|
15.5.2009 |
MT |
Il-Ġurnal Uffiċjali tal-Unjoni Ewropea |
C 111/12 |
SEJĦA GĦAL PROPOSTI – EAC/21/2009
Azzjoni preparatorja fil-qasam tal-Isport
(Sejħa miftuħa)
2009/C 111/08
1. Għanijiet u deskrizzjoni
Is-sejħa għal proposti sservi biex timplimenta l-Azzjoni Preparatorja fil-qasam tal-isport b'konformità mad-Deċiżjoni tal-Kummissjoni K(2009) 1685 tas-16 ta' Marzu 2009 li tadotta “l-programm ta' ħidma annwali 2009 dwar l-għotjiet u l-kuntratti għall-azzjoni preparatorja fil-qasam tal-isport u għall-avvenimenti annwali speċjali”.
L-għan ewlieni tal-azzjoni preparatorja fil-qasam tal-isport għall-2009 huwa li jitħejjew azzjonijiet futuri tal-UE f'dan il-qasam, abbażi tal-prijoritajiet stabbiliti fil-White Paper dwar l-Isport.
Din is-sejħa għall-proposti se tappoġġja proġetti transnazzjonali mressqa minn entitajiet pubbliċi jew għaqdiet tas-soċjetà ċivili sabiex jidentifikaw u jittestjaw netwerks adatti u prassi tajba fil-qasam tal-isport, fl-oqsma li ġejjin:
|
(a) |
Il-promozzjoni ta' attività fiżika li ttejjeb is-saħħa; |
|
(b) |
Il-promozzjoni ta' edukazzjoni u taħriġ fl-isport; |
|
(c) |
Il-promozzjoni tal-valuri fundamentali Ewropej billi jitħeġġeġ l-isport għall-persuni b'diżabilità; |
|
(d) |
Il-promozzjoni tal-ugwaljanza bejn is-sessi fl-isport; |
Kwalunkwe nefqa mġarrba qabel il-bidu tal-attivitajiet mhijiex se titqies.
Id-dipartiment tal-Kummissjoni responsabbli mill-implimentazzjoni u l-ġestjoni ta' din l-azzjoni huwa l-Unità Sportiva tad-Direttorat Ġenerali għall-Edukazzjoni u l-Kultura.
2. Applikanti eliġibbli
Għal din is-Sejħa għal Proposti, huma eliġibbli żewġ kategoriji ta' applikanti:
|
— |
Entitajiet pubbliċi; |
|
— |
Għaqdiet tas-soċjetà ċivili. |
Barra minn dan, biex ikunu eliġibbli l-applikanti jridu jissodisfaw il-kundizzjonijiet li ġejjin:
|
— |
Ikollhom l-uffiċċju ċentrali f'wieħed miIl-Istati Membri tal-Unjoni Ewropea (l-Awstrija, il-Belġju, il-Bulgarija, Ċipru, ir-Repubblika Ċeka, id-Danimarka, l-Estonja, il-Finlandja, Franza, il-Ġermanja, il-Greċja, l-Ungerija, l-Irlanda, l-Italja, il-Latvja, il-Litwanja, il-Lussemburgu, Malta, l-Olanda, il-Polonja, il-Portugall, is-Slovakkja, is-Slovenja, Spanja, l-Iżvezja, ir-Renju unit); |
|
— |
Ikollhom status ġuridiku. |
Il-persuni naturali ma jistgħux jibagħtu applikazzjoni għal din is-sejħa għal proposti.
3. Baġit u t-tul tal-proġett
Il-baġit disponibbli għal din is-sejħa ta’ proposti hu ta’ EUR 4 000 000.
Il-kofinanzjament tal-UE se jkun ipprovdut għal massimu ta' 80 % tal-ispejjeż totali. Il-kofinanzjament estern jista' jkun magħmul parzjalment minn kontributi mhux fi flus.
Madankollu, rigward in-numru u l-kwalità tal-proġetti mressqa, il-Kummissjoni tirriserva d-dritt li ma tagħtix il-finanzjament kollu disponibbli.
Il-proġetti jridu jibdew bejn l-1 ta’ Diċembru 2009 u tal-31 ta’ Marzu 2010 u jintemmu mhux aktar tard mill-31 ta’ Marzu 2011.
Il-perjodu ta' eliġibilità tal-ispejjeż se jibda fid-data speċifikata fil-kuntratt, jiġifieri d-data li fiha jinbeda l-proġett. Id-data tal-bidu tal-eliġibilità ma tista' tibda fl-ebda każ qabel id-data tat-tressiq tal-applikazzjoni għall-għotja.
In-nefqa mġarrba qabel id-data tal-attivitajiet mhijiex se titqies.
4. Data finali għall-applikazzjonijiet
Id-data finali biex l-applikazzjonijiet jintbagħtu lill-Kummissjoni Ewropea hija l-31 ta' Awwissu 2009 fuq il-marka postali.
5. Informazzjoni addizzjonali
It-test sħiħ (speċifikazzjonijiet) għal din is-sejħa għal proposti u l-formoli ta' applikazzjoni huma disponibbli fuq il-websajt li ġejja:
http://ec.europa.eu/sport/index_en.htm
L-applikazzjonijiet għandhom jissodisfaw il-kundizzjonijiet kollha fit-test sħiħ ta' din is-sejħa għal proposti u jintbagħtu bl-użu tal-formola pprovduta għal dan l-għan.