27.2.2014

Il-Ġurnal Uffiċjali tal-Unjoni Ewropea

CA 56/1

AVVIŻ TA' KOMPETIZZJONI ĠENERALI

EPSO/AST/130/14 (AST 3)

(2014/C 56 A/01)

L-Uffiċċju Ewropew għas-Selezzjoni tal-Persunal (EPSO) qed jorganizza kompetizzjoni ġenerali abbażi ta' kwalifiki u testijiet sabiex tinħoloq lista ta' riżerva għar-reklutaġġ ta' assistenti (1) fis-settur tal-bini.

L-għan ta' din il-kompetizzjoni huwa li jinħolqu listi ta' riżerva maħsuba biex jimtlew xi postijiet vakanti ta' uffiċjali fl-istituzzjonijiet tal-Unjoni Ewropea, fi Brussell u fil-Lussemburgu.

Qabel tapplika, għandek taqra bir-reqqa l-gwida applikabbli għall-kompetizzjonijiet ġenerali ppubblikata f' Il-Ġurnal Uffiċjali tal-Unjoni Ewropea C 270 A tas-7 ta' Settembru 2012 kif ukoll fuq is-sit tal-Internet tal-EPSO.

Din il-gwida, li tagħmel parti integrali mill-avviż tal-kompetizzjoni, se tgħinek tifhem ir-regoli dwar il-proċeduri u l-mod ta' kif tapplika.

WERREJ

I.	QAFAS ĠENERALI

II.	DESKRIZZJONI TAD-DMIRIJIET

III.	KUNDIZZJONIJIET TA' AMMISSJONI

IV.	TESTIJIET TA' DĦUL

V.	AMMISSJONI GĦALL-KOMPETIZZJONIJIET U GĦAŻLA ABBAŻI TAL-KWALIFIKI

VI.	KOMPETIZZJONI ĠENERALI

VII.	LISTI TA' RIŻERVA

VIII.

KIF TAPPLIKA?

I. QAFAS ĠENERALI

1.	Numru ta' kandidati magħżula

101

Rimarka

Din il-kompetizzjoni tirreferi għal sitt oqsma, tista' tapplika biss għal qasam wieħed. Din l-għażla għandha ssir meta tkun qed timla l-applikazzjoni elettronika u ma tistax tinbidel wara d-data tal-għeluq tal-applikazzjoni.

N.B.

Biex tiġi rreklutat fis-servizzi tal-istituzzjonijiet Ewropej fil-Lussemburgu, huwa meħtieġ għarfien tajjeb tal-Franċiż orali u miktub, minħabba li dan l-għarfien huwa indispensabbli fil-qafas tax-xogħol u l-iskambji mal-operaturi esterni.

II. DESKRIZZJONI TAD-DMIRIJIET

It-tekniċi speċjalizzati se jkunu responsabbli għall-kompiti ta' ġestjoni, applikazzjoni, sorveljanza u monitoraġġ fis-settur tal-bini, b'mod partikolari f'wieħed minn dawn l-oqsma li ġejjin:

Qasam 1: Inġinerija klimatika — (18-il kandidat magħżula)

Arja kundizzjonata, ventilazzjoni, tisħin, installazzjonijiet idrosanitarji, tekniki u metodi ta' użu sostenibbli tal-bini tal-uffiċċji, ġestjoni tal-enerġija, ġestjoni teknika ċentralizzata, regolazzjoni awtomatika.

Qasam 2: Inġinerija elettromekkanika u elettronika — (15-il kandidat magħżula)

Elettriku (kurrent qawwi u kurrent dgħajjef), makkinarju tal-irfigħ, tagħmir awtomatiku, detezzjoni u protezzjoni min-nar, sistema tal-kejbils tal-informatika/tat-telefown, ġestjoni teknika ċentralizzata, ġeneratur tal-elettriku, tidwil ta' sigurtà, EIB u sistemi simili.

Qasam 3: Arkitettura u rinnovament intern — (15-il kandidat magħżula)

Sistemazzjoni interna u esterna: riorganizzazzjoni tal-ispazji, b'mod partikolari tal-uffiċċji, taż-żoni tas-servizzi, tas-swali għal-laqgħat u tal-bini tekniku, sinjalar ta' konvenjenza u ta' sigurtà, għarfien tal-istandards ta' konteniment.

Qasam 4: Ġestjoni tal-proġetti — (18-il kandidat magħżula)

Assistenza għall-ġestjoni tal-proġetti tal-proprjetà (kostruzzjoni, rinnovament, lokazzjoni tal-bini), tekniki speċjali, bini strutturali u irfinar: strutturi, faċċati, blinds jew tendini interni u esterni, bjut, bibien u twieqi esterni u interni, kisi tal-artijiet u l-ħitan.

Qasam 5: Sigurtà u Saħħa/Iġjene — (17-il kandidat magħżula)

Saħħa u sigurtà fix-xogħol: implimentazzjoni tal-miżuri ta' prevenzjoni, sigurtà u iġjene, koordinazzjoni tas-sigurtà u s-saħħa fil-fażi ta' proġett u ta' kostruzzjoni, tfassil tal-istruzzjonijiet ta' sigurtà u ta' iġjene, ġestjoni tas-sitwazzjoni ta' emerġenza.

