SENTENZA TAL-QORTI ĠENERALI (It-Tmien Awla Estiża)
20 ta’ Diċembru 2023 ( *1 )
“Unjoni Ekonomika u Monetarja – Unjoni bankarja – Mekkaniżmu uniku ta’ riżoluzzjoni tal-istituzzjonijiet ta’ kreditu u ta’ ċerti impriżi ta’ investiment (SRM) – Fond Uniku ta’ Riżoluzzjoni (SRF) – Deċiżjoni tas-SRB dwar il-kalkolu tal-kontribuzzjonijiet ex ante għall‑2021 – Obbligu ta’ motivazzjoni – Prinċipju ta’ amministrazzjoni tajba – Prinċipju ta’ protezzjoni ġudizzjarja effettiva – Eċċezzjoni ta’ illegalità – Limitazzjoni ratione temporis tal-effetti tas-sentenza”
Fil-Kawża T‑383/21,
La Banque postale, stabbilita f’Pariġi (Franza), irrappreżentata minn A. Gosset-Grainville u M. Trabucchi, avukati,
rikorrenti,
vs
Il‑Bord Uniku ta’ Riżoluzzjoni (SRB), irrappreżentat minn J. Kerlin, C. De Falco u C. Flynn, bħala aġenti, assistiti minn H.‑G. Kamann, F. Louis, P. Gey u V. Del Pozo Espinosa de los Monteros, avukati,
konvenut,
sostnut minn
Il‑Parlament Ewropew, irrappreżentat minn J. Etienne, O. Denkov u M. Menegatti, bħala aġenti,
minn
Il‑Kunsill tal‑Unjoni Ewropea, irrappreżentat minn E. d’Ursel, A. Westerhof Löfflerová u J. Bauerschmidt, bħala aġenti,
u minn
Il‑Kummissjoni Ewropea, irrappreżentata minn D. Triantafyllou, A. Nijenhuis u A. Steiblytė, bħala aġenti,
intervenjenti,
IL-QORTI ĠENERALI (It-Tmien Awla Estiża),
komposta minn A. Kornezov, President, G. De Baere, D. Petrlík (Relatur), K. Kecsmár u S. Kingston, Imħallfin,
Reġistratur: S. Jund, Amministratriċi,
wara li rat il-fażi bil-miktub tal-proċedura,
wara s-seduta tal‑10 ta’ Marzu 2023,
tagħti l-preżenti
Sentenza
1 |
Permezz tar-rikors tagħha bbażat fuq l-Artikolu 263 TFUE, ir-rikorrenti, La Banque postale, titlob l-annullament tad-deċiżjoni SRB/ES/2021/22 tal-Bord Uniku ta’ Riżoluzzjoni (SRB) tal‑14 ta’ April 2021 dwar il-kalkolu tal-kontribuzzjonijiet ex ante għall‑2021 lill-Fond Uniku ta’ Riżoluzzjoni (iktar ’il quddiem id-“deċiżjoni kkontestata”), sa fejn din tikkonċernaha. |
I. Il‑fatti li wasslu għall‑kawża
2 |
Ir-rikorrenti hija istituzzjoni ta’ kreditu stabbilita fi Franza. |
3 |
Permezz tad-deċiżjoni kkontestata, is-SRB stabbilixxa, konformement mal-Artikolu 70(2) tar-Regolament (UE) Nru 806/2014 tal-Parlament Ewropew u tal-Kunsill tal‑15 ta’ Lulju 2014 li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta’ kreditu u ċerti ditti tal-investiment fil-qafas ta’ Mekkaniżmu Uniku ta’ Riżoluzzjoni u Fond Uniku għar-Riżoluzzjoni u li jemenda r-Regolament (UE) Nru 1093/2010 (ĠU 2014, L 225, p. 1), il-kontribuzzjonijiet ex ante għall-Fond Uniku ta’ Riżoluzzjoni (SRF) (iktar ’il quddiem il-“kontribuzzjonijiet ex ante”), għall‑2021 (iktar ’il quddiem il-“perijodu ta’ kontribuzzjoni 2021”), tal-istituzzjonijiet li jaqgħu taħt id-dispożizzjonijiet meħuda flimkien tal-Artikolu 2 u tal-Artikolu 67(4) ta’ dan ir-regolament (iktar ’il quddiem l-“istituzzjonijiet”), fosthom ir-rikorrenti. |
4 |
Permezz ta’ avviż għall-ħlas tat‑28 ta’ April 2021, l-Autorité de contrôle prudentiel et de résolution (ACPR) (l-Awtorità ta’ Sorveljanza Prudenzjali u ta’ Riżoluzzjoni, Franza), fil-kwalità tagħha ta’ awtorità nazzjonali ta’ riżoluzzjoni fis-sens tal-punt 3 tal-Artikolu 3(1) tar-Regolament Nru 806/2014, ordnat lir-rikorrenti tħallas il-kontribuzzjoni ex ante tagħha għall-perijodu ta’ kontribuzzjoni 2021, kif kien ġie stabbilit mis-SRB. |
II. Id‑deċiżjoni kkontestata
5 |
Id-deċiżjoni kkontestata tinkludi parti prinċipali li hija akkumpanjata minn tliet annessi. |
6 |
Il-parti prinċipali tad-deċiżjoni kkontestata tiddeskrivi l-proċess ta’ determinazzjoni tal-kontribuzzjonijiet ex ante għall-perijodu ta’ kontribuzzjoni 2021, li huwa applikabbli għall-istituzzjonijiet kollha. |
7 |
B’mod iktar partikolari, fit-Taqsima 5 tal-imsemmija deċiżjoni, is-SRB iddetermina l-livell annwali fil-mira, imsemmi fl-Artikolu 4 tar-Regolament ta’ Implimentazzjoni tal-Kunsill (UE) 2015/81 tad‑19 ta’ Diċembru 2014 li jispeċifika kundizzjonijiet uniformi għall-applikazzjoni tar-Regolament (UE) Nru 806/2014 tal-Parlament Ewropew u tal-Kunsill fir-rigward tal-kontribuzzjonijiet ex ante għall-Fond Uniku ta’ Riżoluzzjoni (ĠU 2015, L 15, p. 1), għall-perijodu ta’ kontribuzzjoni 2021 (iktar ’il quddiem il-“livell annwali fil-mira”). |
8 |
Is-SRB spjega li huwa kien stabbilixxa dan il-livell annwali fil-mira għal wieħed minn tmienja ta’ 1.35 % tal-ammont medju tad-depożiti koperti, ikkalkolat fuq bażi trimestrali, tal-istituzzjonijiet kollha fl‑2020 (iktar ’il quddiem l-“ammont medju tad-depożiti koperti fl‑2020”), kif kien inkiseb abbażi tad-data kkomunikata mill-iskemi ta’ garanzija għal depożiti konformement mal-Artikolu 16 tar-Regolament Delegat tal-Kummissjoni (UE) 2015/63 tal‑21 ta’ Ottubru 2014 li jissupplimenta d-Direttiva 2014/59/UE tal-Parlament Ewropew u l-Kunsill fir-rigward tal-kontribuzzjonijiet ex ante għall-arranġamenti ta’ finanzjament ta’ riżoluzzjoni (ĠU 2015, L 11, p. 44, rettifika fil-ĠU 2017, L 156, p. 38). |
9 |
Fit-Taqsima 6 tad-deċiżjoni kkontestata, is-SRB iddeskriva l-metodu li għandu jiġi segwit għall-kalkolu tal-kontribuzzjonijiet ex ante għall-perijodu ta’ kontribuzzjoni 2021. F’dan ir-rigward, huwa ppreċiża, fil-premessa 59 tal-imsemmija deċiżjoni, li, għal dan il-perijodu, 13.33 % tal-kontribuzzjonijiet ex ante kienu ġew ikkalkolati fuq “bażi nazzjonali”, jiġifieri abbażi tad-data kkomunikata minn istituzzjonijiet awtorizzati fit-territorju tal-Istat Membru parteċipanti kkonċernat (iktar ’il quddiem il-“bażi nazzjonali”), konformement mal-Artikolu 103 tad-Direttiva 2014/59/UE tal-Parlament Ewropew u tal-Kunsill tal‑15 ta’ Mejju 2014 li tistabbilixxi qafas għall-irkupru u r-riżoluzzjoni ta’ istituzzjonijiet ta’ kreditu u ditti ta’ investiment u li temenda d-Direttiva tal-Kunsill 82/891/KE u d-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE, 2011/35/KE, 2012/30/UE u 2013/36/UE, u r-Regolamenti (UE) Nru 1093/2010 u (UE) Nru 648/2012, tal-Parlament Ewropew u tal-Kunsill (ĠU 2014, L 173, p. 190), u konformement mal-Artikolu 4 tar-Regolament Delegat 2015/63. Il-bqija tal-kontribuzzjonijiet ex ante (jiġifieri 86.67 %) ġew ikkalkolati abbażi tal-“bażi tal-unjoni bankarja”, jiġifieri abbażi tad-data kkomunikata mill-istituzzjonijiet kollha awtorizzati fit-territorju tal-Istati Membri kollha li jipparteċipaw fil-Mekkaniżmu Uniku ta’ Riżoluzzjoni (SRM) (iktar ’il quddiem il-“bażi tal-unjoni” u l-“Istati Membri parteċipanti”), konformement mal-Artikoli 69 u 70 tar-Regolament Nru 806/2014 u mal-Artikolu 4 tar-Regolament ta’ Implimentazzjoni 2015/81. |
10 |
Sussegwentement, is-SRB ikkalkola l-kontribuzzjonijiet ex ante tal-istituzzjonijiet, bħar-rikorrenti, billi segwa l-fażijiet prinċipali li ġejjin. |
11 |
Fl-ewwel fażi, is-SRB ikkalkola, konformement mal-punt (a) tat-tieni subparagrafu tal-Artikolu 70(2) tar-Regolament Nru 806/2014, il-kontribuzzjoni annwali bażika ta’ kull istituzzjoni, li hija proporzjonali għall-ammont tal-obbligazzjonijiet tal-istituzzjoni kkonċernata, minbarra l-fondi proprji u d-depożiti koperti, fir-rigward tat-total tal-obbligazzjonijiet, minbarra l-fondi proprji u d-depożiti koperti, tal-istituzzjonijiet kollha awtorizzati fit-territorju tal-Istati Membri parteċipanti kollha. Konformement mal-Artikolu 5(1) tar-Regolament Delegat 2015/63, is-SRB naqqas ċerti tipi ta’ obbligazzjonijiet mill-obbligazzjonijiet totali tal-istituzzjoni li għandhom jittieħdu inkunsiderazzjoni għad-determinazzjoni ta’ din il-kontribuzzjoni. |
12 |
Fit-tieni fażi tal-kalkolu tal-kontribuzzjoni ex ante, is-SRB wettaq aġġustament tal-kontribuzzjoni annwali bażika skont il-profil tar-riskju tal-istituzzjoni kkonċernata, konformement mal-punt (b) tat-tieni subparagrafu tal-Artikolu 70(2) tar-Regolament Nru 806/2014. Huwa evalwa dan il-profil tar-riskju abbażi tal-erba’ pilastri tar-riskju msemmija fl-Artikolu 6 tar-Regolament Delegat 2015/63, li huma komposti minn indikaturi tar-riskju. Sabiex jikklassifika l-istituzzjonijiet skont il-livell tar-riskju tagħhom, qabel kollox, is-SRB stabbilixxa – għal kull indikatur ta’ riskju applikat għall-perijodu ta’ kontribuzzjoni 2021 – intervalli (bins) li fihom ġew ikklassifikati l-istituzzjonijiet, konformement mal-Anness I, taħt il-punt 3 tat-titolu “Pass 2”, ta’ dan ir-regolament delegat. L-istituzzjonijiet li jagħmlu parti mill-istess intervall ingħataw valur komuni għall-indikatur tar-riskju partikolari, imsejjaħ “valur diskretizzat”. Billi għaqqad il-valuri diskretizzati għal kull indikatur tar-riskju, is-SRB ikkalkola l-“multiplikatur tal-aġġustament tar-riskju” tal-istituzzjoni kkonċernata (iktar ’il quddiem il-“multiplikatur tal-aġġustament”). Billi mmultiplika l-kontribuzzjoni annwali bażika ta’ din l-istituzzjoni bil-multiplikatur tal-aġġustament tagħha, is-SRB kiseb il-“kontribuzzjoni annwali bażika aġġustata skont il-profil tar-riskju” tal-imsemmija istituzzjoni. |
13 |
Sussegwentement, is-SRB żied il-kontribuzzjonijiet annwali kollha bażiċi aġġustati skont il-profili tar-riskju sabiex jinkiseb “denominatur komuni” użat sabiex tiġi kkalkolata l-parti tal-livell annwali fil-mira li kull istituzzjoni kellha tħallas. |
14 |
Fl-aħħar nett, is-SRB ikkalkola l-kontribuzzjoni ex ante ta’ kull istituzzjoni billi qassmet il-livell annwali fil-mira bejn l-istituzzjonijiet kollha abbażi tal-proporzjon eżistenti bejn il-kontribuzzjoni annwali bażika aġġustata skont il-profil tar-riskju, minn naħa, u d-denominatur komuni, min-naħa l-oħra. |
15 |
L-Anness I tad-deċiżjoni kkontestata jinkludi skeda individwali għal kull istituzzjoni suġġetta għall-ħlas tal-kontribuzzjonijiet ex ante, inkluża r-rikorrenti, li tinkludi r-riżultati tal-kalkolu tal-kontribuzzjoni ex ante ta’ kull waħda minn dawn l-istituzzjonijiet (iktar ’il quddiem l-“iskeda individwali”). Kull waħda minn dawn l-iskedi tesponi l-ammont tal-kontribuzzjoni annwali bażika tal-istituzzjoni kkonċernata kif ukoll il-valur tal-multiplikatur tal-aġġustament tagħha, kemm fuq il-bażi tal-unjoni kif ukoll fuq il-bażi nazzjonali, billi ssemmi, għal kull indikatur tar-riskju, in-numru tal-intervall li għalih l-imsemmija istituzzjoni ġiet assenjata. Barra minn hekk, l-iskeda individwali tindika data li tintuża għall-kalkolu tal-kontribuzzjonijiet ex ante tal-istituzzjonijiet ikkonċernati kollha u li s-SRB iddetermina billi għaqqad flimkien jew għaqqad id-data individwali ta’ dawn l-istituzzjonijiet kollha. Fl-aħħar nett, din l-iskeda tinkludi d-data ddikjarata mill-istituzzjoni kkonċernata fil-formola ta’ dikjarazzjoni u użata fil-kalkolu tal-kontribuzzjoni ex ante tagħha. |
16 |
L-Anness II tad-deċiżjoni kkontestata jinkludi data statistika relatata mal-kalkolu tal-kontribuzzjonijiet ex ante għal kull Stat Membru parteċipanti, f’forma mqassra u aggregata. Dan l-anness jippreċiża, b’mod partikolari, l-ammont globali tal-kontribuzzjonijiet ex ante li għandhom jitħallsu mill-istituzzjonijiet ikkonċernati għal kull wieħed minn dawn l-Istati Membri. Barra minn hekk, l-imsemmi anness jelenka, għal kull indikatur tar-riskju, in-numru ta’ intervalli, in-numru ta’ istituzzjonijiet li jagħmlu parti minn kull intervall kif ukoll il-valuri minimi u massimi ta’ dawn l-intervalli. Fil-każ ta’ intervalli relatati mal-bażi nazzjonali, dawn il-valuri għandhom, għal raġunijiet ta’ kunfidenzjalità, jitnaqqsu jew jiżdiedu b’ammont aleatorju, filwaqt li jinżamm it-tqassim oriġinali tal-istituzzjonijiet. |
17 |
L-Anness III tad-deċiżjoni kkontestata, intitolat “Evalwazzjoni tal-kummenti sottomessi fil-kuntest tal-konsultazzjoni dwar il-kontribuzzjonijiet ex ante għall-Fond Uniku ta’ Riżoluzzjoni għall‑2021”, jeżamina l-osservazzjonijiet ippreżentati mill-istituzzjonijiet matul il-proċedura ta’ konsultazzjoni mwettqa mis-SRB bejn il‑5 u d‑19 ta’ Marzu 2021 bl-għan tal-adozzjoni tad-deċiżjoni kkontestata. |
III. It‑talbiet tal‑partijiet
18 |
Ir-rikorrenti titlob li l-Qorti Ġenerali jogħġobha:
|
19 |
Is-SRB jitlob li l-Qorti Ġenerali jogħġobha:
|
20 |
Il-Parlament Ewropew jitlob li l-Qorti Ġenerali jogħġobha:
|
21 |
Il-Kunsill tal-Unjoni Ewropea jitlob li l-Qorti tal-Ġustizzja jogħġobha tiċħad ir-rikors. |
22 |
Il-Kummissjoni Ewropea titlob lill-Qorti Ġenerali jogħġobha:
|
IV. Id‑dritt
23 |
Insostenn tar-rikors tagħha, ir-rikorrenti tqajjem tmien motivi, ibbażati, l-ewwel wieħed, fuq ksur tal-prinċipju ta’ ugwaljanza fit-trattament, it-tieni wieħed, fuq ksur tal-prinċipju ta’ proporzjonalità, it-tielet wieħed, fuq ksur tal-prinċipju ta’ ċertezza legali, ir-raba’ wieħed, fuq ksur tal-prinċipju ta’ amministrazzjoni tajba, il-ħames wieħed, fuq ksur tal-prinċipju ta’ protezzjoni ġudizzjarja effettiva, is-sitt wieħed, fuq ksur tal-obbligu ta’ motivazzjoni tad-deċiżjoni kkontestata fir-rigward tal-użu tal-IPI, is-seba’ wieħed, fuq żbalji manifesti ta’ evalwazzjoni tas-SRB fir-rigward tal-limitazzjoni tal-użu tal-IPI għal 15 % tal-ammont tal-kontribuzzjonijiet ex ante u l-limitazzjoni tal-garanziji għal flus kontanti biss u, it-tmien wieħed, fuq żball ta’ liġi fir-rigward tal-limitazzjoni tal-użu tal-IPI. |
24 |
Waqt is-seduta, ir-rikorrenti indikat li hija kienet qiegħda tirtira s-sitt motiv. |
A. Fuq l‑eċċezzjonijiet ta’ inammissibbiltà
25 |
L-ewwel ħames motivi jinkludu eċċezzjonijiet ta’ illegalità ta’ diversi dispożizzjonijiet tar-Regolament Nru 806/2014, tar-Regolament Delegat 2015/63 u tar-Regolament ta’ Implimentazzjoni 2015/81. |
26 |
Il-Kummissjoni tqis li l-eċċezzjonijiet ta’ illegalità li jsostnu l-ewwel tliet motivi għandhom jiġu miċħuda bħala inammissibbli. |
27 |
Is-SRB ma qajjem l-ebda eċċezzjoni ta’ inammissibbiltà f’din il-kawża. |
28 |
Issa, peress li l-Kummissjoni, bħala intervenjenti, għandha locus standi sabiex tqajjem eċċezzjonijiet ta’ inammissibbiltà biss sa fejn tali eċċezzjonijiet ta’ inammissibbiltà tqajmu mill-parti li hija ssostni (ara, f’dan is-sens u b’analoġija, is-sentenzi tal‑24 ta’ Marzu 1993, CIRFS et vs Il‑Kummissjoni, C‑313/90, EU:C:1993:111, punti 20 sa 22; tas‑17 ta’ Ġunju 1998, Svenska Journalistförbundet vs Il‑Kunsill, T‑174/95, EU:T:1998:127, punti 77 u 78, u tas‑7 ta’ Marzu 2013, Cindu Chemicals et vs ECHA, T‑95/10, EU:T:2013:108, punt 32), li ma huwiex il-każ hawnhekk, l-eċċezzjonijiet ta’ inammissibbiltà mqajma minnha huma inammissibbli. |
29 |
Madankollu, għandha tiġi eżaminata ex officio l-ammissibbiltà tal-eċċezzjonijiet ta’ illegalità mqajma mir-rikorrenti, peress li l-imsemmija eċċezzjonijiet ta’ inammissibbiltà huma ta’ ordni pubbliku. |
30 |
Skonthom, il-Kummissjoni tikkunsidra li r-rikorrenti ma turix l-eżistenza ta’ rabta ta’ konnessjoni bejn id-deċiżjoni kkontestata u d-dispożizzjonijiet ikkontestati u li hija ma għandhiex interess li tikseb dikjarazzjoni ta’ illegalità tad-dispożizzjonijiet ikkontestati. |
31 |
F’dan ir-rigward, minn naħa, mill-ġurisprudenza jirriżulta li eċċezzjoni ta’ illegalità, imqajma b’mod inċidentali bis-saħħa tal-Artikolu 277 TFUE fl-okkażjoni tal-kontestazzjoni fil-kawża prinċipali tal-legalità ta’ att terz, hija ammissibbli biss meta tkun teżisti rabta ta’ konnessjoni bejn dan l-att u r-regola li l-allegata illegalità tagħha hija eċċepita (sentenzi tat‑30 ta’ April 2019, Wattiau vs Il‑Parlament, T‑737/17, EU:T:2019:273, punt 56, u tas‑16 ta’ Ġunju 2021, Krajowa Izba Gospodarcza Chłodnictwa i Klimatyzacji vs Il‑Kummissjoni, T‑126/19, EU:T:2021:360, punt 33). |
32 |
F’dan il-każ, mid-deċiżjoni kkontestata jirriżulta li d-dispożizzjonijiet kollha li r-rikorrenti tinvoka l-illegalità tagħhom huma applikati f’dik id-deċiżjoni, jew sa fejn dawn id-dispożizzjonijiet jikkostitwixxu l-bażi tal-kontribuzzjonijiet ex ante mitluba mir-rikorrenti, bħalma huwa l-każ tal-Artikolu 70(1) u (2) tar-Regolament Nru 806/2014, jew sa fejn dawn jiddeterminaw il-parametri għall-kalkolu ta’ dawn il-kontribuzzjonijiet, bħalma huwa l-każ tal-Artikoli 6 u 7 kif ukoll tal-Anness I tar-Regolament Delegat 2015/63. Konsegwentement, kuntrarjament għal dak li ssostni l-Kummissjoni, teżisti rabta ġuridika diretta bejn id-deċiżjoni kkontestata u d-dispożizzjonijiet ikkontestati. |
33 |
Min-naħa l-oħra, huwa minnu li rikors għal annullament ippreżentat minn persuna fiżika jew ġuridika huwa ammissibbli biss sa fejn dik il-persuna jkollha interess li tara li l-att ikkontestat jiġi annullat. Tali interess jippreżumi li l-annullament ta’ dan l-att jista’ jkollu, minnu nnifsu, konsegwenzi ġuridiċi u li r-rikors b’hekk jista’, bl-eżitu tiegħu, jagħti benefiċċju lill-parti li tkun ippreżentatu. L-interess ġuridiku ta’ rikorrent għandu jkun reali u attwali. Ma jistax jikkonċerna sitwazzjoni futura u ipotetika (ara s-sentenza tal‑5 ta’ Mejju 2021, Pharmaceutical Works Polpharma vs EMA,T‑611/18, EU:T:2021:241, punti 139 u 141 u l-ġurisprudenza ċċitata). |
34 |
Madankollu, f’dan il-każ, id-dispożizzjonijiet kollha previsti mill-eċċezzjonijiet ta’ illegalità jew jikkostitwixxu l-bażi tal-kontribuzzjonijiet ex ante li ntalbu mingħand ir-rikorrenti għall‑2021, jew jiddeterminaw il-parametri tal-kalkolu ta’ dawn il-kontribuzzjonijiet, b’tali mod li r-rikorrenti għandha interess reali u attwali sabiex tikseb il-konstatazzjoni tal-illegalità tagħhom. Fil-fatt, fil-każ li r-rikorrenti tirbaħ il-kawża, tali kontribuzzjonijiet ma jkollhomx bażi legali. Konsegwentement, kuntrarjament għal dak li ssostni l-Kummissjoni, ir-rikorrenti għandha interess li tikseb dikjarazzjoni ta’ illegalità ta’ dawn id-dispożizzjonijiet. |
35 |
Konsegwentement, l-eċċezzjonijiet ta’ inammissibbiltà tal-Kummissjoni għandhom jiġu miċħuda. |
B. Fuq l‑eċċezzjonijiet ta’ illegalità tar‑Regolament Nru 806/2014, tar‑Regolament Delegat 2015/63, u tar‑Regolament ta’ Implimentazzjoni 2015/81
1. Fuq l‑ewwel motiv, ibbażat fuq il‑ksur tal‑prinċipju ta’ ugwaljanza fit‑trattament
36 |
Permezz tal-ewwel motiv tagħha, ir-rikorrenti ssostni li l-punti (a) u (b) tat-tieni subparagrafu tal-Artikolu 70(1) tar-Regolament Nru 806/2014 kif ukoll l-Artikoli 6 u 7 u l-Anness I tar-Regolament Delegat 2015/63 jiksru l-prinċipju ta’ ugwaljanza fit-trattament. L-argument insostenn ta’ dan il-motiv huwa maqsum f’erba’ partijiet, ibbażati, l-ewwel waħda, fuq l-assenza ta’ teħid inkunsiderazzjoni tad-differenzi fis-sitwazzjoni bejn l-istituzzjonijiet tal-unjoni bankarja, it-tieni waħda, fuq in-natura inġustifikata tal-esklużjoni tad-depożiti koperti mill-bażi ta’ kalkolu tal-kontribuzzjoni annwali bażika, it-tielet waħda, fuq in-natura inġustifikata tal-assenza ta’ tnaqqis tal-impenji eliġibbli u, ir-raba’ waħda, fuq in-natura mhux xierqa tal-kriterji ta’ aġġustament tal-kontribuzzjoni annwali bażika skont il-profil tar-riskju. |
37 |
Preliminarjament, għandu jiġi ppreċiżat li l-ebda waħda minn dawn il-partijiet ma tista’ tinftiehem fis-sens li r-rikorrenti ssostni, fir-realtà, li d-dispożizzjonijiet imsemmija iktar ’il fuq huma vvizzjati bi żball ta’ evalwazzjoni għar-raġunijiet imsemmija fil-punt 36 iktar ’il fuq. Waqt is-seduta, bi tweġiba għal mistoqsija tal-Qorti Ġenerali, ir-rikorrenti fil-fatt ikkonfermat li, permezz tal-ewwel motiv kollu, hija allegat biss il-ksur tal-prinċipju ta’ ugwaljanza fit-trattament, u mhux żball ta’ evalwazzjoni. |
38 |
Barra minn hekk, fir-rigward tal-ksur tal-prinċipju ta’ ugwaljanza fit-trattament, għandu jitfakkar li dan il-prinċipju, bħala prinċipju ġenerali tad-dritt tal-Unjoni, jeżiġi li sitwazzjonijiet komparabbli ma jiġux ittrattati b’mod differenti u li sitwazzjonijiet differenti ma jiġux ittrattati b’mod ugwali, sakemm tali trattament ma jkunx oġġettivament iġġustifikat (sentenza tat‑3 ta’ Frar 2021, Fussl Modestraße Mayr,C‑555/19, EU:C:2021:89, punt 95). |
39 |
Peress li r-rikorrenti invokat il-ksur tal-prinċipju ta’ ugwaljanza fit-trattament, hija l-Kummissjoni li għandha tidentifika bi preċiżjoni s-sitwazzjonijiet komparabbli li hija tqis li ġew ittrattati b’mod differenti jew is-sitwazzjonijiet differenti li hija tqis li ġew ittrattati b’mod identiku (sentenza tat‑12 ta’ April 2013, Du Pont de Nemours (France) et vs Il‑Kummissjoni, T‑31/07, mhux ippubblikata, EU:T:2013:167, punt 311). |
40 |
Skont ġurisprudenza stabbilita, in-natura komparabbli ta’ tali sitwazzjonijiet għandha tiġi evalwata fid-dawl tal-elementi kollha li jikkaratterizzawhom. Dawn l-elementi għandhom, b’mod partikolari, jiġu ddeterminati u evalwati fid-dawl tal-iskop u tal-għan tal-att li jistabbilixxi d-distinzjoni inkwistjoni. Barra minn hekk, għandhom jittieħdu inkunsiderazzjoni l-prinċipji u l-għanijiet tal-qasam li jagħmel parti minnu dak l-att (ara s-sentenza tat‑3 ta’ Frar 2021, Fussl Modestraße Mayr,C‑555/19, EU:C:2021:89, punt 99 u l-ġurisprudenza ċċitata). |
41 |
Fir-rigward tal-iskop u tal-għan tar-Regolament Nru 806/2014 u tar-Regolament Delegat 2015/63, għandu jitfakkar li, bħad-Direttiva 2014/59, dawn l-atti jaqgħu fil-qasam tas-SRM, li l-ħolqien tiegħu huwa intiż, konformement mal-premessa 12 tar-Regolament Nru 806/2014, li jiżgura approċċ newtrali fit-trattament tal-istituzzjonijiet li qegħdin ifallu, li jsaħħaħ l-istabbiltà tal-istituzzjonijiet fl-Istati Membri parteċipanti u li jipprevjeni t-tixrid ta’ kriżijiet possibbli għall-Istati Membri li ma jipparteċipawx f’dan il-mekkaniżmu, sabiex jiġi ffaċilitat il-funzjonament tas-suq intern kollu kemm hu. |
42 |
Bl-għan li jiġi żgurat finanzjament tal-attivitajiet tas-SRM, id-Direttiva 2014/59, ir-Regolament Nru 806/2014 u r-Regolament Delegat 2015/63 stabbilixxew il-kontribuzzjonijiet ex ante li n-natura speċifika tagħhom tikkonsisti, kif jirriżulta mill-premessi 105 sa 107 ta’ din id-direttiva u mill-premessa 41 ta’ dan ir-regolament, f’li jiġi ggarantit, b’loġika bbażata fuq l-assigurazzjoni, li s-settur finanzjarju jipprovdi riżorsi finanzjarji suffiċjenti lis-SRM sabiex ikun jista’ jissodisfa l-funzjonijiet tiegħu u sabiex l-istituzzjonijiet jiġu mħeġġa jadottaw modi ta’ funzjonament inqas riskjużi (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 113). |
43 |
Huwa fid-dawl ta’ dawn il-kunsiderazzjonijiet li għandha tiġi eżaminata l-legalità tad-dispożizzjonijiet li r-rikorrenti teċċepixxi l-illegalità tagħhom. |
44 |
