Rikors ippreżentat fit-13 ta’ April 2023 – MegaFon vs Il-Kunsill

(Kawża T-193/23)

(2023/C 189/53)

Lingwa tal-kawża: il-Franċiż

Partijiet

Rikorrent: MegaFon OAO (Moska, ir-Russja) (rappreżentant: J. Grand d’Esnon, avukat)

Konvenut: Il-Kunsill tal-Unjoni Ewropea

Talbiet

Ir-rikorrenti titlob li l-Qorti Ġenerali jogħġobha:

—	tannulla r-Regolament tal-Kunsill (UE) Nru 2023/427 (1) tal-25 ta’ Frar 2023 fir-rigward ta’ MegaFon;

—	tannulla d-Deċiżjoni tal-Kunsill Nru 2023/434/PESK (2) tal-25 ta’ Frar 2023 fir-rigward ta’ MegaFon;

—

konsegwentement, tannulla:

—	l-Anness IV tar-Regolament (UE) Nru 833/2014 tal-31 ta’ Lulju 2014 fir-rigward ta’ MegaFon;

—	l-Anness IV tad-Deċiżjoni Nru 2014/512/PESK tal-31 ta’ Lulju 2014 fir-rigward ta’ MegaFon;

—	tikkundanna lill-Kunsill tal-Unjoni Ewropea għall-ispejjeż b’applikazzjoni tal-Artikolu 140(b) tar-Regoli tal-Proċedura tal-Qorti Ġenerali.

Motivi u argumenti prinċipali

Insostenn tar-rikors tagħha, ir-rikorrenti tinvoka erba’ motivi.

L-ewwel motiv ibbażat fuq il-ksur tad-drittijiet tad-difiża u tad-dritt għal protezzjoni ġudizzjarja effettiva. Ir-rikorrenti tqis li l-Kunsill ma kkomunikalhiex minn qabel id-deċiżjoni li tinkludi lil MegaFon fl-Anness IV tar-Regolament (UE) Nru 833/2014 u tad-Deċiżjoni 2014/512/PESK (iktar ’il quddiem l-“atti tal-31 ta’ Lulju 2014”) u ma tahiex il-possibbiltà li tippreżenta osservazzjonijiet, għalkemm huwa kien, skontha, obbligat jagħmel dan bis-saħħa tal-prinċipji marbuta mar-rispett tad-drittijiet tad-difiża.

2.	It-tieni motiv ibbażat fuq in-nuqqas ta’ motivazzjoni tad-deċiżjoni li MegaFon tiġi inkluża fl-Anness IV tal-atti tal-31 ta’ Lulju 2014. Ir-rikorrenti tikkritika lill-Kunsill li ma kkomunikalhiex il-motivi li jiġġustifikaw l-inklużjoni tagħha fl-Anness IV tal-atti tal-31 ta’ Lulju 2014.

3.	It-tielet motiv ibbażat fuq l-illegalità tas-sanzjonijiet imposti fuq ir-rikorrenti peress li dawn jirriżultaw minn żball ta’ evalwazzjoni, minħabba li r-raġunijiet insostenn ta’ dawn is-sanzjonijiet huma żbaljati u fi kwalunkwe każ ma humiex stabbiliti.

4.	Ir-raba’ motiv ibbażat fuq in-nuqqas ta’ osservanza tal-prinċipju ta’ proporzjonalità mill-atti tal-25 ta’ Frar 2023.

(1) Regolament tal-Kunsill (UE) 2023/427 tal-25 ta’ Frar 2023 li jemenda r-Regolament (UE) Nru 833/2014 dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU 2023, L 591 I, p. 6, rettifika fil-ĠU 2023, L 68, p. 181).

(2) Deċiżjoni tal-Kunsill (PESK) 2023/434 tal-25 ta’ Frar 2023 li temenda d-Deċiżjoni 2014/512/PESK dwar miżuri restrittivi fid-dawl tal-azzjonijiet tar-Russja li jiddestabbilizzaw is-sitwazzjoni fl-Ukrajna (ĠU 2023, L 59 I, p. 593).