2.5.2023 |
MT |
Il-Ġurnal Uffiċjali tal-Unjoni Ewropea |
C 155/67 |
Rikors ippreżentat fit-3 ta’ Marzu 2023 – UZ vs Il-Kummissjoni u ECHA
(Kawża T-121/23)
(2023/C 155/84)
Lingwa tal-kawża: l-Ingliż
Partijiet
Rikorrent: UZ (rappreżentanti: H. Estreicher, A. Bartl u M. Escorneboueu, avukati)
Konvenuti: Il-Kummissjoni Ewropea u l-Aġenzija Ewropea għas-Sustanzi Kimiċi (ECHA)
Talbiet
Ir-rikorrent jitlob li l-Qorti Ġenerali jogħġobha:
— |
tiddikjara r-rikors ammissibbli u fondat; |
— |
tannulla d-deċiżjoni tal-Kummissjoni Ewropea (grow.f.1(2022)9602146) tal-21 ta’ Diċembru 2022, u r-rapport anness tal-ECHA, dwar iċ-ċaħda tat-talba ta’ Concawe, li qed taġixxi f’isem il-membri tagħha (inkluż ir-rikorrent), sabiex tikkunsidra mill-ġdid l-elenkar tas-sustanza fenantren bħala sustanza ta’ tħassib serju ħafna; |
— |
tikkundanna lill-konvenuti għall-ispejjeż. |
Motivi u argumenti prinċipali
Insostenn tar-rikors tiegħu, ir-rikorrent jinvoka żewġ motivi.
1. |
L-ewwel motiv ibbażat fuq l-allegazzjoni li l-Kummissjoni Ewropea wettqet żball manifest ta’ evalwazzjoni meta ma tatx lill-ECHA mandat sabiex tipprepara fajl għall-evalwazzjoni mill-ġdid tal-elenkar tal-fenantren fil-Lista ta’ Kandidati minkejja l-fatt li kemm in-natura tal-informazzjoni l-ġdida u r-rapport tal-ECHA indikaw li l-informazzjoni l-ġdida kienet rilevanti għall-evalwazzjoni mill-ġdid. |
2. |
It-tieni motiv ibbażat fuq l-allegazzjoni li l-konvenuti aġixxew ultra vires u/jew bi ksur tal-Artikolu 59 REACH billi wettqu evalwazzjoni ġdida tat-tneħħija tal-fenantren mil-lista, minflok ma llimitaw l-evalwazzjoni tagħhom għall-kwistjoni ta’ jekk l-informazzjoni l-ġdida hijiex affidabbli u rrilevanti għall-evalwazzjoni mill-ġdid. |