Fost dawn id-dispożizzjonijiet hemm qabelxejn il-punti (a) u (b) tat-tieni subparagrafu tal-Artikolu 70(1) u (2) tar-Regolament Nru 806/2014, li jipprevedi d-definizzjoni tal-livell annwali fil-mira li għandu jinqasam bejn l-istituzzjonijiet awtorizzati fit-territorju tal-Istati Membri parteċipanti kollha. |
45 |
Barra minn hekk, ir-rikorrenti tikkontesta l-legalità tal-Artikoli 6 u 7 tar-Regolament Delegat 2015/63, li jispeċifikaw il-kriterji tal-adattament tal-kontribuzzjonijiet ex ante għall-profil tar-riskju tal-istituzzjonijiet, kif stabbiliti mill-Artikolu 103(7) tad-Direttiva 2014/59. B’mod iktar konkret, l-Artikolu 6 ta’ dan ir-regolament delegat jelenka l-pilastri tar-riskju u l-indikaturi tar-riskju li s-SRB għandu jieħu inkunsiderazzjoni sabiex jevalwa l-profil tar-riskju tal-istituzzjonijiet, filwaqt li l-Artikolu 7 tal-imsemmi regolament delegat jippreċiża l-piż relattiv ta’ kull pilastru tar-riskju u indikatur tar-riskju li għandu jiġi applikat mis-SRB meta jevalwa l-profil tar-riskju ta’ kull istituzzjoni. |
46 |
Fl-aħħar nett, ir-rikorrenti teċċepixxi l-illegalità tal-Anness I tar-Regolament Delegat 2015/63, li jispeċifika l-passi differenti tal-metodu ta’ kalkolu użat mis-SRB sabiex jiġi ddeterminat l-ammont tal-kontribuzzjonijiet ex ante u li jistabbilixxi l-formuli matematiċi li għandhom jiġu applikati mis-SRB. |
a) Fuq l‑ewwel u t‑tieni parti, ibbażati fuq l‑assenza ta’ teħid inkunsiderazzjoni tad‑differenzi fis‑sitwazzjoni bejn l‑istituzzjonijiet tal‑unjoni bankarja u tan‑natura inġustifikata tal‑esklużjoni tad‑depożiti koperti mill‑bażi ta’ kalkolu tal‑kontribuzzjoni annwali bażika
47 |
L-ewwel parti tal-ewwel motiv tiffoka fuq żewġ ilmenti, ibbażati, l-ewwel wieħed, fuq l-assenza ta’ teħid inkunsiderazzjoni tad-differenzi fis-sitwazzjoni bejn is-setturi bankarji tal-Istati Membri parteċipanti, u, it-tieni wieħed, fuq l-inkoerenza marbuta mal-assenza ta’ teħid inkunsiderazzjoni tal-kriterji ta’ evalwazzjoni użati fil-kuntest tal-Mekkaniżmu Superviżorju Uniku (MSU). |
48 |
Permezz tat-tieni parti tal-ewwel motiv, ir-rikorrenti ssostni, essenzjalment, li l-punt (a) tat-tieni subparagrafu tal-Artikolu 70(2) tar-Regolament Nru 806/2014 jikser il-prinċipju ta’ ugwaljanza fit-trattament, peress li jipprevedi esklużjoni tad-depożiti koperti mill-obbligazzjonijiet li jittieħdu inkunsiderazzjoni sabiex tiġi kkalkolata l-kontribuzzjoni annwali bażika. |
49 |
Is-SRB, il-Parlament, il-Kunsill u l-Kummissjoni jikkontestaw dan l-argument. |
1) Fuq l‑ewwel ilment tal‑ewwel parti, ibbażat fuq l‑assenza ta’ teħid inkunsiderazzjoni tad‑differenzi fis‑sitwazzjoni bejn is‑setturi bankarji tal‑Istati Membri parteċipanti, u fuq it‑tieni parti, dwar in‑natura inġustifikata tal‑esklużjoni tad‑depożiti koperti mill‑bażi ta’ kalkolu tal‑kontribuzzjoni annwali bażika
50 |
Fl-ewwel lok, fil-kuntest tal-ewwel ilment tal-ewwel parti, ir-rikorrenti ssostni li t-tqassim tal-kontribuzzjonijiet ex ante bejn id-diversi istituzzjonijiet tal-unjoni bankarja, imwettaq abbażi tal-Artikolu 70(1) u (2) tar-Regolament Nru 806/2014 u tal-Artikoli 6 u 7 kif ukoll tal-Anness I tar-Regolament Delegat 2015/63, huwa applikat abbażi ta’ kriterji li l-modalitajiet ta’ kalkolu tagħhom jinjoraw id-differenzi fis-sitwazzjoni bejn is-setturi bankarji tal-Istati Membri parteċipanti. B’mod partikolari, dawn id-dispożizzjonijiet naqsu milli jieħdu inkunsiderazzjoni l-karatteristiċi speċifiċi u l-profil uniku tal-istituzzjonijiet li għandhom is-sede tagħhom fi Franza (iktar ’il quddiem l-“istituzzjonijiet Franċiżi”), bħar-rikorrenti. Għalhekk, filwaqt li dawn l-istituzzjonijiet jinsabu f’sitwazzjonijiet differenti minn dawk tal-istituzzjonijiet li għandhom is-sede tagħhom fi Stati Membri parteċipanti oħra (iktar ’il quddiem l-“istituzzjonijiet tal-Istati Membri l-oħra”), dawn huma ttrattati b’mod identiku fir-rigward tal-kalkolu tal-ammont tal-imsemmija kontribuzzjonijiet. |
51 |
F’dan ir-rigward, ir-rikorrenti ssostni li l-istituzzjonijiet Franċiżi jiddistingwu ruħhom mill-istituzzjonijiet tal-Istati Membri l-oħra minħabba l-fatt li, minkejja li huma għandhom, b’mod ġenerali, ammont totali kbir ta’ obbligazzjonijiet, huma għandhom ammont ta’ depożiti koperti relattivament baxx. |
52 |
Ir-rikorrenti ssostni li hija għandha din il-karatteristika sabiex issostni li hija stess iġġarrab ksur tal-prinċipju ta’ ugwaljanza fit-trattament. Dan il-ksur ikun jirriżulta mill-fatt li l-ammont baxx tad-depożiti koperti tagħha ma jippermettilhiex tnaqqas il-kontribuzzjoni annwali bażika tagħha u għalhekk iżżid “artifiċjalment” il-piż relattiv ta’ din il-kontribuzzjoni fil-kalkolu tat-totalità tal-kontribuzzjoni ex ante tagħha. |
53 |
L-argument tar-rikorrenti għandu għalhekk jinftiehem fis-sens li hija ssostni, essenzjalment, li hija żvantaġġata fir-rigward tal-istituzzjonijiet li għandhom ammont għoli ta’ depożiti koperti, li huma, b’mod partikolari, stabbiliti fl-Istati Membri l-oħra, minħabba l-possibbiltà għal dawn tal-aħħar li jibbenefikaw minn tnaqqis ikbar tal-obbligazzjonijiet li jintużaw għall-finijiet tal-kalkolu tal-kontribuzzjoni ex ante, b’tali mod li hija għandha, fir-realtà, tiġi ttrattata b’mod differenti fir-rigward ta’ dawn l-istituzzjonijiet l-oħra. |
54 |
Dan l-argument jikkorrispondi għal dawk imqajma fil-kuntest tat-tieni parti tal-ewwel motiv, ibbażata fuq in-natura inġustifikata tal-esklużjoni tad-depożiti koperti mill-bażi ta’ kalkolu tal-kontribuzzjoni annwali bażika. Konsegwentement, dawn għandhom jiġu eżaminati flimkien. |
55 |
F’dan ir-rigward, qabelxejn, għandu jiġi kkonstatat li l-esklużjoni tad-depożiti koperti mill-bażi ta’ kalkolu tal-kontribuzzjoni annwali bażika, prevista fil-punt (a) tat-tieni subparagrafu tal-Artikolu 70(2) tar-Regolament Nru 806/2014, tapplika bl-istess mod għall-istituzzjonijiet kollha li jaqgħu fil-kamp ta’ applikazzjoni tiegħu, inkluż, għalhekk, għall-istituzzjonijiet Franċiżi, fosthom ir-rikorrenti, u għall-istituzzjonijiet tal-Istati Membri l-oħra, indipendentement mill-ammont tad-depożiti koperti tagħhom. |
56 |
Fir-rigward, sussegwentement, tal-kwistjoni dwar jekk l-istituzzjonijiet Franċiżi, fosthom ir-rikorrenti, jinsabux f’sitwazzjoni komparabbli għal dik tal-istituzzjonijiet tal-Istati Membri l-oħra, għall-finijiet tal-applikazzjoni tal-imsemmija esklużjoni, għandu jitfakkar li d-Direttiva 2014/59 u r-Regolament Nru 806/2014 huma intiżi, b’mod partikolari, li jiggarantixxu, b’loġika bbażata fuq l-assigurazzjoni, li s-settur finanzjarju jipprovdi riżorsi finanzjarji suffiċjenti lis-SRM sabiex ikun jista’ jwettaq il-funzjonijiet tiegħu, kif indikat fil-punt 42 iktar ’il fuq. Bħala korrispettiv għall-obbligi tagħhom li jħallsu kontribuzzjonijiet ex ante, l-istituzzjonijiet kollha jibbenefikaw minn dawn il-kontribuzzjonijiet permezz tal-istabbiltà tas-sistema finanzjarja żgurata mis-SRF. Dan il-benefiċċju jeżisti indipendentement mill-ammont tad-depożiti koperti disponibbli għall-istituzzjonijiet u mill-punt sa fejn huma jistgħu jeskludu dan l-ammont mill-bażi ta’ kalkolu tal-kontribuzzjoni annwali bażika tagħhom. |
57 |
F’dawn iċ-ċirkustanzi, is-sempliċi fatt li l-istituzzjonijiet għandhom ammonti differenti ta’ depożiti koperti ma għandux il-konsegwenza li jqegħedhom f’sitwazzjonijiet differenti fid-dawl tal-iskop u tal-għan tad-Direttiva 2014/59 u tar-Regolament Nru 806/2014. |
58 |
Fl-aħħar nett, il-fatt li l-applikazzjoni ta’ dawn il-kriterji twassal għal ammonti differenti ta’ kontribuzzjonijiet ex ante għar-rikorrenti u għall-istituzzjonijiet l-oħra huwa r-riżultat tas-sempliċi fatt li huma għandhom ammonti differenti ta’ depożiti koperti. |
59 |
Issa, anki jekk jitqies li l-istituzzjonijiet Franċiżi, fosthom ir-rikorrenti, għandhom ammont ta’ depożiti koperti inqas minn dak tal-istituzzjonijiet tal-Istati Membri l-oħra, dan il-fatt ma huwiex biżżejjed sabiex jiġi stabbilit ksur tal-prinċipju ta’ ugwaljanza fit-trattament. |
60 |
F’dan ir-rigward, mill-ġurisprudenza jirriżulta li l-adozzjoni, mil-leġiżlatur tal-Unjoni, ta’ leġiżlazzjoni f’qasam ta’ azzjoni partikolari jista’ jkollha riperkussjonijiet differenti għal ċerti operaturi ekonomiċi fid-dawl tas-sitwazzjoni individwali tagħhom jew tar-regoli nazzjonali li għalihom huma barra minn hekk suġġetti, peress li tali konsegwenza ma tistax titqies li hija ksur tal-prinċipju ta’ ugwaljanza fit-trattament jekk l-imsemmija leġiżlazzjoni hija bbażata fuq kriterji oġġettivi u adattati għall-għanijiet imfittxija minnha (ara, f’dan is-sens u b’analoġija, is-sentenza tad‑19 ta’ Settembru 2013, Panellinios Syndesmos Viomichanion Metapoiisis Kapnou,C‑373/11, EU:C:2013:567, punt 34 u l-ġurisprudenza ċċitata). |
61 |
F’dan il-każ, minn naħa, għandu jiġi kkonstatat li l-esklużjoni tad-depożiti koperti mill-bażi ta’ kalkolu tal-kontribuzzjoni annwali bażika hija bbażata fuq kriterji oġġettivi. F’dan ir-rigward, mill-punt 11 tal-Artikolu 3(1) tar-Regolament Nru 806/2014, li jirreferi għall-punt 5 tal-Artikolu 2(1) tad-Direttiva 2014/49/UE tal-Parlament Ewropew u tal-Kunsill tas‑16 ta’ April 2014 dwar skemi ta’ garanzija tad-depożiti (ĠU 2014, L 173, p. 149), jirriżulta li l-kunċett ta’ “depożiti koperti”, fis-sens tar-Regolament Nru 806/2014, jikkorrispondi, għall-finijiet tal-esklużjoni ta’ dawn id-depożiti mill-bażi ta’ kalkolu tal-kontribuzzjoni annwali bażika, għall-kunċett ta’ “depożiti ggarantiti” fil-kuntest tal-iskema ta’ garanzija għal depożiti (SGD). Issa, dan l-aħħar kunċett huwa ddefinit abbażi tal-kriterji previsti fil-punti 3 u 4 tal-Artikolu 2 u fl-Artikolu 6 tad-Direttiva 2014/49, li għandhom natura oġġettiva. |
62 |
Min-naħa l-oħra, għandu jiġi rrilevat li din l-esklużjoni hija bbażata fuq kriterji adattati għall-għanijiet imfittxija mill-punt (a) tat-tieni subparagrafu tal-Artikolu 70(2) tar-Regolament Nru 806/2014. Fil-fatt, kif spjega s-SRB, l-imsemmija esklużjoni għandha l-għan, b’mod partikolari, li tevita effett ta’ għadd doppju tad-depożiti koperti. F’dan ir-rigward, għandu jitfakkar li l-istituzzjonijiet huma obbligati, minħabba l-imsemmija depożiti, iħallsu kontribuzzjonijiet lis-SGD li jaqgħu taħthom, skont id-Direttiva 2014/49. Issa, jekk, kif issostni r-rikorrenti, id-depożiti koperti ma kinux esklużi mill-bażi ta’ kalkolu tal-kontribuzzjonijiet ex ante, l-istituzzjonijiet ikunu obbligati jħallsu, minħabba dawn l-istess depożiti koperti, il-kontribuzzjonijiet ex ante b’mod parallel mal-kontribuzzjonijiet li jippermettu l-finanzjament tas-SGD. |
63 |
F’dawn iċ-ċirkustanzi, l-għażla magħmula mil-leġiżlatur tal-Unjoni, fil-punt (a) tat-tieni subparagrafu tal-Artikolu 70(2) tar-Regolament Nru 806/2014, li jeskludi d-depożiti koperti mit-total tal-obbligazzjonijiet tal-istituzzjonijiet li għandhom jittieħdu inkunsiderazzjoni sabiex tiġi kkalkolata l-kontribuzzjoni annwali bażika tista’ titqies li hija bbażata fuq kriterji oġġettivi u adattati għall-għanijiet imfittxija minn din id-dispożizzjoni. |
64 |
Konsegwentement, l-ewwel argument tar-rikorrenti mqajjem insostenn tal-ewwel ilment tal-ewwel parti tal-ewwel motiv kif ukoll it-tieni parti ta’ dan il-motiv għandu jiġi miċħud. |
65 |
Fit-tieni lok, ir-rikorrenti ssostni li l-metodu ta’ kalkolu previst mid-dispożizzjonijiet imsemmija fil-punt 50 iktar ’il fuq għandu bħala konsegwenza li l-kontribuzzjonijiet ex ante tal-istituzzjonijiet Franċiżi huma kunsiderevolment ogħla minn dawk tal-istituzzjonijiet tal-Istati Membri l-oħra u li dawn żdiedu ħafna mill‑2016. |
66 |
F’dan ir-rigward, qabelxejn, ir-rikorrenti ma tikkontestax li l-kriterji ta’ kalkolu ta’ dawn il-kontribuzzjonijiet ex ante japplikaw bl-istess mod għall-istituzzjonijiet Franċiżi, li minnhom hija tagħmel parti, u għall-istituzzjonijiet tal-Istati Membri l-oħra. |
67 |
Sussegwentement, ir-rikorrenti ma tispjegax l-effett tal-fatt imsemmi fil-punt 65 iktar ’il fuq fuq l-eżami tal-kwistjoni dwar jekk hija tinsabx f’sitwazzjoni differenti minn dik tal-istituzzjonijiet tal-Istati Membri l-oħra. |
68 |
Fl-aħħar nett, u fi kwalunkwe każ, l-ammont għoli tal-kontribuzzjonijiet ex ante tal-istituzzjonijiet Franċiżi huwa spjegat minn diversi fatturi li ma ġewx ikkontestati mir-rikorrenti. |
69 |
L-ewwel nett, is-SRB ippreċiża, mingħajr ma ġie kontradett, li l-istituzzjonijiet Franċiżi li ġeneralment kellhom parti mill-obbligazzjonijiet totali ikbar mill-istituzzjonijiet tal-Istati Membri l-oħra, li tikkorrispondi għal iktar minn terz ta’ dawn l-obbligazzjonijiet matul il-perijodu rilevanti għall-kalkolu tal-kontribuzzjonijiet ex ante. |
70 |
Tali fatt għandu impatt sinjifikattiv fuq l-ammont tal-kontribuzzjonijiet annwali bażiċi tal-istituzzjonijiet ikkonċernati u, konsegwentement, fuq l-ammont tal-kontribuzzjonijiet ex ante tagħhom. Fil-fatt, konformement mal-Artikolu 103(2) tad-Direttiva 2014/59 u mal-Artikolu 70(1) tar-Regolament Nru 806/2014, il-kontribuzzjoni annwali bażika ta’ kull istituzzjoni għandha tkun proporzjonali għall-ammont tal-obbligazzjonijiet ta’ din l-istituzzjoni, minbarra l-fondi proprji u d-depożiti koperti, fir-rigward tat-total tal-obbligazzjonijiet, minbarra l-fondi proprji u d-depożiti koperti, tal-istituzzjonijiet kollha awtorizzati fit-territorju tal-Istati Membri parteċipanti kollha. L-applikazzjoni ta’ dawn id-dispożizzjonijiet twassal għalhekk sabiex il-kontribuzzjonijiet annwali tal-istituzzjonijiet Franċiżi ta’ spiss ikunu ogħla minn dawk tal-istituzzjonijiet tal-Istati Membri l-oħra. |
71 |
Issa, ir-rikorrenti ma kkontestatx il-legalità tal-Artikolu 103(2) tad-Direttiva 2014/59 u tal-Artikolu 70(1) tar-Regolament Nru 806/2014, li permezz tagħhom il-leġiżlatur tal-Unjoni ddeċieda li jibbaża l-kalkolu tal-kontribuzzjonijiet ex ante fuq l-ammont tal-obbligazzjonijiet tal-istituzzjonijiet. |
72 |
It-tieni nett, ir-rikorrenti lanqas ma kkontestat l-affermazzjoni tas-SRB li d-daqs tal-bilanċi tal-istituzzjonijiet Franċiżi u tal-obbligazzjonijiet tagħhom kien żdied bejn l‑2016 u l‑2021, li kien wassal għal żieda tal-kontribuzzjoni annwali bażika ta’ dawn l-istituzzjonijiet u, għaldaqstant, tal-kontribuzzjonijiet ex ante li r-rikorrenti kienet obbligata tħallas. |
73 |
It-tielet nett, is-SRB spjega, mingħajr ma ġie kontradett, li ż-żieda tal-kontribuzzjonijiet ex ante tal-istituzzjonijiet Franċiżi kienet ġiet aċċellerata mill-mekkaniżmu msejjaħ “phasing-in” tal-kalkolu ta’ dawn il-kontribuzzjonijiet, kif previst fl-Artikolu 8(1) tar-Regolament ta’ Implimentazzjoni 2015/81 (iktar ’il quddiem il-“mekkaniżmu ta’ ‘phasing-in’”). Skont dan il-mekkaniżmu, barra minn hekk applikabbli għall-istituzzjonijiet ikkonċernati kollha, parti dejjem tikber tal-kontribuzzjonijiet ex ante tal-istituzzjonijiet hija kkalkolata fuq il-bażi tal-unjoni, iktar milli fuq il-bażi nazzjonali, peress li din il-parti tammonta għal 86.67 % għall-kalkolu tal-kontribuzzjonijiet ex ante għall-perijodu ta’ kontribuzzjoni 2021. |
74 |
F’dan ir-rigward, is-SRB ippreċiża li tali fatt kien jimplika li l-profil tar-riskju tal-istituzzjonijiet Franċiżi kien dejjem iktar imkejjel b’riferiment għal dak tal-istituzzjonijiet tal-Istati Membri l-oħra. Għalhekk, fid-dawl tal-parti tal-obbligazzjonijiet totali tal-istituzzjonijiet Franċiżi meta mqabbla mal-obbligazzjonijiet totali tal-istituzzjonijiet tal-Istati Membri l-oħra, kif indikat fil-punt 69 iktar ’il fuq, il-mekkaniżmu ta’ “phasing-in” jispjega – skont l-istess preċiżazzjonijiet mhux ikkontestati tas-SRB – għaliex l-ammont tal-kontribuzzjonijiet ex ante tal-istituzzjonijiet Franċiżi, fosthom ir-rikorrenti, żdied iktar bejn l‑2016 u l‑2021 minn dak tal-istituzzjonijiet tal-Istati Membri l-oħra. |
75 |
Konsegwentement, iż-żieda tal-kontribuzzjoni ex ante tal-istituzzjonijiet Franċiżi, bħar-rikorrenti, hija spjegata minn numru ta’ fatturi oġġettivi, fosthom l-ammont dejjem ikbar tal-obbligazzjonijiet tagħhom, u mhux minn inugwaljanza fit-trattament li kienu suġġetti għaliha. |
76 |
F’dawn iċ-ċirkustanzi, ir-rikorrenti ma stabbilixxietx li d-dispożizzjonijiet imsemmija fil-punt 50 iktar ’il fuq kienu jiksru l-prinċipju ta’ ugwaljanza fit-trattament. |
77 |
Fit-tielet lok, lanqas ma jista’ jintlaqa’ l-argument tar-rikorrenti li, essenzjalment, il-mekkaniżmu ta’ “phasing-in” iwassal sabiex ma jittiħdux inkunsiderazzjoni l-karatteristiċi proprji ta’ kull settur bankarju u sabiex tinħoloq distorsjoni bejn is-setturi bankarji għad-detriment tas-settur Franċiż. |
78 |
Fil-fatt, dan l-argument huwa intiż li jikkontesta l-eżistenza stess tal-mekkaniżmu ta’ “phasing-in”, mingħajr ma r-rikorrenti teċċepixxi l-illegalità tad-dispożizzjoni li tipprevedih, jiġifieri l-Artikolu 8(1) tar-Regolament ta’ Implimentazzjoni 2015/81. |
79 |
Fi kwalunkwe każ, din id-dispożizzjoni tikkonċerna l-istituzzjonijiet kollha, fosthom ir-rikorrenti. Konsegwentement, il-mekkaniżmu ta’ “phasing-in” japplika b’mod identiku għall-istituzzjonijiet Franċiżi, fosthom ir-rikorrenti, u għall-istituzzjonijiet tal-Istati Membri l-oħra. Barra minn hekk, għalkemm il-kritika tar-rikorrenti kellha tinftiehem fis-sens li din tal-aħħar issostni li l-istituzzjonijiet Franċiżi ma jinsabux f’sitwazzjoni komparabbli ma’ dik tal-istituzzjonijiet tal-Istati Membri l-oħra fil-kuntest tal-mekkaniżmu ta’ “phasing-in”, għandu jiġi rrilevat li r-rikorrenti ma ppreżentat l-ebda element konkret lill-Qorti Ġenerali li juri li tal-ewwel jinsabu effettivament f’sitwazzjoni differenti minn dik tat-tieni fil-kuntest ta’ dan il-mekkaniżmu. |
80 |
Fir-raba’ lok, ir-rikorrenti ssostni li, minbarra l-fatt li hija ma għandhiex l-istess riskju bħall-istituzzjonijiet tal-Istati Membri l-oħra, ma tantx huwa probabbli li hija tista’ tibbenefika mis-SRF, fid-dawl tar-rekwiżit minimu għal fondi proprji u obbligazzjonijiet eliġibbli (iktar ’il quddiem il-“MREL”) li għalih hija suġġetta kif ukoll tal-implimentazzjoni neċessarja tal-istrument ta’ rikapitalizzazzjoni interna fi proporzjonijiet kbar u qabel kull intervent tas-SRF. |
81 |
Qabel kollox, għandu jitfakkar li, skont il-punt 40 tal-Artikolu 3(1) tar-Regolament Nru 806/2014, il-fondi proprji jikkorrispondu għall-mezzi mqiegħda għad-dispożizzjoni ta’ istituzzjoni mill-azzjonisti tagħha, jew minn investituri oħra, kif ukoll għall-profitti li hija għamlet u li ma tqassmux. |
82 |
Sussegwentement, skont il-punt 49 tal-Artikolu 3 tar-Regolament Nru 806/2014, l-“obbligazzjonijiet eliġibbli” huma l-impenji jew l-obbligazzjonijiet u l-istrumenti kapitali li ma humiex strumenti ta’ fondi proprji li jaqgħu taħt ċerti kategoriji u li ma humiex esklużi mill-kamp ta’ applikazzjoni tal-istrument ta’ rikapitalizzazzjoni interna. |
83 |
Barra minn hekk, il-punti (a) sa (f) tal-ewwel subparagrafu tal-Artikolu 12(16) tar-Regolament Nru 806/2014 jipprevedi li impenn eliġibbli maħruġ għall-osservanza tal-MREL fis-sens tal-paragrafu 1 ta’ din l-istess dispożizzjoni għandu jkun strument maħruġ u kompletament irrilaxxat, li ma għandux ikun impenn lejn l-istituzzjoni stess jew iggarantit minnha, li x-xiri tal-istrument ma għandux ikun ġie ffinanzjat la direttament u lanqas indirettament mill-istituzzjoni, li l-impenn għandu jkollu maturità residwa ta’ mill-inqas sena, li l-impenn ma għandu jirriżulta la minn prodott idderivat u lanqas minn depożitu li jibbenefika minn preferenza fil-ġerarkija nazzjonali fil-qasam tal-insolvenza. |
84 |
Fl-aħħar nett, għandu jitfakkar li, kif jirriżulta mill-premessa 73 u mill-Artikolu 27 tar-Regolament Nru 806/2014, l-istrument ta’ rikapitalizzazzjoni interna tillimita l-ispejjeż ta’ riżoluzzjoni ta’ entità li qiegħda tfalli mġarrba mill-kontribwent billi tiżgura li l-azzjonisti u l-kredituri tal-entità li qiegħda tfalli jġarrbu telf xieraq u jassumu parti xierqa mill-ispejjeż dovuti għall-falliment tal-entità. Bl-istess mod, mill-premessa 83 tar-Regolament Nru 806/2014 jirriżulta li, sabiex jiġi żgurat li l-istrument ta’ rikapitalizzazzjoni interna hija effettiva, l-Artikolu 12 ta’ dan ir-regolament jipprevedi li l-istituzzjonijiet għandu jkollhom ammonti suffiċjenti ta’ fondi proprji u ta’ impenji eliġibbli sabiex jassorbu t-telf u jirrikapitalizzaw l-istituzzjonijiet li qegħdin ifallu. |
85 |
Madankollu, ir-rikorrenti ma tikkontestax li r-Regolament Nru 806/2014 u r-Regolament Delegat 2015/63 jittrattawha bl-istess mod bħall-istituzzjonijiet ikkonċernati l-oħra fir-rigward tat-teħid inkunsiderazzjoni tar-rekwiżiti fil-qasam ta’ MREL u tal-implimentazzjoni tal-istrument ta’ rikapitalizzazzjoni interna. |
86 |
Għalkemm, f’dawn iċ-ċirkustanzi, l-argument tar-rikorrenti kellu jinftiehem fis-sens li din tal-aħħar issostni, fir-realtà, li hija kienet żvantaġġata mill-fatt li r-Regolament Nru 806/2014 u r-Regolament Delegat 2015/63 ma ħadux suffiċjentement inkunsiderazzjoni r-rekwiżiti fil-qasam ta’ MREL u tal-implimentazzjoni tal-istrument ta’ rikapitalizzazzjoni interna għall-finijiet tal-kalkolu tal-ammont tal-kontribuzzjonijiet ex ante, għandu jiġi rrilevat dan li ġej. |
87 |
Qabelxejn, ir-rikorrenti ma pproduċiet l-ebda element konkret quddiem il-Qorti Ġenerali intiż li jikkontesta l-affermazzjoni tas-SRB li l-istituzzjonijiet li għandhom obbligazzjonijiet kbar, bħalha stess, huma l-aħjar istituzzjonijiet li jibbenefikaw mill-mekkaniżmi ta’ riżoluzzjoni stabbiliti mir-Regolament Nru 806/2014, u dan minkejja r-rekwiżiti li għalihom huma suġġetti fil-qasam ta’ MREL jew ta’ rekwiżiti prudenzjali oħra. Fuq dan il-punt, il-premessa 5 tar-Regolament Delegat 2015/63 tenfasizza barra minn hekk li, iktar ma istituzzjoni tkun kbira, iktar huwa probabbli li, fil-każ ta’ diffikultà, l-awtorità ta’ riżoluzzjoni tqis li huwa fl-interess pubbliku li tipproċedi għar-riżoluzzjoni tagħha u li tirrikorri għas-SRF sabiex tiżgura l-applikazzjoni effettiva tal-istrumenti ta’ riżoluzzjoni. |
88 |
Sussegwentement, l-Artikolu 6(2)(a) tar-Regolament Delegat 2015/63 jipprevedi indikatur tar-riskju bbażat, b’mod partikolari, fuq ir-rekwiżiti fil-qasam ta’ MREL, fil-kuntest tal-evalwazzjoni tal-profil tar-riskju tal-istituzzjonijiet, għall-finijiet tal-kalkolu tal-ammont tal-kontribuzzjoni ex ante tagħhom. Issa, ir-rikorrenti ma sostnietx li l-piż ta’ dan l-indikatur tar-riskju kien insuffiċjenti fil-kuntest tal-kalkolu tal-kontribuzzjonijiet ex ante. |
