–

għall-Gvern Sloven, minn N. Pintar Gosenca, bħala aġent,

–

għall-Kummissjoni Ewropea, minn U. Babovič, A. Kraner u M. Salyková, bħala aġenti,

1

It-talba għal deċiżjoni preliminari tirrigwarda l-interpretazzjoni tal-intestatura tariffarja 9401 tan-Nomenklatura Magħquda (iktar ’il quddiem in-“NM”) li tinsab fl-Anness I tar-Regolament tal-Kunsill (KEE) Nru 2658/87 tat‑23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni […] (ĠU Edizzjoni Speċjali bil-Malti, Kapitolu 2, Vol. 2, p. 382), fil-verżjonijiet tiegħu li jirriżultaw mir-Regolament ta’ Implimentazzjoni tal-Kummissjoni (UE) Nru 1101/2014 tas‑16 ta’ Ottubru 2014 (ĠU 2014, L 312, p. 1), tar-Regolament ta’ Implimentazzjoni tal-Kummissjoni (UE) 2015/1754 tas‑6 ta’ Ottubru 2015 (ĠU 2015, L 285, p. 1, rettifika fil-ĠU 2015, L 288, p. 16), u tar-Regolament ta’ Implimentazzjoni tal-Kummissjoni (UE) 2016/1821 tas‑6 ta’ Ottubru 2016 (ĠU 2016, L 294, p. 1, rettifiki fil-ĠU 2016, L 329, p. 119 u fil-ĠU 2017, L 150, p. 19).

2

Din it-talba tressqet fil-kuntest ta’ kawża bejn SOMEO S.A. u r-Republika Slovenija, irrappreżentata mill-Ministrstvo za finance (il-Ministeru għall-Finanzi, is-Slovenja), dwar il-klassifikazzjoni tariffarja fis-subintestatura 94019080 tan-NM ta’ merkanzija importata minn din il-kumpannija fis-Slovenja u ddikjarata bħala partijiet ta’ sits għal vetturi bil-mutur.

3

Is-sistema armonizzata għad-deskrizzjoni u l-kodifikazzjoni ta’ merkanzija (iktar ’il quddiem is-“SA”) twaqqfet mill-Konvenzjoni Internazzjonali dwar is-sistema armonizzata għad-deskrizzjoni u kodifikazzjoni ta’ merkanzija, konkluża fi Brussell fl‑14 ta’ Ġunju 1983, fil-kuntest tal-Organizzazzjoni Dinjija tad-Dwana (WCO), u approvata, flimkien mal-Protokoll ta’ Emenda tagħha tal‑24 ta’ Ġunju 1986, f’isem il-Komunità Ekonomika Ewropea, bid-Deċiżjoni tal-Kunsill 87/369/KEE tas‑7 ta’ April 1987 (ĠU Edizzjoni Speċjali bil-Malti, Kapitolu 2, Vol. 2, p. 288). In-noti ta’ spjega tas-SA ġew elaborati fi ħdan il-WCO, skont id-dispożizzjonijiet ta’ din il-konvenzjoni.

4

Skont il-punt 2 tal-Artikolu 3(1)(a) tal-imsemmija konvenzjoni, kull parti kontraenti tintrabat li tapplika r-regoli ġenerali għall-interpretazzjoni tas-SA kif ukoll in-noti kollha tat-taqsimiet, tal-kapitoli u tas-subintestaturi u li ma jbiddlux il-portata tat-taqsimiet, tal-kapitoli, tal-intestaturi jew tas-subintestaturi tas-SA.

5

In-noti ta’ spjega tas-SA, fil-verżjoni tagħhom tal‑2012, jgħidu, għal dak li jirrigwarda l-Kapitolu 94 tagħha, “għamara; għamara mediko-kirurġika; friex, imtieraħ, irfid għal imtieraħ, kuxxini u tagħmir (furnishing) simili mimli; lampi u tagħmir (fittings) tad-dawl, mhux speċifikati jew inklużi band’oħra; sinjali mdawlin, pjanċi tal-ismijiet imdawlin u simili; bini prefabbrikat” [traduzzjoni mhux uffiċjali]:

“1. Dan il-kapitolu ma jinkludix:

[…]

[…]

KUNSIDERAZZJONIJIET ĠENERALI

Dan il-kapitolu jinkludi, bla ħsara għall-eċċezzjonijiet imsemmija fin-noti ta’ spjega ta’ dan il-kapitolu:

1) L-għamara kollha, kif ukoll il-partijiet tagħhom (intestaturi 94.01 sa 94.03).

