2.7.2010   

MT

Il-Ġurnal Uffiċjali tal-Unjoni Ewropea

C 176/7

Notifika minn qabel ta' konċentrazzjoni

(Każ COMP/M.5741 – CDC/Veolia Environment/Transdev/Veolia Transport)

(Test b’relevanza għaż-ŻEE)

2010/C 176/04

1.

Fil-25 ta’ Ġunju 2010 il-Kummissjoni rċeviet notifika, skont l-Artikolu 4 tar-Regolament tal-Kunsill (KE) Nru 139/2004 (1) ta' proposta ta' konċentrazzjoni skont liema l-impriżi Veolia Environment (“Veolia Environment”, Franza) u l-Caisse des Dépôts et Consignations (“CDC”, Franza) jakkwistaw skont l-Artikolu 3(1)(b) tar-Regolament dwar l-Għaqdiet, il-kontroll konġunt tal-impriżi Transdev (“Transdev”, Franza) u ta' Veolia Transport (“Veolia Transport”, Franza), organizzati taħt entità ġdida Veolia Transdev, permezz tax-xiri ta' ishma.

2.

L-attivitajiet kummerċjali tal-impriżi kkonċernati huma:

—

Veolia Environnement: grupp internazzjonali b'dawn l-attivitajiet: (i) l-amministrazzjoni tas-servizzi tal-ilma u ta' purifikazzjoni tad-drenaġġ, (ii) il-fornitura ta' servizzi ta' tindif u ta' trattament tal-iskart, (iii) l-għoti ta' servizzi fil-qasam tal-enerġija u (iv) l-amministrazzjoni ta' servizzi ta' trasport,

—

Veolia Transport: fergħa ta' Veolia Environment speċjalizzata fl-għoti ta' servizzi ta' trasport pubbliku tal-persuni u l-amministrazzjoni ta' netwerks urbani, interurbani (fi ħdan taqsimiet amministrattivi u reġjuni) kif ukoll nazzjonali permezz ta' kull xorta ta' vetturi (karozzi tal-linja, ferrovija ta' taħt l-art, tram, eċċ) fuq skala internazzjonali,

—

CDC: entità pubblika b'kompiti ta' interess ġenerali li jikkonsistu fi (i) l-amministrazzjoni ta' fondi privati li l-awtoritajiet pubbliċi jkunu jixtiequ li jipproteġu b'mod partikolari u (ii) is-self jew l-investiment f'attivitajiet f'isem l-interess ġenerali. Is-CDC hija wkoll preżenti fl-oqsma tal-assikurazzjoni personali, tat-trasport, tal-proprjetà imobbli u tal-iżvilupp ta' impriżi u servizzi,

—

Transdev: fergħa tas-CDC li tieħu ħsieb operazzjoni ta' trasport kollettiv urban u interurban permezz tal-ferrovija, tat-tram jew tal-ferrovija ta' taħt l-art, karozzi tal-linja, diversi forom ta' ġarr ta' passiġġieri fuq it-triq, laneċ għax-xmajjar, użu kollettiv ta' karozzi u ta' roti, l-aktar fl-Ewropa.

3.

Wara eżami preliminari, il-Kummissjoni ssib li l-operazzjoni nnotifikata tista' taqa' fl-ambitu tar-Regolament tal-KE dwar l-Għaqdiet. Madanakollu, id-deċiżjoni finali dwar dan il-punt hija riżervata.

4.

Il-Kummissjoni tistieden lill-partijiet terzi interessati biex jibagħtu kwalunkwe kumment li jista’ jkollhom dwar l-operazzjoni proposta lill-Kummissjoni.

Il-kummenti jridu jaslu għand il-Kummissjoni mhux aktar tard minn għaxart ijiem wara d-data ta’ din il-pubblikazzjoni. Il-kummenti jistgħu jintbagħtu lill-Kummissjoni bil-feks (+32 22964301), jew b'emejl lil COMP-MERGER-REGISTRY@ec.europa.eu jew bil-posta, taħt in-numru ta' referenza COMP/M.5741 – CDC/Veolia Environment/Transdev/Veolia Transport, fl-indirizz li ġej:

Il-Kummissjoni Ewropea

Direttorat Ġenerali għall-Kompetizzjoni

Reġistru tal-Amalgamazzjonijiet

J-70

1049 Bruxelles/Brussel

BELGIQUE/BELGIË

(1)  ĠU L 24, 29.1.2004, p. 1 (ir-“Regolament tal-KE dwar l-Għaqdiet”).