89 |
F’dan ir-rigward, għandu jinżied ukoll li, għalkemm huwa minnu li l-Artikolu 20 tar-Regolament Delegat 2015/63 jippermetti lis-SRB ma jiħux inkunsiderazzjoni, b’mod tranżitorju, l-imsemmi indikatur tar-riskju fil-kalkolu tal-kontribuzzjoni ex ante, ir-rikorrenti madankollu ma kkontestatx il-validità ta’ din id-dispożizzjoni. |
90 |
Fl-aħħar nett, mill-Artikoli 22 u 27 tar-Regolament Nru 806/2014 jirriżulta li, fil-kuntest tal-adozzjoni ta’ riżoluzzjoni skont dan ir-regolament, l-istrument ta’ rikapitalizzazzjoni interna hija intiża li tapplika, bl-istess mod, għall-istituzzjonijiet kollha qabel l-użu tas-SRF. Barra minn hekk, il-possibbiltà li jintuża l-istrument tar-rikapitalizzazzjoni interna ma teskludix l-użu possibbli tas-SRF. F’dawn iċ-ċirkustanzi, ir-rikorrenti ma wrietx li l-istituzzjonijiet Franċiżi kienu jinsabu f’sitwazzjoni differenti minn dik tal-istituzzjonijiet tal-Istati Membri l-oħra minħabba l-MREL tagħhom u minħabba l-possibbiltà għalihom li japplikaw l-istrument tar-rikapitalizzazzjoni interna. |
91 |
Fil-ħames lok, ir-rikorrenti tallega li, waqt il-laqgħa tad‑9 ta’ Diċembru 2014, il-Kunsill stabbilixxa ftehim politiku li skontu l-“kontribuzzjonijiet Franċiżi u Ġermaniżi” kellhom ikunu fuq l-istess livell matul il-perijodu tranżitorju. |
92 |
Madankollu, mill-minuti ta’ din il-laqgħa tal-Kunsill, ippubblikati fuq is-sit internet tiegħu, ma jirriżultax li tali ftehim ġie konkluż. |
93 |
Għaldaqstant, l-argument tar-rikorrenti għandu jiġi miċħud. |
94 |
Fis-sitt lok, ir-rikorrenti tqis li hija kienet is-suġġett ta’ inugwaljanza fit-trattament minħabba li hija ma setgħetx tibbenefika mill-iskema ta’ kalkolu tal-kontribuzzjonijiet ex ante li hija applikabbli għall-istituzzjonijiet żgħar u medji. |
95 |
L-Artikolu 10 tar-Regolament Delegat 2015/63 u l-Artikolu 8(5) tar-Regolament ta’ Implimentazzjoni 2015/81 jipprevedu skemi speċjali għall-istituzzjonijiet żgħar u medji, li minnhom jirriżulta, minn naħa, li l-kontribuzzjonijiet ex ante tal-istituzzjonijiet żgħar huma magħmula, bħala prinċipju u ħlief f’ċirkustanzi partikolari, minn ammonti f’daqqa u, min-naħa l-oħra, li l-kontribuzzjonijiet ex ante tal-istituzzjonijiet ta’ daqs medju, għal parti waħda, huma fil-forma ta’ somma f’daqqa u, għall-parti l-oħra, jistgħu jiġu kkalkolati skont ir-regoli applikabbli għall-istituzzjonijiet l-oħra kollha. Madankollu, fid-dawl tal-kunsiderazzjonijiet imsemmija fil-punt 87 iktar ’il fuq, l-istituzzjonijiet ta’ daqs kbir li għandhom ammont ta’ obbligazzjonijiet għoli ħafna, bħar-rikorrenti, ma għandhomx, fir-rigward tal-użu tas-SRF, profil tar-riskju ekwivalenti għal dak tal-istituzzjonijiet żgħar u medji jew iktar baxx minn dan tal-aħħar. Konsegwentement, dawn iż-żewġ kategoriji ma jinsabux f’sitwazzjoni komparabbli għall-finijiet tal-kalkolu tal-kontribuzzjonijiet ex ante. |
96 |
Sussegwentement, u fid-dawl tal-kunsiderazzjonijiet kollha preċedenti, ir-rikorrenti ma wrietx li l-Artikolu 70(1) u l-punti (a) u (b) tat-tieni subparagrafu tal-Artikolu 70(2) tar-Regolament Nru 806/2014 kif ukoll l-Artikoli 6 u 7 u l-Anness I tar-Regolament Delegat 2015/63 kisru l-prinċipju ta’ ugwaljanza fit-trattament. |
97 |
Konsegwentement, l-ewwel ilment tal-ewwel parti u t-tieni parti tal-ewwel motiv għandhom jiġu miċħuda bħala infondati. |
2) Fuq it‑tieni lment tal‑ewwel parti, ibbażat fuq l‑inkoerenza marbuta mal‑assenza ta’ teħid inkunsiderazzjoni tal‑kriterji ta’ evalwazzjoni użati fil‑kuntest tal‑MSU
98 |
Ir-rikorrenti ssostni li, fid-dawl tal-kontinwità u tar-relazzjoni qawwija bejn il-MSU u s-SRM, huwa inkoerenti li jiġi evalwat ir-riskju ppreżentat minn istituzzjoni fil-kuntest tas-SRM mingħajr ma jittieħdu inkunsiderazzjoni l-kriterji ta’ evalwazzjoni użati fil-kuntest tal-MSU, li jippermettu li jiġi żgurat li l-istituzzjonijiet bl-ikbar probabbiltà li jirrikorru għas-SRF huma dawk li jikkontribwixxu l-iktar għall-finanzjament tagħhom. L-assenza ta’ teħid inkunsiderazzjoni tal-kriterji ta’ evalwazzjoni użati fil-kuntest tal-MSU twassal għalhekk sabiex l-istituzzjonijiet li għalihom l-użu tas-SRF huwa l-inqas probabbli, fid-dawl, b’mod partikolari, tas-solidità tagħhom irrikonoxxuta fil-kuntest tal-MSU. |
99 |
F’dan ir-rigward, għandu qabelxejn jiġi kkonstatat li, minkejja r-rekwiżiti li jirriżultaw mill-ġurisprudenza ċċitata fil-punti 38 u 39 iktar ’il fuq, ir-rikorrenti ma tispjegax b’ċarezza suffiċjenti kif l-allegat rekwiżit ta’ koerenza mal-kriterji msemmija fil-punt 98 iktar ’il fuq huwa rilevanti sabiex jiġi stabbilit jekk hija ġarrbitx ksur tal-prinċipju ta’ ugwaljanza fit-trattament. |
100 |
Jekk, f’dawn iċ-ċirkustanzi, l-argument tar-rikorrenti għandu jinftiehem fis-sens li din tal-aħħar issostni, fir-realtà, li hija ttrattata bl-istess mod bħall-istituzzjonijiet l-oħra li għandhom profil tar-riskju ogħla fid-dawl tal-kriterji ta’ evalwazzjoni użati fil-kuntest tal-MSU, minkejja li, skont dawn il-kriterji, il-probabbiltà li hija tirrikorri għas-SRF hija inqas, għandu jiġi rrilevat dan li ġej. |
101 |
Huwa minnu, kif jirriżulta mill-premessi 11, 13, 15 u 52 tar-Regolament Nru 806/2014, li teżisti rabta ta’ komplementarjetà bejn ir-regoli stabbiliti fil-kuntest tas-SRM u dawk adottati fil-kuntest tal-MSU. |
102 |
B’mod partikolari, uħud mill-kriterji ta’ evalwazzjoni użati fil-kuntest tas-SRM joqorbu lejn dawk użati fil-kuntest tal-MSU, kif previsti, b’mod partikolari, mir-Regolament (UE) Nru 575/2013 tal-Parlament Ewropew u tal-Kunsill tas‑26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU 2013, L 176, p. 1, rettifiki fil-ĠU 2013, L 208, p. 68, fil-ĠU 2013, L 321, p. 6, fil-ĠU 2017, L 20, p. 2 u fil-ĠU 2023, L 92, p. 29). |
103 |
Għalhekk, diversi kriterji tal-leġiżlazzjoni dwar is-SRM jużaw kunċetti li jikkorrispondu għal dawk tal-leġiżlazzjoni adottata fil-kuntest tal-MSU u huma wkoll iddefiniti b’riferiment espress għal dan tal-aħħar. Dan huwa, b’mod partikolari, il-każ tal-kunċetti ta’ “fondi proprji”, ta’ “proporzjon tal-effett ta’ lieva” jew ta’ “proporzjon tal-kapital tal-Grad I”, li huma determinanti għall-finijiet tal-applikazzjoni tal-indikaturi tar-riskju elenkati fl-Artikolu 6(2)(a) sa (c) tar-Regolament Delegat 2015/63 u li huma ddefiniti fl-Artikolu 3 ta’ dan ir-regolament delegat, b’riferiment għar-Regolament Nru 575/2013. |
104 |
Madankollu, minkejja din ir-rabta ta’ komplementarjetà, għandu jiġi kkonstatat li, kif isostni s-SRB mingħajr ma ġie kontradett fuq dan il-punt, l-għanijiet imfittxija mil-leġiżlazzjoni dwar is-SRM fil-qasam tar-riżoluzzjoni tal-istituzzjonijiet huma differenti minn dawk imfittxija mil-leġiżlazzjoni dwar il-MSU fir-rigward tar-rekwiżiti ta’ superviżjoni. |
105 |
Għalhekk, minn naħa, il-leġiżlazzjoni tal-Unjoni fil-qasam tar-riżoluzzjoni tal-istituzzjonijiet għandha l-għan, fir-rigward tal-kontribuzzjonijiet ex ante, li tiggarantixxi, kif jirriżulta mill-punt 42 iktar ’il fuq, b’loġika bbażata fuq l-assigurazzjoni, li s-settur finanzjarju jipprovdi riżorsi finanzjarji suffiċjenti għas-SRM sabiex ikun jista’ jissodisfa l-funzjonijiet tiegħu u li tinkoraġġixxi lill-istituzzjonijiet jadottaw modi ta’ funzjonament inqas riskjużi. |
106 |
Min-naħa l-oħra, il-leġiżlazzjoni tal-Unjoni dwar ir-rekwiżiti prudenzjali għandha, min-naħa tagħha, l-għan, skont il-premessa 32 tar-Regolament Nru 575/2013, li tinkoraġġixxi l-attivitajiet bankarji ekonomikament utli li jservu l-interess ġenerali u li tiskoraġġixxi l-ispekulazzjoni finanzjarja mhux vijabbli, mingħajr valur miżjud reali, iżda wkoll, skont il-premessa 42 ta’ dan ir-regolament, li tapplika l-aħjar metodi ta’ kejl u ta’ ġestjoni tar-riskju u li tużahom għar-rekwiżiti ta’ fondi proprji regolatorji. |
107 |
Minn dan isegwi, b’mod iktar partikolari, li l-evalwazzjoni tar-riskju fl-applikazzjoni tal-leġiżlazzjoni dwar is-SRM u l-evalwazzjoni tar-riskju fil-kuntest tal-MSU jissodisfaw għanijiet differenti. Għalhekk, l-evalwazzjoni tar-riskju taħt il-pilastru II tal-MSU titwettaq sabiex jiġu ssodisfati r-rekwiżiti prudenzjali stabbiliti minnu bl-għan li jiġi żgurat li istituzzjoni partikolari jkollha fondi proprji suffiċjenti sabiex tindirizza kwalunkwe riskju speċifiku li ma jkunx kopert mill-pilastru I tal-MSU, li jikkorrispondi għall-evalwazzjoni trasversali tar-riskju ta’ istituzzjoni. Ir-riżultat ta’ tali evalwazzjoni huwa intiż sabiex jiddetermina r-rekwiżiti prudenzjali li għalihom istituzzjoni partikolari għandha tkun suġġetta sabiex jiġi evitat li ssib ruħha f’sitwazzjoni ta’ falliment. |
108 |
Min-naħa l-oħra, l-evalwazzjoni tar-riskju fil-kuntest tal-aġġustament tal-kontribuzzjoni annwali bażika skont il-profil tar-riskju, prevista fil-punt (b) tat-tieni subparagrafu tal-Artikolu 70(2) tar-Regolament Nru 806/2014 u fl-Artikoli 5 sa 9 tar-Regolament Delegat 2015/63, titwettaq sabiex jitqassmu l-kontribuzzjonijiet ex ante bejn l-istituzzjonijiet ikkonċernati kollha. Ir-riżultat ta’ tali evalwazzjoni għandu tendenza li jevalwa mhux biss ir-riskju ta’ falliment ta’ istituzzjoni partikolari, iżda wkoll, b’mod iktar wiesa’, ir-riskju tal-użu tas-SRF minn istituzzjoni li tkun qiegħda tfalli. |
109 |
Barra minn hekk, il-leġiżlazzjoni dwar is-SRM tissodisfa loġika partikolari fis-sens li l-profil tar-riskju ta’ istituzzjoni partikolari huwa evalwat ukoll fid-dawl tal-profil tar-riskju tal-istituzzjonijiet ikkonċernati l-oħra kollha. |
110 |
Fid-dawl tal-iskopijiet u tal-għanijiet speċifiċi tal-leġiżlazzjoni dwar il-MSU u ta’ dik dwar is-SRM, kif ukoll tal-loġika komparattiva ta’ dan tal-aħħar, ma jista’ jinsilet l-ebda ksur tal-prinċipju ta’ ugwaljanza fit-trattament mis-sempliċi fatt li l-kuntest ġuridiku li jirregola l-kalkolu tal-kontribuzzjonijiet ex ante tas-SRM ma jinkludix, bħala tali, il-kriterji ta’ evalwazzjoni tar-riskju previsti fil-kuntest tal-MSU. |
111 |
Konsegwentement, hemm lok li t-tieni lment tal-ewwel parti tal-ewwel motiv jiġi miċħud bħala infondat u, miegħu, din il-parti kollha kemm hi għandha tiġi miċħuda bħala infondata. |
b) Fuq it‑tielet parti, ibbażata fuq in‑natura inġustifikata tal‑assenza ta’ tnaqqis tal‑impenji eliġibbli li jissodisfaw ir‑rekwiżiti prudenzjali skont il‑MREL
112 |
Ir-rikorrenti ssostni li l-Artikolu 70(1) u (2) tar-Regolament Nru 806/2014 kif ukoll l-Artikoli 6 u 7 u l-Anness I tar-Regolament Delegat 2015/63 jiksru l-prinċipju ta’ ugwaljanza fit-trattament minħabba li la l-punt (a) tat-tieni subparagrafu tal-Artikolu 70(2) tar-Regolament Nru 806/2014 u lanqas l-Artikolu 5(1) tar-Regolament Delegat 2015/63 ma jipprevedu tnaqqis tal-impenji eliġibbli tal-obbligazzjonijiet li jittieħdu inkunsiderazzjoni sabiex tiġi kkalkolata l-kontribuzzjoni annwali bażika. Din il-leġiżlazzjoni kellha tipprevedi tali tnaqqis, peress li l-impenji eliġibbli jikkostitwixxu “kważi ekwità” li tiġi stabbilita sabiex jiġu ssodisfatti r-rekwiżiti prudenzjali skont l-MREL u li sservi sabiex tassorbi t-telf kif ukoll sabiex jiġi stabbilit l-istrument ta’ rikapitalizzazzjoni interna. |
113 |
Is-SRB, il-Parlament, il-Kunsill u l-Kummissjoni jikkontestaw dan l-argument. |
114 |
Fid-dawl tal-preċiżazzjonijiet ipprovduti mir-rikorrenti waqt is-seduta, għandu jiġi kkonstatat li hija ssostni, essenzjalment, fl-ewwel lok, li l-ksur tal-prinċipju ta’ ugwaljanza fit-trattament jirriżulta mill-fatt li l-impenji eliġibbli jinsabu f’sitwazzjoni komparabbli għall-fondi proprji, iżda huma ttrattati b’mod differenti minn dawn il-fondi sa fejn ma humiex esklużi, skont il-punt (a) tat-tieni subparagrafu tal-Artikolu 70(2) tar-Regolament Nru 806/2014, mill-obbligazzjonijiet li għandhom jittieħdu inkunsiderazzjoni sabiex tiġi kkalkolata l-kontribuzzjoni annwali bażika. |
115 |
F’dan ir-rigward, għandu jitfakkar li, skont il-punt (a) tat-tieni subparagrafu tal-Artikolu 70(2) tar-Regolament Nru 806/2014, il-fondi proprji huma esklużi mill-obbligazzjonijiet li għandhom jittieħdu inkunsiderazzjoni sabiex tiġi kkalkolata l-kontribuzzjoni annwali bażika. Min-naħa l-oħra, la l-Artikolu 70(1) tar-Regolament Nru 806/2014 u lanqas l-Artikolu 5(1) tar-Regolament Delegat 2015/63, li jipprevedu l-esklużjoni ta’ ċerti obbligazzjonijiet mill-kalkolu tal-kontribuzzjoni annwali bażika, ma eskludew l-impenji eliġibbli tal-imsemmija obbligazzjonijiet. |
116 |
Fid-dawl tal-ġurisprudenza ċċitata fil-punt 40 iktar ’il fuq, għandu jiġi eżaminat jekk, fid-dawl tal-iskop u tal-għan tar-Regolament Nru 806/2014, l-impenji eliġibbli jinsabux f’sitwazzjoni komparabbli għal dik tal-fondi proprji, b’tali mod li għandhom jiġu esklużi mill-kalkolu tal-kontribuzzjoni annwali bażika. |
117 |
Dwar dan il-punt, għandu jiġi kkonstatat li, konformement mal-Artikolu 17(1) tar-Regolament Nru 806/2014 u mal-Artikolu 48(1) tad-Direttiva 2014/59, fil-każ ta’ applikazzjoni tal-istrument ta’ rikapitalizzazzjoni interna għal istituzzjoni fil-kuntest ta’ proċedura ta’ riżoluzzjoni, l-awtoritajiet nazzjonali ta’ riżoluzzjoni jeżerċitaw is-setgħat ta’ żvalutazzjoni u ta’ konverżjoni tal-krediti, l-ewwel fuq il-fondi proprji u, sussegwentement, “jekk, u biss jekk” il-fondi proprji disponibbli ma setgħux jassorbu t-telf, fuq l-impenji eliġibbli. |
118 |
Barra minn hekk, bis-saħħa tal-Artikolu 21(1) u (7a) tar-Regolament Nru 806/2014, is-SRB jeżerċita s-setgħat ta’ żvalutazzjoni jew ta’ konverżjoni tal-impenji eliġibbli, indipendentement minn miżura ta’ riżoluzzjoni, biss fir-rigward tal-impenji eliġibbli li jissodisfaw il-kundizzjonijiet speċifiċi u restrittivi tal-Artikolu 12g(2)(a) ta’ dan ir-regolament, ħlief għall-kundizzjoni marbuta mal-maturità residwa tal-impenji msemmija fl-Artikolu 72c(1) tar-Regolament Nru 575/2013. Dawn id-dispożizzjonijiet juru li l-possibbiltajiet għas-SRB li jwettaq, indipendentement minn miżura ta’ riżoluzzjoni, l-iżvalutazzjoni u l-konverżjoni tal-impenji eliġibbli huma rregolati minn kundizzjonijiet speċifiċi u limitattivi, b’differenza mill-każ tal-fondi proprji. |
119 |
Fl-aħħar nett, l-Artikolu 27(5) tar-Regolament Nru 806/2014 jipprevedi li, f’ċirkustanzi eċċezzjonali, meta jiġi applikat l-istrument ta’ rikapitalizzazzjoni interna, ċerti impenji eliġibbli jistgħu jiġu esklużi totalment jew parzjalment mill-kamp ta’ applikazzjoni tas-setgħat ta’ żvalutazzjoni jew ta’ konverżjoni. Issa, tali possibbiltà ma teżistix fir-rigward tal-fondi proprji. |
120 |
Għaldaqstant, kuntrarjament għal dak li ssostni r-rikorrenti, l-impenji eliġibbli ma għandhomx l-istess kapaċità li jassorbu t-telf tal-istituzzjonijiet bħall-fondi proprji. |
121 |
F’dawn iċ-ċirkustanzi, għandu jiġi konkluż li, minkejja r-rekwiżiti li jirriżultaw mill-ġurisprudenza ċċitata fil-punt 39 iktar ’il fuq, ir-rikorrenti ma wrietx li l-impenji eliġibbli kienu jinsabu f’sitwazzjoni komparabbli ma’ dik tal-fondi proprji fir-rigward tal-kapaċità tagħhom li jassorbu telf u li jimplimentaw l-istrument ta’ rikapitalizzazzjoni interna. |
122 |
Fit-tieni lok, ir-rikorrenti tikkritika l-fatt li l-Artikolu 5(1) tar-Regolament Delegat 2015/63 ma jipprevedix tnaqqis tal-impenji eliġibbli mill-obbligazzjonijiet li jservu bħala bażi għall-kalkolu sabiex tiġi ddeterminata l-kontribuzzjoni annwali bażika. |
123 |
F’dan ir-rigward, għandu jiġi kkonstatat li din id-dispożizzjoni lanqas ma tipprevedi l-esklużjoni tal-fondi proprji mill-obbligazzjonijiet li jservu bħala bażi ta’ kalkolu sabiex tiġi ddeterminata l-kontribuzzjoni annwali bażika, peress li din l-esklużjoni hija prevista fil-punt (a) tat-tieni subparagrafu tal-Artikolu 70(2) tar-Regolament Nru 806/2014. |
124 |
Barra minn hekk, mill-ġurisprudenza jirriżulta li t-teħid inkunsiderazzjoni tal-prinċipju ta’ ugwaljanza fit-trattament ma jistax jiġġustifika t-tnaqqis tal-impenji eliġibbli mill-obbligazzjonijiet li jservu bħala bażi għall-kalkolu sabiex tiġi ddeterminata l-kontribuzzjoni annwali bażika, peress li r-Regolament Delegat 2015/63 għamel distinzjoni bejn sitwazzjonijiet li għandhom karatteristiċi partikolari notevoli, direttament marbuta mar-riskji rrappreżentati mill-obbligazzjonijiet inkwistjoni (ara, f’dan is-sens, is-sentenza tat‑3 ta’ Diċembru 2019, Iccrea Banca,C‑414/18, EU:C:2019:1036, punt 95). |
125 |
Mill-kunsiderazzjonijiet preċedenti jirriżulta li l-fatt li fl-Artikolu 5(1) tar-Regolament Delegat 2015/63 ma huwiex previst it-tnaqqis tal-impenji eliġibbli mill-obbligazzjonijiet li jservu bħala bażi għall-kalkolu sabiex tiġi ddeterminata l-kontribuzzjoni annwali bażika ma jikkostitwixxix ksur tal-prinċipju ta’ ugwaljanza fit-trattament. |
126 |
Konsegwentement, it-tielet parti tal-ewwel motiv għandha tiġi miċħuda bħala infondata. |
c) Fuq ir‑raba’ parti, ibbażata fuq il‑fatt li l‑kontribuzzjonijiet ex ante ma humiex rappreżentattivi tar‑riskju realment sostnut minħabba l‑kriterji ta’ kalkolu tal‑multiplikatur tal‑aġġustament
127 |
Permezz tar-raba’ parti tal-ewwel motiv, ir-rikorrenti ssostni li l-Artikolu 70(1) u (2) tar-Regolament Nru 806/2014 kif ukoll l-Artikoli 6 u 7 u l-Anness I tar-Regolament Delegat 2015/63 jiksru l-prinċipju ta’ ugwaljanza fit-trattament minħabba li l-kontribuzzjonijiet ex ante ma humiex rappreżentattivi tar-riskju realment sostnut minħabba l-kriterji ta’ kalkolu tal-multiplikatur tal-aġġustament. F’dan ir-rigward, ir-rikorrenti tqajjem tliet ilmenti bbażati, l-ewwel wieħed, fuq l-assenza ta’ teħid inkunsiderazzjoni tal-profil tar-riskju globali intrinsiku ta’ kull istituzzjoni, it-tieni wieħed, fuq l-assenza ta’ evalwazzjoni tal-fatturi ta’ riskju fid-dawl ta’ kwalunkwe rekwiżit impost mill-awtorità ta’ superviżjoni fil-kuntest tal-MSU u, it-tielet wieħed, fuq l-impossibbiltà li tittieħed inkunsiderazzjoni b’mod globali kull speċifiċità individwali ta’ kull istituzzjoni. |
1) Fuq l‑ewwel ilment, ibbażat fuq l‑assenza ta’ teħid inkunsiderazzjoni tal‑profil ta’ riskju globali intrinsiku ta’ kull istituzzjoni
128 |
Ir-rikorrenti ssostni li l-kriterji stabbiliti fl-“Artikoli 6 et seq.” tar-Regolament Delegat 2015/63 huma bbażati fuq it-teħid inkunsiderazzjoni ta’ fatturi tar-riskju meqjusa individwalment, u mhux fuq it-teħid inkunsiderazzjoni tal-profil tar-riskju globali intrinsiku ta’ kull istituzzjoni. |
129 |
Is-SRB, il-Parlament, il-Kunsill u l-Kummissjoni jikkontestaw dan l-argument. |
130 |
Qabelxejn, għandu jiġi rrilevat li, bi ksur tal-ġurisprudenza ċċitata fil-punt 39 iktar ’il fuq, ir-rikorrenti ma identifikatx bi preċiżjoni s-sitwazzjonijiet komparabbli li, fil-fehma tagħha, ġew ittrattati b’mod differenti jew is-sitwazzjonijiet differenti li, fil-fehma tagħha, ġew ittrattati b’mod identiku f’dak li jirrigwarda d-determinazzjoni tal-kriterji tal-aġġustament tal-kontribuzzjoni annwali bażika skont il-profil tar-riskju mil-leġiżlatur tal-Unjoni. |
131 |
Sussegwentement, huwa stabbilit li l-kriterji ta’ kalkolu tal-multiplikatur tal-aġġustament, li jwasslu għall-aġġustament tal-kontribuzzjoni annwali bażika skont il-kriterju tar-riskju, japplikaw għall-istituzzjonijiet ikkonċernati kollha, bħar-rikorrenti, minbarra dawk li huma eliġibbli għall-ħlas ta’ kontribuzzjoni f’daqqa skont l-Artikolu 10 tar-Regolament Delegat 2015/63 u dawk li huma msemmija fl-Artikolu 11 ta’ dan ir-regolament delegat. F’dawn iċ-ċirkustanzi, ir-rikorrenti ma ġietx ittrattata b’mod differenti fir-rigward tal-imsemmija kriterji. |
132 |
Barra minn hekk, ir-rikorrenti ma sostnietx, u wisq inqas uriet, li l-ksur tal-prinċipju ta’ ugwaljanza fit-trattament jirriżulta mill-fatt li hija ma għandhiex tiġi ttrattata bl-istess mod bħall-istituzzjonijiet l-oħra fir-rigward tal-applikazzjoni tal-kriterji ta’ kalkolu tal-multiplikatur tal-aġġustament imsemmija iktar ’il fuq. |
133 |
Barra minn hekk, anki jekk jitqies li l-kritika tar-rikorrenti għandha tinftiehem fis-sens li din tal-aħħar issostni li hija ma tinsabx f’sitwazzjoni komparabbli għal dik ta’ istituzzjonijiet oħra u li din għandha tiġi ttrattata b’mod differenti, għandu jiġi rrilevat li r-rikorrenti ma ppreżentat l-ebda element konkret lill-Qorti Ġenerali li juri li hija tinsab f’tali sitwazzjoni. |
134 |
Fl-aħħar nett, u fi kwalunkwe każ, l-argument tar-rikorrenti huwa bbażat fuq premessi żbaljati. Fl-ewwel lok, ir-rikorrenti ssostni b’mod żbaljat li l-kriterji stabbiliti mir-Regolament Delegat 2015/63 ma jiħdux inkunsiderazzjoni l-profil tar-riskju globali intrinsiku tal-istituzzjonijiet. Fil-fatt, diversi mill-erba’ pilastri tar-riskju msemmija fl-Artikolu 6 tar-Regolament Delegat 2015/63, b’mod partikolari dak dwar l-importanza tal-istituzzjoni għall-istabbiltà tas-sistema finanzjarja jew tal-ekonomija, jippermettu tali analiżi globali. |
135 |
Fit-tieni lok, għandhom jiġu miċħuda l-kritiki tar-rikorrenti kontra l-kriterji previsti fl-“Artikoli 6 et seq.” tar-Regolament Delegat 2015/63 minħabba li jieħdu inkunsiderazzjoni l-banek reġjonali ta’ daqs żgħir, li jwassal għal preġudizzju negattiv kontra l-istituzzjonijiet ta’ daqs kbir minħabba li dawn il-banek reġjonali jżommu ammont sinjifikattiv ta’ depożiti koperti, u dan kuntrarjament għall-istituzzjonijiet ta’ daqs kbir, bħar-rikorrenti, li l-attivitajiet tagħhom madankollu ma humiex iktar riskjużi. |
136 |
Fil-fatt, minn naħa, mill-punti 51 sa 63 iktar ’il fuq jirriżulta li r-rikorrenti ma stabbilixxietx li l-esklużjoni tad-depożiti koperti għall-finijiet tal-kalkolu tal-kontribuzzjoni ex ante kienet tikser il-prinċipju ta’ ugwaljanza fit-trattament. Min-naħa l-oħra, fid-dawl tal-kunsiderazzjonijiet imsemmija fil-punti 94 u 96 iktar ’il fuq, l-istituzzjonijiet ta’ daqs kbir li għandhom ammont ta’ obbligazzjonijiet għoli ħafna, bħar-rikorrenti, ma jirrappreżentawx profil tar-riskju ekwivalenti għal dak tal-istituzzjonijiet żgħar u medji jew iktar baxx minn dan tal-aħħar. Konsegwentement, dawn iż-żewġ kategoriji ma jinsabux f’sitwazzjoni komparabbli għall-finijiet tal-evalwazzjoni li għandu jwettaq is-SRB sabiex jikkalkola l-kontribuzzjonijiet ex ante. |
137 |
Għaldaqstant, dan l-ilment għandu jiġi miċħud bħala infondat. |
2) Fuq it‑tieni lment, ibbażat fuq l‑assenza ta’ evalwazzjoni tal‑fatturi tar‑riskju fid‑dawl tar‑rekwiżiti imposti mill‑awtorità ta’ superviżjoni fil‑kuntest tal‑MSU
138 |