Qasam 6: Sigurtà — (18-il kandidat magħżula)

Tekniċi ta' sigurtà (sikurezza) f'termini ta' evalwazzjoni u ta' implimentazzjoni tal-protezzjonijiet ta' sigurtà, kemm b'mezzi fiżiċi (kostruzzjoni, twieqi u bibien, eċċ.) kif ukoll b'mezzi elettroniċi (bħal pereżempju CCTV, kontroll tal-aċċess, detezzjoni ta' dħul mhux awtorizzat): implimentazzjoni tal-miżuri ta' sigurtà, koordinazzjoni tas-sistemi ta' sigurtà fil-fażi ta' proġett u ta' kostruzzjoni, tfassil tal-istruzzjonijiet ta' sigurtà, ġestjoni tas-sitwazzjoni ta' emerġenza, awditjar fil-manutenzjoni tal-installazzjonijiet ta' sigurtà. Abbozzar tal-pjanijiet ta' kontinwità u/jew tal-pjanijiet ta' kriżi, abbozzar tal-evalwazzjonijiet tar-riskji.

Barra minn hekk, dan ix-xogħol jeħtieġ ħiliet ta' ġestjoni amministrattiva u finanzjarja u għarfien tajjeb tal-għodod tal-informatika (Office, Excel, Word, MS Project, eċċ.), kif ukoll għarfien tas-softwer ta' ġestjoni u Disinn Assistit permezz tal-Kompjuter (CAD), l-aktar għall-oqsma 3 u 4.

Bħala indikazzjoni, id-dmirijiet jistgħu jinkludu b'mod partikolari:

—	kompiti marbuta mal-manutenzjoni u l-ġestjoni tal-bini,

—	kompiti marbuta mal-ġestjoni tal-manutenzjoni assistita permezz tal-kompjuter (Computerised Maintenance Management System — CMMS), mal-ġestjoni teknika ċentralizzata (Building Management System — BMS), mal-ġestjoni termika u enerġetika u mal-użu sostenibbli tal-bini,

—	kompiti marbuta mal-protezzjoni min-nar, mas-sigurtà teknika tal-bini u l-iġjene jew kompiti oħrajn marbuta mas-saħħa u s-sigurtà fix-xogħol,

—	l-analiżi tal-ħtiġijiet u l-programmazzjoni pluriennali tal-bini jew tagħmir/installazzjonijiet speċifiċi li għandhom x'jaqsmu mal-protezzjoni (organizzazzjonali, operazzjonali, eċċ.),

—	il-monitoraġġ tal-proġetti lesti ta' sistemazzjoni/rinnovament/kostruzzjoni/rikostruzzjoni, l-abbozzar ta' proċeduri ta' użu u t-taħriġ tal-utenti,

—	l-assistenza għall-ġestjoni tal-binjiet u/jew l-użu tat-tagħmir u l-installazzjonijiet ta' sikurezza,

—	l-abbozzar tal-ispeċifikazzjonijiet qabel is-sejħa għall-offerti, il-parteċipazzjoni fil-proċeduri ta' sejħa għall-offerti, il-kontroll u l-koordinazzjoni tax-xogħlijiet jew tal-għotja ta' servizzi speċifiċi għas-settur tal-bini inkluża s-sigurtà,

—	il-ġestjoni amministrattiva u teknika (b'mod partikolari s-sorveljanza tal-eżekuzzjoni, il-monitoraġġ, il-kontroll tal-kwalità) tal-kuntratti magħmula fis-settur tal-bini ma' ditti esterni ta'

—	servizzi, xogħlijiet, provvisti u bini, inklużi l-kuntratti ta' manutenzjoni,

—	il-ġestjoni finanzjarja fil-qafas tal-ġestjoni tal-proġetti,

—	il-parteċipazzjoni fil-proċeduri ta' għażla u fin-negozjati mmirati biex jinxtara/jimtela l-bini,

—	it-tfassil, il-konsultazzjoni u l-aġġornament tal-pjanijiet permezz tas-softwer tad-disinn assistit permezz tal-kompjuter (CAD),

—	il-kuntatti mal-partijiet kontraenti u l-amministrazzjonijiet nazzjonali għall-kwistjonijiet relatati mal-qasam ta' attività,

—	l-evalwazzjoni tar-riskji u t-tfassil ta' soluzzjonijiet ta' sikurezza multidixxiplinari,

—	l-inizjazzjoni u l-monitoraġġ tal-fajls relatati mas-sikurezza f'dixxiplini oħra bħal pereżempju: l-elettriku, l-ergonomija, il-prevenzjoni, eċċ.