[…]

PARTIJIET

Dan il-kapitolu jkopri biss il-partijiet tal-prodotti tal-intestaturi 94.01 sa 94.03 u 94.05. Huma kkunsidrati bħala tali l-oġġetti, anki jekk ikunu għadhom fi stadju ta’ tfassil li, minħabba l-forma tagħhom jew karatteristiċi oħra, huma identifikabbli bħala li huma kkonċepiti esklużivament jew prinċipalment għal oġġett taħt dawn l-intestaturi u li ma jissemmewx b’mod iktar speċifiku band’oħra.

[…]”

6

Fir-rigward tal-intestatura 9401, intitolata “Sits (seats) (ħlief dawk tal-intestatura 94.02), kemm jekk jinbidlu f’sodod jew le, u partijiet tagħhom”, dawn in-noti ta’ spjega jippreċiżaw, fir-rigward tal-kunċett ta’ “partijiet”, fis-sens ta’ din l-intestatura, li:

“Din l-intestatura tkopri wkoll il-partijiet ta’ sits identifikabbli bħala tali u, b’mod partikolari, id-dahar, il-qiegħ u l-partijiet għas-serħan tad-dirgħajn (armrests), kemm jekk miksija bit-tiben jew bil-qasab, ikkuttunati jew bil-molol, kif ukoll l-assemblaġġi ta’ molol spirali użati għat-tapizzerija tal-imsemmija sits.

[…]”

7

Għal dak li jirrigwarda dan il-kunċett, in-noti ta’ spjega tas-SA, fil-verżjoni tagħhom tal‑2017, jipprovdu li dan ikopri, barra minn hekk, “għata intiżi sabiex jitwaħħlu b’mod permanenti mas-sits jew mad-dahar tas-sits”.

8

Hekk kif jirriżulta mill-Artikolu 1(1) tar-Regolament Nru 2658/87, kif emendat bir-Regolament tal-Kunsill (KE) Nru 254/2000 tal‑31 ta’ Jannar 2000 (ĠU Edizzjoni Speċjali bil-Malti, Kapitolu 2, Vol. 9, p. 357), in-NM, stabbilita mill-Kummissjoni Ewropea, tirregola l-klassifikazzjoni tariffarja tal-merkanzija importata fl-Unjoni Ewropea. Skont l-Artikolu 3(1) tar-Regolament Nru 2658/87, in-NM tirriproduċi l-intestaturi u s-subintestaturi b’sitt ċifri tas-SA, u huma biss is-seba’ u t-tmien ċifra li joħolqu subdiviżjonijiet li huma speċifiċi għaliha.

9

Skont l-Artikolu 12(1) tar-Regolament Nru 2658/87, il-Kummissjoni għandha tadotta, kull sena, regolament li jirriproduċi l-verżjoni kompleta tan-NM, flimkien mar-rati tad-dazji doganali komuni skont l-Artikolu 1, kif jirriżulta minn miżuri adottati mill-Kunsill tal-Unjoni Ewropea jew mill-Kummissjoni. Dan l-aħħar regolament għandu jiġi ppubblikat f’Il-Ġurnal Uffiċjali tal-Unjoni Ewropea mhux iktar tard mill‑31 ta’ Ottubru u għandu japplika mill‑1 ta’ Jannar tas-sena ta’ wara.

10

Ir-Regolamenti ta’ Implimentazzjoni Nri 1101/2014, 2015/1754 u 2016/1821 ġew adottati abbażi ta’ din id-dispożizzjoni. Kull wieħed minn dawn ir-regolamenti ta’ implimentazzjoni emenda n-NM mill‑1 ta’ Jannar 2015, mill‑1 ta’ Jannar 2016 u mill‑1 ta’ Jannar 2017 rispettivament. Il-formulazzjoni tad-dispożizzjonijiet ta’ din in-nomenklatura rilevanti għall-kawża prinċipali madankollu baqgħet l-istess.