Ir-rikorrenti ssostni li l-metodu tal-aġġustament tal-kontribuzzjoni annwali bażika skont il-profil tar-riskju jwassal sabiex il-fatturi tar-riskju jiġu evalwati indipendentement minn kull rekwiżit impost mill-awtorità ta’ superviżjoni fil-kuntest tal-MSU. Issa, skont il-kriterji tal-MSU, l-istituzzjonijiet Franċiżi huma l-inqas riskjużi tal-unjoni bankarja, filwaqt li jidhru li huma l-iktar riskjużi skont il-kriterji ta’ evalwazzjoni stabbiliti mir-Regolament Delegat 2015/63. |
139 |
Is-SRB u l-Kunsill jikkontestaw dan l-argument. |
140 |
Dan l-ilment u t-tieni lment tal-ewwel parti tal-ewwel motiv, li ġie miċħud fil-punti 100 sa 110 iktar ’il fuq, jikkoinċidu fis-sustanza tagħhom. |
141 |
Għaldaqstant, dan l-ilment għandu jiġi miċħud għall-istess raġunijiet. |
3) Fuq it‑tielet ilment, ibbażat fuq l‑impossibbiltà li tittieħed inkunsiderazzjoni b’mod globali kull speċifiċità individwali ta’ kull istituzzjoni
142 |
Ir-rikorrenti tqis li l-Artikolu 70(1) u (2) tar-Regolament Nru 806/2014 u l-Artikoli 6 u 7 kif ukoll l-Anness I tar-Regolament Delegat 2015/63 jiksru l-prinċipju ta’ ugwaljanza fit-trattament minħabba li, fil-kuntest ta’ proċess applikat b’mod uniformi għall-istituzzjonijiet kollha u sabiex l-ammont li jikkorrispondi għal-livell annwali fil-mira jinqasam b’mod ugwali u proporzjonali bejniethom, ma huwiex possibbli li tittieħed inkunsiderazzjoni b’mod globali kull speċifiċità individwali ta’ kull istituzzjoni. |
143 |
Is-SRB u l-Kunsill jikkontestaw dan l-argument. |
144 |
Qabelxejn, għandu jiġi rrilevat li, permezz tal-formulazzjoni tal-ilment tagħha, ir-rikorrenti stess tirrikonoxxi li l-metodu kkritikat ta’ kalkolu tal-kontribuzzjonijiet ex ante japplika bl-istess mod għall-istituzzjonijiet kollha. |
145 |
Sussegwentement, jekk il-kritika tar-rikorrenti kellha tinftiehem fis-sens li din tal-aħħar issostni li hija ma tinsabx f’sitwazzjoni komparabbli għal dik ta’ istituzzjonijiet oħra u li din kellha tiġi ttrattata b’mod differenti, għandu jiġi rrilevat li r-rikorrenti ma ppreżentat l-ebda element konkret lill-Qorti Ġenerali li juri li hija tinsab f’tali sitwazzjoni. |
146 |
Fl-aħħar nett, u fi kwalunkwe każ, l-argument tar-rikorrenti jsostni, fir-realtà, li l-kriterji ta’ aġġustament tal-kontribuzzjoni annwali bażika skont il-profil tar-riskju ma humiex xierqa. Issa, ir-rikorrenti ma pproduċiet l-ebda prova ddettaljata lill-Qorti Ġenerali li hija intiża li turi, b’mod konkret, in-natura mhux xierqa ta’ dawn il-kriterji, peress li hija sempliċement tifformula affermazzjonijiet mhux issostanzjati. |
147 |
Konsegwentement, għandhom jiġu miċħuda t-tielet ilment u, miegħu, ir-raba’ parti tal-ewwel motiv kif ukoll dan il-motiv kollu kemm hu. |
2. Fuq it‑tieni motiv, ibbażat fuq ksur tal‑prinċipju ta’ proporzjonalità
148 |
Ir-rikorrenti ssostni li l-Artikolu 70(1) u l-punti (a) u (b) tat-tieni subparagrafu tal-Artikolu 70(2) tar-Regolament Nru 806/2014 kif ukoll l-Artikoli 6 u 7 u l-Anness I tar-Regolament Delegat 2015/63 jistabbilixxu modalitajiet ta’ kalkolu tal-kontribuzzjonijiet ex ante li jiksru l-prinċipju ta’ proporzjonalità. |
149 |
Is-SRB, il-Parlament, il-Kunsill u l-Kummissjoni jikkontestaw dan l-argument. |
150 |
Il-prinċipju ta’ proporzjonalità, li jagħmel parti mill-prinċipji ġenerali tad-dritt tal-Unjoni, jeżiġi li l-atti tal-istituzzjonijiet tal-Unjoni jkunu xierqa sabiex jitwettqu l-għanijiet leġittimi li jridu jintlaħqu mil-leġiżlazzjoni inkwistjoni u ma jeċċedux il-limiti ta’ dak li huwa neċessarju għat-twettiq ta’ dawn l-għanijiet, filwaqt li meta jkun hemm possibbiltà ta’ għażla bejn diversi miżuri xierqa, għandha tintgħażel l-inqas waħda restrittiva, u li l-inkonvenjenzi li jinħolqu ma għandhomx ikunu sproporzjonati fir-rigward tal-għanijiet previsti (sentenzi tal‑4 ta’ Mejju 2016, Philip Morris Brands et, C‑547/14, EU:C:2016:325, punt 165, u tal‑20 ta’ Jannar 2021, ABLV Bank vs SRB,T‑758/18, EU:T:2021:28, punt 142; ara wkoll, f’dan is-sens, is-sentenza tat‑8 ta’ Ġunju 2010, Vodafone et, C‑58/08, EU:C:2010:321, punt 51). |
151 |
Fir-rigward tal-istħarriġ ġudizzjarju tal-kundizzjonijiet imsemmija fil-punt 150 iktar ’il fuq, għandu jitfakkar li, fid-determinazzjoni tal-metodu ta’ kalkolu tal-kontribuzzjonijiet ex ante, il-leġiżlatur tal-Unjoni jgawdi minn setgħa wiesgħa ta’ evalwazzjoni, peress li huwa għandu jintervjeni f’qasam li jinvolvi, min-naħa tiegħu, għażliet ta’ natura politika u ekonomika u li fih huwa mitlub iwettaq evalwazzjonijiet kumplessi (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punti 117 u 118). |
152 |
Bl-istess mod, fil-kuntest ta’ setgħa ddelegata fis-sens tal-Artikolu 290 TFUE, il-Kummissjoni għandha, fil-kuntest tal-eżerċizzju tal-kompetenzi mogħtija lilha, setgħa wiesgħa ta’ evalwazzjoni meta tintalab, b’mod partikolari, twettaq evalwazzjonijiet u eżamijiet kumplessi (ara, f’dan is-sens, is-sentenza tal‑11 ta’ Mejju 2017, Dyson vs Il‑Kummissjoni, C‑44/16 P, EU:C:2017:357, punt 53 u l-ġurisprudenza ċċitata). |
153 |
Dan japplika, b’mod partikolari, għar-Regolament Delegat 2015/63, li permezz tiegħu l-Kummissjoni ppreċiżat ir-regoli ta’ aġġustament tal-kontribuzzjonijiet ex ante għall-profil tar-riskju, skont l-Artikolu 103(7) tad-Direttiva 2014/59. |
154 |
Fil-fatt, kif jirriżulta mid-dokumenti relatati mal-adozzjoni tar-Regolament Delegat 2015/63, b’mod partikolari d-dokumenti “JRC technical work supporting Commission second level legislation on risk based contributions to the (single) resolution fund” (Studju tekniku tal-JRC insostenn tal-leġiżlazzjoni tat-tieni livell tal-Kummissjoni dwar il-kontribuzzjonijiet ibbażati fuq ir-riskji għall-fond (uniku) ta’ riżoluzzjoni), iktar ’il quddiem l-“istudju tekniku tal-JRC”), u “Commission Staff Working Document: estimates of the application of the proposed methodology for the calculation of contributions to resolution financing arrangements” (Dokument ta’ Ħidma tal-Persunal tal-Kummissjoni: stimi tal-applikazzjoni tal-metodu propost għall-kalkolu tal-kontribuzzjonijiet lill-mekkaniżmi ta’ finanzjament tar-riżoluzzjonijiet), it-tfassil ta’ tali regoli kien jinvolvi evalwazzjonijiet u eżamijiet kumplessi min-naħa tal-Kummissjoni sa fejn din kellha teżamina l-elementi differenti li fid-dawl tagħhom id-diversi tipi ta’ riskju kienu kkunsidrati fis-settur bankarju u f’dak finanzjarju. |
155 |
F’dawn iċ-ċirkustanzi, u konformement mal-ġurisprudenza (ara, f’dan is-sens, is-sentenzi tal‑4 ta’ Mejju 2016, Il‑Polonja vs Il‑Parlament u Il‑Kunsill, C‑358/14, EU:C:2016:323, punti 79, 96 u 97 u l-ġurisprudenza ċċitata, u tal‑21 ta’ Diċembru 2022, Firearms United Network et vs Il‑Kummissjoni, T‑187/21, mhux ippubblikata, taħt appell, EU:T:2022:848, punti 122 u 123 u l-ġurisprudenza ċċitata), l-istħarriġ, mill-Qorti Ġenerali, tal-osservanza tal-prinċipju ta’ proporzjonalità għandu jkun limitat għall-eżami ta’ jekk il-miżuri stabbiliti mil-leġiżlatur tal-Unjoni u mill-Kummissjoni humiex manifestament mhux xierqa fid-dawl tal-għan li għandu jintlaħaq, ta’ jekk dawn imorrux manifestament lil hinn minn dak li huwa neċessarju sabiex jintlaħaq dan l-għan jew ta’ jekk dawn ma jinvolvux inkonvenjenzi manifestament sproporzjonati fid-dawl tal-imsemmi għan. |
156 |
F’dan ir-rigward, ir-rikorrenti essenzjalment issostni tliet argumenti. |
157 |
Fl-ewwel lok, għandu jiġi eżaminat l-argument tar-rikorrenti li jipprovdi li l-Artikolu 70(1) u l-punti (a) u (b) tat-tieni subparagrafu tal-Artikolu 70(2) tar-Regolament Nru 806/2014 kif ukoll l-Artikoli 6 u 7 u l-Anness I tar-Regolament Delegat 2015/63 jiksru l-prinċipju ta’ proporzjonalità minħabba li l-kalkolu tal-kontribuzzjoni ex ante ta’ kull istituzzjoni jiddependi fuq is-sitwazzjoni ta’ istituzzjonijiet oħra, mingħajr madankollu ma jiġi osservat l-għan ta’ tqassim ibbilanċjat, skont ir-riskju. B’mod partikolari, minħabba din l-interdipendenza bejn l-istituzzjonijiet, is-settur bankarju Franċiż iġarrab piż sproporzjonat. |
158 |
Fir-rigward, qabelxejn, tan-natura xierqa tal-metodu ta’ kalkolu tal-kontribuzzjonijiet ex ante, minn naħa, għandu jitfakkar li l-Qorti tal-Ġustizzja diġà aċċettat li l-leġiżlatur tal-Unjoni seta’ jagħżel, fil-kuntest tas-setgħa wiesgħa ta’ evalwazzjoni tiegħu, metodu ta’ kalkolu tal-kontribuzzjonijiet ex ante li kien ibbażat fuq it-teħid inkunsiderazzjoni komparattiv, b’mod partikolari, tas-sitwazzjoni finanzjarja ta’ kull istituzzjoni awtorizzata fl-Istati Membri parteċipanti (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 118). |
159 |
Min-naħa l-oħra, ir-rikorrenti ma invokat l-ebda element li jista’ jikkontesta r-raġunijiet li jsostnu din il-konstatazzjoni jew l-affermazzjoni tas-SRB li tali metodu ta’ kalkolu huwa intiż sabiex jinkoraġġixxi lill-istituzzjonijiet jadottaw modi ta’ funzjonament inqas riskjużi billi jħeġġiġhom, b’mod partikolari, itejbu l-pożizzjoni tagħhom fid-dawl ta’ dik tal-istituzzjonijiet l-oħra. |
160 |
F’dawn iċ-ċirkustanzi, ir-rikorrenti ma tistax issostni li l-kalkolu tal-kontribuzzjonijiet ex ante abbażi tat-teħid inkunsiderazzjoni komparattiv tas-sitwazzjoni finanzjarja ta’ kull istituzzjoni jikkostitwixxi miżura manifestament mhux xierqa sabiex jintlaħaq l-għan imsemmi fil-punt 159 iktar ’il fuq. |
161 |
Fir-rigward tan-natura neċessarja tal-metodu msemmi fil-punt 159 iktar ’il fuq, ir-rikorrenti ssostni li l-kontribuzzjonijiet ex ante setgħu jiġu kkalkolati permezz ta’ metodu ieħor, li jkun ibbażat biss fuq id-data speċifika għall-istituzzjoni kkonċernata. Madankollu, anki jekk jitqies li tali metodu jwassal għal kontribuzzjoni ex ante inqas għolja u li għalhekk huwa inqas restrittiv għall-istituzzjonijiet, ma huwiex stabbilit li dan jippermetti li jintlaħaq l-għan imsemmi fil-punt 159 iktar ’il fuq b’mod effikaċi daqs il-metodu ta’ kalkolu komparattiv stabbilit mil-leġiżlatur tal-Unjoni u mill-Kummissjoni. |
162 |
Fid-dawl tal-kontenut tal-argumenti tar-rikorrenti, ma huwiex għalhekk stabbilit li l-metodu ta’ kalkolu jmur manifestament lil hinn minn dak li huwa neċessarju sabiex jintlaħaq l-għan imsemmi fil-punt 159 iktar ’il fuq. |
163 |
Fl-aħħar nett, ir-rikorrenti ma wrietx li l-kalkolu tal-kontribuzzjonijiet ex ante abbażi tat-teħid inkunsiderazzjoni komparattiv tas-sitwazzjoni finanzjarja ta’ kull istituzzjoni jwassal għal inkonvenjenzi manifestament sproporzjonati fid-dawl tal-għan li għandu jintlaħaq, deskritt fil-punt 159 iktar ’il fuq. |
164 |
Fit-tieni lok, ir-rikorrent isostni li l-evalwazzjoni tal-profil tar-riskju tal-istituzzjonijiet għall-finijiet tal-kalkolu tal-kontribuzzjonijiet ex ante hija bbażata fuq kriterji li ma humiex konnessi ma’ dawk applikati fil-kuntest tal-MSU. Minħabba din l-assenza ta’ korrelazzjoni, ir-rikorrenti tkun suġġetta għal kontribuzzjoni ex ante li l-ammont tagħha jkun artifiċjalment għoli u sproporzjonat. |
165 |
Fir-rigward, l-ewwel, tan-natura xierqa tal-kriterji ta’ evalwazzjoni tal-profil tar-riskju tal-istituzzjonijiet, kif stabbiliti mill-Artikolu 103(7) tad-Direttiva 2014/59 – li għalih jirreferi barra minn hekk il-punt (b) tat-tieni subparagrafu tal-Artikolu 70(2) tar-Regolament Nru 806/2014 – u mill-Artikoli 6 u 7 kif ukoll mill-Anness I tar-Regolament Delegat 2015/63, mill-kontenut tagħhom kif ukoll mill-premessa 107 tad-Direttiva 2014/59, mill-premessa 109 tar-Regolament Nru 806/2014 u mill-premessa 5 tar-Regolament Delegat 2015/63 jirriżulta li dawn il-kriterji huma intiżi li jiżguraw li l-istituzzjonijiet li għandhom mod ta’ funzjonament iktar riskjuż ikunu obbligati jħallsu kontribuzzjonijiet ex ante ogħla minn dawk li adottaw mod ta’ funzjonament inqas riskjuż. |
166 |
Issa, ir-rikorrenti ma ppreżentat l-ebda element konkret lill-Qorti Ġenerali li jikkontesta l-fatt li l-imsemmija kriterji huma ta’ natura li jippermettu li jintlaħaq tali għan. F’dan ir-rigward, hija sempliċement għamlet dikjarazzjoni mhux issostanzjata li l-kriterji użati għall-evalwazzjoni tar-riskju fil-kuntest tal-MSU jkunu iktar xierqa sabiex jiġi żgurat li l-istituzzjonijiet li jirrappreżentaw riskju għoli jikkontribwixxu l-iktar lis-SRF. Issa, fid-dawl tal-kunsiderazzjonijiet stabbiliti fil-punti 104 sa 111 iktar ’il fuq, tali argument ma jistax jintlaqa’, peress li l-għanijiet tal-leġiżlazzjoni dwar is-SRM u dawk dwar il-MSU huma differenti. |
167 |
F’dawn iċ-ċirkustanzi, għandhom jiġu miċħuda l-argumenti tar-rikorrenti intiżi sabiex juru li d-dispożizzjonijiet imsemmija fil-punt 165 iktar ’il fuq, li jipprevedu l-kriterji ta’ aġġustament tal-kontribuzzjonijiet ex ante għall-profil tar-riskju tal-istituzzjonijiet, huma manifestament mhux xierqa fid-dawl tal-għan imfakkar fl-imsemmi punt. |
168 |
It-tieni nett, fir-rigward tan-natura neċessarja tat-teħid inkunsiderazzjoni tal-kriterji li jirriżultaw mid-dispożizzjonijiet imsemmija fil-punt 165 iktar ’il fuq, ir-rikorrenti tallega li teħid inkunsiderazzjoni possibbli tal-kriterji użati fil-kuntest tal-MSU, għall-finijiet tal-kalkolu tal-kontribuzzjonijiet ex ante, jista’ jwassal għal inqas spejjeż għall-istituzzjonijiet ikkonċernati. |
169 |
Madankollu, kif irrilevat il-Qorti tal-Ġustizzja fis-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB (C‑584/20 P u C‑621/20 P, EU:C:2021:601, punt 113), il-kriterji previsti mid-dispożizzjonijiet imsemmija fil-punt 165 iktar ’il fuq huma intiżi sabiex iqassmu l-ammont tal-livell annwali fil-mira bejn l-istituzzjonijiet ikkonċernati kollha. Għalhekk, jekk kriterji ta’ sostituzzjoni għal dawk li jirriżultaw minn dawn id-dispożizzjonijiet, bħall-kriterji użati fil-kuntest tal-MSU, iwasslu għal inqas piżijiet għal ċerti istituzzjonijiet, huma jwasslu, fl-istess ħin, għal iktar spejjeż għal istituzzjonijiet oħra. Minkejja dan, ir-rikorrenti ma spjegatx kif l-applikazzjoni tal-imsemmija kriterji ta’ sostituzzjoni toħloq inqas spejjeż għall-istituzzjonijiet ikkonċernati kollha. |
170 |
Barra minn hekk, anki jekk jitqies li tali kriterji jwasslu għal kontribuzzjoni ex ante inqas għolja għall-istituzzjonijiet, ir-rikorrenti ma tispeċifikax kif l-applikazzjoni ta’ dawn il-kriterji tippermetti li jintlaħaq l-għan stabbilit fil-punt 165 iktar ’il fuq b’mod daqstant effikaċi bħall-applikazzjoni tal-kriterji li jirriżultaw mid-dispożizzjonijiet imsemmija fl-imsemmi punt, minkejja l-fatt li, kif jirriżulta mill-punti 104 sa 111 iktar ’il fuq, l-għanijiet tal-MSU u, b’mod iktar partikolari, tal-leġiżlazzjoni tal-Unjoni dwar ir-rekwiżiti ta’ superviżjoni huma differenti minn dawk imsemmija fil-leġiżlazzjoni speċifika għar-riżoluzzjoni tal-istituzzjonijiet. |
171 |
F’dawn iċ-ċirkustanzi, ir-rikorrenti ma stabbilixxietx kif il-kriterji stabbiliti mid-dispożizzjonijiet imsemmija fil-punt 165 iktar ’il fuq marru manifestament lil hinn minn dak li huwa neċessarju sabiex jintlaħaq l-għan imsemmi fl-istess punt. |
172 |
It-tielet nett, ir-rikorrenti lanqas ma wriet li l-aġġustament tal-kontribuzzjonijiet ex ante għall-profil tar-riskju tal-istituzzjonijiet, fid-dawl tal-kriterji stabbiliti mid-dispożizzjonijiet imsemmija fil-punt 165 iktar ’il fuq, kien iwassal għal inkonvenjenzi manifestament sproporzjonati fid-dawl tal-għan li għandu jintlaħaq li huwa deskritt fil-punt imsemmi iktar ’il fuq. |
173 |
Fit-tielet lok, ir-rikorrenti ssostni li l-prinċipju ta’ proporzjonalità huwa miksur, peress li l-ammont tal-kontribuzzjonijiet ex ante huwa kważi esklużivament iddeterminat mill-kontribuzzjoni annwali bażika. Fil-fehma tagħha, il-parametru prinċipali tal-kontribuzzjonijiet ex ante jibqa’ d-daqs tal-karta tal-bilanċ iktar milli l-multiplikatur tal-aġġustament li, sa fejn ivarja minn 0.8 sa 1.5, ikollu influwenza limitata. Tali mekkaniżmu jimplika li l-istituzzjonijiet ta’ daqs kbir ikollhom il-kontribuzzjonijiet annwali bażiċi tagħhom sopravalutati, anki jekk ikollhom profil tar-riskju baxx fil-kuntest tal-MSU. |
174 |
F’dan ir-rigward, mill-punt (a) tat-tieni subparagrafu tal-Artikolu 70(2) tar-Regolament Nru 806/2014, moqri flimkien mal-premessa 5 tar-Regolament Delegat 2015/63, jirriżulta li l-kontribuzzjoni annwali bażika hija proporzjonali għall-ammont tal-obbligazzjonijiet tal-istituzzjoni kkonċernata, minbarra l-fondi proprji u d-depożiti koperti, fir-rigward tat-total tal-obbligazzjonijiet, minbarra l-fondi proprji u d-depożiti koperti, tal-istituzzjonijiet kollha awtorizzati fit-territorju tal-Istati Membri parteċipanti kollha, fejn din il-kontribuzzjoni hija għalhekk ibbażata fuq id-daqs tal-istituzzjoni. |
175 |
Fir-rigward tan-natura xierqa tat-teħid inkunsiderazzjoni tad-daqs tal-istituzzjonijiet għall-finijiet tal-kalkolu tal-kontribuzzjoni annwali bażika, għandu jitfakkar, fid-dawl tal-kunsiderazzjonijiet imsemmija fil-punt 87 iktar ’il fuq, li l-istituzzjonijiet li għandhom obbligazzjonijiet kbar – u li għalhekk għandhom daqs kbir – huma l-iktar suxxettibbli li għalihom jiġi applikat strument ta’ riżoluzzjoni u li għalhekk jibbenefikaw mill-finanzjamenti tas-SRF. |
176 |
Issa, huwa abbażi tal-kriterju tas-sinjifikat tal-obbligazzjonijiet tal-istituzzjonijiet – u, għaldaqstant, fuq id-daqs tagħhom – li l-leġiżlatur tal-Unjoni u l-Kummissjoni riedu jiggarantixxu l-għanijiet imfakkra fil-punt 42 iktar ’il fuq, li jikkonsistu, minn naħa, fl-għoti lis-SRM ta’ riżorsi finanzjarji suffiċjenti għall-finijiet ta’ applikazzjoni effiċjenti tal-istrumenti ta’ riżoluzzjoni u, min-naħa l-oħra, li l-istituzzjonijiet jiġu mħeġġa jadottaw modi ta’ funzjonament inqas riskjużi billi jnaqqsu, b’mod partikolari, l-obbligazzjonijiet tagħhom. |
177 |
F’dan ir-rigward, ir-rikorrenti ma wrietx li, billi bbażaw il-kalkolu tal-kontribuzzjoni annwali bażika fuq id-daqs tal-istituzzjonijiet, il-leġiżlatur tal-Unjoni u l-Kummissjoni kienu rrakkomandaw miżura manifestament mhux xierqa sabiex jintlaħqu l-għanijiet imsemmija fil-punt 176 iktar ’il fuq. |
178 |
Fir-rigward tan-natura neċessarja tal-kriterju relatat mad-daqs, ir-rikorrenti ssostni, essenzjalment, li, jekk il-kalkolu tal-kontribuzzjonijiet ex ante kien ibbażat iktar fuq il-multiplikatur tal-aġġustament milli fuq id-daqs tal-istituzzjonijiet, l-ammont ta’ dawn il-kontribuzzjonijiet ikun inqas għoli, peress li jirrifletti l-profil tar-riskju baxx tal-istituzzjonijiet. |
179 |
Issa, jekk l-argument tar-rikorrenti kellu jiġi interpretat fis-sens li din tal-aħħar titlob l-applikazzjoni ta’ firxa iktar wiesgħa tal-multiplikatur tal-aġġustament minn dik prevista fl-Artikolu 9(3) tar-Regolament Delegat 2015/63, jiġifieri firxa li tinkludi wkoll valuri ogħla minn 1.5 %, ma huwiex stabbilit li l-kalkolu tal-kontribuzzjonijiet ex ante abbażi ta’ tali firxa jkun iwassal għal inqas spejjeż għall-istituzzjonijiet. Fil-fatt, f’tali ipoteżi, il-multiplikatur tal-aġġustament jista’ jkun stabbilit għal valur ogħla minn 1.5 %, b’tali mod li l-ammont ta’ dawn il-kontribuzzjonijiet jiżdied. |
180 |
Għalhekk ma jistax jiġi allegat li, billi l-metodu ta’ kalkolu tal-imsemmija kontribuzzjonijiet previst mil-leġiżlatur tal-Unjoni u ppreċiżat mill-Kummissjoni bbaża l-kalkolu tal-kontribuzzjoni ex ante iktar fuq id-daqs tal-istituzzjonijiet milli fuq il-multiplikatur tal-aġġustament, dan il-metodu jmur manifestament lil hinn minn dak li huwa neċessarju sabiex jintlaħaq l-għan imsemmi fil-punt 176 iktar ’il fuq. |
181 |
Għalhekk, ir-rikorrenti ma wrietx li t-teħid inkunsiderazzjoni tad-daqs tal-istituzzjonijiet għall-finijiet tal-kalkolu tal-kontribuzzjonijiet ex ante jista’ jwassal għal inkonvenjenzi manifestament sproporzjonati fid-dawl tal-għanijiet li għandhom jintlaħqu. |
182 |
Fid-dawl ta’ dak li ntqal, it-tieni motiv għandu jiġi miċħud bħala infondat. |
3. Fuq it‑tielet motiv, ibbażat fuq il‑ksur tal‑prinċipju ta’ ċertezza legali
183 |
Permezz tat-tielet motiv tagħha, ir-rikorrenti ssostni li l-Artikolu 69(1) u (2)u l-Artikolu 70(1) u (2) tar-Regolament Nru 806/2014, l-Artikolu 4(2), l-Artikoli 6 u 7 u l-Anness I tar-Regolament Delegat 2015/63 kif ukoll l-Artikolu 4 tar-Regolament ta’ Implimentazzjoni 2015/81 jiksru l-prinċipju ta’ ċertezza legali. L-argument insostenn ta’ dan il-motiv huwa maqsum fi tliet partijiet, ibbażati, l-ewwel waħda, fuq l-impossibbiltà għall-istituzzjonijiet li jkunu jafu minn qabel l-ammont tal-kontribuzzjonijiet ex ante tagħhom, it-tieni waħda, fuq l-assenza ta’ teħid inkunsiderazzjoni ta’ ċerti indikaturi tar-riskju u, it-tielet waħda, fuq modalitajiet mhux xierqa ta’ determinazzjoni tar-“rata ta’ żieda tad-depożiti koperti” li jservu sabiex jiġi ddeterminat il-livell annwali fil-mira. Fil-kuntest ta’ dan il-motiv, ir-rikorrenti invokat ukoll ir-raba’ parti, ibbażata fuq il-ksur tal-Artikolu 290 TFUE. |
184 |
Preliminarjament, għandha tiġi ppreċiżata l-portata ta’ din l-eċċezzjoni ta’ illegalità. |
185 |
F’dan ir-rigward, għandu jiġi rrilevat li, anki jekk ir-rikorrenti tqajjem formalment eċċezzjoni ta’ illegalità kontra d-dispożizzjonijiet kollha msemmija fil-punt 183 iktar ’il fuq, l-argument tagħha insostenn ta’ din l-eċċezzjoni jirrigwarda biss il-konformità tal-Artikoli 6 u 7 kif ukoll tal-Anness I tar-Regolament Delegat 2015/63 mal-prinċipju ta’ ċertezza legali. Għaldaqstant, ir-rikorrenti ma tressaq l-ebda argument li jikkonċerna speċifikament il-legalità, fid-dawl tal-imsemmi prinċipju, tal-Artikolu 69(1) u (2) u tal-Artikolu 70(1) u (2) tar-Regolament Nru 806/2014, tal-Artikolu 4(2) tar-Regolament Delegat 2015/63 kif ukoll tal-Artikolu 4 tar-Regolament ta’ Implimentazzjoni 2015/81. F’dawn iċ-ċirkustanzi, għandu jiġi kkonstatat li din l-eċċezzjoni ta’ illegalità tirrigwarda, fir-realtà, biss l-Artikoli 6 u 7 kif ukoll l-Anness I tar-Regolament Delegat 2015/63. |
a) Fuq l‑ewwel parti, ibbażata fuq l‑impossibbiltà li jkun magħruf minn qabel il‑livell tal‑kontribuzzjoni ex ante
186 |
Ir-rikorrenti ssostni, essenzjalment, li l-Artikoli 6 u 7 kif ukoll l-Anness I tar-Regolament Delegat 2015/63 jiksru l-prinċipju ta’ ċertezza legali, peress li hija ma tistax tkun taf suffiċjentement minn qabel l-ammont tal-kontribuzzjoni ex ante li ser jiġi impost fuqha. Qabelxejn, il-metodu ta’ kalkolu kollu kemm hu ma jkunx trasparenti. Sussegwentement, l-aġġustament tal-kontribuzzjoni annwali bażika skont il-profil tar-riskju jiddependi mill-modalitajiet previsti minn dawn id-dispożizzjonijiet, li ma jkunux trasparenti. Fl-aħħar nett, l-assenjazzjoni tagħha għad-diversi intervalli ssir b’mod unilaterali u mhux trasparenti. |