—	l-inizjazzjoni, il-monitoraġġ, il-koordinazzjoni, il-parteċipazzjoni fi proġetti u riflessjonijiet interistituzzjonali,

—	l-abbozzar u l-monitoraġġ ta' fajls regolatorji jew ta' konformità u kull azzjoni relatata (kisba tal-konformità),

—	it-tfassil tal-istandards u l-ispeċifikazzjonijiet relatati mas-sikurezza; ir-reviżjoni tagħhom jew il-parteċipazzjoni fi gruppi ta' ħidma relatati magħhom,

—	is-sorveljanza teknoloġika.

III. KUNDIZZJONIJIET TA' AMMISSJONI

Fid-data tal-għeluq stabbilita għall-applikazzjoni elettronika , int għandek tissodisfa l-kundizzjonijiet ġenerali u speċifiċi kollha li ġejjin:

1.	Kundizzjonijiet ġenerali

(a)	Tkun ċittadin ta' wieħed mill-Istati Membri tal-Unjoni Ewropea.

(b)	Tgawdi mid-drittijiet ċivili tiegħek.

(c)	Tkun wettaqt kwalunkwe obbligu impost mil-liġijiet dwar ir-reklutaġġ applikabbli fil-qasam militari.

(d)	Tipproduċi r-referenzi meħtieġa dwar il-karattru, li jindikaw li int tajjeb biex twettaq il-funzjonijiet previsti.

2.	Kundizzjonijiet speċifiċi

2.1

Kwalifiki/diplomi u esperjenza professjonali

Livell ta' edukazzjoni post sekondarja ċċertifikat minn diploma ta' tmiem l-istudji marbuta mad-deskrizzjoni tad-dmirijiet, segwit minn esperjenza professjonali ta' mill-inqas 3 snin marbuta mad-deskrizzjoni tad-dmirijiet.

JEW

Livell ta' edukazzjoni sekondarja ċċertifikat minn diploma ta' tmiem l-istudji li tagħti aċċess għall-edukazzjoni post sekondarja, segwit minn esperjenza professjonali ta' mill-inqas 6 snin marbuta mad-deskrizzjoni tad-dmirijiet.

2.2.

Għarfien lingwistiku (2)

Il-lingwi uffiċjali tal-Unjoni Ewropea huma dawn li ġejjin:

BG (il-Bulgaru)

CS (iċ-Ċek)

DA (id-Daniż)

DE (il-Ġermaniż)

EL (il-Grieg)

EN (l-Ingliż)

ES (l-Ispanjol)

ET (l-Estonjan)

FI (il-Finlandiż)

FR (il-Franċiż)

GA (l-Irlandiż)

HR (il-Kroat)

HU (l-Ungeriż)

IT (it-Taljan)

LT (il-Litwan)

LV (il-Latvjan)

MT (il-Malti)

NL (l-Olandiż)

PL (il-Pollakk)

PT (il-Portugiż)

RO (ir-Rumen)

SK (is-Slovakkja)

SL (is-Sloven)

SV (l-Isvediż)

Lingwa 1

Il-lingwa ewlenija

għarfien profond ta' waħda mil-lingwi uffiċjali tal-Unjoni Ewropea

Lingwa 2

It-tieni lingwa (li bilfors trid tkun differenti mil-lingwa 1)

għarfien sodisfaċenti tal-Ġermaniż, l-Ingliż jew il-Franċiż

Skont is-sentenza tal-Qorti tal-Ġustizzja tal-Unjoni Ewropea (Awla Manja) fil-kawża C-566/10 P, ir-Repubblika Taljana vs il-Kummissjoni, l-Istituzzjonijiet tal-Unjoni jixtiequ, fil-qafas tal-kompetizzjoni preżenti, jistqarru r-raġunijiet għal-limitu tal-għażla tat-tieni lingwa għal numru limitat ta' lingwi uffiċjali tal-Unjoni.

Għaldaqstant il-kandidati huma infurmati li l-għażliet tat-tieni lingwa aċċettati għal din il-kompetizzjoni ġew definiti b'konformità mal-interess tas-servizzi li jesiġi li dawk li jiġu rreklutati jkunu jistgħu jibdew jaħdmu mal-ewwel u jikkomunikaw b'mod effiċjenti fix-xogħol tagħhom ta' kuljum. Jekk dan ma jkunx il-każ, it-tħaddim effettiv tal-istituzzjonijiet jista' jiġi affettwat ħażin ħafna.