11

Skont ir-regoli ġenerali għall-interpretazzjoni tan-NM, li jinsabu fit-Titolu A tat-Taqsima I tal-ewwel parti tal-Anness I, fil-verżjonijiet tagħha li jirriżultaw minn kull wieħed mill-imsemmija regolamenti ta’ implimentazzjoni:

“Il-klassifikazzjoni ta’ oġġetti fin-[NM] għandha tkun irregolata mill-prinċipji li ġejjin:

[…]

[…]”

12

It-tieni parti ta’ dan l-Anness I, intitolata “Skeda ta’ dazji tad-dwana”, tinkludi t-Taqsima VII, intitolata “Plastik u oġġetti tiegħu; gomma u oġġetti tagħha”. Din it-taqsima fiha l-Kapitolu 39, intitolat “Plastiks u oġġetti tagħhom”. Skont in-nota 2(x) ta’ dan il-kapitolu, dan tal-aħħar ma jinkludix l-“oġġetti ta’ Kapitlu 94 (per eżempju, għamara, lampi u tagħmir tad-dawl, sinjali mdawlin, bini prefabbrikat)”.

13

Din it-tieni parti tinkludi, barra minn hekk, it-Taqsima XI, intitolata “Tessuti u oġġetti ta’ tessuti”. Skont in-nota 1(s) ta’ din it-taqsima, din tal-aħħar ma tinkludix l-“oġġetti ta’ Kapitlu 94 (per eżempju, għamara, friex, lampi u tagħmir (fittings) tad-dawl)”. L-imsemmija taqsima tinkludi l-Kapitolu 63, intitolat “Oġġetti oħrajn manifatturati ta’ tessuti; settijiet; ħwejjeġ li jintlibsu u oġġetti ta’ tessuti li jintlibsu; ċraret”. Skont in-nota 1 ta’ dan il-Kapitolu 63, is-Subkapitolu I tiegħu, intitolat “Oġġetti oħrajn manifatturati ta’ tessuti”, “japplika biss għal oġġetti manifatturati, ta’ kull drapp ta’ tessuti”.

14

L-imsemmija tieni parti tinkludi wkoll it-Taqsima XX, intitolata “Oġġetti manifatturati varji”, li fiha l-Kapitolu 94, li huwa intitolat “Għamara; [għamara mediko-kirurġika;] friex, mtieraħ, irfid għal imtieraħ, kuxxini u tagħmir (furnishing)simili mimli; lampi u tagħmir (fittings) tad-dawl mhux speċifikati jew inklużi band’ oħra; sinjali mdawwlin, pjanċi ta’ l-ismijiet imdawwlin u simili; bini prefabbrikat”.

15

In-noti 1 u 3 ta’ dan il-kapitolu jgħidu li:

[…]

16

L-imsemmi Kapitolu 94 jinkludi b’mod partikolari l-intestatura 9401, ifformulata kif ġej:

17

Bejn ix-xahar ta’ Awwissu 2015 u x-xahar ta’ Ġunju 2017, ir-rikorrenti fil-kawża prinċipali ddikjarat, taħt is-subintestatura 94019080 tan-NM, l-oġġetti “xibka għall-fabrikazzjoni ta’ kompartimenti mqiegħda fuq in-naħa ta’ wara tas-sits – Bend and net”) (iktar ’il quddiem “xibka għall-fabrikazzjoni ta’ kompartimenti”) u “protezzjoni għas-sits – Skirt Assy” (iktar ’il quddiem “protezzjoni għas-sits”), ikklassifikati bħala partijiet ta’ sits għal vetturi bil-mutur, għall-finijiet tar-rilaxx tagħhom għal ċirkulazzjoni libera.

