet (3) snin (din is-sena ta’ esperjenza professjonali ma tistax tkun inkluża fl-esperjenza professjonali ta’ wara l-lawrja meħtieġa hawn taħt).

—	Esperjenza professjonali: il-kandidati għandu jkollhom mill-inqas 15-il sena esperjenza professjonali postgradwatorja f’livell li jagħtu aċċess għalih il-kwalifiki msemmija hawn fuq. Mill-inqas ħames (5) snin minn din l-esperjenza professjonali postgradwatorja jridu jkunu fil-qasam tal-ekonomija.

—	Esperjenza maniġerjali: mill-anqas ħames (5) snin mill-esperjenza professjonali postgradwatorja jridu jkunu nkisbu f’funzjoni ta’ ġestjoni ta’ livell għoli (1), f’qasam li huwa rilevanti għal din il-kariga.

—

Lingwi: il-kandidati jrid ikollhom għarfien approfondit ta’ waħda mil-lingwi uffiċjali tal-Unjoni Ewropea (2) u għarfien sodisfaċenti ta’ lingwa oħra minn dawn il-lingwi uffiċjali. Matul l-intervista/i, il-bordijiet tal-għażla jivverifikaw jekk il-kandidati jikkonformawx mar-rekwiżit ta’ għarfien sodisfaċenti ta’ lingwa uffiċjali oħra tal-UE. Dan jista’ jinkludi li l-intervista jew parti minnha ssir f’din il-lingwa l-oħra.

—	Limitu tal-età: il-kandidati ma jridux ikunu laħqu l-età regolari tal-irtirar, li għall-uffiċjali tal-Unjoni Ewropea hija ddefinita bħala l-aħħar tax-xahar li fih il-persuna tkun għalqet is-66 sena (ara l-Artikolu 52 lit (a) tar-Regolamenti tal-Persunal (3)).

Barra minn hekk, il-kandidati għandhom ikunu ssodisfaw kull obbligu impost mil-liġi li jikkonċerna s-servizz militari; jipproduċu referenzi xierqa tal-karattru dwar l-adegwatezza għat-twettiq tad-dmirijiet tagħhom u jkunu fiżikament b’saħħithom sabiex iwettqu d-dmirijiet tagħhom.

Għażla u ħatra

Il-Kummissjoni Ewropea tagħżel u tinnomina lid-Direttur tagħha skont il-proċeduri tal-għażla u tar-reklutaġġ tagħha (ara: Id-Dokument dwar il-Politika għall-Uffiċjali f’Kariga Għolja (4)).

Bħala parti mill-proċedura tal-għażla, il-Kummissjoni Ewropea tistabbilixxi bord ta’ preselezzjoni. Dan il-bord janalizza l-applikazzjonijiet kollha, jipproċedi bl-ewwel verifika tal-eliġibbiltà u jidentifika l-kandidati li jkollhom l-aħjar profil fid-dawl tal-kriterji tal-għażla msemmijin hawn fuq, u li jistgħu jiġu mistiedna għal intervista mal-bord tal-preselezzjoni.

Wara dawn l-intervisti, il-bord ta’ preselezzjoni jfassal il-konklużjonijiet tiegħu u jipproponi lista ta’ kandidati għal aktar intervisti mal-Kumitat Konsultattiv dwar il-Ħatriet (CCA, Consultative Committee on Appointments) tal-Kummissjoni Ewropea. Is-CCA, filwaqt li jqis il-konklużjonijiet tal-bord tal-preselezzjoni, jiddeċiedi dwar il-kandidati li għandhom jiġu mistiedna għal intervista.

Il-kandidati li jissejħu għal intervista mas-CCA jipparteċipaw għal ġurnata sħiħa f’ċentru ta’ valutazzjoni ta’ kompetenzi fil-maniġment immexxi minn konsulenti esterni tar-reklutaġġ Fuq il-bażi tar-riżultati tal-intervista u r-rapport taċ-ċentru ta’ valutazzjoni, is-CCA jistabbilixxi lista preliminari tal-kandidati li jikkunsidra xierqa biex jaqdu l-funzjonijiet ta’ Direttur.