187 |
Barra minn hekk, l-istabbiliment tal-kontribuzzjonijiet ex ante huwa bbażat fuq l-użu ta’ data li ma tkunx saret pubblika. Finalment, l-ammont tal-kontribuzzjonijiet ex ante jiddependi mill-iżvilupp tas-sitwazzjoni tal-istituzzjonijiet l-oħra, li joħloq interdipendenzi qawwija bejn l-ammonti tal-kontribuzzjonijiet individwali tad-diversi istituzzjonijiet, peress li jirrendi impossibbli l-kalkolu bil-quddiem ta’ kontribuzzjoni ex ante eżatta. |
188 |
Is-SRB, il-Parlament, il-Kunsill u l-Kummissjoni jikkontestaw dan l-argument. |
189 |
Il-prinċipju ta’ ċertezza legali jeżiġi, minn naħa, li d-dispożizzjonijiet legali jkunu ċari u preċiżi u, min-naħa l-oħra, li l-applikazzjoni tagħhom tkun prevedibbli għall-partijiet fil-kawża, b’mod partikolari meta jista’ jkollhom konsegwenzi sfavorevoli. B’mod partikolari, l-imsemmi prinċipju jeżiġi li leġiżlazzjoni tippermetti lill-partijiet ikkonċernati jkunu jafu b’eżattezza l-portata tal-obbligi li hija timponi fuqhom u li dawn tal-aħħar ikollhom il-possibbiltà li jkollhom għarfien tad-drittijiet u tal-obbligi tagħhom mingħajr ambigwità u jaġixxu konsegwentement (sentenzi tad‑29 ta’ April 2021, Banco de Portugal et, C‑504/19, EU:C:2021:335, punt 51, u tas‑16 ta’ Frar 2022, Il‑Polonja vs Il‑Parlament u Il‑Kunsill, C‑157/21, EU:C:2022:98, punt 319). |
190 |
Madankollu, dawn ir-rekwiżiti la għandhom jinftiehmu bħala li jipprekludu lil istituzzjoni tal-Unjoni, fil-kuntest ta’ regola li hija tadotta, milli tuża kunċett legali astratt u lanqas li jimponu li tali regola astratta issemmi d-diversi każijiet konkreti li fihom din x’aktarx tiġi applikata, sa fejn l-imsemmija istituzzjoni ma tistax tiddetermina dawn il-każijiet kollha minn qabel (ara, b’analoġija, is-sentenzi tal‑20 ta’ Lulju 2017, Marco Tronchetti Provera et, C‑206/16, EU:C:2017:572, punti 39 u 40, u tas‑16 ta’ Frar 2022, Il‑Polonja vs Il‑Parlament u Il‑Kunsill, C‑157/21, EU:C:2022:98, punt 320). |
191 |
Konsegwentement, dispożizzjoni ta’ att tal-Unjoni tikser il-prinċipju ta’ ċertezza legali, minħabba n-nuqqas ta’ ċarezza tagħha, biss jekk hija tippreżenta ambigwità tali li tostakola lill-partijiet fil-kawża milli jqajmu b’ċertezza suffiċjenti kwalunkwe dubji dwar il-portata jew is-sens ta’ din id-dispożizzjoni (ara, f’dan is-sens, is-sentenzi tal‑14 ta’ April 2005, Il‑Belġju vs Il‑Kummissjoni, C‑110/03, EU:C:2005:223, punt 31, u tat‑22 ta’ Mejju 2007, Mebrom vs Il‑Kummissjoni, T‑216/05, EU:T:2007:148, punt 108). |
192 |
Bl-istess mod, il-fatt li att tal‑Unjoni jagħti setgħa ta’ evalwazzjoni lill-awtoritajiet inkarigati mill-implimentazzjoni tiegħu ma jiksirx, minnu nnifsu, ir-rekwiżit ta’ prevedibbiltà, sakemm il-portata u l-modalitajiet ta’ eżerċizzju ta’ tali setgħa jkunu ddefiniti b’ċarezza suffiċjenti, fid-dawl tal-għan leġittimu inkwistjoni, li l-individwu jingħata protezzjoni xierqa mill-arbitrarjetà (ara s-sentenza tas‑16 ta’ Frar 2022, Il‑Polonja vs Il‑Parlament u Il‑Kunsill, C‑157/21, EU:C:2022:98, punt 321 u l-ġurisprudenza ċċitata). |
193 |
Konformement mal-ġurisprudenza ċċitata fil-punti 191 u 192 iktar ’il fuq, għandu għalhekk jiġi eżaminat, f’dan il-każ, jekk il-leġiżlazzjoni applikabbli tippreżentax ambigwità tali li tipprekludi li l-istituzzjonijiet ma jkunux jistgħu jneħħu b’ċertezza suffiċjenti kwalunkwe dubji dwar il-portata jew is-sens tal-Artikoli 6 u 7 kif ukoll tal-Anness I tar-Regolament Delegat 2015/63, li r-rikorrenti tinvoka l-illegalità tiegħu. |
194 |
Fl-ewwel lok, fir-rigward tal-allegata natura mhux trasparenti tal-metodu ta’ kalkolu fl-intier tiegħu, hija r-rikorrenti li għandha tidentifika n-nuqqas ta’ ċarezza, in-nuqqas ta’ preċiżjoni jew in-nuqqas ta’ prevedibbiltà fid-dispoiżjonijiet legali li hija tikkontesta. Issa, ir-rikorrenti ma identifikathomx, billi llimitat ruħha li tifformula affermazzjonijiet ġenerali u mhux issostanzjati. |
195 |
Fi kwalunkwe każ, mill-ġurisprudenza jirriżulta li l-leġiżlazzjoni applikabbli ma għandhiex neċessarjament tippermetti lill-istituzzjonijiet jivverifikaw l-eżattezza tal-kalkolu tal-kontribuzzjoni ex ante tagħhom, peress li tali rekwiżit jimplika, neċessarjament, li l-leġiżlatur tal-Unjoni u l-Kummissjoni jiġu pprojbiti milli jistabbilixxu metodu ta’ kalkolu ta’ din il-kontribuzzjoni li jinkludi data li n-natura kunfidenzjali tagħha hija protetta mid-dritt tal-Unjoni u, għaldaqstant, li titnaqqas b’mod eċċessiv is-setgħa wiesgħa ta’ evalwazzjoni li għandu jkollhom, għal dan l-għan, il-leġiżlatur u l-Kummissjoni, billi jiġu preklużi, b’mod partikolari, milli jagħżlu metodu li jista’ jiżgura adattament dinamiku tal-finanzjament tas-SRF skont l-iżviluppi tas-settur finanzjarju, permezz tat-teħid inkunsiderazzjoni komparattiv, b’mod partikolari, tas-sitwazzjoni finanzjarja ta’ kull istituzzjoni awtorizzata fit-territorju ta’ Stat Membru parteċipanti fis-SRF (ara, f’dan is-sens u b’analoġija, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 118). |
196 |
Għalhekk, huwa suffiċjenti li l-persuni kkonċernati minn deċiżjoni li tistabbilixxi kontribuzzjonijiet ex ante, filwaqt li ma tiġix trażmessa lilhom data koperta mis-sigriet kummerċjali, ikollhom il-metodu ta’ kalkolu użat mis-SRB u informazzjoni suffiċjenti sabiex jifhmu, essenzjalment, b’liema mod ittieħdet inkunsiderazzjoni s-sitwazzjoni individwali tagħhom, għall-finijiet tal-kalkolu tal-kontribuzzjoni ex ante tagħhom, fid-dawl tas-sitwazzjoni tal-istituzzjonijiet ikkonċernati l-oħra kollha (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 122). |
197 |
Fost l-informazzjoni li għandha titqiegħed għad-dispożizzjoni tal-istituzzjonijiet hemm, b’mod partikolari, il-valuri limitu ta’ kull intervall u dawk tal-indikaturi tar-riskju relatati miegħu, li abbażi tagħhom il-kontribuzzjoni ex ante tal-istituzzjonijiet ġiet adattata għall-profil tar-riskju tagħhom (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 167). |
198 |
Barra minn hekk, ir-Regolament Delegat 2015/63 bl-ebda mod ma jostakola l-possibbiltà, għas-SRB, li jiżvela, f’forma kollettiva u anonimizzata, informazzjoni suffiċjenti sabiex istituzzjoni tkun tista’ tifhem b’liema mod is-sitwazzjoni individwali tagħha tkun ittieħdet inkunsiderazzjoni fil-kalkolu tal-kontribuzzjoni ex ante tagħha, fid-dawl tas-sitwazzjoni tal-istituzzjonijiet ikkonċernati l-oħra kollha (sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 139). |
199 |
F’dawn iċ-ċirkustanzi, l-ewwel ilment għandu jiġi miċħud. |
200 |
Fit-tieni lok, fir-rigward tal-aġġustament tal-kontribuzzjoni annwali bażika tal-istituzzjonijiet skont il-profil tar-riskju, għandu jiġi rrilevat li r-rikorrenti sempliċement issostni li l-Artikoli 6 u 7 tar-Regolament Delegat 2015/63 huma “mhux trasparenti minħabba l-iskala tagħhom” u għalhekk issostni, b’mod ġenerali, li l-kunċetti użati f’dawn id-dispożizzjonijiet għandhom nuqqas ta’ ċarezza tali li jwassal għal ksur tal-prinċipju ta’ ċertezza legali. |
201 |
Madankollu, ir-rikorrenti ma pproduċiet l-ebda element konkret quddiem il-Qorti Ġenerali sabiex tikkontesta l-legalità tal-Artikoli 6 u 7 tar-Regolament Delegat 2015/63 minħabba l-allegat nuqqas ta’ ċarezza tagħhom, in-nuqqas ta’ preċiżjoni tagħhom jew in-nuqqas ta’ prevedibbiltà tagħhom. |
202 |
F’dawn iċ-ċirkustanzi, it-tieni lment ma jistax jintlaqa’. |
203 |
Fit-tielet lok, fir-rigward tal-argument tar-rikorrenti li l-metodu msejjaħ “ta’ binning”, deskritt fil-punt 204 iktar ’il quddiem, b’mod partikolari l-assenjazzjoni għad-diversi intervalli, huwa implimentat b’mod unilaterali u mhux trasparenti, għandu jiġi rrilevat dan li ġej. |
204 |
Skont l-Anness I, taħt it-titolu “Pass 2”, tar-Regolament Delegat 2015/63, huwa s-SRB li għandu jikkalkola, fl-ewwel lok, in-numru ta’ intervalli sabiex iqabbel l-istituzzjonijiet fid-dawl tad-diversi indikaturi u subindikaturi tar-riskju. Fit-tieni lok, huwa s-SRB li għandu jassenja l-istituzzjonijiet lil kull intervall. Fit-tielet lok, huwa s-SRB li għandu jassenja l-istess punteġġ lill-istituzzjonijiet kollha li jinsabu f’intervall partikolari, imsejjaħ “indikatur diskretizzat”, li huwa għandu jieħu inkunsiderazzjoni għall-bqija tal-kalkolu tal-multiplikatur tal-aġġustament tagħhom. |
205 |
Barra minn hekk, l-Anness I tar-Regolament Delegat 2015/63 jispeċifika, b’mod partikolari, id-diversi passi tal-metodu ta’ binning u jistabbilixxi l-formuli matematiċi li għandhom jiġu applikati mis-SRB. |
206 |
Issa, ir-rikorrenti ma ppreżentat l-ebda element konkret lill-Qorti Ġenerali li huwa intiż li jidentifika nuqqas ta’ ċarezza, ta’ preċiżjoni jew ta’ prevedibbiltà fir-rigward ta’ dawn id-diversi passi jew ta’ dawn il-formuli. |
207 |
Fi kwalunkwe każ, fid-dawl tal-kunsiderazzjonijiet imsemmija fil-punti 195 sa 197 iktar ’il fuq, il-Kummissjoni ma kinitx obbligata tipprevedi li l-istituzzjonijiet jiġu pprovduti b’data li tippermettilhom jivverifikaw, b’mod komplet, l-eżattezza tal-applikazzjoni tal-metodu ta’ binning. |
208 |
Barra minn hekk, ir-Regolament Delegat 2015/63 bl-ebda mod ma jipprekludi lis-SRB milli jiżvela, sabiex jissodisfa r-rekwiżiti msemmija fil-punti 196 u 197 iktar ’il fuq, il-valuri limitu ta’ kull intervall u l-indikaturi relatati miegħu, sabiex jippermetti lill-istituzzjoni kkonċernata tiżgura ruħha, b’mod partikolari, li l-klassifikazzjoni li ġiet attribwita lilha waqt id-diskretizzazzjoni tal-indikaturi, kif iddefinita fl-Anness I ta’ dan ir-regolament delegat, tikkorrispondi effettivament għas-sitwazzjoni ekonomika tagħha, li din id-diskretizzazzjoni saret b’mod konformi mal-metodu ddefinit minn dan ir-regolament delegat abbażi ta’ data plawżibbli u li l-fatturi tar-riskju kollha li għandhom jittieħdu inkunsiderazzjoni b’applikazzjoni tar-Regolament Nru 806/2014 u tal-imsemmi regolament delegat tassew ittieħdu inkunsiderazzjoni. |
209 |
Fir-raba’ lok, ir-rikorrenti ma tistax tinvoka, insostenn ta’ din l-eċċezzjoni ta’ illegalità, il-fatt li l-għodda ta’ kalkolu mqiegħda għad-dispożizzjoni tal-istituzzjonijiet mis-SRB qabel l-adozzjoni tad-deċiżjoni kkontestata ma ppermettietx li jiġu mistħarrġa l-analiżijiet imwettqa minn dan tal-aħħar sabiex jiġu assenjati l-istituzzjonijiet fid-diversi intervalli. Fil-fatt, din l-għodda ta’ kalkolu ma hijiex prevista mil-leġiżlazzjoni applikabbli, b’mod iktar partikolari mir-Regolament Delegat 2015/63. Konsegwentement, tali kritika tikkonċerna l-legalità tal-atti tas-SRB, u mhux il-legalità ta’ dan ir-regolament delegat. |
210 |
Jekk jitqies li l-imsemmi lment għandu jinftiehem fis-sens li, permezz tiegħu, ir-rikorrenti tikkontesta l-legalità tad-deċiżjoni kkontestata, huwa biżżejjed li jiġi rrilevat li din tal-aħħar ma tispjegax kif, minkejja l-fatt li l-leġiżlazzjoni applikabbli ma tobbligax lis-SRB iqiegħed għad-dispożizzjoni tal-istituzzjonijiet l-għodda ta’ kalkolu msemmija fil-punt 209 iktar ’il fuq u li l-komunikazzjoni lil dan tal-aħħar tippreċedi l-adozzjoni ta’ dik id-deċiżjoni, id-data allegatament insuffiċjenti fl-imsemmija għodda taffettwa l-validità tal-imsemmija deċiżjoni. Fi kwalunkwe każ, mill-ġurisprudenza ċċitata fil-punti 195 u 196 iktar ’il fuq jirriżulta li s-SRB ma huwiex obbligat jiżvela d-data koperta mis-sigriet kummerċjali relatata mas-sitwazzjoni ekonomika ta’ kull waħda mill-istituzzjonijiet ikkonċernati l-oħra. |
211 |
Fil-ħames lok, ir-rikorrenti tenfasizza li l-pubblikazzjoni ta’ ċerti aggregati ta’ data kunfidenzjali fid-deċiżjonijiet li jiddeterminaw il-kontribuzzjonijiet ex ante ta’ sena partikolari tkun insuffiċjenti, peress li elementi oħra mhux kunfidenzjali neċessarji għall-fehim u għall-antiċipazzjoni tal-kalkoli għadhom ma humiex ippubblikati mis-SRB. |
212 |
Issa, permezz ta’ tali argument, ir-rikorrenti lanqas ma tikkontesta d-dispożizzjonijiet tal-leġiżlazzjoni applikabbli, imsemmija fil-punt 186 iktar ’il fuq, li hija teċċepixxi l-illegalità tagħhom fid-dawl tal-prinċipju ta’ ċertezza legali. |
213 |
Fil-fatt, ir-rikorrenti sempliċement tikkritika l-assenza ta’ pubblikazzjoni, mis-SRB, ta’ ċerti elementi mhux kunfidenzjali neċessarji għall-kalkolu tal-kontribuzzjonijiet ex ante, qabel l-adozzjoni tad-deċiżjonijiet li jiddeterminaw dawn il-kontribuzzjonijiet. Konsegwentement, dan l-ilment ma jikkonċernax il-legalità tal-leġiżlazzjoni applikabbli, iżda l-modalitajiet tal-applikazzjoni tagħha mis-SRB. |
214 |
Anki jekk jitqies li l-imsemmi lment għandu jinftiehem f’dan is-sens li, permezz tiegħu, ir-rikorrenti tikkontesta l-legalità tad-deċiżjoni kkontestata, ir-rikorrenti ma tispjegax b’ċarezza suffiċjenti liema elementi konkreti s-SRB kien obbligat jippubblika sabiex jissodisfa r-rekwiżiti li jirriżultaw mill-ġurisprudenza ċċitata fil-punti 195 u 196 iktar ’il fuq, minkejja li huwa ma għamilx dan. Barra minn hekk, f’dan ir-rigward, minn din l-istess ġurisprudenza jirriżulta li jkun eċċessiv li s-SRB jintalab jikkomunika kull wieħed miċ-ċifri li fuqhom huwa bbażat il-kalkolu tal-kontribuzzjoni ex ante ta’ kull istituzzjoni kkonċernata (ara s-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 123 u l-ġurisprudenza ċċitata). |
215 |
Fis-sitt lok, fir-rigward tal-fatt li l-kalkolu tal-kontribuzzjonijiet ex ante ta’ istituzzjoni jiddependi mid-data kunfidenzjali relatata mas-sitwazzjoni tal-istituzzjonijiet l-oħra, li huwa fatt li jżid l-imprevedibbiltà tal-metodu ta’ kalkolu, għandu jiġi rrilevat li l-argument tar-rikorrenti f’dan ir-rigward ma huwa żviluppat bl-ebda mod. |
216 |
Fi kwalunkwe każ, dan l-argument imur kontra t-tagħlim li jirriżulta mis-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB (C‑584/20 P u C‑621/20 P, EU:C:2021:601), li ċertament jirrigwarda l-osservanza tal-obbligu ta’ motivazzjoni, iżda jgħodd ukoll fir-rigward tal-osservanza tal-prinċipju ta’ ċertezza legali. |
217 |
Fis-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB (C‑584/20 P u C‑621/20 P, EU:C:2021:601), il-Qorti tal-Ġustizzja aċċettat li l-prinċipju stess tal-metodu ta’ kalkolu tal-kontribuzzjonijiet ex ante, kif irriżulta mid-Direttiva 2014/59 u mir-Regolament Nru 806/2014, seta’ jimplika l-użu, mis-SRB, ta’ data ta’ istituzzjonijiet oħra koperta mis-sigriet kummerċjali (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 114). |
218 |
F’dawn iċ-ċirkustanzi, minn naħa, ir-rikorrenti ma tkunx tista’ tibbaża ruħha fuq is-sempliċi fatt li hija ma tistax, minħabba l-fatt li d-data tal-istituzzjonijiet l-oħra ma tkunx miġjuba għall-attenzjoni tagħha, tikkalkola minn qabel il-kontribuzzjoni ex ante li hija responsabbli għall-ħlas tagħha. |
219 |
Min-naħa l-oħra, kif ġie rrilevat fil-punt 198 iktar ’il fuq, ir-Regolament Delegat 2015/63 bl-ebda mod ma jostakola l-possibbiltà, għas-SRB, li jiżvela, f’forma kollettiva u anonimizzata, informazzjoni suffiċjenti sabiex istituzzjoni tkun tista’ tifhem b’liema mod is-sitwazzjoni individwali tagħha ttieħdet inkunsiderazzjoni fil-kalkolu tal-kontribuzzjoni ex ante tagħha, fid-dawl tas-sitwazzjoni tal-istituzzjonijiet ikkonċernati l-oħra kollha. |
220 |
Konsegwentement, l-ewwel parti tat-tielet motiv għandha tiġi miċħuda. |
b) Fuq it‑tieni parti, ibbażata fuq l‑assenza ta’ prevedibbiltà fir‑rigward tal‑applikazzjoni ta’ ċerti indikaturi tar‑riskju
221 |
Ir-rikorrenti ssostni li ċerti indikaturi tar-riskju ma ġewx applikati sabiex jiġu kkalkolati l-kontribuzzjonijiet ex ante għall-perijodu ta’ kontribuzzjoni 2021, jiġifieri l-“proporzjon ta’ finanzjament nett stabbli”, il-MREL kif ukoll il-“kumplessità” u r-“riżolvibbiltà”. L-assenza ta’ teħid inkunsiderazzjoni ta’ dawn l-indikaturi tar-riskju, kif ukoll l-assenza ta’ prevedibbiltà fir-rigward tal-implementazzjoni tagħhom, tmur kontra l-prinċipju ta’ ċertezza legali, peress li r-rikorrenti ma tistax tantiċipa l-implimentazzjoni tagħhom. |
222 |
Barra minn hekk, il-fatt li r-Regolament Delegat 2015/63 iħalli, fid-dispożizzjonijiet tranżitorji tiegħu, il-possibbiltà għas-SRB li ma jżommx ċerti indikaturi ta’ riskju, filwaqt li jippermettilu madankollu li jaġġustata l-kontribuzzjoni annwali bażika skont il-profil tar-riskju, huwa sors ta’ inċertezza legali. |
223 |
Is-SRB u l-Kummissjoni jikkontestaw dawn l-argumenti. |
224 |
Konformement mal-ġurisprudenza ċċitata fil-punti 189 sa 192 iktar ’il fuq, għandu jiġi eżaminat, f’dan il-każ, jekk il-leġiżlazzjoni applikabbli hijiex tant ambigwa li tipprekludi lill-istituzzjonijiet milli jqajmu b’ċertezza suffiċjenti kwalunkwe dubji dwar l-applikazzjoni ta’ ċerti indikaturi tar-riskju, bħall-“proporzjon ta’ finanzjament nett stabbli”, il-MREL kif ukoll il-“kumplessità” u r-“riżolvibbiltà”. |
225 |
Il-kundizzjonijiet li fihom is-SRB jista’ jastjeni, b’mod tranżitorju, milli japplika tali indikaturi tar-riskju huma previsti fl-Artikolu 20(1) tar-Regolament Delegat 2015/63 li jipprovdi li “[m]eta l-informazzjoni meħtieġa minn indikatur speċifiku kif imsemmi fl-Anness II [ta’ dan ir-regolament delegat] ma tkunx inkluża fir-rekwiżit tar-rappurtar superviżorju applikabbli msemmi fl-Artikolu 14 [tal-imsemmi regolament delegat] għas-sena ta’ referenza, dak l-indikatur tar-riskju ma japplikax qabel li dak ir-rekwiżit ta’ rappurtar superviżorju jsir applikabbli”. |
226 |
Għaldaqstant, l-Artikolu 20(1) tar-Regolament Delegat 2015/63 jipprevedi żewġ kundizzjonijiet li fihom is-SRB ma japplikax, b’mod tranżitorju, indikatur tar-riskju, jiġifieri, fl-ewwel lok, dak fejn l-informazzjoni meħtieġa taħt tali indikatur ma tagħmilx parti mir-rekwiżiti ta’ informazzjoni prudenzjali msemmija fl-Artikolu 14 ta’ dan ir-regolament delegat u, fit-tieni lok, dak fejn dan l-indikatur jissemma fl-Anness II tal-imsemmi regolament delegat, li huwa intitolat “Dejta li trid tiġi sottomessa lill-awtoritajiet tar-riżoluzzjoni” u li fih ħmistax-il kategorija ta’ data. Issa, ir-rikorrenti ma sostnietx, u wisq inqas ipprovat, li dawn il-kundizzjonijiet huma tant ambigwi li jipprekludu lill-istituzzjonijiet milli jkunu jistgħu jqajmu, b’ċertezza suffiċjenti, kwalunkwe dubji dwar l-applikazzjoni ta’ ċerti indikaturi tar-riskju. |
227 |
F’dawn iċ-ċirkustanzi, għandhom jiġu miċħuda l-argumenti tar-rikorrenti intiżi sabiex juru li r-Regolament Nru 806/2014 jew ir-Regolament Delegat 2015/63 huma illegali minħabba allegat ksur tal-prinċipju ta’ ċertezza legali minħabba l-assenza ta’ prevedibbiltà fir-rigward tal-implimentazzjoni tal-indikaturi tar-riskju. |
228 |
Għaldaqstant, it-tieni parti tat-tielet motiv għandha tiġi miċħuda. |
c) Fuq it‑tielet parti, ibbażata fuq il‑modalitajiet ta’ determinazzjoni tar‑“rata ta’ żieda tad‑depożiti koperti”
229 |
Ir-rikorrenti tqis li l-għan li jintlaħaq livell fil-mira finali – ugwali għal 1 % tal-ammont tad-depożiti koperti mill-unjoni bankarja – jimplika li, kull sena, is-SRB jevalwa “rata ta’ żieda ta’ dawn id-depożiti koperti”, li hija ddeterminata b’mod mhux trasparenti u li l-iżvilupp tagħha jkun diffiċli li jiġi previst mill-istituzzjonijiet. |
230 |
Is-SRB jikkontesta dan l-argument. |
231 |
Għandu jiġi rrilevat li r-rikorrenti ma pproduċiet l-ebda element konkret lill-Qorti Ġenerali li huwa intiż li juri li d-dispożizzjonijiet imsemmija fil-punt 183 iktar ’il fuq huma tant ambigwi li jipprekludu li l-istituzzjonijiet milli jkunu jistgħu jqajmu b’ċertezza suffiċjenti kwalunkwe dubji dwar id-determinazzjoni tal-livell fil-mira finali jew tal-livell annwali fil-mira. |
232 |
Barra minn hekk, permezz ta’ parti mill-argument tagħha, ir-rikorrenti tikkontesta, fir-realtà, in-nuqqas ta’ motivazzjoni tad-deċiżjoni kkontestata fir-rigward tad-determinazzjoni tal-livell annwali fil-mira. Dan l-ilment ma jikkonċernax il-legalità tad-dispożizzjonijiet imsemmija fil-punt 183 iktar ’il fuq u ser jiġi eżaminat fil-punti 271 sa 308 iktar ’il quddiem. |
233 |
Għaldaqstant, it-tielet parti tat-tielet motiv għandha tiġi miċħuda sa fejn ir-rikorrenti tikkontesta l-legalità ta’ dawn id-dispożizzjonijiet. |
d) Fuq ir‑raba’ parti, ibbażata fuq il‑ksur tal‑Artikolu 290 TFUE mill‑kriterji ta’ kalkolu ddefiniti mir‑Regolament Delegat 2015/63
234 |
Fil-kuntest tat-tielet motiv, ir-rikorrenti qieset ukoll li l-fatt li l-kriterji essenzjali ta’ kalkolu kienu ġew iddefiniti mir-Regolament Delegat 2015/63, u mhux mir-Regolament Nru 806/2014, wassal għal ksur tal-Artikolu 290 TFUE. Waqt is-seduta, ir-rikorrenti ppreċiżat li, permezz ta’ dan l-argument, hija sostniet li d-Direttiva 2014/59 kienet stabbilixxiet biss il-kategoriji l-kbar ta’ riskju, li hija kienet ġabret f’erba’ pilastri tar-riskju, iżda li hija ma kinitx iddeċidiet dwar il-kriterji stess, li kienu ġew iddefiniti mill-Kummissjoni fir-Regolament Delegat 2015/63. |
235 |
Il-Parlament jikkontesta l-fondatezza ta’ din il-parti tat-tielet motiv u jistaqsi dwar l-ammissibbiltà tagħha, peress li ma kinitx invokata b’mod suffiċjentement ċar u preċiż fir-rikors. |
236 |
F’dan ir-rigward, mill-ġurisprudenza jirriżulta li, sabiex rikors ikun ammissibbli, huwa neċessarju li l-punti essenzjali ta’ fatt u ta’ liġi li fuqhom dan ikun ibbażat jirriżultaw, minn tal-inqas fil-qosor, iżda b’mod koerenti u li jinftiehem, mit-test tar-rikors stess, u dan sabiex tiġi żgurata ċ-ċertezza legali u amministrazzjoni tajba tal-ġustizzja. Għalhekk, kull motiv li ma huwiex artikolat b’mod suffiċjenti fir-rikors promotur għandu jitqies li huwa inammissibbli. Rekwiżiti simili huma imposti meta lment jiġi invokat insostenn ta’ motiv. Din l-eċċezzjoni ta’ inammissibbiltà ta’ ordni pubbliku għandha titqajjem ex officio mill-qorti tal-Unjoni (ara s-sentenzi tat‑30 ta’ Ġunju 2021, L‑Italja vs Il‑Kummissjoni, T‑265/19, mhux ippubblikata, EU:T:2021:392, punt 33 u l-ġurisprudenza ċċitata, u tas‑7 ta’ Lulju 2021, Bateni vs Il‑Kunsill, T‑455/17, EU:T:2021:411, punt 135 u l-ġurisprudenza ċċitata). |
237 |