18

Wara verifika a posteriori tad-dikjarazzjonijiet inkwistjoni, l-awtorità fiskali tal-ewwel istanza qieset li din il-merkanzija ma kellhiex tiġi kklassifikata taħt is-subintestatura 94019080 tan-NM u, permezz ta’ deċiżjoni tat‑13 ta’ Lulju 2018, ordnat lir-rikorrenti fil-kawża prinċipali tħallas ammont ta’ EUR 298 810.52, bħala dazji doganali fuq l-imsemmija merkanzija, flimkien mal-interessi moratorji. Skont din l-awtorità, il-prodott “xibka għall-fabrikazzjoni ta’ kompartimenti” kellu jiġi kklassifikat taħt is-subintestatura 63079010 tan-NM, li jikkonċerna oġġetti oħra tal-maljerija, u l-prodott “protezzjoni għas-sits”, taħt is-subintestatura 39269097 tan-NM, li jikkonċerna oġġetti oħra tal-plastik, peress li dawn il-prodotti ma setgħux jitqiesu li huma partijiet ta’ sits għall-vetturi bil-mutur u kellhom jiġu kklassifikati bħala aċċessorji.

19

Il-Ministeru għall-Finanzi, bħala awtorità fiskali tat-tieni istanza, ċaħad bħala infondat ir-rikors tar-rikorrenti fil-kawża prinċipali kontra din id-deċiżjoni. Huwa ppreċiża li l-intestatura 9401 tan-NM, li tinkludi partijiet ta’ sits, ma kinitx tapplika għal aċċessorji, bħall-imsemmija prodotti. Fil-fatt, fil-fehma tiegħu, minn naħa, il-protezzjoni għas-sits ma tikkostitwixxix element ta’ appoġġ li mingħajru sit ma jkunx jista’ jissodisfa l-funzjoni essenzjali u prinċipali tiegħu u, min-naħa l-oħra, ix-xibka għall-fabrikazzjoni ta’ kompartimenti, li titwaħħal mal-protezzjoni tal-plastik fuq in-naħa ta’ wara tas-sit ta’ vettura, għandha biss funzjoni aċċessorja ta’ ħżin ta’ oġġetti żgħar, b’tali mod li, mingħajr din ix-xibka, sit iżomm il-funzjonijiet prinċipali kollha tiegħu.

20

Permezz ta’ sentenza tat‑23 ta’ Ġunju 2020, l-Upravno sodišče (il-Qorti Amministrattiva, is-Slovenja) ikkonfermat il-klassifikazzjoni tariffarja magħmula mill-awtoritajiet fiskali. Din il-qorti qieset b’mod partikolari li l-fatt li merkanzija tkun intiża esklużivament għal mudell speċifiku ta’ magna jew ta’ oġġett ma huwiex determinanti għall-finijiet tal-klassifikazzjoni ta’ din il-merkanzija bħala “parti” jew “aċċessorju”.

21

Ir-rikorrenti fil-kawża prinċipali ppreżentat appell għal Reviżjoni minn din id-deċiżjoni quddiem il-qorti tar-rinviju. Hija ssostni li l-prodotti inkwistjoni fil-kawża prinċipali kellhom jiġu kklassifikati taħt is-subintestatura 94019080 tan-NM, għar-raġuni li protezzjoni għas-sits ma hijiex prodott li jista’ jintuża b’mod ġenerali u lanqas prodott simili għal oġġett ieħor tal-plastik li jaqa’ taħt il-Kapitolu 39 tan-NM. Barra minn hekk, xibka għall-fabrikazzjoni ta’ kompartimenti ma hijiex prodott tat-tessut li jaqa’ taħt il-Kapitolu 63 tan-NM. Skont ir-rikorrenti fil-kawża prinċipali, dawn iż-żewġ prodotti jintużaw esklużivament għas-sits tal-karozzi u, jekk ma jitwaħħlux magħhom, ma għandhomx użu awtonomu. Hija ssostni wkoll li, mingħajr l-assemblaġġ ta’ protezzjoni għas-sits, ikun impossibbli li dawn jintużaw, peress li din ma hijiex aċċessorju estetiku jew sostitwibbli, iżda għandha funzjonalità addizzjonali tas-sit, jiġifieri t-tisħiħ u l-protezzjoni tal-istruttura stess tiegħu, li hija essenzjali mill-perspettiva tas-sigurtà. Bl-istess mod, ix-xibka għall-fabrikazzjoni ta’ kompartimenti ma hijiex aċċessorju estetiku jew sostitwibbli ta’ sit, iżda għandha funzjonalità addizzjonali, jiġifieri dik ta’ appoġġ u ta’ protezzjoni.