Abbażi tal-prassi tal-Istituzzjonijiet tal-Unjoni li ilha titħaddem fir-rigward tal-lingwi użati għall-komunikazzjoni interna u b'kunsiderazzjoni wkoll tal-ħtiġijiet tas-servizzi dwar il-komunikazzjoni esterna u l-ipproċessar tal-fajls, l-Ingliż, il-Franċiż u l-Ġermaniż jibqgħu l-aktar lingwi użati. Barra minn hekk, l-Ingliż, il-Franċiż u l-Ġermaniż huma l-lingwi sekondarji l-aktar użati fl-Unjoni Ewropea u dawk l-aktar studjati bħala lingwi sekondarji. Dan jikkonferma l-livell ta' edukazzjoni u l-kompetenzi professjonali li attwalment wieħed jista' jistenna mill-kandidati f'pożizzjonijiet fl-Istituzzjonijiet tal-Unjoni, jiġifieri l-għarfien ta' mill-inqas waħda minn dawn il-lingwi. Konsegwentement, meta wieħed iqabbel l-interess tas-servizz u l-ħtiġijiet u l-kapaċitajiet tal-kandidati, meta jitqies il-qasam partikolari ta' din il-kompetizzjoni, ikun ġust li jiġu organizzati testijiet f'dawn it-tliet lingwi sabiex jiġi żgurat li, tkun xi tkun l-ewwel lingwa uffiċjali tagħhom, il-kandidati kollha jkunu jafu tajjeb mill-inqas waħda minn dawn it-tliet lingwi uffiċjali fil-livell ta' xogħol. Il-valutazzjoni tal-kompetenzi speċifiċi b'dan il-mod tippermetti lill-Istituzzjonijiet tal-Unjoni jevalwaw il-kapaċità tal-kandidati li jkunu jistgħu jaħdmu minnufih f'ambjent simili għal dak li jsibu fl-impjieg.

Għall-istess raġunijiet, huwa indikat li tiġi ristretta l-lingwa ta' komunikazzjoni bejn il-kandidati u l-istituzzjoni, inkluża l-lingwa li biha jitfasslu l-applikazzjonijiet. Fil-fatt, din l-eżiġenza tiżgura l-omoġeneità tat-tqabbil u l-kontroll tal-kandidati fl-applikazzjonijiet tagħhom stess.

Barra minn hekk, fl-interess ta' trattament ugwali tal-kandidati kollha, inklużi dawk li l-ewwel lingwa uffiċjali tagħhom hija waħda minn dawn it-tlieta, kulħadd huwa meħtieġ li jagħmel ċerti testijiet fit-tieni lingwa tiegħu, magħżula minn fost dawn it-tliet lingwi.

Dawn id-dispożizzjonijiet ma jaffettwawx it-tagħlim ulterjuri tat-tielet lingwa ta' xogħol, b'konformità mal-Artikolu 45 (2) tar-Regolamenti tal-Persunal.

IV. TESTIJIET TA' DĦUL

It-testijiet ta' dħul isiru fuq il-kompjuter u huma organizzati mill-EPSO. Il-bord ta' selezzjoni jiddetermina l-livell ta' diffikultà ta' dawn it-testijiet u japprova s-sustanza tagħhom abbażi tal-proposti magħmula mill-EPSO.

It-testijiet ta' dħul se jiġu organizzati biss jekk l-għadd tal-kandidati li japplikaw ikun ogħla minn ċertu limitu. Il-limitu jiġi determinat mid-Direttur tal-EPSO bħala Awtorità tal-Ħatra (autorité investie du pouvoir de nomination — AIPN), wara li tagħlaq ir-reġistrazzjoni tal-applikazzjonijiet. Dan il-limitu jista' jvarja minn qasam għall-ieħor u int tkun infurmat permezz tal-kont EPSO tiegħek.

Jekk dan ma jkunx il-każ, se jiġu organizzati testijiet tal-kapaċità fiċ-ċentru ta' evalwazzjoni (ara l-punt 2 tat-Taqsima VI).

1.	L-istedina

Inti tiġi mistieden għat-testijiet jekk tkun ivvalidajt l-applikazzjoni tiegħek fil-ħin (ara t-Taqsima VIII).

Attenzjoni:

1.	meta tivvalida l-applikazzjoni tiegħek, inti tiddikjara li tissodisfa l-kundizzjonijiet ġenerali u speċifiċi tat-Taqsima III;

2.	biex tipparteċipa fit-testijiet, trid tirriżerva data; din ir-riżervazzjoni trid bilfors issir fiż-żmien stipulat li jiġi indikat lilek permezz tal-kont EPSO tiegħek.

2.	Deskrizzjoni tat-testijiet u dettalji dwar il-marki

Sensiela ta' testijiet ibbażati fuq mistoqsijiet b'għażla multipla bl-għan li jiġu evalwati l-ħiliet tiegħek fir-rigward tar-raġunament:

Test (a)

verbali

marki: minn 0 sa 20 punt

minimu meħtieġ: 10 punti

Test (b)

numeriku

marki: minn 0 sa 10 punt

Test (c)

astratt

marki: minn 0 sa 10 punt

Il-minimu meħtieġ għaż-żewġ testijiet (b) u (c) flimkien huwa ta' 10 punti

3.	Lingwa tat-testijiet

Lingwa 1

V. AMMISSJONI GĦALL-KOMPETIZZJONIJIET U GĦAŻLA ABBAŻI TAL-KWALIFIKI

1. Proċedura

L-evalwazzjoni tal-kundizzjonijiet ġenerali u speċifiċi kif ukoll l-għażla abbażi tal-kwalifiki l-ewwel isiru skont id-dikjarazzjonijiet li tkun ipprovdejt fl-applikazzjoni tiegħek.

