10.11.2007   

MT

Il-Ġurnal Uffiċjali ta’ l-Unjoni Ewropea

C 269/7

Sentenza tal-Qorti tal-Ġustizzja (Ir-Raba' Awla) ta' l-20 ta' Settembru 2007 — Il-Kummissjoni tal-Komunitajiet Ewropej vs Ir-Repubblika ta' l-Italja

(Kawża C-304/05) (1)

(Nuqqas ta' Stat li jwettaq obbligu - Direttiva 92/43/KEE - Konservazzjoni tal-habitat naturali u tal-fawna u l-flora selvaġġa - Direttiva 79/409/KEE - Konservazzjoni ta' l-għasafar selvaġġi - Evalwazzjoni ta' l-impatt fuq l-ambjent ta' xogħol ta' modifikazzjoni ta' pisti ta' l-iskijing)

(2007/C 269/13)

Lingwa tal-kawża: It-Taljan

Partijiet

Rikorrenti: Il-Kummissjoni tal-Komunitajiet Ewropej (rappreżentanti: M. van Beek u D. Recchia, aġenti)

Konvenuta: Ir-Repubblika ta' l-Italja (rappreżentanti: I. M. Braguglia u G. Fiengo, aġenti)

Suġġett

Nuqqas ta' Stat li jwettaq obbligu — Ksur ta' l-Artikolu 6(2) sa (4), flimkien ma' l-Artikolu 7 tad-Direttiva tal-Kunsill 92/43/KEE tal-21 ta' Mejju 1992 dwar il-konservazzjoni tal-habitat naturali u tal-fawna u l-flora selvaġġa (ĠU L 206, p. 7) — Ksur ta' l-Artikolu 4(1) u (2) tad-Direttiva tal-Kunsill 79/409/KEE, tat-2 ta' April 1979 dwar il-konservazzjoni ta' l-għasafar selvaġġi (ĠU L 103, p. 1) — Tkabbir taż-żona ta' l-iskijing ta' Santa Caterina Valfurva li tinsab fil-park nazzjonali ta' Stelvio (żona ta' protezzjoni speċjali IT 2040044) mingħajr ma ssir evalwazzjoni ta' l-impatt tal-proġett fuq l-ambjent — Nuqqas li jittieħdu l-miżuri sabiex jiġu evitati t-tfixkil u d-deterjorazzjoni tal-habitat ta' l-ispeċi li għalihom iż-żona ta' protezzjoni speċjali ġiet indikata.

Dispożittiv

1)

—

Billi awtorizzat miżuri li jista' jkollhom impatt sinjifikanti fuq iż-żona ta' protezzjoni speċjali IT 2040044, Parco Nazionale dello Stelvio, mingħajr ma ssuġġettathom għal evalwazzjoni xierqa ta' l-impatt tagħhom fir-rigward ta' l-għanijiet ta' konservazzjoni ta' l-imsemmija żona;

—

billi awtorizzat miżuri bħal dawn, mingħajr ma ġew osservati d-dispożizzjonijiet li ma jippermettux li jitwettaq proġett, f'każ ta' konklużjonijiet negattivi ta' l-evalwazzjoni ta' l-impatt u fin-nuqqas ta' soluzzjonijiet oħrajn, ħlief jekk ikun hemm raġunijiet obbligatorji ta' interess pubbliku akbar, u biss wara li tkun ġiet adottata u nnotifikata lill-Kummissjoni kull miżura ta' kumpens meħtieġa biex tiġi ggarantita l-protezzjoni tal-koerenza globali ta' Natura 2000, u

—

billi naqset milli tadotta miżuri sabiex jiġi evitat id-deterjorament tal-habitat naturali u tal-habitat ta' l-ispeċi kif ukoll it-tfixkil li jaffettwa l-ispeċi li għalihom din iż-żona ta' protezzjoni speċjali IT 2040044, Parco Nazionale dello Stelvio, ġiet indikata,

ir-Repubblika Taljana naqset mill-obbligi li hija għandha skond l-Artikolu 6(2) sa (4) tad-Direttiva tal-Kunsill 92/43/KEE tal-21 ta' Mejju 1992 dwar il-konservazzjoni tal-habitat naturali u tal-fawna u l-flora selvaġġa, flimkien ma' l-Artikolu 7 ta' din id-Direttiva kif ukoll skond l-Artikolu 4(1) u (2) tad-Direttiva 79/409/KEE tal-Kunsill tat-2 ta' April 1979 dwar il-Konservazzjoni ta' l-Għasafar Selvaġġi.

2)

Il-bqija tar-rikors huwa miċħud.

3)

Ir-Repubblika Taljana hija kkundannata tbati l-ispejjeż.

(1)  ĠU C 229, 17.9.2005.