22

Permezz ta’ digriet tat‑18 ta’ Novembru 2020, il-qorti tar-rinviju awtorizzat ir-Reviżjoni tal-imsemmija deċiżjoni.

23

Għal dak li jirrigwarda l-prodott “xibka għall-fabrikazzjoni ta’ kompartimenti”, din il-qorti tosserva li dan il-prodott huwa fil-forma ta’ xibka elastika magħmula minn maljerija, b’kejl ta’ 30 x 20 ċm, magħmula minn ħjut tal-filament sintetiku, bil-kulur iswed, b’ċinga tal-plastik meħjuta b’mod lonġitudinali fuq naħa waħda li permezz tagħha titwaħħal mad-dahar tas-sit ta’ vettura bil-mutur. Fir-rigward tal-prodott “protezzjoni għas-sits”, l-imsemmija qorti tindika li dan huwa magħmul mill-plastik u huwa miksi bil-pannu u li jitwaħħal mad-dahar u taħt is-sit ta’ vettura bil-mutur sabiex jipproteġi l-parti ta’ ġewwa.

24

Skont l-istess qorti, il-klassifikazzjoni tal-prodotti inkwistjoni fil-kawża prinċipali fin-NM tiddependi mill-interpretazzjoni tal-kunċett ta’ “partijiet”, imsemmi fl-intestatura 9401 tan-NM, u għalhekk mill-interpretazzjoni tad-dritt tal-Unjoni. F’dan ir-rigward, il-qorti tar-rinviju tistaqsi dwar jekk dan il-kunċett għandux l-istess portata bħal dak imsemmi f’kapitoli oħra tan-NM li diġà kien is-suġġett tal-interpretazzjoni mill-Qorti tal-Ġustizzja, li jikkostitwixxi parti mis-sit biss prodott li mingħajru s-sit ma jkunx jista’ jeżerċita l-funzjoni essenzjali u prinċipali tiegħu jikkostitwixxi parti mis-sit. F’dan il-kuntest, il-qorti tar-rinviju tosserva li interpretazzjoni iktar wiesgħa tal-kunċett ta’ “partijiet” fis-sens tal-Kapitolu 94 tan-NM minn dik li tirriżulta mill-ġurisprudenza tal-Qorti tal-Ġustizzja tista’ tirriżulta min-noti ta’ spjega tas-SA.

25

F’dawn iċ-ċirkustanzi, il-Vrhovno sodišče (il-Qorti Suprema, is-Slovenja) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

26

Permezz tal-ewwel domanda tagħha, il-qorti tar-rinviju tistaqsi, essenzjalment, jekk l-intestatura 9401 tan-NM għandhiex tiġi interpretata fis-sens li l-kunċett ta’ “partijiet” ta’ sit ta’ vettura bil-mutur ikopri merkanzija li ma hijiex indispensabbli sabiex tali sit ikun jista’ jaqdi l-funzjoni tiegħu.

27

Preliminarjament, għandu jitfakkar li, meta l-Qorti tal-Ġustizzja tiġi adita b’rinviju għal deċiżjoni preliminari dwar il-klassifikazzjoni tariffarja, ir-rwol tagħha huwa li tagħti kjarifika lill-qorti tar-rinviju dwar il-kriterji li permezz tagħhom il-qorti tar-rinviju tkun tista’ tikklassifika b’mod korrett il-prodotti kkonċernati fin-NM iktar milli li tikklassifikahom hija stess. Din il-klassifikazzjoni tirriżulta minn evalwazzjoni purament fattwali li ma huwiex kompitu tal-Qorti tal-Ġustizzja li twettaq fil-kuntest ta’ rinviju għal deċiżjoni preliminari (sentenza tal‑20 ta’ Ottubru 2022, Mikrotīkls, C‑542/21, EU:C:2022:814, punt 21 u l-ġurisprudenza ċċitata).

