Digriet tal-President tal-Qorti Ġenerali tal-24 ta’ Lulju 2023 – Zaklady Farmaceutyczne Polpharma vs Il-Kummissjoni

(Kawża T-258/23 R)

(“Proċeduri għal miżuri proviżorji - Prodotti mediċinali għall-użu mill-bniedem - Awtorizzazzjoni għat-tqegħid fis-suq - Talba għal miżuri proviżorji - Talba għal tneħħija - Nuqqas ta’ urġenza)

(2023/C 338/37)

Lingwa tal-kawża: l-Ingliż

Partijiet

Rikorrent: Zaklady Farmaceutyczne Polpharma S.A. (Starogard Gdański, il-Polonja) (rappreżentanti: K. Roox, T. De Meese, J. Stuyck u C. Dumont, avukati)

Konvenut: Il-Kummissjoni Ewropea (rappreżentanti: E. Mathieu, L. Haasbeek u A. Spina, aġenti)

Suġġett

Permezz tat-talba tagħha bbażata fuq l-Artikoli 278 u 279 TFUE, ir-rikorrenti titlob essenzjalment, minn naħa, is-sospensjoni tal-eżekuzzjoni tad-Deċiżjoni ta’ Implimentazzjoni tal-Kummissjoni C(2023) 3067(final) tat-2 ta’ Mejju 2023 li temenda d-Deċiżjoni ta’ Implimentazzjoni tal-Kummissjoni C(2014) 601(final), tat-30 ta’ Jannar 2014 li tirrigwarda l-awtorizzazzjoni għat-tqegħid fis-suq (iktar ’il quddiem l-“AMM”) tal-prodott mediċinali għall-użu mill-bniedem “Tecfidera – dimethyl fumarate” skont ir-Regolament (KE) Nru 726/2004 tal-Parlament Ewropew u tal-Kunsill tal-31 ta’ Marzu 2004 li jistabbilixxi proċeduri [tal-Unjoni] għall-awtorizzazzjoni u s-sorveljanza ta’ prodotti mediċinali għall-użu mill-bniedem u veterinarju u li jistabbilixxi l-Aġenzija Ewropea għall-Mediċini (ĠU Edizzjoni Speċjali bil-Malti, Kapitolu 13 Vol. 34, p. 229 u rettifika ĠU 2023, L 92, p. 31], kif emendat, kif ukoll kull deċiżjoni oħra sussegwenti sa fejn din testendi u/jew tissostitwixxi l-imsemmija deċiżjoni, sa fejn dawn jikkonċernaw lir-rikorrenti u, min-naħa l-oħra, ordni lill-Kummissjoni Ewropea intiża li din tastjeni milli tieħu kull miżura oħra li tkun ekwivalenti għal irtirar tal-AMM li minnha hija tibbenefika jew għal projbizzjoni li tqiegħed fis-suq il-prodotti ġeneriċi tad-Dimethyl fumarate.

Dispożittiv

1)	It-talba għal miżuri proviżorji hija miċħuda.

2)	Ma hemmx iktar lok li tingħata deċiżjoni fuq it-talbiet għal intervent imressqa mill-Biogen Netherlands BV u Biogaran SAS kif ukoll fuq it-talbiet għal trattament kunfidenzjali ta’ Zaklady Farmaceutyczne Polpharma S.A.

3)	L-ispejjeż fir-rigward tal-proċeduri għal miżuri proviżorji huma rriżervati.

4)	Kull parti għandha tbati l-ispejjeż tagħha stess fir-rigward tat-talbiet għal intervent ta’ Biogen Netherlands u Biogaran.