Rikors ippreżentat fid-29 ta’ Lulju 2022 – Il-Kummissjoni Ewropea vs Ir-Renju Unit tal-Gran Brittanja u l-Irlanda ta’ Fuq

(Kawża C-516/22)

(2022/C 398/18)

Lingwa tal-kawża: l-Ingliż

Partijiet

Rikorrent: Il-Kummissjoni Ewropea (rappreżentanti: L. Armati, P.-J. Loewenthal, T. Maxian Rusche, aġenti)

Konvenut: Ir-Renju Unit tal-Gran Brittanja u l-Irlanda ta’ Fuq

Ir-rikorrenti titlob li l-Qorti tal-Ġustizzja jogħġobha:

—

tiddikjara li, billi awtorizza l-infurzar tad-deċiżjoni ta’ arbitraġġ mogħtija fil-Każ ICSID Nru ARB/05/20, ir-Renju Unit naqas milli wettaq l-obbligi tiegħu taħt: — l-Artikolu 4(3) TUE moqri flimkien mal-Artikolu 127(1) tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (1), (iktar ’il quddem il-“Ftehim dwar il-Ħruġ”), billi ta deċiżjoni dwar l-interpretazzjoni tal-ewwel paragrafu tal-Artikolu 351 TFUE u l-applikazzjoni tiegħu għall-implimentazzjoni tad-deċiżjoni ta’ arbitraġġ filwaqt li l-istess kwistjoni kienet ġiet deċiża minn deċiżjonijiet eżistenti tal-Kummissjoni u kienet qed tistenna deċiżjoni quddiem il-qrati tal-Unjoni; — l-ewwel paragrafu tal-Artikolu 351 TFUE moqri flimkien mal-Artikolu 127(1) tal-Ftehim dwar il-Ħruġ, billi interpreta u applika b’mod żbaljat il-kunċetti ta’ “drittijiet […] ta’ wieħed jew diversi Stati terzi” u ta’ “milquta mit-Trattati”. — id-dispożizzjonijiet tal-punti (a) u (b) tal-paragrafu 1, kif ukoll tal-paragrafu 3 tal-Artikolu 267 TFUE, moqri flimkien mal-Artikolu 127(1) tal-Ftehim dwar il-Ħruġ, billi naqas milli jressaq domanda dwar il-kwistjoni tal-validità tad-deċiżjoni tal-Kummissjoni tas-26 ta’ Mejju 2014 li tipprojbixxi lir-Rumanija milli timplimenta d-deċiżjoni ta’ arbitraġġ (iktar ’il quddiem l-“ordni għal sospensjoni tal-2014”) kif ukoll dwar id-deċiżjoni tal-Kummissjoni tal-1 ta’ Ottubru 2014 li tiftaħ il-proċedura ta’ investigazzjoni formali fir-rigward l-implimentazzjoni mir-Rumanija tad-deċiżjoni ta’ arbitraġġ (2) (iktar ’il quddiem id-“deċiżjoni ta’ ftuħ tal-2014” u billi astjena, bħala qorti tal-aħħar istanza, li jressaq domanda dwar l-interpretazzjoni tad-dritt tal-Unjoni li la kien acte clair u lanqas acte éclairé; — l-Artikolu 108(3) TFUE moqri flimkien mal-Artikolu 127(1) tal-Ftehim dwar il-Ħruġ, billi ordna lir-Rumanija tisker l-obbligi tagħha tad-dritt tal-Unjoni li jirriżultaw mill-ordni għal sospensjoni tal-2014 u mid-deċiżjoni ta’ ftuħ tal-2014; — tikkundanna lir-Renju Unit tal-Gran Brittanja u l-Irlanda ta’ fuq għall-ispejjeż.

Motivi u argumenti prinċipali

Permezz ta’ sentenza tad-19 ta’ Frar 2020 fil-kawża Micula vs Ir-Rumanija, is-Supreme Court of the United Kingdom (il-Qorti Suprema tar-Renju Unit) ordnat l-implimentazzjoni tad-deċiżjoni ta’ arbitraġġ mogħtija, matul is-sena 2013, kontra r-Rumanija favur ċerti investituri Svediżi għall-ksur minn dan l-Istat ta’ trattat bilaterali ta’ investiment konkluż bejn ir-Renju tal-Isveza u r-Rumanija.

Il-Kummissjoni kienet preċedentement ikkonkludiet li l-implimentazzjoni tad-deċiżjoni ta’ arbitraġġ kienet tikkostitwixxi għajnuna mill-Istat illegali u inkompatibbli mogħtija mir-Rumanija favur dawn l-investituri. Minn dak iż-żmien, il-Qorti tal-Ġustizzja ddeċidiet li dan l-għoti kien jisker ir-regoli u l-prinċipji fundamentali tad-dritt tal-Unjoni, b’mod partikolari l-Artikoli 267 u 344 TFUE, il-prinċipji ġenerali ta’ awtonomija u ta’ fiduċja reċiproka, kif ukoll il-funzjonament tal-istituzzjonijiet tal-Unjoni konformement mal-qafas kostituzzjonali tal-Unjoni.

Billi bbażat ruħha fuq l-ewwel paragrafu tal-Artikolu 351 TFUE, is-Supreme Court (il-Qorti Suprema) kkonkludiet li d-deċiżjoni ta’ arbitraġġ kellha tiġi implimentata mir-Renju Unit, u dan minkejja l-fatt li din l-implimentazzjoni kienet tmur kontra d-dritt tal-Unjoni. Billi għamel dan, ir-Renju Unit kiser l-Artikolu 4(3) TUE, l-Artikolu 108(3), l-Artikolu 267(1)(a) u (b), l-Artikolu 267(3) kif ukoll l-ewwel paragrafu tal-Artikolu 351 TFUE, moqrija flimkien mal-Artikolu 127(1) tal-Ftehim dwar il-Ħruġ.

---

(1)  ĠU 2020, L 29, p. 7.

(2)  Għajnuna mill-Istat – Ir-Rumanija — Għajnuna mill-Istat SA.38517 (2014/C) (ex 2014/NN) — L-implimentazzjoni ta’ Deċiżjoni b’Arbitraġġ Micula vs Ir-Rumanija tal-11 ta’ Diċembru 2013 — Stedina biex jitressqu kummenti skont l-Artikolu 108(2) tat-Trattat dwar il-Funzjonament tal-Unjoni Ewropea (ĠU 2014, C 393, p. 27).