—

tannulla d-deċiżjoni tad-Direttur tal-konvenuta li tirrifjuta li tagħtih eċċezzjoni skont l-Artikolu 12(2)(a) tar-Regolament Nru 31 (KEE)/11 (KEEA), li jistabbilixxi r-Regolamenti tal-Persunal tal-Uffiċjali u l-Kundizzjonijiet tal-Impjieg ta’ Aġenti Oħra tal-Komunità Ekonomika Ewropea u tal-Komunità Ewropea tal-Enerġija Atomika (1) u li ttemm, konsegwentement, il-kuntratt tar-rikorrent taħt l-Artikolu 47(c)(ii) tal-Kondizzjonijiet tal-Impjieg ta’ Aġenti Oħra;

—

jekk hemm bżonn, tannulla d-deċiżjoni tad-Direttur tal-konvenuta li tiċħad l-ilment taħt l-Artikolu 90(2) tar-Regolamenti tal-Persunal dirett mir-rikorrent kontra d-deċiżjoni msemmija iktar ’il fuq;

—

tordna l-kumpens għad-danni morali tar-rikorrent stmati ex aequo et bono għal EUR 50 000;

—

tordna, bħala miżura ta’ investigazzjoni skont l-Artikolu 91 tar-Regoli tal-Proċedura, il-preżentazzjoni mill-konvenuta tal-informazzjoni relatata mal-esperjenza tal-Uffiċjal Kontabbli li ġie appuntat irreġistrata fir-rekords tal-Baġit Ibbażat fuq l-Attivitajiet tal-konvenuta; u

—

tikkundanna lill-konvenuta għall-ispejjeż.

1.

L-ewwel motiv, li jallega li l-konvenuta kisret id-dritt tas-smigħ tar-rikorrent għaliex id-deċiżjoni kkontestata ġiet adottata mingħajr ma r-rikorrent instema’ mid-Direttur wara r-rakkomandazzjoni negattiva tal-Kap tas-Servizz Legali tal-konvenuta.

2.

It-tieni motiv li jallega li l-konvenuta kisret il-prinċipju ta’ ċertezza legali. Ir-rikorrent jikkontesta li n-nota amministrattiva li tat bidu għall-proċess ta’ awtorizzazzjoni ta’ eċċezzjoni inħarġet mill-Kap tal-Korporazzjoni tal-konvenuta u għalhekk ma huwiex ċar jekk da nil-proċess kienx stabbilit minn awtorità kompetenti. Barra minn hekk, ma hemmx evidenza li d-Direttur tal-konvenuta approva n-nota amministrattiva. Huwa allegat ukoll li anki l-kriterji għall-evalwazzjoni tal-interess tas-servizz huma ċari fir-rigward ta’ jekk ġewx adottati minn awtorità kompetenti jew le.

3.

It-tielet motiv li jallega li l-konvenuta kisret il-prinċipju ta’ imparzjalità għaliex ir-rakkomandazzjoni tal-każ tar-rikorrent kienet saret mill-manager ġerarkiku preċedenti tar-rikorrent, li ma kienx f’pożizzjoni li jevalwa l-espressjoni ta’ interess tiegħu fid-dawl tal-kriterji rilevanti u li ma kienx imparzjali.

4.

Ir-raba’ motiv li jallega li l-konvenut wettaq wettaq żball manifest fl-evalwazzjoni tal-interess tas-servizz u fir-raġunament għad-deċiżjoni kkontestata. Barra minn hekk, huwa allegat li l-konvenuta kisret l-obbligu ta’ amministrazzjoni tajba tagħha u abbużat mis-setgħa tagħha.

5.

Il-ħames motiv li jallega li l-konvenuta kisret il-prinċipju ta’ amministrazzjoni tajba, l-obbligu ta’ premura tagħha kif ukoll l-Artikolu 41 tal-Karta u l-prinċipju ta’ ċertezza legali, għaliex ir-rikorrent, peress li huwa membru tal-persunal mir-Renju Unit, ma kellux kjarezza fir-rigward tal-pożizzjoni legali tiegħu mal-konvenuta għal madwar sentejn.

6.

Is-sitt motiv li jallega li d-deċiżjoni kkontestata toħloq diskriminazzjoni abbażi tas-saħħa tar-rikorrent.