(a)

Ir-risposti tiegħek għall-mistoqsijiet dwar il-kundizzjonijiet ġenerali u speċifiċi se jkunu pproċessati sabiex jiġi ddeterminat jekk inti tagħmilx parti mil-lista tal-kandidati li jissodisfaw il-kundizzjonijiet kollha tal-ammissjoni għall-kompetizzjoni.

Fil-każ li t-testijiet ta' dħul huma organizzati minn qabel, l-evalwazzjoni tal-kundizzjonijiet ġenerali u speċifiċi ssir, f'ordni dixxendenti tal-punti miksuba, sakemm jintlaħaq in-numru stabbilit, għal kull qasam, mill-AIPN għall-kandidati li:

—	kisbu kemm il-minimu meħtieġ kif ukoll l-aħjar marki fit-testijiet ta' dħul u

—	jissodisfaw il-kundizzjonijiet ta' ammissjoni għall-kompetizzjoni

F'każ li diversi kandidati jkunu kisbu l-istess marka għall-aħħar post, dawn il-kandidati kollha se jiġu kkunsidrati għall-fażi ta' għażla abbażi tal-kwalifiki. L-applikazzjonijiet elettroniċi tal-kandidati li jiġu kklassifikati taħt dan il-limitu mhux se jkunu eżaminati.

(b)

Imbagħad, il-bord ta' selezzjoni jagħżel abbażi tal-kwalifiki sabiex jidentifika, fost il-kandidati li jissodisfaw il-kundizzjonijiet ta' ammissjoni għall-kompetizzjoni, dawk il-kandidati li għandhom l-aktar kwalifiki rilevanti (speċjalment diplomi u esperjenza professjonali) fid-dawl tad-deskrizzjoni tal-funzjonijiet u tal-kriterji ta' għażla deskritti f'dan l-avviż ta' kompetizzjoni. Din l-għażla ssir biss fuq il-bażi tad-dikjarazzjonijiet tiegħek ipprovduti fis-sezzjoni “Evalwazzjoni tal-Kapaċitajiet” skont klassifikazzjoni stabbilita kif ġej:

—	Kull kriterju ta' għażla jitqies minn 1 sa 3, skont l-importanza mogħtija mill-bord ta' selezzjoni;

—	Il-bord ta' selezzjoni jeżamina r-risposti tal-kandidati u jagħti marka minn 0 sa 4 għal kull risposta, skont il-kwalifiki tal-kandidat. Il-marki, immultiplikati bil-piż mogħti lil kull mistoqsija, jingħaddu ma' xulxin biex tinkiseb il-marka globali.

Imbagħad, il-bord ta' selezzjoni jistabbilixxi klassifika tal-kandidati skont dawn il-marki globali. In-numru ta' kandidati mistiedna (3) għaċ-ċentru ta' evalwazzjoni jikkorrispondi, għal kull qasam, għal mhux aktar minn 3 darbiet in-numru ta' kandidati magħżula. Dan in-numru se jkun ippubblikat fuq il-websajt tal-EPSO (http://blogs.ec.europa.eu/eu-careers.info/).

2. Verifika tad-dikjarazzjonijiet tal-kandidati

Meta joħorġu r-riżultati taċ-ċentru tal-evalwazzjoni, u fid-dawl ta' dawn ir-riżultati, id-dikjarazzjonijiet li jsiru mill-kandidati fl-applikazzjoni elettronika tagħhom se jiġu vverifikati mill-EPSO għall-konformità mal-kundizzjonijiet ġenerali, filwaqt li l-bord ta' selezzjoni jagħmel l-istess għall-kundizzjonijiet speċifiċi abbażi tad-dokumenti ġustfikattivi pprovduti mill-kandidati. Għall-evalwazzjoni tal-kwalifiki, id-dokumenti ġustifikattivi se jkunu kkunsidrati biss biex jikkonfermaw ir-risposti diġà mogħtija fis-sezzjoni “Evalwazzjoni tal-Kapaċitajiet”. Jekk matul din il-verifika jinstab li dawn id-dikjarazzjonijiet (4) mhumiex ikkonfermati mid-dokumenti ġustifikattivi rilevanti, il-kandidati kkonċernati jiġu esklużi mill-kompetizzjoni.

Il-verifika ssir b'ordni dixxendenti ta' mertu, għall-kandidati li kisbu l-minimu meħtieġ u l-aħjar marki għat-testijiet kollha flimkien taċ-ċentru ta' evalwazzjoni (d), (e), (f) u (g) (ara l-punt 2 tat-Taqsima VI). Dawn il-kandidati jridu wkoll ikunu ġabu l-minimu meħtieġ fit-testijiet tal-kapaċità a), b) u c). Din il-verifika tibqa' ssir sakemm jintlaħaq in-numru ta' kandidati li jistgħu jitniżżlu fil-listi ta' riżerva u li effettivament jissodisfaw il-kundizzjonijiet kollha tal-ammissjoni. Id-dokumenti ġustifikattivi tal-kandidati li jikklassifikaw taħt dan in-numru ma jiġux eżaminati.