28

Għandu jitfakkar ukoll li, skont ir-regola ġenerali 1 għall-interpretazzjoni tan-NM, il-klassifikazzjoni tariffarja tal-merkanzija għandha tiġi ddeterminata skont it-termini tal-intestaturi u tan-noti tat-taqsimiet jew tal-kapitoli ta’ din in-nomenklatura. Fl-interess taċ-ċertezza legali u tal-faċilità tal-kontrolli, il-kriterju deċiżiv għall-klassifikazzjoni tariffarja ta’ din il-merkanzija għandu jinstab, b’mod ġenerali, fil-karatteristiċi u fil-kwalitajiet oġġettivi tagħha, kif iddefiniti mill-formulazzjoni tal-intestatura inkwistjoni tal-imsemmija nomenklatura u tan-noti tat-taqsimiet jew tal-kapitoli korrispondenti (sentenza tal‑20 ta’ Ottubru 2022, Mikrotīkls, C‑542/21, EU:C:2022:814, punt 22 u l-ġurisprudenza ċċitata).

29

Barra minn hekk, il-Qorti tal-Ġustizzja ddeċidiet ripetutament li, għalkemm in-noti ta’ spjega tas-SA u tan-NM ma għandhomx saħħa vinkolanti, huma jikkostitwixxu strumenti importanti sabiex tiġi żgurata applikazzjoni uniformi tat-tariffa doganali komuni u jipprovdu, bħala tali, elementi validi għall-interpretazzjoni tagħha (sentenza tal‑20 ta’ Ottubru 2022, Mikrotīkls, C‑542/21, EU:C:2022:814, punt 23 u l-ġurisprudenza ċċitata).

30

Għal dak li jirrigwarda l-intestatura 9401 tan-NM, għandu jiġi kkonstatat li l-formulazzjoni tagħha tinkludi sits u partijiet tagħhom. Dawn tal-aħħar jaqgħu taħt is-subintestatura 940190, intitolata “partijiet”, u huma kklassifikati f’waħda mit-tliet subintestaturi speċifiċi bi tmien ċifri previsti għal dan il-għan. Għandu jiġi kkonstatat ukoll li l-merkanzija inkwistjoni fil-kawża prinċipali, jiġifieri x-“xibka għall-fabrikazzjoni ta’ kompartimenti” u l-“protezzjoni għas-sits”, ma jissemmew fl-ebda waħda minn dawn is-subintestaturi bi tmien ċifri.

31

In-NM ma tiddefinixxix il-kunċett ta’ “partijiet” fis-sens tal-intestatura 9401 tan-NM. Għandu jiġi osservat ukoll li n-nota 3(A) tal-Kapitolu 94 tan-NM, li tikkonċerna folji u ċangaturi ta’ ħġieġ, irħam jew ġebel ieħor jew ta’ xi materjal ieħor imsemmi fil-Kapitoli 68 jew 69 tan-NM, jiġifieri prodotti għajr dawk inkwistjoni fil-kawża prinċipali, ma tippermettix li jinsiltu indikazzjonijiet utli għal dak li jirrigwarda l-interpretazzjoni ta’ dan il-kunċett. Barra minn hekk, in-noti ta’ spjega tan-NM rilevanti fil-kuntest tal-kawża prinċipali, li ġew adottati mill-Kummissjoni skont l-Artikolu 9(1)(a) tar-Regolament Nru 2658/87 u ppubblikati f’Il-Ġurnal Uffiċjali tal-Unjoni Ewropea tal‑4 ta’ Marzu 2015 (ĠU 2015, C 76, p. 1), ma jinkludu ebda preċiżazzjoni dwar l-imsemmi kunċett.

