Id-data ta' skadenza għar-reġistrazzjoni: is-7 ta’ Lulju 2015 f’12.00 (nofsinhar), ħin ta’ Brussell

L-Uffiċċju Ewropew għas-Selezzjoni tal-Persunal (EPSO) qed jorganizza kompetizzjonijiet miftuħa, ibbażati fuq kwalifiki u testijiet, sabiex jinħolqu listi ta’ riserva li minnhom il-Kummissjoni Ewropea se tirrekluta membri ġodda tas-servizz pubbliku bħala “tobba” (grupp ta’ funzjoni AD) għas-siti tagħha fi Brussell (BE), il-Lussemburgu (LU) u Ispra (IT).

Dan l-Avviż ta' Kompetizzjoni, flimkien mar-Regoli Ġenerali li jirregolaw il-Kompetizzjonijiet Miftuħa li huma ppubblikati f’Il-Ġurnal Uffiċjali tal-Unjoin Ewropea C 70 A tas-27 ta' Frar 2015 (http://eur-lex.europa.eu/legal-content/MT/TXT/?uri=OJ:C:2015:070A:TOC) jifforma l-qafas legalment vinkolanti għal din il-proċedura ta' selezzjoni.

L-intenzjoni hija li jiġu reklutati tobba għal assenjazzjoni fis-siti msemmija f’dan l-avviż, iżda dan ma jeskludix il-possibbiltà li l-Artikolu 7 tar-Regolamenti tal-Persunal jista' jiġi applikat, li skontu uffiċjali jistgħu jiġu trasferiti lejn sit ieħor tax-xogħol matul il-karriera tagħhom jekk l-interessi tas-servizz jeħtieġu dan. (L-Artikolu 7 jista' jinstab fir-Regolament 31 (http://eur-lex.europa.eu/LexUriServ/LexUriServ.do?uri=CONSLEG:1962R0031:20140101:MT:PDF))

EPSO/AD/309/15 fiha żewġ għażliet. Tista’ tapplika biss għal waħda minn dawn. Din l-għażla għandek tagħmilha waqt l-applikazzjoni elettronika u ma tistax tibdilha ġaladarba tkun ikkonfermajt u vvalidajt l-applikazzjoni elettronika tiegħek.

Jekk tiġi reklutat minn din il-kompetizzjoni tibda twettaq erba' tipi prinċipali ta’ xogħlijiet:

Ara l-ANNESS I għal aktar informazzjoni dwar id-dmirijiet tipiċi li jridu jiġu mwettqa.

Trid tissodisfa dawn il-kundizzjonijiet KOLLHA meta tivvalida l-applikazzjoni tiegħek:

It-tieni lingwa magħżula trid tkun l-Ingliż, il-Franċiż, jew il-Ġermaniż . Dawn huma l-lingwi prinċipali tax-xogħol użati fl-istituzzjonijiet tal-UE u, fl-interessi tas-servizz, ir-rekluti l-ġodda jridu jkunu kapaċi li jibdew jaħdmu u jikkomunikaw mal-ewwel b’mod effiċjenti fix-xogħol tagħhom ta’ kuljum f’mill-inqas waħda minn dawn il-lingwi.

Ara l-ANNESS II għal informazzjoni addizzjonali dwar il-lingwi f'kompetizzjonijiet tal-UE.

L-ewwel nett, ir-rekwiżiti ta’ eliġibbiltà tal-kandidati kollha għal kull kompetizzjoni jiġu vverifikati abbażi ta' informazzjoni pprovduta fl-applikazzjoni elettronika tal-kandidati.

It-tieni, għall-kandidati eliġibbli biss, l-għażla abbażi tal-kwalifiki ssir bl-użu tal-informazzjoni pprovduta mill-kandidati fit-taqsima Evalwazzjoni tal-Kapaċitajiet (Talent Screener Tab) tal-formola tal-applikazzjoni. Il-bord ta' selezzjoni jassenja piż lil kull kriterju ta' selezzjoni li jirrifletti l-importanza relattiva tiegħu (minn 1 sa 3) u t-tweġibiet ta’ kull kandidat jingħataw bejn 0 u 4 punti.

