12.2.2008 |
MT |
Il-Ġurnal Uffiċjali ta’ l-Unjoni Ewropea |
C 38/8 |
SEJĦA GĦAL PROPOSTI — EACEA/31/07
“Żgħażagħ fid-dinja”: kooperazzjoni ma' pajjiżi li mhux dawk li jinsabu fil-viċinat ta' l-Unjoni Ewropea
Programm “Żgħażagħ fl-Azzjoni”
(2008/C 38/06)
1. Objettivi u deskrizzjoni
Din is-sejħa għandha l-objettiv sabiex tappoġġa proġetti li jippromwovu l-kooperazzjoni fil-qasam taż-żgħażagħ bejn pajjiżi tal-Programm u pajjiżi msieħba li ma jkunux dawk li jinsabu fil-viċinat ta' l-Unjoni Ewropea u timmira sabiex:
— |
jiġi promoss l-iskambju ta' esperjenzi u ta' prattiki tajbin fil-qasam taż-żgħażagħ u ta' l-edukazzjoni mhux formali, |
— |
isir kontribut għall-iżvilupp fil-politika taż-żgħażagħ, tax-xogħol fis-settur taż-żgħażagħ u tal-volontarjat, kif ukoll tat-tisħiħ tal-kapaċitajiet ta' l-organizzazzjonijiet/strutturi taż-żgħażagħ u tal-kompentenzi ta' qafas, |
— |
żvilupp ta' sħubiji u kuntatti soda li jibqgħu fiż-żmien fost l-organizzazzjonijiet taż-żgħażagħ. |
Il-proġetti għandhom jittrattaw waħda minn dawn it-temi li ġejjin:
(1) |
Tisħiħ tas-soċjetà ċivili, taċ-ċittadinanza u tad-demokrazija |
(2) |
Ġlieda kontra r-razziżmu u l-ksenofobija |
(3) |
Djalogu bejn gruppi etniċi u reliġjużi |
(4) |
Riżoluzzjoni wara l-kunflitti u rikostruzzjoni |
(5) |
Rwol attiv tal-mara fis-soċjetà |
(6) |
Drittijiet tal-minoranzi. |
Id-destinatarji ta' din il-kooperazzjoni huma l-persuni li jaħdmu fis-settur taż-żgħażagħ, l-animaturi u persuni oħrajn responsabbli minn dawn l-attivitajiet, kif ukoll atturi oħrajn involuti fl-organizzazzjonijiet u strutturi taż-żgħażagħ u kkonċernati fit-twettiq tal-proġetti li jippromwovu l-kooperazzjoni f'dan il-qasam.
Din is-sejħa tirrigwarda l-azzjoni 3.2 tal-programm “Żgħażagħ fl-Azzjoni”.
L-Aġenzija Eżekuttiva għall-Edukazzjoni, l-Awdjoviżiv u l-Kultura hija responsabbli għall-implimentazzjoni ta' din is-sejħa għal proposti.
2. Kandidati eliġibbli
Il-proposti għandhom jiġu ppreżentati minn organizzazzjonijiet jew assoċjazzjonijiet li ma jaħdmux għal profitt, organizzazzjonijiet mhux governamentali jew entitajiet lokali u reġjonali. Huma eliġibbli biss l-applikazzjonijiet ta' l-applikanti legalment stabbiliti f'wieħed mill-Pajjiżi tal-Programm.
Il-Pajjiżi tal-Programm huma dawn:
— |
l-Istati Membri ta' l-Unjoni Ewropea (1): l-Awstrija, il-Belġju, il-Bulgarija, Ċipru, id-Danimarka, l-Estonja, il-Finlandja, Franza, il-Ġermanja, il-Greċja, l-Irlanda, l-Italja, il-Latvja, il-Litwanja, il-Lussemburgu, Malta, l-Olanda, il-Polonja, il-Portugall, ir-Renju Unit, ir-Repubblika Ċeka, ir-Rumanija, is-Slovakkja, is-Slovenja, Spanja, l-Ungerija u l-Iżvezja; |
— |
l-Istati ta' l-Assoċjazzjoni Ewropea tal-Kummerċ Ħieles (EFTA) li jagħmlu parti mill-ftehim dwar iż-Żona Ekonomika Ewropea (ŻEE): l-Iżlanda, il-Liechtenstein u n-Norveġja); |
— |
il-pajjiżi kandidati li jibbenefikaw minn strateġija ta' qabel l-adeżjoni, b'mod konformi mal-prinċipji ġenerali, il-kondizzjonijiet u l-proċeduri ġenerali stabbiliti fil-ftehimiet ta' qafas konklużi ma' dawn il-pajjiżi għall-finijiet tal-parteċipazzjoni tagħhom fil-programmi Komunitarji: it-Turkija. |
Il-proġetti għandhom jinvolvu organizzazzjonijiet imsieħba minn ta' mill-inqas erba' pajjiżi differenti (inkluż l-applikant), li jkollhom ta' mill-inqas żewġ Pajjiżi tal-Programm u mill-inqas Stat Membru wieħed ta' l-Unjoni Ewropea u żewġ Pajjiżi Msieħba.
3. Baġit u tul ta' żmien tal-proġetti
Il-baġit totali allokat għall-kofinanzjament tal-proġetti fil-qafas ta' din is-sejħa għal proposti huwa stmat li jkun ta' madwar EUR 2 500 000.
L-għajnuna finanzjarja ta' l-Aġenzija ma tistax taqbeż it-80 % tat-total ta' l-ispejjeż eliġibbli. L-ammont tas-sussidju mogħti għal kull proġett ma jistax jaqbeż is-somma ta' EUR 100 000.
Il-proġetti għandhom imperattivament jibdew bejn l-1 ta' Novembru 2008 u l-31 ta' Diċembru 2008. Il-proġetti għandhom ikunu għal perjodu minimu ta' 6 xhur u massimu ta' 12-il xahar.
4. Data ta' għeluq ta' l-applikazzjoni
L-applikazzjonijiet għandhom jintbagħtu lill-Aġenzija Eżekuttiva għall-Edukazzjoni, l-Awdjoviżiv u l-Kultura (EACEA) sa mhux iktar tard mill-15 ta' April 2008, it-timbru postali jitqies bħala prova.
5. Informazzjoni supplimentari
It-test komplut ta' din is-sejħa għal proposti kif ukoll il-formoli ta' applikazzjonijiet jinsabu fuq is-sit ta' l-internet:
http://eacea.ec.europa.eu/youth/calls2008/action32/index_en.htm
L-applikazzjonijet għandhom jirrispettaw ir-rekwiżiti fformulati fit-test sħiħ ta' din is-sejħa għal proposti u għandhom jiġu ppreżentati bil-formola apposta għal dan il-għan.
(1) Il-persuni tal-pajjiżi u t-territorji extra-Ewropej u, jekk ikun il-każ, l-istituzzjonijiet pubbliċi jew privati li stabbilixxew ruħhom hemm, huma eliġibbli fil-qafas tal-Programm “Żgħażagħ fl-Azzjoni”, skond ir-regoli tal-programm u dawk li japplikaw fl-Istat Membru li miegħu huma marbutin. Il-lista ta' dawn il-pajjiżi u territorji extra-Ewropej tinsab fl-Anness 1A tad-Deċiżjoni tal-Kunsill 2001/822/KE tas-27 ta' Novembru 2001 dwar l-assoċjazzjoni tal-pajjiżi u territorji barranin mal-Komunità Ewropea (“Overseas Association Decision”), ĠU L 314, 30.11.2001, p. 1).