F’dan il-każ, ir-rikors sempliċement, fil-punt 125 tiegħu, indika li “l-funzjoni strutturata ħafna u determinanti tal-kriterji ta’ kalkolu stabbiliti mir-Regolament Delegat [2015/63] [wasslet] sabiex jitqies li dawn il-kriterji [kienu], mid-definizzjoni tagħhom stess, essenzjali għar-[Regolament Nru 806/2014], li [wassal] għal ksur tal-Artikolu 290 TFUE” u, fil-punt 139 tiegħu, jipprovdi li “l-fatt li l-kriterji essenzjali ta’ kalkolu ġew adottati fil-kuntest tar-[r]egolament delegat u mhux tar-[Regolament Nru 806/2014] [kien] jikser l-Artikolu 290 [(1)] TFUE”. |
238 |
Dawn l-affermazzjonijiet ma ġewx akkumpanjati minn ebda argument fir-rikors. Għalhekk, ir-rikorrenti ma identifikatx, b’mod partikolari, id-dispożizzjonijiet tar-Regolament Delegat 2015/63 li, fil-fehma tagħha, kien jinkludu elementi essenzjali fis-sens tat-tieni sentenza tat-tieni subparagrafu tal-Artikolu 290(1) TFUE, li kellhom jiġu inklużi fid-Direttiva 2014/59. Bl-istess mod, ir-rikorrenti la ppreċiżat liema elementi konkreti tal-imsemmija dispożizzjonijiet għandhom natura “essenzjali” u lanqas ma pprovdiet argument għal dan l-għan. |
239 |
Fl-aħħar nett, in-nuqqas ta’ ċarezza ta’ din il-parti huwa aggravat mill-fatt li din ġiet invokata fil-kuntest ta’ motiv ibbażat fuq il-ksur ta’ dispożizzjoni legali differenti, jiġifieri l-prinċipju ta’ ċertezza legali. |
240 |
Konsegwentement, għandu jiġi kkonstatat li l-punti essenzjali ta’ fatt u ta’ liġi li fuqhom huwa bbażat l-ilment ibbażat fuq il-ksur tal-Artikolu 290 TFUE ma jirriżultawx, minn tal-inqas fil-qosor, mit-test tar-rikors innifsu. Għaldaqstant, tali lment ma jissodisfax ir-rekwiżiti stabbiliti fil-punt 236 iktar ’il fuq. |
241 |
F’dawn iċ-ċirkustanzi, l-argument tar-rikorrenti waqt is-seduta ma jistax jitqies bħala amplifikazzjoni tal-ilment imsemmi fil-punti 125 u 139 tar-rikors, peress li tali lment ma ġiex invokat validament. |
242 |
Għaldaqstant, ir-raba’ parti tat-tielet motiv għandha tiġi miċħuda bħala inammissibbli. |
4. Fuq ir‑raba’ u l‑ħames motiv, ibbażati fuq il‑ksur tal‑prinċipju ta’ amministrazzjoni tajba u fuq il‑ksur tal‑prinċipju ta’ protezzjoni ġudizzjarja effettiva, sa fejn jinkludu eċċezzjoni ta’ illegalità
243 |
Ir-rikorrenti tqis li kemm l-Artikolu 4(2), l-Artikoli 6 u 7 u l-Anness I tar-Regolament Delegat 2015/63 kif ukoll id-deċiżjoni kkontestata, li hija bbażata fuq dawn id-dispożizzjonijiet, jiksru l-prinċipju ta’ amministrazzjoni tajba, li jinkludi l-obbligu ta’ motivazzjoni, kif ukoll il-prinċipju ta’ protezzjoni ġudizzjarja effettiva. Skont ir-rikorrenti, l-istituzzjonijiet ma għandhomx aċċess għad-data kollha li hija essenzjali sabiex ikunu jistgħu jifhmu u jivverifikaw id-deċiżjoni kkontestata. B’mod partikolari, il-modalitajiet iddettaljati tal-kalkolu tar-“rata ta’ aġġustament tad-depożiti koperti” ma humiex magħrufa mill-istituzzjonijiet, li hija ħaġa li tipprekludihom milli jiżguraw il-validità tal-kalkoli mwettqa f’dan ir-rigward. |
244 |
Is-SRB jikkontesta dawn l-argumenti. |
245 |
Fl-ewwel lok, għandu jitfakkar li l-prinċipju ta’ amministrazzjoni tajba jeżiġi, fil-każijiet fejn, bħal f’dan il-każ, l-istituzzjonijiet jew il-korpi tal-Unjoni jkollhom setgħa ta’ evalwazzjoni, l-osservanza tal-garanziji mogħtija mill-ordinament ġuridiku tal-Unjoni fil-proċeduri amministrattivi, fosthom, b’mod partikolari, l-obbligu tal-istituzzjoni jew tal-korp kompetenti li jeżaminaw, b’reqqa u b’imparzjalità, l-elementi rilevanti kollha tal-każ inkwistjoni (sentenzi tal‑21 ta’ Novembru 1991, Technische Universität München,C‑269/90, EU:C:1991:438, punt 14; tat‑30 ta’ Settembru 2003, Atlantic Container Line et vs Il‑Kummissjoni, T‑191/98, T‑212/98 sa T‑214/98, EU:T:2003:245, punt 404, u tad‑9 ta’ April 2019, Qualcomm u Qualcomm Europe vs Il‑Kummissjoni, T‑371/17, mhux ippubblikata, EU:T:2019:232, punt 200). |
246 |
Fit-tieni lok, skont ġurisprudenza stabbilita, l-effettività tal-istħarriġ ġudizzjarju ggarantit mill-Artikolu 47 tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”) teżiġi li l-persuna kkonċernata tkun tista’ tkun taf ir-raġunijiet li fuqhom tkun ibbażata d-deċiżjoni meħuda fil-konfront tagħha jew minn qari tad-deċiżjoni stess, jew minn komunikazzjoni ta’ dawn ir-raġunijiet magħmula fuq talba tagħha, bla ħsara għas-setgħa tal-qorti kompetenti li teżiġi li l-awtorità inkwistjoni tikkomunika l-imsemmija raġunijiet, sabiex il-persuna kkonċernata tkun tista’ tiddefendi d-drittijiet tagħha fl-aħjar kundizzjonijiet possibbli u sabiex tkun tista’ tiddeċiedi b’għarfien sħiħ tal-fatti jekk ikunx utli li tersaq quddiem il-qorti kompetenti, kif ukoll sabiex din tal-aħħar tkun tista’ teżerċita b’mod sħiħ l-istħarriġ tal-legalità tad-deċiżjoni inkwistjoni (ara s-sentenzi tas‑26 ta’ April 2018, Donnellan,C‑34/17, EU:C:2018:282, punt 55, u tal‑24 ta’ Novembru 2020, Minister van Buitenlandse Zaken,C‑225/19 u C‑226/19, EU:C:2020:951, punt 43). |
247 |
Barra minn hekk, fid-dawl tal-prinċipju ta’ kontradittorju, li jagħmel parti mid-drittijiet tad-difiża msemmija fl-Artikolu 47 tal-Karta, il-partijiet f’kawża għandu jkollhom id-dritt li jsiru jafu bid-dokumenti jew bl-osservazzjonijiet kollha ppreżentati lill-qorti sabiex jinfluwenzaw id-deċiżjoni tagħha u li jiddiskutuhom. Fil-fatt, id-dritt fundamentali għal rimedju ġudizzjarju effettiv ma jippermettix li deċiżjoni ġudizzjarja tiġi bbażata fuq fatti u dokumenti li l-partijiet stess, jew waħda minnhom, ma setgħux isiru jafu bihom u li għalhekk ma setgħux jieħdu pożizzjoni dwarhom (ara s-sentenzi tal‑4 ta’ Ġunju 2013, ZZ,C‑300/11, EU:C:2013:363, punti 55 u 56, u tat‑23 ta’ Ottubru 2014, Unitrading,C‑437/13, EU:C:2014:2318, punt 21). |
248 |
Madankollu, f’ċerti każijiet eċċezzjonali, awtorità tal-Unjoni tista’ topponi l-komunikazzjoni lill-persuna kkonċernata tal-motivi preċiżi u kompleti li jikkostitwixxu l-bażi ta’ deċiżjoni meħuda kontra tagħha, billi tinvoka raġunijiet li jaqgħu taħt il-protezzjoni tad-data kunfidenzjali. F’tali każ, huwa neċessarju li jiġu implimentati tekniki u dispożizzjonijiet legali li jippermettu li jiġu kkonċiljati, minn naħa, il-kunsiderazzjonijiet leġittimi dwar il-protezzjoni ta’ data kunfidenzjali li ttieħdet inkunsiderazzjoni għall-adozzjoni ta’ tali deċiżjoni u, min-naħa l-oħra, in-neċessità li jiġi ggarantit b’mod suffiċjenti lill-parti fil-kawża r-rispett tad-drittijiet proċedurali tagħha, bħad-dritt għal smigħ xieraq kif ukoll il-prinċipju ta’ kontradittorju (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punti 115 sa 120; ara wkoll, f’dan is-sens u b’analoġija, is-sentenza tat‑18 ta’ Lulju 2013, Il‑Kummissjoni et vs Kadi, C‑584/10 P, C‑593/10 P u C‑595/10 P, EU:C:2013:518, punt 125). |
249 |
Fid-dawl tan-natura speċifika tal-kontribuzzjonijiet ex ante, tali konċiljazzjoni għandha ssir ukoll fil-każ tal-kalkolu ta’ dawn il-kontribuzzjonijiet. Fil-fatt, kif jirriżulta mill-premessi 105 sa 107 tad-Direttiva 2014/59 u mill-premessa 41 tar-Regolament Nru 806/2014, l-imsemmija kontribuzzjonijiet huma intiżi li jiggarantixxu, b’loġika bbażata fuq l-assigurazzjoni, li s-settur finanzjarju jipprovdi riżorsi finanzjarji suffiċjenti lis-SRM sabiex ikun jista’ jaqdi l-funzjonijiet tiegħu, filwaqt li jinkoraġġixxi l-adozzjoni, mill-istituzzjonijiet ikkonċernati, ta’ modi ta’ funzjonament inqas riskjużi. Għalhekk, il-kalkolu ta’ dawn il-kontribuzzjonijiet huwa bbażat, mhux fuq l-applikazzjoni ta’ rata għal bażi taxxabbli, iżda, b’applikazzjoni tal-Artikoli 102 u 103 tad-Direttiva 2014/59 kif ukoll tal-Artikoli 69 u 70 tar-Regolament Nru 806/2014, fuq id-definizzjoni ta’ livell fil-mira finali li għandu jintlaħaq permezz tas-somma ta’ dawn l-istess kontribuzzjonijiet miġbura qabel it-tmiem tal-perijodu inizjali ta’ tmien snin mill‑1 ta’ Jannar 2016 (iktar ’il quddiem il-“perijodu inizjali” u l-“livell fil-mira finali”), imbagħad fuq livell annwali fil-mira li għandu jitqassam bejn l-istituzzjonijiet awtorizzati fit-territorju tal-Istati Membri parteċipanti kollha (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 113). |
250 |
Peress li l-livell fil-mira finali huwa ddefinit bħala li għandu jkun ta’ mill-inqas 1 % tal-ammont tad-depożiti koperti ta’ dawn l-istituzzjonijiet kollha u peress li l-kontribuzzjoni annwali bażika ta’ kull istituzzjoni hija kkalkolata prorata skont l-ammont tal-passiv tagħha (minbarra l-fondi proprji) u filwaqt li jitnaqqsu d-depożiti koperti, marbuta mal-passiv aggregat (minbarra l-fondi proprji) u filwaqt li jitnaqqsu d-depożiti koperti, tat-total tal-istituzzjonijiet awtorizzati fit-territorju tal-Istati Membri parteċipanti kollha, jidher li l-prinċipju stess tal-metodu ta’ kalkolu tal-kontribuzzjonijiet ex ante, kif jirriżulta mid-Direttiva 2014/59 u mir-Regolament Nru 806/2014, jimplika l-użu, mis-SRB, ta’ data koperta mis-sigriet kummerċjali (sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 114). |
251 |
Issa, l-istituzzjonijiet u l-organi tal-Unjoni huma, bħala prinċipju, obbligati, skont il-prinċipju ta’ protezzjoni tas-sigriet kummerċjali, li jikkostitwixxi prinċipju ġenerali tad-dritt tal-Unjoni, li huwa, b’mod partikolari, kkonkretizzat fl-Artikolu 339 TFUE, li ma jiżvelawx lill-kompetituri ta’ operatur privat informazzjoni kunfidenzjali pprovduta minnu (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punti 109 u 114 u l-ġurisprudenza ċċitata). |
252 |
F’dawn iċ-ċirkustanzi, kien l-obbligu tal-Kummissjoni u tal-Kunsill tal-Unjoni Ewropea, meta jistabbilixxu s-sistema ta’ kalkolu tal-kontribuzzjonijiet ex ante mir-Regolament Delegat 2015/63 u mir-Regolament ta’ Implimentazzjoni 2015/81, li jirrikonċiljaw l-osservanza tas-sigriet kummerċjali mal-prinċipju ta’ protezzjoni ġudizzjarja effettiva, b’tali mod li d-data koperta minn dan is-sigriet ma tkunx tista’ tiġi kkomunikata lill-persuni kkonċernati u li din ma tkunx tista’, b’mod partikolari, tiġi inkluża fil-motivazzjoni tad-deċiżjonijiet li jiffissaw l-ammont tal-kontribuzzjonijiet ex ante. |
253 |
Din il-karatteristika tas-sistema ta’ kalkolu tal-kontribuzzjonijiet ex ante ma tipprekludix, madankollu, l-eżerċizzju ta’ stħarriġ ġudizzjarju effettiv mill-qorti tal-Unjoni. |
254 |
Fil-fatt, minn naħa, xejn fid-dispożizzjonijiet li r-rikorrenti teċċepixxi l-illegalità tagħhom ma jipprekludi li, konformement mal-ewwel subparagrafu tal-Artikolu 88(1) tar-Regolament Nru 806/2014, is-SRB jiżvela, waqt l-adozzjoni tad-deċiżjoni tiegħu li tiffissa l-kontribuzzjonijiet ex ante, informazzjoni kunfidenzjali miksuba fil-kuntest tal-attività tiegħu f’forma mqassra jew aggregata, b’tali mod li l-istituzzjonijiet ikkonċernati ma jkunux jistgħu jiġu identifikati (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 136). |
255 |
Min-naħa l-oħra, meta l-motivazzjoni ta’ tali deċiżjoni għandha tkun limitata sabiex tiġi żgurata l-protezzjoni tad-data kunfidenzjali, huwa l-awtur ta’ dik id-deċiżjoni, fil-każ ta’ rikors quddiem il-qrati tal-Unjoni li jikkontesta dik l-informazzjoni, li għandu jiġġustifika ruħu quddiem din tal-aħħar fil-kuntest tal-istruttorja kontenzjuża (ara, f’dan is-sens, is-sentenzi tal‑1 ta’ Lulju 2008, Chronopost u La Poste vs UFEX et, C‑341/06 P u C‑342/06 P, EU:C:2008:375, punt 110, u tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 145). |
256 |
Jekk ikun il-każ, sabiex jiġi eżerċitat stħarriġ ġudizzjarju effettiv skont ir-rekwiżiti tal-Artikolu 47 tal-Karta, il-qrati tal-Unjoni jistgħu jitolbu lis-SRB jipproduċi data li tista’ tiġġustifika l-kalkoli li l-eżattezza tagħhom hija kkontestata quddiemhom, filwaqt li jiżgura, jekk ikun hemm bżonn, il-kunfidenzjalità ta’ din id-data (ara s-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 146). |
257 |
Barra minn hekk, meta twettaq eżami tal-punti ta’ liġi u ta’ fatt kollha pprovduti mis-SRB, hija l-qorti tal-Unjoni li għandha tivverifika l-fondatezza tar-raġunijiet invokati minnu sabiex jopponi l-komunikazzjoni tad-data użata għall-finijiet tal-kalkolu tal-kontribuzzjoni ex ante (ara, f’dan is-sens u b’analoġija, is-sentenza tat‑18 ta’ Lulju 2013, Il‑Kummissjoni et vs Kadi, C‑584/10 P, C‑593/10 P u C‑595/10 P, EU:C:2013:518, punt 126). |
258 |
Jekk jirriżulta li r-raġunijiet invokati mis-SRB jipprekludu effettivament il-komunikazzjoni ta’ informazzjoni jew ta’ provi prodotti quddiem il-qorti tal-Unjoni, huwa neċessarju li jiġu bbilanċjati b’mod xieraq ir-rekwiżiti marbuta mad-dritt għal protezzjoni ġudizzjarja effettiva, b’mod partikolari mal-osservanza tal-prinċipju ta’ kontradittorju, u dawk li jirriżultaw mill-protezzjoni tas-sigriet kummerċjali (ara, f’dan is-sens u b’analoġija, is-sentenza tat‑18 ta’ Lulju 2013, Il‑Kummissjoni et vs Kadi, C‑584/10 P, C‑593/10 P u C‑595/10 P, EU:C:2013:518, punt 128). |
259 |
Mill-kunsiderazzjonijiet preċedenti jirriżulta li l-kalkolu tal-kontribuzzjonijiet ex ante abbażi ta’ data koperta mis-sigriet kummerċjali, konformement mal-Artikolu 4(2), mal-Artikoli 6 u 7 kif ukoll mal-Anness I tar-Regolament Delegat 2015/63, u mingħajr ma l-imsemmija data titqiegħed għad-dispożizzjoni tal-persuni kkonċernati, ma jimplikax fih innifsu li dawn id-dispożizzjonijiet huma inkompatibbli mal-prinċipju ta’ amministrazzjoni tajba u mal-prinċipju ta’ protezzjoni ġudizzjarja effettiva. |
260 |
Din il-konklużjoni ma hijiex ikkontestata mill-argumenti tar-rikorrenti. |
261 |
F’dan ir-rigward, l-ewwel nett, ir-rikorrenti ma tistax tibbaża ruħha fuq is-sentenzi tat‑28 ta’ Novembru 2019, Portigon vs SRB (T‑365/16, EU:T:2019:824), u tat‑23 ta’ Settembru 2020, Landesbank Baden-Württemberg vs SRB (T‑411/17, EU:T:2020:435). Minn naħa, din l-aħħar sentenza ġiet annullata mill-Qorti tal-Ġustizzja fis-sentenza tagħha tal‑15 ta’ Lulju 2021, Il‑Kummissjoni vs Landesbank Baden-Württemberg u SRB (C‑584/20 P u C‑621/20 P, EU:C:2021:601), peress li ġew iċċensurati l-kunsiderazzjonijiet dwar il-prinċipju ta’ protezzjoni ġudizzjarja effettiva li fuqhom tibbaża ruħha r-rikorrenti. Min-naħa l-oħra, is-sentenza tat‑28 ta’ Novembru 2019, Portigon vs SRB (T‑365/16, EU:T:2019:824), kuntrarjament għal dak li tallega r-rikorrenti, ma tinkludi l-ebda analiżi li tikkonċerna speċifikament il-prinċipju ta’ protezzjoni ġudizzjarja effettiva. |
262 |
It-tieni nett, ir-rikorrenti ma tistax tikkontesta l-legalità tar-Regolament Delegat 2015/63 minħabba li la r-Regolament Nru 806/2014 u lanqas id-Direttiva 2014/59 ma jimponu metodu ta’ kalkolu tal-kontribuzzjonijiet ex ante li abbażi tiegħu jkun l-ewwel iddefinit livell fil-mira, imbagħad titwettaq distribuzzjoni relattiva ta’ dawn l-istess kontribuzzjonijiet bejn l-istituzzjonijiet. |
263 |
F’dan ir-rigward, huwa biżżejjed li jitfakkar li, kif ġie rrilevat fil-punti 254 sa 258 iktar ’il fuq, il-Qorti tal-Ġustizzja aċċettat il-possibbiltà għal-leġiżlatur tal-Unjoni li juża metodu ta’ kalkolu bbażat fuq id-definizzjoni ta’ livell fil-mira, imbagħad ta’ livell annwali fil-mira li għandu jinqasam bejn l-istituzzjonijiet kollha, mingħajr madankollu ma jinkisru l-obbligu ta’ motivazzjoni jew il-prinċipju ta’ protezzjoni ġudizzjarja effettiva (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punti 136, 145 u 146). |
264 |
F’dawn iċ-ċirkustanzi, ir-Regolament Delegat 2015/63 seta’ wkoll jistabbilixxi tali metodu. |
265 |
It-tielet nett, ir-rikorrenti tqis li l-istituzzjonijiet ma għandhomx aċċess għad-data kollha li hija essenzjali sabiex ikunu jistgħu jifhmu u jivverifikaw id-deċiżjoni kkontestata. |
266 |
F’dan ir-rigward, minn naħa, huwa biżżejjed li jitfakkar li d-dispożizzjonijiet imsemmija fil-punt 243 iktar ’il fuq bl-ebda mod ma jipprekludu lis-SRB milli jiżvela, sabiex jissodisfa r-rekwiżiti msemmija fil-punti 245 sa 258 iktar ’il fuq, l-informazzjoni neċessarja sabiex l-istituzzjonijiet ikkonċernati jkunu jistgħu jiżguraw ruħhom, b’mod partikolari, li jkollhom aċċess għad-data kollha li hija essenzjali sabiex jifhmu u jivverifikaw id-deċiżjoni kkontestata. |
267 |
Min-naħa l-oħra, sa fejn l-imsemmi lment jirrigwarda l-legalità tad-deċiżjoni kkontestata, ir-rikorrenti ma ressqet l-ebda argument insostenn tiegħu quddiem il-Qorti Ġenerali. |
268 |
Għaldaqstant, tali lment ma jistax jintlaqa’. |
269 |
Ir-raba’ nett, fir-rigward tal-argument tar-rikorrenti dwar l-assenza, fid-deċiżjoni kkontestata, ta’ data dwar l-iffissar tar-“rata ta’ aġġustament tad-depożiti koperti” li sservi sabiex jiġi ddeterminat il-livell annwali fil-mira, tali argument ma jikkontestax id-dispożizzjonijiet imsemmija fil-punt 243 iktar ’il fuq, li r-rikorrenti teċċepixxi l-illegalità tagħhom fid-dawl tal-prinċipju ta’ amministrazzjoni tajba u tal-prinċipju ta’ protezzjoni ġudizzjarja effettiva, iżda l-legalità tad-deċiżjoni kkontestata. B’hekk din ser tiġi eżaminata fil-punti 309 sa 314 iktar ’il quddiem. |
270 |
Għaldaqstant, ir-raba’ u l-ħames motiv għandhom jiġu miċħuda sa fejn dawn tqajmu insostenn tal-eċċezzjoni ta’ illegalità tal-Artikolu 4(2), tal-Artikoli 6 u 7 kif ukoll tal-Anness I tar-Regolament Delegat 2015/63. |
C. Fuq il‑motivi li jirrigwardaw il‑legalità tad‑deċiżjoni kkontestata
1. Fuq il‑motivazzjoni tad‑determinazzjoni tal‑livell annwali fil‑mira
271 |
Kif indikat fil-punt 232 iktar ’il fuq, permezz tat-tielet parti tat-tielet motiv, ir-rikorrenti tikkontesta, b’mod partikolari, fir-realtà, in-nuqqas ta’ motivazzjoni tad-deċiżjoni kkontestata fir-rigward tad-determinazzjoni tal-livell annwali fil-mira. |
272 |
F’dan ir-rigward, għandu jitfakkar li, konformement mal-Artikolu 69(1) tar-Regolament Nru 806/2014, fi tmiem il-perijodu inizjali, il-mezzi finanzjarji disponibbli fis-SRF għandhom jilħqu l-livell fil-mira finali, li jikkorrispondi għal mill-inqas 1 % tal-ammont tad-depożiti koperti tal-istituzzjonijiet kollha awtorizzati fit-territorju tal-Istati Membri parteċipanti kollha. |
273 |
Skont l-Artikolu 69(2) tar-Regolament Nru 806/2014, matul il-perijodu inizjali, il-kontribuzzjonijiet ex ante għandhom jitqassmu b’mod uniformi kemm jista’ jkun fiż-żmien sakemm jintlaħaq il-livell fil-mira finali msemmi fil-punt 272 iktar ’il fuq, iżda billi tittieħed debitament inkunsiderazzjoni l-fażi taċ-ċiklu tan-negozju u l-impatt li l-kontribuzzjonijiet proċikliċi jista’ jkollhom fuq il-pożizzjoni finanzjarja tal-istituzzjonijiet. |
274 |
L-Artikolu 70(2) tar-Regolament Nru 806/2014 jippreċiża li, kull sena, il-kontribuzzjonijiet dovuti mill-istituzzjonijiet kollha awtorizzati fit-territorju tal-Istati Membri parteċipanti kollha ma jaqbżux 12.5 % tal-livell fil-mira finali. |
275 |
Fir-rigward tal-metodu ta’ kalkolu tal-kontribuzzjonijiet ex ante, l-Artikolu 4(2) tar-Regolament Delegat 2015/63 jipprevedi li s-SRB għandu jiddetermina l-ammont tagħhom abbażi tal-livell annwali fil-mira, fid-dawl tal-livell fil-mira finali, u abbażi tal-ammont medju tad-depożiti koperti tas-sena preċedenti, ikkalkolat kull tliet xhur, għall-istituzzjonijiet awtorizzati kollha fit-territorju tal-Istati Membri parteċipanti kollha. |
276 |
Bl-istess mod, skont l-Artikolu 4 tar-Regolament ta’ Implimentazzjoni 2015/81, is-SRB jikkalkola l-kontribuzzjoni ex ante għal kull istituzzjoni abbażi tal-livell annwali fil-mira, li għandu jiġi stabbilit fid-dawl tal-livell fil-mira finali u konformement mal-metodu espost fir-Regolament Delegat 2015/63. |
277 |
F’dan il-każ, kif jirriżulta mill-premessa 48 tad-deċiżjoni kkontestata, is-SRB stabbilixxa, għall-perijodu ta’ kontribuzzjoni 2021, l-ammont tal-livell annwali fil-mira għal EUR 11287677 212.56. |
278 |
Fil-premessi 36 u 37 tad-deċiżjoni kkontestata, is-SRB spjega, essenzjalment, li l-livell annwali fil-mira kellu jiġi ddeterminat abbażi ta’ analiżi tal-evoluzzjoni tad-depożiti koperti matul is-snin preċedenti, abbażi ta’ kull żvilupp rilevanti tas-sitwazzjoni ekonomika kif ukoll abbażi ta’ analiżi dwar l-indikaturi relatati mal-fażi taċ-ċiklu tan-negozju u dwar l-effetti li l-kontribuzzjonijiet proċikliċi jkollhom fuq is-sitwazzjoni finanzjarja tal-istituzzjonijiet. Sussegwentement, is-SRB qies xieraq li jiġi ffissat koeffiċjent li kien ibbażat fuq din l-analiżi u fuq il-mezzi finanzjarji disponibbli fis-SRF (iktar ’il quddiem il-“koeffiċjent”). Is-SRB applika dan il-koeffiċjent għal wieħed minn tmienja tal-ammont medju tad-depożiti koperti fl‑2020, sabiex jinkiseb il-livell annwali fil-mira. |
279 |
Is-SRB espona l-approċċ segwit sabiex jiġi stabbilit il-koeffiċjent fil-premessi 38 sa 47 tad-deċiżjoni kkontestata. |
280 |
Fil-premessa 38 tad-deċiżjoni kkontestata, is-SRB ikkonstata tendenza kostanti ta’ żieda tad-depożiti koperti għall-istituzzjonijiet kollha tal-Istati Membri parteċipanti. B’mod partikolari, l-ammont medju ta’ dawn id-depożiti, ikkalkolat kull tliet xhur, għall‑2020 kien jammonta għal EUR 6.689 triljun. |
281 |
Fil-premessi 40 u 41 tad-deċiżjoni kkontestata, is-SRB ippreżenta l-evoluzzjoni pronjostikata tad-depożiti koperti għat-tliet snin li kien jifdal tal-perijodu inizjali, jiġifieri mill‑2021 sal‑2023. Huwa qies li r-rati ta’ tkabbir annwali tad-depożiti koperti sal-aħħar tal-perjodu inizjali kienu bejn 4 % u 7 %. |
282 |
Fil-premessi 42 sa 45 tad-deċiżjoni kkontestata, is-SRB ippreżenta evalwazzjoni tal-fażi taċ-ċiklu tan-negozju u tal-effett proċikliku potenzjali li l-kontribuzzjonijiet ex ante jista’ jkollhom fuq is-sitwazzjoni finanzjarja tal-istituzzjonijiet. Sabiex jagħmel dan, huwa indika li ħa inkunsiderazzjoni diversi indikaturi, bħall-previżjoni tat-tkabbir tal-prodott domestiku gross tal-Kummissjoni u bħall-projezzjonijiet tal-Bank Ċentrali Ewropew (BĊE) f’dan ir-rigward jew bħall-fluss ta’ kreditu tas-settur privat f’perċentwali tal-prodott domestiku gross. |
283 |
Fil-premessa 46 tad-deċiżjoni kkontestata, is-SRB ikkonkluda li, li kieku kien raġonevoli li wieħed jistenna li jkompli t-tkabbir tad-depożiti koperti fi ħdan l-unjoni bankarja, ir-ritmu ta’ dan it-tkabbir ikun inqas minn dak tal‑2020. F’dan ir-rigward, is-SRB indika, fil-premessa 47 tad-deċiżjoni kkontestata, li adotta “approċċ prudenti” fir-rigward tar-rati ta’ tkabbir tad-depożiti koperti għas-snin li ġejjin sal‑2023. |
284 |
Fid-dawl ta’ dawn il-kunsiderazzjonijiet, is-SRB stabbilixxa, fil-premessa 48 tad-deċiżjoni kkontestata, il-valur tal-koeffiċjent għal 1.35 %. Sussegwentement hija kkalkolat l-ammont tal-livell annwali fil-mira, billi mmultiplikat l-ammont medju tad-depożiti koperti fl‑2020 b’dan il-koeffiċjent u billi għamlet diviżjoni tar-riżultat ta’ dan il-kalkolu bi tmienja, konformement mal-formula matematika li ġejja, li tinsab fil-premessa 48 tal-imsemmija deċiżjoni: “Mira0 [ammont tal-livell annwali fil-mira] = Total tad-depożiti koperti2020 * 0.0135 * ⅛ = EUR 11287677 212.56”. |