Imbagħad, il-bord tas-selezzjoni jimmultiplika l-punti bil-piż ta’ kull kriterju u jgħoddhom flimkien sabiex jiġu identifikati dawk li l-profili tagħhom jissodisfa l-aħjar id-dmirijiet li se jwettqu.

Sa massimu ta’ 3 darbiet in-numru ta’ kandidati magħżula mfittxija għal kull kompetizzjoni u sit se jiġu mistiedna għal din il-fażi. Jekk inti tikseb waħda mill- ogħla marki totali fis-selezzjoni abbażi tal-kwalifiki, int tkun mistieden tattendi Ċentru ta’ Valutazzjoni għal jum jew tnejn fejn isirulek it-testijiet bil- lingwa 2 tiegħek. Għal EPSO/AD/308/15, dan probabbilment ser ikun fi Brussell u għal EPSO/AD/309/15, probabbilment fil- Lussemburgu .

Fiċ-Ċentru ta' Valutazzjoni jiġu ttestjati tmien kompetenzi ġenerali u l-kompetenzi speċifiċi meħtieġa għal din il-kompetizzjoni permezz ta’ ħames testijiet (intervisti bbażati fuq il-kompetenzi ġenerali u speċifiċi, eżerċizzju fi grupp, studju ta’ każ u diskussjoni dwar żewġ każi kliniċi) kif deskritt fil-matriċi li ġejjin:

Wara li jiġu ċċekkjati d-dokumenti ta’ sostenn tal-kandidati, il-bord ta' selezzjoni jistabbilixxi lista ta’ riżerva għal kull kompetizzjoni u sit, magħmula mill-kandidati eliġibbli li ġabu l-aħjar marki fit-testijiet kollha wara ċ-Ċentru ta' Valutazzjoni, sakemm jintlaħaq in-numru meħtieġ ta’ kandidati magħżula. L-ismijiet jiġu elenkati f'ordni alfabetiku.

ANNESS I

ID-DMIRIJIET

Dawn il-kompetizzjonijiet miftuħa huma maħsuba biex jiġu reklutati Amministraturi (AD 11) li d-dmirijiet tagħhom ikunu li jwettqu l-kompiti meħtieġa ta’ uffiċjal mediku tal-istituzzjoni:

—	eżamijiet mediċi tal-membri tal-persunal u l-applikanti;

—	eżamijiet u konsultazzjonijiet relatati mas-saħħa okkupazzjonali;

—	opinjonijiet mediċi amministrattivi;

—	kontroll mediku ta’ assenzi minħabba mard;

—	emerġenzi mediċi (għal Ispra biss);

—	kampanji ta’ promozzjoni tas-saħħa;

—	protezzjoni mir-radjazzjoni (għal-Lussemburgu u Ispra biss);

—

parteċipazzjoni fil-ħidma ta’ diversi fora:

—	saħħa u sikurezza fil-post tax-xogħol,

—	l-invalidità,

—	bord ta’ konsulenti mediċi għolja tal-istituzzjonijiet tal-Unjoni Ewropea;

—	tmexxija ta' tim;

—	żamma ta’ kuntatti ma’ tobba esterni u/jew sptarijiet fl-oqsma speċjalizzati tagħhom;

—	trattament ta’ kawżi u proċeduri amministrattivi.

Tmiem tal-ANNESS I, ikklikkja hawn biex tmur lura għat-test prinċipali

ANNESS II

IL-LINGWI

F’konformità mas-sentenza mogħtija mill-Qorti tal-Ġustizzja tal-Unjoni Ewoprea (l-Awla Manja) fil-Kawża C-566/10 P, ir-Repubblika Taljana vs. il-Kummissjoni, l-Istituzzjonijiet tal-Unjoni stabilixxew hawn taħt ir-raġunijiet għalfejn f'din il-kompetizzjoni ġiet limitata l-għażla tat-tieni lingwa għal għadd ristrett ta' lingwi uffiċjali tal-Unjoni.