3. Kriterji għall-għażla

Fil-qafas tas-selezzjoni abbażi tal-kwalifiki, il-bord ta' selezzjoni se jikkunsidra l-kriterji li ġejjin:

Qasam 1: Inġinerija klimatika

1.	Esperjenza professjonali addizzjonali ma' dik tat-Taqsima III, il-punt 2.1 ta' mill-inqas sentejn, f'wieħed mid-dmirijiet tal-qasam.

2.	Esperjenza professjonali addizzjonali fi dmir ieħor tal-qasam, ta' perjodu ta' żmien minimu ta' 9 xhur.

3.	Esperjenza professjonali ta' mill-inqas 6 xhur fl-informatika: softwer speċifiku fil-qasam tal-kostruzzjoni/pjanifikazzjoni/manutenzjoni tal-bini.

4.	Diploma addizzjonali f'wieħed mid-dmirijiet tal-qasam.

5.	Taħriġ kumplimentari, differenti mid-diploma msemija fil-punt 4 hawn fuq, fil-qasam tal-bini jew ċertifikazzjonijiet/approvazzjonijiet tekniċi relatati mal-qasam.

6.	Esperjenza professjonali ta' ġestjoni finanzjarja fil-qasam tal-ġestjoni tal-proġetti u/jew esperjenza professjonali fil-qasam tas-sejħa għall-offerti (bħala dak li jfassal is-sejħa għall-offerti u/jew l-evalwatur u/jew l-offerent).

7.	Esperjenza professjonali fil-ġestjoni ta' tim jew fil-koordinazzjoni tas-servizzi esterni.

Qasam 2: Inġinerija elettromekkanika u elettronika

1.	Esperjenza professjonali addizzjonali ma' dik tat-Taqsima III, il-punt 2.1 ta' mill-inqas sentejn, f'wieħed mid-dmirijiet tal-qasam.

2.	Esperjenza professjonali addizzjonali fi dmir ieħor tal-qasam, ta' perjodu ta' żmien minimu ta' 9 xhur.

3.	Esperjenza professjonali ta' mill-inqas 6 xhur fl-informatika: softwer speċifiku fil-qasam tal-kostruzzjoni/pjanifikazzjoni/manutenzjoni tal-bini.

4.	Diploma addizzjonali f'wieħed mid-dmirijiet tal-qasam.

5.	Taħriġ kumplimentari, differenti mid-diploma msemija fil-punt 4 hawn fuq, fil-qasam tal-bini jew ċertifikazzjonijiet/approvazzjonijiet tekniċi relatati mal-qasam.

6.	Esperjenza professjonali fil-ġestjoni finanzjarja fil-qasam tal-ġestjoni tal-proġetti u/jew esperjenza professjonali fil-qasam tas-sejħa għall-offerti (bħala dak li jfassal is-sejħa għall-offerti u/jew l-evalwatur u/jew l-offerent).

7.	Esperjenza professjonali fil-ġestjoni ta' tim jew fil-koordinazzjoni tas-servizzi esterni.

Qasam 3: Arkitettura u rinnovament intern

1.	Esperjenza professjonali addizzjonali ma' dik tat-Taqsima III, il-punt 2.1 ta' mill-inqas sentejn, f'wieħed mid-dmirijiet tal-qasam.

2.	Esperjenza professjonali fil-qasam tal-istrumenti għad-disinn: ġestjoni elettronika tal-pjanijiet (Disinn Assistit permezz tal-Kompjuter) u tal-mapep (Geographical Information System).

3.	Esperjenza professjonali fis-sistemazzjoni interna (Interior Design) u esterna.

4.	Esperjenza professjonali f'qasam ieħor (ara t-Taqsima II) marbuta mal-qasam tat-tekniki tal-bini, ta' perjodu ta' żmien minimu ta' 9 xhur.

5.	Taħriġ kumplimentari jew esperjenza professjonali ekwivalenti fil-qasam tal-ġestjoni tal-proġetti.

6.	Taħriġ kumplimentari jew esperjenza professjonali ekwivalenti fil-qasam tal-metodi u l-istrumenti tal-analiżi.

7.	Esperjenza professjonali fil-koordinazzjoni tas-servizzi esterni.

Qasam 4: Ġestjoni tal-proġetti

1.	Esperjenza professjonali addizzjonali ma' dik tat-Taqsima III, il-punt 2.1 ta' mill-inqas sentejn, f'wieħed mid-dmirijiet tal-qasam.

2.	Esperjenza professjonali ta' mill-inqas 6 xhur fl-informatika: softwer speċifiku fil-qasam tal-kostruzzjoni/pjanifikazzjoni/manutenzjoni tal-bini.

3.	Esperjenza professjonali ta' mill-inqas sentejn bħala maniġer tal-proġetti, b'mod partikolari f'uffiċċju tal-inġinerija jew tal-arkitettura.

4.	Esperjenza professjonali f'qasam ieħor (ara t-Taqsima II) marbuta mal-qasam tat-tekniki tal-bini, ta' perjodu ta' żmien minimu ta' 9 xhur.