285 |
Madankollu, waqt is-seduta, is-SRB indika li kien iddetermina l-livell annwali fil-mira għall-perijodu ta’ kontribuzzjoni 2021 kif ġej. |
286 |
L-ewwel nett, abbażi ta’ analiżi prospettiva, is-SRB stabbilixxa l-ammont tad-depożiti koperti tal-istituzzjonijiet kollha awtorizzati fit-territorju tal-Istati Membri parteċipanti kollha, pronjostikata sal-aħħar tal-perijodu inizjali, għal madwar EUR 7.5 triljun. Sabiex jasal għal dan l-ammont, is-SRB ħa inkunsiderazzjoni l-ammont medju tad-depożiti koperti fl‑2020, jiġifieri EUR 6.689 triljun, rata ta’ tkabbir annwali tad-depożiti koperti ta’ 4 % kif ukoll in-numru ta’ perijodi ta’ kontribuzzjoni li jifdal sat-tmiem tal-perijodu inizjali, jiġifieri tlieta. |
287 |
It-tieni nett, konformement mal-Artikolu 69(1) tar-Regolament Nru 806/2014, is-SRB ikkalkola 1 % ta’ dawn is‑EUR 7.5 triljun sabiex jinkiseb l-ammont stmat tal-livell fil-mira finali li kellu jintlaħaq fi tmiem il-perijodu inizjali, jiġifieri madwar EUR 75 biljun. |
288 |
It-tielet nett, is-SRB naqqas minn dan l-aħħar ammont ir-riżorsi finanzjarji diġà disponibbli fis-SRF fl‑2021, jiġifieri madwar EUR 42 biljun, sabiex jikseb l-ammont li kien għad irid jinġabar matul il-perijodi ta’ kontribuzzjoni li kien fadal qabel it-tmiem tal-perijodu inizjali, jiġifieri mill‑2021 sal‑2023. Dan l-ammont ammonta għal madwar EUR 33 biljun. |
289 |
Ir-raba’ nett, is-SRB għamel diviżjoni ta’ dan l-aħħar ammont bi tlieta sabiex iqassmu b’mod uniformi bejn l-imsemmija tliet perijodi ta’ kontribuzzjoni li kien fadal. Il-livell annwali fil-mira għall-perijodu ta’ kontribuzzjoni 2021 ġie għalhekk iffissat għall-ammont imsemmi fil-punt 277 iktar ’il fuq, jiġifieri madwar EUR 11.287 biljun. |
290 |
Is-SRB afferma wkoll, waqt is-seduta, li huwa kien għamel pubbliċi l-elementi ta’ informazzjoni li fuqhom kien ibbażat il-metodu deskritt fil-punti 286 sa 289 iktar ’il fuq u li kienu jippermettu lir-rikorrenti tifhem il-metodu li permezz tiegħu ġie ddeterminat il-livell annwali fil-mira. B’mod partikolari, huwa ppreċiża li huwa kien ippubblika fis-sit internet tiegħu, f’Mejju 2021, jiġifieri wara l-adozzjoni tad-deċiżjoni kkontestata, iżda qabel il-preżentata ta’ dan ir-rikors, skeda deskrittiva msejħa “Fact Sheet 2021” (iktar ’il quddiem l-“iskeda deskrittiva”), li kienet tindika l-ammont stmat tal-livell fil-mira finali. Bl-istess mod, is-SRB afferma li l-ammont tal-mezzi finanzjarji disponibbli fis-SRF kien disponibbli wkoll fuq is-sit internet tiegħu kif ukoll permezz ta’ sorsi pubbliċi oħra, u dan ferm qabel l-adozzjoni tad-deċiżjoni kkontestata. |
291 |
Sabiex jiġi eżaminat jekk is-SRB osservax l-obbligu ta’ motivazzjoni tiegħu f’dak li jirrigwarda d-determinazzjoni tal-livell annwali fil-mira, għandu qabelxejn jitfakkar li nuqqas jew insuffiċjenza ta’ motivazzjoni jikkostitwixxu motiv ta’ ordni pubbliku li jista’, jew li għandu, jitqajjem ex officio mill-qorti tal-Unjoni (ara s-sentenza tat‑2 ta’ Diċembru 2009, Il‑Kummissjoni vs L‑Irlanda et, C‑89/08 P, EU:C:2009:742, punt 34 u l-ġurisprudenza ċċitata). Konsegwentement, il-Qorti Ġenerali tista’, jew saħansitra għandha, tieħu inkunsiderazzjoni wkoll nuqqasijiet oħra ta’ motivazzjoni minbarra dawk invokati mir-rikorrenti, u dan b’mod partikolari meta dawn jirriżultaw matul il-proċedura. |
292 |
Għal dan l-għan, il-partijiet instemgħu, matul il-fażi orali tal-proċedura, dwar in-nuqqasijiet ta’ motivazzjoni possibbli li bihom hija vvizzjata d-deċiżjoni kkontestata fir-rigward tad-determinazzjoni tal-livell annwali fil-mira. B’mod partikolari, mistoqsi espressament f’dan ir-rigward, is-SRB ikkonferma l-metodu li huwa kien realment segwa sabiex jiddetermina l-livell annwali fil-mira għall-perijodu ta’ kontribuzzjoni 2021, kif espost fil-punti 286 sa 289 iktar ’il fuq. |
293 |
F’dak li jirrigwarda, sussegwentement, il-kontenut tal-obbligu ta’ motivazzjoni, mill-ġurisprudenza jirriżulta li l-motivazzjoni ta’ deċiżjoni ta’ istituzzjoni, ta’ korp jew ta’ organu tal-Unjoni għandha importanza partikolari ħafna, sa fejn din tippermetti lill-persuna kkonċernata tiddeċiedi b’għarfien sħiħ tal-fatti jekk għandhiex l-intenzjoni li tippreżenta rikors kontra dik id-deċiżjoni kif ukoll lill-qorti kompetenti li teżerċita l-istħarriġ tagħha, u li għalhekk tikkostitwixxi waħda mill-kundizzjonijiet għall-effettività tal-istħarriġ ġudizzjarju ggarantit mill-Artikolu 47 tal-Karta (ara s-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 103 u l-ġurisprudenza ċċitata). |
294 |
Tali motivazzjoni tista’ tkun adattata għan-natura tal-att inkwistjoni u għall-kuntest li fih dan ikun ġie adottat. F’dan ir-rigward, ma huwiex meħtieġ li l-motivazzjoni tispeċifika kull punt ta’ fatt u ta’ liġi rilevanti, sa fejn in-natura suffiċjenti ta’ motivazzjoni għandha tiġi evalwata mhux biss fid-dawl tal-formulazzjoni tagħha, iżda wkoll fid-dawl tal-kuntest tagħha kif ukoll fid-dawl tar-regoli ġuridiċi kollha li jirregolaw il-qasam ikkonċernat u, b’mod partikolari, skont l-interess li l-persuni kkonċernati mill-att jista’ jkollhom sabiex jirċievu spjegazzjonijiet. Konsegwentement, att li jikkawża preġudizzju jkun immotivat b’mod suffiċjenti meta dan ikun sar f’kuntest magħruf mill-persuna kkonċernata, li jkun jippermettilha tifhem il-portata tal-miżura meħuda fil-konfront tagħha (ara, f’dan is-sens, is-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 104 u l-ġurisprudenza ċċitata). |
295 |
Barra minn hekk, din il-motivazzjoni għandha tkun, b’mod partikolari, nieqsa minn kontradizzjonijiet sabiex tippermetti lill-persuni kkonċernati jkunu jafu l-motivi reali ta’ din id-deċiżjoni, sabiex jiddefendu d-drittijiet tagħhom quddiem il-qorti kompetenti, u sabiex din tal-aħħar teżerċita l-istħarriġ tagħha (ara, f’dan is-sens, is-sentenzi tal‑10 ta’ Lulju 2008, Bertelsmann u Sony Corporation of America vs Impala, C‑413/06 P, EU:C:2008:392, punt 169 u l-ġurisprudenza ċċitata; tat‑22 ta’ Settembru 2005, Suproco vs Il‑Kummissjoni, T‑101/03, EU:T:2005:336, punti 20 u 45 sa 47, u tas‑16 ta’ Diċembru 2015, Il‑Greċja vs Il‑Kummissjoni, T‑241/13, EU:T:2015:982, punt 56). |
296 |
Bl-istess mod, meta l-awtur tad-deċiżjoni kkontestata jipprovdi ċerti spjegazzjonijiet dwar il-motivi tagħha matul il-proċedura quddiem il-qorti tal-Unjoni, dawn l-ispjegazzjonijiet għandhom ikunu koerenti mal-kunsiderazzjonijiet esposti f’dik id-deċiżjoni (ara, f’dan is-sens, is-sentenzi tat‑22 ta’ Settembru 2005, Suproco vs Il‑Kummissjoni, T‑101/03, EU:T:2005:336, punti 45 sa 47, u tat‑13 ta’ Diċembru 2016, Printeos et vs Il‑Kummissjoni, T‑95/15, EU:T:2016:722, punti 54 u 55). |
297 |
Fil-fatt, għalkemm il-kunsiderazzjonijiet esposti fid-deċiżjoni kkontestata ma humiex koerenti ma’ tali spjegazzjonijiet ipprovduti matul il-proċedura ġudizzjarja, il-motivazzjoni tad-deċiżjoni kkonċernata ma tissodisfax il-funzjonijiet imfakkra fil-punti 293 u 294 iktar ’il fuq. B’mod partikolari, tali inkoerenza tipprekludi, minn naħa, lill-persuni kkonċernati milli jkunu jafu l-motivi reali tad-deċiżjoni kkontestata, qabel il-preżentata tar-rikors, u milli jippreparaw id-difiża tagħhom fir-rigward tagħhom u, min-naħa l-oħra, lill-qorti tal-Unjoni milli tidentifika l-motivi li servew bħala bażi legali vera għal dik id-deċiżjoni u milli teżamina l-konformità tagħhom mar-regoli applikabbli. |
298 |
Fl-aħħar nett, għandu jitfakkar li, meta s-SRB jadotta deċiżjoni li tistabbilixxi l-kontribuzzjonijiet ex ante, huwa għandu jgħarraf lill-istituzzjonijiet ikkonċernati bil-metodu ta’ kalkolu ta’ dawn il-kontribuzzjonijiet (ara s-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 122). |
299 |
L-istess għandu japplika għall-metodu ta’ determinazzjoni tal-livell annwali fil-mira, peress li dan l-ammont għandu importanza essenzjali fl-istruttura ta’ tali deċiżjoni. Fil-fatt, kif jirriżulta mill-Artikolu 4 tar-Regolament ta’ Implimentazzjoni 2015/81, il-metodu ta’ kalkolu tal-kontribuzzjonijiet ex ante jikkonsisti fit-tqassim tal-imsemmi ammont bejn l-istituzzjonijiet ikkonċernati kollha, b’tali mod li żieda jew tnaqqis ta’ dan l-istess ammont iwassal għal żieda jew tnaqqis korrispondenti tal-kontribuzzjoni ex ante ta’ kull waħda minn dawn l-istituzzjonijiet. |
300 |
Mill-kunsiderazzjonijiet preċedenti jirriżulta li, għalkemm is-SRB huwa obbligat li jipprovdi lill-istituzzjonijiet, permezz tad-deċiżjoni kkontestata, spjegazzjonijiet dwar il-metodu ta’ determinazzjoni tal-livell annwali fil-mira, dawn l-ispjegazzjonijiet għandhom ikunu koerenti mal-ispjegazzjonijiet ipprovduti mis-SRB matul il-proċedura ġudizzjarja u dwar il-metodu realment applikat. |
301 |
Issa, dan ma huwiex il-każ f’din il-kawża. |
302 |
Fil-fatt, qabel kollox għandu jiġi rrilevat li d-deċiżjoni kkontestata esponiet, fil-premessa 48, formula matematika li ġiet ippreżentata bħala l-bażi tad-determinazzjoni tal-livell annwali fil-mira. Issa, jirriżulta li din il-formula ma tinkludix l-elementi tal-metodu realment applikat mis-SRB, kif spjegat waqt is-seduta. Fil-fatt, kif jirriżulta mill-punti 286 sa 289 iktar ’il fuq, is-SRB kiseb l-ammont tal-livell annwali fil-mira, bl-użu ta’ dan il-metodu, billi naqqas mil-livell fil-mira finali l-mezzi finanzjarji disponibbli fis-SRF, sabiex jikkalkola l-ammont li kien għad irid jinġabar sat-tmiem tal-perijodu inizjali, u billi għamel diviżjoni ta’ dan l-aħħar ammont bi tlieta. Issa, dawn iż-żewġ passi tal-kalkolu ma huma bl-ebda mod espressi fl-imsemmija formula matematika. |
303 |
Barra minn hekk, din il-konstatazzjoni ma tistax tiġi kkontestata mid-dikjarazzjoni tas-SRB li huwa ppubblika, f’Mejju 2021, l-iskeda deskrittiva, li tinkludi firxa li tindika l-ammonti possibbli tal-livell fil-mira finali, u, fuq is-sit internet tiegħu, l-ammont tal-mezzi finanzjarji disponibbli fis-SRF. Fil-fatt, indipendentement mill-kwistjoni dwar jekk ir-rikorrenti kinitx effettivament taf b’dawn l-ammonti, dawn tal-aħħar ma kinux, waħedhom, ta’ natura li jippermettulha tifhem li ż-żewġ operazzjonijiet imsemmija fil-punt 302 iktar ’il fuq kienu ġew effettivament applikati mis-SRB, filwaqt li huwa ppreċiżat, barra minn hekk, li l-formula matematika prevista fil-premessa 48 tad-deċiżjoni kkontestata lanqas biss kienet issemmihom. |
304 |
Inkoerenzi simili jaffettwaw ukoll il-mod li bih ġie ffissat il-koeffiċjent ta’ 1.35 %, li madankollu għandu rwol kruċjali fil-formula matematika msemmija fil-punt 303 iktar ’il fuq. Fil-fatt, dan il-koeffiċjent jista’ jinftiehem fis-sens li huwa bbażat, fost parametri oħra, fuq it-tkabbir pronjostikat tad-depożiti koperti matul is-snin li jifdal tal-perijodu inizjali. Issa, dan huwa inkoerenti mal-ispjegazzjonijiet ipprovduti mis-SRB waqt is-seduta, li minnhom jirriżulta li dan il-koeffiċjent kien ġie stabbilit b’mod li jkun jista’ jiġġustifika r-riżultat tal-kalkolu tal-ammont tal-livell annwali fil-mira, jiġifieri wara li s-SRB ikkalkola dan l-ammont b’applikazzjoni tal-erba’ passi esposti fil-punti 286 sa 289 iktar ’il fuq u, b’mod partikolari, permezz tad-diviżjoni bi tlieta tal-ammont li jirriżulta mit-tnaqqis tal-mezzi finanzjarji disponibbli fis-SRF mil-livell fil-mira finali. Issa, dan l-approċċ bl-ebda mod ma jirriżulta mid-deċiżjoni kkontestata. |
305 |
Barra minn hekk, għandu jitfakkar li, skont l-iskeda deskrittiva, l-ammont tal-livell fil-mira finali stmat kien jinsab f’firxa ta’ bejn EUR 70 u 75 biljun. Madankollu, din il-firxa tidher li hija inkoerenti mal-firxa tar-rata ta’ tkabbir tad-depożiti koperti ta’ bejn 4 % u 7 % li tinsab fil-premessa 41 tad-deċiżjoni kkontestata. Fil-fatt, is-SRB indika waqt is-seduta li, għall-finijiet tad-determinazzjoni tal-livell annwali fil-mira, huwa kien ħa inkunsiderazzjoni r-rata ta’ tkabbir tad-depożiti koperti ta’ 4 % – li kienet l-iktar rata baxxa tat-tieni firxa – u li għalhekk kien kiseb il-livell fil-mira finali stmat ta’ EUR 75 biljun – li kien jikkostitwixxi l-ogħla valur tal-ewwel firxa. B’hekk jirriżulta li jeżisti nuqqas ta’ qbil bejn dawn iż-żewġ firxiet. Fil-fatt, minn naħa, il-firxa li tirrigwarda r-rata ta’ evoluzzjoni tad-depożiti koperti tinkludi wkoll valuri ogħla mir-rata ta’ 4 %, li l-applikazzjoni tagħhom madankollu tkun wasslet għal ammont stmat tal-livell fil-mira finali ogħla minn dawk inklużi fil-firxa relatata ma’ dan il-livell fil-mira. Min-naħa l-oħra, huwa impossibbli għar-rikorrenti li tifhem ir-raġuni għalfejn is-SRB inkluda ammonti ta’ inqas minn EUR 75 biljun fil-firxa relatata mal-imsemmi livell fil-mira. Fil-fatt, sabiex dan jirnexxi, kien neċessarju li tiġi applikata rata ta’ inqas minn 4 %, li madankollu ma hijiex inkluża fil-firxa tar-rata ta’ tkabbir tad-depożiti koperti. F’dawn iċ-ċirkustanzi, ir-rikorrenti ma kinitx f’pożizzjoni li tiddetermina l-mod kif is-SRB kien uża l-firxa li tirrigwarda r-rata ta’ evoluzzjoni ta’ dawn id-depożiti sabiex jasal għall-kalkolu tal-livell fil-mira finali stmat. |
306 |
Minn dan isegwi li, fir-rigward tad-determinazzjoni tal-livell annwali fil-mira, il-metodu realment applikat mis-SRB, kif spjegat waqt is-seduta, ma jikkorrispondix għal dak deskritt fid-deċiżjoni kkontestata, b’tali mod li l-motivi reali, li fid-dawl tagħhom ġie ffissat dan il-livell fil-mira, ma setgħux jiġu identifikati abbażi tad-deċiżjoni kkontestata la mill-istituzzjonijiet u lanqas mill-Qorti Ġenerali. |
307 |
Fid-dawl tal-kunsiderazzjonijiet preċedenti, għandu jiġi kkonstatat li d-deċiżjoni kkontestata hija vvizzjata b’difetti ta’ motivazzjoni f’dak li jirrigwarda d-determinazzjoni tal-livell annwali fil-mira. |
308 |
Għalhekk, it-tielet parti tat-tielet motiv, sa fejn hija bbażata fuq nuqqas ta’ motivazzjoni tad-deċiżjoni kkontestata fir-rigward tad-determinazzjoni tal-livell annwali fil-mira, għandha tintlaqa’. Fid-dawl tal-kwistjonijiet legali u ekonomiċi ta’ din il-kawża, huwa madankollu fl-interess ta’ amministrazzjoni tajba tal-ġustizzja li jitkompla l-eżami tal-motivi l-oħra tar-rikors. |
2. Fuq il‑kumplament tar‑raba’ u tal‑ħames motiv, ibbażati fuq il‑ksur tal‑prinċipju ta’ amministrazzjoni tajba u fuq il‑ksur tal‑prinċipju ta’ protezzjoni ġudizzjarja effettiva mis‑SRB fid‑deċiżjoni kkontestata
309 |
Kif jirriżulta mill-punt 269 iktar ’il fuq, permezz tar-raba’ u tal-ħames motiv tagħha, ir-rikorrenti tikkontesta wkoll il-ksur tal-prinċipju ta’ amministrazzjoni tajba u tal-prinċipju ta’ protezzjoni ġudizzjarja effettiva mid-deċiżjoni kkontestata stess. |
310 |
L-argument tar-rikorrenti jirrigwarda b’mod iktar preċiż l-assenza, fid-deċiżjoni kkontestata, ta’ data dwar l-iffissar tar-“rata ta’ aġġustament tad-depożiti koperti” li sservi sabiex jiġi ddeterminat il-livell annwali fil-mira, jiġifieri l-koeffiċjent. |
311 |
Kif jirriżulta mill-eżami li jinsab fil-punti 271 sa 308 iktar ’il fuq, is-SRB kiser l-obbligu ta’ motivazzjoni f’dak li kien jirrigwarda l-iffissar tal-livell annwali fil-mira. |
312 |
Barra minn hekk, mill-Artikolu 41(2)(ċ) tal-Karta u mill-ġurisprudenza ċċitata fil-punt 246 iktar ’il fuq jirriżulta li l-motivazzjoni ta’ deċiżjoni ta’ korp tal-Unjoni tikkostitwixxi waħda mill-kundizzjonijiet għall-effettività tal-prinċipji ta’ amministrazzjoni tajba u ta’ protezzjoni ġudizzjarja effettiva. |
313 |
Minn dan isegwi li l-ksur tal-obbligu ta’ motivazzjoni tad-deċiżjoni kkontestata fir-rigward tad-determinazzjoni tal-livell annwali fil-mira jikkostitwixxi wkoll ksur tal-prinċipju ta’ amministrazzjoni tajba u tal-prinċipju ta’ protezzjoni ġudizzjarja effettiva. |
314 |
Għaldaqstant, ir-raba’ u l-ħames motiv għandhom jintlaqgħu sa fejn jirrigwardaw il-ksur tal-prinċipji ta’ amministrazzjoni tajba u ta’ protezzjoni ġudizzjarja effettiva minħabba l-ksur tal-obbligu ta’ motivazzjoni. |
3. Fuq is‑seba’ u t‑tmien motiv, ibbażati fuq żbalji manifesti ta’ evalwazzjoni u fuq żball ta’ liġi li jirriżultaw mil‑limitazzjonijiet imposti fuq l‑użu tal‑IPI
315 |
Permezz tas-seba’ motiv, ir-rikorrenti ssostni li s-SRB wettaq diversi żbalji manifesti ta’ evalwazzjoni meta evalwa l-livell ta’ użu tal-IPI u l-garanziji li għandhom jiġu aċċettati bħala korrispettiv. |
316 |
Permezz tat-tmien motiv, ir-rikorrenti ssostni li s-SRB kiser l-Artikolu 70(3) tar-Regolament Nru 806/2014 u l-Artikolu 103(3) tad-Direttiva 2014/59 meta stabbilixxa l-livell tal-użu tal-IPI u l-garanziji li għandhom jiġu aċċettati bħala korrispettiv. |
317 |
Is-SRB jikkontesta dawn l-argumenti. |
318 |
Preliminarjament, għandu jitfakkar li l-kontribuzzjonijiet ex ante jistgħu jitħallsu jew permezz ta’ ħlas immedjat fi flus, jew permezz ta’ IPI, konformement mal-Artikolu 70(3) tar-Regolament Nru 806/2014. Fil-każ tal-użu ta’ IPI, l-istituzzjoni għandha tikkonkludi ftehim mas-SRB li permezz tiegħu hija timpenja ruħha li tħallas is-somma korrispondenti, bħala parti mill-kontribuzzjoni ex ante, mal-ewwel talba. |
319 |
F’dan ir-rigward, għandu jiġi ppreċiżat li, fid-deċiżjoni kkontestata, is-SRB illimita l-użu tal-IPI għal 15 % tal-ammont tal-kontribuzzjonijiet ex ante dovuti għall-perijodu ta’ kontribuzzjoni 2021 u l-garanziji ppreżentati taħt l-IPI għal flus biss. |
320 |
Barra minn hekk, għandu jitfakkar li l-Artikolu 70(3) tar-Regolament Nru 806/2014 jipprevedi li l-mezzi finanzjarji disponibbli li għandhom jittieħdu inkunsiderazzjoni sabiex jintlaħaq il-livell fil-mira finali jistgħu jinkludu IPI kompletament iggarantiti minn assi b’riskju baxx mhux ostakolati b’xi drittijiet ta’ terzi, irriżervati għall-użu esklużiv tas-SRB, filwaqt li jiġi ppreċiżat li l-parti tal-IPI ma tistax taqbeż 30 % tal-ammont totali tal-kontribuzzjonijiet ex ante kull sena. Tali possibbiltà hija prevista wkoll fl-Artikolu 103(3) tad-Direttiva 2014/59. |
321 |
Skont l-Artikolu 13(3) tar-Regolament Delegat 2015/63, huwa s-SRB li għandu jispeċifika, fid-deċiżjoni dwar il-kontribuzzjonijiet ex ante għal perijodu ta’ kontribuzzjoni partikolari, il-parti tal-IPI li kull istituzzjoni tista’ tuża, filwaqt li s-SRB jaċċetta l-garanziji biss jekk it-tip tagħhom u l-kundizzjonijiet marbuta magħhom jippermettu r-rilaxx rapidu tagħhom, inkluż fil-każ fejn ser tittieħed deċiżjoni ta’ riżoluzzjoni fi tmiem il-ġimgħa. |
322 |
Meta s-SRB jiddefinixxi l-parti ta’ dawn l-IPI, huwa għandu jiżgura, konformement mal-Artikolu 7(1) tar-Regolament ta’ Implimentazzjoni 2015/81, li l-użu ta’ IPI ma jikkomprometti bl-ebda mod il-kapaċità finanzjarja jew il-likwidità tas-SRF. |
323 |
Fl-aħħar nett, l-Artikolu 8(3) tar-Regolament ta’ Implimentazzjoni 2015/81 jindika li, matul il-perijodu inizjali, f’kundizzjonijiet normali, is-SRB jawtorizza l-użu ta’ IPI fuq talba ta’ istituzzjoni u jiżgura tqassim ġust bejn l-istituzzjonijiet li jitolbuh. Din id-dispożizzjoni tippreċiża wkoll li l-ammont tal-IPI allokati ma jistax ikun inqas minn 15 % tat-total tal-obbligi ta’ ħlas tal-istituzzjoni kkonċernata u li, meta jikkalkola l-kontribuzzjonijiet annwali ta’ kull istituzzjoni, is-SRB għandu jiżgura li, għal kull sena partikolari, is-somma tal-imsemmija IPI ma taqbiżx 30 % tal-ammont totali ta’ dawn il-kontribuzzjonijiet. |
324 |
Mid-dispożizzjonijiet imsemmija iktar ’il fuq jirriżulta, minn naħa, li r-rata speċifika tal-IPI mogħtija lil istituzzjoni li tagħmel it-talba għall-użu tagħhom tammonta, tal-inqas, għal 15 % tat-total tal-obbligi ta’ ħlas tagħha u, min-naħa l-oħra, li s-somma tal-IPI awtorizzati kollha ma għandhiex taqbeż il-limitu massimu ta’ 30 % tat-total tal-kontribuzzjonijiet ex ante għall-perijodu kollu ta’ kontribuzzjoni partikolari. Dan il-limitu massimu tal-aħħar stabbilit mil-leġiżlatur tal-Unjoni huwa intiż, kif jikkonferma l-Artikolu 7(1) tar-Regolament ta’ Implimentazzjoni 2015/81, li ma jipperikolax il-likwidità u l-kapaċità operattiva tas-SRF. |
325 |
Għalhekk, huwa s-SRB li għandu jistabbilixxi l-parti preċiża tal-IPI mogħtija lil istituzzjoni li tagħmel talba għall-użu tagħhom, peress li din il-parti ma tistax tkun inqas minn 15 % tat-total tal-obbligi ta’ ħlas tagħha, filwaqt li għandu jiżgura li ma jinqabiżx il-limitu massimu msemmi fil-punt 324 iktar ’il fuq fir-rigward tas-somma tal-IPI awtorizzati kollha. Barra minn hekk, għalkemm dawn id-dispożizzjonijiet ma jinkludux preċiżazzjonijiet fir-rigward tan-natura tal-garanziji li għandhom jiġu aċċettati, xorta jibqa’ l-fatt li s-SRB jista’ jaċċetta IPI biss jekk dawn ikunu ggarantiti minn assi b’riskju baxx mhux ostakolati b’xi drittijiet ta’ terzi u jekk il-kundizzjonijiet marbuta magħhom jippermettu r-rilaxx rapidu tagħhom. |
326 |
Għalhekk, d-determinazzjoni tal-parti preċiża tal-IPI mogħtija lil istituzzjoni li tagħmel talba għall-użu tagħhom u tan-natura tal-garanziji aċċettabbli tinvolvi evalwazzjonijiet kumplessi ta’ natura ekonomika u teknika, b’tali mod li l-istħarriġ tal-qorti tal-Unjoni għandu jkun limitat għal eżami dwar jekk l-eżerċizzju tas-setgħa ta’ evalwazzjoni mogħtija lis-SRB huwiex ivvizzjat minn żball manifest jew minn użu ħażin ta’ poter, jew jekk is-SRB eċċediex manifestament il-limiti ta’ din is-setgħa. |
327 |
Huwa fid-dawl ta’ dawn il-kunsiderazzjonijiet li għandhom jiġu eżaminati l-argumenti tar-rikorrenti. |
328 |
Fl-ewwel lok, fir-rigward tal-limitazzjoni tal-użu tal-IPI għal 15 % tal-ammont tal-kontribuzzjonijiet ex ante, ir-rikorrenti tqis li tali limitazzjoni tmur kontra l-ispirtu, il-kuntest u l-għanijiet tal-Artikolu 70(3) tar-Regolament Nru 806/2014, peress li s-SRB ma ppruvax joffri b’mod sħiħ lill-istituzzjonijiet il-possibbiltà li jużaw IPI lil hinn minn dan il-limitu ta’ 15 %. |
329 |
F’dan ir-rigward, kif diġà ġie indikat fil-punt 320 iktar ’il fuq, l-Artikolu 70(3) tar-Regolament Nru 806/2014 jippreċiża li l-parti tal-IPI ma tistax taqbeż il-limitu ta’ 30 % tal-ammont totali tal-kontribuzzjonijiet ex ante kollha mħallsa kull sena. Min-naħa l-oħra, din id-dispożizzjoni ma tipprevedix li s-SRB għandu jiffissa l-parti tal-IPI għal 30 % tat-total tal-obbligi ta’ ħlas tal-istituzzjoni li tagħmel talba għall-użu tagħhom. |