32

In-noti ta’ spjega tas-SA, fil-verżjoni tagħhom tal‑2012, jipprovdu li l-Kapitolu 94 ikopri biss il-partijiet tal-prodotti msemmija fl-intestaturi 9401 sa 9403 u 9405 u li jitqiesu bħala tali l-oġġetti, anki jekk ikunu għadhom fi stadju ta’ tfassil li, minħabba l-forma tagħhom jew karatteristiċi oħra, huma identifikabbli bħala li huma kkonċepiti esklużivament jew prinċipalment għal oġġett taħt dawn l-intestaturi u li ma jissemmewx b’mod iktar speċifiku band’oħra. Barra minn hekk, minn dawn in-noti jirriżulta li l-intestatura 9401 tkopri l-partijiet ta’ sits identifikabbli bħala tali u, b’mod partikolari, id-dahar, il-qiegħ u l-partijiet għas-serħan tad-dirgħajn, kif ukoll l-assemblaġġi ta’ molol spirali użati għat-tapizzerija ta’ dawn is-sits. In-noti ta’ spjega tas-SA, fil-verżjoni tagħhom tal‑2017, jippreċiżaw li l-għata intiżi sabiex jitwaħħlu b’mod permanenti mas-sits jew mad-dahar tas-sits huma koperti wkoll minn din l-intestatura 9401 bħala “partijiet” ta’ sits.

33

Mill-ġurisprudenza tal-Qorti tal-Ġustizzja, żviluppata fil-kuntest tal-Kapitoli 84 u 85 tat-Taqsima XVI u tal-Kapitolu 90 tat-Taqsima XVIII tan-NM, jirriżulta li l-kunċett ta’ “partijiet” jimplika l-preżenza ta’ unità li dawn il-partijiet ikunu indispensabbli għall-funzjonament tagħha. Minn din il-ġurisprudenza jirriżulta li, sabiex oġġett ikun jista’ jiġi kklassifikat bħala “partijiet”, fis-sens ta’ dawn il-kapitoli, ma huwiex biżżejjed li jintwera li, mingħajr dan l-oġġett, il-magna jew l-apparat ma jkunx f’pożizzjoni li jissodisfa l-bżonnijiet li huwa intiż għalihom. Għandu jiġi stabbilit ukoll li l-funzjonament mekkaniku jew elettriku tal-magna jew tal-apparat inkwistjoni huwa kkundizzjonat mill-imsemmi oġġett (sentenza tat‑8 ta’ Diċembru 2016, Lemnis Lighting, C‑600/15, EU:C:2016:937, punt 48 u l-ġurisprudenza ċċitata).

34

Il-Qorti tal-Ġustizzja ddeċidiet ukoll li, fl-interess tal-applikazzjoni koerenti u uniformi tat-tariffa doganali komuni, il-kunċett ta’ “partijiet” imsemmi f’kapitolu partikolari tan-NM għandu jingħata l-istess definizzjoni bħal dik li tirriżulta mill-ġurisprudenza dwar kapitoli oħra tan-NM (ara, f’dan is-sens, is-sentenzi tat‑12 ta’ Diċembru 2013, HARK, C‑450/12, EU:C:2013:824, punt 37; tat‑8 ta’ Diċembru 2016, Lemnis Lighting, C‑600/15, EU:C:2016:937, punt 52, u tal‑15 ta’ Mejju 2019, Korado, C‑306/18, EU:C:2019:414, punt 44).

35

Barra minn hekk, il-Qorti tal-Ġustizzja diġà kellha l-okkażjoni tippreċiża li din id-definizzjoni tal-kunċett ta’ “partijiet” tapplika wkoll fil-kuntest tal-Kapitolu 94 tan-NM. Għalhekk, il-Qorti tal-Ġustizzja ddeċidiet li l-kunċett ta’ “partijiet” ta’ tagħmir tad-dawl, fis-sens tal-intestatura 9405 tan-NM, ma jkoprix merkanzija li ma hijiex indispensabbli għall-funzjonament ta’ dan it-tagħmir (ara, f’dan is-sens, is-sentenza tat‑8 ta’ Diċembru 2016, Lemnis Lighting, C‑600/15, EU:C:2016:937, punti 51 sa 53).

36

L-istess japplika għal dak li jirrigwarda l-“partijiet” ta’ sits, fis-sens tal-intestatura 9401 tan-NM.