5.	Diploma addizzjonali f'wieħed mid-dmirijiet tal-qasam.

6.	Taħriġ kumplimentari, differenti mid-diploma msemija fil-punt 5 hawn fuq, fil-qasam tal-bini jew ċertifikazzjonijiet/approvazzjonijiet tekniċi relatati mal-qasam.

7.	Esperjenza professjonali fil-ġestjoni finanzjarja fil-qasam tal-ġestjoni tal-proġetti u/jew esperjenza professjonali fil-qasam tas-sejħa għall-offerti (bħala dak li jfassal is-sejħa għall-offerti u/jew l-evalwatur u/jew l-offerent).

8.	Esperjenza professjonali fil-ġestjoni ta' tim jew fil-koordinazzjoni tas-servizzi esterni.

9.	Esperjenza professjonali fil-ġestjoni u l-monitoraġġ tal-kuntratti.

Qasam 5: Sigurtà u Saħħa/Iġjene

1.	Esperjenza professjonali addizzjonali ma' dik tat-Taqsima III, il-punt 2.1, ta' mill-inqas sentejn, fil-qasam tas-sigurtà u tas-saħħa fix-xogħol.

2.	Taħriġ kumplimentari fil-qasam tas-sigurtà tal-bini, tas-sigurtà u tas-saħħa fix-xogħol, tal-iġjene (pereżempju: ħaddiem innominat bħala uffiċjal għas-sikurezza, koordinatur tas-sigurtà u s-saħħa, konsulent fil-prevenzjoni).

3.	Esperjenza professjonali fl-applikazzjoni tal-istandards speċifiċi fil-qasam tas-sigurtà u s-saħħa fix-xogħol.

4.	Diploma u/jew ċertifikat fil-qasam tas-sigurtà u s-saħħa fix-xogħol.

5.	Esperjenza professjonali f'qasam ieħor (ara t-Taqsima II) marbuta mal-qasam tat-tekniki tal-bini, ta' perjodu ta' żmien minimu ta' 9 xhur.

Qasam 6: Sigurtà

1.	Esperjenza professjonali addizzjonali ma' dik tat-Taqsima III, il-punt 2.1, ta' mill-inqas sentejn, fil-qasam tal-inġinerija jew tas-sigurtà.

2.	Taħriġ kumplimentari fil-qasam tas-sigurtà tal-bini.

3.	Esperjenza professjonali fl-applikazzjoni tal-istandards speċifiċi fil-qasam tas-sigurtà.

4.	Diploma fil-qasam tal-inġinerija.

5.	Ċertifikazzjoni fil-qasam tas-sigurtà.

6.	Esperjenza professjonali f'qasam ieħor (ara t-Taqsima II) relatata mal-qasam tas-sigurtà, marbuta mal-qasam tat-tekniki tal-bini, ta' perjodu ta' żmien minimu ta' 9 xhur.

VI. KOMPETIZZJONI ĠENERALI

1.	L-istedina

Jekk inti tkun wieħed mill-kandidati li (5)

—	skont id-dikjarazzjonijiet tagħhom fl-applikazzjoni elettronika, jissodisfaw il-kundizzjonijiet ta' ammissjoni ġenerali u speċifiċi tat-Taqsima III kif ukoll

—	ikunu kisbu waħda mill-aħjar marki fl-għażla abbażi tal-kwalifiki,

inti tiġi mistieden biex tipparteċipa fl-eżamijiet taċ-ċentru ta' evalwazzjoni li ġeneralment isiru fi Brussell (6) u li jdumu jum jew jumejn.

2.	Iċ-Ċentru ta' Evalwazzjoni

Inti se tkun soġġett għal tliet tipi ta' evalwazzjoni li l-kontenut huwa vvalidat mill-bord ta' selezzjoni:

—

il-kapaċitajiet fir-rigward tar-raġunament (ħlief jekk dawn ma kinux diġà evalwati waqt it-testijiet ta' dħul organizzati minn qabel) permezz ta' dawn it-testijiet:

(a)	test tar-raġunament verbali

(b)	test tar-raġunament numeriku

(c)	test tar-raġunament astratt

—

il-kompetenzi speċifiċi ikunu evalwati permezz ta' dan it-test:

(d)	intervista strutturata dwar il-kompetenzi fil-qasam, abbażi tar-risposti li tkun tajt fis-sezzjoni “Evalwazzjoni tal-Kapa ċitajiet” tal-applikazzjoni

—

il-kompetenzi ġenerali tiegħek (7) se jkunu evalwati permezz tal-eżamijiet li ġejjin:

(e)	studju ta' każ

(f)	eżerċizzju fi grupp

(g)	intervista strutturata dwar il-kompetenzi ġenerali

Se jiġu ttestjati dawn il-kompetenzi ġenerali skont it-tabella li ġejja:

Studju ta' każ partikolari

Eżerċizzju fi grupp

Intervista strutturata

Analiżi u soluzzjoni tal-problemi

Komunikazzjoni

Kwalità u riżultati

Tagħlim u żvilupp

Prijoritizzazzjoni u organizzazzjoni

Reżiljenza

Xogħol f'tim

3.	Lingwa taċ-ċentru ta' evalwazzjoni

Lingwa 1 għat-testijiet (a), (b) u (c)