Il-kandidati huma infurmati li l-għażliet tat-tieni lingwa għal din il-kompetizzjoni ġew definiti b'konformità mal-interessi tas-servizz, li jeżiġi li dawk li jiġu rreklutati jkunu jistgħu jibdew jaħdmu minnufih u jikkomunikaw b'mod effiċjenti fix-xogħol tagħhom ta' kuljum. Jekk dan ma jkunx il-każ, it-tħaddim effettiv tal-istituzzjonijiet jista’ jiġi affettwat ħażin ħafna.

Il-prassi li jintużaw prinċipalment l-Ingliż, il-Franċiż u l-Ġermaniż għall-komunikazzjoni interna fl-istituzzjonijiet tal-UE ilha fis-seħħ u dawn huma wkoll il-lingwi meħtieġa l-aktar spiss waqt komunikazzjoni esterna u fit-trattament tal-kawżi. Barra minn hekk, l-Ingliż, il-Franċiż u l-Ġermaniż huma l-lingwi l-aktar użati bħala t-tieni lingwa fl-Unjoni Ewropea u dawk l-aktar studjati bħala t-tieni lingwa. Dan jikkonferma l-livell ta' edukazzjoni u l-kompetenzi professjonali li attwalment wieħed jistenna mill-kandidati għal pożizzjonijiet mal-Unjoni Ewropea, jiġifieri l-għarfien ta' mill-inqas waħda minn dawn il-lingwi. Konsegwentement, sabiex ikun hemm bilanċ bejn l-interess u l-ħtiġijiet tas-servizz u l-ħiliet tal-kandidati, u minħabba l-qasam partikolari ta' din il-kompetizzjoni, ikun leġittimu li jiġu organizzati testijiet f'dawn it-tliet lingwi sabiex jiġi żgurat li l-kandidati kollha jkunu kapaċi jaħdmu f'mill-inqas waħda minnhom, tkun xi tkun l-ewwel lingwa uffiċjali tagħhom. Il-valutazzjoni ta' kompetenzi speċifiċi b'dan il-mod tippermetti lill-istituzzjonijiet li jevalwaw il-kapaċità tal-kandidati li jkunu jistgħu jibdew jaħdmu minnufih f'ambjent simili ħafna għal dak li se jsibu fl-impjieg.

Għal dawn l-istess raġunijiet, huwa raġonevoli li tiġi ristretta l-lingwa ta' komunikazzjoni bejn il-kandidati u l-istituzzjoni, inkluża l-lingwa li biha jitfasslu l-applikazzjonijiet. Barra dan, din l-eżiġenza tiżgura l-uniformità fit-tqabbil tal-kandidati u fil-verifika tal-applikazzjonijiet tagħhom.

Sabiex jiġi żgurat trattament ugwali għall-kandidati kollha, kulħadd – inklużi dawk li l-ewwel lingwa uffiċjali tagħhom hija waħda mit-tlieta – irid jagħmel xi testijiet fit-tieni lingwa tiegħu, magħżula minn fost dawn it-tlieta.

Xejn minn dan ma jaffettwa l-possibilità ta' taħriġ f'lingwa aktar tard biex jippermetti lill-persunal li jaħdem b'tielet lingwa, b'konformità mal-Artikolu 45(2) tar-Regolamenti tal-Persunal.

Tmiem tal-ANNESS II, ikklikkja hawn biex tmur lura għat-test prinċipali

ANNESS III

KRITERJI TAL-GĦAŻLA

Il-bord ta' selezzjoni jikkunsidra l-kriterji li ġejjin għall-għażla bbażata fuq il-kwalifiki:

EPSO/AD/308/15 – Brussell:

1.	Mill-inqas 5 snin esperjenza professjonali li għadha għaddejja f’mediċina okkupazzjonali

2.	Mill-inqas 3 snin esperjenza professjonali ta’ kontroll mediku ta’ assenzi minħabba mard

3.	Mill-inqas 3 snin esperjenza professjonali f’mediċina ġenerali

4.	Mill-inqas 3 snin esperjenza professjonali f’mediċina interna

5.	Mill-inqas sentejn esperjenza professjonali fl-ergonomija

6.	Mill-inqas sentejn esperjenza professjonali fis-saħħa pubblika

7.	Mill-inqas sentejn esperjenza professjonali fil-psikjatrija

8.	Mill-inqas sentejn esperjenza professjonali f’mediċina tropikali

9.	Esperjenza professjonali fit-trattament ta’ kawżi u proċeduri amministrattivi f’ambjent mediku

10.	Esperjenza professjonali fil-qasam tal-ġestjoni ta' tim mediku.

11.	Mill-inqas 3 snin esperjenza professjonali f’ambjent internazzjonali/multikulturali f’wieħed mill-oqsma li ġejjin: mediċina okkupazzjonali, mediċina ġenerali, mediċina interna, mediċina tropikali, l-ergonomija, kontroll mediku ta’ assenzi minħabba mard, is-saħħa pubblika jew psikjatrija.

12.	Għarfien ippruvat tal-Ingliż u/jew tal-Franċiż (livell minimu meħtieġ: B2 tal-Qafas Komuni Ewropew ta’ Referenza għal-Lingwi (CEFR) http://europass.cedefop.europa.eu/mt/resources/european-language-levels-cefr)

EPSO/AD/309/15 – Il-Lussemburgu/Is-siti tal-Ispra:

1.	Mill-inqas 5 snin esperjenza professjonali li għadha għaddejja f’mediċina okkupazzjonali

2.	Mill-inqas 3 snin esperjenza professjonali ta’ kontroll mediku ta’ assenzi minħabba mard

3.	Mill-inqas 3 snin esperjenza professjonali f’mediċina ġenerali

4.	Mill-inqas 3 snin esperjenza professjonali fil-protezzjoni mir-radjazzjoni

5.	Mill-inqas sentejn esperjenza professjonali f’mediċina ta' emerġenza (għal Ispra biss)

6.	Mill-inqas 3 snin esperjenza professjonali f’mediċina interna

7.	Mill-inqas sentejn esperjenza professjonali fl-ergonomija

8.	Mill-inqas sentejn esperjenza professjonali fis-saħħa pubblika

9.	Mill-inqas sentejn esperjenza professjonali fil-psikjatrija

10.	Mill-inqas sentejn esperjenza professjonali f’mediċina tropikali

11.	Esperjenza professjonali fit-trattament ta’ kawżi u proċeduri amministrattivi f’ambjent mediku

12.	Esperjenza professjonali fil-qasam tal-ġestjoni ta' tim mediku.

13.

Mill-inqas 3 snin esperjenza professjonali f’ambjent internazzjonali/multikulturali f’wieħed mill-oqsma li ġejjin: mediċina tax-xogħol, mediċina ġenerali, mediċina interna, mediċina tropikali, l-ergonomija, kontroll mediku ta’ assenzi minħabba mard, is-saħħa pubblika, psikjatrija, mediċina ta' emerġenza (għal Ispra biss) jew protezzjoni mir-radjazzjoni.

14.	Għarfien ippruvat tal-Ingliż u/jew tal-Franċiż (livell minimu meħtieġ: B2 tal-Qafas Komuni Ewropew ta’ Referenza għal-Lingwi (CEFR) http://europass.cedefop.europa.eu/mt/resources/european-language-levels-cefr)

15.

Għarfien ippruvat ta' waħda jew iktar minn dawn il-lingwi li ġejjin: L-Olandiż u/jew il-Ġermaniż għal-Lussemburgu; It-Taljan u/jew l-Ispanjol għal Ispra (livell minimu meħtieġ: B2 tal-Qafas Komuni Ewropew ta’ Referenza għal-Lingwi (CEFR) http://europass.cedefop.europa.eu/mt/resources/european-language-levels-cefr)

Tmiem tal-ANNESS III, ikklikkja hawn biex tmur lura għat-test prinċipali