330 |
Barra minn hekk, id-determinazzjoni, mis-SRB, tal-parti tal-IPI mogħtija lill-istituzzjonijiet li jitolbu l-użu tagħhom għandha tkun ibbażata fuq evalwazzjoni konkreta tas-sitwazzjoni tal-imsemmija istituzzjonijiet u ta’ dik tas-SRF, peress li s-SRB għandu wkoll jiżgura li l-użu tal-IPI ma jikkomprometti bl-ebda mod il-kapaċità finanzjarja jew il-likwidità tas-SRF, konformement mal-premessa 16 u mal-Artikolu 7(1) tar-Regolament ta’ Implimentazzjoni 2015/81. |
331 |
Issa, kif jirriżulta, b’mod partikolari, mill-premessa 150 tad-deċiżjoni kkontestata, is-SRB iddeċieda li ma jistabbilixxix il-parti tal-IPI f’livell ogħla minn 15 % tal-ammont tal-kontribuzzjonijiet ex ante abbażi ta’ eżami konkret taċ-ċirkustanzi kollha li huwa qies rilevanti, b’mod partikolari dawk marbuta mal-pandemija tal-COVID‑19, kif ukoll il-konsegwenzi fit-tul li jkollha sejħa għal ammont ogħla tal-IPI fuq is-sitwazzjoni tal-istituzzjonijiet. |
332 |
F’dawn iċ-ċirkustanzi, ir-rikorrenti ma tistax issostni li l-limitazzjoni tal-użu tal-IPI għal 15 % tat-total tal-obbligi ta’ ħlas tal-istituzzjoni li tagħmel talba għal dan tmur kontra l-Artikolu 70(3) tar-Regolament Nru 806/2014. |
333 |
Fit-tieni lok, ir-rikorrenti ssostni, fir-rigward tar-rekwiżit impost mis-SRB li l-garanziji tal-IPI għandhom ikunu kkostitwiti fi flus, li la l-Artikolu 103(3) tad-Direttiva 2014/59 u lanqas l-Artikolu 70(3) tar-Regolament Nru 806/2014 ma jħallu għad-diskrezzjoni tas-SRB l-għażla li jiddefinixxu t-tip ta’ garanzija li l-istituzzjonijiet jistgħu jipprovdu. Għalhekk, is-SRB imur lil hinn mid-dispożizzjonijiet legali li jirregolaw il-kompetenzi tiegħu billi jimponi, bħala prinċipju u b’mod kważi regolatorju, tali tip ta’ garanzija. |
334 |
F’dan ir-rigward, kif ġie kkonstatat fil-punt 326 iktar ’il fuq, mid-dispożizzjonijiet imsemmija fil-punti 320 sa 323 iktar ’il fuq jirriżulta li s-SRB għandu setgħa ta’ evalwazzjoni fir-rigward tal-modalitajiet għall-użu tal-IPI u tan-natura tal-garanziji li għandhom jiġu aċċettati bħala korrispettiv għal dawn tal-aħħar. |
335 |
Huwa minnu li din is-setgħa hija rregolata mir-rekwiżit li dawn il-garanziji għandhom ikunu assi b’riskju baxx mhux ostakolati b’xi drittijiet ta’ terzi, irriżervati għall-użu esklużiv tas-SRB, li bl-ebda mod ma jikkomprometti l-kapaċità finanzjarja jew il-likwidità tas-SRF. |
336 |
Madankollu, ir-rikorrenti ma pproduċiet l-ebda prova quddiem il-Qorti Ġenerali li tista’ turi liema tipi oħra ta’ assi jippreżentaw garanziji komparabbli għall-flus fir-rigward ta’ dawn il-kundizzjonijiet. |
337 |
F’dawn iċ-ċirkustanzi, ir-rikorrenti ma tistax issostni li s-SRB kiser l-Artikolu 103(3) tad-Direttiva 2014/59 u l-Artikolu 70(3) tar-Regolament Nru 806/2014 meta ddefinixxa t-tip ta’ garanzija li l-istituzzjonijiet kellhom jipprovdu fir-rigward tal-IPI. |
338 |
Din il-konklużjoni ma hijiex ikkontestata mill-fatt li s-SRB iġġustifika dan ir-rekwiżit billi rrefera, fil-premessa 152 tad-deċiżjoni kkontestata, għall-IPI diġà kkuntrattati matul il-perijodi ta’ kontribuzzjoni, peress li tali fatt ma għandu l-ebda effett fuq l-allegat żball ta’ liġi. |
339 |
Fit-tielet lok, ir-rikorrenti ssostni li l-limitazzjoni tal-użu tal-IPI ma huwiex trasparenti, peress li s-SRB irrifjuta t-talba ta’ ċerti istituzzjonijiet sabiex tiġi kkomunikata lilhom jew sabiex tiġi ppubblikata d-deċiżjoni tiegħu SRB/ES/2020/71 tas‑16 ta’ Diċembru 2020 li tistabbilixxi l-politika għall-perijodu ta’ kontribuzzjoni 2021 dwar l-IPI (iktar ’il quddiem id-“deċiżjoni li tistabbilixxi l-politika IPI”). |
340 |
F’dan ir-rigward, ir-rikorrenti ma tispjegax b’mod suffiċjenti l-effett ta’ dan il-fatt fuq l-eżami tal-iżball ta’ liġi invokat fil-kuntest ta’ dawn il-motivi. |
341 |
Barra minn hekk, sa fejn dan l-ilment għandu jinftiehem fis-sens li, permezz tiegħu, ir-rikorrenti tikkontesta n-natura suffiċjenti tal-motivazzjoni tad-deċiżjoni kkontestata, għandu jiġi rrilevat li dan l-ilment u s-sitt motiv, ibbażat fuq nuqqas ta’ motivazzjoni tad-deċiżjoni kkontestata dwar l-IPI, jikkoinċidu. Madankollu, waqt is-seduta, ir-rikorrenti rtirat dan il-motiv, billi tat x’tifhem li hija ma kinitx għadha tikkontesta l-motivazzjoni tad-deċiżjoni kkontestata f’dak li kien jirrigwarda l-użu tal-IPI. |
342 |
Fi kwalunkwe każ, is-SRB ipproduċa, bi tweġiba għal miżura istruttorja tal-Qorti Ġenerali tad‑9 ta’ Novembru 2022, id-deċiżjonijiet intermedji li kienu rilevanti għall-kalkolu tal-kontribuzzjonijiet ex ante għall-perijodu ta’ kontribuzzjoni 2021. Dawn id-deċiżjonijiet, li sussegwentement ġew innotifikati lir-rikorrenti fil-verżjoni mhux kunfidenzjali tagħhom, jinkludu, inter alia, id-deċiżjoni li tistabbilixxi l-politika IPI. Barra minn hekk, id-deċiżjoni kkontestata stess tipprovdi, fil-premessi 145 sa 155 tagħha, motivazzjoni dwar l-IPI. |
343 |
Barra minn hekk, ir-rikorrenti ma identifikat l-ebda element li jinsab fid-deċiżjoni li tistabbilixxi l-politika IPI li ma ġiex riprodott fid-deċiżjoni kkontestata nnifisha. |
344 |
Konsegwentement, xejn ma jindika li l-assenza ta’ pubblikazzjoni tad-deċiżjoni li tistabbilixxi l-politika IPI kellha xi effett fuq il-portata tal-informazzjoni li kellha r-rikorrenti sabiex tkun tista’ tivverifika l-legalità tal-użu tal-IPI. |
345 |
Fir-raba’ lok, ir-rikorrenti ssostni li s-SRB wettaq żbalji manifesti ta’ evalwazzjoni fir-rigward tar-riskji ta’ likwidità u ta’ proċikliċità li jirriżultaw mill-użu tal-IPI lil hinn minn 15 % tal-kontribuzzjonijiet ex ante. Fil-fatt, kuntrarjament għall-evalwazzjoni tas-SRB, l-użu tal-IPI kien previst sabiex jittaffew l-effetti proċikliċi li l-kontribuzzjonijiet ex ante setgħu jikkawżaw minħabba l-ammont tagħhom. Għalhekk, fid-dawl tal-kuntest makroekonomiku tal‑2020, l-użu ikbar tal-IPI kien jippermetti li tiġi kkontrobilanċjata ż-żieda ta’ dawn il-kontribuzzjonijiet minħabba ż-żieda tad-depożiti tal-istituzzjonijiet. |
346 |
F’dan ir-rigward, huwa minnu li, għalkemm is-SRB jistabbilixxi l-parti tal-IPI ta’ kull istituzzjoni li titlob l-użu tagħhom f’livell ogħla minn 15 % tat-total tal-obbligi ta’ ħlas tagħha, dan il-livell jista’ jkollu tnaqqis għal żmien qasir għall-istituzzjonijiet inkwistjoni, kif issostni r-rikorrenti, peress li dan inaqqas il-parti tal-kontribuzzjonijiet ex ante tagħhom li għandhom jitħallsu immedjatament fi flus. |
347 |
Madankollu, kif jirrileva essenzjalment is-SRB, mingħajr ma jiġi kontradett fuq dan il-punt, livell ogħla minn 15 % jirriskja li jkollu effetti proċikliċi fit-tul fuq il-pożizzjoni tal-istituzzjonijiet. Fil-fatt, l-Artikolu 7(2) tar-Regolament ta’ Implimentazzjoni 2015/81 jipprevedi li, meta miżura ta’ riżoluzzjoni tinvolvi lis-SRF konformement mal-Artikolu 76 tar-Regolament Nru 806/2014, l-IPI kollha jew parti minnhom jintlabu mis-SRB sabiex is-somom korrispondenti jitħallsu lis-SRF. Minn dan jirriżulta li, f’tali sitwazzjoni, l-istituzzjonijiet li jużaw l-IPI għandhom jimmobilizzaw lil dawn tal-aħħar u jħallsu s-somom korrispondenti, li jwassal għal riskju ta’ telf kbir għalihom, li jkun riskju iktar sinjifikattiv jekk il-parti tal-IPI tkun ġiet stabbilita f’livell għoli. |
348 |
Dan huwa iktar u iktar il-każ peress li d-deċiżjoni kkontestata kienet ġiet adottata f’ċirkustanzi partikolari, li kienu kkaratterizzati mill-inċertezza ekonomika marbuta mal-pandemija tal-COVID‑19. F’dan il-kuntest, l-effetti pprovokati minn kwalunkwe talba għall-IPI fuq il-pożizzjoni tal-istituzzjonijiet setgħu jiġu aggravati iktar, kif jirrileva essenzjalment is-SRB fil-premessi 150, 152 u 153 tad-deċiżjoni kkontestata. |
349 |
F’dawn iċ-ċirkustanzi, is-SRB seta’ jqis li livell ogħla ta’ IPI seta’ jkollu effetti proċikliċi fit-tul għall-istituzzjonijiet billi jżid it-telf tagħhom wara l-ħlas tas-somom korrispondenti lill-IPI fil-kuntest ta’ kwalunkwe miżura ta’ riżoluzzjoni. |
350 |
Għaldaqstant, ir-rikorrenti ma wrietx li s-SRB kien wettaq żball manifest ta’ evalwazzjoni jew użu ħażin ta’ poter jew li kien eċċeda manifestament il-limiti tas-setgħa ta’ evalwazzjoni tiegħu meta ffissa l-parti tal-IPI għal 15 % tal-ammont tal-kontribuzzjonijiet ex ante għall-perijodu ta’ kontribuzzjoni 2021. |
351 |
Din il-konstatazzjoni ma hijiex ikkontestata mis-sentenzi msemmija mir-rikorrenti, jiġifieri s-sentenzi tad‑9 ta’ Settembru 2020, Société générale vs BĊE (T‑143/18, mhux ippubblikata, EU:T:2020:389), tad‑9 ta’ Settembru 2020, Crédit agricole et vs BĊE (T‑144/18, mhux ippubblikata, EU:T:2020:390), tad‑9 ta’ Settembru 2020, Confédération nationale du Crédit mutuel et vs BĊE (T‑145/18, mhux ippubblikata, EU:T:2020:391), tad‑9 ta’ Settembru 2020, BPCE et vs BĊE (T‑146/18, mhux ippubblikata, EU:T:2020:392), tad‑9 ta’ Settembru 2020, Arkéa Direct Bank et vs BĊE (T‑149/18, mhux ippubblikata, EU:T:2020:393), u tad‑9 ta’ Settembru 2020, BNP Paribas vs BĊE (T‑150/18 u T‑345/18, EU:T:2020:394). Dawn is-sentenzi jikkonċernaw deċiżjonijiet tal-BĊE li permezz tagħhom dan tal-aħħar impona li l-ammonti akkumulati tal-IPI sottoskritti lejn is-SRF jew is-SGD jitnaqqsu mill-fondi proprji. F’dawn is-sentenzi, il-qorti tal-Unjoni ma ddeċidiet la dwar id-determinazzjoni mis-SRB tal-livell ta’ użu tal-IPI u lanqas dwar il-garanziji li għandhom jiġu aċċettati bħala korrispettiv. |
352 |
Fil-ħames lok, ir-rikorrenti ssostni li s-SRB ma spjegax kif kien jeżisti riskju ta’ likwidità fil-każ ta’ garanziji esklużivament ikkostitwiti fi flus u ddenominati f’euro. F’dan ir-rigward, il-mudell ta’ ftehim dwar l-IPI jipprevedi mekkaniżmu li jiżgura l-likwidità tajba tas-SRF, peress li jistipula, minn naħa, il-possibbiltà għas-SRB li jaqbad, fi żmien qasir, flus li jikkorrispondi għall-IPI pprovduti bħala garanzija u, min-naħa l-oħra, il-proprjetà sħiħa tas-SRB ta’ dan il-flus kif ukoll il-possibbiltà għal dan tal-aħħar li jiddisponi minnhom liberament fil-każ ta’ nuqqas ta’ ħlas mill-istituzzjoni kkonċernata. |
353 |
Sa fejn dan l-ilment għandu jinftiehem ukoll fis-sens li, permezz tiegħu, ir-rikorrenti tikkontesta n-natura suffiċjenti tal-motivazzjoni tad-deċiżjoni kkontestata fir-rigward tar-riskju ta’ likwidità fil-każ ta’ garanziji esklużivament ikkostitwiti fi flus u ddenominati f’euro, għandu jiġi rrilevat li dan l-ilment u s-sitt motiv, ibbażat fuq nuqqas ta’ motivazzjoni tad-deċiżjoni kkontestata fir-rigward tal-IPI, jikkoinċidu. Issa, kif ġie indikat fil-punt 341 iktar ’il fuq, waqt is-seduta, ir-rikorrenti rtirat dan il-motiv. |
354 |
Barra minn hekk, għalkemm l-argument tar-rikorrenti dwar dan l-ilment kellu jinftiehem fis-sens li din tal-aħħar issostni li s-SRB wettaq żball manifest ta’ evalwazzjoni meta llimita l-parti tal-IPI għal 15 % tal-ammont tal-kontribuzzjonijiet ex ante, filwaqt li tali garanziji huma kkostitwiti esklużivament fi flus u għalhekk ma jippreżentawx riskju ta’ likwidità fir-rigward tal-mudell ta’ ftehim dwar l-IPI, għandu jiġi rrilevat dan li ġej. |
355 |
Minn naħa, minkejja li huwa stabbilit li l-garanziji dwar l-IPI kkostitwiti esklużivament fi flus huma assi b’riskju baxx minħabba l-possibbiltà li dawn jiġu llikwidati fi żmien qasir, dan il-fatt ma jikkontestax il-kunsiderazzjonijiet stabbiliti fil-punti 347 sa 349 iktar ’il fuq, li jgħidu li s-SRB seta’ jqis, fiċ-ċirkustanzi partikolari li jimmarkaw il-perijodu kkonċernat u mingħajr ma jwettaq żball manifest ta’ evalwazzjoni, li rata ta’ IPI ogħla minn 15 % tal-ammont tal-kontribuzzjonijiet ex ante jista’ jkollha effetti proċikliċi fit-tul għall-istituzzjonijiet. |
356 |
Min-naħa l-oħra, ir-rikorrenti tibbaża ruħha b’mod żbaljat fuq il-mudell ta’ ftehim dwar l-IPI sabiex issostni li s-SRB kellu jawtorizza parti tal-IPI ogħla minn 15 % minħabba li dan il-mudell jistipula li s-SRB għandu l-proprjetà sħiħa tal-flus ittrasferiti, b’tali mod li dan il-flus jikkostitwixxi assi b’riskju baxx. |
357 |
Huwa minnu li l-mudell ta’ ftehim dwar l-IPI jipprevedi, fl-Artikolu 3.1 tiegħu, li, sabiex jiġi żgurat il-ħlas sħiħ u fil-ħin tal-obbligi ggarantiti, l-istituzzjoni għandha tikkostitwixxi garanzija fi flus favur is-SRB u tittrasferilu l-proprjetà sħiħa ta’ ammont fi flus li huwa ugwali għall-ammont tal-IPI u, fl-Artikolu 3.5 tiegħu, li s-SRB għandu l-proprjetà sħiħa tal-flus ittrasferiti u li huwa għandu d-dritt li jużah liberament, bla ħsara għall-obbligu li jħallas lura l-ammont korrispondenti tal-garanzija fi flus fil-każ ta’ ħlas tal-obbligi ggarantiti fid-data tal-iskadenza tagħhom. |
358 |
Madankollu, l-Artikoli 2, 5 u 6 tal-mudell ta’ ftehim dwar il-IPI jistabbilixxu proċedura li permezz tagħha s-SRB jitlob il-ħlas tal-IPI kif ukoll il-konsegwenzi għall-istituzzjoni kkonċernata. |
359 |
Fl-Artikoli 2.1 u 2.2 tal-mudell ta’ ftehim dwar il-IPI, huwa previst li s-SRB jibgħat avviż lill-istituzzjoni li jitlob il-ħlas tal-IPI. L-Artikolu 5 tal-istess mudell ta’ ftehim jistipula li, malli jirċievi l-ħlas mitlub, is-SRB għandu jħallas lura ammont ta’ garanzija fi flus li huwa ugwali għall-ammont tal-ħlas mitlub u mħallas. L-Artikolu 6 tal-mudell ta’ ftehim dwar il-IPI jistipula, inter alia, li, fil-każ ta’ nuqqas ta’ ħlas fuq l-ewwel talba mill-istituzzjoni, is-SRB għandu d-dritt li jikkonfiska l-garanzija fi flus sabiex jakkwista l-obbligi ggarantiti u jista’ b’mod partikolari, għal dan l-għan, iwettaq kumpens bejn l-ammont tal-obbligi ggarantiti mħallsa u l-obbligu tiegħu ta’ rimbors tal-garanzija fi flus. |
360 |
Mill-analiżi tal-istipulazzjonijiet tal-mudell ta’ ftehim dwar il-IPI jirriżulta li, minkejja li s-SRB għandu l-proprjetà sħiħa tal-flus li jiggarantixxi l-IPI, huwa jista’ jimmobilizzah, favur is-SRF, biss billi jsegwi proċedura partikolari. |
361 |
F’dawn iċ-ċirkustanzi, is-SRB seta’ jqis, konformement mal-Artikolu 7(1) tar-Regolament ta’ Implimentazzjoni 2015/81, li tali IPI ma kinux jipprovdu l-istess livell ta’ garanzija fir-rigward tal-kapaċità finanzjarja u tal-likwidità tas-SRF bħal ħlas immedjat fi flus. |
362 |
Fis-sitt lok, għalkemm ir-rikorrenti ssostni li s-SRB ma invokax il-possibbiltà li jintużaw tipi oħra ta’ assi minbarra l-flus li xorta waħda jistgħu jitqiesu li għandhom riskju baxx u ma humiex ostakolati b’xi drittijiet ta’ terzi, hija ma speċifikatx liema tipi oħra ta’ assi jkunu jipprovdu garanziji komparabbli għall-flus billi ma jikkompromettux il-kapaċità finanzjarja jew il-likwidità tas-SRF, b’tali mod li dan l-argument għandu jiġi miċħud. |
363 |
F’dawn iċ-ċirkustanzi, ir-rikorrenti ma wrietx li s-SRB kien wettaq żbalji manifesti ta’ evalwazzjoni jew żball ta’ liġi meta kien illimita l-użu tal-IPI għal 15 % tal-ammont tal-kontribuzzjonijiet ex ante dovuti għall-perijodu ta’ kontribuzzjoni 2021 u l-garanziji ppreżentati taħt l-IPI għal flus biss. |
364 |
Konsegwentement, is-seba’ u t-tmien motiv għandhom jiġu miċħuda. |
D. Konklużjoni
365 |
Fid-dawl tal-fondatezza tat-tielet parti tat-tielet motiv u tar-raba’ u tal-ħames motiv sa fejn dawn huma diretti direttament kontra d-deċiżjoni kkontestata, hemm lok li tiġi annullata d-deċiżjoni kkontestata, sa fejn din tikkonċerna lir-rikorrenti. |
E. Fuq il‑limitazzjoni ratione temporis tal‑effetti tas‑sentenza
366 |
Is-SRB jitlob lill-Qorti Ġenerali żżomm, fil-każ ta’ annullament tad-deċiżjoni kkontestata, l-effetti tagħha sas-sostituzzjoni tagħha jew, minn tal-inqas, għal perijodu ta’ sitt xhur mid-data li fiha s-sentenza tkun saret definittiva. |
367 |
Matul is-seduta r-rikorrenti rrilevat li annullament eventwali tad-deċiżjoni kkontestata minħabba illegalità fil-mertu kellu jwassal lis-SRB iħallasha lura l-ammont tal-kontribuzzjoni ex ante tagħha. Barra minn hekk, tali annullament ma jkollu l-ebda impatt la fuq il-funzjonament tas-SRB u lanqas fuq l-istabbiltà finanzjarja tal-Unjoni, peress li s-SRF huwa avvanzat ħafna fil-kostituzzjoni tiegħu. |
368 |
Għandu jitfakkar li, skont it-tieni paragrafu tal-Artikolu 264 TFUE, il-qorti tal-Unjoni tista’, jekk tqis li huwa neċessarju, tindika liema mill-effetti ta’ att annullat għandhom jitqiesu li huma definittivi. |
369 |
F’dan ir-rigward, mill-ġurisprudenza jirriżulta li, fid-dawl ta’ motivi marbuta maċ-ċertezza legali, l-effetti ta’ tali att jistgħu jinżammu fis-seħħ, b’mod partikolari meta l-effetti immedjati tal-annullament tiegħu jkunu jwasslu għal konsegwenzi negattivi serji u meta l-legalità tal-att ikkontestat ma tkunx qiegħda tiġi kkontestata minħabba l-iskop jew il-kontenut tiegħu, iżda minħabba motivi ta’ ksur ta’ rekwiżiti formali essenzjali (ara s-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB, C‑584/20 P u C‑621/20 P, EU:C:2021:601, punt 175 u l-ġurisprudenza ċċitata). |
370 |
F’dan il-każ, id-deċiżjoni kkontestata ttieħdet bi ksur tar-rekwiżiti formali essenzjali. Min-naħa l-oħra, il-Qorti Ġenerali ma kkonstatatx, f’din il-proċedura, żball li jaffettwa l-legalità sostantiva ta’ din id-deċiżjoni. |
371 |
Barra minn hekk, bħalma ddeċidiet il-Qorti tal-Ġustizzja fis-sentenza tal‑15 ta’ Lulju 2021, Il‑Kummissjoni vs Landesbank Baden-Württemberg u SRB (C‑584/20 P u C‑621/20 P, EU:C:2021:601, punt 177), għandu jiġi kkonstatat li l-annullament tad-deċiżjoni kkontestata mingħajr ma tiġi prevista ż-żamma tal-effetti tagħha sakemm tiġi ssostitwita b’att ġdid jista’ jippreġudika l-implimentazzjoni tad-Direttiva 2014/59, tar-Regolament Nru 806/2014 u tar-Regolament Delegat 2015/63, li jikkostitwixxu parti essenzjali tal-unjoni bankarja, li tikkontribwixxi għall-istabbiltà taż-żona tal-euro. |
372 |
F’dawn iċ-ċirkustanzi, hemm lok li l-effetti tad-deċiżjoni kkontestata jinżammu fis-seħħ, sa fejn dawn jikkonċernaw lir-rikorrenti, u dan sad-dħul fis-seħħ, f’terminu raġonevoli li ma jistax jaqbeż sitt xhur mid-data tal-għoti ta’ din is-sentenza, ta’ deċiżjoni ġdida tas-SRB li tistabbilixxi l-kontribuzzjoni ex ante għas-SRF tar-rikorrenti għall-perijodu ta’ kontribuzzjoni 2021. |
Fuq l‑ispejjeż
373 |
Skont l-Artikolu 134(1) tar-Regoli tal-Proċedura tal-Qorti Ġenerali, il-parti li titlef il-kawża għandha tbati l-ispejjeż, jekk dawn ikunu ntalbu. Peress li s-SRB tilef, hemm lok li huwa jiġi kkundannat ibati l-ispejjeż rispettivi tiegħu kif ukoll dawk tar-rikorrenti, skont it-talbiet ta’ din tal-aħħar. |
374 |
Skont l-Artikolu 138(1) tar-Regoli tal-Proċedura, il-Parlament, il-Kunsill u l-Kummissjoni għandhom ibatu l-ispejjeż rispettivi tagħhom. |
Għal dawn il-motivi, IL-QORTI ĠENERALI (It-Tmien Awla Estiża) taqta’ u tiddeċiedi: |
|
|
|
|
Kornezov De Baere Petrlík Kecsmár Kingston Mogħtija f’qorti bil-miftuħ fil-Lussemburgu, fl‑20 ta’ Diċembru 2023. Reġistratur T. Henze Il-President |
Werrej
I. Il‑fatti li wasslu għall‑kawża |
|
II. Id‑deċiżjoni kkontestata |
|
III. It‑talbiet tal‑partijiet |
|
IV. Id‑dritt |
|
A. Fuq l‑eċċezzjonijiet ta’ inammissibbiltà |
|
B. Fuq l‑eċċezzjonijiet ta’ illegalità tar‑Regolament Nru 806/2014, tar‑Regolament Delegat 2015/63, u tar‑Regolament ta’ Implimentazzjoni 2015/81 |
|
1. Fuq l‑ewwel motiv, ibbażat fuq il‑ksur tal‑prinċipju ta’ ugwaljanza fit‑trattament |
|
a) Fuq l‑ewwel u t‑tieni parti, ibbażati fuq l‑assenza ta’ teħid inkunsiderazzjoni tad‑differenzi fis‑sitwazzjoni bejn l‑istituzzjonijiet tal‑unjoni bankarja u tan‑natura inġustifikata tal‑esklużjoni tad‑depożiti koperti mill‑bażi ta’ kalkolu tal‑kontribuzzjoni annwali bażika |
|
1) Fuq l‑ewwel ilment tal‑ewwel parti, ibbażat fuq l‑assenza ta’ teħid inkunsiderazzjoni tad‑differenzi fis‑sitwazzjoni bejn is‑setturi bankarji tal‑Istati Membri parteċipanti, u fuq it‑tieni parti, dwar in‑natura inġustifikata tal‑esklużjoni tad‑depożiti koperti mill‑bażi ta’ kalkolu tal‑kontribuzzjoni annwali bażika |
|
2) Fuq it‑tieni lment tal‑ewwel parti, ibbażat fuq l‑inkoerenza marbuta mal‑assenza ta’ teħid inkunsiderazzjoni tal‑kriterji ta’ evalwazzjoni użati fil‑kuntest tal‑MSU |
|
b) Fuq it‑tielet parti, ibbażata fuq in‑natura inġustifikata tal‑assenza ta’ tnaqqis tal‑impenji eliġibbli li jissodisfaw ir‑rekwiżiti prudenzjali skont il‑MREL |
|
c) Fuq ir‑raba’ parti, ibbażata fuq il‑fatt li l‑kontribuzzjonijiet ex ante ma humiex rappreżentattivi tar‑riskju realment sostnut minħabba l‑kriterji ta’ kalkolu tal‑multiplikatur tal‑aġġustament |
|
1) Fuq l‑ewwel ilment, ibbażat fuq l‑assenza ta’ teħid inkunsiderazzjoni tal‑profil ta’ riskju globali intrinsiku ta’ kull istituzzjoni |
|
2) Fuq it‑tieni lment, ibbażat fuq l‑assenza ta’ evalwazzjoni tal‑fatturi tar‑riskju fid‑dawl tar‑rekwiżiti imposti mill‑awtorità ta’ superviżjoni fil‑kuntest tal‑MSU |
|
3) Fuq it‑tielet ilment, ibbażat fuq l‑impossibbiltà li tittieħed inkunsiderazzjoni b’mod globali kull speċifiċità individwali ta’ kull istituzzjoni |
|
2. Fuq it‑tieni motiv, ibbażat fuq ksur tal‑prinċipju ta’ proporzjonalità |
|
3. Fuq it‑tielet motiv, ibbażat fuq il‑ksur tal‑prinċipju ta’ ċertezza legali |
|
a) Fuq l‑ewwel parti, ibbażata fuq l‑impossibbiltà li jkun magħruf minn qabel il‑livell tal‑kontribuzzjoni ex ante |
|
b) Fuq it‑tieni parti, ibbażata fuq l‑assenza ta’ prevedibbiltà fir‑rigward tal‑applikazzjoni ta’ ċerti indikaturi tar‑riskju |
|
c) Fuq it‑tielet parti, ibbażata fuq il‑modalitajiet ta’ determinazzjoni tar‑“rata ta’ żieda tad‑depożiti koperti” |
|
d) Fuq ir‑raba’ parti, ibbażata fuq il‑ksur tal‑Artikolu 290 TFUE mill‑kriterji ta’ kalkolu ddefiniti mir‑Regolament Delegat 2015/63 |
|
4. Fuq ir‑raba’ u l‑ħames motiv, ibbażati fuq il‑ksur tal‑prinċipju ta’ amministrazzjoni tajba u fuq il‑ksur tal‑prinċipju ta’ protezzjoni ġudizzjarja effettiva, sa fejn jinkludu eċċezzjoni ta’ illegalità |
|
C. Fuq il‑motivi li jirrigwardaw il‑legalità tad‑deċiżjoni kkontestata |
|
1. Fuq il‑motivazzjoni tad‑determinazzjoni tal‑livell annwali fil‑mira |
|
2. Fuq il‑kumplament tar‑raba’ u tal‑ħames motiv, ibbażati fuq il‑ksur tal‑prinċipju ta’ amministrazzjoni tajba u fuq il‑ksur tal‑prinċipju ta’ protezzjoni ġudizzjarja effettiva mis‑SRB fid‑deċiżjoni kkontestata |
|
3. Fuq is‑seba’ u t‑tmien motiv, ibbażati fuq żbalji manifesti ta’ evalwazzjoni u fuq żball ta’ liġi li jirriżultaw mil‑limitazzjonijiet imposti fuq l‑użu tal‑IPI |
|
D. Konklużjoni |
|
E. Fuq il‑limitazzjoni ratione temporis tal‑effetti tas‑sentenza |
|
Fuq l‑ispejjeż |
( *1 ) Lingwa tal-kawża: il-Franċiż.