Lingwa 2 għat-testijiet (d), (e), (f) u (g)

4.	Marki u piż tal-marki

Kapaċitajiet ta' raġunament

(a)	verbali: minn 0 sa 20 punt minimu meħtieġ: 10 punti

(b)	numeriku: minn 0 sa 10 punti

(c)	astratt: minn 0 sa 10 punti minimu meħtieġ għaż-żewġ testijiet (b) u (c) flimkien: 10 punti

It-testijiet (a), (b) u (c) huma eliminatorji iżda l-marki tagħhom mhux se jkunu miżjuda mal-marki tat-testijiet l-oħra taċ-ċentru ta' evalwazzjoni.

Kompetenzi speċifiċi (test (d))

minn 0 sa 100 punt

minimu meħtieġ: 50 punt

piż: 55 % tal-marka globali

Kompetenzi ġenerali (testijiet (e), (f) u (g))

minn 0 sa 10 punti għal kull kompetenza ġenerali

minimu meħtieġ:

3 punti għal kull kompetenza u

35 punt minn 70 għas-7 kompetenzi ġenerali kollha f'daqqa

piż: 45 % tal-marka globali

VII. LISTI TA' RIŻERVA

1.	Applikazzjoni

Il-bord ta selezzjoni jniżżel ismek fil-lista ta' riżerva

—	jekk inti tkun fost il-kandidati (8) li jkunu kisbu l-marki minimi meħtieġa għall-eżamijiet kollha minn (a) sa (g) u waħda mill-aħjar marki għat-testijiet taċ-ċentru ta' evalwazzjoni (d), (e), (f) u (g) kollha (ara n-numru tal-kandidati magħżula, Taqsima I, punt 1)

—	u jekk, fid-dawl tad-dokumenti ġustifikattivi, inti tissodisfa l-kundizzjonijiet kollha tad-dħul.

2.	Klassifika

Il-listi jitfasslu skont il-qasam u skont l-ordni alfabetiku.

VIII. KIF TAPPLIKA?

1.	Applikazzjoni elettronika

Għandek tapplika b'mod elettroniku billi ssegwi l-proċedura indikata fuq il-websajt tal-EPSO, u b'mod speċjali fil-Manwal tal-Applikazzjoni.

Data tal-għ eluq (inkluża l-validazzjoni): l-1 ta' April 2014 f'12:00 (nofsinhar), ħin ta' Brussell

2.	Fajl tal-applikazzjoni

Jekk inti tkun fost il-kandidati ammessi għaċ-ċentru ta' evalwazzjoni, għandek iġġib miegħek (9) il-fajl tal-applikazzjoni komplut tiegħek (l-applikazzjoni elettronika tiegħek iffirmata u d-dokumenti ġustifikattivi) meta tmur fiċ-ċentru ta' evalwazzjoni.

Termini: ara l-punt 6.1 tal-gwida applikabbli għall-kompetizzjonijiet ġenerali.

(1) F'dan l-avviż kull referenza għal persuna tas-sess maskil hija wkoll għal persuna tas-sess femminil.

(2) Ara l-Qafas Ewropew ta' Referenza Komuni għall-Ilsna (QERK) — livell minimu meħtieġ: lingwa 1 = C1, lingwa 2 = B2

(http://europass.cedefop.europa.eu/mt/resources/european-language-levels-cefr)

(3) Il-kandidati li ma jkunux mistiedna għaċ-ċentru tal-evalwazzjoni se jirċievu r-riżultati tal-evalwazzjoni tagħhom kif ukoll il-piż ta' kull mistoqsija mill-bord ta' selezzjoni.

(4) Din l-informazzjoni tiġi verifikata, abbażi tad-dokumenti ġustifikattivi, qabel ma tiġi stabbilita l-lista ta' riżerva (ara t-Taqsima VII, il-punt 1 u t-Taqsima VIII, il-punt 2).

(5) F'każ li, diversi kandidati jkunu kisbu l-istess marka għall-aħħar post, dawn il-kandidati kollha jkunu mistiedna għall-eżamijiet tal-evalwazzjoni.

(6) Minħabba raġunijiet organizzattivi, it-testijiet ta' raġunament jistgħu jkunu organizzati fiċ-ċentri ta' testijiet fl-Istati Membri, b'mod indipendenti minn eżamijiet oħra taċ-ċentru ta' evalwazzjoni.

(7) Dawn il-kompetenzi huma mfissra fid-detall fil-punt 1.2 tal-gwida applikabbli għall-kompetizzjoni ġenerali.

(8) Fil-każ li, diversi kandidati jkunu kisbu l-istess marka għall-aħħar post, dawn il-kandidati kollha jitniżżlu fil-lista ta' riżerva.

(9) Id-data tal-konvokazzjoni għaċ-ċentru ta' evalwazzjoni tiġi kkomunikata lilek fi żmien xieraq permezz tal-kont tiegħek tal-EPSO.