Il-kandidati fuq il-lista preliminari tas-CCA jiġu intervistati mill-Membru/i tal-Kummissjoni li għandhom il-Eurostat bħala parti mill-portafoll.

Wara dawn l-intervisti, il-Kummissjoni Ewropea tieħu deċiżjoni dwar il-ħatra.

Għal raġunijiet funzjonali u sabiex il-proċedura tal-għażla titlesta malajr kemm jista’ jkun fl-interess tal-kandidati kif ukoll tal-istituzzjoni, il-proċedura tal-għażla ssir biss bl-Ingliż u/jew bil-Franċiż (5).

Opportunitajiet indaqs

Il-Kummissjoni Ewropea tapplika politika ta’ opportunitajiet indaqs u ta’ nondiskriminazzjoni skont l-Artikolu 1d tar-Regolamenti tal-Persunal (6).

Kundizzjonijiet tal-impjieg

Is-salarji u l-kundizzjonijiet tal-impjieg huma elenkati fir-Regolamenti tal-Persunal (7).

Il-kandidat magħżul jiġi reklutat bħala uffiċjal fil-grad AD14. Il-kandidat jiġi kklassifikat skont it-tul tal-esperjenza professjonali preċedenti tiegħu fil-pass 1 jew il-pass 2 f’dan il-grad.

Jenħtieġ li l-kandidati jieħdu nota tar-rekwiżit skont ir-Regolamenti tal-Persunal għall-persunal ġdid kollu li jrid itemm b’suċċess perjodu ta’ prova ta’ disa’ xhur.

Il-post tal-impjieg huwa l-Lussemburgu, fejn huwa bbażat il-Eurostat.

Indipendenza u dikjarazzjoni tal-interessi:

Qabel jibda jaqdi dmirijietu, id-Direttur jintalab jagħmel dikjarazzjoni ta’ impenn li jaġixxi b’mod indipendenti fl-interess pubbliku u li jiddikjara kull interess li jista’ jitqies bħala li jippreġudika l-indipendenza tiegħu.

Il-proċedura ta’ applikazzjoni

Qabel tibgħat l-applikazzjoni tiegħek, jenħtieġ li tivverifika bir-reqqa jekk tissodisfax ir-rekwiżiti ta’ eliġibbiltà kollha (il-“Kundizzjonijiet essenzjali”), b’mod partikolari dawk marbutin mat-tip ta’ diplomi, l-esperjenza professjonali ta’ livell għoli kif ukoll il-kompetenza lingwistika meħtieġa. Min ma jissodisfax xi wieħed minn dawn ir-rekwiżiti ta’ eliġibbiltà jiġi awtomatikament eskluż mill-proċedura tal-għażla.

Jekk tixtieq tapplika, trid tirreġistra permezz tal-Internet fis-sit web li ġej u ssegwi l-istruzzjonijiet li jikkonċernaw l-istadji diversi tal-proċedura:

https://ec.europa.eu/dgs/human-riżorsi/seniormanagementvacancies/

Irid ikollok indirizz tal-posta elettronika validu. Dan se jintuża biex tiġi kkonfermata r-reġistrazzjoni tiegħek kif ukoll biex matul l-istadji differenti tal-proċedura jibqa’ jsir kuntatt miegħek. Għaldaqstant, jekk jogħġbok, żomm lill-Kummissjoni Ewropea informata dwar kull tibdil fl-indirizz tal-posta elettronika tiegħek.

Biex tikkompleta l-applikazzjoni tiegħek, jenħtieġ li ttella’ CV fil-format PDF u timla online ittra ta’ motivazzjoni (massimu ta’ 8 000 karattru). Is-CV u l-ittra ta’ motivazzjoni tiegħek jistgħu jintbagħtu bi kwalunkwe lingwa uffiċjali tal-Unjoni Ewropea.