37

Għaldaqstant, merkanzija ma tistax titqies li hija “partijiet” ta’ sits, fis-sens ta’ din l-intestatura, ħlief bil-kundizzjoni li tkun indispensabbli sabiex is-sits inkwistjoni jkunu jistgħu jwettqu l-funzjoni tagħhom.

38

Il-fatt imsemmi mill-qorti tar-rinviju li min-noti ta’ spjega tas-SA dwar l-intestatura 9401 tagħha jirriżulta li din l-intestatura tkopri wkoll il-partijiet għas-serħan tad-dirgħajn ma tikkontestax il-konklużjoni stabbilita fil-punt preċedenti. Fil-fatt, kif tenfasizza l-Kummissjoni fl-osservazzjonijiet bil-miktub tagħha, sit jista’ jiġi ddisinjat b’diversi modi u jinkludi, bħala prinċipju, mhux biss parti li fuqha l-persuna tkun fil-fatt bilqiegħda, iżda wkoll dahar jew partijiet għas-serħan tad-dirgħajn li jsostnu d-dahar jew id-dirgħajn tal-persuna bilqiegħda fuq dan is-sit. Tali elementi huma għalhekk partijiet integrali ta’ sit iddinsinjat speċifikament u jikkostitwixxu, għalhekk, element essenzjali tal-istruttura tiegħu. Għaldaqstant, dawn l-elementi jsiru indispensabbli sabiex tali sit ikun jista’ jissodisfa l-funzjoni tiegħu. Dan japplika wkoll għall-għata intiżi sabiex jitwaħħlu b’mod permanenti mas-sits jew mad-dahar tas-sits, li jissemmew espressament fin-noti ta’ spjega tas-SA, fil-verżjoni tagħhom tal‑2017, bħala “partijiet” ta’ sits, fis-sens tal-imsemmija intestatura.

39

F’dan il-każ, mill-konstatazzjonijiet fattwali magħmula mill-qorti tar-rinviju ma jirriżultax li l-merkanzija inkwistjoni fil-kawża prinċipali hija indispensabbli sabiex sit ta’ vettura bil-mutur ikun jista’ jissodisfa l-funzjoni tiegħu, fatt li madankollu għandu jiġi vverifikat minn dik il-qorti. Wara din il-verifika u fid-dawl tal-karatteristiċi oġġettivi ta’ din il-merkanzija, hija l-imsemmija qorti li għandha tipproċedi għall-klassifikazzjoni tariffarja tagħha.

40

F’dawn iċ-ċirkustanzi, ir-risposta li għandha tingħata għall-ewwel domanda hija li l-intestatura 9401 tan-NM għandha tiġi interpretata fis-sens li l-kunċett ta’ “partijiet” ta’ sit ta’ vettura bil-mutur ma jkoprix merkanzija li ma hijiex indispensabbli sabiex tali sit ikun jista’ jaqdi l-funzjoni tiegħu.

41

Fid-dawl tar-risposta mogħtija għall-ewwel domanda, ma hemmx lok li tingħata risposta għat-tieni domanda.

42

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas‑sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (L-Għaxar Awla) taqta’ u tiddeċiedi:

L-intestatura 9401 tan-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87 tat‑23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni […], fil-verżjonijiet tiegħu li jirriżultaw mir-Regolament ta’ Implimentazzjoni tal-Kummissjoni (UE) Nru 1101/2014 tas‑16 ta’ Ottubru 2014, tar-Regolament ta’ Implimentazzjoni tal-Kummissjoni (UE) 2015/1754 tas‑6 ta’ Ottubru 2015, u tar-Regolament ta’ Implimentazzjoni tal-Kummissjoni (UE) 2016/1821 tas‑6 ta’ Ottubru 2016,

għandha tiġi interpretata fis-sens li:

il-kunċett ta’ “partijiet” ta’ sit ta’ vettura bil-mutur ma jkoprix merkanzija li ma hijiex indispensabbli sabiex tali sit ikun jista’ jaqdi l-funzjoni tiegħu.