Ladarba tkun lestejt ir-reġistrazzjoni online tiegħek, se tirċievi email li tikkonferma li l-applikazzjoni tiegħek tkun ġiet irreġistrata. Jekk ma tirċevix email ta’ konferma, l-applikazzjoni tiegħek ma tkunx ġiet irreġistrata!

Jekk jogħġbok kun af li mhuwiex possibbli li żżomm taħt monitoraġġ il-progress tal-applikazzjoni tiegħek online. Il-Kummissjoni Ewropea se tikkuntattjak direttament rigward l-istatus tal-applikazzjoni tiegħek.

Jekk teħtieġ iktar informazzjoni u/jew tiltaqa’ ma’ problemi tekniċi, jekk jogħġbok ibgħat email lil: HR-MANAGEMENT-ONLINE@ec.europa.eu

Id-data tal-għeluq

Id-data tal-għeluq għar-reġistrazzjoni hija l-5 ta’ Settembru 2019 — 12.00, u wara din id-data ma jkunx iktar possibbli li tirreġistra.

Hija r-responsabbiltà tiegħek li tlesti r-reġistrazzjoni online tiegħek fil-ħin. Nagħtuk parir biex ma tħallix għall-aħħar jiem biex tapplika, peress li traffiku qawwi tal-Internet jew problema fil-konnessjoni tal-Internet tiegħek jistgħu jwasslu biex ir-reġistrazzjoni online tiegħek tiġi tterminata qabel ma tlestiha, u b’hekk ikollok tirrepeti l-proċess kollu. Ladarba jiskadi ż-żmien tar-reġistrazzjonijiet, inti ma tkunx tista’ ddaħħal iktar data. Ir-reġistrazzjonijiet li jaslu tard ma jiġux aċċettati.

Informazzjoni importanti għall-kandidati

Il-kandidati huma mfakkra li x-xogħol tad-diversi kumitati tal-għażla huwa kunfidenzjali. Il-kandidati ma jistgħux jagħmlu kuntatt dirett jew indirett mal-membri tagħhom u lanqas ma jista’ ħaddieħor jagħmel dan f’isimhom. Kull mistoqsija trid tiġi indirizzata lis-segretarjat tal-bordijiet rilevanti.

Protezzjoni tad-data personali

Il-Kummissjoni se tiżgura li d-data personali tal-kandidati tiġi pproċessata kif jeżiġi r-Regolament (UE) 2018/1725 tal-Parlament Ewropew u tal-Kunsill (8) dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data. Dan japplika b’mod partikolari għall-kunfidenzjalità u s-sigurtà ta’ tali data.

(1) Fil-curriculum vitae tagħhom, il-kandidati għandhom jispeċifikaw għas-snin kollha li matulhom kisbu l-esperjenza maniġerjali: (1) it-titolu u r-rwol tal-pożizzjonijiet maniġerjali li kellhom; (2) l-għadd ta’ persunal li jkunu mexxew f’dawn il-pożizzjonijiet; (3) id-daqs tal-baġits ġestiti; (4) l-għadd ta’ livelli ġerarkiċi fuqhom u taħthom; u (5) l-għadd ta’ kollegi fl-istess livell.

(2) http://eur-lex.europa.eu/legal-content/MT/TXT/PDF/?uri=CELEX:01958R0001-20130701&qid=1408533709461&from=MT

(3) http://eurlex.europa.eu/LexUriServ/LexUriServ.do?uri=CONSLEG:1962R0031:20140101:MT:PDF

(4) https://ec.europa.eu/info/sites/info/files/compilation-of-the-senior-official-policy-at-the-european-commission_en.pdf

(5) Il-bordijiet tal-għażla jiżguraw li ma jingħata l-ebda vantaġġ inġust lill-kelliema nattivi ta’ dawn il-lingwi.

(6) http://eur-lex.europa.eu/legal-content/MT/TXT/PDF/?uri=CELEX:01962R0031-20140701&from=MT

(7) http://eur-lex.europa.eu/legal-content/MT/TXT/PDF/?uri=CELEX:01962R0031-20140701&from=MT

(8) Ir Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).